ԵԷԴ/0018/01/11

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ` Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ` Լ. ՄԻՐԶՈՅԱՆ

Մասնակցությամբ`

ՄԵՂԱԴՐՈՂ` Ա. ՄՈւՐԱԴՅԱՆ

2011թ. մարտի 11-ին դատարանում
Դռնբաց դատական նիստում քննեց քրեական գործն ըստ մեղադրանքի` Արթուր Գարեգինի Մկրտչյանի, ծնված 28.10.1984թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, նախկինում դատված`
1. Երևանի Կենտրոն և Նորք-Մարաշ համայնքների առաջին ատյանի դատարանի 02.11.2005թ. դատավճռով ՀՀ քր. օր-ի 177 հոդվածի 2-րդ մասի 3-րդ և 4-րդ կետերով, 268 հոդվածի 1-ին մասով և 271 հոդվածի 1-ին մասով դատապարտվել է ազատազրկման` 2 տարի 3 ամիս ժամկետով և տուգանքի` 50.000 ՀՀ դրամի չափով,
2. Երևանի Կենտրոն և Նորք-Մարաշ համայնքների առաջին ատյանի դատարանի 15.12.2005թ. դատավճռով ՀՀ քր. օր-ի 268 հոդվածի 1-ին մասով և 271 հոդվածի 1-ին մասով, 66 հոդվածի կիրառմամբ դատապարտվել է ազատազրկման` 2 տարի 3 ամիս ժամկետով և տուգանքի` 150.000 ՀՀ դրամի չափով, չի աշխատել, բնակվել է ք.Երևան Բագրատունյաց 36 շենք, 4 բնակարանում, ներկայումս ՀՀ ԱՆ «Նուբարաշեն» քրեակատարողական հիմնարկի կալանավոր։
Մեղադրվում է ՀՀ քր. օր-ի 34-268 հոդվածի 2-րդ մասի 1-ին կետով։
Դատաքննությամբ և գործի տվյալներով պարզվեց հետևյալը.
Արթուր Գարեգինի Մկրտչյանը Երևանի Արաբկիր և Քանաքեռ-Զեյթուն համայնքների ընդհանուր իրավասության դատարանի որոշմամբ ՀՀ քր. օր-ի 34-177 հոդվածի 2-րդ մասի 3-րդ և 4-րդ կետերով և 235 հոդվածի 1-ին մասով նախատեսված հանցագործություններ կատարելու մեղադրանքով գտնվելով կալանքի տակ և այն 13.08.2009թ. ՀՀ ԱՆ «Նուբարաշեն» քրեակատարողական հիմնարկում կրելու ընթացքում` 2010թ. հոկտեմբերի 12-ին կրկին անգամ, առանց իրացնելու նպատակի` իր օգտագործման համար, փորձել է ձեռք բերել զգալի չափի` 0.016 գրամ ընդհանուր քաշով «բուպրենորֆին» տեսակի թմրամիջոց, սակայն հանցագործությունն ավարտին չի հասցրել իր կամքից անկախ հանգամանքներով.
