ԵԷԴ/0055/01/11

Ո Ր Ո Շ ՈՒ Մ
ՔՐԵԱԿԱՆ ԳՈՐԾԻ ՎԱՐՈւՅԹԸ ԿԱՐՃԵԼՈւ ԵՎ ՔՐԵԱԿԱՆ ՀԵՏԱՊՆԴՈւՄԸ ԴԱԴԱՐԵՑՆԵԼՈւ ՄԱՍԻՆ

Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը հետևյալ կազմով՝

ՆԱԽԱԳԱՀՈւԹՅԱՄԲ ԴԱՏԱՎՈՐ՝ Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ՝ Լ. ՄԻՐԶՈՅԱՆ

Մասնակցությամբ`

ՄԵՂԱԴՐՈՂ՝ Հ. ՄՈՎՍԵՍՅԱՆ
ՊԱՇՏՊԱՆՆԵՐ` Ա. ՈւՄՐՇԱՏՅԱՆ
Գ. ԳԵՎՈՐԳՅԱՆ
ՏՈւԺՈՂՆԵՐ` Է. ՄԿՐՏՉՅԱՆ
Ա. ԴՈԽՈՅԱՆ
Գ. ԱԴԱՄՅԱՆ
Ա. ՂԱԶԱՐՅԱՆ

2011թ. մայիսի 4-ին, դատարանում
Դռնբաց դատական նիստում քննության առնելով քրեական գործն ըստ մեղադրանքի`
1. Սուրեն Թոռնիկի Բրուտյանի, ծնված 16.09.1982թ., ք.Երևան, ազգությամբ հայ,
ՀՀ քաղաքացի, սովորում է ԵՊՃՀ-ի 5-րդ կուրսում, չամուսնացած, չի աշխատում, նախկինում չդատված, բնակվում է ք.Երևան Նոր-Արեշ 27 փողոց, 22 տանը/` ՀՀ քր. օր-ի 117 հոդվածով,
2. Զավեն Թոռնիկի Բրուտյանի, ծնված 08.07.1981թ., ք.Երևան, ազգությամբ հայ,
ՀՀ քաղաքացի, միջնակարգ կրթությամբ, չամուսնացած, չի աշխատում, նախկինում չդատված, բնակվում է ք.Երևան Նոր-Արեշ 27 փողոց, 22 տանը/` ՀՀ քր. օր-ի 118 հոդվածով,
3. Թամարա Ասքանազի Մելքոնյանի, ծնված 16.02.1959թ., ք.Երևան,
ազգությամբ հայ, ՀՀ քաղաքացի, բարձրագույն կրթությամբ, ամուսնացած, աշխատում է Երևան քաղաքի թիվ 177 միջնակարգ դպրոցում որպես դաստիարակչական աշխատանքների գծով փոխտնօրեն, նախկինում չդատված, բնակվում է ք.Երևան Ավան, Սայաթ-Նովա թաղ. 6 շենք, 21 բնակարանում` ՀՀ քր. օր-ի 118 հոդվածով,
4. Գոհար Ասքանազի Մելքոնյանի, ծնված 20.08.1962թ., ք.Երևան, ազգությամբ
հայ, ՀՀ քաղաքացի, բարձրագույն կրթությամբ, ամուսնացած, չի աշխատում, նախկինում չդատված, հաշվառված է ք.Երևան Նոր-Արեշ 27 փողոց, 22 տանը, փաստացի բնակվում է ք.Երևան Դավիթաշեն 1-ին թաղ., 7/33 տանը` ՀՀ քր. օր-ի 118 հոդվածով.

