ԵԷԴ/0102/01/11

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ` Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ` Լ. ՄԻՐԶՈՅԱՆ

Մասնակցությամբ`

ՄԵՂԱԴՐՈՂ` Ա. ՄՈւՐԱԴՅԱՆ

2011թ. սեպտեմբերի 28-ին դատարանում
Դռնբաց դատական նիստում քննեց քրեական գործն ըստ մեղադրանքի` Հայկ Վաղինակի Թովմասյանի, ծնված 19.03.1962թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, 1-ին խմբի հաշմանդամ, չի աշխատել, նախկինում երկու անգամ դատված`
1. Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 26.04.2011թ. ԵԱՔԴ/0005/01/11 դատավճռով ՀՀ քր. օր-ի 266 հոդվածի 2-րդ մասի 2-րդ կետով, 268 հոդվածի 2-րդ մասի 2-րդ կետով և 266 հոդվածի 4-րդ մասով, 66 հոդվածի կիրառմամբ դատապարտվել է ազատազրկման` 5 տարի 6 ամիս ժամկետով և տուգանքի` 80.000 ՀՀ դրամի չափով,
2. Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 25.08.2011թ. ԵԷԴ/0067/01/11 դատավճռով ՀՀ քր. օր-ի 268 հոդվածի 1-ին մասով, 66 հոդվածի կիրառմամբ դատապարտվել է ազատազրկման` 6 տարի ժամկետով և տուգանքի` 80.000 ՀՀ դրամի չափով, հաշվառված է ք.Երևան Խաղաղ-Դոնի 23 շենք, բն. 242, ներկայումս ՀՀ ԱՆ «Նուբարաշեն» քրեակատարողական հիմնարկի դատապարտյալ։
Մեղադրվում է ՀՀ քր. օր-ի 34-268 հոդվածի 2-րդ մասի 2-րդ կետով։
Դատաքննությամբ և գործի տվյալներով պարզվեց հետևյալը.
Ամբաստանյալ Հայկ Վաղինակի Թովմասյանը Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 28.09.2010թ. ԵԱՔԴ/0210/06/10 որոշմամբ ՀՀ քր. օր-ի 266 հոդվածի 2-րդ մասի 2-րդ կետով, 268 հոդվածի 3-րդ մասով և 266 հոդվածի 4-րդ մասով առաջադրված մեղադրանքով 25.09.2010թ. գտնվելով կալանքի տակ ՀՀ ԱՆ «Նուբարաշեն» քրեակատարողական հիմնարկում, առանց իրացնելու նպատակի` իր օգտագործման համար, փորձել է ձեռք բերել խոշոր չափի` 0.04 գրամ «բուպրենորֆին» և խոշոր չափի` 1.31 գրամ «ացետիլացված ափիոն» տեսակի թմրամիջոցներ, սակայն իր կամքից անկախ հանգամանքներով չի կարողացել իրականացնել իր հանցավոր մտադրությունը։
Այսպես. քննությամբ չպարզված անձից և հանգամանքներում Հայկ Թովմասյանը քննությամբ դեռևս չպարզված անձի հետ պայմանավորվել է «բուպրենորֆին» և «ացետիլացված ափիոն» տեսակի թմրամիջոցներ ձեռք բերելու շուրջ։ Թմրամիջոցները իրեն փոխանցելու նպատակով, 2011թ. մարտի 27-ին իր մոտ ապօրինի պահվող 099-13-08-01 հեռախոսահամարից զանգահարել է իր քրոջ ամուսնուն` Ֆելիքս Իվանի Գրիգորյանին, և խնդրել է հաջորդ օրը` մարտի 28-ին, գնալ իրենց` Երևան քաղաքի Խաղաղ-Դոնի 23 շենքի, 242 բնակարան, իր կնոջից` Մելանյա Ժորայի Մուրադյանից, վերցնել իր համար նախատեսված հանձնուքը և տանել ՀՀ ԱՆ «Նուբարաշեն» քրեակատարողական հիմնարկ։ 2011թ. մարտի 28-ին քննությամբ դեռևս չպարզված մի անձնավորություն գնացել է Մելանյա Մուրադյանի տուն, վերջինիս փոխանցել է մի ծանրոց և հեռացել է։ Նույն օրը Մ. Մուրադյանը կատարել է գնումներ, դրանք տեղադրել անծանոթի կողմից տրված հանձնուքի մեջ, որից հետո, ժամը 1100-ին