ԵԷԴ/0124/01/11

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ` Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ` Ք. ԲԱԴԱԼՅԱՆ

Մասնակցությամբ`

ՄԵՂԱԴՐՈՂ` Հ. ՄՈՎՍԵՍՅԱՆ
ՊԱՇՏՊԱՆ` Ս. ՀԱՐՈւԹՅՈւՆՅԱՆ
ՏՈւԺՈՂ` Կ. ԲԱԴԱԼՅԱՆ

2011թ. դեկտեմբերի 6-ին դատարանում
Դռնբաց դատական նիստում քննեց քրեական գործն ըստ մեղադրանքի` Հոմերոս Շմավոնի Նազարյանի, ծնված 19.02.1960թ., ք.Սիսիան, ազգությամբ հայ, ՀՀ քաղաքացի, բարձրագույն կրթությամբ, չի աշխատել, նախկինում դատված` Երևանի Կենտրոն և Նորք-Մարաշ համայնքների ընդհանուր իրավասության դատարանի 25.06.2009թ. ԵԿԴ/0084/01/08 դատավճռով ՀՀ քր. օր-ի 178 հոդվածի 2-րդ մասի 3-րդ կետով դատապարտվել է ազատազրկման` 3 տարի ժամկետով, ՀՀ ԱԺ «Համաներում հայտարարելու մասին» 19.06.2009թ. որոշման 1-ին կետի 1-ին ենթակետի կիրառմամբ ազատվել է պատիժը կրելուց, հաշվառված է ք.Երևան Ն. Շենգավիթ 4 փողոց, 47 տանը։
Մեղադրվում է ՀՀ քր. օր-ի 325 հոդվածի 1-ին մասով և 178 հոդվածի 1-ին մասով։
Սույն գործով կալանքի տակ է 22.07.2011թ.։
Դատաքննությամբ և գործի տվյալներով պարզվեց հետևյալը.
Ամբաստանյալ Հոմերոս Շմավոնի Նազարյանը խաբեությամբ` ուրիշի գույքին տիրանալու նպատակով, հիփոթեքային վարկ ձևակերպելու պատրվակով 2009թ. սեպտեմբերի սկզբներին Մարիամ Չախոյանի կողմից օգտագործելու` բանկ ներկայացնելու համար, «ՀԱՊ-ԳՐԻԳ» ՍՊԸ տնօրեն Վրեժ Պողոսյանից ձեռք է բերել իրավունք վերապահող` Մարիամ Չախոյանի անվամբ 13.06.2008թ. թվագրումով լրացված ակնհայտ կեղծ աշխատանքային պայմանգիր և ամսական միջին աշխատավարձի վերաբերյալ 18.09.2009թ. թվագրումով տրված կեղծ տեղեկանքներ այն մասին, որ իբր Մարիամ Չախոյանը աշխատում է նշված ընկերությունում որպես մենեջեր-համակարգող և ամսական ստանում է 350.000 դրամ աշխատավարձ։ Նշված կեղծ փաստաթղթերը օգտագործելու համար Կորյուն Բադալյանի միջոցով հանձնել է Մարիամ Չախոյանին։
Բացի այդ, խաբեությամբ` ուրիշի գույքին տիրանալու նպատակով, Կորյուն Բադալյանի դստեր ամուսին Դավիթ Չախոյանի անվամբ «Արարատբանկ» ԲԲ ընկերությունում հիփոթեքային վարկ ձևակերպելու պատրվակով, չարաշահելով Կորյուն Արծրունի Բադալյանի վստահությունը, նրանից երկու անգամով ստացել է սկզբում` 120.000 դրամ, ապա` 300.000 դրամ, ընդհամենը` 420.000 ՀՀ դրամ գումար և հափշտակել է։
Վերը նշված հանցավոր արարքների կատարման համար Հոմերոս Շմավոնի Նազարյանին մեղադրանք է առաջադրվել ՀՀ քր. օր-ի 325 հոդվածի 1-ին մասով և 178 հոդվածի 1-ին մասով։
