Ո Ր Ո Շ ՈՒ Մ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Գործ ԵԷԴ/0066/01/11
25 նոյեմբերի 2011թ. ք.Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ`
ՆԱԽԱԳԱՀՈՂ ԴԱՏԱՎՈՐ` Մ.ՊԵՏՐՈՍՅԱՆ
ԴԱՏԱՎՈՐՆԵՐ` Ա.ՊԵՏՐՈՍՅԱՆ
Ս.ՀԱՄԲԱՐՁՈՒՄՅԱՆ

ՔԱՐՏՈՒՂԱՐՈՒԹՅԱՄԲ` Ռ.ԴԱՎՈՅԱՆԻ
ՄԱՍՆԱԿՑՈՒԹՅԱՄԲ`
ՄԵՂԱԴՐՈՂ` Ա.ՄՈՒՐԱԴՅԱՆԻ
ՊԱՇՏՊԱՆ` Ա.ՋՈՒՎԱՆՈՎԱՅԻ

Դռնբաց դատական նիստում, քննելով ամբաստանյալ Կարեն Վլադիմիրի Հարությունյանի և վերջինիս շահերի պաշտպան Ա.Ջուվանովայի վերաքննիչ բողոքները` քրեական գործով ըստ մեղադրանքի Կարեն Վլադիմիրի Հարությունյանի` ՀՀ քրեական օրենսգրքի 34-268 հոդվածի 3-րդ մասով, Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի /այսուհետ դատարան/ 2011թ. օգոստոսի 24-ի դատավճռի դեմ.

Պ Ա Ր Զ Ե Ց

1/. Գործի դատավարական նախապատմությունը և փաստական հանգամանքները.
Ամբաստանյալ Կարեն Վլադիմիրի Հարությունյանը Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի որոշմամբ ՀՀ քր. օր-ի 268-րդ հոդվածի 3-րդ մասով գտնվելով կալանքի տակ, և կալանքը 02.06.2010թ. ՀՀ ԱՆ <<Նուբարաշեն>> քրեակատարողական հիմնարկում կրելու ընթացքում, առանց իրացնելու նպատակի` իր օգտագործման համար, փորձել է ձեռք բերել առանձնապես խոշոր չափի` 1.82 գրամ <<հերոին>> տեսակի թմրամիջոց.
Այսպես, քննությամբ չպարզված անձից և հանգամանքներում Կարեն Հարությունյանը իր ծանոթի` քննությամբ դեռևս չպարզված անձի հետ, պայմանավորվել է թմրամիջոց ձեռք բերելու շուրջ։ Թմրամիջոցները իրեն փոխանցելու նպատակով, 2010թ. դեկտեմբերի 14-ին զանգահարել է իր ծանոթին` Սահարոն Սիրեկանի Կարապետյանին և խնդրել է գնալ իրենց տուն, վերցնել իր համար նախատեսված հանձնուքը, այն տեղափոխել ՀՀ ԱՆ <<Նուբարաշեն>> քրեակատարողական հիմնարկ և փոխանցել իր անվամբ:
Սահարոն Կարապետյանը պայմանավորվածության համաձայն, ժամը 17:00-ի սահմաններում գնացել է Երևան քաղաքի Ս.Տարոնցի նրբանցքի 7 շենքի մոտ և Կարեն Հարությունյանի մոր` Էմմա Հակոբյանից վերցրել է ծանրոցը: Ծանրոցը վերցնելու ժամանակ իրենց է մոտեցել մի երիտասարդ, Ս.Կարապետյանին տվել է 10.000 ՀՀ դրամ գումար, պոլիէթիլենային տոպրակով արևածաղիկ և հեռացել է: Ս.Կարապետյանը արևածաղիկը տեղավորել է ծանրոցի մեջ և գնացել է քրեակատարողական հիմնարկ` հանձնուքը Կ.Հարությունյանին փոխանցելու համար, սակայն ուշ լինելու պատճառով չի կարողացել այն փոխանցել: Հաջորդ օրը առավոտյան, ժամը 11:00-ին գնացել է ՀՀ ԱՆ <<Նուբարաշեն>> քրեակատարողական հիմնարկ, լրացրել հանձնուքը Կ.Հարությունյանին փոխանցելու համար նախատեսված փաստաթղթերը և այն ներկայացրել ստուգման: Քրեակատարողական հիմնարկի աշխատակիցների կողմից հանձնուքի խուզարկության ժամանակ` հանձնուքում առկա արևածաղիկի մեջ թաքցված հայտնաբերել են առանձնապես խոշոր չափի` 1.82 գրամ <<հերոին>> տեսակի թմրամիջոց, ինչի պատճառով Կ.Հարությունյանը չի կարողացել ավարտին հասցնել իր հանցավոր մտադրությունը:
Վերը նշված հանցավոր արարքի կատարման համար Կարեն Վլադիմիրի Հարությունյանին մեղադրանք է առաջադրվել ՀՀ քր. օր-ի 34-268 հոդվածի 3-րդ մասով։
Կատարած հանցագործության համար ամբաստանյալ Կարեն Վլադիմիրի Հարությունյանը մեղավոր է ճանաչվել ՀՀ քրեական օրենսգրքի 34-268-րդ հոդվածի 3-րդ մասով և դատապարտվել է ազատազրկման` 3/երեք/ տարի ժամկետով:
ՀՀ քրեական օրենսգրքի 66-րդ հոդվածի 4-րդ մասի համաձայն` նոր նշանակված և Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 22.12.2010թ. ԵԿԴ/0297/01/10 դատավճռով նշանակված պատիժները մասնակիորեն գումարելու միջոցով, վերջնական պատիժ է նշանակվել ազատազրկում` 6/վեց/ տարի ժամկետով, որը պետք է կրի ՀՀ ԱՆ համապատասխան քրեակատարողական հիմնարկում` պատժի սկիզբը հաշվելով 02.06.2010թ.-ից:
Վճռվել է գործով իրեղեն ապացույց ճանաչված արևածաղիկը դատավճիռն օրինական ուժի մեջ մտնելուց հետո ոչնչացնել, իսկ արևածաղկի մեջ հայտնաբերված առանձնապես խոշոր չափի` 1.82 գրամ <<հերոին>> տեսակի թմրամիջոցը` թողնել ՀՀ ոստիկանության ՔԳՎ Էրեբունու քննչական բաժնում` թիվ 12149110 քրեական գործից թիվ 12112711 համարով անջատված մասին կից` անհայտ անձի նկատմամբ քննություն կատարելու համար:

2/. Վերաքննիչ բողոքի հիմքերը, փաստարկները և պահանջը.
Դատավճռի դեմ վերաքննիչ բողոք են բերել ամբաստանյալ Կ.Հարությունյանը և վերջինիս շահերի պաշտպան Ա.Ջուվանովան` հետևյալ հիմքերի սահմաններում ներքոհիշյալ հիմնավորումներով.
Ըստ ամբաստանյալի` իրեն դատապարտել են չկատարած հանցանքի համար, նախաքննությունը և դատաքննությունն անց են կացվել միակողմանի, իսկ մեղադրանքը հիմնված է ենթադրությունների վրա:
Մազի նմուշի 11.03.2011թ. փորձաքննության եզրակացությունը որևէ կապ չունի իրեն առաջադրված մեղադրանքի հետ, իսկ 27.03.2007թ. <<ՀԲԿ>>-ի եզրակացությունը հանցագործության ապացույց չի կարող հանդիսանալ:
Դատարանն իրեն դատապարտել է` հիմնվելով նախկին դատվածությունների վրա:
Դատաքննության ընթացքում դատախազը փորձել է ճնշում գործադրել վկա Ս.կարապետյանի վրա, սակայն վկան հաստատել է իր նախկին ցուցմունքները:
Դատարանն անտեսել է այն հանգամանքը, որ ինքը 2007թ. հաշմանդամ է, որը վկայում է նրա վերաբերմունքի մասին:
Վերոգրյալի հիման վրա խնդրել է բեկանել Էրեբունի և Նուբարաշեն վարչական շրջանների դատարանի 24.08.2011թ. դատավճիռը և իրեն արդարացնել առաջադրված մեղադրանքում:
Պաշտպանը ներկայացնելով գործի նախապատմությունը և մեջբերելով այն ապացույցները, որոնցով դատարանը հիմնավորված է համարել ամբաստանյալին մեղսագրված արարքը` հայտնել է, որ այդ ապացույցներից որևէ մեկով չի հաստատվել Կ.Հարությունյանին մեղսագրվող ՀՀ քրեական օրենսգրքի 34-268-րդ հոդվածի 3-րդ մասով նախատեսված հանցանքը:
Դատարանը դատավճիռ կայացնելիս հիմնվել է զուտ ենթադրությունների վրա` ի խախտումն ՀՀ քրեական դատավարության օրենսգրքի 18-րդ հոդվածի 3-րդ մասի:
Գործով ձեռք բերված և դատարանում հետազոտված ապացույցներով հիմնավորվել է, որ Կ.Հարությունյանը չի կատարել քրեական օրենքով արգելված արարք, այսինքն անհայտ անձի հետ չի պայմանավորվել, որ վերջինս թմրամիջոց թաքցնի արևածաղկի սերմի մեջ և ուղարկի իրեն:
Դատարանը յուրովի է մեկնաբանել դատարանում հարցաքննված վկաների ցուցմունքները: Դրանք չեն ապացուցում Կ.Հարությունյանի մեղադրանքը:
Վկա Սահարոն Կարապետյանի ցուցմունքով, ով նշեց, որ Կարեն Հարությունյանին ճանաչում է կալանավայրից, դեպքի օրը Կարենը զանգահարել է իրեն և խնդրել, որ ինքը Կարենի մոր Էմմա Հակոբյանից վերցնի նախապես պատրաստված հանձնուքը և հանձնի <<Նուբարաշեն>> ՔԿՀ հանձնուքների բաժնում, իրեն է խնդրել է իրեն, քանի որ մայրը վատառողջ տարեց կին է և չի կարող անձամբ տանել հանձնուքը:
Ինքը համաձայնվել և գնացել է Կարենի մոր տան մոտ, որտեղ իրեն սպասում էր Էմմա Հակոբյանը` Կարենի մայրը: Վերջինիցս վերցնելով նախապես պատրաստված հանձնուքը և ցուցակը հասկացել է, որ տաքսու գումար չկա, այդ պահին կրկին իրեն է զանգել Կարենը, և ինքը հարցրել է, թե ինչպես պետք է վճարի տաքսու ծառայության համար, Կարենը պատասխանել է, որ հիմա կմոտենան քեզ և գումար կտան: Հենց այդ պահին մի քաղաքացի` նույնպես տաքսի ավտոմեքենայով մոտեցել է և իրեն է հանձնել գումար, և չգիտի, թե ինչու արևածաղկի սերմ: Արևածաղկի սերմը իրեն տալու հանգամանքի մասին ինքը չի հարցրել ոչ այդ անձնավորությանը և ոչ էլ Կարենին: Այլ վերցրել է և ընթացքում տեղավորելով արդեն իսկ պատրաստված հանձնուքի պայուսակի մեջ տարել իր հետ մեկուսարան:
Վկա Կարապետյանը նշել է նաև, որ ինքը այդ տղային չի ճանաչում, մի ակնթարթ է տեսել և ուրիշ ոչ մի բառ չի փոխանակել նրա հետ:
Վկա Էմմա Հակոբյանի ցուցմունքի համաձայն` ինքը որդու համար հանձնուք է պատրաստել և պայմանավորվածության համաձայն շենքի բակում սպասել է, որ Ս.Կարապետյանը գա և տանի: Սահակը եկել է, ինքը հանձնուքը և ցուցակը տվել է իրեն, այդ պահին մի տղա է մոտեցել մեքենայով:
Վկայակոչելով ՀՀ քրեական օրենսգրքի 3-րդ, 18-րդ, ՀՀ քրեական դատավարության օրենսգրքի 358-րդ հոդվածները` խնդրել է բեկանել Էրեբունի և Նուբարաշեն վարչական շրջանների ընդհանուր իրավասության դատարանի 24.08.2011թ. դատավճիռը, որոշում կայացնել Կարեն Հարությունյանին ՀՀ քրեական օրենսգրքի 34-268-րդ հոդվածի 3-րդ մասով մեղսագրվող արարքում անպարտ ճանաչելու մասին:



3/.Վերաքննիչ դատարանի պատճառաբանությունները և եզրահանգումները.
