ԵԷԴ/0012/01/11

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ` Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ` Լ. ՄԻՐԶՈՅԱՆ

Մասնակցությամբ`

ՄԵՂԱԴՐՈՂ` Ա. ՄՈւՐԱԴՅԱՆ
ՊԱՇՏՊԱՆ` Հ. ԲԱՂԴԱՍԱՐՅԱՆ

2011թ. սեպտեմբերի 13-ին դատարանում
Դռնբաց դատական նիստում քննեց քրեական գործն ըստ մեղադրանքի`
1. Կառլեն Սիրեկանի Հայրապետյանի, ծնված 01.09.1975թ., Կոտայքի մարզ գ.Գեղանիստ, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին մեկ անչափահաս երեխա, նախկինում դատված`
ա) Երևանի Շենգավիթ համայնքի առաջին ատյանի դատարանի 23.12.2002թ. դատավճռով ՀՀ 07.03.1961թ. քր. օր-ի 105 հոդվածի 1-ին մասով և 203 հոդվածի 1-ին մասով, 37 հոդվածի կիրառմամբ դատապարտվել է ազատազրկման` 4 տարի ժամկետով,
բ) Արմավիրի մարզի առաջին ատյանի դատարանի 23.02.2011թ. ԱՐԴ/0109/01/10 դատավճռով ՀՀ քր. օր-ի 112 հոդվածի 1-ին մասով և 177 հոդվածի 2-րդ մասի 1-ին, 2-րդ, 3-րդ և 4-րդ կետերով, 66 հոդվածի կիրառմամբ դատապարտվել է ազատազրկման` 5 տարի 6 ամիս ժամկետով, չի աշխատել, հաշվառված է Արմավիրի մարզ գ.Արգավանդ, ներկայումս ՀՀ ԱՆ «Նուբարաշեն» քրեակատարողական հիմնարկի դատապարտյալ։
Մեղադրվում է ՀՀ քր. օր-ի 34-268 հոդվածի 1-ին մասով։
2. Զաբելա Հովհաննեսի Հովհաննիսյանի, ծնված 06.12.1976թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին մեկ անչափահաս երեխա, չի աշխատում, նախկինում չդատված, բնակվում է ք.Երևան Ս. Տարոնցի նրբ. 5 շենք, 28 բնակարանում։
Մեղադրվում է ՀՀ քր. օր-ի 38-34-268 հոդվածի 1-ին մասով։
Սույն գործով կալանքի տակ չի եղել։
Դատաքննությամբ և գործի տվյալներով պարզվեց հետևյալը.
Ամբաստանյալ Կառլեն Սիրեկանի Հայրապետյանը Արմավիրի մարզի ընդհանուր իրավասության դատարանի որոշմամբ ՀՀ քր. օր-ի 112 հոդվածի 1-ին մասով և 177 հոդվածի 2-րդ մասի 1-ին, 2-րդ, 3-րդ և 4-րդ կետերով նախատեսված հանցագործություններ կատարելու մեղադրանքով 18.12.2009թ. գտնվել է կալանքի տակ ՀՀ ԱՆ «Նուբարաշեն» քրեակատարողական հիմնարկում։