Դատաքննությամբ առաջադրված մեղադրանքում ամբաստանյալ Հոմերոս Նազարյանն իրեն լիովին մեղավոր ճանաչեց և ցուցմունք տվեց այն մասին, որ 2009թ. սեպտեմբեր ամսին իր ընկեր Արամը իրեն ծանոթացրել է Կորյուն Բադալյանի հետ։ Վերջինս խնդրել է իրեն օգնել «Արարատ բանկ»-ում աղջկա անվամբ հիփոթեքային վարկ ձևակերպել` բնակարան ձեռք բերելու համար։ Ինքը չի առարկել և վարկը ձևակերպելու` համապատասխան աշխատանքային պայմանագիր, տեղեկանքներ և այլ փաստաթղթերը կազմելու նպատակով, Կ. Բադալյանից պահանջել և ստացել է սկզբում 120.000 ՀՀ դրամ, իսկ մի քանի օր անց 300.000 ՀՀ դրամ, սակայն վարկը ձևակերպելու հարցում վերջինիս չի օգնել, այլ նշված գումարները ծախսել է իր բուժման վրա։ Բայց մի հարցում աջակցել է Կ. Բադալյանին, այն է` «ՀԱՊ-ԳՐԻԳ» ՍՊ ընկերության տնօրեն Վրեժ Պողոսյանին խնդրել է Կ. Բադալյանի դուստր` Մարիամ Չախոյանի տվյալներով ակնհայտ կեղծ աշխատանքային պայմանագիր և աշխատավարձի վերաբերյալ տեղեկանքներ տալ, որը փոխանցել է Կ. Բադալյանին։
Բացի ամբաստանյալի խոստովանական ցուցմունքից, նրա կատարած արարքը հիմնավորվեց գործով ձեռք բերված հետևյալ ապացույցներով.
Տուժող` Կորյուն Բադալյանի ցուցմունքով այն մասին, որ 2009թ. իր ծանոթ Արամի միջոցով ծանոթացել է Հոմերոս Նազարյանի հետ։ Խոսակցության ընթացքում ինքը ասել է, որ ցանկանում է աղջկա անվամբ հիփոթեքային վարկ ձևակերպել բանկում` բնակարան ձեռք բերելու համար, սակայն չի կարողանում, քանի որ բանկի կողմից պահանջվող փաստաթղթերը իրենք չեն կարողանում ներկայացնել։ Այդ ժամանակ, Հոմերոս Նազարյանը ասել է, որ իրենց կօգնի այդ հարցում` աղջկան կձևակերպի իր կազմակերպությունում որպես թարգմանչուհի, սակայն սոցապ. նախարարությունում անհրաժեշտ է կատարել 120.000 ՀՀ դրամի չափով սոց. վճար։ Ինքը այդ մասին հայտնել է աղջկան` Մարիամին և փեսային։ Վերջիններս համաձայնվել են որպեսզի Հ. Նազարյանը իրենց օգնի, ուստի զանգահարել, հանդիպել են Հոմերոսի հետ և վերջինիս տվել են պահանջվող գումարը, Մարիամ Չախոյանի անձնագիրը և սոց. քարտը։ Դրանից հետո, Հ. Նազարյանը իրեն փոխանցել է աղջկա` Մարիամ Չախոյանի անվամբ աշխատանքային պայմանագիրը, համաձայն որի վերջինս աշխատում է «ՀԱՊ-ԳՐԻԳ» ՍՊԸ-ում որպես մենեջեր-համակարգող և աշխատավարձի չափի մասին տեղեկանքը, համաձայն որի վերջինիս ամսեկան աշխատավարձը կազմում է 350.000 ՀՀ դրամ։ Նշված փաստաթղթերը ինքը տվել է աղջկան, վերջինս էլ դրանք փոխանցել է բանկին, սակայն բանկը մերժել է վարկի ձևակերպումը։ Ինքը այդ մասին հայտնել է Հոմերոսին։ Վերջինս ասել է, որ անհրաժեշտ է բանկին 