Գործ թիվ ԵԷԴ/0054/01/11
2011թ

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղարությամբ Արմինե Արղամանյան
Մասնակցությամբ`
Մեղադրող Ալեքսան Մուրադյան
Ամբաստանյալ Արմեն Նունուշյան
Ամբաստանյալի պաշտպան Կարապետ Աղաջանյան

2011թվականի մայիսի 03-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում քննեց քրեական գործն ըստ մեղադրանքի՝
Արմեն Արամայիսի Նունուշյանի ծնված 14.05.1972թ. Երևան քաղաքում, ազգությունը հայ, Հայաստանի Հանրապետության քաղաքացի, միջնակարգ կրթությամբ, ամուսնացած, խնամքին 02.12.1995թ. ծնված մեկ երեխա, 1940թ. ծնված մայրը, նախկինում դատված`
1. Ռուսաստանի Դաշնության Վոլոգոդսկի մարզի Չերեպովցի քաղաքի ժողդատարանի 03.09.1997թ. դատավճռով ՌԴ քրեական օրենսգրքի 162-րդ հոդվածի 3-րդ մասի «ա» և «բ» կետերով դատապարտվել է ազատազրկման 8/ութ/ տարի ժամկետով։ ՌԴ Վոլոգոդսկի մարզային դատարանի 22.01.1998թ. դատավճռով հանցանքը վերաորակվել է ՌԴ քրեական օրենսգրքի 143-րդ հոդվածի 3-րդ մասով և պատիժ է նշանակվել ազատազրկում 8 /ութ/ տարի ժամկետով,
2. Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 04.11.2010թ. ԵԿԴ/0206/01/10 դատավճռով ՀՀ քրեական օրենսգրքի 266-րդ հոդվածի 4-րդ մասով, 266-րդ հոդվածի 2-րդ մասի 2.1 ենթակետով, 268-րդ հոդվածի 2-րդ մասի 1-ին և 2-րդ կետերով, ՀՀ քրեական օրենսգրքի 66-րդ հոդվածի կիրառմամբ դատապարտվել է ազատազրկման 6 /վեց/ տարի ժամկետով` առանց գույքի բռնագրավման և տուգանքի նվազագույն աշխատավարձի հարյուրապատիկի` 100.000 /մեկ հարյուր հազար/ ՀՀ դրամ գումարի չափով, կիրառելով հարկադրական բուժում` թմրամոլության դեմ, պատժի սկիզբը հաշվելով 2010 թվականի ապրիլի 24-ից։
ՀՀ ԱՆ «Նուբարաշեն» ՔԿ հիմնարկի դատապարտյալ, հաշվառված է Երևանի Նոր-Նորքի 5-րդ զանգվածի 12 շենքի 14 բնակարանում, մինչև կալանավորվելը բնակվել է Երևան քաղաքի Նոր-Նորքի զանգվածի թիվ 18/1 շենքին հարակից տնակում, սույն քրեական գործով խափանման միջոց չի կիրառվել, մեղադրվում է ՀՀ քրեական օրենսգրքի 34-268-րդ հոդվածի 2-րդ մասի 1-ին կետով։
Առաջադրված մեղադրանքում իրեն մեղավոր չի ճանաչել։