Կալանքի տակ գտնվելու ընթացքում Կառլեն Հայրապետյանը քննությամբ չպարզված անձնավորությունից առանց իրացնելու նպատակի` իր գործածման համար, զգալի չափի` 0.008 գրամ «բուպրենորֆին» տեսակի թմրամիջոց ձեռք բերելու նպատակով, 2010թ. հոկտեմբերի 10-ին իր մոտ ապօրինաբար պահվող հեռախոսից զանգահարել է անհայտ անձին և խնդրել է իր համար «բուպրենորֆին» տեսակի թմրամիջոց ուղարկել։ Վերջինս համաձայնվել է թմրամիջոցն իրացնել Կ. Հայրապետյանին, սակայն ՀՀ ԱՆ «Նուբարաշեն» ՔԿ հիմնարկում տեսակցելուց թմրամիջոցն անձամբ վերջինիս փոխանցելուց հրաժարվել է։ Այդ նպատակով, 2010թ. հոկտեմբերի 10-ին Կ. Հայրապետյանը զանգահարել է իր կնոջը` Զաբելա Հովհաննիսյանին, և ասել է, որ իր ծանոթն իր համար թմրամիջոց է պատրաստել և թաքցրել է ՀՀ ԱՆ «Նուբարաշեն» ՔԿ հիմնարկի բակում գտնվող նստարանի տակ, խնդրել է այն վերցնել և իր հետ տեսակցության ժամանակ փոխանցել իրեն։ Զաբելա Հովհաննիսյանը, նախապես խոստանալով օժանդակել ամուսնուն` թմրամիջոց ձեռք բերելու համար, 2010թ. հոկտեմբերի 11-ին, ժամը 1400-ի սահմաններում գնացել է ՀՀ ԱՆ «Նուբարաշեն» ՔԿ հիմնարկի բակ, որտեղ նստարանի տակից վերցրել է 2 փաթեթները, որոնց մեջ եղել են մեկական կոճակներ և թաքցրել իր ձեռքի թաշկինակի մեջ, որից հետո լրացրել է տեսակցության համար անհրաժեշտ փաստաթղթերը և սպասել իր հերթին։ Ժամը 1520-ին Զաբելա Հովհաննիսյանը մտել է տեսակցություններից առաջ անձնական խուզարկություն կատարելու համար նախատեսված սենյակ, որտեղ ՀՀ ԱՆ «Նուբարաշեն» ՔԿ հիմնարկի աշխատակից` Ջիվան Օհանյանի կողմից կատարված անձնական խուզարկությամբ, նրա ձեռքի թաշկինակի մեջից հայտնաբերվել են փաթեթները, որոնցից մեկը Զ. Հովհաննիսյանը վայր է գցել գետին, ապա գետնից վերցնելով կուլ է տվել, իսկ մյուս փաթեթը առգրավվել է, որի մեջ հայտնաբերվել է զգալի չափի` 0.008 գրամ քաշով «բուպրենորֆին» տեսակի թմրամիջոց, որի պատճառով Զ. Հովհաննիսյանն իր կամքից անկախ հանգամանքներում չի կարողացել օժանդակել ամուսնուն` Կառլեն Հայրապետյանին, զգալի չափի թմրամիջոց ձեռք բերել։
Վերը նշված հանցավոր արարքների կատարման համար Կառլեն Սիրեկանի Հայրապետյանին մեղադրանք է առաջադրվել ՀՀ քր. օր-ի 34-268 հոդվածի 1-ին մասով, իսկ Զաբելա Հովհաննեսի Հովհաննիսյանին` ՀՀ քր. օր-ի 38-34-268 հոդվածի 1-ին մասով։
Դատաքննությամբ առաջադրված մեղադրանքում ամբաստանյալ Կառլեն Հայրապետյանն իրեն լիովին մեղավոր ճանաչեց, և օգտվելով իր սահմանադրական իրավունքից, հրաժարվեց դատաքննությամբ ցուցմունք տալուց։
