Դ Ա Տ Ա Վ Ճ Ի Ռ
ՀԱՆՈւՆ ՀԱՅԱՍՏԱՆԻ ՀԱՆՐԱՊԵՏՈւԹՅԱՆ

Գործ հմ. ԵԷԴ/0125/01/11
2011թ.
ք. Երևան

Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը հետևյալ կազմով՝

ՆԱԽԱԳԱՀՈՂ ԴԱՏԱՎՈՐ՝ Ա. ՕՀԱՆՅԱՆ
ՔԱՐՏՈւՂԱՐ՝ Հ. ՀՈՎՀԱՆՆԻՍՅԱՆ
ՄԵՂԱԴՐՈՂ-ԴԱՏԱԽԱԶ՝ Հ. ՄՈՎՍԻՍՅԱՆ
Ա. ԲԱՐՍԵՂՅԱՆ
ՊԱՇՏՊԱՆ` Ա. ՄԱՐՏԻՐՈՍՅԱՆ
ՏՈւԺՈՂ` Ա. ԽԱՉԱՏՐՅԱՆ


2011թ. Հոկտեմբերի «27»-ին, Երևան քաղաքում.
Դռնբաց դատական նիստում քննեց քրեական գործն, ըստ մեղադրանքի՝ Հակոբ Սերգոյի Թադևոսյանի /ծնված՝ 08.01.1986թ. Երևան քաղաքում, ազգությամբ հայ, Հայաստանի Հանրապետության քաղաքացի, միջնակարգ կրթությամբ, ֆիզիկապես առողջ, ամուսնացած, խնամքին երկու անձ, աշխատում է որպես վարորդ, նախկինում չդատապարտված, փաստացի բնակվել է Երևան քաղաքի, Խաղաղ Դոն փողոցի 19 շենքի հմ.212 հասցեի բնակարանում, ներկայումս ՀՀ ԱՆ «Նուբարաշեն» քրեակատարողական հիմնարկության կալանավոր/։
Սույն գործով արգելանքի տակ է 09.04.2011թ-ից։
Մեղադրվում է ՀՀ Քրեական օրենսգրքի 112 հոդվածի 1-ին մասով։


1. Գործի դատավարական նախապատմությունը


Արթուր Պատվականի Խաչատարյանի առողջությանը դիտավորությամբ ծանր վնաս պատճառելու դեպքի առթիվ 03.03.2010թ. ՀՀ Ոստիկանության ՔԳՎ Երևան քաղաքի ՔՎ Էրեբունու քննչական բաժնում ՀՀ Քրեական օրենսգրքի 112 հոդվածի 1-ին մասի հատկանիշներով հարուցվել է հմ.12107111 քրեական գործը։
01.04.2011թ. որոշմամբ Հակոբ Սերգոյի Թադևոսյանը որպես մեղադրյալ է ներգրավվել ՀՀ Քրեական օրենսգրքի 112 հոդվածի 1-ին մասով։ 30.08.2011թ. որոշմամբ Հ.Թադևոսյանին առաջադրված մեղադրանքը փոփոխվել է և նա ՀՀ Քրեական օրենսգրքի 112 հոդվածի 1-ին մասով ներգրավվել է որպես մեղադրյալ։ Հ.Թադևոսյանին մեղադրանք է առաջադրվել այն բանի համար, որ. «նա 2011թ. մարտի «03»-ին ժամը «02։15»-ի սահմաններում, Ազատամարտիկների փողոցին հարակից այգում, դանակով դիտավորությամբ հարվածել է Արթուր Խաչատրյանի որովայնին և նրա առողջությանը պատճառել ծանր վնաս` կյանքին վտանգ սպառնացող։ Այսպես` 2011թ. փետրվար ամսվա կեսերին Արթուր Խաչատրյանը տեղեկացել է, որ իր դուստր Սեդա Խաչատրյանն առանց իր համաձայնությունը ստանալու փաստացի ամուսնական կապի մեջ է մտել Անդրանիկ Թադևոսյանի հետ և տեղափոխվել է բնակվելու վերջինիս Երևան քաղաքի Խաղաղ Դոն 19 շենքի 212 բնակարանում։ Կատարվածի արդյունքում իրեն վիրավորված զգալով Ա.Խաչատրյանը 2011թ. փետրվար-մարտ ամիսների ընթացքում ոգելից խմիչք օգտագործած վիճակում պարբերաբար նրանց բնակարան այցելելու, ինչպես նաև հեռախոսազանգերի միջոցով վիրավորանքներ է հնչեցրել Թադևոսյանների հասցեին, իսկ վերջին այցելության ժամանակ` 2011թ. մարտի «02»-ին, դիտավորյալ կոտրել է նրանց բնակարանի պատուհանի ապակին և վնասել բնակարանի մուտքի դուռը։ 2011թ. մարտի «02»-ի լույս «03»-ի գիշերը Ա.Խաչատրյանը հերթական անգամ զանգահարելով Թադևոսյանների բնակարանի հեռախոսահամարով, հեռախոսազրույց է ունեցել Ա.