ԵԷԴ/0051/01/11

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ` Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ` Լ. ՄԻՐԶՈՅԱՆ

Մասնակցությամբ`

ՄԵՂԱԴՐՈՂ` Տ. ՈւԶՈՅԱՆ
ՊԱՇՏՊԱՆ` Գ. ՄԱՐԳԱՐՅԱՆ

2011թ. մայիսի 5-ին դատարանում
Դռնբաց դատական նիստում քննեց քրեական գործն ըստ մեղադրանքի` Աշոտ Լիպարիտի Գաբրիելյանի, ծնված 01.04.1970թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, նախկինում չդատված, չի աշխատել, բնակվել է ք.Երևան Նոր-Արեշ 44 փողոց, 81 տանը։
Սույն գործով կալանքի տակ է 14.02.2011թ.։
Դատաքննությամբ ձեռք բերված ապացույցներով պարզվեց հետևյալը.
Նախաքննական մարմինը ամբաստանյալ Աշոտ Լիպարիտի Գաբրիելյանին ՀՀ քր. օր-ի 235 հոդվածի 1-ին մասով և 268 հոդվածի 3-րդ մասով մեղադրանք է առաջադրել այն բանի համար, որ շուրջ 5 տարի առաջ ընկերոջից ապօրինի կերպով ձեռք է բերել և Նոր-Արեշ թաղամասում գտնվող թիվ 2 էլեկտրոցանցին կից իր ամառանոցում պահել է հրազեն հանդիսացող 1 հատ գործարանային արտադրության «Տոզ-9» տեսակի 5.6մմ տրամաչափի 4753 գործարանային համարով որսորդական-սպորտային ակոսափող հրացան, հրազեն հանդիսացող 1 հատ գործարանային արտադրության «ԻԺ 53-M» տեսակի 4.5մմ տրամաչափի 045303253 գործարանային համարի օդաճնշիչ ատրճանակ` ձևափոխված 5.6մմ տրամաչափի օղակավոր բոցավառման փամփուշտներով կրակելու համար, ռազմամթերթ հանդիսացող 17 հատ 9մմ, 56 հատ 5.6մմ և 5 հատ 5.45մմ տրամաչափի փամփուշտներ։ Հրազենները և ռազմամթերքը հայտնաբերվել են 2011թ. փետրվարի 13-ին ամառանոցում կատարված խուզարկությամբ։
Նույն ամառանոցի հողամասում ինքն իրեն աճած կանեփի բույսից առանց իրացնելու նպատակի ապօրինի ձեռք է բերել, պատրաստել ու ամառանոցում պահել է առանձնապես խոշոր չափի` 777.99 գրամ հաստատուն քաշով չորացված մարիխուանա տեսակի թմրամիջոց, որը հայտնաբերվել է 2011թ. փետրվարի 13-ին ամառանոցում կատարված խուզարկությամբ։
Առաջադրված մեղադրանքում Աշոտ Գաբրիելյանն իրեն մեղավոր ճանաչեց և ցուցմունք տվեց այն մասին, որ Նոր-Արեշ թաղամասում գտնվող թիվ 2 էլեկտրոցանցին կից գտնվող ամառանոցը պատկանում է իրեն, որտեղ ինքը ծառեր է աճեցնում, կենդանիներ է պահում։ 2011թ. փետրվարի 13-ին իր ամառանոց են եկել ոստիկանության աշխատակիցները, կանչել են հարևաններից երկու հոգու և իրեն ասել են, որ ամառանոցում խուզարկություն պետք է կատարեն, ուստի առաջարկել են, եթե արգելված իրեր կան, ներկայացնի նրանց։ Ինքը ինքնակամ նրանց է ներկայացրել ամառանոցում գտնվող զենք-զինամթերքը և արկղով կանեփի թուփը։ Իր ամառանոցից հայտնաբերված զենք-զինամթերքը որպես հիշատակ մնացել է իր մարտական ընկերոջից, որը ներկայումս մահացած է, իսկ ինչ վերաբերվում է կանեփի թփին, ապա ծտերի վանդակից սերմը ընկել է հողի մեջ և աճել է։ Քանի որ ծտերը այդ սերմերից ևս ուտում են, ինքը սերմերով թփերը պահել է որպեսզի կեր չլինելու դեպքում այդ սերմերով կերակրի նրանց։