Ֆ. Գրիգորյանը, վերցնելով հանձնուքը, գնացել է ՀՀ ԱՆ «Նուբարաշեն» քրեակատարողական հիմնարկ, որտեղ հանձնուքը ներկայացրել է Հայկ Թովմասյանի անվամբ։ Հանձնուքի ստուգման ժամանակ կատարված խուզարկությամբ քրեակատարողական հիմնարկի աշխատակիցների կողմից, վերջինիս կողմից ներկայացված հանձնուքում առկա «տոլմա» ճաշատեսակի մեջ թաքցված հայտնաբերվել է խոշոր չափի` 0.04 գրամ «բուպրենորֆին» և խոշոր չափի` 1.31 գրամ «ացետիլացված ափիոն» տեսակի թմրամիջոցներ, ինչի պատճառով Հ. Թովմասյանը չի կարողացել ավարտին հասցնել իր հանցավոր մտադրությունը։
Վերը նշված հանցավոր արարքի կատարման համար Հայկ Վաղինակի Թովմասյանին մեղադրանք է առաջադրվել ՀՀ քր. օր-ի 34-268 հոդվածի 2-րդ մասի 2-րդ կետով։
Դատաքննությամբ առաջադրված մեղադրանքում ամբաստանյալ Հայկ Թովմասյանն իրեն լիովին մեղավոր ճանաչեց և ցուցմունք տվեց այն մասին, որ իր օգտագործման համար փորձել է ձեռք բերել «սուբուտեքս» տեսակի թմրամիջոցի դեղահատի կտորներ և /չերնյաշկա/«ափիոն» տեսակի թմրամիջոց։ Այդ նպատակով 2011թ. մարտի 27-ին իր մոտ գտնվող 099-13-08-01 հեռախոսահամարից զանգահարել է քրոջ ամուսնուն` Ֆելիքս Իվանի Գրիգորյանին, և խնդրել է հաջորդ օրը` մարտի 28-ին, գնալ իրենց` Երևան քաղաքի Խաղաղ-Դոնի 23 շենքի, 242 բնակարան, իր կնոջից` Մելանյա Ժորայի Մուրադյանից, վերցնել իր համար նախատեսված հանձնուքը, տանել ՀՀ ԱՆ «Նուբարաշեն» քրեակատարողական հիմնարկ և փոխանցել իր անվամբ։ Նույն օրը տեղեկացել է, որ հանձնուքի խուզարկությամբ թմրամիջոցները հայտնաբերվել են։
Բացի ամբաստանյալի խոստովանական ցուցմունքից, նրա կատարած արարքը հիմնավորվեց գործով ձեռք բերված հետևյալ ապացույցներով.
Վկա` Ֆելիքս Գրիգորյանի ցուցմունքով այն մասին, որ 2011թ. մարտի 27-ին իր 091-83-83-00 հեռախոսահամարին 099-13-08-01 հեռախոսահամարից զանգահարել է ՀՀ ԱՆ «Նուբարաշեն» քրեակատարողական հիմնարկում կալանք կրող, իր կնոջ եղբայր Հայկ Վաղինակի Թովմասյանը և խնդրել է հաջորդ օրը գնալ իրենց տուն, կնոջից վերցնել իր համար նախատեսված հանձնուքը, տանել քրեակատարողական հիմնարկ և փոխանցել իր անվամբ։
Հաջորդ օրը, ժամը 1000-ի սահմաններում գնացել է Հայկ Թովմասյանի բնակարան, վերջինիս կնոջից` Մելանյա Մուրադյանից, վերցրել է հանձնուքը և նույն օրը, ժամը 1400-ի սահմաններում գնացել է ՀՀ ԱՆ «Նուբարաշեն» քրեակատարողական հիմնարկ, որտեղ հանձնուքը Հ. Թովմասյանին փոխանցելու համար ներկայացրել է ստուգման։ Իր ներկայությամբ հանձնուքի ստուգման ընթացքում քրեակատարողական հիմնարկի աշխատակիցները հանձնուքում առկա «տոլմա» ճաշատեսակի միջից հայտնաբերել են դեղահատեր և սև գույնի ինչ որ զանգված, որի մասին ինքը չի իմացել։ Հայտնաբերված դեղահատը և սև գույնի զանգվածը իր և 2 այլ քաղաքացիների ներկայությամբ կշռվել, փաթեթավորվել և կնիքվել է, կատարված զննության մասին կազմվել է արձանագրություն, որի տակ ինքը ստորագրել է։