Թադևոսյանի եղբոր` Հակոբ Թադևոսյանի հետ, որի ժամանակ վիճաբանել են, միմյանց հասցեին հնչեցրել սեռական բնույթի հայհոյանքեր, որից հետո պայմանավորվել են հանդիպել Ազատամարտիկների փողոցին հարակից այգում։ Նույն օրը, ժամը «02։15»-ի սահմաններում, Հ.Թադևոսյանը նշված այգում հանդիպել է Ա.Խաչատրյանին, որտեղ վիճաբանել են, որի ընթացքում Հ.Թադևոսյանը նախապես իր հետ վերցրած և բաճկոնի աջ թևի մեջ թաքցրած կտրող-ծակող գործիք հանդիսացող դանակով դիտավորությամբ հարվածել է Ա.Խաչատրյանի որովայնին, որի հետևանքով վերջինս ընկել է գետնին։ Դանակի հարվածի հետևանքով Հ.Թադևոսյանը դիտավորությամբ Ա.Խաչատրյանի առողջությանը պատճառել է որովայնի առաջնային պատի ծակած-կտրած թափանցող վերքի, զստաղու միջանցիկ, զստաղու միջընդերքի և ճարպենի վնասումների ձևով ծանր վնաս` կյանքին վտանգ սպառնացող, իսկ դանակի հարվածից հետո ընկնելու հետևանքով Ա.Խաչատրյանը ստացել է թեթև վնասի հատկանիշներ չպարունակող վնասվածքներ` զույգ ծնկահոդերի շրջանների առաջային մակերեսների քերծվածքների ձևով»։
17.05.2011թ. որոշմամբ Արթուր Պատվականի Խաչատրյանի նկատմամբ ՀՀ Քրեական օրենսգրքի 185 հոդվածի 1-ին մասով քրեական գործի հարուցումը մերժվել է` տուժողի բողոքի բացակայության պատճառաբանությամբ։
25.08.2011թ. որոշմամբ Հայկ Արթուր Խաչատրյանի նկատմամբ ՀՀ Քրեական օրենսգրքի 185 հոդվածի 1-ին մասով քրեական հետապնդում չի իրականացվել` տուժողների բողոքների բացակայության պատճառաբանությամբ։
25.08.2011թ. որոշմամբ Հայկ Արթուրի Խաչատրյանի առողջությանը թեթև վնասի հատկանիշներ չպարունակող մարմնական վնասվածք ստանալու դրվագով քրեական հետապնդում չի իրականացվել` հանցագործության դեպքի բացակայության պատճառաբանությամբ։
Քրեական գործը 26.08.2011թ. կազմված և 31.08.2011թ. հաստատված մեղադրական եզրակացությամբ 02.09.2011թ-ին ստացվել է Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարան։

2. Ապացույցների հետազոտում և գնահատում


Դատարանի հետևությունները հիմնված են դատաքննությամբ հետազոտված հետևյալ ապացույցների վրա։
Տուժող Արթուր Պատվականի Խաչատրյանի ցուցմունքով այն մասին, որ ամբաստանյալ Հայկ Թադևոսյանը հանդիսանում է իր դստեր` Սեդա Խաչատրյանի տեգրը։ Քանի որ իր դուստրն առանց իր գիտության և համաձայնության ամուսնացել է Անդրանիկ Թադևոսյանի հետ և տեղափոխվել է բնակության վերջինիս` Խաղաղ Դոն փողոցի 19 շենքի հմ. 212 բնակարան, ինքը զայրացած է եղել թե' Խաչատրյանների ընտանիքի և թե' դստեր վրա, ինչ պատճառով իրենց միջև եղել են լարված փոխհարաբերություններ։ 2011թ. մարտի «02»-ի երեկոյան, հերթական անգամ փեսայի հետ խոսելու նպատակով, զանգարել է նրանց տուն, սակայն լսափողը վերցրել է վերջինիս եղբայր Հակոբ Թադևոսյանը և հրաժարվել է լսափողը եղբորը փոխանցել, ինչ պատճառով իրենց միջև լեզվակռիվ է սկսել, որի ընթացքում փոխադարձ հայհոյանքներ են հնչել։ Որոշ ժամանակ անց Հակոբ Թադևոսյանը հետ է զանգահարել իրեն ու հարաբերությունները պարզելու նպատակով հրավիրել Ազատամարտիկների փողոցին հարակից այգի։ Ինքն այգի է գնացել ու Հակոբ Թադևոսյանի հետ խոսելու ժամանակ իրենց միջև վիճաբանություն է ծագել, որի ընթացքում որովայնի հատվածում ծակոց է զգացել ու կորցրել գիտակցությունը։ Գիտակցության է եկել արդեն հիվանդանոցում և հասկացել, որ վիճաբանության ընթացքում իրեն դանակահարել են։ Դատաքննությամբ տուժողը հայտնեց, նաև որ ամբաստանյալի հետ հաշտվել է և խնդրեց դատարանին նրան մեղմ վերաբերվել, քանի որ կատարվածում առկա է եղել նաև իր մեղավորությունը։
Վկա Հայկ Արթուր Խաչատրյանի ցուցմունքով այն մասին, որ տուժող Արթուր Խաչատրյանն իր հայրն է, ով չարաշահում է ոգելից խմիչքների օգտագործումը և ամեն անգամ գնում և անհանգստություն է պատճառում քրոջը` Սեդա Խաչատրյանին և նրա նորաստեղծ ընտանիքին։ 2011թ. մարտի «02»-ին, ժամը «23»-ի սահմաններում հայրը կրկին զանգահարել է քրոջ տուն ու հայհոյանքներ տեղացել նրա ու հեռախոսի լսափողը վերցրած Հակոբ Թադևոսյանի հասցեին ու հրավիրել նրան Ազատամարտիկների փողոցին հարակից այգի` հարաբերությունները պարզելու։ Ինքն անհանգստանալով զանգահարել ու հանդիպման մասին տեղեկացրել է Անդրանիկ Թադևոսյանին ու նրա հետ Արեշի շուկայի մոտ հանդիպելով, միասին, նրա «Նիվա» մակնիշի ավտոմեքենայով գնացել են այգի, որտեղ հայրը և Հակոբ Թադևոսյանը սկսել են վիճաբանել, որի ընթացքում ներկա գտնվողներից մեկը դանակով հարվածել է հորը։ Ինքը հորը դանակահարված վիճակում տեսնելով հուզմունքից գետնից քար է վերցրել ու կոտրել ավտոմեքենայի ապակիները։ Վկա Հայկ Խաչատրյանը նախաքննության ընթացքում տված իր ցուցմունքով հայտնել է, որ հորը դանակահարել է Հայկ Թադևոսյանը։ Դատարանն առավել արժանահավատ է համարում վերջինիս նախաքննության ընթացքում տված ցուցմունքները։
Վկա Անդրանիկ Սերգոյի Թադևոսյանի ցուցմունքով այն մասին, որ 2011թ. փետրվարի «20»-ին, առանց կնոջ ծնողների գիտության և համաձայնության ամուսնացել է տուժող Արթուր Խաչատրյանի դստեր` Սեդա Խաչատրյանի հետ, ինչն առաջացրել է Արթուր Խաչատրյանի զայրույթը։ Ամուսնությունից հետո Արթուր Խաչատրյանը պարբերաբար ալկոհոլի ազդեցության տակ զանգահարել կամ այցելել է իրենց բնակարան ու հայհոյանքներով ու վիրավորական այլ արտահայտություններով անհանգստացրել է իր ընտանիքի անդամներին։ 2011թ. մարտի «02»-ին, ժամը «24»-ի սահմաններում իրեն է զանգահարել եղբայրը` Հակոբ Թադևոսյանը և հայտնել է, որ Արթուր Խաչատրյանը ցանկանում է գալ իրենց տուն, սակայն քիչ անց կրկին զանգահարել ու հայտնել է, որ ինքն է գնում վերջինիս հանդիպելու Ազատամարտիկների փողոցին հարակից այգում։ Անհանգստանալով ինքը գնացել է մորաքրոջ տուն ու վերջինիս ամուսնու` Ռոբերտ Մանուկյանի և որդու հետ ճանապարհվել հանդիպման վայր։ Այգում հանդիպել են Հակոբ Թադևոսյանին, իսկ քիչ անց բարձրաձայն հայհոյանքներ հնչեցնելով եկել է նաև Արթուր Խաչատրյանը, ով մոտենալով եղբորը բռնել է վերջինիս ձեռքը և շարունակել հայհոյանքները։ Հակոբը խնդրել է չմիջամտել ու իրենք մի փոքր առանձնացել են։ Մի քանի րոպե անց եղբայրը վազելով հեռացել է, որից հետո Արթուր Խաչատրյանն ընկել է գետնին։ Վախից իրենք նստել են մեքենան ու հեռացել են դեպքի վայրից, իսկ այնուհետև երբ հանդիպել է եղբորը նրանից տեղեկացել է, որ նա դանակով հարվածել է Արթուր Խաչատրյանին։ Իրենք վախենալով որոշ ժամանակ թաքնվել են իրենց Գեղարքունիքի մարզում գտնվող տանը, որից հետո գիտակցելով ու զղջալով կատարածի համար Հակոբ Թադևոսյանն ինքնակամ ներկայացել է ոստիկանությանը։
Վկա Ռոբերտ Սոսի Մանուկյանի ցուցմունքով այն մասին, որ 2011թ. մարտի «02»-ին, ժամը «24»-ի սահմաններում անհանգիստ վիճակում իրենց տուն է եկել կնոջ քրոջ որդի Անդրանիկ Թադևոսյանն ու հայտնել, որ Արթուր Խաչատրյանի հերթական վիճաբանության շուրջ պարզաբանումների համար Ազատամարտիկների փողոցին հարակից այգի վերջինիս հետ հանդիպման է գնացել եղբայրը` Հակոբ Թադևոսյանը։ Իրենք անմիջապես ուղևորվել են այգի։ Ճանապարհին Անդրանիկ Թադևոսյանին է զանգահարել Արթուր Խաչատրյանի որդի Հայկ Խաչատրյանը և նույն բանը հայտնել։ Ձեռք բերված պայմանավորվածության համաձայն Արեշի շուկայի մոտ իրենք հանդիպել են Հայկին ու նրա հետ միասին գնացել այգի։ Այգում հանդիպել են Հակոբ Թադևոսյանին, իսկ քիչ անց բարձրաձայն հայհոյանքներ տալով եկել է նաև Արթուր Խաչատրյանը, ով մոտենալով Հակոբին բռնել է նրա ձեռքը և շարունակել հայհոյանքները։ Վերջիններս մի փոքր առանձնացել են, իսկ մի քանի րոպե անց տեսել են, որ Հակոբ Թադևոսյանը վազելով փախել է, իսկ Արթուր Խաչատրյանն ընկել է գետնին։ Անակնկալի գալով իրենք նստել են մեքենան ու հեռացել են, իսկ հետագայում իրեն հայտնի է դարձել, որ Հակոբ Թադևոսյանը դանակով հարվածել է Արթուր Խաչատրյանին ու թաքնվել։ Սակայն որոշ ժամանակ անց տեղեկացել է նաև, որ Հակոբ Թադևոսյանը վերադարձել ու ներկայացել է ոստիկանությանը։
Ամբաստանյալ Հակոբ Սերգոյի Թադևոսյանի դատաքննության ցուցմունքով այն մասին, որ սկսած եղբոր` Անդրանիկ Թադևոսյանի և Սեդա Խաչատրյանի ամուսնության օրվանից մինչ դեպքի օրը հարսի հայրը` Արթուր Խաչատրյանը, պարբերաբար ալկոհոլային խմիչքներ օգտագործած վիճակում, օրվա տարբեր ժամերի այցելել է իրենց բնակարան, աղմկել, հայհոյել ու սպառնացել ընտանիքի անդամներին, դուռը չբացելու դեպքում հարվածներով վնասել այն։ Հերթական անգամ, 2011թ. մարտի «02»-ին, աշխատանքի գնալուց առաջ, լսել է Սեդա Խաչատրյանի լացակումած ձայնը ու նրա ձեռքից վերցնելով լսափողը մյուս կողմից լսել է Արթուր Խաչատրյանի հայհոյանքները, ով սպառնալով իրեն հրավիրել է հանդիպման։ Ինքը գնացել է հանդիպման վայր նշանակված Ազատամարտիկների փողոցին հարակից այգի, որտեղ նկատել է հայհոյանքներով դեպի իրեն մոտեցող Արթուր Խաչատրյանին` ձեռքը գրպանում, և