Դատաքննությամբ որպես վկա հարցաքննված Ալեքսանդր Ավագյանը ցուցմունք է տվել այն մասին, որ 2011թ. փետրվարի 13-ին իրենց տուն են եկել ոստիկանության աշխատակիցները և իրեն հրավիրել են հարևան ամառանոց` կատարվող խուզարկությանը որպես ընթերակա մասնակցելու համար։ Ամառանոցում եղել են զենքեր, որսորդական հրացան, որսորդական փամփուշտներ և ստվարաթղթե արկղով խոտաբույս։ Արկղը բաց վիճակում դրված է եղել աղավնիների բնի կողքը, որի մեջ հայտնաբերված խոտաբույսը ցողունով և տերևներով է եղել։ Իրենց ներկայությամբ ոստիկանության աշխատակիցները թփերը առանձնացրել են ցողունից և դրել առանձին տոպրակների մեջ` ցողունները առանձին, տերևները առանձին, որովհետև հայտնաբերված խոտաբույսը ամբողջական տեքով տոպրակի մեջ չէր տեղավորվի, որից հետո կշռել են միայն տերևները։ Յուրաքանչյուր գործողություն կատարել են իր ներկայությամբ, իրեն ցույց են տվել հայտնաբերված բոլոր իրերը, որից հետո կազմվել է արձանագրություն և իրենք ստորագրել են արձանագրության տակ։
Դատաքննությամբ որպես վկա հարցաքննված Արսեն Ղուկասյանը ցուցմունք է տվել այն մասին, որ 2011թ. փետրվարի 13-ին գտնվել է փողոցում, երբ իրեն են մոտեցել ոստիկանության աշխատակիցները և հրավիրել են հարևան ամառանոց` կատարվող խուզարկությանը որպես ընթերակա մասնակցելու համար։ Ամառանոցում եղել է որսորդական հրացան և ստվարաթղթե արկղ։ Արկղը գտնվել է բաց վիճակում։ Դրա միջից հանել են չորացած խոտաբույս և ցույց են տվել իրեն։ Խոտաբույսը եղել է ցողունով և տերևներով։ Այդ ժամանակ ոստիկանության աշխատակիցները որոշել են հայտնաբերված խոտաբույսը կշռել, քանի որ կշեռքը փոքր է եղել, ուստի տերևները առանձնացրել են ցողուններից, լցրել տոպրակի մեջ և կշռել։ Այդ բոլոր գործողությունները կատարելուց հետո կազմվել է արձանագրություն և իրենք ստորագրել են արձանագրության տակ։
Դատաքննությամբ որպես վկա հարցաքննված ՀՀ ոստիկանության Էրեբունու ՔՀԲ-ի օ/լ Հմայակ Միլիտոսյանը ցուցմունք է տվել այն մասին, որ օպերատիվ տվյալների հիման վրա խուզարկություն են կատարել Աշոտ Գաբրիելյանին պատկանող` Նոր-Արեշ թաղամասում գտնվող թիվ 2 էլեկտրոցանցին կից գտնվող ամառանոցում։ Խուզարկությամբ հայտնաբերել են փամփուշտներ, Տոզ հրացան, որսորդական հրացանի փամփուշտներ, կացին, ինքնաշեն դաշույն, կանեփի տերևներ և ստվարաթղթե արկղի մեջ ցողուններով կանեփի ճյուղ։ Արկղը թաքցրած չի եղել, այլ գտնվել է բաց վիճակում։ Հայտնաբերված կանաչ զանգվածներից 34 գրամը եղել է կանեփի չորացված տերևներ` առանց ցողունների, որը եղել է առանձին տոպրակի մեջ։ Դրանից հետո կշռել են ստվարաթղթե արկղի մեջ եղած ցողունները` տերևներով, սակայն դրանք չեն տեղավորվել կշեռքի վրա, այդ պատճառով ցողուններից` ճյուղերից պոկել են լրիվ չոր վիճակում եղած տերևները և տերևները առանձին են կշռել, որը կազմել է 836 գրամ, իսկ ցողունները, ճյուղերը առանց կշռելու թողել են արկղի մեջ։ Տերևները կշռելուց հետո նշված 34 գրամը և 836 գրամ չորացված տերևները դրել են արկղի մեջ եղած ճյուղերի վրա։ Նույն արկղի մեջ դրվել է նաև առանձին տոպրակի մեջ եղած, մանրացված 6 գրամ զանգվածը։ Ցողունները մնացել է արկղի մեջ, իսկ տերևները լցրել են պոլիէթիլենային տոպրակի մեջ, որից հետո բոլորը միասին դրել են արկղի մեջ և փաթեթավորել։ Իրենք ցողունները չեն կշռել, կշռել են միայն տերևները։ Ցողունները թողել են արկղի մեջ որպեսզի պարզ լինի, որ այդ տերևները եղել են ցողունի վրա։
Դատաքննությամբ որպես փորձագետ հարցաքննված Արմեն Մամաջանյանը ցուցմունք է տվել այն մասին, որ կանեփի թուփը իրենից ներկայացնում է կենտրոնական ցողունը, կողմնային ճյուղերը, վերնամասը, տերևները և արմատը։ Բուն «մարիխուանայի» հումքը, դա կանեփի բույսի վերնամասն է, որոշակի քանակությամբ սերմերը և ցողունի մասնիկները միասին խառնած։ Դրանցից ստանում են «մարիխուանա» տեսակի թմրանյութը։ «Մարիխուանան» հանդիսանում է արդեն պատրաստի թմրամիջոց, իսկ կանեփի թուփը որպես հումք է հանդիսանում «մարիխուանա» տեսակի թմրամիջոցը պատրաստելու համար։ Եթե կանեփի թուփը ներկայացվի փորձաքննությանը ամբողջական տեսքով` առանց տերևները ցողուններից անջատելու, ապա այն կդիտվի որպես «կանեփի թուփ» տեսակի թմրամիջոց, և ոչ թե «մարիխուանա» տեսակի թմրամիջոց։ Կանեփի թփի միայն կողմնային ճյուղերը չի կարող դիտվել թմրամիջոց, որպես «կանեփի թուփ» տեսակի թմրամիջոց դիտվելու համար անհրաժեշտ է, որ այն լինի ամբողջական տեսքով` ցողուն, ճյուղեր, վերնամաս և տերևներ։ Որպեսզի կանեփի թուփը դիտվի «մարիխուանա» տեսակի թմրամիջոց, պետք է որոշակի ձևով մանրացված լինի, քանի որ այն ամբողջական տեսքով չի կարող դիտվել որպես «մարիխուանա» տեսակի թմրամիջոց։
Նախաքննության ընթացքում իրեղեն ապացույցները իրեն ինչ ձևով, որ ներկայացրել են, դրա վերաբերյալ էլ ինքը տվել է եզրակացություն։ Իրեն ներկայացրել են մեկ ստվարաթղթե արկղ, որի մեջ եղել են 310 գրամ քաշով կանեփի թփի կտրատված կողմնային ճյուղեր և ցողուններ, իսկ հատակին` 835 գրամ քաշով մանրացված կանաչ զանգված։ Որոշման մեջ նշված չի եղել, որ ստվարաթղթե արկղի մեջ գտնվող զանգվածը` ցողունները և տերևները, խուզարկությամբ հայտնաբերման պահին եղել են մեկ ամբողջություն, այսինքն եղել են կանեփի չորացված թփեր, այդ պատճառով էլ 835 գրամ քաշով չորացված զանգվածը որակվել է «մարիխուանա», իսկ 310 գրամ քաշով կանաչ բույսի կողմնային ճյուղերը` առանց տերևների և վերնամասերի թմրամիջոցներ չեն հանդիսանում։
Վկաներ` Անժելա Գաբրիելյանը, Անահիտ Գաբրիելյանը և Լիպարիտ Գաբրիելյանը նախաքննության ընթացքում նույնաբովանդակ ցուցմունքներ են տվել այն մասին, որ իրենք մինչև 2011թ. փետրվարի 13-ը տեղյակ չեն եղել Աշոտ Գաբրիելյանի կողմից իրենց` Նոր-Արեշ թաղամասի, թիվ 2 էլեկտրոցանցին կից գտնվող ամառանոցում պահվող ռազմամթերքի և թմրամիջոցի մասին։ Միայն հաջորդ օրն են տեղեկացել, որ իրենց ամառանոցից հայտնաբերվել է զենք, ռազմամթերք և թմրամիջոց։