Վկա` Միհրան Ռշտունու ցուցմունքով այն մասին, որ 2011թ. մարտի 28-ին իր կողմից վարվող «Սամանդ» տեսակի, 0624 պետհամարանիշի տաքսի ավտոմեքենայով Ֆելիքս Գրիգորյանի հետ գնացել են Էրեբունու մասիվ, որտեղ Ֆելիքս Գրիգորյանը ինչ որ տուն է մտել, որտեղից վերադարձել է փաթեթով, որից հետո ուղևորվել են ՀՀ ԱՆ «Նուբարաշեն» քրեակատարողական հիմնարկ։ Ֆելիքս Գրիգորյանին իջեցրել է քրեակատարողական հիմնարկի մոտ և հեռացել է։ Մի քանի օր անց Ֆ. Գրիգորյանից իմացել է, որ իր կողմից ներկայացրած հանձնուքի միջից քրեակատարողական հիմնարկի աշխատակիցները թմրամիջոց են հայտնաբերել։
Վկաներ` ՀՀ ԱՆ «Նուբարաշեն» ՔԿ հիմնարկի անվտանգության ապահովման բաժնի աշխատակիցներ Հովհաննես Մանջիկյանի և Էդգար Մանուկյանի նույնաբովանդակ ցուցմունքներով այն մասին, որ 2011թ. մարտի 28-ին, ժամը 1415-ի սահմաններում կատարել են քրեակատարողական հիմնարկի դատապարտյալ Հայկ Վաղինակի Թովմասյանի անվամբ Ֆելիքս Իվանի Գրիգորյանի կողմից բերված հանձնուքի զննություն, որի ընթացքում հանձնուքում առկա «տոլմա» ճաշատեսակի միջից հայտնաբերել են դեղահատի կտորներ և մուգ շագանակագույն, յուրահատուկ սուր հոտով զանգված։ Հանձնուքը ներկայացրած Ֆելիքս Գրիգորյանը հայտնել է, որ հանձնուքը նույն օրը վերցրել է Հայկ Թովմասյանի կնոջից` Մելանիայից։
Վկա` Մելանյա Մուրադյանի նախաքննությամբ տրված և դատաքննությամբ հետազոտված ցուցմունքով այն մասին, որ 2011թ. մարտի 27-ին իր 091-52-18-58 հեռախոսահամարին զանգահարել է իր ամուսինը` ՀՀ ԱՆ «Նուբարաշեն» քրեակատարողական հիմնարկի կալանավոր Հայկ Վաղինակի Թովմասյանը և խնդրել է հաջորդ օրը իր համար հանձնուք փոխանցել, ասելով, որ այն կգան և կտանեն։
Հաջորդ օրը` 2011թ. մարտի 28-ին, առավոտյան, ժամը 0830-ի սահմաններում իրենց` Երևան քաղաքի Խաղաղ-Դոնի 23 շենքի, 242 բնակարան է եկել մի անձնավորություն, իրեն է փոխանցել ծանրոց, ասելով, որ այն իր կողմից պատրաստված հանձնուքի հետ միասին փոխանցի Հայկին, որի մասին Հայկը տեղյակ է։ Ծանրոցը վերցնելուց հետո իրեն է զանգահարել Հայկը` տեղականալու համար տոպրակը բերել են, թե ոչ, և ստանալով դրական պատասխան, ասել է, որ այն տեղադրի իր կողմից պատրաստված հանձնուքի մեջ և փոխանցի իրեն։ Որոշ ժամանակ անց իրենց տուն է եկել իր ամուսնու քրոջ ամուսինը` Ֆելիքս Գրիգորյանը, իրենից վերցրել է հանձնուքը և գնացել է քրեակատարողական հիմնարկ։ Մի քանի օր անց քրեակատարողական հիմնարկի աշխատակիցներից տեղեկացել է, որ Ֆ. Գրիգորյանի կողմից ներկայացված հանձնուքի մեջ թմրամիջոց է հայտնաբերվել։
Հայկ Թովմասյանի հանցանքը հիմնավորվեց նաև ՀՀ «Փորձագիտական կենտրոն» ՊՈԱԿ-ի կողմից 30.03.2011թ. տրված դատաքիմիական փորձաքննության թիվ 11601105 եզրակացությամբ, համաձայն որի փորձաքննությանը ներկայացված ընդհանուր 2.0 գրամ մաքուր քաշով, գործարանային արտադրության, «B8» դաջվածքով 2 հատ ամբողջական դեղահատերը և «B» և «8» դաջվածքներով 6 հատ ոչ ամբողջական դեղահատի հատվածները իրենց բաղադրության մեջ պարունակում են ընդհանուր 0.04 գրամ քաշով «բուպրենորֆին» տեսակի թմրամիջոց։
