Գործ թիվ ԵԷԴ/0126/01/11
2011թ.

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղարությամբ Արմինե Արղամանյան
Մասնակցությամբ`
Մեղադրող Ալեքսան Մուրադյան
Ամբաստանյալ Աշոտ Հովհաննիսյան
Ամբաստանյալի պաշտպան Վարդան Գրիգորյան

2011թվականի հոկտեմբերի 05-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում, արագացված դատական քննության կարգի կիրառմամբ քննեց քրեական գործն ըստ մեղադրանքի
Աշոտ Ռազմիկի Հովհաննիսյանի ծնված 05.12.1965թ. Երևան քաղաքում, ազգությունը հայ, Հայաստանի Հանրապետության քաղաքացի, միջնակարգ կրթությամբ, ամուսնացած, խնամքին անչափահաս երկու երեխա, ծնված 24.02.1996թ. և 15.10.1998թ., չի աշխատել, նախկինում դատված Արարատի և Վայոց Ձորի մարզերի ընդհանուր իրավասության դատարանի 09.11.2009թ. դատավճռով ՀՀ քրեական օրենսգրքի 268-րդ հոդվածի 2-րդ մասով, 266-րդ հոդվածի 4-րդ մասով, քրեական օրենսգրքի 66-րդ հոդվածի կիրառմամբ ազատազրկման 2 /երկու/ տարի ժամկետով և տուգանքով 200.000 ՀՀ դրամի չափով, ՀՀ վերաքննիչ քրեական դատարանի 02.02.2010թ. ԱՎԴ/0045/1/09 որոշմամբ Աշոտ Ռազմիկի Հովհաննիսյանը մեղավոր է ճանաչվել ՀՀ քրեական օրենսգրքի 268-րդ հոդվածի 2-րդ մասի 1-ին և 2-րդ կետերով և 266-րդ հոդվածի 4-րդ մասով և ՀՀ քրեական օրենսգրքի 66-րդ հոդվածի կիրառմամբ դատապարտվել է ազատազրկման 1 /մեկ/ տարի ժամկետով և տուգանքով 200.000 ՀՀ դրամ գումարի չափով։
Կալանքի տակ է 19.11.2010 թվականից Ավան և Նոր-Նորք վարչական շրջանների ընդհանուր իրավասության դատարանի որոշմամբ, նշված գործով դեռևս դատական ակտ չի կայացվել, բն. Երևան, Ավան, 3-րդ փող. 13 տուն, սույն քրեական գործով խափանման միջոց չի կիրառվել, մեղադրվում է ՀՀ քրեական օրենսգրքի 34-268-րդ հոդվածի 2-րդ մասի 2-րդ կետով։
Առաջադրված մեղադրանքում իրեն լիովին մեղավոր է ճանաչել։

1. Գործի դատավարական նախապատմությունը
Ամբաստանյալ Աշոտ Ռազմիկի Հովհաննիսյանի նկատմամբ Երևանի Ավան և Նոր-Նորք վարչական շրջանների ընդհանուր իրավասության դատարանի 22.11.2010թ. որոշմամբ որպես խափանման միջոց կիրառվել է կալանավորումը, մեղադրվել է ՀՀ քրեական օրենսգրքի 266-րդ հոդվածի 2-րդ մասի 2 և 2.1 կետերով և 266-րդ հոդվածի 4-րդ մասով, ՀՀ ԱՆ «Նուբարաշեն» ՔԿ հիմնարկի կալանավոր է, գտնվել է թիվ 33 խցում, նույն խցում կալանքը կրել է նաև գործով վկա Հայկ Անդրանիկի Մնացականյանը։ Վերջինիս անվամբ հաճախակի հանձնուք է հանձնել նրա ընկերուհին` վկա Կատին Թանգյանը։
