Գործ հա. ԵԷԴ/0057/01/11
2011թ.

ՈՐՈՇՈՒՄ
ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ ՔՐԵԱԿԱՆ
ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը հետևյալ կազմով.
Նախագահող դատավոր Վլադիմիր Գրիգորյան
Քարտուղար Արմինե Արղամանյան
Մասնակցությամբ՝
Ամբաստանյալներ Երվանդ Նավասարդյան
Արսեն Պողոսյան
Ամբաստանյալների պաշտպաններ Հովիկ Արսենյան
Ամալյա Ավագյան
Տուժող Արաբո Հարությունյան
Մեղադրող Արարատ Գասպարյան

2011թ-ի հունիսի 03-ին դատարանում.
Դռնբաց դատական նիստում քննության առնելով ամբաստանյալներ Երվանդ Վաչագանի Նավասարդյանի և Արսեն Կորյունի Պողոսյանի միջնորդությունները` իրենց նկատմամբ ՀՀ Ազգային ժողովի 26.05.2011թ. ընդունած «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» որոշումը կիրառելու, թիվ ԵԷԴ/0057/01/11 քրեական գործը կարճելու և քրեական հետապնդումը դադարեցնելու մասին

ՊԱՐԶԵՑ

Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի վարույթում քննվող ԵԷԴ/0057/01/11 քրեական գործով ամբաստանյալ Երվանդ Վաչագանի Նավասարդյանը /ծնվ. 15.12.1992թ. Լոռու մարզի Մղարթ գյուղում, ազգությունը հայ, Հայաստանի Հանրապետության քաղաքացի, միջնակարգ կրթությամբ, չդատված, ամուրի, ՀՀ ՊՆ 24923 զորամասի ժամկետային զինծառայող, 4-րդ ջոկատի 11-րդ վաշտի 2-րդ խմբի 2-րդ ջոկի հետախույզ-դիպուկահար, շարքային, բնակ. գ. Մղարթ Լոռու մարզ/ մեղադրվում է ՀՀ քրեական օրենսգրքի 360-րդ հոդվածի 1-ին մասով այն բանում, որ նա հանդիսանալով ՀՀ ՊՆ 24923 զորամասի 4-րդ ջոկատի 11-րդ վաշտի 2-րդ խմբի 2-րդ ջոկատի հետախույզ-դիպուկահար, կոչումով շարքային, 2010 թվականի նոյեմբերի 22-ին, ժամը 19։30-ի սահմաններում զորամասի թեյարանի հարևանությամբ, զինվորական ծառայության պարտականությունները կատարելու կապակցությամբ` անվայել պահվածքի համար, իր դիտողությունն անտեսած համածառայող, շարքային Արաբո Ռոբերտի Հարությունյանին, բռնել է նրա օձիքից և քաշքշել, որի ընթացքում ձեռքով հարվածել է նրա ծնոտին` անպարկեշտ ձևով ստորացնելով վերջինիս պատիվն ու արժանապատվությունը։
Գործով մյուս ամբաստանյալ Արսեն Կորյունի Պողոսյանը /ծնվ. 22.10.1984թ. Գեղարքունիքի մարզի Վաղաշեն գյուղում, ազգությունը հայ, Հայաստանի Հանրապետության քաղաքացի, միջնակարգ կրթությամբ, ամուսնացած, խնամքին երկու երեխա, ծնված 17.01.2006թ. և 24.07.2008թ., չդատված, չի աշխատում, բնակ. Գեղարքունիքի մարզ գ. Վաղաշեն 27փող. տուն 25/ մեղադրվում է ՀՀ քրեական օրենսգրքի 258-րդ հոդվածի 2-րդ մասով այն բանի համար, որ նա 2010 թվականի նոյեմբերի 23-ին ժամը 02։30-ի սահմաններում, ոգելից խմիչք օգտագործած վիճակում, մուտք է գործել ՀՀ ՊՆ թիվ 24923 զորամասի 4-րդ գումարտակի զորանոց և դիտավորությամբ, կոպիտ կերպով խախտելով հասարակական կարգը` քնած զինծառայողների անդորրը, բացահայտ անհարգալից վերաբերմունք դրսևորելով զինծառայողների նկատմամբ, համագյուղացի` նույն զորամասի ժամկետային զինծառայող, շարքային Արաբո Ռոբերտի Հարությունյանին նեղացնելու կապակցությամբ, շուրջ 10 րոպե տևողությամբ վիճաբանել նշված գումարտակի ժամկետային զինծառայողներ, շարքային Երվանդ Վաչագանի Նավասարդյանի ու եֆրեյտոր Նորիկ Կորյունի Հարությունյանի հետ, որի ընթացքում սեռական բնույթի հայհոյանքներ է տվել նրանց հասցեին, քաշքշել և հարվածներ է հասցրել վերջիններիս, որն էլ հնարավոր է եղել կանխել զինծառայողների միջամտության արդյունքում։
Փաստի առթիվ ՀՀ ՊՆ քննչական ծառայության 4-րդ կայազորային քննչական բաժնի կողմից 10.01.2011թ. ՀՀ քրեական օրենսգրքի 258-րդ հոդվածի 3-րդ մասի 1-ին կետով հարուցվել է թիվ 90250111 քրեական գործը և նախաքննություն է կատարվել։
30.03.2011թ. որոշում է կայացվել Արսեն Կորյունի Պողոսյանին ՀՀ քրեական օրենսգրքի 258-րդ հոդվածի 2-րդ մասով որպես մեղադրյալ ներգրավելու մասին, խափանման միջոց է կիրառվել ստորագրություն չհեռանալու մասին։
Առաջադրված մեղադրանքում Արսեն Կորյունի Պողոսյանն իրեն լիովին մեղավոր է ճանաչել։
01.04.2011թ. որոշում է կայացվել Երվանդ Վաչագանի Նավասարդյանին ՀՀ քրեական օրենսգրքի 360-րդ հոդվածի 1-ին մասով որպես մեղադրյալ ներգրավելու մասին, որպես խափանման միջոց է կիրառվել զորամասի հրամանատարության հսկողությանը հանձնելը։