Դատարանի կողմից հետազոտվեց Աշոտ Գաբրիելյանի ամառանոցում կատարված խուզարկության արձանագրությունը, համաձայն որի խուզարկությամբ նշված ամառանոցում հայտնաբերվել է 1 հատ գործարանային արտադրության «Տոզ-9» տեսակի 5.6մմ տրամաչափի 4753 գործարանային համարով որսորդական-սպորտային ակոսափող հրացան, 1 հատ գործարանային արտադրության «ԻԺբ 53-M» տեսակի 4.5մմ տրամաչափի 045303253 գործարանային համարի օդաճնշիչ ատրճանակ` ձևափոխված 5.6մմ տրամաչափի օղակավոր բոցավառման փամփուշտներով կրակելու համար, 17 հատ 9մմ, 56 հատ 5.6մմ և 5 հատ 5.45մմ տրամաչափի փամփուշտներ և 876 գրամ քաշով կանաչանման զանգված։
Դատաձգաբանական փորձաքննության 14.02.2011թ. թիվ 218 եզրակացությունը, համաձայն որի Աշոտ Գաբրիելյանի ամառանոցից հայտնաբերված և փորձաքննությանը ներկայացված զենք և ռազմամթերքներից հրազեն են հանդիսանում 1936թ. գործարանային արտադրության 5.6մմ տրամաչափի «Տոզ-9» մոդելի «4753» համարի որսորդական-սպորտային ակոսափող հրացանը, գործարանային արտադրության «ԻԺ-53Մ» տեսակի 4.5մմ տրամաչափի «045303253» համարի օդաճնշիչ ատրճանակը` ձևափոխված 5.6մմ տրամաչափի օղակավոր բոցավառման փամփուշտներով կրակելու համար, 5 հատ 5.45մմ/5.45X39/ տրամաչափի մարտական փամփուշտները` նախատեսված «ԱԿ-74» տեսակի ինքնաձիգի, «ՌՊԿ-74» տեսակի ձեռքի գնդացիրների և դրանց մոդիֆիկացիաների համար, 17 հատ 9մմ/9X18 ՊՄ/ տրամաչափի մարտական փամփուշտները` նախատեսված «ՊՄ» և «ԱՊՍ» տեսակի ատրճանակների համար և 56 հատ 5.6մմ տրամաչափի օղակաձև բոցավառման հրացանային փամփուշտները` նախատեսված համապատասխան տրամաչափի «ՏՈԶ» տեսակի հրացանների, «Մարգոլին» տեսակի ատրճանակների և այլ զենքերի համար։
Դատաքիմիական փորձաքննության 14.02.2011թ. թիվ 45Ք եզրակացությունը, համաձայն որի փորձաքննությանը ներկայացված ընդհանուր 775.2/750 գրամ, 25.2 գրամ/ գրամ հաստատուն քաշով նյութը հանդիսանում է չորացված մարիխուանա տեսակի թմիամիջոց։ Փորձաքննությանը ներկայացված ընդհանուր 2.8 գրամ հաստատուն քաշով նյութը հանդիսանում է 2.79 գրամ քաշով չորացված մարիխուանա տեսակի թմրամիջոցի և 0.01 գրամ քաշով թութունի մասնիկների խառնուրդ։ Թութունի մասնիկները թմրամիջոց չեն հանդիսանում։ Փորձաննությանը ներկայացված 310 գրամ քաշով կանեփի բույսի կողմնային ճյուղերը` առանց տերևների և վերնամասերի, թմրամիջոց չեն հանդիսանում։
Կրկնակի դատաքիմիական փորձաքննության 22.04.2011թ. թիվ 14321105 եզրակացությունը, համաձայն որի փորձաքննությանը ներկայացված կանեփի ցեղի խոտաբույսերի անհատին կամ անհատներին պատկանող բուսական զանգվածը և կոտրատված/կտրատված/ ցողունների հատվածները/պտղաբույլերի մնացորդները ներառյալ/ ունեն ընդհանուր խմբային պատկանելություն և ամենայն հավանականությամբ նախկինում կազմել են մեկ ամբողջություն։ Որպես ամբողջական միավոր վերջիններս կարող էին կազմել կանեփի ցեղի խոտաբույսերի անհատի կամ անհատների կողային ճյուղեր, ինչպես նաև կենտրոնական