Նախաքննության ընթացքում Կառլեն Հայրապետյանը հայտնել է, որ 2010թ. հոկտեմբերի 10-ին իր մոտ ապօրինաբար պահվող հեռախոսից զանգահարել է իր ծանոթին, որի տվյալները չի ցանկանում հայտնել, և խնդրել է 2 հատ «բուպրենորֆին» տեսակի թմրամիջոց իրացնել իրեն` այն իրեն փոխանցելու համար թողնել ՀՀ ԱՆ «Նուբարաշեն» ՔԿ հիմնարկի բակում տեղադրված նստարանի տակ։ Այնուհետև, իր մոտ գտնվող հեռախոսից զանգահարել է կնոջը` Զաբելա Հովհաննիսյանին, և խնդրել է իր մոտ ՀՀ ԱՆ «Նուբարաշեն» ՔԿ հիմնարկ գնալուց առաջ ՔԿ հիմնարկի բակի նստարանի տակից վերցնել իր համար նախատեսված 2 հատ «սուբոտեքս» տեսակի թմրամիջոցը, դրանք այնպես թաքցնել, որպեսզի ՔԿ հիմնարկի աշխատակիցները անձնական խուզարկության ընթացքում չկարողանան հայտնաբերել և տեսակցության ժամանակ փոխանցել իրեն։ Նույն օրը Քկ հիմնարկի աշխատակիցներից տեղեկացել է, որ կնոջ` Զաբելա Հովհաննիսյանի անձնական խուզարկության ժամանակ ՔԿ հիմնարկի աշխատակիցները հայտնաբերել են 0.008 գրամ «բուպրենորֆին» տեսակի թմրամիջոցը, որը ինքը փորձել է ձեռք բերել։
Դատաքննությամբ առաջադրված մեղադրանքում ամբաստանյալ Զաբելա Հովհաննիսյանն իրեն մեղավոր ճանաչեց, և օգտվելով իր սահմանադրական իրավունքից, հրաժարվեց դատաքննությամբ ցուցմունք տալուց։
Նախաքննության ընթացքում Զաբելա Հովհաննիսյանը ցուցմունք է տվել այն մասին, որ 2010թ. հոկտեմբերի 10-ին զանգահարել է իր ամուսին` Կառլեն Հայրապետյանը, և խնդրել է հաջորդ օրը` 2010թ. հոկտեմբերի 11-ին ՀՀ ԱՆ «Նուբարաշեն» ՔԿ հիմնարկի բակում` տեսակցության մտնելուց առաջ, նստարանի տակից վերցնել իր համար նախատեսված դեղամիջոցը և տեսակցության ժամանակ փոխանցել իրեն։ Հոկտեմբերի 11-ին, ժամը 1400-ի սահմաններում ՀՀ ԱՆ «Նուբարաշեն» ՔԿ հիմնարկի բակում տեղադրված նստարանի տակից վերցրել է 1 փաթեթ և թաքցրել է ձեռքի թաշկինակի մեջ, որից հետո ամուսնուն տեսակցելու համար, մտել է տեսակցությունից առաջ անձնական զննության ենթարկելու համար նախատեսված սենյակ, որտեղ իր անձնական խուզարկությամբ ՔԿ հիմնարկի աշխատակցի կողմից հայտնաբերվել է նշված փաթեթը, որի միջից հայտնաբերվել է 1 հատ դեղահաբ։
Ամբաստանյալների կատարած արարքները հիմնավորվեց գործով ձեռք բերված հետևյալ ապացույցներով.