2011 թվականի մարտի 16-ին արտաքին աշխարհի հետ ունեցած հեռախոսային կապի արդյունքում գործի քննությամբ չպարզված թմրամիջոց իրացնող անձի հետ ունեցած պայմանավորվածության համաձայն ամբաստանյալ Աշոտ Ռազմիկի Հովհաննիսյանը ցանկացել է առանց իրացնելու նպատակի, իր անձնական օգտագործման նպատակով ձեռք բերել խոշոր չափի «բուպրենորֆին» տեսակի թմրամիջոց։ Քննությամբ չպարզված անձը ընդամենը 0,062 գրամ «բուպրենորֆին» տեսակի թմրամիջոցը` դեղահատերի և փոշենման զանգվածի տեսքով թաքցրել է «գրիլ» հավի մեջ, ձեռք է բերել նաև այլ սննդամթերք, այն նախապատրաստել է որպես հանձնուք «Նուբարաշեն» ՔԿ հիմնարկ հանձնելու համար, սակայն անձամբ չի բերել հանձնելու։ Ինքնությունը չպարզված անձնավորությունը պայմանավորվել է ամբաստանյալ Աշոտ Հովհաննիսյանի հետ` 16.05.2011թ. ժ.10։00-ի սահմաններում սպասել «Էրեբունի» թանգարանի մոտ և հանձնել հանձնուքը Աշոտ Հովհաննիսյանի կողմից երաշխավորված անձին։
Ամբաստանյալ Աշոտ Հովհաննիսյանի խնդրանքով կալանավոր Հայկ Մնացականյանը իր բջջային 094-73-00-52 հեռախոսահամարով զանգահարել է իր ընկերուհի Կատին Թանգյանին` վերջինիս պատկանող 098-93-16-08 հեռախոսահամարի վրա և խնդրել է 16.05.2011թ. ժ.10։00-ին «Էրեբունի» թանգարանի մոտ հանդիպել անծանոթին, վերցնել փաթեթները և դրանց պարունակությունը որպես հանձնուք հանձնել իր անվամբ «Նուբարաշեն» ՔԿ հիմնարկ։
Ըստ գործի տվյալների` ինչպես Հայկ Մնացականյանը, այնպես էլ` Կատին Թանգյանը չեն իմացել հանձնուքում թմրամիջոցի առկայության մասին։
16.05.2011թ. վկա Կատին Թանգյանը պայմանավորված վայրում հանդիպել է նշված անձնավորությանը, վերցրել է ծանրոցները և այն բերելով ՀՀ ԱՆ «Նուբարաշեն» ՔԿ հիմնարկ, ժ.12։50-ի սահմաններում որպես հանձնուք ներկայացրել է համապատասխան ծառայությանը` լրացնելով նշված հանձնուքը կալանավոր Հայկ Մնացականյանին հանձնելու մասին դիմումը և հանձնուքի պարունակության վերաբերյալ ցուցակը։
Հանձնուքների ընդունման սենյակում ՔԿ հիմնարկի աշխատակիցների կողմից կատարված ստուգմամբ «գրիլ» հավի մեջ հայտնաբերվել են թաքցված թվով 10 հատ դեղահատեր և փոշենման զանգված, որոնք դատավարական կարգի պահպանմամբ կշռվել, փաթեթավորվել, կնքվել և առգրավվել են։
Դատաքիմիական փորձաքննության 19.05.2011թ. թիվ 18201105 եզրակացության համաձայն փորձաքննությանը ներկայացված գործարանային արտադրության չորս հատ 0,4-ական գրամ քաշով սպիտակ գույնի ամբողջական դեղահատերը և 1,33 գրամ ընդհանուր քաշով նմանատիպ դեղահատի 6 կտորները իրենց բաղադրության մեջ պարունակում են ընդհանուր 0,0586 գրամ քաշով «բուպրենորֆին» տեսակի թմրամիջոց։
Միաժամանակ փորձաքննությանը ներկայացված 0,17 գրամ քաշով սպիտակ գույնի անհամասեռ մանրացված փոշեզանգվածը իր բաղադրության մեջ պարունակում է 0,0034 գրամ քաշով «բուպրենորֆին» տեսակի թմրամիջոց։
Փաստի առթիվ ՀՀ ԱՆ «Նուբարաշեն» ՔԿ հիմնարկի հետաքննիչի կողմից 23.05.2011թ. ՀՀ քրեական օրենսգրքի 266-րդ հոդվածի 2-րդ մասի 2-րդ կետով և 268-րդ հոդվածի 2-րդ մասի հատկանիշներով հարուցվել է թիվ 86153711 քրեական գործը, որը 24.05.2011թ. ընդունվել է ՀՀ ոստիկանության ՔԳՎ Էրեբունու քննչական բաժնի քննիչի վարույթ։