1. Գործի դատավարական նախապատմությունը.
ՀՀ ԱՆ «Նուբարաշեն» ՔԿ հիմնարկի դատապարտյալ, գործով ամբաստանյալ Արմեն Արամայիսի Նունուշյանը կրկին անգամ, առանց իրացնելու նպատակի,
անձնական օգտագործման համար թմրամիջոց ձեռք բերելու մասին կալանախցում իր մոտ ապօրինի պահվող 077-948-150 բջջային հեռախոսահամարից զանգահարել և գործի քննությամբ չպարզված անձնավորության հետ պայմանավորվածություն է ձեռք բերել։ Թմրամիջոցն իրացնողը տվել է իր համաձայնությունը, պայմանավորվածություն է ձեռք բերվել «ացետիլացված ափիոն» տեսակի թմրամիջոցը ներծծել շորի կտորների մեջ, այնուհետև շորի կտորները կարել տաբատի գոտկատեղում և տաբատն այլ անձի միջոցով ուղարկել ՔԿ հիմնարկ, քանի որ թմրամիջոցն իրացնողը հրաժարվել է անձամբ այն տանել ՀՀ ԱՆ «Նուբարաշեն» ՔԿ հիմնարկ։
Ամբաստանյալ Արմեն Նունուշյանն իր մոտ ունեցած 077-948-150 հեռախոսահամարի բջջային հեռախոսով զանգահարել է իր մորը` գործով վկա Օֆիկ Օհանյանի բջջային 093-873-384 հեռախոսահամարին և մորը հայտնել, որ իրենց տուն հանձնուք են բերելու, որը նախատեսված է իր հետ պատիժ կրող ընկերներից մեկի համար, և քանի որ հանձնուք բերողը անձնագիր չունի, այդ պատճառով չի կարող անձամբ մուտք գործել ՔԿ հիմնարկ, մորը խնդրել է ստանալ այդ հանձնուքը և բերել ՀՀ ԱՆ «Նուբարաշեն» ՔԿ հիմնարկ և այն հանձնել իր անվամբ։
Գործով վկա Օֆիկ Օհանյանը նախկինում բազմիցս հանձնուք է տարել «Նուբարաշեն» ՔԿ հիմնարկ և փոխանցել իր որդու` դատապարտյալ Արմեն Նունուշյանի անվամբ, համաձայնվել է որդու խնդրանքին, չկասկածելով, որ հանձնուքում կարող է թմրամիջոց լինել։ Հանձնուքում թմրամիջոցի առկայության մասին մորը չի հայտնել նաև ամբաստանյալ Արմեն Նունուշյանը։
2010 թվականի հոկտեմբերի 01-ին ժամը 13.00-ի սահմաններում Երևան քաղաքի Մառի փողոցի 18/1 տան մոտ է եկել գործի քննությամբ ինքնությունը չճշտված մի անձնավորություն և վկա Օֆիկ Օհանյանին հանձնել ծանրոցը։ Դա զուգադիպել է նրան, որ այդ պահին Օֆիկ Օհանյանի տուն հյուր են եկել նրա ազգակիցները` Սևան քաղաքի բնակչուհի Սոնիկ Իսպիրյանը և նրա 17-ամյա որդին` Արմեն Վարդանյանը։
Վկա Օֆիկ Օհանյանը նրանց խնդրել է ուղեկցել իրեն, որպեսզի Արմեն Վարդանյանն իրեն օգնի ՔԿ հիմնարկում դիմում գրելու հարցում։ Նրանք հանձնուքը բերած անհայտ անձի վարած տաքսի ավտոմեքենայով գնացել են «Նուբարաշեն» ՔԿ հիմնարկ, որտեղից անհայտ անձն իր ավտոմեքենայով հեռացել է։
ՀՀ ԱՆ «Նուբարաշեն» ՔԿ հիմնարկում Արմեն Վարդանյանը լրացրել է Օֆիկ Օհանյանի անվամբ դիմումի ձևաթուղթը` դիմումում նշված ապրանքների անվանումների թվարկմամբ։ Հանձնուքը ձևակերպվել է Արմեն Նունուշյանի անվամբ։
