Գործ թիվ ԵԷԴ/0001/01/11
2011թ.

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղարությամբ Արմինե Արղամանյան
Մասնակցությամբ`
Մեղադրող Սամվել Մկրտչյան
Ամբաստանյալ Հայկազ Թության
Ամբաստանյալի պաշտպան Մելսիկ Մանուկյան
Տուժող Կլարա Ասատրյան

2011 թվականի փետրվարի 18-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում քննեց քրեական գործն ըստ մեղադրանքի՝
Հայկազ Սարգսի Թությանի ծնված 03.05.1960թ. Երևան քաղաքում, ազգությունը հայ, Հայաստանի Հանրապետության քաղաքացի, ութամյա կրթությամբ, ամուսնացած, խնամքին երկու անչափահաս երեխաներ, ծնված 14.02.1996թ. և 18.08.1997թ, չի աշխատում, չդատված, բնակվում է Երևան, Խաղաղ-Դոնի 31 շենքի 290 բնակարանում,
• ձերբակալվել է 22.10.2010թ.,
• խափանման միջոցը կալանավորում է ընտրվել 25.10.2010թ.,
• կալանքի տակ պահելու ժամկետը դատարանի կողմից 17.12.2010թ. մերժվելու կապակցությամբ ՀՀ ԱՆ «Նուբարաշեն» ՔԿ հիմնարկի պետի 22.12.2010թ. որոշմամբ ազատվել է կալանքից,
• ՀՀ վերաքննիչ քրեական դատարանը, 27.12.2010թ. քննության առնելով Էրեբունի և Նուբարաշեն վարչական շրջանների դատախազության բողոքը` Հայկազ Սարգսի Թությանին կալանքի տակ պահելու վերաբերյալ նախաքննական մարմնի միջնորդությունը մերժելու մասին Երևանի Էրեբունի և Նուբարաշեն վարչական շրջանների ընդհանուր իրավասության դատարանի 17.12.2010թ. որոշման դեմ, վերաքննիչ բողոքը բավարարել, ընդհանուր իրավասության դատարանի 17.12.2010թ. որոշումը բեկանել է։ Միաժամանակ բավարարվել է նախաքննական մարմնի միջնորդությունը, Հայկազ Սարգսի Թությանին կալանքի տակ պահելու ժամկետը երկարացվել է մեկ ամիս ժամկետով։ Ամբաստանյալ Հայկազ Թությանը կալանավորվել է 27.12.2010թ., ներկայումս ՀՀ ԱՆ «Նուբարաշեն» ՔԿ հիմնարկի կալանավոր, մեղադրվում է ՀՀ քրեական օրենսգրքի 119-րդ հոդվածի 1-ին մասով և 34-185-րդ հոդվածի 3-րդ մասի 1-ին կետով։
Առաջադրված մեղադրանքում ամբաստանյալ Հայկազ Սարգսի Թությանն իրեն լիովին մեղավոր է ճանաչել։