Այսպես, Արթուր Գարեգինի Մկրտչյանը քննությամբ չպարզված անձի հետ հեռագրական կապի միջոցով համաձայնության է եկել վերջինիցս թմրամիջոց ձեռք բերելու շուրջ։ 2010թ. հոկտեմբերի 12-ին տեղեկանալով, որ իր խցակից Արսեն Գրիգորի Գևորգյանի քույրը` Գեղեցիկ Գրիգորի Գևորգյանը, ՀՀ ԱՆ «Նուբարաշեն» քրեակատարողական հիմնարկ եղբորը հանձնուք է բերելու, Ա. Գևորգյանին խնդրել է զանգահարել քրոջը և խնդրել որպեսզի ՔԿ հիմնարկ բերի նաև իր հանձնուքը։ Նույն օրը, քննությամբ չպարզված անձը Էրեբունի թանգարանի հարակից տարածքում գտնվող կանգառի մոտ Գեղեցիկ Գևորգյանին է փոխանցել դեղին գույնի պոլիէթիլենային տոպրակով հանձնուք, որը վերջինս դնելով իր հանձնուքի հետ մեկ փաթեթում տարել է ՀՀ ԱՆ «Նուբարաշեն» ՔԿ հիմնարկ և ներկայացրել Ա. Գևորգյանի անվամբ։ ՀՀ ԱՆ «Նուբարաշեն» քրեակատարողական հիմնարկում կատարված հանձնուքի ստուգմամբ «Լուսաստղ» բուսական յուղ պիտակով պլաստմասե տարայի մեջ լցրած կարմիր պղպեղի մեջ` տարայի պատին թափանցիկ, կպչուն ժապավենով ամրացված հայտնաբերվել է զգալի չափի` 0.016 գրամ ընդհանուր քաշով «բուպրենորֆին» տեսակի թմրամիջոցը։
Վերը նշված հանցավոր արարքի կատարման համար Արթուր Գարեգինի Մկրտչյանին մեղադրանք է առաջադրվել ՀՀ քր. օր-ի 34-268 հոդվածի 2-րդ մասի 1-ին կետով։
Դատաքննությամբ առաջադրված մեղադրանքում ամբաստանյալ Արթուր Մկրտչյանն իրեն լիովին մեղավոր ճանաչեց և ցուցմունք տվեց այն մասին, որ 13.08.2009թ. գտնվելով կալանքի տակ, և հանդիսանալով ՀՀ ԱՆ «Նուբարաշեն» քրեակատարողական հիմնարկի կալանավոր հեռագրական կապի միջոցով համաձայնության է եկել ոմն եզդի Սամոյի հետ վերջինիցս թմրամիջոց ձեռք բերելու շուրջ։ 2010թ. հոկտեմբերի 12-ին տեղեկանալով, որ իր խցակից Արսեն Գևորգյանի քույրը` Գեղեցիկ Գևորգյանը, եղբորը հանձնուք է բերելու, Ա. Գևորգյանին խնդրել է զանգահարել քրոջը և խնդրել որպեսզի ՔԿ հիմնարկ բերի նաև իր հանձնուքը, որից հետո կրկին հեռագրական կապի միջոցով իր ծանոթին տեղեկացրել է, որ իր համար նախատեսված հանձնուքը կարող է փոխանցել Էրեբունի թանգարանի մոտ գտնվող աղջկան` նկարագրելով վերջինիս արտաքին տվյալները։ Դրանից մեկ ժամ անց, Քկ հիմնարկի աշխատակիցները եկել և տարել են Արսեն Գևորգյանին, որից ինքը հասկացել է, որ Արսենի անվամբ բերված հանձնուքի խուզարկությամբ թմրանյութը հայտնաբերվել է։
Բացի ամբաստանյալի խոստովանական ցուցմունքից, նրա կատարած արարքը հիմնավորվեց գործով ձեռք բերված հետևյալ ապացույցներով.
Վկաներ` ՀՀ ԱՆ «Նուբարաշեն» քրեակատարողական հիմնարկի անվտանգության ապահովման բաժնի աշխատակիցներ Հովհաննես Մանջիկյանի դատաքննությամբ տված և Ստեփան Մշեցյանի նախաքննությամբ տրված և դատաքննությամբ հետազոտված նույնաբովանդակ ցուցմունքներով այն մասին, որ 2010թ. հոկտեմբերի 12-ին, ժամը 1300-ի սահմաններում ՔԿ հիմնարկի հանձնուքների ընդունման սենյակում իրականացրել են դատապարտյալ Արսեն Գևորգյանի անվամբ` վերջինիս քրոջ` Գեղեցիկ Գևորգյանի կողմից բերված հանձնուքի խուզարկությունը, որի ընթացքում կարմիր պղպեղի տարայի պատին թափանցիկ կպչուն ժապավենով ամրացված հայտնաբերվել է 2 հատ` յուրաքանչյուրը 0.04 գրամ քաշով, սպիտակ գույնի, օվալաձև, «B8» գործարանային դաջվածքով դեղահաբեր։ Հայտնաբերվածի վերաբերյալ Գ. Գևորգյանը հայտնել է, որ դեղահաբերի առկայության մասին տեղյակ չէ, քանի որ հանձնուքը ինքը չի պատրաստել, այլ իրեն փոխանցել է անծանոթ մի քաղաքացի։