ՀՀ ԱՆ «Նուբարաշեն» ՔԿ հիմնարկի անվտանգության ապահովման բաժնի մասնագետներ, գործով վկաներ Ստեփան Մշեցյանը և Հովհաննես Մանջիկյանը, 01.10.2010թ. ժամը 17.05-ին հանձնուքների ընդունման սենյակում ստուգելով հանձնուքը, հանձնուքում առկա վիլվետ կտորից կարված տաբատի գոտկատեղի մեջ ներկարված հայտնաբերել են երկու հատ սպիտակ գույնի շորի կտորներ` ներծծված յուրահատուկ սուր հոտով նյութով` չորացած վիճակում։
Վկա Օֆիկ Օհանյանը հայտարարել է, որ հանձնուքը, որի մեջ եղել է տաբատը, իր որդի Արմեն Նունուշյանի խնդրանքով նույն օրը ժամը 14.00-ի սահմաններում ինքը վերցրել է տաքսի ավտոմեքենայի վարորդ մի տղայից, իրեն հայտնի չէ, թե ի՞նչ նյութով են ներծծված տաբատում հայտնաբերված կտորները։
Նշված կտորները դատավարական կարգի պահպանմամբ առգրավվել, փաթեթավորվել, կնքվել և ուղարկվել են դատաքիմիական փորձաքննության։ Գիտականորեն հիմնավորված մեթոդների կիրառմամբ ներծծված նյութը լուծելու, ֆիլտրելու և չորացնելու արդյունքում ստացվել է 0,163 գրամ հաստատուն քաշով զգալի չափով տնայնագործական եղանակով պատրաստված «ացետիլացված ափիոն» տեսակի թմրամիջոց։
ՀՀ ոստիկանության ՔԳՎ Էրեբունու քննչական բաժնի կողմից փաստի առթիվ 05.10.2010թ. ՀՀ քրեական օրենսգրքի 266-րդ հոդվածի 2-րդ մասի 3-րդ կետի և 34-268-րդ հոդվածի 2-րդ մասի 1-ին կետի հատկանիշներով հարուցվել է թիվ 12138510 քրեական գործը և նախաքննություն է կատարվել։
24.12.2010թ. որոշում է կայացվել Արմեն Նունուշյանին ՀՀ քրեական օրենսգրքի 34-268-րդ հոդվածի 2-րդ մասի 1-ին կետով որպես մեղադրյալ ներգրավելու մասին, նրա նկատմամբ խափանման միջոց չի կիրառվել` մեկ այլ քրեական գործով «Նուբարաշեն» ՔԿ հիմնարկում կալանավորված լինելու հիմքով։
Ամբաստանյալ Արմեն Նունուշյանը առաջադրված մեղադրանքում իրեն մեղավոր չի ճանաչել և հրաժարվել է նախաքննության ընթացքում ցուցմունք տալ։
31.01.2011թ. որոշում է կայացվել քրեական գործից իրացնողի մասով նյութերի անջատման և ՀՀ քրեական օրենսգրքի 266-րդ հոդվածի 2-րդ մասի 3-րդ կետի հատկանիշներով 12103511 քրեական գործ հարուցելու մասին։
31.01.2011թ. քրեական գործը ավարտվել է մեղադրական եզրակացությամբ։ 07.02.2011թ. ՀՀ գլխավոր դատախազության պատիժների և հարկադրանքի այլ միջոցների կիրառման օրինականության նկատմամբ հսկողություն իրականացնող վարչության կողմից քրեական գործը վերադարձվել է Էրեբունու քննչական բաժին` լրացուցիչ նախաքննության։
14.02.2011թ. քրեական գործն ընդունվել է քննիչի վարույթ, մեղադրական եզրակացությունը հաստատվել է 29.03.2011թ.։
Քրեական գործը 04.04.2011թ. մուտք է եղել Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարան։