25.08.2011թ. Աշոտ Ռազմիկի Հովհաննիսյանին մեղադրանք է առաջադրվել ՀՀ քրեական օրենսգրքի 34-268-րդ հոդվածի 2-րդ մասի 2-րդ կետով այն բանի համար, որ նա կալանքը ՀՀ ԱՆ «Նուբարաշեն» ՔԿ հիմնարկի թիվ 33 խցում կրելու ընթացքում, 2010թ. մայիսի 16-ին մտադրվել է առանց իրացնելու նպատակի, իր օգտագործման համար ապօրինի ձեռք է բերել խոշոր չափի` 0,062 գրամ «բուպրենորֆին» տեսակի թմրամիջոց։ Այդ նպատակով, գործով չպարզված անձը Աշոտ Հովհաննիսյանի խնդրանքով «տապակած հավի» մեջ թաքրել է խոշոր չափի 0,062 գրամ «բուպրենորֆին» տեսակի թմրամիջոց պարունակող դեղահաբի կտորներ և այն Երևան քաղաքի Էրեբունի վարչական շրջանում գտնվող «Էրեբունի» թանգարանի մոտ փոխանցել Աշոտ Հովհաննիսյանի խցակից Հայկ Մնացականյանի ծանոթ, Երևան քաղաքի բնակիչ Կատին Լենդրոշի Թանգյանին։ Մինչ այդ Աշոտ Հովհաննիսյանը Հայկ Մնացականյանին խնդրել է իր ծանոթի միջոցով «Էրեբունի» թանգարանի մոտ հանձնուք վերցնել մի անձնավորությունից և տեղափոխելով ՔԿՀ ներկայացնել իր` Հայկ Մնացականյանի անվամբ` առանց վերջինիս այդ մասին նախօրոք տեղյակ պահելու։ Հայկ Մնացականյանը Աշոտ Հովհաննիսյանի խնդրանքով զանգահարել է իր ծանոթին և խնդրել նույն օրը գնալ «Էրեբունի» թանգարանի մոտ, մի անձնավորությունից վերցնել հանձնուք և տեղափոխելով ՔԿՀ ներկայացնել իր անվամբ։ Կատին Թանգյանը Հայկ Մնացականյանի խնդրանքով անհայտ անձից վերցրել է նշված հանձնուքը և դրանում թմրամիջոցի առկայության մասին անտեղյակ լինելով` գնացել է «Նուբարաշեն» ՔԿ հիմնարկ։
2010թ. մայիսի 16-ին ժամը 12։50-ի սահմաններում Կատին Թանգյանի կողմից «Նուբարաշեն» ՔԿ հիմնարկի թիվ 33 խցի կալանավոր Հայկ Անդրանիկի Մնացականյանի անվամբ բերված հանձնուքի ստուգմամբ տապակած հավի մեջ հայտնաբերվել է վերը նշված խոշոր չափի` 0,062 գրամ «բուպրենորֆին» տեսակի թմրամիջոց պարունակող դեղահատերը, որի պատճառով Աշոտ Հովհաննիսյանը հանցագործությունն ավարտին չի հասցրել իր կամքից անկախ հանգամանքներով։
Աշոտ Հովհաննիսյանի նկատմամբ խափանման միջոց չի կիրառվել։
Առաջադրված մեղադրանքում Աշոտ Հովհաննիսյանն իրեն լիովին մեղավոր է ճանաչել, սակայն հրաժարվել է ցուցմունք տալ։
26.08.2011թ. քրեական գործից մաս է անջատվել, հարուցվել է թիվ 12130511 քրեական գործը ՀՀ քրեական օրենսգրքի 266-րդ հոդվածի 2-րդ և 3-րդ մասերով` թմրամիջոցն իրացնելու փաստի առթիվ։
Մեղադրական եզրակացությունը հաստատվել է 31.08.2011թ.։
Քրեական գործը 07.09.2011թ. մուտք է եղել Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարան։

2. Արագացված դատական քննություն.