1.Գործի դատավարական նախապատմությունը։
Գործով ամբաստանյալ Հայկազ Սարգսի Թությանը և տուժող Կլարա Սարգսի Ասատրյանը տարիներ շարունակ գույքային վեճ են ունեցել Երևանի Մարքսի /ներկայիս Խորենացի/ փողոցի 3-րդ նրբանցքի 32 հասցեում հաշվառված շինության նկատմամբ։
Հայաստանի Հանրապետության վճռաբեկ դատարանը 01.10.2010թ. քննելով ԵԿԴ/1836/02/08 քաղ. գործով Կլարա Ասատրյանի վճռաբեկ բողոքը ՀՀ վերաքննիչ քաղաքացիական դատարանի 11.02.2010թ. որոշման դեմ` ըստ հայցի Հայկազ Թությանի ընդդեմ Կլարա Ասատրյանի` կառուցապատողի իրավունքը ճանաչելու պահանջի մասին, որոշել է վճռաբեկ բողոքը բավարարել, բեկանել ՀՀ վերաքննիչ քաղաքացիական դատարանի 11.02.2010թ. որոշումը և այն փոփոխել` Հայկազ Թությանի հայցը մերժել։
Իմանալով քաղաքացիական գործով կայացված վերջնական որոշման մասին, ամբաստանյալ Հայկազ Սարգսի Թությանը որոշել է ֆիզիկական հաշվեհարդար տեսնել տուժողի` 1935թ. ծնված Կլարա Ասատրյանի նկատմամբ, ալկոհոլ օգտագործած վիճակում գնացել է նրան պատկանող` Երևանի Մ. Խորենացու 3-րդ նրբանցքի 32 տուն և տուժողին տանը գտնելով մենակ, օգտվելով նրա մենակ և անպաշտպան լինելու և տարիքի բերումով դիմադրություն ցույց տալու անկարողության վիճակից, խոշտանգման եղանակով` տուժողին առանձնակի ֆիզիկական, հոգեկան ցավ և տառապանք պատճառելու նպատակով, աթոռով հարվածել է տուժող Կլարա Ասատրյանի գլխի գագաթային, ճակատի, վերհոնքային շրթունքին, կրծքավանդակին, ձեռքերի նախաբազուկներին և մարմնի մյուս մասերին։ Հարվածների հետևանքով աթոռը կոտրվելուց և տուժողի ուժասպառ գետնին ընկնելուց հետո արնաթաթախ տուժողին նա սկսել է ոտքերով հարվածել այնքան ժամանակ, մինչև տուժողն ուշագնաց է եղել։ Տուժողի ուշագնացությունն ընդունելով որպես նրա մահվան պահ, ամբաստանյալ Հայկազ Թությանը դադարեցրել է հարվածները և հեռացել տուժողի բնակարանից։
Համոզված լինելով այն բանում, որ ինքն սպանել է տուժող Կլարա Ասատրյանին, ամբաստանյալ Հայկազ Թությանը դեպքի հաջորդ օրը` 13.10.2010թ. մեղայականով ներկայացել է ՀՀ ոստիկանության Էրեբունու բաժին և հայտարարել, որ սպանել է Մ. Խորենացի 3-րդ նրբանցքի 32 տան բնակչուհի Կլարա Ասատրյանին։
Ստուգմամբ պարզվել է, որ տուժող Կլարա Ասատրյանը մարմնական վնասվածքներով պառկած է իր տանը, տուժողից հայտարարություն է ընդունվել։
22.10.2010թ. ՀՀ ոստիկանության ՔԳՎ Էրեբունու քննչական բաժնի կողմից ՀՀ քրեական օրենսգրքի 113-րդ հոդվածի 1-ին մասով հարուցվել է թիվ 12141010 քրեական գործը և նախաքննություն է կատարվել։
Նշված քրեական գործի նախաքննության ընթացքում ամբաստանյալ Հայկազ Թությանը, գտնվելով ալկոհոլային հարբածության վիճակում, տուժող Կլարա Ասատրյանի Երևանի Մ. Խորենացի փող. 3-րդ նրբանցքի 32 հասցեում գտնվող խոշոր չափերի` 8.100.000 ՀՀ դրամ արժողության տունը հրկիզման եղանակով, դիտավորությամբ ոչնչացնելու նպատակով 22.10.2010թ. ժամը 03.00-ի սահմաններում բենզալիցքավորման կայանից գնելով 2 լիտր բենզին, այն լցրել է տուժողի տան մուտքի դռան վրա և իր մոտ ունեցած կրակայրիչով վառել է հեղուկ վառելանյութով լցված հատվածը։
Տան հրկիզման ընթացքին լրացուցիչ կարգով նպաստելու նպատակով ամբաստանյալ Հայկազ Թությանը կրկին գնացել է բենզալիցքավորման կայան և 1 լիտր բենզին վերցրել այնտեղից։
Մինչև տուժողի տուն նրա վերադառնալը տուժող Կլարա Ասատրյանն ու նրա որդի Սերգեյ Գնունին հեռախոսով կատարվածի մասին հայտնել են ՀՀ ոստիկանության Էրեբունու բաժնին և սեփական ուժերով կարողացել են հանգցնել կրակը։
Երկրորդ անգամ հեղուկ վառելանյութով` բենզինով լի շիշը ձեռքին տուժող Կլարա Ասատրյանի տան մոտ հայտնված ամբաստանյալ Հայկազ Թությանը դռան վրա է լցրել շշի պարունակությունը, սակայն տուժողի ահազանգով դեպքի վայր հասած ոստիկանության աշխատակիցները Հայկազ Թությանին բռնել և բերման են ենթարկել ոստիկանության բաժին, այդ պատճառով տուժողի տունը հրկիզելուն ուղղված նրա գործողությունները կանխվել են։
Այսպիսով` նշված հանցագործությունը ավարտին չի հասցվել ամբաստանյալի կամքից անկախ հանգամանքներով։
ՀՀ ոստիկանության Էրեբունու քննչական բաժնի կողմից փաստի առթիվ 22.10.2010թ. ՀՀ քրեական օրենսգրքի 185-րդ հոդվածի 2-րդ մասի 1-ին կետի հատկանիշներով հարուցվել է թիվ 12140810 քրեական գործը և նախաքննություն է կատարվել։
22.10.2010թ. ժամը 20.30-ին Հայկազ Սարգսի Թությանը ձերբակալվել է։
25.10.2010թ. Հայկազ Թությանին մեղադրանք է առաջադրվել ՀՀ քրեական օրենսգրքի 185-րդ հոդվածի 2-րդ մասի 1-ին կետով։
25.10.2010թ. Երևան քաղաքի Էրեբունի և Նուբարաշեն վարչական շրջանների դատարանը 25.10.2010թ. որոշմամբ բավարարել է նախաքննական մարմնի միջնորդությունը և Հայկազ Թությանի նկատմամբ որպես խափանման միջոց է ընտրել կալանավորումը։
25.10.2010թ. որոշում է կայացվել թիվ 12141010 և 12140810 քրեական գործերը մեկ վարույթում 12140810 համարի տակ միացնելու մասին։
29.12.2010թ. որոշում է կայացվել առաջադրված մեղադրանքը փոփոխելու և լրացնելու մասին, նույն օրը Հայկազ Սարգսի Թությանին մեղադրանք է առաջադրվել ՀՀ քրեական օրենսգրքի 119-րդ հոդվածի 1-ին մասով և 34-185-րդ հոդվածի 3-րդ մասի 1-ին կետով։
Մեղադրական եզրակացությունը հաստատվել է 30.12.2010թ.։
Քրեական գործը 10.01.2011թ. մուտք է եղել Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարան։