2. Դատաքննությամբ ձեռք բերված ու հետազոտված ապացույցները։
Դատաքննությամբ հետազոտվել են այն բոլոր ապացույցները, որոնք թվարկված են մեղադրական եզրակացության մեջ։
Ապահովելով դատաքննության լրիվությունը, բազմակողմանիությունը և օբյեկտիվությունը և ղեկավարվելով գործի արդար քննությանը վերաբերող սահմանադրական և դատավարական նորմերի դրույթներով, հիմնվելով պատշաճ ընթացակարգի շրջանակներում դատական քննության ընթացքում գործի հանգամանքների հետազոտման արդյունքի վրա, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով, դատարանը գտնում է, որ ամբաստանյալ Արմեն Նունուշյանի նկատմամբ պետք է կայացվի մեղադրական դատավճիռ և նրա նկատմամբ պետք է քրեական պատիժ կիրառվի։
ՀՀ քրեական օրենսգրքի 34-268-րդ հոդվածի 2-րդ մասի 1-ին կետով նախատեսված հանցանքը կատարելու համար առաջադրված մեղադրանքում Արմեն Նունուշյանը իրեն մեղավոր չի ճանաչել, նախաքննության և դատաքննության ընթացքում հրաժարվել է ցուցմունք տալ։

Գ.Թ. 26, 194, 285, դատաքննության արձանագրություն

Ամբաստանյալ Արմեն Արամայիսի Նունուշյանի մեղքը նրան առաջադրված մեղադրանքում հիմնավորվել է դատաքննությամբ հետազոտված հետևյալ ապացույցներով.
ՀՀ ԱՆ «Նուբարաշեն» ՔԿ հիմնարկի անվտանգության ապահովման բաժնի մասնագետներ Հովհաննես Մանջիկյանի և Ստեփան Մշեցյանի կողմից 01.10.2010թ. կազմված զննության արձանագրությամբ և դիմումով այն մասին, որ նշված օրը ժամը 17.05-ին «Նուբարաշեն» ՔԿ հիմնարկի հանձնուքների ընդունման սենյակում զննության են ենթարկել կալանավոր Արմեն Նունուշյանին հանձնելու համար Օֆիկ Օհանյանի ներկայացրած հանձնուքը։ Հանձնուքում առկա վիլվետ տեսակի սև գույնի կտորից կարված տաբատի գոտկատեղի մեջ ներկարված հայտնաբերվել են թվով երկու հատ սպիտակ գույնի կտորներ` ներծծված յուրահատուկ սուր հոտով հեղուկով։ Օֆիկ Օհանյանը հայտարարել է, որ «Նուբարաշեն» ՔԿ հիմնարկ ներկայացրած ողջ հանձնուքը իր որդու` կալանավոր Արմեն Նունուշյանի խնդրանքով 01.10.2010թ. ժամը 14.00-ի սահմաններում «Արևիկ» խանութի դիմաց վերցրել է տաքսու վարորդ հանդիսացող մի անծանոթ տղայից, հանձնուքը ցանկացել է հանձնել որդու անվամբ, իսկ տաբատի գոտկատեղում ներկարված կտորների առկայության մասին ինքը չի իմացել և տեղյակ չէ, թե դրանք ինչ նյութով են ներծծված։
Նշված կտորները և տաբատը դատավարական կարգի պահպանմամբ զննվել, լուսանկարահանվել, առգրավվել, փաթեթավորվել և կնքվել են։

Գ.Թ. 5-6, 7-8, 9-10

ՀՀ ոստիկանության փորձաքրեագիտական վարչության 04.10.2010թ. թիվ 561Ք եզրակացությամբ այն մասին, որ դատաքիմիական փորձաքննության ընթացքում գիտականորեն հիմնավորված մեթոդիկայի կիրառմամբ փորձաքննությանը ներկայացված երկու գործվածքները մի քանի անգամ լվացվել են թորած ջուր-էթանոլ /1։1/ լուծույթով։ Լուծամզուքը ֆիլտրվել, այնուհետև 105-1100C ջերմաստիճանի պայմաններում այն գոլորշիացվել է, ստացվել է հաստատուն քաշով 0,163 գրամ նյութ, որը հանդիսանում է տնայնագործական եղանակով պատրաստված «ացետիլացված ափիոն» տեսակի թմրամիջոց։

Գ.Թ. 33-35

Հայտնաբերված 0,163 գրամ հաստատուն քաշով «ացետիլացված ափիոն» տեսակի թմրամիջոցը և տաբատը ճանաչվել են իրեղեն ապացույց։