Առաջադրված մեղադրանքում Երվանդ Վաչագանի Նավասարդյանն իրեն լիովին մեղավոր է ճանաչել։
Մեղադրական եզրակացությունը հաստատվել է 11.04.2011թ։
Քրեական գործը 13.04.2011թ. մուտք է եղել Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարան։
Քրեական գործով դատաքննությունն սկսվել է 27.04.2011թ.։
Հերթական դատական նիստի ժամանակ` 03.06.2011թ., ամբաստանյալներ Երվանդ Վաչագանի Նավասարդյանը և Արսեն Կորյունի Պողոսյանը միջնորդել են դատարանին` իրենց նկատմամբ կիրառել ՀՀ Ազգային ժողովի 26.05.2011թ. ընդունած «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» որոշումը և թիվ ԵԷԴ/0057/01/11 քրեական գործի վարույթը կարճել և իրենց նկատմամբ քրեական հետապնդումը դադարեցնել։
Քննության առնելով ամբաստանյալներ Երվանդ Վաչագանի Նավասարդյանի և Արսեն Կորյունի Պողոսյանի միջնորդությունները և լսելով դատավարության մյուս մասնակիցների կարծիքը, դատարանը գտնում է, որ ամբաստանյալներ Երվանդ Վաչագանի Նավասարդյանի և Արսեն Կորյունի Պողոսյանի միջնորդությունները հիմնավոր են և դրանք պետք է բավարարել։
ՀՀ քրեական օրենսգրքի 360-րդ հոդվածի 1-ին մասի սանկցիան նախատեսում է կալանք` առավելագույնը երկու ամիս ժամկետով, կամ կարգապահական գումարտակում պահելով` առավելագույնը վեց ամիս ժամկետով։
ՀՀ քրեական օրենսգրքի 258-րդ հոդվածի 2-րդ մասի սանկցիան նախատեսում է տուգանք` նվազագույն աշխատավարձի հարյուրապատիկից երեքհարյուրապատիկի չափով, կամ կալանք` մեկից երեք ամիս ժամկետով, կամ ազատազրկում` առավելագույնը երկու տարի ժամկետով։
ՀՀ Ազգային ժողովի 26.05.2011թ. «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» որոշման 6-րդ կետի 2-րդ ենթակետի պահանջի համաձայն` պետք է կարճվեն դատարանի վարույթում գտնվող այն քրեական գործերը, դադարեցնելով քրեական հետապնդումը մինչև 01.05.2011թ. կատարված հանցագործությունների այն դեպքերով, որոնցով հանցանք կատարած անձինք մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում։
Նույն որոշման 13-րդ կետի 1-ին կետի «ա» ենթակետի համաձայն` որոշման կատարումը վերապահվել է դատարաններին այն անձանց նկատմամբ, որոնց վերաբերյալ գործերը գտնվում են դատարաններում, սակայն մինչև համաներում հայտարարելու մասին որոշումն ուժի մեջ մտնելը չեն քննվել։ Թիվ ԵԷԴ/0057/01/11 քրեական գործի դատաքննությունը դեռևս չի ավարտվել։
Դատարանը գտնում է, որ գործով բացակայում են ՀՀ ԱԺ 26.05.2011թ. «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» որոշման կիրառումը բացառող հիմքերը, որոնք նախատեսված են նշված որոշման 9-րդ կետի 1-12-րդ ենթակետերում։
ՀՀ քրեական օրենսգրքի 35-րդ հոդվածի 1-ին մասի 13-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման ակտ։
ՀՀ քրեական դատավարության օրենսգրքի 35-րդ հոդվածի 6-րդ մասի համաձայն, նույն հոդվածի 1-ին մասի 13-րդ կետում նշված հիմքով գործի վարույթի կարճում և քրեական հետապնդման դադարեցում չի թույլատրվում, եթե դրա դեմ առարկում է մեղադրյալը։ Այդ դեպքում գործի վարույթը շարունակվում է սովորական կարգով։
ՀՀ քրեական դատավարության օրենսգրքի 313-րդ հոդվածի համաձայն` այն բոլոր հարցերի կապակցությամբ, որոնք լուծվում են դատարանի կողմից դատական քննության ժամանակ, դատարանը որոշումներ է կայացնում։
Քրեական գործը կարճելու մասին որոշումը դատարանը կայացնում է խորհրդակցական սենյակում։
Այսպիսով, վերոգրյալի հիմնավորմամբ դատարանը գտնում է, որ գործով ամբաստանյալներ Երվանդ Վաչագանի Նավասարդյանի և Արսեն Կորյունի Պողոսյանի միջնորդությունները` իրենց նկատմամբ համաներում կիրառելու, քրեական գործի վարույթը կարճելու և իրենց նկատմամբ քրեական հետապնդումը դադարեցնելու մասին, հիմնավոր է և ենթակա է բավարարման։
Հիմք ընդունելով ՀՀ ԱԺ 26.05.2011թ. «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» որոշման 6-րդ կետի 2-րդ ենթակետը և 13-րդ կետի 1-ին կետի «ա» ենթակետը և ղեկավարվելով ՀՀ քրեական դատավարության օրենսգրքի 41-րդ, 44-րդ հոդվածների, 35-րդ հոդվածի 1-ին մասի 13-րդ կետի և նույն հոդվածի 6-րդ մասի, 313-րդ, 376-րդ, 3761-րդ և 379-րդ հոդվածների պահանջներով, ՀՀ դատական օրենսգրքի 20-րդ հոդվածով, դատարանը

