ԵԷԴ/0014/01/11




ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«24» նոյեմբերի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Տ.Ուզոյան
տուժողներ Գ.Օհանյան
Ա.Պետրոսյան
պաշտպան Ա.Ումրշատյան

դռնբաց դատական նիստում քննեց քրեական գործն ըստ մեղադրանքի`
Զոհրակ Մուրադի Հովակիմյանի` ծնված 1990 թվականի հուլիսի 10-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չի աշխատում, նախկինում դատապարտված, բնակվում է Երևան քաղաքի Բաշինջաղյան 1-ին փողոցի 22-րդ շենքի 14-րդ բնակարանում, մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2010 թվականի նոյեմբերի 16-ին ՀՀ ոստիկանության Էրեբունու քննչական բաժնի քննիչ Ա.Պետրոսյանի որոշմամբ ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցագործության հատկանիշներով հարուցվել և վարույթ է ընդունվել թիվ 12144410 քրեական գործը:
2010 թվականի դեկտեմբերի 28-ին ՀՀ ոստիկանության Էրեբունու քննչական բաժնի քննիչ Ա.Պետրոսյանի որոշմամբ թիվ 12144410 քրեական գործով Մուրադ Շմավոնի Հովակիմյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով:
2010 թվականի դեկտեմբերի 28-ին ՀՀ ոստիկանության Էրեբունու քննչական բաժնի քննիչ Ա.Պետրոսյանի որոշմամբ թիվ 12144410 քրեական գործով Անահիտ Իմրանի Հակոբյանի նկատմամբ ՀՀ քրեական օրենսգրքի 213-րդ և 258-րդ հոդվածների հատկանիշներով քրեական հետապնդում չի իրականացվել` նրա արարքներում հանցակազմի բացակայության հիմքով:
2010 թվականի դեկտեմբերի 29-ին ՀՀ ոստիկանության Էրեբունու քննչական բաժնի քննիչ Ա.Պետրոսյանի որոշմամբ թիվ 12144410 քրեական գործով Մուրադ Շմավոնի Հովակիմյանի նկատմամբ քրեական հետապնդումը դադարեցվել է` իրադրության փոփոխման հիմքով:
2010 թվականի դեկտեմբերի 29-ին ՀՀ ոստիկանության Էրեբունու քննչական բաժնի քննիչ Ա.Պետրոսյանի որոշմամբ թիվ 12144410 քրեական գործով Հովհաննես Մուրադի Հովակիմյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով:
2010 թվականի դեկտեմբերի 29-ին ՀՀ ոստիկանության Էրեբունու քննչական բաժնի քննիչ Ա.Պետրոսյանի որոշմամբ թիվ 12144410 քրեական գործով Զոհրակ Մուրադի Հովակիմյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով:
2011 թվականի հունվարի 10-ին Հովհաննես Մուրադի Հովակիմյանի և Զոհրակ Մուրադի Հովակիմյանի վերաբերյալ քրեական գործը մեղադրական եզրակացությամբ ուղարկվել է Երևան քաղաքի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարան, որին շնորհվել է ԵԷԴ/0014/01/11 համարը:
2011 թվականի փետրվարի 22-ին Երևան քաղաքի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանի որոշմամբ թիվ ԵԷԴ/0014/01/11 քրեական գործն ըստ ընդդատության ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան:
2011 թվականի հուլիսի 7-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի որոշմամբ թիվ ԵԷԴ/0014/01/11 քրեական գործով Հովհաննես Մուրադի Հովակիմյանի նկատմամբ քրեական հետապնդումը դադարեցվել է` համաներման ակտի ընդունման հիմքով:
Զոհրակ Մուրադի Հովակիմյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով` այն արարքի համար, որ նա եղբոր` Հովհաննես Հովակիմյանի և հոր` Մուրադ Հովակիմյանի հետ 2010 թվականի օգոստոսի 12-ին` ժամը 15:00-ի սահմաններում, Երևան քաղաքի Մ.Խորենացի 43 հասցեում գործող «Այրարատ» տոնավաճառի մուտքի մոր` Անահիտ Հակոբյանի հետ ունեցած պարտք ու պահանջի կապակցությամբ վիճաբանել են նույն տոնավաճառի անհատ ձեռներեց Գայանե Օհանյանի և նրա ամուսին Արմեն Պետրոսյանի հետ, որի ընթացքում կոպիտ կերպով խախտելով հասարակական կարգը և հասարակության նկատմամաբ բացահայտ անհարգալից վերաբերմունք դրսևորելով` շուրջ 15-20 րոպե կոպտորեն խախտել են հասարակական կարգը, որի հետևանքով խանգարվել է շրջակա տաղավարների աշխատանքը, խուլիգանական բնույթի հայհոյանքներ են տվել նրանց հասցեին, որը զուգորդվել է Գայանե Օհանյանի և Արմեն Պետրոսյանի նկատմամբ բռնություն գործադրելով, այն է` քաշքշել, ձեռքերով հարվածներ են հասցրել Արմեն Պետրոսյանին և Գայանե Օհանյանին, իսկ Հովհաննես Հովակիմյանը բռունցքով հարվածել է Արմեն Պետրոսյանի ձախ քունքային շրջանին` նրա առողջությանը պատճառելով թեթև վնաս: Խուլիգանական գործողությունները խափանվել են ականատեսների միջամտությամբ:
2. Ապացույցների հետազոտում և գնահատում.