Գ.Թ. 177

Գործով վկաներ, ՀՀ ԱՆ «Նուբարաշեն» ՔԿ հիմնարկի անվտանգության ապահովման բաժնի աշխատակիցներ Ստեփան Մշեցյանն ու Հովհաննես Մանջիկյանը ցուցմունք են տվել այն մասին, որ 01.10.2010թ. ժամը 17.05-ի սահմաններում ՀՀ ԱՆ «Նուբարաշեն» ՔԿ հիմնարկի հանձնուքների ընդունման սենյակում Օֆիկ Օհանյանը հանձնուք է ձևակերպել և ներկայացրել իր որդու` կալանավոր Արմեն Նունուշյանի անվամբ։ Հանձնուքում իրենց ուշադրությունն է գրավել սուր յուրահատուկ հոտով սև գույնի վիլվետ կտորից տաբատը, որի գոտկատեղի կարը քանդելուց հետո հայտնաբերել են ներկարված երկու գործվածքի կտոր` ներծծված սուր յուրահատուկ հոտով նյութով։ Օֆիկ Օհանյանը հայտարարել է, որ որդու` Արմեն Նունուշյանի խնդրանքով հանձնուքը նույն օրն ստացել է իրեն անծանոթ մի տաքսու վարորդից և բերել է ՔԿ հիմնարկ` որդուն փոխանցելու համար։ Օֆիկ Օհանյանը հայտարարել է, որ տաբատի գոտկատեղում թաքցված գործվածքի կտորներից և դրանցում ներծծված թմրամիջոցի առկայության փաստից ինքը տեղյակ չէ։ Իրենք հայտնաբերվածը փաթեթավորել, կնքել և արձանագրություն են կազմել։

Գ.Թ. 68-69, 70-71, դատաքննության արձանագրություն

Վկա Օֆիկ Օհանյանը ցուցմունք է տվել այն մասին, որ իր որդի, «Նուբարաշեն» ՔԿ հիմնարկի կալանավոր Արմեն Նունուշյանը 01.10.2010թ. ժամը 13.00-ի սահմաններում 077-948-150 հեռախոսահամարից իր բջջային 093-873-384 հեռախոսահամարին զանգահարելով, հայտնել է, որ իր կալանավոր ընկերներից մեկի համար պետք է հանձնուք բերեն, սակայն բերող անձնավորությունը անձնագիր չունի և այդ պատճառով ՔԿ հիմնարկում հանձնուքը չի կարող ձևակերպել։ Որդին` Արմեն Նունուշյանը, ասել է, որ նշված իրերը կբերեն իրենց տան մոտ, խնդրել է այն վերցնել և գալ «Նուբարաշեն» ՔԿ հիմնարկ ու որպես հանձնուք փոխանցել իր անվամբ։
Նույն օրը Երևանի Մառի փողոցի 18/1 տան մոտ տաքսի ավտոմեքենայով եկել է մի անծանոթ անձնավորություն, հայտնելով, որ հանձնուքը ավտոմեքենայի մեջ է։ Այդ պահին իրենց տանն են եղել բարեկամները` Սևան քաղաքի բնակիչներ Սոնիկ Իսպիրյանն ու նրա որդին` Արմեն Վարդանյանը։ Տաքսի ավտոմեքենայի վարորդն իրենց տարել է «Նուբարաշեն» ՔԿ հիմնարկ և հեռացել է։ Ինքը Արմեն Վարդանյանի հետ մուտք է գործել ՔԿ հիմնարկ, նա լրացրել է փաստաթղթերը որդու` Արմեն Նունուշյանի անվամբ, ինքն էլ հանձնուքների ընդունման սենյակում հանձնել է տաքսու վարորդի կողմից իրեն փոխանցված իրերը, չիմանալով, որ դրանց մեջ թաքցված թմրամիջոց կա։ Իր ներկայությամբ հանձնուքի մեջ եղած տաբատի գոտկատեղի կարը քանդելուց հետո հայտնաբերվել են 2 հատ սպիտակ գույնի կտորներ յուրահատուկ սուր հոտով, դրանք իր ներկայությամբ փաթեթավորվել, կնքվել են, կազմվել է արձանագրություն, որն ինքը ստորագրել է։