ՈՐՈՇԵՑ

Դատարանի վարույթում քննվող թիվ ԵԷԴ/0057/01/11 քրեական գործով ամբաստանյալներ Երվանդ Վաչագանի Նավասարդյանի և Արսեն Կորյունի Պողոսյանի միջնորդությունները բավարարել, քրեական գործի վարույթը կարճել և Երվանդ Վաչագանի Նավասարդյանի նկատմամբ ՀՀ քրեական օրենսգրքի 360-րդ հոդվածի 1-ին մասի և Արսեն Կորյունի Պողոսյանի նկատմամբ ՀՀ քրեական օրենսգրքի 258-րդ հոդվածի 2-րդ մասի մեղադրանքներով քրեական հետապնդումը դադարեցնել` համաներման ակտ ընդունվելու հիմքով։
Ամբաստանյալ Արսեն Կորյունի Պողոսյանի նկատմամբ որպես խափանման միջոց ընտրված չհեռանալու մասին ստորագրությունը և ամբաստանյալ Երվանդ Վաչագանի Նավասարդյանի նկատմամբ որպես խափանման միջոց ընտրված զորամասի հրամանատարության հսկողությանը հանձնելը վերացնել։
Դատավարությանը մասնակցող անձանց կողմից դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում։

ԴԱՏԱՎՈՐ` Վ. Թ. ԳՐԻԳՈՐՅԱՆ