Դատական քննության ընթացքում ամբաստանյալ Զոհրակ Հովակիմյանն առաջադրված մեղադրանքում իրեն մեղավոր չճանաչեց և ցուցմունք տվեց այն մասին, որ որ իր մայրը` Անահիտ Հակոբյանը «Հրազդան» տոնավաճառում ունի առևտրի տաղավար: Իր մորը դիմում են նաև Ամալյա անունով: 2010 թվականի օգոստոսին` դեպքի օրն ինքն ու իր եղբայրը` Հովհաննեսը, որոշել են գնալ «Հրազդան» տոնավաճառ` հագուստ գնելու: Իրենք գնացել են տոնավաճառ, սակայն իրենց մայրն այնտեղ չի եղել, իսկ տոնավաճառի աշխտակիցներն ասել են, որ նա գնացել է «Այրարատ» տոնավաճառ: Դրանից հետո ինքն ու Հովհաննեսը գնացել են «Այրարատ» տոնավաճառ և տեսել, որ տոնավաճառի մուտքի մոտ իրարանցում է և ծեծկռտուք, որին մասնակից են եղել նաև իրենց ծնողները: Վիճաբանության ընթացքում լսվել են հայհոյանքներ: Ինքը փորձել է միջամտել վիճաբանությանը և այդ ժամանակ տեսել է, որ Արմեն Պետրոսյանը երկաթյա ձողով հարվածել է իր մորը: Վիճաբանությանը միջամտել են «Այրարատ» տոնավաճառի անվտանգության աշխատակիցները և կանխել այն: Ինքը Գայանե Օհանյանին և Արմեն Պետրոսյանին չի հարվածել և չի հայհոյել, այլ միայն փորձել է իր հորը ետ պահել վիճաբանությունից:
Դատական քննության ընթացքում Հովհաննես Հովակիմյանը, որպես ամբաստանյալ, ցուցմունք տվեց այն մասին, որ իր մայրը` Անահիտ Հակոբյանը «Հրազդան» տոնավաճառում ունի առևտրի տաղավար: Դեպքի օրն ինքն ու իր եղբայրը` Զոհրակը, որոշել են գնալ «Հրազդան» տոնավաճառ` հագուստ գնելու: Իրենք գնացել են տոնավաճառ, սակայն իրենց մայրն այնտեղ չի եղել, իսկ տոնավաճառի աշխատակիցներն ասել են, որ նա գնացել է «Այրարատ» տոնավաճառ: Դրանից հետո ինքն ու Զոհրակը որոշել են գնալ «Այրարատ» տոնավաճառ և այնտեղից գնել հագուստ: Դրանից 30-35 րոպե հետո` ժամը 13:30-ի սահմաններում, իրենք հասել են «Այրարատ» տոնավաճառ և տոնավաճառի` Խորենացու փողոցի մուտքի մոտ տեսել են իրենց ծնողներին` այլ անձանց հետ վիճաբանելիս: Ինքն ու Զոհրակը փորձել են հանգստացնել վիճաբանությունը, սակայն չեն հասցրել, քանի որ վիճաբանությանը միջամտել են «Այրարատ» տոնավաճառի անվտանգության աշխատակիցները: Իր ձեռքին որևէ ձող կամ շղթա չի եղել: Ինքը Գայանե Օհանյանին և Արմեն Պետրոսյանին չի հարվածել, այլ միայն փորձել է իր հորը ետ պահել վիճաբանությունից: Ինքը չի տեսել որ Արմենն ինչ-որ իրով հարվածի իր մորը: Արմենի ստացած մարմնական վնասվածքը հնարավոր է առաջացած լինի իր հոր կամ մոր հարվածից:
Տուժող Գայանե Օհանյանը դատական քննության ընթացքում ցուցմունք տվեց այն մասին, որ ինքը Անահիտ Հակոբյանին պարտք է եղել 60.000 ՀՀ դրամ: Իրենք 2010 թվականի օգոստոսի 9-ին պայմանավորվել են, որ 2010 թվականի օգոստոսի 12-ին Անահիտը գա «Այրարատ» տոնավաճռում գտնվող իր առևտրի տաղավար և այնտեղից այդ գումարի փոխարեն վերցնի ապրանք: Այդ օրը` առավոտյան, ինքը գնացել է տոնավաճառ, սակայն իր տաղավարի վաճառողուհի Անահիտ Իսկանյանը եղել է վատառողջ, ինչի պատճառով նրա հետ միասին գնացել են հիվանդանոց: Մինչ իրենց գնալն ինքը տոնավաճառ է կանչել իր ամուսնուն` Արմեն Պետրոսյանին, որպեսզի վերջինն իրենց բացակայության ժամանակ գտնվի տաղավարում: Այդ ընթացքում Արմենը զանգահարել է իրեն և ասել, որ իրենց բացակայության ժամանակ Անահիտ Հակոբյանը գնացել է իր տաղավար, վիճաբանել նրա (Արմենի) հետ և հրաժարվել գումարի փոխարեն վերցնել ապրանք: Ժամը 13:30-ից 13:45-ն ընկած ժամանակահատվածում ինքն ու Անահիտ Իսկանյանը վերադարձել են տոնավաճառ: Անահիտ Իսկանյանը մնացել է տաղավարում, իսկ ինքն ու Արմենը գնացել են տոնավաճառի` Խորենացու փողոցի մուտքի մոտ: Ժամը 14:00-ից 14:15-ն ընկած