Գ.Թ. 55-57, դատաքննության արձանագրություն

Վկա Արմեն Վարդանյանը նախաքննության ընթացքում ցուցմունք է տվել այն մասին, որ 2010թ. հոկտեմբերի 1-ին իր մոր` Սոնիկ Իսպիրյանի հետ գտնվել է իր բարեկամ Օֆիկ Օհանյանի տանը։ Օ. Օհանյանն ասել է, որ իրենց տուն մեքենա է գալու և քանի որ իր աչքերը լավ չեն տեսնում, առաջարկել է միասին գնալ ՔԿ հիմնարկ իր որդուն` Արմեն Նունուշյանին հանձնուք փոխանցելու։ Որոշ ժամանակ անց տան դարպասների մոտ է եկել կանաչ գույնի «Ֆոլցվագեն» մակնիշի մեքենա, որի հետևի նստատեղի վրա դրված են եղել մի քանի ծանրոցներ, իրենք նստել են նշված մեքենան և գնացել են ՔԿՀ, որտեղ մեքենայի վարորդը իրենց իջեցնելով` հեռացել է։ Հանձնուքի ստուգման ժամանակ, երբ ինքը և Օ. Օհանյանը գտնվել են հանձնուքի ընդունման սենյակում, ՔԿՀ աշխատակիցների կողմից հանձնուքում գտնվող տաբատի գոտկատեղում կարված հայտնաբերվել են երկու հատ սպիտակ կտորներ։

Գ.Թ. 64-65

Վկա Սոնիկ Իսպիրյանը նախաքննության ընթացքում ցուցմունք է տվել այն մասին, որ 2010թ. հոկտեմբերի 1-ին իր որդու` Արմեն Վարդանյանի հետ գտնվել է իր մորաքույր Օֆիկ Օհանյանի տանը։ Օ. Օհանյանը ասել է, որ իրենց տուն մեքենա է գալու և քանի որ աչքերը լավ չեն տեսնում, առաջարկել է միասին գնալ ՔԿՀ իր որդուն` Արմեն Նունուշյանին հանձնուք փոխանցել։ Որոշ ժամանակ անց տան դարպասների մոտ է եկել մուգ կանաչ գույնի արտասահմանյան մեքենա, որի հետևի նստատեղի վրա դրված են եղել մի քանի ծանրոցներ, իրենք նստել են նշված մեքենան և գնացել են ՔԿՀ, որտեղ մեքենայի վարորդը իրենց իջեցնելով` հեռացել է։ Ինքը սպասել է ՔԿՀ բակում, իսկ իր որդին Օ. Օհանյանի հետ մտել է ՔԿՀ` հանձնուքը փոխանցելու։ Որոշ ժամանակ անց որդին վերադարձել և հայտնել է, որ հանձնուքը փոխանցելիս որոշակի խնդիրներ են առաջացել, որից հետո նա իր որդու հետ վերադարձել է տուն։ Մի քանի օր անց իմացել է, որ հանձնուքում թմրամիջոց է հայտնաբերվել։

Գ.Թ. 161-162

«Ղ-Տելեկոմ» ՓԲԸ-ից ստացած 093-87-33-84 և 077-94-81-50 հեռախոսահամարների վերծանումներով այն մասին, որ 2010թ. սեպտեմբերի 25-ից մինչև հոկտեմբերի 01-ն ընկած ժամանակահատվածում վկա Օֆիկ Օհանյանի կողմից օգտագործվող 093-87-33-84 հեռախոսահամարից բազմաթիվ փոխադարձ հեռախոսազանգեր են կատարվել ամբաստանյալ Արմեն Նունուշյանի կողմից օգտագործվող 077-94-81-50 հեռախոսահամարին։

Գ.Թ. 72-134

Տոքսիկոքիմիական փորձաքննության 07.12.2010թ. թիվ 10-3215 եզրակացությամբ այն մասին, որ փորձաքննությանը տրամադրված Արմեն Արամայիսի Նունուշյանի մազի փորձանմուշի մեջ հայտնաբերվել են ափիոնի խմբին պատկանող թմրամիջոցի թմրալկալոիդների հետքեր։