Վերաքննիչ դատարանը, քննության առնելով վերաքննիչ բողոքը բողոքի հիմքերի և հիմնավորումների սահմաններում, լսելով բողոքներում ներկայացված հետևությունները հիմնավորելու մասին ամբաստանյալ Կ.Հարությունյանի և վերջինիս շահերի պաշտպան Ա.Ջուվանովայի ելույթները վերաքննիչ բողոքների կապակցությամբ, մեղադրողի պատասխանը բողոքների դեմ, ստուգելով գործի փաստական հանգամանքների բացահայտման ու քրեական օրենքի կիրառման ճշտությունը, գործը քննելիս և լուծելիս քրեադատավարական օրենքի նորմերի պահպանումը, ինչպես նաև ուսումնասիրելով և վերլուծելով քրեական գործի նյութերը, դրանք գնահատելով իրենց համակցությամբ հանգում է այն հետևության, որ ամբաստանյալ Կարեն Վլադիմիրի Հարությունյանի մեղքը` ՀՀ քրեական օրենսգրքի 34-268-րդ հոդվածի 3-րդ մասով, նախատեսված արարքը կատարելու մեջ հաստատված է պատշաճ իրավական ընթացակարգի շրջանակներում ձեռք բերված փաստական տվյալներով, իսկ ամբաստանյալ Կ.Հարությունյանի և վերջինիս շահերի պաշտպան Ա.Ջուվանովայի կողմից բերված վերաքննիչ բողոքների եզրահանգումներն անհիմն են և ենթակա մերժման հետևյալ պատճառաբանությամբ.
ՀՀ քրեական օրենսգրքի 34-268-րդ հոդվածի 3-րդ մասով առաջադրված մեղադրանքում Կարեն Վլադիմիրի Հարությունյանն իրեն մեղավոր չի ճանաչել և ցուցմունք է տվել այն մասին, որ 2010թ. դեկտեմբերի 14-ին իրեն է զանգահարել անծանոթ մի տղամարդ, որը ներկայացել է ոմն <<ճուտո>> մականունով և հայտնել է, որ եկել է ՌԴ-ից և տվել է իր ընկերներից մի քանիսի անունները, որոնք խնդրել են վերջինիս, եթե կարիք կա իրեն օգտակար լինի։ Ինքը նրան պատասխանել է, որ ոչ մի բանի կարիք չունի։ Ոմն <<ճուտոն>> ասել է, եթե ցանկանում է, կարող է հանձնուք ուղարկել իր համար, սակայն ինքը դրանից էլ է հրաժարվել, միայն նրան խնդրել է, որ իրենց տանը իր համար նախատեսված պատրաստի հանձնուք կա, սակայն մայրը հիվանդ է չի կարող բերել, եթե կարող է ճանապարհածախսի համար վճարել, ինքը ինչ-որ մեկին կխնդրի դա կփոխանցեն իրեն։ Վերջինս համաձայնվել է, որից հետո ինքը նրան ասել է, որ գումարը տա իր մորը և զանգահարել է իր մտերիմ Սահարոնին, որին խնդրել է իրենց տանից վերցնել իր համար պատրաստված հանձնուքը և փոխանցել իրեն, միաժամանակ նրան հայտնել է, որ մայրը ճանապարհածախսի գումարը կտա։
Ինքը որևէ մեկից թմրամիջոց չի ուզել, առավել ևս արևածաղիկ չի խնդրել, որ ուղարկեն իրեն: Թե այդ անձնավորությունը ինչ նպատակով է արևածաղիկ ուղարկել իրեն և ինչի է դրա մեջ թմրամիջոց դրել, չգիտի, ինքը նրանից միայն խնդրել է ճանապարհածախսի գումարը տա, ուրիշ ոչինչ, մնացածը նրա նախաձեռնությունն է եղել, որից ինքը տեղյակ չէ։
Դատարանը վերլուծության և գնահատության ենթարկելով ամբաստանյալ Կարեն Հարությունյանի ցուցմունքները, այն համադրելով գործով ձեռք բերված և դատավճռի հիմքում դրված մյուս ապացույցների հետ, այդպիսիք գնահատելով իրենց ամբողջության մեջ, իրավացիորեն գտել է, որ Կարեն Հարությունյանի պատճառաբանություններն անհիմն են ու մտածացին և դրանք նպատակ են հետապնդում խուսափելու քրեական պատասխանատվությունից և պատժից:
Ամբաստանյալ Կարեն Հարությունյանի կողմից կատարած հանցավոր արարքը և նրա մեղավորությունն իրեն մեղսագրված հանցագործությունը կատարելու մեջ հիմնավորվել է քրեական գործով ձեռք բերված ներքոհիշյալ հետևյալ ապացույցներով.