Վկա` Գեղեցիկ Գևորգյանի նախաքննությամբ տրված և դատաքննությամբ հետազոտված ցուցմունքով այն մասին, որ 2010թ. հոկտեմբերի 12-ին, ժամը 0930-ի սահմաններում ՀՀ ԱՆ «Նուբարաշեն» քրեակատարողական հիմնարկից իրեն է զանգահարել եղբայրը` Արսեն Գևորգյանը և խնդրել է իրեն ծխախոտ և քաղցրավենիքներ տանել, որին ինքը համաձայնվել է։ Միաժամանակ եղբայրը իրեն խնդրել է ՀՀ ԱՆ «Նուբարաշեն» քրեակատարողական հիմնարկ տանել նաև իր խցակիցներից մեկի հանձնուքը։
Հարևանությամբ գտնվող խանութից գնումներ կատարելով, երթուղային տաքսիով ուղևորվել է Էրեբունի թանգարանի հարակից տարածք, որտեղից եղբայրը խնդրել էր վերցնել իր խցակցի հանձնուքը։ Հասնելով Էրեբունի թանգարանի հարակից տարածքում գտնվող կանգառ, զանգահարել է եղբորը և տեղեկացրել է, որ արդեն գտնվում է իրենց պայմանավորված վայրում։ Եղբայրը իրենից հարցրել է իր հանդերձանքի նկարագրությունը և խնդրել է մի քիչ սպասել։ 5 րոպե անց կանգառի հարակից տարածքում գտնվող միջանցիկ հատվածից քայլելով իրեն է մոտեցել մոտ 40 տարեկան մի տղամարդ և իրեն է փոխանցել դեղին գույնի պոլիէթիլենային մեկ տոպրակ։ Ինքը` վերցնելով տոպրակը, նստել է 119 համարի երթուղային տաքսին և ուղևորվել է ՀՀ ԱՆ «Նուբարաշեն» քրեակատարողական հիմնարկ, որտեղ էլ իրեն փոխանցված հանձնուքի խուզարկությամբ «Լուսաստղ» բուսական յուղ պիտակով պլաստմասե տարայի մեջ լցրած կարմիր պղպեղի միջից հայտնաբերվել է «բուպրենորֆին» տեսակի թմրանյութը։
Վկա` Արսեն Գևորգյանի նախաքննությամբ տրված և դատաքննությամբ հետազոտված ցուցմունքով այն մասին, որ 2010թ. հոկտեմբերի 12-ի առավոտյան, երբ իր խցակից Արթուր Մկրտչյանը տեղեկացել է, որ քույրը` Գեղեցիկ Գևորգյանը, իրեն հանձնուք է բերելու, խնդրել է իրեն ասել քրոջը ՔԿ հիմնարկ բերել նաև ընկերոջ կողմից իր համար նախատեսված հանձնուքը։ Իր այն հարցին, թե ինչու ընկերն անձամբ չի բերում հանձնուքը, Ա. Մկրտչյանը պատասխանել է, որ ընկերն անձնագիր չունի։ Ինքը մի քանի անգամ փորձել է Արթուրից ճշտել, թե արդյոք հանձնուքում որևէ անօրինական բան կա, թե ոչ, վերջինս հավաստիացրել է, որ հանձնուքում արգելված որևէ իր չկա։ Սակայն կեսօրից հետո, ինքը ՀՀ ԱՆ «Նուբարաշեն» ՔԿ հիմնարկի աշխատակիցներից տեղեկացել է, որ Արթուր Մկրտչյանի ընկերոջ կողմից փոխանցված հանձնուքում թմրանյութ է հայտնաբերվել։
Արթուր Մկրտչյանի հանցանքը հիմնավորվեց նաև դատաքիմիական փորձաքննության Հմ 35601005 եզրակացությամբ, համաձայն որի փորձաքննությանը ներկայացված 2 հատ գործարանային արտադրության, յուրաքանչյուրը 0.04 գրամ քաշով սպիտակ գույնի, «B8» դաջվածքով, օվալաձև դեղահատերը իրենց բաղադրության մեջ պարունակում են 0.008 գրամ, ընդհանուր` 0.016 գրամ «բուպրենորֆին» տեսակի թմրամիջոց։