ցողունի շարունակական բաղադրիչներ/կենտրոնական ցողունի միջնամաս և վերնամաս/։ Կանեփի բույսի կողային ճյուղերը և կենտրոնական ցողունի միջնամասը և վերնամասը հանդիսանում են բույսի բազմահամաչափ և միահամաչափ վերգետնյա օրգանների ամբողջություն, ուստի փորձաքննությանը ներկայացված կանեփի ցեղի խոտաբույսերի անհատին կամ անհատներին պատկանող բուսական զանգվածը և կոտրատված/կտրտված/ ցողունների հատվածները մեկ ամբողջություն կազմելու դեպքում կհանդիսանային «կանեփի թուփ» տեսակի թմրամիջոց։
16.02.2011թ. Աշոտ Գաբրիելյանի ամառանոցում խուզարկությամբ հայտնաբերված 1 հատ գործարանային արտադրության «Տոզ-9» տեսակի 5.6մմ տրամաչափի 4753 գործարանային համարով որսորդական-սպորտային ակոսափող հրացանը, 1 հատ գործարանային արտադրության «ԻԺ 53-M» տեսակի 4.5մմ տրամաչափի 045303253 գործարանային համարի օդաճնշիչ ատրճանակը` ձևափոխված 5.6մմ տրամաչափի օղակավոր բոցավառման փամփուշտներով կրակելու համար, 17 հատ 9մմ, 56 հատ 5.6մմ և 5 հատ 5.45մմ տրամաչափի փամփուշտները իրեղեն ապացույց ճանաչելու որոշումը։
16.02.2011թ. Աշոտ Գաբրիելյանի ամառանոցում խուզարկությամբ հայտնաբերված «չորացված մարիխուանա» և դատարանի կողմից «կանեփի թուփ» տեսակի թմրամիջոցները իրեղեն ապացույց ճանաչելու որոշումները։
Դատաքննությամբ հաստատված հանգամանքները հաշվի առնելով, մեղադրող Տ.Ուզոյանը ամբաստանյալ Աշոտ Գաբրիելյանի նկատմամբ ՀՀ քր. օր-ի 235 հոդվածի 1-ին մասով և 268 հոդվածի 3-րդ մասով առաջադրված մեղադրանքը փոփոխեց և դատարանում մեղադրանքը պաշտպանեց ՀՀ քր. օր-ի 235 հոդվածի 1-ին մասով և 268 հոդվածի 2-րդ մասի 2-րդ կետով, պատճառաբանելով, որ դատաքննությամբ նշանակված կրկնակի դատաքիմիական փորձաքննության 22.04.2011թ. թիվ 14321105 եզրակացության համաձայն 13.02.2011թ. Ա. Գաբրիելյանին պատկանող ամառանոցում կատարված խուզարկությամբ հայտնաբերված ստվարաթղթե արկղում եղել են կանեփի թփերով չորացված ցողուններ, այսինքն ցողուններից անջատված 835 գրամ տերևները և 310 գրամ ցողունները եղել են մեկ ամբողջություն։ Հետևաբար երկու դատաքիմիական փորձաքննությունների եզրակացությունների հետազոտմամբ հիմնավորվեց, որ Ա. Գաբրիելյանը առանց իրացնելու նպատակի ձեռք է բերել և ապօրինի պահել է խոշոր չափի` 27.99 գրամ «չորացված մարիխուանա» տեսակի թմրամիջոց և խոշոր չափի` 1կգ 145 գրամ «կանեփի թուփ» տեսակի թմրամիջոց։
Գնահատելով դատաքննությամբ հետազոտված բոլոր ապացույցները, դրանք համադրելով իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված, ինչպես նաև ներքին համոզմամբ, դատարանը գտնում է, որ մեղադրող Տ. Ուզոյանի կողմից Աշոտ Գաբրիելյանին ՀՀ քր. օր-ի 235 հոդվածի 1-ին մասով և 268 հոդվածի 2-րդ մասի 2-րդ կետով նոր մեղադրանք առաջադրելը, հիմնավոր է, այն բխում է գործի դատաքննությամբ ձեռք բերված տվյալների ամբողջական վերլուծությունից և ապացույցների իրավական ճիշտ գնահատումից հետևյալ պատճառաբանությամբ.