Վկա` Սահարոն Կարապետյանի ցուցմունքով այն մասին, որ 2010թ. հոկտեմբերի 14-ին, ժամը 12:00-ի սահմաններում իրեն է զանգահարել ՀՀ ԱՆ <<Նուբարաշեն>> քրեակատարողական հիմնարկի կալանավոր` իր ծանոթ Կարեն Վլադիմիրի Հարությունյանը և խնդրել է գնալ իրենց տուն, մորից` Էմմա Հակոբյանից, վերցնի իր համար նախատեսված հանձնուքը, այն տեղափոխի քրեակատարողական հիմնարկ և հանձնի իր անվամբ։ Քիչ անց կրկին զանգահարել և ասել է, որ մայրը հանձնուքը պատրաստել է, սակայն գումար չկա, լինելու դեպքում լրացուցիչ կզանգահարի: Ժամը 17:00-ի սահմաններում նորից է զանգահարել և ասել է, որ ճանապարհածախսը պատրաստ է, տաքսի վերցնի և գնա իրենց տուն: Ինքը նստել է Սամվել Բաղդասարյանի վարած ՎԱԶ-2107 մակնիշի տաքսի ավտոմեքենան, գնացել է Կարեն Հարությունյանենց տուն, որտեղ շենքի բակում հանդիպել է նրա մորը` Էմմա Հակոբյանին, որից վերցրել է հանձնուքը, տեղավորել մեքենայի մեջ և սպասել է մինչև բերեն ճանապարհածախսը։ Քիչ անց իրենց է մոտեցել մի երիտասարդ, տվել է 10.000 ՀՀ դրամ գումար, պոլիէթիլենային տոպրակով արևածաղիկ և հեռացել է։ Այնուհետև, իրենք ուղևորվել են քրեակատարողական հիմնարկ, սակայն ուշ լինելու պատճառով չի կարողացել հանձնուքը փոխանցել և վերադարձել է տուն: Հաջորդ օրը` 2010թ. դեկտեմբերի 15-ի առավոտյան, ժամը 9:00-ի սահմաններում զանգահարել է Կարեն Հարությունյանը և խնդրել է շտապ հանձնուքը տանել քրեակատարողական հիմնարկ: Նորից Ս.Բաղդասարյանի տաքսի ավտոմեքենայով գնացել են քրեակատարողական հիմնարկ, լրացրել պահանջվող փաստաթղթերը և հանձնուքը ներկայացրել ստուգման։ Իր ներկայությամբ հանձնուքի ստուգմամբ նախորդ օրը անծանոթ երիտասարդի կողմից տված արևածաղիկի սերմերի միջից հայտնաբերվել է պոլիէթիլենային փաթեթի մեջ փաթեթավորված փոշենման զանգվածներ:
Վկա` Էմմա Հակոբյանի ցուցմունքով այն մասին, որ Կարեն Վլադիմիրի Հարությունյանը իր որդին է, վերջինս 2010թ. հունիս ամսից կալանքի տակ է ՀՀ ԱՆ <<Նուբարաշեն>> քրեակատարողական հիմնարկում: 2010թ. դեկտեմբերի սկզբներին որդին զանգահարել է իրեն և խնդրել է հագուստներ ուղարկել: Մի քանի օր անց կրկին զանգահարել և հարցրել է հանձնուքը պատրաստ է, թե ոչ։ Ինքը պատասխանել է, որ պատրաստ է, սակայն վատառողջ լինելու պատճառով, չի կարող այն բերել: Որդին ասել է, որ ինքը մարդ կուղարկի կգան կտանեն: Մոտ մեկ ժամ անց զանգահարել և ասել է, որ հանձնուքը իջացնի բակ: Ինքը, վերցնելով որդու հագուստները և իր կողմից պատրաստված հանձնուքը, իջեցրել է բակ, որտեղ քիչ անց իրեն է մոտեցել Սահարոնը և վերցրել է հանձնուքը: Հանձնուքը վերցնելուց քիչ անց, բակ է եկել մի երիտասարդ, Սահարոնին է փոխանցել մի փաթեթ և հեռացել է: Հետագայում տեղեկացել է, որ որդու անվամբ ներկայացված հանձնուքի մեջ թմրամիջոց է հայտնաբերվել:
Վկաներ` ՀՀ ԱՆ <<Նուբարաշեն>> քրեակատարողական հիմնարկի անվտանգության ապահովման բաժնի աշխատակիցներ Հովհաննես Մանջիկյանի և Ստեփան Մշեցյանի նույնաբովանդակ ցուցմունքներով այն մասին, որ 2010թ. դեկտեմբերի 15-ին, ժամը 11:00-ի սահմաններում ՀՀ ԱՆ <<Նուբարաշեն>> քրեակատարողական հիմնարկի հանձնուքների ընդունման սենյակում կատարել են քրեակատարողական հիմնարկի դատապարտյալ Կարեն Վլադիմիրի Հարությունյանի անվամբ բերված հանձնուքի զննություն, որի մեջ առկա արևածաղկի սերմերի մեջ թաքցված հայտնաբերվել է թվով 57 հատ պոլիէթիլենային փաթեթների մեջ փաթեթավորված փոշենման զանգվածներ, որոնք ընթերականների ներկայությամբ կշռվել, փաթեթավորվել և կազմվել է համապատասխան արձանագրություն: Զննության ժամանակ հանձնուքը ներկայացրած Սահարոն Կարապետյանը հայտարարել է, որ հանձնուքը` բացառությամբ արևածաղկի, 2010թ. դեկտեմբերի 14-ին վերցրել է Կ.Հարությունյանի մորից` Էմմայից, իսկ արևածաղիկը մոր ներկայությամբ իրեն է փոխանցել իրեն անծանոթ մի երիտասարդ:
Վկա` Սամվել Բաղդասարյանի նախաքննությամբ տրված և դատաքննությամբ հետազոտված ցուցմունքով այն մասին, որ վարում է ՎԱԶ-2107 մակնիշի 02 ԼՕ 03 պետհամարանիշի տաքսի ավտոմեքենան։ 2010թ. դեկտեմբերի 14-ին, ժամը 17:00-ի սահմաններում իրեն զանգահարել և պատվիրել են գնալ Ս.Տարոնցի փողոց, այնուհետև ՀՀ ԱՆ <<Նուբարաշեն>> քրեակատարողական հիմնարկ: Ինքը գնացել է նշված վայրը, որտեղից վերցրել է Սահարոն Կարապետյանին, ապա գնացել են Ս.Տարոնցի փողոցի 7 շենքի մոտ, որտեղ Սահարոնը հանդիպել է մի տարեց կնոջ, նրանից վերցրել է ծանրոցներ և տեղավորել ավտոմեքենայի բեռնախցում: Մոտ 2 րոպե անց նույն շենքի բակ է եկել սպիտակ գույնի ՎԱԶ-2107 մակնիշի տաքսի ծառայության ավտոմեքենա, որի վարորդի կողքի նստատեղից իջել է մի երիտասարդ, մոտեցել է Սահարոնին, նրան է փոխանցել ինչ-որ փաթեթ և հեռացել է: Սահարոնի պահանջով իրենք գնացել են ՀՀ ԱՆ <<Նուբարաշեն>> քրեակատարողական հիմնարկ, որտեղ վերջինս վերցրել է ծանրոցները և մտել է քրեակատարողական հիմնարկ։ Որոշ ժամանակ անց հետ է վերադարձել և հայտնել է, որ ուշ լինելու պատճառով հանձնուքը չեն ընդունել, ուստի խնդրել է իրեն հետ տանել տուն։ Հաջորդ օրը` 2010թ. դեկտեմբերի 15-ին, առավոտյան ժամը 09:30-ի սահմաններում Սահարոն Կարապետյանին նորից տարել է քրեակատարողական հիմնարկ, որտեղ վերջինս նորից վերցրել է ծանրոցները և մտել է ներս։ Որոշ ժամանակ անց իրեն են մոտեցել քրեակատարողական հիմնարկի աշխատակիցները և հրավիրել են ներս, որտեղ ինքը իմացել է, որ Ս.Կարապետյանի կողմից ներկայացված հանձնուքում ինչ-որ կասկածելի փոշենման զանգվածներ են հայտնաբերվել։