2. Դատաքննությամբ ձեռք բերված ու հետազոտված ապացույցները։
Դատաքննությամբ հետազոտվել են այն բոլոր ապացույցները, որոնք թվարկված են մեղադրական եզրակացության մեջ։
Ապահովելով դատաքննության լրիվությունը, բազմակողմանիությունը և օբյեկտիվությունը և ղեկավարվելով գործի արդար քննությանը վերաբերող սահմանադրական և դատավարական նորմերի դրույթներով, հիմնվելով պատշաճ ընթացակարգի շրջանակներում դատական քննության ընթացքում գործի հանգամանքների հետազոտման արդյունքի վրա, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով, դատարանը գտնում է, որ ամբաստանյալ Հայկազ Սարգսի Թությանի նկատմամբ պետք է կայացվի մեղադրական դատավճիռ և նրա նկատմամբ պետք է քրեական պատիժ կիրառվի։
Դատարանի նշված եզրահանգման համար հիմք են հանդիսանում նախաքննությամբ ձեռք բերված և դատաքննությամբ հետազոտված հետևյալ ապացույցները.
Նախաքննական մարմնի կողմից Հայկազ Սարգսի Թությանին մեղադրանք է առաջադրվել ՀՀ քրեական օրենսգրքի 119-րդ հոդվածով և 34-185-րդ հոդվածի 3-րդ մասի 1-ին կետով նախատեսված հանցանքները կատարելու համար։