Դատաքննությամբ ձեռք բերված և հետազոտված ապացույցներով, մասնավորապես` կրկնակի դատաքիմիական փորձաքննության 22.04.2011թ. թիվ 14321105 եզրակացությամբ հաստատվեց, որ 2011թ. փետրվարի 13-ին Նոր-Արեշ թաղամասում գտնվող թիվ 2 էլեկտրոցանցին կից գտնվող ամբաստանյալ Աշոտ Գաբրիելյանին պատկանող ամառանոցում կատարված խուզարկությամբ հայտնաբերված ստվարաթղթե արկղում եղել է ոչ թե առանձնապես խոշոր չափի` 750 գրամ հաստատուն քաշով «չորացված մարիխուանա» տեսակի թմրամիջոց, այլ ընդհանուր` 1կգ 145 գրամ խոշոր չափի «կանեփի թուփ» տեսակի թմրամիջոց, հետևաբար դատարանը նույնպես գտնում է, որ մեղադրողի կողմից Աշոտ Գաբրիելյանին ՀՀ քր. օր-ի 268 հոդվածի 2-րդ մասի 2-րդ կետով նոր մեղադրանք առաջադրելը հիմնավոր է, այն բխում է գործի դատաքննությամբ ձեռք բերված տվյալների ամբողջական վերլուծությունից։
Այսպիսով դատարանը ապացուցված համարեց, որ Աշոտ Լիպարիտի Գաբրիելյանը կատարել է արարք, որը նախատեսված է ՀՀ քր. օր-ի 235 հոդվածի 1-ին մասով և 268 հոդվածի 2-րդ մասի 2-րդ կետով, որով և պետք է ենթարկվի քրեական պատասխանատվության։
Պատիժ նշանակելիս դատարանը հաշվի է առնում արարքի հասարակական վտանգավորությունը, ամբաստանյալի ինքնությունը և գործի ողջ հանգամանքները։
Աշոտ Գաբրիելյանի պատասխանատվությունը և պատիժը ծանրացնող հանգամանքներ չկան։
Դատարանն ամբաստանյալի պատասխանատվությունը և պատիժը մեղմացնող, ինչպես նաև անձը բնութագրող հանգամանք է համարում այն, որ վերջինս երիտասարդ է, վատառողջ, նախկինում արատավորված չի եղել,1990-1994թթ. ակտիվորեն մասնակցել է ՀՀ և ԼՂՀ սահմանների պաշտպանության համար մղվող մարտական գործողություններին, բնութագրվում է դրականորեն, խնամքին են գտնվում կինը և թոշակառու ծնողները, որոնցից հայրը` երկրորդ կարգի հաշմանդամ է, ընտանիքի միակ կերակրողն է, զղջացել է կատարած արարքի համար և ընդունել մեղքը։
Քննարկելով խափանման միջոցի հարցը, դատարանը գտնում է, որ ամբաստանյալ Ա. Գաբրիելյանի նկատմամբ ընտրված կալանք խափանման միջոցը պետք է թողնել անփոփոխ։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված և ՀՀ ոստիկանության ՓՔ վարչությանն ի պահ հանձնված հրազեն հանդիսացող 1 հատ գործարանային արտադրության «Տոզ-9» տեսակի 5.6մմ տրամաչափի 4753 գործարանային համարով որսորդական-սպորտային ակոսափող հրացանը, 1 հատ գործարանային արտադրության «ԻԺ 53-M» տեսակի 4.5մմ տրամաչափի 045303253 գործարանային համարի օդաճնշիչ ատրճանակը` ձևափոխված 5.6մմ տրամաչափի օղակավոր բոցավառման փամփուշտներով կրակելու համար, 17 հատ 9մմ, 56 հատ 5.6մմ և 5 հատ 5.45մմ տրամաչափի փամփուշտները պետք է թողնել ՀՀ ոստիկանության փորձաքրեագիտական վարչության տնօրինմանը, իսկ իրեղեն ապացույց «չորացված մարիխուանա» և «կանեփի թուփ» տեսակի թմրամիջոցները` ոչնչացնել։
Ինչ վերաբերվում է Աշոտ Գաբրիելյանի ամառանոցում 13.02.2011թ. կատարված խուզարկությամբ հայտնաբերված գործարանային արտադրության տրամաչափի «ԻԺ-18Ե» մոդելի «Տ14537» համարի որսորդական ողորկափող մեկփողանի հրացանին, 3 հատ` 12 տրամաչափի որսորդական փամփուշտներին` նախատեսված համապատասխան տրամաչափի որսորդական ողորկափող զենքերի համար, որոնք լիցքավորված են տնային պայմաններում, երկկողմանի սահմանափակիչով դանակին, գործարանային արտադրության ընդհանուր նշանակության որսորդական դանակին և կացնին, ապա դատարանը գտնում է, որ դատավճիռն օրինական ուժի մեջ մտնելուց հետո պետք է վերադարձնել Աշոտ Գաբրիելյանի հարազատներին։
Ելնելով վերոգրյալից և ղեկավարվելով ՀՀ քր. դատ. օր-ի 357-360 հոդվածներով, դատարանը.