Գ.Թ. 180-181

3. Դատարանի իրավական վերլուծությունը։
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Արմեն Արամայիսի Նունուշյանի մեղքը ՀՀ քրեական օրենսգրքի 34-268-րդ հոդվածի 2-րդ մասի 1-ին կետով նախատեսված հանցանքի կատարման մեջ հիմնավորված է և նշված հոդվածի սանկցիայով նրա նկատմամբ պետք է քրեական պատիժ կիրառվի։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված` պատասխանատվությունը և պատիժը մեղմացնող ու ծանրացնող հանգամանքները։ Դրանք բնութագրելով ամբաստանյալի անձնավորության ու կատարված հանցագործության հանրային վտանգավորության աստիճանը, հնարավորություն են տալիս անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ կոնկրետ դեպքով ամբաստանյալ Արմեն Արամայիսի Նունուշյանի մոտ, որպես պատասխանատվությունը և պատիժը ծանրացնող հանգամանք, առկա է հանցանքը կատարելու ռեցիդիվը, քանի որ ամբաստանյալի նախկին դատվածությունը մարված չէ, ինչպես նաև` հանցագործության մեջ առանձնապես ակտիվ դերը։
Քրեական գործով Արմեն Արամայիսի Նունուշյանի նկատմամբ պատասխանատվությունը և պատիժը մեղմացնող հանգամանք է ամբաստանյալի խնամքին անչափահաս` 02.12.1995թ. ծնված երեխա և 1940թ. ծնված մայր ունենալը։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալ Արմեն Արամայիսի Նունուշյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածների պահանջներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, տվյալ գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր եզրակացության, որ ամբաստանյալի նկատմամբ որպես պատիժ անհրաժեշտ է նշանակել ազատազրկում որոշակի ժամկետով, որը պետք է կրի ՀՀ ԱՆ ՔԿՎ համապատասխան քրեակատարողական հիմնարկում։
Պատիժ նշանակելիս և պատժաչափը որոշելիս դատարանը նկատի է առնում ՀՀ քրեական օրենսգրքի 65-րդ հոդվածի պահանջը` չավարտված հանցագործության, կոնկրետ` հանցափորձի համար պատիժ նշանակելու վերաբերյալ, ինչպես նաև այն, որ պատիժ պետք է նշանակվի ՀՀ քրեական օրենսգրքի 66-րդ հոդվածի պահանջների պահպանմամբ` հանցագործությունների համակցությամբ, քանի որ գործով քննարկվող հանցագործության դեպքը կատարվել է 01.10.2010թ.` մինչև Արմեն Նունուշյանի նկատմամբ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից 04.11.2010թ. Արմեն Նունուշյանի նկատմամբ ԵԿԴ/0206/01/10 դատավճիռ կայացնելը։
ՀՀ քրեական օրենսգրքի 66-րդ հոդվածի 4-րդ մասի հիմքով վերջնական պատիժը նշանակվում է պատիժները լրիվ կամ մասնակիորեն գումարելու միջոցով։ ՀՀ քրեական օրենսգրքի 66-րդ հոդվածի 6-րդ մասի հիմքով վերջնական պատժի ժամկետին հաշվակցվում է առաջին դատավճռով նշանակված պատժի կրած մասը։
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 04.11.2010թ. թիվ ԵԿԴ/0206/01/10 դատավճռով Արմեն Արամայիսի Նունուշյանը ՀՀ քրեական օրենսգրքի 266-րդ հոդվածի 4-րդ մասով, 266-րդ հոդվածի 2-րդ մասի 2.1 ենթակետով, 268-րդ հոդվածի 2-րդ մասի 1-ին և 2-րդ կետերով, ՀՀ քրեական օրենսգրքի 66-րդ հոդվածի կիրառմամբ դատապարտվել է ազատազրկման 6 /վեց/ տարի ժամկետով` առանց գույքի բռնագրավման և տուգանքի` նվազագույն աշխատավարձի հարյուրապատիկի` 100.000 /մեկ հարյուր հազար/ ՀՀ դրամ գումարի չափով։ Միաժամանակ Արմեն Արամայիսի Նունուշյանի նկատմամբ կիրառվել է հարկադրական բուժում` թմրամոլության դեմ։
Հայաստանի Հանրապետության վերաքննիչ քրեական դատարանը 25.01.2011թ. որոշմամբ ԵԿԴ/0206/01/10 քրեական գործով ամբաստանյալ Արմեն Արամայիսի Նունուշյանի վերաքննիչ բողոքը մերժել է, դատավճիռը մտել է օրինական ուժի մեջ։
Գործով իրեղեն ապացույց ճանաչված զգալի չափի 0,163 գրամ քաշով «ացետիլացված ափիոն» տեսակի թմրամիջոցը գտնվում է նախաքննական մարմնի տրամադրության տակ` թիվ 12103511 քրեական գործում, իսկ տաբատն ուղարկվել է դատարան։ Դատավճիռն օրինական ուժի մեջ մտնելուց հետո իրեղեն ապացույց ճանաչված տաբատը ենթակա է ոչնչացման։
Նախաքննական մարմինը դատարան չի ուղարկել նաև թիվ 28 խցից ոչ պլանային ստուգմամբ առգրաված «Նոկիա» տեսակի բջջային հեռախոսը` «Բիլայն» բաժանորդային քարտով և 2 լիցքավորիչներով։ Քանի որ դրանք գործով իրեղեն ապացույց չեն ճանաչվել, ուստի դատարանի կողմից տնօրինման ենթակա առարկաներ չեն հանդիսանում։
Դատարանը հաշվի է առնում նաև այն հանգամանքը, որ սույն քրեական գործով ամբաստանյալի նկատմամբ խափանման միջոց չի կիրառվել։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 44, 357-358, 360, 365, 368-372, 376, 3761, 379-րդ հոդվածների և ՀՀ դատական օրենսգրքի 20-րդ հոդվածի պահանջներով, դատարանը.