մտածելով, որ վերջինս հնարավոր է դանակ ունենա, ինքը ևս մեքենայի միջից վերցրել է դանակն ու թաքցրել իր բաճկոնի թևի մեջ։ Երբ Արթուր Խաչատրյանը մոտեցել է, իրենք սկսել են վիճաբանել և այդ ընթացքում ինքը հանելով դանակը հարվածել է նրան ու փախել։ Այնուհետև գիտակցելով ու զղջալով իր կատարած արարքի համար վերադարձել է ու հանձնվել ոստիկանությանը։ Դատաքննությամբ Հակոբ Թադևոսյանը կատարած արարքի համար զղջաց և իրեն լիովին մեղավոր ճանաչեց։
Արթուր Խաչատրյանի մասնակցությամբ 19.03.2011թ. կատարված քննչական փորձարարության արձանագրությամբ այն մասին, որ Ա.Խաչատրյանը մատնացույց է արել Ազատամարտիկների փողոցի հարակից այգու ավտոճանապարհի կողքին գտնվող ծառից մեկ մետր դեպի ձախ գտնվող այն հատվածը, որտեղ 2011թ. մարտի «03»-ին, ժամը «02։00»-ի սահմաններում վիճաբանության ընթացքում Հակոբ Թադևոսյանը դանակով հարվածել է իրեն։
«Էրեբունի» բժշկական կենտրոնի աշխատակից Աստղիկ Խաչատրյանի կողմից Ա.Խաչատրյանին հիվանդանոց ընդունելու պահին վերջինիս հագին եղած մեկ հատ սև գույնի «Ադիդաս» ապրանքանիշի սպորտային անդրավարտիքը, մեկ հատ կապույտ բրդյա սվիտերը, մեկ հատ կարճաթև բրդյա սվիտերը ներկայացնելու վերաբերյալ 03.03.2011թ. կազմված արձանագրությամբ։
Դատաբժշկական փորձաքննության հմ.270/հ եզրակացությամբ այն մասին, որ Ա.Խաչատրյանի ստացած մարմնական վնասվածքները` զույգ ծնկահոդերի շրջանների առաջային մակերեսների ներկայիս էպիթելիզացված տեղամասերի` նախկին քերծվածքների, որովայնի առաջային պատի ծակած-կտրած թափանցող վերքի, զստաղու միջանցիկ, զստաղու միջընդերքի և ճարպոնի վնասումների ձևով, հասցվել են` քերծվածքները` բութ առարկայի ներգործությամբ, որովայնի առաջնային պատի ծակած-կտրած թափանցող վերքը` սուր ծակող-կտրող գործիքով, հնարավոր են որոշման մեջ նշված ժամկետին, քերծվածքները` առողջության թեթև վնասի հատկանիշներ չեն պարունակում, իսկ ծակած-կտրած թափանցող վերքը առաջացրել է առողջությանը ծանր վնաս` կյանքին վտանգ ներկայացնող։
Դատահետքաբանական փորձաքննության հմ.641 եզրակացությամբ այն մասին, որ փորձաքննության ներկայացված Արթուր Խաչատրյանի սվիտերի և ժիլետի վրա առկա են մեկական միաժամանակ առաջացած ծակած-կտրած բնույթի վնասվածքներ, որոնք կարող էին առաջանալ, ինչպես միակողմանի, այնպես էլ երկկողմանի սրվածության ծակող-կտրող շեղբ ունեցող առարկայի` հնարավոր է դանակի շեղբի մեկ ներթափանցման արդյունքում։ Ա.Խաչատրյանի սվիտերի և ժիլետի առաջամասերի աջ կողմի ստորին կիսամասերի վրա առկա մեկական միաժամանակ առաջացած վնասվածքները իրենց տեղակայություններով, չափերով և ուղղվածություններով հիմնականում համապատասխանում են Ա.Խաչատրյանի որովայնի առաջնային պատի թափանցող ծակած-կտրած բնույթի վերքի հետ։