Ամբաստանյալ Աշոտ Ռազմիկի Հովհաննիսյանը մինչ դատաքննությունն սկսելը միջնորդեց դատարանին` կիրառել դատական քննության արագացված կարգ, հայտարարելով, որ միջնորդությունը ներկայացնում է կամավոր, խորհրդակցելով պաշտպան Վարդան Գրիգորյանի հետ, գիտակցում է արագացված կարգով դատաքննություն իրականացնելու հետևանքները, առաջադրված մեղադրանքը ՀՀ քրեական օրենսգրքի 34-268-րդ հոդվածի 2-րդ մասի 2-րդ կետով իրեն պարզ է, համաձայն է մեղադրանքի հետ և իրեն լիովին մեղավոր է ճանաչում։
Թեև մեղադրող Ա. Մուրադյանը մեղադրական եզրակացությունը հաստատելիս առարկել էր գործով դատական քննության արագացված կարգ կիրառելու դեմ, սակայն նա փոխեց իր դիրքորոշումը և մինչև դատաքննությունն սկսելը չառարկեց արագացված կարգով դատական քննություն անցկացնելու մասին ամբաստանյալ Աշոտ Ռազմիկի Հովհաննիսյանի միջնորդության դեմ։
Ուսումնասիրելով քրեական գործի նյութերը, գտնելով, որ ամբաստանյալ Աշոտ Ռազմիկի Հովհաննիսյանին առաջադրված մեղադրանքը ՀՀ քրեական օրենսգրքի 34-268-րդ հոդվածի 2-րդ մասի 2-րդ կետով հիմնավորված է, ամբաստանյալի միջնորդությունը բխում է ՀՀ քրեական դատավարության օրենսգրքի 3751, 3752-րդ հոդվածների պահանջներից, դատարանը բավարարել է ամբաստանյալի միջնորդությունը և ՀՀ քրեական դատավարության օրենսգրքի 3753-րդ հոդվածի 4-րդ մասի կարգով որոշում է կայացրել արագացված կարգով դատական քննություն անցկացնելու մասին։

3. Դատարանի իրավական վերլուծությունը
Դատարանը արագացված կարգով իրականացված դատական քննության ընթացքում ուսումնասիրելով ամբաստանյալի անձը բնութագրող տվյալները, պատասխանատվությունը մեղմացնող ու ծանրացնող հանգամանքները, հաշվի առնելով այն, որ առաջադրված մեղադրանքում ամբաստանյալ Աշոտ Ռազմիկի Հովհաննիսյանի մեղքը ՀՀ քրեական օրենսգրքի 34-268-րդ հոդվածի 2-րդ մասի 2-րդ կետով նախատեսված հանցանքը կատարելու մեջ հիմնավորված է, գտնում է, որ ամբաստանյալի նկատմամբ նշված հոդվածի սանկցիայով պետք է քրեական պատիժ նշանակվի։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված` պատասխանատվությունը և պատիժը մեղմացնող ու ծանրացնող հանգամանքները։ Դրանք բնութագրելով ամբաստանյալի անձնավորության ու կատարված հանցագործության հանրային վտանգավորության աստիճանը, հնարավորություն են տալիս անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ կոնկրետ դեպքով ամբաստանյալ Աշոտ Ռազմիկի Հովհաննիսյանի մոտ, որպես պատասխանատվությունը և պատիժը ծանրացնող հանգամանք, առկա է հանցանքը կատարելու ռեցիդիվը, քանի որ ամբաստանյալի նախկին դատվածությունը մարված չէ։