Վկա` ՀՀ ԱՆ «Նուբարաշեն» ՔԿ հիմնարկի աշխատակից Ջիվան Օհանյանի ցուցմունքով այն մասին, որ 2010թ. հոկտեմբերի 11-ին, ժամը 1520-ի սահմաններում անձնական խուզարկության է ենթարկել ՔԿ հիմնարկի կալանավոր Կառլեն Սիրեկանի Հայրապետյանին տեսակցության այցելած Զաբելա Հովհաննիսյանին, որի ընթացքում վերջինիս ձեռքի թաշկինակի միջից հայտնաբերվել է երկու հատ պոլիէթիլենային թաղանթով փաթեթավորված փաթեթներ, որոնցից մեկը ընկել է գետին։ Այդ ընթացքում Զ. Հովհաննիսյանը գետնից վերցրել է փաթեթը և կուլ տվել։ Մյուս փաթեթի միջից հայտնաբերվել է օվալաձև «B8» գործարանային արտադրության, սպիտակ գույնի դեղահաբ, որը ընթերականների ներկայությամբ փաթեթավորվել և կնիքվել է։ Գետին ընկած փաթեթի վերաբերյալ Զ. Հովհաննիսյանը հայտարարել է, որ այն իր ծամոնն էր, որը վերցրել և կուլ է տվել։
Կառլեն Հայրապետյանի և Զաբելա Հովհաննիսյանի հանցանքը հիմնավորվեց նաև ՀՀ «Փորձագիտական կենտրոն» ՊՈԱԿ-ի կողմից 13.10.2010թ. տրված դատաքիմիական փորձաքննության թիվ 35611005 եզրակացությամբ, համաձայն որի փորձաքննությանը ներկայացված 1 հատ գործարանային արտադրության, 0.4 գրամ քաշով, սպիտակ գույնի, «B8» դաջվածքով օվալաձև դեղահատը իր բաղադրության մեջ պարունակում է 0.008 գրամ «բուպրենորֆին» տեսակի թմրամիջոց։
«Հոգեբուժական բժշկական կենտրոն» ՓԲԸ Նարկոլոգիական կլինիկայի կողմից 01.11.2010թ. տրված տոկսիկոքիմիական փորձաքննության թիվ 0816 եզրակացությամբ, համաձայն որի Զաբելա Հովհաննեսի Հովհաննիսյանի մեզի փորձանմուշում հայտնաբերվել են ափիոնիդային շարքի անալգետիկ` բուպրենորֆինի մետաբոլիտի հետքեր։
«ՀՀ փորձաքննությունների ազգային բյուրո» ՊՈԱԿ-ի կողմից 25.11.2010թ. տրված տոկսիկոքիմիական փորձաքննության թիվ 10-3093 եզրակացությամբ, համաձայն որի Կառլեն Սիրեկանի Հայրապետյանի մազի փորձանմուշի մեջ հայտնաբերվել են ափիոնիդների շարքի բուպրենորֆին տեսակի դեղամիջոցի հետքեր։
Զ. Հովհաննիսյանի անձնական խուզարկություն կատարելու մասին արձանագրությամբ, 0.008 գրամ քաշով «բուպրենորֆին» տեսակի թմրամիջոցը որպես իրեղեն ապացույց ճանաչելու որոշմամբ, ինչպես նաև գործով ձեռք բերված այլ փաստական տվյալներով։
Այսպիսով դատարանը ապացուցված համարեց, որ Կառլեն Սիրեկանի Հայրապետյանը կատարել է արարք, որը նախատեսված է ՀՀ քր. օր-ի 34-268 հոդվածի 1-ին մասով, իսկ Զաբելա Հովհաննեսի Հովհաննիսյանը` ՀՀ քր. օր-ի 38-34-268 հոդվածի 1-ին մասով, որով և պետք է ենթարկվեն քրեական պատասխանատվության։
Պատիժ նշանակելիս դատարանը հաշվի է առնում արարքի հասարակական վտանգավորությունը, ամբաստանյալների ինքնությունը և գործի ողջ հանգամանքները։
Կառլեն Հայրապետյանի պատասխանատվությունը և պատիժը ծանրացնող հանգամանք է դիտվում հանցանքը կատարելու ռեցիդիվը։
Դատարանն ամբաստանյալի պատասխանատվությունը և պատիժը մեղմացնող, ինչպես նաև անձը բնութագրող հանգամանք է համարում այն, որ վերջինս երիտասարդ է, խնամքին ունի մեկ անչափահաս երեխա, զղջացել է կատարած արարքի համար և ընդունել մեղքը։