ժամանակահատվածում ինքը լսել է հայհոյանքներ և տեսել, որ Անահիտ Հակոբյանը, Մուրադ, Հովհաննես և Զոհրակ Հովակիմյանները տոնավաճառի ներսի կողմից գալիս են իր և Արմենի ուղղությամբ: Այդ ժամանակ Հովհաննեսը մի քանի անգամ հարվածել է Արմենի գլխին, ինչի պատճառով նրա գլխից արյուն է հոսել, և նա գրեթե կորցրել է գիտակցությունը: Դրանից հետո սկսվել է վիճաբանություն և քաշքշուկ, որի ընթացքում Հովհաննեսը, Զոհրակը և Մուրադը հայհոյել և հարվածել են իրեն և իր ամուսնուն: Վիճաբանությունն ու ծեծկռտուքը տևել է մոտ 15 րոպե, որը կանխվել է տոնավաճառի անվտանգության աշխատակիցների միջամտությամբ: Վիճաբանության ու ծեծկռտուքի պատճառով հավաքվել են բազմաթիվ մարդիկ, այդ թվում` տոնավաճառի շատ աշխատակիցներ: Այդ ընթացքում իր ամուսնու ձեռքին որևէ ձող կամ իր չի եղել, ինչպես նաև ինքը Հովհաննեսի ձեռքին որևէ իր չի տեսել: Այնուհետև Անահիտ Իսկանյանն իրեն ասել է, որ երբ նա գտնվել է առևտրի տաղավարում, Անահիտը, Մուրադը, Զոհրակը և Հովհաննեսը գնացել են տաղավար, հարցրել իր գտնվելու տեղը, որի ընթացքում Զոհրակը և Հովհաննեսը հայհոյանքեր են տվել, ինչպես նաև վիրավորել Անահիտ Իսկանյանին: Դեպքից հետո Արմենը դիմել է հիվանդանոց:
Տուժող Արմեն Պետրոսյանը դատական քննության ընթացքում ցուցմունք տվեց այն մասին, որ աջակողմյան հատվածի ինսուլտի հետևանքով շուրջ 8 տարի ունի հաշմանդամության խումբ: Իր կինը` Գայանե Օհանյանը գումար է պարտք եղել Անահիտ Հակոբյանին: 2010 թվականի օգոստոսի 12-ին Անահիտը զանգահարել է և Գայանեի հետ պայմանավորվել գումարի փոխարեն ապրանք վերցնել: Գայանեն ապրանքը տնից բերել է իրենց` «Այրարատ» տոնավաճառում գտնվող առևտրի տաղավար և տաղավարի վաճառող Անահիտի հետ գնացել հիվանդանոց` ասելով, որ Անահիտ Հակոբյանը կզանգահարի և կգա ապրանքը տանելու, իսկ ինքը մնացել է իրենց առևտրի տաղավարում: Դրանից հետո Անահիտ Հակոբյանը զանգահարել է և ասել, որ կգա գումարը վերցնելու, իսկ ինքն ասել է, որ ոչ թե գումար պետք է վերցնի, այլ ապրանք: Դրանից հետո` ժամը 13:30-ի սահմաններում, Անահիտ Հակոբյանը եկել է տաղավար, շուրջ 10 րոպե վիճաբանել իր հետ և ասել, որ «մարդ է բերելու»: Նրա գնալուց հետո` ժամը 14:00-ի սահմաններում, Գայանեն և իրենց տաղավարի վաճառող Անահիտ Իսկանյանը վերադարձել են: Դրանից հետո ինքը և Գայանեն գնացել են տոնավաճառի` Խորենացու փողոցի մուտքի մոտ, որտեղ ինքը նրան ասել է, որ Անահիտ Հակոբյանն ապրանքը չի տարել: Դրանից մոտ 15 րոպե հետո ինքը լսել է գոռգոռոցներ, որից հետո տոնավաճառի մուտքի մոտ` տոնավաճառի ներսի կողմից իրենց մոտեցել են Մուրադ, Զոհրակ և Հովհաննես Հովակիմյանները: Հովհաննեսը առանց որևէ բան ասելու հարվածել է իր գլխին, որից հետո ինքը գրեթե ոչինչ չի հիշում: Ինքը լսել է հայհոյանքներ և տեսել է, որ Մուրադը հայհոյել է Գայանեին և հարվածել նրան: Միջադեպի ընթացքում ինքը և Գայանեն որևէ մեկին չեն հարվածել: Միջադեպը տևել է 5-10 րոպե, որի ընթացքում հավաքվել են այլ անձինք և փորձել հանդարտեցնել միջադեպը: Այդ ընթացքում եկել են տոնավաճառի անվտանգության աշխատակիցները և հանդարտեցրել միջադեպը: Հետագայում ինքը Անահիտ Իսկանյանից տեղեկացել է, որ մինչ իրենց մոտենալը Մուրադը, Զոհրակը և Հովհաննեսը գնացել են իրենց տաղավար, հարցրել Գայանեի գտնվելու վայրը, գոռգոռացել և սպառնացել Անահիտ Իսկանյանին:
Վկա Անահիտ Իսկանյանը դատական քննության ընթացքում ցուցմունք տվեց այն մասին, որ աշխատում է Երևան քաղաքի Խորենացի 43 հասցեում գործող «Այրարատ» տոնավաճառում գտնվող` Գայանե Օհանյանին պատկանող հագուստի առևտրի տաղավարում` որպես վաճառող: 2010 թվականի օգոստոսի 12-ին` ժամը 14:00-ի սահմաններում ինքը և Գայանեն հիվանդանոցից եկել են իրենց առևտրի տաղավար: Ժամը 14:30-15:00-ի սահմաններում Զոհրակ և Հովհաննես Հովակիմյանները, վերջինների հայրը և մայրը եկել են իրենց առևտրի տաղավարի մոտ: Զոհրակը Գայանեին հայհոյելով մտել է բաժին և հարցրել, թե որտեղ է Գայանեն, իսկ ինքը պատասխանել է, որ Գայանեն այդտեղ չէ: Այդ ժամանակ Զոհրակը և Հովհաննեսը բարձրաձայն լկտի հայհոյանքներ են տվել և կրկին հարցրել Գայանեի գտնվելու տեղը, իսկ Զոհրակը նաև սպառնացել է հարվածել իրեն: Ինքը չի ցանկացել կոնֆլիկտի մեջ մտնել և նրանցից պահանջել է դուրս գալ իրենց տաղավարից: Այդ ժամանակ Զոհրակի և Հովհաննեսի ծնողները` Մուրադը և Անահիտը դժվարությամբ, քաշելով կարողացել են նրանց դուրս հանել տաղավարից: Տաղավարում տեղի ունեցած միջադեպը տևել է մոտ 10 րոպե, որի ժամանակ ներկա են եղել նաև այլ անձինք: Նրանց հեռանալուց 5 րոպե հետո տոնավաճառի մուտքի մոտից լսվել են աղմուկի և հայհոյանքի ձայներ, որից հետո ինքը և տոնավաճառում գտնվող այլ անձինք դուրս են եկել տոնավաճառի` Խորենացու փողոցի մուտքի մոտ: Այդտեղ ինքը տեսել է, որ Զոհրակը, Հովհաննեսը և Մուրադը քաշքաշում են Գայանեին և նրա ամուսնուն` Արմենին, հայհոյանքներ տալիս նրանց և հարվածում, իսկ Անահիտը փորձել է հանգստացնել նրանց: Ինքը նույնպես փորձել է Գայանեին ու Արմենին մի կողմ քաշել նրանցից: Այդ ընթացքում Զոհրակը հարվածել է Արմենի գլխի քունքային հատվածին, իսկ Մուրադը հարվածել է Գայանեին: Ստացված վնասվածքի պատճառով Արմենի գլխից արյուն է հոսել, և նա դիմել է հիվանդանոց: Տոնավաճառի մուտքի մոտ տեղի ուեցած միջադեպը տևել է մոտ 15 րոպե: Ինքը չի լսել, որ միջադեպի ընթացքում Մուրադը և Արմենը հայհոյանքներ տան, Գայանեն հայհոյանքներ չի տվել, իսկ Անահիտը անպատիվ խոսքեր է ասել Գայանեին: Ինքը տեղյակ է, որ Գայանեն 60.000 ՀՀ դրամի դիմաց ինչ-որ ապրանք պետք է տար Անահիտին:
Վկա Թամարա Մանուկյանը դատական քննության ընթացքում ցուցմունք տվեց այն մասին, որ իրեն պատկանող առևրտի տաղավարը գտնվում է Գայանե Օհանյանին պատկանող առևտրի տաղավարի դիմաց: 2010 թվականին` դեպքի օրը, Զոհրակ և Հովհաննես Հովակիմյանների մայրը եկել է Գայանեին պատկանող առևտրի տաղավար, որտեղ եղել է Գայանեի ամուսին Արմենը: Մի քանի րոպե հետո այդ կինը գնացել է, որից հետո դուրս է եկել նաև Արմենը: Դրանից հետո Զոհրակը, Հովհաննեսը, նրանց հայրը և մայրը մոտեցել են Գայանեին պատկանող առևտրի տաղավարին, որտեղ եղել է տաղավարի վաճառող Անահիտը: Զոհրակը հայհոյանքներ է տվել Գայանեի և նրա ամուսնու հասցեին: Այդ միջադեպը տևել է 5-10 րոպե: Նրանք սպառնացել են Անահիտին, հարցրել Գայանեի և նրա ամուսնու գտնվելու վայրը և գնացել տոնավաճառի` Խորենացու փողոցի մուտքի մոտ: Դրանից հետո այդտեղից լսել է աղմուկի ձայներ և տեսել, որ մարդիկ և տոնավաճառի անվտանգության աշխատակիցները գնացել են այդ ուղղությամբ: Ինքը տեղեկացել է, որ միջադեպի ընթացքում Արմենը ստացել է մարմնական վնասվածք:
Վկա Նելլի Ոսկանյանը դատական քննության ընթացքում ցուցմունք տվեց այն մասին, որ «Այրարատ» տոնավաճառում իրեն պատկանող առևրտի տաղավարը գտնվում է Գայանե Օհանյանին պատկանող առևտրի տաղավարի հարևանությամբ: 2010 թվականի ամռանը` դեպքի օրը, Զոհրակ և Հովհաննես Հովակիմյանների մայրը` Անահիտը եկել է Գայանեին պատկանող առևտրի տաղավար, խոսել է Գայանեի ամուսնու` Արմենի հետ և հեռացել: Դրանից մոտ մեկ ժամ հետո` ժամը 15:00-ի սահմաններում, Զոհրակը, Հովհաննեսը, նրանց հայրը և մայրը եկել են Գայանեին պատկանող առևտրի տաղավար, տաղավարի