Վ Ճ Ռ Ե Ց

Ամբաստանյալ Արմեն Արամայիսի Նունուշյանին մեղավոր ճանաչել ՀՀ քրեական օրենսգրքի 34-268-րդ հոդվածի 2-րդ մասի 1-ին կետով նախատեսված հանցանքի կատարման մեջ և նշված հոդվածի սանկցիայով նրա նկատմամբ քրեական պատիժ կիրառել` նշանակելով ազատազրկում 1 /մեկ/ տարի ժամկետով։
Նշանակված պատիժը լրիվ գումարել Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 04.11.2010թ. ԵԿԴ/0206/01/10 դատավճռով Արմեն Արամայիսի Նունուշյանի նկատմամբ նշանակված պատժին և վերջնական պատիժ նշանակել ազատազրկում 7 /յոթ/ տարի ժամկետով` առանց գույքի բռնագրավման և տուգանք նվազագույն աշխատավարձի հարյուրապատիկի` 100.000 /մեկ հարյուր հազար/ ՀՀ դրամ գումարի չափով։
Նշանակված պատժի մեջ հաշվակցել 04.11.2010թ. թիվ ԵԿԴ/0206/01/10 դատավճռով նշանակված պատժի կրած մասը։
Ամբաստանյալ Արմեն Արամայիսի Նունուշյանի նկատմամբ նշանակել պատժի կիրառման հետ միացված բժշկական բնույթի հարկադրանքի միջոց թմրամոլության դեմ` այն կիրառելու ժամկետը հաշվակցելով պատժի ժամկետի մեջ։
Պատիժը պետք է կրի ՀՀ ԱՆ ՔԿՎ համապատասխան ՔԿ հիմնարկում։
Պատժի սկիզբը հաշվել 2010 թվականի ապրիլի 24-ից։
Դատավճիռն օրինական ուժի մեջ մտնելուց հետո իրեղեն ապացույց ճանաչված տաբատը ոչնչացնել, իսկ 0,163 գրամ քաշով «ացետիլացված ափիոն» տեսակի թմրամիջոցը թողնել Էրեբունու քննչական բաժնի տնօրինության տակ` թիվ 12103511 քրեական գործին կից։
Դատավարության մասնակիցների կողմից դատավճիռը կարող է վերաքննության կարգով բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում։

ԴԱՏԱՎՈՐ Վ. Թ. ԳՐԻԳՈՐՅԱՆ