Նախաքննական մարմինը 13.12.2010թ. որոշմամբ Կառլեն Սիրեկանի Հայրապետյանի նկատմամբ սույն գործով խափանման միջոց չի կիրառել` պատճառաբանելով, որ Կառլեն Հայրապետյանը հանդիսանում է ՀՀ ԱՆ «Նուբարաշեն» ՔԿ հիմնարկի կալանավոր, գտնվում է անազատության մեջ և չի կարող թաքնվել քննությունից։
Նկատի ունենալով, որ սույն գործով Կառլեն Սիրեկանի Հայրապետյանի նկատմամբ խափանման միջոց չի կիրառվել, հետևաբար դատարանը գտնում է, որ վերջինիս նկատմամբ ազատազրկման ձևով պատիժ նշանակելիս պատժի սկիզբը պետք է հաշվել Արմավիրի մարզի առաջին ատյանի դատարանի 23.02.2011թ. ԱՐԴ/0109/01/10 դատավճռով որպես պատժի սկիզբ ընտրված` 18.12.2009թ.։
Կառլեն Հայրապետյանը Արմավիրի մարզի առաջին ատյանի դատարանի 23.02.2011թ. դատավճռով ՀՀ քր. օր-ի 112 հոդվածի 1-ին մասով և 177 հոդվածի 2-րդ մասի 1-ին, 2-րդ, 3-րդ և 4-րդ կետերով, 66 հոդվածի կիրառմամբ դատապարտվել է ազատազրկման` 5 տարի 6 ամիս ժամկետով։ Նոր հանցանքը կատարել է նախքան առաջին գործով դատավճիռ կայացնելը, հետևաբար դատարանը գտնում է, որ նրա նկատմամբ պատիժ պետք է նշանակել ՀՀ քրեական օրենսգրքի 66 հոդվածի կանոններով նախատեսված հանցանքների համակցությամբ։
Նշված դատավճռով Կառլեն Սիրեկանի Հայրապետյանի նկատմամբ պատժի հետ միաժամանակ նշանակվել է պոլինարկոմանիա հիվանդությունից բուժման բժշկական բնույթի հարկադրանքի միջոց։
Զաբելա Հովհաննիսյանի պատասխանատվությունը և պատիժը ծանրացնող հանգամանքներ չկան։
Դատարանն ամբաստանյալի պատասխանատվությունը և պատիժը մեղմացնող, ինչպես նաև անձը բնութագրող հանգամանք է համարում այն, որ վերջինս երիտասարդ է, նախկինում արատավորված չի եղել, խնամքին է գտնվում անչափահաս երեխան, ամուսինը դատապարտված է և ներկա պահին պատիժը կրում է քրեակատարողական հիմնարկում` ընտանիքի միակ կերակրողն է, բնութագրվում է դրականորեն, զղջացել է կատարած արարքի համար և ընդունել մեղքը։
Քննարկելով խափանման միջոցի հարցը, դատարանը գտնում է, որ ամբաստանյալ Զ. Հովհաննիսյանի նկատմամբ ընտրված խափանման միջոցը` ստորագրություն չհեռանալու մասին, պետք է թողնել անփոփոխ։
ՀՀ Ազգային Ժողովի կողմից 26.05.2011թ. ընդունվել է «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» որոշումը։
Նկատի ունենալով, որ ամբաստանյալ Զաբելա Հովհաննիսյանին մեղսագրվել է արարք` ՀՀ քր. օր-ի 38-34-268 հոդվածի 1-ին մասով, իսկ ՀՀ քր. օր-ի 268 հոդվածի 1-ին մասի սանկցիան նախատեսում է կալանք` առավելագույնը երկու ամիս ժամկետով, կամ ազատազրկում` առավելագույնը մեկ տարի ժամկետով, հետևաբար դատարանը գտնում է, որ այդպիսի հանգամանքների պայմաններում նրա նկատմամբ կիրառելի է ՀՀ ԱԺ «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» 26.05.2011թ. որոշման դրույթները։