Պ Ա Ր Զ Ե Ց

Նախաքննական մարմինն ամբաստանյալներ Սուրեն Թոռնիկի Բրուտյանին` ՀՀ քր. օր-ի 117 հոդվածով, Զավեն Թոռնիկի Բրուտյանին` ՀՀ քր. օր-ի 118 հոդվածով, Թամարա Ասքանազի Մելքոնյանին` ՀՀ քր. օր-ի 118 հոդվածով և Գոհար Ասքանազի Մելքոնյանին` ՀՀ քր. օր-ի 118 հոդվածով մեղադրանք է առաջադրել այն բանի համար, որ Երևան քաղաքի Նոր-Արեշ 27 փողոցի, 22 հասցեում առանձին տնտեսությամբ բնակվում են Կոլյա Բրուտյանի և վերջինիս եղբոր կին` Անիչկա Ղազարյանի ընտանիքները։ Մինչև 2008թ. վերջիններիս փոխհարաբերությունները եղել են բարեկամական, իսկ դրանից հետո աստիճանաբար լարվել են` կապված նույն հասցեի տնամերձ հողատարածքի և շինությունների սեփականության իրավունքի հետ։ Այդ կապակցությամբ Ա. Ղազարյանի որդին` Հ. Մելքոնյանը, 2009թ. քաղաքացիական հայց է ներկայացրել Երևան քաղաքի Էրեբունի և Նուբարաշեն համայնքների ընդհանուր իրավասության դատարան ընդդեմ Կ. Բրուտյանի` ձեռքբերման վաղեմության ուժով անշարժ գույքի նկատմամբ սեփականության իրավունքը ճանաչելու պահանջի մասին։ Դատարանի 24.08.2009թ. վճռով Հ. Մելքոնյանի հայցապահանջները բավարարվել է մասնակի` պատասխանող Կ. Բրուտյանին պարտավորեցվել է հայցվոր Հ. Մելքոնյանին ու նրա ընտանիքի անդամներին չխոչընդոտել մուտք գործել Երևան քաղաքի Նոր-Արեշ 27 փողոց, 22 հասցեում նրանց կողմից օգտագործվող հողատարածք և շինություններ, օգտագործել դրանք, ինչպես նաև չխոչընդոտել հայցվորի ընտանիքի անդամների կողմից օգտագործվող բաժնեմասում իրավասու մարմինների աշխատակիցների կողմից չափագրման աշխատանքների կատարմանը, իսկ նույն հասցեում հայցվորի ընտանիքի կողմից օգտագործվող հողամասի և կառույցների նկատմամբ ձեռքբերման վաղեմության ուժով հայցվոր Հ. Մելքոնյանի սեփականության իրավունքը ճանաչելու մասով հայցապահանջը մերժվել է անհիմն լինելու պատճառաբանությամբ։
Ամբաստանյալներ Թամարա և Գոհար Մելքոնյանները 2010թ. հուլիսի 7-ին գնացել են իրենց մոր` տուժող Ա. Ղազարյանի Նոր-Արեշ 27 փողոց, 22 հասցեի տուն։ Ժամը 1100-ի սահմաններում Թամարա և Գոհար Մելքոնյանները, Ա. Ղազարյանը և վերջինիս հարսը` տուժող Գյուլնարա Ադամյանը սկսել են հավաքել իրենց բակի ծիրանի բերքը։ Քիչ անց տանից դուրս է եկել Կ. Բրուտյանը և վերջինիս կին` Արմենուհի Դոխոյանը ու վիճաբանել Ա. Ղազարյանի և նրա ընտանիքի անդամների հետ` պատճառաբանելով, որ այդ ծիրանի ծառն իրենց է պատկանում։ Վիճաբանությունը տևել է շուրջ 20 րոպե, որի ընթացքում հնչել են փոխադարձ վիրավորական արտահայտություններ և ավարտվել այն բանից հետո, երբ Ա. Ղազարյանը զանգահարել ու այդ մասին հայտնել է ոստիկանությանը։
Նույն օրը, ժամը 1500-ի սահմաններում Ա. Ղազարյանի, վերջինիս դուստրերի` Թամարա և Գոհար Մելքոնյանների, նրանց հարսի` Գ. Ադամյանի և Կ. Բրուտյանի, նրա կնոջ` Ա. Դոխոյանի, որդու` Թոռնիկ Բրուտյանի, վերջինիս կնոջ` տուժող Էմմա Մկրտչյանի, նրանց որդիներ` ամբաստանյալներ Զավեն և Սուրեն Բրուտյանների միջև տան տնամերձ հողամասերի, դրանում առկա ծիրանի ծառի բաժանման պատկանելիության հետ կապված տեղի է ունեցել վիճաբանություն այն բանի համար, որ Ա. Ղազարյանի հարս Գ. Ադամյանը կտրել է ծիրանի ծառի` Կ. Բրուտյանի տան բակի կողմ անցած ճյուղերը, ապա նրանց կողմն է անցկացրել իրենց բակի կողմն անցած խաղողի վազի ճյուղերը։ Շուրջ 30 րոպե տևած վիճաբանության ընթացքում Թ. Մելքոնյանը փայտյա ձողով և ավելի բռնակով հարվածներ է հասցրել Ա. Դոխոյանի գլխի շրջանին, այնուհետև փայտյա ձողով, ապա ձեռքով մի քանի անգամ հարվածներ է հասցրել Է. Մկրտչյանի աջ նախաբազկի վերին երրորդի առաջային մակերեսին` վերջինիս