Փորձաքննությանը ներկայացված 1.36 գրամ մաքուր քաշով, մուգ շագանակագույն զանգվածը հանդիսանում է 1.31 գրամ հաստատուն քաշով, տնայնագործական եղանակով պատրաստված «ացետիլացված ափիոն» տեսակի թմրամիջոց։
Հանձնուքի զննություն կատարելու արձանագրությամբ, համաձայն որի 2011թ. մարտի 28-ին ՀՀ ԱՆ «Նուբարաշեն» քրեակատարողական հիմնարկի կալանավոր Հայկ Վաղինակի Թովմասյանի անվամբ Ֆելիքս Գրիգորյանի կողմից ներկայացված հանձնուքի խուզարկությամբ հանձնուքում առկա «տոլմա» ճաշատեսակի թվով 2 գլանակների մեջ թաքցված հայտնաբերվել են թվով 2 կասկածելի փաթեթներ, որոնք որպես ընթերականներ հրավիրված անձանց ներկայությամբ զննության նպատակով բացվել են և պարզվել է, որ նրանցում առկա են դեղահատեր և մուգ շագանակագույն, յուրահատուկ սուր հոտով կասկածելի զանգվածներ։ Այնուհետև, դեղահատերը և զանգվածը կշռվել են, որից հետո դեղահատերը, կասկածելի զանգվածները և «տոլմա» ճաշատեսակը առգրավվել, փաթեթավորվել և կնիքվել են։
06.06.2011թ. որոշմամբ իրեղեն ապացույց ճանաչված և քրեական գործին կցված խոշոր չափի` 0.04 գրամ ընդհանուր քաշով «բուպրենորֆին» և խոշոր չափի` 1.31 գրամ «ացետիլացված ափիոն» տեսակի թմրամիջոցներով և «տոլմա» ճաշատեսակով, որի թվով 2 գլանակների մեջ թաքցված հայտնաբերվել են թմրամիջոցները։
«ԱրմենՏել» ՓԲԸ-ից ստացված 091-83-83-00, 099-13-08-01 և 091-52-18-58 հեռախոսահամարների վերծանումներով, համաձայն որի 2011թ. մարտի 27-ից մինչև 2011թ. մարտի 28-ն ընկած ժամանակահատվածում Ֆ. Գրիգորյանի կողմից օգտագործվող 091-83-83-00 հեռախոսահամարին և Մ. Մուրադյանի կողմից օգտագործվող` 091-52-18-58 հեռախոսահամարին բազմաթիվ մուտքային հեռախոսազանգեր է գրանցվել Հ. Թովմասյանի կողմից օգտագործվող 099-13-08-01 հեռախոսահամարից, ինչպես նաև գործով ձեռք բերված այլ փաստական տվյալներով։
Այսպիսով դատարանը ապացուցված համարեց, որ Հայկ Վաղինակի Թովմասյանը կատարել է արարք, որը նախատեսված է ՀՀ քր. օր-ի 34-268 հոդվածի 2-րդ մասի 2-րդ կետով, որով և պետք է ենթարկվի քրեական պատասխանատվության։
Պատիժ նշանակելիս դատարանը հաշվի է առնում արարքի հանրության համար վտանգավորությունը, աստիճանը և բնույթը, ամբաստանյալի անձը բնութագրող տվյալները, նրա պատասխանատվությունը և պատիժը մեղմացնող և ծանրացնող հանգամանքները։
Հայկ Թովմասյանի պատասխանատվությունը և պատիժը ծանրացնող հանգամանքներ չկան։
Դատարանն ամբաստանյալի պատասխանատվությունը և պատիժը մեղմացնող, ինչպես նաև անձը բնութագրող հանգամանք է համարում այն, որ վերջինս 1-ին խմբի հաշմանդամ է, զղջացել է կատարած արարքի համար և ընդունել մեղքը։
Նկատի ունենալով, որ սույն գործով Հայկ Վաղինակի Թովմասյանի նկատմամբ խափանման միջոց չի կիրառվել, հետևաբար դատարանը գտնում է, որ վերջինիս նկատմամբ ազատազրկման ձևով պատիժ նշանակելիս պատժի սկիզբը պետք է հաշվել Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 25.08.2011թ. ԵԷԴ/0067/01/11 դատավճռով որպես պատժի սկիզբ ընտրված` 25.09.2010թ.։