Դատաբժշկական փորձաքննության հմ.132 եզրակացությամբ այն մասին, որ փորձաքննության ներկայացված Արթուր Պատվականի Խաչատրյանի արյան նմուշն ըստ արյան ABO իզոշճաբանական համակարգի պատկանում է ուղեկցող H հակածինով արյան A խմբին։ Փորձաքննության ներկայացված տուժող Ա.Պ.Խաչատրյանի հագուստների` անթև սվիտերի առաջային կեսին, վնասվածքի ստորին անկյան շրջանում` դարձ երեսից, նրա հետին կեսին, սպորտային անդրավարտիքի վերին առաջային վերին առաջային հատվածում և աջ ծնկան շրջանում, կապույտ տրիկոտաժե նախկին վերնազգեստի առաջային կեսին հայտնաբերված կասկածելի հետքերում հաստատվեց արյան առկայություն, որը պատկանում է մարդու և ըստ արյան ABO իզոշճաբանական համակարգի առաջացել է H հակածինով արյան A խումբ ունեցող անձից կամ անձանցից, այդ թվում նաև կարող էր առաջանալ Արթուր Պատվականի Խաչատրյանից։
Ամբաստանյալ Հակոբ Թադևոսյանին մեղսագրվող հանցանքը հիմնավորվեցին նաև վկա Համլետ Դերենիկի Կարեյանի նախաքննական ցուցմունքներով, իրեղեն ապացույց ճանաչված Արթուր Պատվականի Խաչատրյանի հագուստներով, ինչպես նաև գործով ձեռք բերված այլ փաստական տվյալներով։

3. Դատարանի իրավական վերլուծությունը

ՀՀ Քրեական օրենսգրքի 18 հոդվածի 1-ին մասի համաձայն հանցագործություն է համարվում մեղավորությամբ կատարված` հանրության համար վտանգավոր այն արարքը, որը նախատեuված է ՀՀ քրեական օրենսգրքով։
ՀՀ Քրեական օրենսգրքի 112 հոդվածի 1-ին մասի համաձայն հանցագործություն է համարվում` դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար կամ առաջացրել է ... որևէ օրգանի կամ օրգանի ֆունկցիայի կորստի, ինչպես նաև կյանքի համար վտանգավոր այլ վնաս է պատճառել առողջությանը կամ առաջացրել է դրա քայքայում` զուգորդված ընդհանուր աշխատունակության ոչ պակաս, քան մեկ երրորդի կայուն կորուստ ...։
Այսպիսով, դատարանը գործով ձեռք բերված բոլոր ապացույցները գնահատելով իրենց համակցության մեջ և դրանց բազմակողմանի, լրիվ, օբյեկտիվ քննության վրա հիմնված ներքին համոզմամբ գտնում է, որ Հակոբ Սերգոյի Թադևոսյանը կատարել է արարք, որը նախատեսված է ՀՀ Քրեական օրենսգրքի 112 հոդվածի 1-ին մասով, որով և պետք է ենթարկվի քրեական պատասխանատվության։
Համաձայն ՀՀ Քրեական օրենսգրքի 61 հոդվածի 2-րդ կետի` պատժի տեuակը և չափը որոշվում են հանցագործության` հանրության համար վտանգավորության աuտիճանով և բնույթով, հանցավորի անձը բնութագրող տվյալներով, այդ թվում` պատաuխանատվությունը և պատիժը մեղմացնող կամ ծանրացնող հանգամանքներով։
Դատաքննությամբ հիմնավորվեց, որ ամբաստայալ Հակոբ Թադևոսյանը երիտասարդ է, նախկինում դատապարտված չի եղել, բնութագրվում է դրականորեն, զղջացել է կատարածի համար, որն արտահայտվել է նրանում, որ մեղայականով ներկայացել է նախաքննության մարմին, տվել ինքնախոստովանական ցուցմունքներ, հանցագործության կատարումը պայմանավորվել է տուժողի հակաօրինական և հակաբարոյական վարքագծով, խնամիքին ունի երկու փոքրահասակ երեխա։
Դատարանը գտնում է նաև, որ գործում բացակայում են Հակոբ Թադևոսյանի պատասխանատվությունը և պատիժը ծանրացնող հանգամանքները։