առողջությանը պատճառելով թեթև վնասի հատկանիշներ չպարունակող մարմնական վնասվածք, Զ. Բրուտյանը ձեռքերով հարվածներ է հասցրել Գ. Ադամյանի ձախ բազկի վերին և ստորին երրոդների, աջ բազկի վերին երրորդի և աջ արմնկահոդի շրջանի հետին մակերեսին` վերջինիս առողջությանը պատճառելով թեթև վնասի հատկանիշներ չպարունակող մարմնական վնասվածքներ, իսկ Ս. Բրուտյանը փայտյա ձողով դիտավորությամբ հարվածներ է հասցրել Ա. Ղազարյանի գլխի շրջանին` վերջինիս առողջությանը` ձախից քունքային շրջանների փափուկ հյուսվածքների սալջարդի, գլխի գագաթային շրջանի սալջարդ վերքի և գլխուղեղի ցնցման ձևերով պատճառելով թեթև վնաս` առողջության կարճատև քայքայումով։
Տուժողներ Է. Մկրտչյանը, Ա. Դոխոյանը, Գ. Ադամյանը և Ա. Ղազարյանը հայտնեցին դատարանին, որ հաշտվել են ամբաստանյալներ Սուրեն Բրուտյանի, Զավեն Բրուտյանի, Թամարա Մելքոնյանի և Գոհար Մելքոնյանի հետ, նրանցից ոչ մի պարտք ու պահանջ չունեն, ուստի խնդրեցին քրեական գործի վարույթը կարճել։
Հաշվի առնելով, որ տուժողները հաշտվել են ամբաստանյալների հետ մեղադրող-դատախազ Հ. Մովսեսյանը հայտնեց դատարանին, որ համաձայն ՀՀ քր. դատ. օր-ի 35 հոդվածի համաձայն պետք է քրեական գործի վարույթը կարճել և քրեական հետապնդումը դադարեցնել։
Դատարանը գտնում է, որ ամբաստանյալներ Սուրեն Բրուտյանի նկատմամբ ՀՀ քր. օր-ի 117 հոդվածով, իսկ Զավեն Բրուտյանի, Թամարա Մելքոնյանի և Գոհար Մելքոնյանի նկատմամբ ՀՀ քր. օր-ի 118 հոդվածով հարուցված քրեական գործի վարույթը պետք է կարճել և քրեական հետապնդումը դադարեցնել հետևյալ պատճառաբանությամբ.
Համաձայն ՀՀ քր. դատ. օր-ի 35 հոդվածի 1-ին մասի 5-րդ կետի. «Քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե քրեական դատավարության օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ»։
Նույն հոդվածի 4-րդ մասի համաձայն` մեղադրողը, դատարանում հայտնաբերելով քրեական հետապնդումը բացառող հանգամանքներ, պարտավոր է հայտարարել ամբաստանյալի նկատմամբ քրեական հետապնդում իրականացնելուց հրաժարվելու մասին։ Ամբաստանյալի նկատմամբ քրեական հետապնդում իրականացնելուց հրաժարվելու մասին մեղադրողի հայտարարությունը դատարանի համար քրեական գործի վարույթը կարճելու և քրեական հետապնդումը դադարեցնելու հիմք է։
ՀՀ քր. դատ. օր-ի 183 հոդվածի համաձայն` ՀՀ քր. օր-ի 117 և 118 հոդվածներով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է մինչև դատավճիռ կայացնելու համար դատարանի` խորհրդակցական սենյակ հեռանալը։
Նկատի ունենալով, որ տուժողները հաշտվել են ամբաստանյալների հետ, իսկ մեղադրողը հրաժարվել է ամբաստանյալների նկատմամբ քրեական հետապնդում իրականացնելուց, դատարանը գտնում է, որ ամբաստանյալներ Սուրեն Բրուտյանի նկատմամբ ՀՀ քր. օր-ի 117 հոդվածով, իսկ Զավեն Բրուտյանի, Թամարա Մելքոնյանի և Գոհար Մելքոնյանի նկատմամբ ՀՀ քր. օր-ի 118 հոդվածով հարուցված քրեական գործի վարույթը պետք է կարճել և քրեական հետապնդումը դադարեցնել։
Քննարկելով խափանման միջոցի հարցը, դատարանը գտնում է, որ ամբաստանյալներ Ս. Բրուտյանի, Զ. Բրուտյանի. Թ. Մելքոնյանի և Գ. Մելքոնյանի նկատմամբ ընտրված խափանման միջոցը` ստորագրություն չհեռանալու մասին, պետք է թողնել անփոփոխ մինչև որոշման օրինական ուժի մեջ մտնելը։
Անդրադառնալով իրեղեն ապացույցների տնօրինման հարցին, դատարանը գտնում է, որ որոշումն օրինական ուժի մեջ մտնելուց հետո գործով իրեղեն ապացույց ճանաչված 237.5սմ երկարությամբ, մոտ 2սմ տրամագծով, կլոր, հարթ մակերեսով փայտյա ձողը պետք է ոչնչացնել։
Ղեկավարվելով ՀՀ քր. դատ. օր-ի 35, 183 և 313 հոդվածներով, դատարանը.