վաճառող Անահիտից տեղեկացել, որ Գայանեն և Արմենը գտնվում են դրսում, որից հետո գնացել են նրանց ուղղությամբ: Այդ ընթացքում Զոհրակը և Հովհաննեսը գոռգոռացել են և հայհոյել Գայանեին ու նրա ամուսնուն: Դրանից հետո ինքը դուրս է եկել և տեսել, որ Զոհրակը, Հովհաննեսը և նրանց հայրը հարվածել են Գայանեին: Այդ ընթացքում հնչել են հայհոյանքներ և հավաքվել են բազմաթիվ անձինք, ինչպես նաև միջամտել են տոնավաճառի անվտանգության աշխտակիցները: Միջադեպի պատճառով խանգարվել է տոնավաճառի տաղավարների բնականոն աշխատանքը: Միջադեպի ընթացքում Արմենը ստացել է մարմնական վնասվածք և եղել է արյունոտ:
Վկա Աստղիկ Կարապետյանը դատական քննության ընթացքում ցուցմունք տվեց այն մասին, որ իրեն դիմում են նաև Դոնարա անվամբ: «Այրարատ» տոնավաճառում իրեն պատկանող առևրտի տաղավարը գտնվում է Գայանե Օհանյանին պատկանող առևտրի տաղավարի հարևանությամբ: 2010 թվականի ամռանը` դեպքի օրը, Գայանեին պատկանող առևտրի տաղավարում վերջինի ամուսինը` Արմենը և Զոհրակ ու Հովհաննես Հովկիմյանների մայրը զրուցել են: Դրանից որոշ ժամանակ անց Զոհրակը և Հովհաննեսը եկել են Գայանեին պատկանող առևտրի տաղավար, տաղավարի վաճառող Անահիտից կոպիտ ձևով և սպառնալով հարցրել, թե որտեղ են Գայանեն և նրա ամուսինը, որից հետո աղմկել են և հայհոյանքներ տվել Գայանեի ու նրա ամուսնու հասցեին և դուրս գնացել: Դրանից մի քանի րոպե անց իրենք դրսից լսել են աղմուկ և դուրս եկել, որտեղ եղել են շատ մարդիկ, որոնց միջամտությամբ միջադեպը դադարեցվել է: Ինքը տեսել է, որ Գայանեն և Արմենը եղել են ծեծված, իսկ Արմենը եղել է նաև արյունոտ: Ինքը հարվածներ հասցնելու պահը չի տեսել: Միջադեպի պատճառով խանգարվել է տոնավաճառի տաղավարների բնականոն աշխատանքը: Հետագայում տեղեկացել է, որ միջադեպի պատճառը եղել է գումարային խնդիրները:
Վկա Մուրադ Հովակիմյանը դատական քննության ընթացքում ցուցմունք տվեց այն մասին, որ Զոհրակ և Հովհաննես Հովակիմյանների հայրն է: Իր կինը և Գայանե Օհանյանը հարևանությամբ աշխատել են տոնավաճառում և Գայանեն պարտք է եղել իր կնոջը: Դեպքի նախորդ օրն իր կինն ասել է, որ Գայանեն զանգահարել է և ասել, որ իրենք կարող են գնալ և վերցնել գումարը, ինչպես նաև նրան պետք է տան ստացական, որ նրանից որևէ պահանջ չունեն: Ինքը գրել է ստացականը և հաջորդ օրն իր կնոջ հետ գնացել «Այրարատ» տոնավաճառ: Ինքը սպասել է դրսում, իսկ իր կինը գնացել է Գայանեին պատկանող տաղավար, որպեսզի վերցնի գումարը: Դրանից մոտ 15 րոպե հետո ինքը նկատել է, որ Գայանեի ամուսինը` Արմենը մետաղյա ձողով հարվածել է իր կնոջ գլխին և հայհոյել նրան: Ինքը մոտեցել է նրանց, հարցրել, թե ինչ է պատահել, և այդ ժամանակ իր կինն ապտակել է Արմենին: Ինքը փորձել է բաժանել նրանց և այդ ժամանակ եկել է Գայանեն և պայուսակը պտտեցնելով հարվածել իրենց: Այդ աղմուկից եկել են տոնավաճառի անվտանգության աշխատակիցները և բաժանել իրենց: Այդ ժամանակ ինքը նկատել է, որ այդտեղ եղել են նաև իր որդիները: Տոնավաճառ գնալու ժամանակ իր որդիները եղել են տանը: Իր որդիները չեն տեսել, որ Արմենը հարվածել է իր կնոջը: Ինքն ու իր որդիները որևէ մեկին չեն հարվածել: Արմենի գլուխն արնահոսել է իր կնոջ հարվածի պատճառով: Հետագայում ինքն իմացել է, որ իր որդիները գնացել են «Հրազդան» տոնավաճառ, այնտեղից տեղեկացել, որ ինքն ու իր կինը գնացել են «Այրարատ» տոնավաճառ, որից հետո եկել են այդտեղ:
Վկա Անահիտ Հակոբյանը դատական քննության ընթացքում ցուցմունք տվեց այն մասին, որ Զոհրակ և Հովհաննես Հովակիմյանների մայրն է: 2007 թվականից ճանաչել է Գայանե Օհանյանին և նրա հետ ունեցել է մտերիմ հարաբերություններ: Ինքը պարտքով գումար է տվել Գայանեին: Դրանից հետո ինքը մի քանի անգամ Գայանեից պահանջել է վերադարձնել գումարը: Դեպքից երկու օր առաջ` երեկոյան, Գայանեն զանգահարել է իրեն և ասել, որ երկու օր հետո` ժամը 12:00-ին, կարող է գնալ և վերցնել գումար, ինչպես նաև խնդրել է տալ ստացական` գումարը ստանալու վերաբերյալ: Նշված օրը` ժամը 12:00-ի սահմաններում, ինքը զանգահարել է Գայանեին, սակայն նա ասել է, որ տաղավարում չէ և խնդրել է գալ կես ժամ հետո: Ընդմիջումից հետո ինքը կրկին զանգահարել է Գայանեին, ով ասել է որ 15 րոպե հետո կլինի տաղավարում, ինչից հետո ինքն ու իր ամուսինը «Հրազդան» տոնավաճառից գնացել են «Այրարատ» տոնավաճառ: Իր ամուսինը սպասել է դրսում, իսկ ինքը գնացել է Գայանեի առևտրի տաղավար: Տաղավարում գտնվել է Գայանեի ամուսինը` Արմենը, ով առանց որևէ բան ասելու հայհոյել է իրեն և փորձել մետաղյա ձողով հարվածել իրեն: Դրանից հետո ինքը դուրս է եկել տոնավաճառից, որտեղ Արմենը մետաղյա ձողով երկու անգամ հարվածել է իր գլխին: Այդ ժամանակ այդտեղ իր ամուսնու հետ կանգնած են եղել իր որդիները: Ինքը չի կարողացել տիրապետել իրեն և հարվածել է Արմենին, որից հետո եկել է Գայանեն և պայուսակը պտտեցնելով, ինչպես նաև ոտքերով և ձեռքերով հարվածել է իրեն: Այդ ժամանակ միջամտել է իր ամուսինը և փորձել հանդարտեցնել միջադեպը: Դրանից հետո միջամտել են տոնավաճառի անվտնագության աշխատակիցները և կանխել միջադեպը: Դրսում տեղի ունեցած միջադեպը տևել է 5-10 րոպե: Միջադեպի ընթացքում Արմենի գլուխը արնահոսել է: Առավոտյան, երբ ինքը դուրս է եկել տնից, իր որդիները եղել են տանը: Իր որդիները «Այրարատ» տոնավաճառի ներս չեն մտել և որևէ մեկին չեն հարվածել ու չեն հայհոյել:
Փորձագետի 2010 թվականի օգոստոսի 19-ի թիվ 2107 եզրակացության համաձայն` Արմեն Պետրոսյանի ստացած մարմնական վնասվածքը` ձախ քունքային շրջանի սալջարդ վերքի ձևով հասցվել է բութ, կոշտ առարկայով, հնարավոր է նշված ժամկետում, չի բացառվում որոշման մեջ նկարագրված գործի հանգամանքներում և պատճառել է առոջությանը թեթև վնաս` առողջության կարճատև քայքայումով` նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը` 6 օրից ավելի, բայց ոչ ավելի 21 օրից:
Փորձագետի 2010 թվականի օգոստոսի 19-ի թիվ 2108 եզրակացության համաձայն` Գայանե Օհանյանի ստացած մարմնական վնասվածքը` ձախ կրծքագեղձի վերին դրսային քառակուսու արյունազեղման ձևով հասցվել է բութ, կոշտ առարկայով, հնարավոր է նշված ժամկետում, չի բացառվում որոշման մեջ նկարագրված գործի հանգամանքներում, որն առոջության թեթև վնասի հատկանիշներ չի պարունակում:
ՀՀ ոստիկանության ինֆորմացիոն կենտրոնի պահանջագրի համաձայն` Զոհրակ Մուրադի Հովակիմյանը 2009 թվականի սեպտեմբերի 28-ին Հադրութի զինվորական դատախազության կողմից ՀՀ քրեական օրենսգրքի 360-րդ հոդվածի 2-րդ մասով ենթարկվել է քրեական պատասխանատվության:
Սյունիքի մարզի ընդհանուր իրավասության դատարանի 2010 թվականի նոյեմբերի 30-ի թիվ ՍԴ3/0083/01/10 դատավճռի պատճենի համաձայն` Զոհրակ Մուրադի Հովակիմյանը մեղավոր է ճանաչվել ՀՀ քրեական օրենսգրքի 360-րդ հոդվածի 2-րդ մասով և պատիժ է նշանակվել կալանք` 3 (երեք) ամիս ժամկետով: ՀՀ քրեական օրենսգրքի 70-րդ հոդվածի կիրառմամբ պատիժը պայմանականորեն չի կիրառվել և սահմանվել է փորձաշրջան` 1 (մեկ) տարի ժամկետով:
«Համաներման կիրառմամբ պատժից ազատելու վերաբերյալ միջնորդությունը քննության առնելու մասին» Երևան քաղաքի Աջափնյակ և Դավթաշեն վարչական շրջանների ընդհանուր իրավասության դատարանի 2011 թվականի նոյեմբերի 1-ի թիվ ԵԱԴԴ/0067/13/11 որոշման համաձայն` Զոհրակ Մուրադի Հովակիմյանի նկատմամբ կիրառվել է «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման 1-ին կետի 2-րդ ենթակետը և նա ազատվել է Սյունիքի մարզի ընդհանուր իրավասության դատարանի 2010 թվականի նոյեմբերի 30-ի թիվ ՍԴ3/0083/01/10 դատավճռով նշանակված և պայմանականորեն չկիրառված պատժից:
«Արմինե» համատիրության նախագահի կողմից հաստատված բնութագրի համաձայն` Զոհրակ Մուրադի Հովակիմյանը բնութագրվում է դրականորեն:
Վերը նշված ապացույցներից պարզ է դառնում նաև, որ քրեական գործում առկա են ինչպես ամբաստանյալ Զոհրակ Հովակիմյանին մեղադրող, այնպես էլ այն հերքող ապացույցներ: Դատարանի գնահատմամբ ամբաստանյալ Զոհրակ Հովակիմյանին առաջադրված մեղադրանքը հերքող տեղեկությունները չեն կարող դրվել դատավճռի հիմքում, քանի որ բացի այն, որ դրանք հերքվում են կատարված դեպքին անմիջական մասնակցություն ունեցած անձանց ցուցմունքներով, այլև նշված տեղեկությունները տրվել են բացառապես ամբաստանյալի, նրա եղբոր, հոր և մոր կողմից, ովքեր շահագրգռված են քրեական գործի լուծման` ամբաստանյալ Զոհրակ Հովակիմյանի համար բարենպաստ ելքով:
3. Դատարանի իրավական վերլուծությունները.
Վերոգրյալ ապացույցների հիման վրա Դատարանը գալիս է այն եզրահանգման, որ 2010 թվականի օգոստոսի 12-ին` ժամը 14:00-ի սահմաններում, Զոհրակ Մուրադի Հովակիմյանը եղբոր` Հովհաննես Հովակիմյանի և հոր` Մուրադ Հովակիմյանի հետ, Երևան քաղաքի Խորենացի 43 հասցեում գործող «Այրարատ» տոնավաճառի մուտքի մոտ շուրջ 15 րոպե վիճաբանել է Գայանե Օհանյանի և նրա ամուսնու` Արմեն Պետրոսյանի հետ, որի ընթացքում տվել է հայհոյանքներ և հարվածել Գայանե Օհանյանին ու Արմեն Պետրոսյանին:
Այսինքն` Զոհրակ Մուրադի Հովակիմյանը, Հովհաննես Հովակիմյանի և Մուրադ Հովակիմյանի հետ, հասարակության նկատմամբ բացահայտ անհարգալից վերաբերմունք դրսևորելով, դիտավորությամբ կոպիտ կերպով խախտել է հասարակական կարգը, որը զուգորդվել է անձանց նկատմամբ բռնություն գործադրելով, ինչը համապատասխանում է ՀՀ քրեական օրենսգրքի 258-րդ հոդվածի 3-րդ մասի 1-ին կետի հատկանիշներին:
Ապացուցված է Զոհրակ Մուրադի Հովակիմյանի մեղավորությունը ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված արարքը կատարելու մեջ:
Դատարանը գտնում է, որ Զոհրակ Հովակիմյանի պատասխանատվությունն ու պատիժը մեղմացնող հանգամանք պետք է դիտել դրականորեն բնութագրվելը:
Դատարանը արձանագրում է, որ Զոհրակ Հովակիմյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Զոհրակ Հովակիմյանը ենթակա է քրեական պատասխանատվության և պատժի:
Դատարանը, հաշվի առնելով Զոհրակ Հովակիմյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, պատասխանատվությունն ու պատիժը մեղմացնող հանգամանքը, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Զոհրակ Հովակիմյանի կատարած արարքի համար ՀՀ քրեական օրենսգրքի 258-րդ հոդվածի հոդվածի 3-րդ մասի սանկցիայով նախատեսված է պատիժ նաև ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկում` 1 (մեկ) տարի ժամկետով:
Միաժամանակ Դատարանը, նկատի ունենալով, որ Զոհրակ Հովակիմյանը սույն դատավճռով հաստատված արարքը կատարել է նախքան Սյունիքի մարզի ընդհանուր իրավասության դատարանի 2010 թվականի նոյեմբերի 30-ի թիվ ՍԴ3/0083/01/10 դատավճռի կայացումը, հարկ է համարում քննարկել ՀՀ քրեական օրենսգրքի 66-րդ հոդվածի 6-րդ մասի կիրառման հարցը, համաձայն որի` պատիժը նշանակվում է այդ հոդվածի կանոններով, եթե դատավճիռը կայացնելուց հետո պարզվի, որ դատապարտյալը մեղավոր է նաև մեկ այլ հանցանքի համար, որը նա կատարել է նախքան առաջին գործով դատավճիռ կայացնելը: Այս դեպքում վերջնական պատժի ժամկետին հաշվակցվում է առաջին դատավճռով նշանակված պատժի կրած մասը:
Դատարանը գտնում է, որ սույն գործով ՀՀ քրեական օրենսգրքի 66-րդ հոդվածի 6-րդ մասով սահմանված կանոնի կիրառումը իրատեսական չէ, քանի որ Երևան քաղաքի Աջափնյակ և Դավթաշեն վարչական շրջանների ընդհանուր իրավասության դատարանի որոշմամբ Զոհրակ Հովակիմյանի նկատմամբ կիրառվել է «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշումը, և նա ազատվել է Սյունիքի մարզի ընդհանուր իրավասության դատարանի 2010 թվականի նոյեմբերի 30-ի թիվ ՍԴ3/0083/01/10 դատավճռով նշանակված և պայմանականորեն չկիրառված պատժից:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման (այսուհետ նաև` Համաներման որոշում) 1-ին կետի 1-ին ենթակետի համաձայն` պատժից պետք է ազատել, բացառությամբ այդ որոշման 8-րդ կետի 4-րդ և 5-րդ ենթակետերով նախատեսված դեպքերի, առավելագույնը երեք տարի ժամկետով ազատությունից զրկելու հետ կապված պատիժների դատապարտված անձանց: Նույն որոշման 15-րդ կետի համաձայն` Համաներման որոշումը կիրառվում է այն անձանց նկատմամբ, որոնք հանցագործություն են կատարել մինչև 2011 թվականի մայիսի 1-ը ներառյալ, իսկ Զոհրակ Հովակիմյանը հանրորեն վտանգավոր արարքը կատարել է 2010 թվականի օգոստոսի 12-ին: Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Սակայն սույն քրեական գործի նյութերում բացակայում է Համաներման որոշման 9-րդ կետում նշված այն սահմանափակումները, որոնք կարող են արգելք հանդիսանալ Զոհրակ Հովակիմյանի նկատմամբ Համաներման որոշման կիրառման համար: Ինչ վերաբերում է Համաներման որոշման 9-րդ կետի 2-րդ ենթակետի «ա» պարբերությամբ նախատեսված այն դրույթին, որ Համաներումը պետք է չկիրառել կրկին դիտավորյալ հանցանք կատարած այն անձանց նկատմամբ, որոնք վերջին տասը տարվա ընթացքում պատիժը կրելուց ազատվել են Հայաստանի Հանրապետության Ազգային ժողովի` համաներում հայտարարելու մասին որոշման հիման վրա, ապա Դատարանը գտնում է, որ այն արգելք չէ Զոհրակ Հովակիմյանի նկատմամբ Համաներման որոշման կիրառման համար, քանի որ սույն դատավճռով հաստատված արարքը Զոհրակ Հովակիմյանը կատարել է նախքան Երևան քաղաքի Աջափնյակ և Դավթաշեն վարչական շրջանների ընդհանուր իրավասության դատարանի կողմից նրա նկատմամբ Համաներման որոշման կիրառումը:
Հիմք ընդունելով վերը նշվածը` Դատարանը գտնում է, որ Համաներման որոշման կիրառմամբ ամբաստանյալ Զոհրակ Հովակիմյանին պետք է ազատել նշանակված պատժից:
Դատարանը գտնում է, որ Զոհրակ Հովակիմյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերն ամբաստանյալ Զոհրակ Հովակիմյանից ենթակա չեն բռնագանձման, քանի որ տուժողները, հնարավորությունը ունենալով ներկայացնելու իրենց շահերը, ամբաստանյալին որևէ պահանջ չեն ներկայացրել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 2-6-րդ կետերով նախատեսված դատական ծախսերին, ապա դրանք ամբաստանյալից նույնպես ենթակա չեն բռնագանձման, քանի որ 4-6-րդ կետերով նախատեսված դատական ծախսեր ընդհանրապես չկան, իսկ 2-րդ և 3-րդ կետերով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Զոհրակ Մուրադի Հովակիմյանին մեղավոր ճանաչել ՀՀ քրեական օրենսգրքի 258-րդ հոդվածի 3-րդ մասի 1-ին կետով և պատիժ նշանակել ազատազրկում` 1 (մեկ) տարի ժամկետով:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման 1-ին կետի 1-ին ենթակետի կիրառմամբ Զոհրակ Մուրադի Հովակիմյանին պատժից ազատել:
Զոհրակ Մուրադի Հովակիմյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