Քրեական գործով Աշոտ Ռազմիկի Հովհաննիսյանի նկատմամբ պատասխանատվությունը և պատիժը մեղմացնող հանգամանք է ամբաստանյալի խնամքին երկու անչափահաս` 24.02.1996թ. և 15.10.1998թ. ծնված երեխաներ և կենսաթոշակառու ծնողներ ունենալը, անկեղծորեն զղջալը։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալ Աշոտ Ռազմիկի Հովհաննիսյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածների պահանջներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, տվյալ գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր եզրակացության, որ ամբաստանյալի նկատմամբ որպես պատիժ անհրաժեշտ է նշանակել ազատազրկում որոշակի ժամկետով։
Պատիժ նշանակելիս և պատժաչափը որոշելիս դատարանը նկատի է առնում ՀՀ քրեական օրենսգրքի 65-րդ հոդվածի պահանջը` չավարտված հանցագործության, կոնկրետ` հանցափորձի համար պատիժ նշանակելու վերաբերյալ, ինչպես նաև ՀՀ քրեական դատավարության օրենսգրքի 3754-րդ հոդվածի 5-րդ մասի պահանջների պահպանմամբ։
Դատարանը գտնում է, որ ՀՀ ԱԺ կողմից 26.05.2011թ. ընդունված «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» որոշման 9-րդ կետի 3-րդ ենթակետի հիմքով սույն գործով համաներման ակտը կիրառելի չէ։
Վերոգրյալն ի նկատի ունենալով, դատարանը գտնում է, որ ամբաստանյալ Աշոտ Ռազմիկի Հովհաննիսյանի նկատմամբ անհրաժեշտ է նշանակել քրեական պատիժ 1 /մեկ/ տարի 6 /վեց/ ամիս ժամկետով։
Գործով իրեղեն ապացույց ճանաչված 0,062 գրամ ընդհանուր քաշով «բուպրենորֆին» տեսակի թմրամիջոցը թողնել ՀՀ ոստիկանության ՔԳՎ Էրեբունու քննչական բաժնի տնօրինության տակ` վարույթում քննվող 12130511 քրեական գործին կից։
Դատավճռի հրապարակման պահից ամբաստանյալ Աշոտ Ռազմիկի Հովհաննիսյանի նկատմամբ որպես խափանման միջոց ընտրել կալանավորումը, նրա նկատմամբ նշանակված պատժի սկիզբը հաշվել 05.10.2011թ- ից։
Պատիժը պետք է կրի ՀՀ ԱՆ ՔԿՎ համապատասխան ՔԿ հիմնարկում։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 44, 357-358, 360, 365, 368-372, 3751-3754, 376, 3761, 379-րդ հոդվածների և ՀՀ դատական օրենսգրքի 20-րդ հոդվածի պահանջներով, դատարանը.

Վ Ճ Ռ Ե Ց

Ամբաստանյալ Աշոտ Ռազմիկի Հովհաննիսյանին մեղավոր ճանաչել ՀՀ քրեական օրենսգրքի 34-268-րդ հոդվածի 2-րդ մասի 2-րդ կետով նախատեսված հանցանքի կատարման մեջ և նշված հոդվածի սանկցիայով նրա նկատմամբ քրեական պատիժ կիրառել` դատապարտելով ազատազրկման 1 /մեկ/ տարի 6 /վեց/ ամիս ժամկետով։
Ամբաստանյալ Աշոտ Ռազմիկի Հովհաննիսյանի նկատմամբ որպես խափանման միջոց կիրառել կալանավորումը և նրան կալանքի վերցնել դատական նիստերի դահլիճից։
Պատժի սկիզբը հաշվել 2011թ. հոկտեմբերի 05-ից։
Պատիժը պետք է կրի ՀՀ ԱՆ ՔԿՎ համապատասխան ՔԿ հիմնարկում։
Գործով իրեղեն ապացույց ճանաչված խոշոր չափի 0,062 գրամ քաշով «բուպրենորֆին» տեսակի թմրամիջոցը թողնել ՀՀ ոստիկանության ՔԳՎ Էրեբունու քննչական բաժնի տնօրինության տակ` վարույթում քննվող թիվ 12130511 քրեական գործին կից։
Դատավարության մասնակիցների կողմից դատավճիռը կարող է վերաքննության կարգով բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում։

ԴԱՏԱՎՈՐ Վ. Թ. ԳՐԻԳՈՐՅԱՆ