Քրեական գործով իրեղեն ապացույց ճանաչված 0.016 գրամ «բուպրենորֆին» տեսակի թմրամիջոցոց և այն հայտնաբերելու արձանագրությամբ, ինչպես նաև գործով ձեռք բերված այլ փաստական տվյալներով։
Այսպիսով դատարանը ապացուցված համարեց, որ Արթուր Գարեգինի Մկրտչյանը կատարել է արարք, որը նախատեսված է ՀՀ քր. օր-ի 34-268 հոդվածի 2-րդ մասի 1-ին կետով, որով և պետք է ենթարկվի քրեական պատասխանատվության։
Պատիժ նշանակելիս դատարանը հաշվի է առնում արարքի հասարակական վտանգավորությունը, ամբաստանյալի ինքնությունը և գործի ողջ հանգամանքները։
Արթուր Մկրտչյանի պատասխանատվությունը և պատիժը ծանրացնող հանգամանք է դիտվում հանցանքը կատարելու վտանգավոր ռեցիդիվը։
Դատարանն ամբաստանյալի պատասխանատվությունը և պատիժը մեղմացնող, ինչպես նաև անձը բնութագրող հանգամանք է համարում այն, որ վերջինս երիտասարդ է, զղջացել է կատարած արարքի համար և ընդունել մեղքը։
Նախաքննական մարմինը 28.12.2010թ. որոշմամբ Արթուր Գարեգինի Մկրտչյանի նկատմամբ սույն գործով խափանման միջոց չի կիրառել` պատճառաբանելով, որ Արթուր Մկրտչյանը հանդիսանում է ՀՀ ԱՆ «Նուբարաշեն» ՔԿ հիմնարկի կալանավոր, գտնվում է անազատության մեջ և չի կարող թաքնվել քննությունից։
Նկատի ունենալով, որ սույն գործով Արթուր Գարեգինի Մկրտչյանի նկատմամբ խափանման միջոց չի կիրառվել, հետևաբար դատարանը գտնում է, որ վերջինիս նկատմամբ ազատազրկման ձևով պատիժ նշանակելիս պատժի սկիզբը պետք է հաշվել դատավճռի հրապարակման օրվանից։
ՀՀ ոստիկանության ՔԳՎ Էրեբունու քննչական բաժնի 12.01.2011թ. որոշմամբ թիվ 12139710 քրեական գործից պատճենահանման եղանակով անջատվել և առանձին վարույթ է առանձնացվել Ա. Մկրտչյանին զգալի չափի` 0.016 գրամ «բուպրենորֆին» տեսակի թմրամիջոց իրացրած անհայտ անձի մասը, որի գործողություններում առկա է ՀՀ քր. օր-ի 266 հոդվածի 2-րդ մասի 3-րդ կետով նախատեսված հանցագործության հատկանիշներ։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված 0.016 գրամ ընդհանուր քաշով «բուպրենորֆին» տեսակի թմրամիջոցը պետք է թողնել ՀՀ ոստիկանության ՔԳՎ Էրեբունու քննչական բաժնում` թիվ 12139710 քրեական գործից անջատված մասին կից՝ անհայտ անձի նկատմամբ քննություն կատարելու համար։
Ղեկավարվելով ՀՀ քր. դատ. օր-ի 357-360 հոդվածներով, դատարանը.

Վ Ճ Ռ Ե Ց

Արթուր Գարեգինի Մկրտչյանին մեղավոր ճանաչել ՀՀ քր. օր-ի 34-268 հոդվածի 2-րդ մասի 1-ին կետով դատապարտել ազատազրկման` 1/մեկ/ տարի 6/վեց/ ամիս ժամկետով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել դատավճռի հրապարակման օրվանից` 11.03.2011թ.։
Գործով իրեղեն ապացույց ճանաչված 0.016 գրամ ընդհանուր քաշով «բուպրենորֆին» տեսակի թմրամիջոցը դատավճիռն օրինական ուժի մեջ մտնելուց հետո թողնել ՀՀ ոստիկանության ՔԳՎ Էրեբունու քննչական բաժնում` թիվ 12139710 քրեական գործից անջատված մասին կից՝ անհայտ անձի նկատմամբ քննություն կատարելու համար։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