300.000 ՀՀ դրամի չափով «մաղարիչ» անել որպեսզի այդ հարցը լուծվի։ Փեսան և աղջիկը համաձայնվել են տալ նշված գումարը և ինքը անձամբ 300.000 ՀՀ դրամ գումարը հաջորդ օրը տվել է Հոմերոսին։ Գումարը տալուց հետո Հոմերոսը այլևս չի պատասխանել իր զանգերին և խաբեությամբ հափշտակել է ընդհանուր 420.000 ՀՀ դրամ գումարը։ Միաժամանակ հայտնեց դատարանին, որ հաշտվել է ամբաստանյալ Հոմերոս Նազարյանի հետ, վերջինս փոխհատուցել է 420.000 ՀՀ դրամ գումարը, հետևաբար նրանից ոչ մի պարտք ու պահանջ չունեն, ուստի խնդրեց Հ. Նազարյանի նկատմամբ մեղմ վերաբերվել։
Վկա` Վրեժ Պողոսյանի նախաքննությամբ տրված և դատաքննությամբ հետազոտված ցուցմունքով այն մասին, որ 2009թ. սեպտեմբեր ամսին, ստույգ օրը չի հիշում, Երևան քաղաքի Մ. Խորենացի և Զաքյան փողոցների խաչմերուկի մոտակայքում` «Շիրակ» հյուրանոցի դիմաց, հանդիպել է իր ընկեր Կարեն Մուրադյանին և այդ ժամանակ նրա միջոցով ծանոթացել է Հոմերոս Նազարյանի հետ, որին իրենց զրույցի ընթացքում հայտնել է, որ ՍՊԸ ունի, որը ցանկանում է վաճառել։ Այդ հանգամանքը հետաքրքրել է Հոմերոսին և վերջինս տեղեկացրել է իր գործունեության մասին։ Իրենց զրույցի վերջում Հոմերոսը ցանկություն է հայտնել պետռեգիստրի մարմիններում տնօրենի անվանափոխություն կատարելու միջոցով ձեռք բերել իր «ՀԱՊ-ԳՐԻԳ» ՍՊԸ-ն։ Ինքը Հոմերոսի հետ համաձայնվել է այն պայմանով, եթե վերջինս պարտավորվում է հարկային մարմիններում 850.000 ՀՀ դրամի չափով կատարել իր հարկային պարտավորությունները։ Հոմերոսը չի առարկել և 2009թ. հոկտեմբերի 9-ին Երևան քաղաքի Նոր-Նորքի տարածքային պետ. ռեգիստրի բաժնում դիմում է ներկայացրել, որի հիման վրա կատարվել է «ՀԱՊ-ԳՐԻԳ» ՍՊԸ-ի կանոնադրական կապիտալի բաժնեմասերի սեփականության իրավունքի փոփոխություն Հ. Նազարյանի որդի` Վահան Նազարյանի անվամբ։ Վ. Նազարյանը միաժամանակ նշել է, որ Մարիամ Չախոյան տվյալներով անձնավորությանը չի ճանաչում և ոչ էլ ճանաչել է։ Վերջինս իր «ՀԱՊ-ԳՐԻԳ» ՍՊԸ-ում որպես մենեջեր-համակարգող` 350.000 ՀՀ դրամ աշխատավարձով չի աշխատել, սակայն նրա անձնագրային տվյալներով ձևակերպված աշխատանքային պայմանագրում և նրա տվյալներով աշխատավարձի չափի վերաբերյալ տրված տեղեկանքներում իր ազգանվան դիմաց առկա ստորագրությունները կատարվել են իր կողմից ու չի հիշում, թե ինչ հանգամանքներում է դրանք կատարել։