ՀՀ ոստիկանության ՔԳՎ Էրեբունու քննչական բաժնի 28.12.2010թ. որոշմամբ թիվ 12138410 քրեական գործից` պատճենահանման եղանակով անջատվել և թիվ 12500110 համարով առանձին վարույթ է առանձնացվել Կ. Հայրապետյանին զգալի չափի` 0.008 գրամ «բուպրենորֆին» տեսակի թմրամիջոց իրացրած անհայտ անձի մասը, որի գործողություններում առկա է ՀՀ քր. օր-ի 266 հոդվածի 2-րդ մասի 3-րդ կետով նախատեսված հանցագործության հատկանիշներ։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված զգալի չափի` 0.008 գրամ «բուպրենորֆին» տեսակի թմրամիջոցը պետք է թողնել ՀՀ ոստիկանության ՔԳՎ Էրեբունու քննչական բաժնում` թիվ 12138410 քրեական գործից` թիվ 12500110 համարով անջատված մասին կից՝ անհայտ անձի նկատմամբ քննություն կատարելու համար, իսկ քրեական գործին կցված և ապացույց ճանաչված այլ փաստաթուղթ հանդիսացող` Կ. Հայրապետյանի բացատրությունը` թողնել քրեական գործում։
Վերոգրյալի հիման վրա և ղեկավարվելով ՀՀ քր. դատ. օր-ի 357-360 հոդվածներով և ՀՀ ԱԺ «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» 26.05.2011թ. որոշման 1-ին կետի 1-ին ենթակետով և 13 կետի 1-ին ենթակետով, դատարանը.

Վ Ճ Ռ Ե Ց

1. Կառլեն Սիրեկանի Հայրապետյանին մեղավոր ճանաչել ՀՀ քր. օր-ի 34-268 հոդվածի 1-ին մասով և դատապարտել ազատազրկման` 6/վեց/ ամիս ժամկետով։
ՀՀ քր. օր-ի 66 հոդվածի 4-րդ մասի համաձայն՝ նոր նշանակված և Արմավիրի մարզի առաջին ատյանի դատարանի 23.02.2011թ. ԱՐԴ/0109/01/10 դատավճռով նշանակված պատիժները մասնակիորեն գումարելու միջոցով, վերջնական պատիժ նշանակել ազատազրկում՝ 5/հինգ/ տարի ժամկետով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը` 18.12.2009թ.։
Պատիժը կրելու ընթացքում Կառլեն Սիրեկանի Հայրապետյանի նկատմամբ ՀՀ քր. օր-ի 97 հոդվածով նշանակել հարկադիր բուժում` պոլինարկոմանիայի դեմ։
2. Զաբելա Հովհաննեսի Հովհաննիսյանին մեղավոր ճանաչել ՀՀ քր. օր-ի 38-34-268 հոդվածի 1-ին մասով և դատապարտել ազատազրկման` 6/վեց/ ամիս ժամկետով։
Կիրառել ՀՀ ԱԺ «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» 26.05.2011թ. որոշման 1-ին կետի 1-ին ենթակետը և Զաբելա Հովհաննեսի Հովհաննիսյանին ազատել 6/վեց/ ամիս ժամկետով ազատազրկման ձևով նշանակված պատժից։
Զաբելա Հովհաննիսյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ մինչև դատավճռի օրինական ուժի մեջ մտնելը։
Գործով իրեղեն ապացույց ճանաչված զգալի չափի` 0.008 գրամ «բուպրենորֆին» տեսակի թմրամիջոցը դատավճիռն օրինական ուժի մեջ մտնելուց հետո թողնել ՀՀ ոստիկանության ՔԳՎ Էրեբունու քննչական բաժնում` թիվ 12138410 քրեական գործից` թիվ 12500110 համարով անջատված մասին կից՝ անհայտ անձի նկատմամբ քննություն կատարելու համար, իսկ քրեական գործին կցված և ապացույց ճանաչված այլ փաստաթուղթ հանդիսացող` Կ. Հայրապետյանի բացատրությունը, թողնել քրեական գործում։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