ՀՀ ոստիկանության ՔԳՎ Էրեբունու քննչական բաժնի 28.06.2011թ. որոշմամբ թիվ 86151811 քրեական գործից պատճենահանման եղանակով անջատվել և թիվ 12122011 համարով առանձին վարույթ է առանձնացվել Հայկ Վաղինակի Թովմասյանին ապօրինաբար խոշոր չափի` 0.04 գրամ «բուպրենորֆին» և խոշոր չափի` 1.31 գրամ «ացետիլացված ափիոն» տեսակի թմրամիջոցներ իրացրած անհայտ անձի մասը, որի գործողություններում առկա է ՀՀ քր. օր-ի 266 հոդվածի 2-րդ մասի 2-րդ և 3-րդ կետերով նախատեսված հանցագործության հատկանիշներ։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված խոշոր չափի` 0.04 գրամ ընդհանուր քաշով «բուպրենորֆին» և խոշոր չափի` 1.31 գրամ «ացետիլացված ափիոն» տեսակի թմրամիջոցները պետք է թողնել ՀՀ ոստիկանության ՔԳՎ Էրեբունու քննչական բաժնում` թիվ 86151811 քրեական գործից թիվ 12122011 համարով անջատված մասին կից՝ անհայտ անձի նկատմամբ քննություն կատարելու համար, իսկ քրեական գործին կցված և ապացույց ճանաչված այլ փաստաթուղթ հանդիսացող` Հ. Թովմասյանի բացատրությունը` թողնել քրեական գործում։
Հայկ Թովմասյանը Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 25.08.2011թ. ԵԷԴ/0067/01/11 դատավճռով ՀՀ քր. օր-ի 34-268 հոդվածի 1-ին մասով, 66 հոդվածի կիրառմամբ դատապարտվել է ազատազրկման` 6 տարի ժամկետով և տուգանքի` 80.000 ՀՀ դրամի չափով։ Նոր հանցանքը կատարել է նախքան առաջին գործով դատավճիռ կայացնելը, հետևաբար դատարանը գտնում է, որ նրա նկատմամբ պատիժ պետք է նշանակել ՀՀ քրեական օրենսգրքի 66 հոդվածի կանոններով նախատեսված հանցանքների համակցությամբ։
Վերոգրյալի հիման վրա և ղեկավարվելով ՀՀ քր. դատ. օր-ի 357-360 հոդվածներով, դատարանը.

Վ Ճ Ռ Ե Ց

Հայկ Վաղինակի Թովմասյանին մեղավոր ճանաչել ՀՀ քր. օր-ի 34-268 հոդվածի 2-րդ մասի 2-րդ կետով և դատապարտել ազատազրկման` 1/մեկ/ տարի ժամկետով։
ՀՀ քր. օր-ի 66 հոդվածի 3-րդ մասի համաձայն՝ նոր նշանակված և Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 25.08.2011թ. ԵԷԴ/0067/01/11 դատավճռով ազատազրկման ձևով նշանակված պատիժները մասնակիորեն գումարելու միջոցով, վերջնական պատիժ նշանակել ազատազրկում՝ 6/վեց/ տարի 6/վեց/ ամիս ժամկետով և տուգանք` նվազագույն աշխատավարձի ութսունապատիկի` 80.000/ութսուն հազար/ ՀՀ դրամի չափով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը` 25.09.2010թ.։
Գործով իրեղեն ապացույց ճանաչված խոշոր չափի` 0.04 գրամ ընդհանուր քաշով «բուպրենորֆին» և խոշոր չափի` 1.31 գրամ «ացետիլացված ափիոն» տեսակի թմրամիջոցները դատավճիռն օրինական ուժի մեջ մտնելուց հետո թողնել ՀՀ ոստիկանության ՔԳՎ Էրեբունու քննչական բաժնում` թիվ 86151811 քրեական գործից թիվ 12122011 համարով անջատված մասին կից՝ անհայտ անձի նկատմամբ քննություն կատարելու համար, իսկ քրեական գործին կցված և ապացույց ճանաչված այլ փաստաթուղթ հանդիսացող` Հ. Թովմասյանի բացատրությունը, թողնել քրեական գործում։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