Կարեն Հարությունյանի հանցանքը հիմնավորվել է նաև ՀՀ <<Փորձագիտական կենտրոն>> ՊՈԱԿ-ի կողմից 16.12.2010թ. տրված դատաքիմիական փորձաքննության թիվ 44701005 եզրակացությամբ, համաձայն որի փորձաքննությանը ներկայացված 57 հատ, պոլիէթիլենային թաղանթներով փաթեթավորված, բաց շագանակագույն փոշենման զանգվածները հանդիսանում են ընդհանուր 1.82 գրամ քաշով, տնայնագործական եղանակով պատրաստված <<հերոին>> տեսակի թմրամիջոց։
Հանձնուքի զննություն կատարելու արձանագրությամբ, համաձայն որի 2010թ. դեկտեմբերի 15-ին ՀՀ ԱՆ <<Նուբարաշեն>> քրեակատարողական հիմնարկի աշխատակիցների կողմից ՀՀ ԱՆ <<Նուբարաշեն>> քրեակատարողական հիմնարկի կալանավոր Կարեն Հարությունյանի անվամբ Սահարոն Կարապետյանի կողմից ներկայացված հանձնուքում արևածաղիկի սերմերի մեջ թաքցված հայտնաբերվել է թվով 57 հատ պոլիէթիլենային փաթեթների մեջ փաթեթավորված կասկածելի բաց շագանակագույն զանգվածներ։
18.04.2011թ. որոշմամբ իրեղեն ապացույց ճանաչված 1.82 գրամ քաշով <<հերոին>> տեսակի թմրամիջոցով և արևածաղիկի սերմերով:
<<Ղ-Տելեկոմ>> ՓԲԸ-ից ստացված 093-04-85-48 և 098-06-61-05 հեռախոսահամարների վերծանումներով, համաձայն որի 2010թ. դեկտեմբերի 14-ից մինչև 2010թ. դեկտեմբերի 15-ն ընկած ժամանակահատվածում Ս.Կարապետյանի կողմից օգտագործվող 093-04-85-48 հեռախոսահամարից բազմաթիվ փոխադարձ հեռախոսազանգեր են կայացվել Կ.Հարությունյանի կողմից օգտագործվող 098-06-61-05 հեռախոսահամարին։
ՀՀ <<Փորձաքննությունների ազգային բյուրո>> ՊՈԱԿ-ի կողմից 11.03.2011թ. տրված տոկսիկոքիմիական փորձաքննության թիվ 11-0370 եզրակացությամբ, համաձայն որի Կարեն Վլադիմիրի Հարությունյանից վերցված մազի փորձանմուշի մեջ հայտնաբերվել են ափիոնի խմբին պատկանող թմրամիջոցի թմալկալոիդների հետքեր:
ՀՀ ԱՆ <<Հոգեբուժական բժշկական կենտրոն>> ՓԲԸ նարկոլոգիական կլինիկայի դատանարկոլոգիական հանձնաժողովի կողմից 27.03.2007թ. տրված եզրակացությամբ, համաձայն որի Կարեն Վլադիմիրի Հարությունյանը տառապում է թմրամոլությամբ, սակայն հարկադիր բուժումը հակացուցված է, քանի որ տառապում է TBC-ով, ԲԿ դրական փուլում:
Վերոգրյալ հիմքերի առկայության պայմաններում, վերաքննիչ դատարանը վերլուծության ու գնահատության ենթարկելով քրեական գործում առկա ապացույցները, դրանցից յուրաքանչյուրը գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ներքին համոզմամբ հանգում է այն հետևության, որ Կարեն Վլադիմիրի Հարությունյանին` ՀՀ քրեական օրենսգրքի 34-268-րդ հոդվածի 3-րդ մասով մեղսագրված արարքը հիմնավորված և հաստատված է գործին վերաբերվող փոխկապակցված, հավաստի ապացույցների բավարար ամբողջությամբ, քրեական գործի ինչպես նախաքննության, այնպես էլ դատաքննության ընթացքում քրեադատավարական օրենքի էական խախտումներ, որոնք գործին մասնակցող անձանց օրենքով երաշխավորված իրավունքներից զրկելու կամ դրանցում սահմանափակելու կամ այլ ճանապարհով խոչընդոտել են գործի հանգամանքների բազմակողմանի, լրիվ և օբյեկտիվ հետազոտմանը, ազդել են կամ կարող են ազդել գործով ճիշտ որոշում կայացնելու վրա, թույլ չեն տրվել և գործի փաստական հանգամանքների մասին դատարանի դատավճռում շարադրված հետևությունները բխում են քրեական գործով ձեռք բերված ապացույցներից, ամբաստանյալի գործողություններում առկա են իրեն առաջադրված մեղադրանքը հաստատող օբյեկտիվ տվյալներ, որի համար նա պետք է ենթարկվի քրեական պատասխանատվության և պատժի:
Այսպիսով, Վերաքննիչ դատարանն արձանագրում է, որ քրեական գործի նախաքննության ընթացքում ձեռք բերված բոլոր ապացույցները հանգամանորեն հետազոտվել և օբյեկտիվ գնահատման են ենթարկվել դատաքննության ընթացքում և եզրակացությունները կառուցվել են միայն ապացույցների համալիր գնահատականի հիման վրա, հետևաբար ամբաստանյալ Կարեն Հարությունյանի և վերջինիս շահերի պաշտպանի կողմից բերված վերաքննիչ բողոքները բավարարելու և ամբաստանյալի վերաբերյալ ՀՀ քրեական օրենսգրքի 34-268-րդ հոդվածի 3-րդ մասով դատավճիռը բեկանելու և արդարացման դատավճիռ կայացնելու օբյեկտիվ հիմքեր չկան:
Քրեական գործի քննության նախորդ փուլում թույլ չեն տրվել նյութական և դատավարական իրավունքի նորմերի այնպիսի խախտումներ, որոնք կհանգեցնեին դատական սխալի:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-394-րդ, 402-րդ հոդվածներով, վերաքննիչ դատարանը

Ո Ր Ո Շ Ե Ց
Ամբաստանյալ Կարեն Վլադիմիրի Հարությունյանի և վերջինիս շահերի պաշտպան Ա.Ջուվանովայի վերաքննիչ բողոքները մերժել:
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 2011թ. օգոստոսի 24-ի դատավճիռը` Կարեն Վլադիմիրի Հարությունյանի վերաբերյալ` ՀՀ քրեական օրենսգրքի 34-268 հոդվածի 3-րդ մասով, թողնել օրինական ուժի մեջ:
Որոշումը կարող է բողոքարկվել ՀՀ Վճռաբեկ դատարանին` հրապարակման պահից մեկամսյա ժամկետում:

ՆԱԽԱԳԱՀՈՂ ԴԱՏԱՎՈՐ` Մ. ՊԵՏՐՈՍՅԱՆ

ԴԱՏԱՎՈՐՆԵՐ` Ա.ՊԵՏՐՈՍՅԱՆ

Ս.ՀԱՄԲԱՐՁՈՒՄՅԱՆ