Վ Ճ Ռ Ե Ց

Աշոտ Լիպարիտի Գաբրիելյանին մեղավոր ճանաչել ՀՀ քր. օր-ի 235 հոդվածի 1-ին մասով և 268 հոդվածի 2-րդ մասի 2-րդ կետով.
ՀՀ քր. օր-ի 235 հոդվածի 1-ին մասով դատապարտել ազատազրկման` 6/վեց/ ամիս ժամկետով։
ՀՀ քր. օր-ի 268 հոդվածի 2-րդ մասի 2-րդ կետով դատապարտել ազատազրկման` 1/մեկ/ տարի ժամկետով։
ՀՀ քր. օր-ի 66 հոդվածի 3-րդ մասի համաձայն՝ պատիժները լրիվ գումարելու միջոցով, վերջնական պատիժ նշանակել ազատազրկում՝ 1/մեկ/ տարի 6/վեց/ ամիս ժամկետով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել 14.02.2011թ.։
Կալանք խափանման միջոցը թողնել անփոփոխ մինչև դատավճռի օրինական ուժի մեջ մտնելը։
Գործով իրեղեն ապացույց ճանաչված և ՀՀ ոստիկանության ՓՔ վարչությանն ի պահ հանձնված հրազեն հանդիսացող 1 հատ գործարանային արտադրության «Տոզ-9» տեսակի 5.6մմ տրամաչափի 4753 գործարանային համարով որսորդական-սպորտային ակոսափող հրացանը, 1 հատ գործարանային արտադրության «ԻԺ 53-M» տեսակի 4.5մմ տրամաչափի 045303253 գործարանային համարի օդաճնշիչ ատրճանակը` ձևափոխված 5.6մմ տրամաչափի օղակավոր բոցավառման փամփուշտներով կրակելու համար, 17 հատ 9մմ, 56 հատ 5.6մմ և 5 հատ 5.45մմ տրամաչափի փամփուշտները դատավճիռն օրինական ուժի մեջ մտնելուց հետո թողնել ՀՀ ոստիկանության փորձաքրեագիտական վարչության տնօրինմանը, իսկ իրեղեն ապացույց «չորացված մարիխուանա» և «կանեփի թուփ» տեսակի թմրամիջոցները` ոչնչացնել։
Աշոտ Գաբրիելյանի ամառանոցում 13.02.2011թ. կատարված խուզարկությամբ հայտնաբերված գործարանային արտադրության տրամաչափի «ԻԺ-18Ե» մոդելի «Տ14537» համարի որսորդական ողորկափող մեկփողանի հրացանը, 3 հատ` 12 տրամաչափի որսորդական փամփուշտները` նախատեսված համապատասխան տրամաչափի որսորդական ողորկափող զենքերի համար, որոնք լիցքավորված են տնային պայմաններում, երկկողմանի սահմանափակիչով դանակը, գործարանային արտադրության ընդհանուր նշանակության որսորդական դանակը և կացինը դատավճիռն օրինական ուժի մեջ մտնելուց հետո վերադարձնել Աշոտ Գաբրիելյանի հարազատներին։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