Վկա` Մարիամ Չախոյանի նախաքննությամբ տրված և դատաքննությամբ հետազոտված ցուցմունքով այն մասին, որ 2009թ. օգոստոս ամսին ամուսնու հետ որոշել են հիփոթեքային վարկի միջոցով բնակարան ձեռք բերել և այդ մասին տեղեկացրել են հորը` Կորյուն Բադալյանին։ Վերջինիս խնդրել են հնարավորության սահմաններում օգնել իրենց։ Նշել է, որ 2008թ. հունիսի 13-ին «ՀԱՊ-ԳՐԻԳ» ՍՊԸ-ի հետ աշխատանքային պայմանագիր չի կնքել, այդ ՍՊԸ-ում չի աշխատել, այն իրեն անծանոթ է և չգիտի, թե որտեղ է այդ ՍՊԸ-ն գտնվում և ինչ գործունեություն է ծավալում։
Հոմերոս Նազարյանի հանցանքը հիմնավորվեց նաև ՀՀ «Փորձագիտական կենտրոն» ՊՈԱԿ-ի կողմից 14.04.2011թ. տրված դատաձեռագրաբանական փորձաքննության թիվ 11241101 եզրակացությամբ, համաձայն որի փորձաքննությանը տրամադրված 13.06.2008թ. աշխատանքային պայմանագրի պատճենում տեղավորված ձեռագիր գրառումները կատարվել են Կորյուն Բադալյանի կողմից։ Փորձաքննությանը տրամադրված 13.06.2008թ. աշխատանքային պայմանագրի պատճենի 2-րդ էջի հակառակ կողմի ներքևի ձախ` «Գործատու» հատվածում, «Տնօրեն» բառի դիմաց և 18.09.2009թ. Մարիամ Չախոյանին տրված թվով 2 աշխատավարձի չափի վերաբերյալ տեղեկանքների միջնամասերում «Տնօրեն» և «Վ. Պողոսյան» բառերի միջև տեղավորված ստորագրությունները հավանաբար կատարվել են Վրեժ Պողոսյանի կողմից։
Ոստիկանության Էրեբունու բաժին Կորյուն Բադալյանի կողմից տրված հաղորդմամբ, իրեղեն ապացույց ճանաչված և գործին կցված աշխատանքային պայմանագրի և 18.09.2009թ. թվագրումով Մարիամ Չախոյանի անվամբ տրված աշխատավարձի չափի վերաբերյալ թվով 2 տեղեկանքների առկայությամբ։
Տուժող Կորյուն Բադալյանի կողմից 11.11.2011թ. ներկայացված դիմումով, համաձայն որի Հոմերոս Նազարյանի կողմից իրեն պատճառված 420.000 ՀՀ դրամի վնասը ամբողջությամբ հատուցվել է, ուստի հաշտվել է Հոմերոս Նազարյանի հետ և նրանից որևէ գույքային կամ դրամական պահանջ չունի, ինչպես նաև գործով ձեռք բերված այլ փաստական տվյալներով։
Մեղադրող-դատախազ Հ. Մովսեսյանը, նկատի ունենալով, որ տուժողը հաշտվել է ամբաստանյալի հետ, հայտնեց դատարանին, որ Հոմերոս Շմավոնի Նազարյանի նկատմամբ ՀՀ քր. օր-ի 178 հոդվածի 1-ին մասով հարուցված քրեական գործի վարույթը պետք է կարճել և քրեական հետապնդումը դադարեցնել։
Այսպիսով, դատարանը ապացուցված համարեց, որ Հոմերոս Շմավոնի Նազարյանը կատարել է արարքներ, որոնք նախատեսված են ՀՀ քր. օր-ի 178 հոդվածի 1-ին մասով և 325 հոդվածի 1-ին մասով, սակայն քրեական պատասխանատվության պետք է ենթարկվի ՀՀ քր. օր-ի 325 հոդվածի 1-ին մասով, իսկ ՀՀ քր. օր-ի 178 հոդվածի 1-ին մասով հարուցված քրեական գործի վարույթը պետք է կարճել և քրեական հետապնդումը դադարեցնել հետևյալ պատճառաբանությամբ.