Ո Ր Ո Շ Ե Ց

Ամբաստանյալներ Սուրեն Թոռնիկի Բրուտյանի նկատմամբ ՀՀ քր. օր-ի 117 հոդվածով, Զավեն Թոռնիկի Բրուտյանի նկատմամբ ՀՀ քր. օր-ի 118 հոդվածով, Թամարա Ասքանազի Մելքոնյանի նկատմամբ ՀՀ քր. օր-ի 118 հոդվածով և Գոհար Ասքանազի Մելքոնյանի նկատմամբ ՀՀ քր. օր-ի 118 հոդվածով հարուցված քրեական գործի վարույթը կարճել և քրեական հետապնդումը դադարեցնել` ամբաստանյալների հետ տուժողների հաշտվելու պատճառով։
Սուրեն Բրուտյանի, Զավեն Բրուտյանի, Թամարա Մելքոնյանի և Գոհար Մելքոնյանի նկատմամբ ընտրված խափանման միջոցը՝ ստորագրություն չհեռանալու մասին, թողնել անփոփոխ մինչև որոշման օրինական ուժի մեջ մտնելը։
Գործով իրեղեն ապացույց ճանաչված 237.5սմ երկարությամբ, մոտ 2սմ տրամագծով, կլոր, հարթ մակերեսով փայտյա ձողը որոշումն օրինական ուժի մեջ մտնելուց հետո ոչնչացնել։
Որոշումը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