Դատարանը քննարկելով Հակոբ Թադևոսյանի նկատմամբ «ՀՀ անկախության հռչակման 20-րդ տարեդարձի կապակցությամբ համաներում հայտարարելու մասին» որոշման կիրառելիության հարցը, գտնում է, որ այն վերջինիս նկատմամբ պետք է կիրառվի, քանի որ որոշման 8-րդ կետի 5-րդ ենթակետի համաձայն պատժի չկրած մասը ՀՀ Քրեական օրենսգրքի 112 հոդվածի 1-ին մասով նախատեսված հանցագործությունները կատարելու համար դատապարտված անձանց նկատմամբ կրճատվում է մեկ քառորդով։ Նույն որոշման 13-րդ կետի 4-րդ ենթակետի համաձայն` որոշման կատարումը վերապահվում է ՀՀ Արդարադատության նախարարության քրեակատարողական հիմնարկների պետերին այն անձանց նկատմամբ, որոնք պատիժը կրում են քրեակատարողական հիմնարկում, հետևաբար` պատժաչափի վերջնական հաշվարկը նույնպես պետք է կատարվի քրեակատարողական հիմնարկի կողմից։
Քննարկելով քաղաքացիական հայցի պահանջի հարցը և նկատի ունենալով, որ դատաքննությամբ տուժող Արթուր Պատվականի Խաչատրյանը հրաժարվեց քաղաքացիական հայց ներկայացնելուց և հայտնեց, որ հաշտվել է ամբաստանյալի հետ և նրանից որևէ պարտք ու պահանջ չունի, ուստի դատարանը գտնում է, որ ՀՀ Քրեական դատավարության օրենսգրքի 161 հոդվածի 2-րդ մասի պահանջներով քրեական դատավարությունում քաղաքացիական հայցով վարույթը պետք է կարճել։
Քննարկելով իրեղեն ապացույցների հարցը դատարանը գտնում է, որ դատավճիռն օրինական ուժի մեջ մտնելուց հետո իրեղեն ապացույց ճանաչված Արթուր Պատվականի Խաչատրյանի հագուստները պետք է վերադարձնել վերջինիս, իսկ նախաքննության մարմնի որոշմամբ իրեղեն ապացույց ճանաչված և Անդրանիկ Սերգոյի Թադևոսյանին ի պահ հանձնված «ՎԱԶ 2121» մակնիշի 18 ՍՕ 257 պետհամարանիշի ավտոմեքենան պետք է թողնել վերջինիս։
Ելնելով վերոգրյալից և ղեկավարվելով ՀՀ Քրեական դատավարության օրենսգրքի 357-360 հոդվածներով, դատարանը
Վ Ճ Ռ Ե Ց

Հակոբ Սերգոյի Թադևոսյանին մեղավոր ճանաչել ՀՀ Քրեական օրենսգրքի 112 հոդվածի 1-ին մասով և դատապարտել ազատազրկման` 3 /երեք/ տարի ժամկետով։
ՀՀ Ազգային ժողովի կողմից 26.05.2011թ-ին ընդունված «ՀՀ անկախության հռչակման 20-րդ տարեդարձի կապակցությամբ համաներում հայտարարելու մասին» որոշման 8-րդ կետի 5-րդ ենթակետի համաձայն պատժաչափի չկրած մասը կրճատել մեկ քառորդով` պատժաչափի հաշվարկը վերապահելով քրեակատարողական հիմնարկությանը։
Պատժի սկիզբը հաշվել 2011թ. ապրիլի «09»-ից։
Պատիժը պետք է կրի ՀՀ Արդարադատության նախարարության համապատասխան քրեակատարողական հիմնարկում։
Դատավճիռն օրինական ուժի մեջ մտնելուց հետո իրեղեն ապացույց ճանաչված հագուստները վերադարձնել Արթուր Պատվականի Խաչատրյանին, իսկ «ՎԱԶ 2121» մակնիշի 18 ՍՕ 257 պետհամարանիշի ավտոմեքենան թողնել Անդրանիկ Սերգոյի Թադևոսյանին։
Դատավճիռը կարող է բողոքարկվել ՀՀ Վերաքննիչ քրեական դատարանին՝ հրապարակվելու օրվանից հետո` մեկամսյա ժամկետում։





ԴԱՏԱՎՈՐ Ա. ՕՀԱՆՅԱՆ