Համաձայն ՀՀ քր. դատ. օր-ի 35 հոդվածի 1-ին մասի 5-րդ կետի. «Քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե քրեական դատավարության օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ»։
ՀՀ քր. դատ. օր-ի 183 հոդվածի համաձայն` ՀՀ քր. օր-ի 178 հոդվածի 1-ին մասով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է մինչև դատավճիռ կայացնելու համար դատարանի` խորհրդակցական սենյակ հեռանալը։
Նկատի ունենալով, որ տուժողը հաշտվել է ամբաստանյալի հետ, դատարանը գտնում է, որ ամբաստանյալ Հոմերոս Նազարյանի նկատմամբ ՀՀ քր. օր-ի 178 հոդվածի 1-ին մասով հարուցված քրեական գործի վարույթը պետք է կարճել և քրեական հետապնդումը դադարեցնել։
Պատիժ նշանակելիս դատարանը հաշվի է առնում արարքի հանրության համար վտանգավորությունը, աստիճանը և բնույթը, ամբաստանյալների անձը բնութագրող տվյալները, նրանց պատասխանատվությունը և պատիժը մեղմացնող և ծանրացնող հանգամանքները։
Հոմերոս Նազարյանի պատասխանատվությունը և պատիժը ծանրացնող հանգամանք է դիտվում հանցանքը կատարելու ռեցիդիվը։
Դատարանն ամբաստանյալի պատասխանատվությունը և պատիժը մեղմացնող, ինչպես նաև անձը բնութագրող հանգամանք է համարում այն, որ վերջինս զղջացել է կատարած արարքի համար և ընդունել մեղքը։
Քննարկելով խափանման միջոցի հարցը, դատարանը գտնում է, որ ամբաստանյալ Հոմերոս Նազարյանի նկատմամբ ընտրված կալանք խափանման միջոցը պետք է թողնել անփոփոխ։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված 13.06.2008թ. թվագրումով լրացված ակնհայտ կեղծ աշխատանքային պայմանագիրը և ամսեկան միջին աշխատավարձի վերաբերյալ 18.09.2009թ. թվագրումով տրված կեղծ տեղեկանքները պետք է թողնել քրեական գործում։
Վերոգրյալի հիման վրա և ղեկավարվելով ՀՀ քր. դատ. օր-ի 35, 183, 357-360 հոդվածներով, դատարանը.

Վ Ճ Ռ Ե Ց

Հոմերոս Շմավոնի Նազարյանի նկատմամբ ՀՀ քր. օր-ի 178 հոդվածի 1-ին մասով հարուցված քրեական գործի վարույթը կարճել և քրեական հետապնդումը դադարեցնել` ամբաստանյալի հետ տուժողի հաշտվելու պատճառով։
Հոմերոս Շմավոնի Նազարյանին մեղավոր ճանաչել ՀՀ քր. օր-ի 325 հոդվածի 1-ին մասով և դատապարտել ազատազրկման` 1/մեկ/ տարի ժամկետով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը` 22.07.2011թ.։
Հոմերոս Նազարյանի նկատմամբ ընտրված կալանք խափանման միջոցը թողնել անփոփոխ մինչև դատավճռի օրինական ուժի մեջ մտնելը։
Գործով իրեղեն ապացույց ճանաչված 13.06.2008թ. թվագրումով լրացված ակնհայտ կեղծ աշխատանքային պայմանագիրը և ամսեկան միջին աշխատավարձի վերաբերյալ 18.09.2009թ. թվագրումով տրված կեղծ տեղեկանքները դատավճիռն օրինական ուժի մեջ մտնելուց հետո թողնել քրեական գործում։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