Հատոր 1 Գ.Թ. 154-155

Առաջադրված մեղադրանքում ամբաստանյալ Հայկազ Սարգսի Թությանն իրեն մեղավոր է ճանաչել լիովին։ Ամբաստանյալ Հայկազ Թությանը նախաքննության ժամանակ տված ցուցմունքներում հայտնել է, որ իր և տուժողի միջև տարիներ շարունակ գույքային վեճ է առկա եղել Երևանի Մ. Խորենացի փողոցի 3-րդ նրբանցքի 32 հասցեում գտնվող շինության նկատմամբ, այն քննության է առնվել դատական ատյաններում։ 2010 թվականի հոկտեմբերի 12-ին ինքն ստացել է ՀՀ վճռաբեկ դատարանի որոշումը, հասկացել, որ վեճը լուծվել է հօգուտ Կլարա Ասատրյանի։ Գտնվելով ոգելից խմիչքի ազդեցության տակ, ինքը զայրացած գնացել է Կլարա Ասատրյանի տուն։ Տանը գտնվել է միայն Կլարա Ասատրյանը։ Հարցրել է Կլարա Ասատրյանից, թե «Իմ խանութը խլու՞մ ես ինձանից», նրանից լսել է հայհոյանքներով համեմված պատասխան այն մասին, որ` լավ է անում։ Շատ զայրանալով տուժողի պատասխան խոսքից, վերցրել է փայտե աթոռը և սկսել է դրանով հարվածել Կլարային։ Մի քանի հարված ստանալուց հետո տուժողն ընկել է գետնին, որից հետո ինքը դադարեցրել է հարվածները, բայց թքելով տուժողի վրա, հեռացել է։ Կարծելով, որ իր հարվածների արդյունքում Կլարա Ասատրյանը մահացել է, ինքը հաջորդ օրը մեղայականով ներկայացել է ոստիկանության Էրեբունու բաժին, սակայն ստուգմամբ պարզվել է, որ Կլարան ողջ է։
2010թ. հոկտեմբերի 21-ին իր ընկերների հետ խմել են 4 շիշ օղի։ Երեկոյան գնացել է տուն։ Գտնվելով հարբած վիճակում, որոշել է Կլարայի տունն այրել` տուժողին զրկելով սեփականությունից։ Վերցնելով 2լ տարողությամբ պոլիմերային շիշ, գնացել է մոտակա բենզալիցքավորման կայան, վճարել և շշի մեջ լցնելով բենզին, ժամը 03.00-ի սահմաններում գնացել է Կլարայի տան մոտ, բենզինը լցրել է մուտքի փայտե դռան ներքևի մասում, բենզինը լցվել է տան ներսի հատված, այնուհետև հանել է իր մոտ ունեցած կրակայրիչն ու կրակը պահել բենզինով թրջված հատվածի ուղղությամբ։ Դուռը բոցավառվել է` առաջացնելով փոքրիկ պայթյունի էֆեկտ։ Տան ներսից ձայներ է լսել, հեռացել է 10մ և նկատել, որ տանից դուրս են եկել մի քանի հոգի ու հանգցրել են կրակը։ Դա տեսնելով, ինքը որոշել է էլի բենզին բերել և նորից այրել տունը։ Մոտակա աղբարկղից ճարել է մի դատարկ պոլիմերային շիշ, վերստին գնացել է բենզալիցքավորման կայան, սակայն մոտը գումար չունենալու պատճառով խնդրել է իր ծանոթ Արամ Զաքարյանից պարտքով 1 լիտր բենզին տալ, պատճառաբանելով, որ ավտոմեքենայի բենզինը վերջացել է։
Արամ Զաքարյանն իրեն հավատացել է, «ֆլեշ» բենզալցակայանի աշխատակցին խնդրել է տալ 1լ բենզինը, խոստանալով հատուցել դրա արժեքը։ Ստանալով բենզինը, այն շշի մեջ լցրած վերադարձել է Կլարա Ասատրյանի տան մոտ, սակայն չի կարողացել տուժողի տան հրկիզման նպատակով այն օգտագործել, քանի որ դեպքի վայրում գտնված ոստիկանության աշխատակիցներն իրեն բռնել և բերման են ենթարկել ոստիկանության Էրեբունու բաժին։
Դատաքննության ժամանակ ամբաստանյալ Հայկազ Թությանը հայտարարեց, որ պնդում է նախաքննության ընթացքում տված ցուցմունքները։

Հատոր 1 Գ.Թ. 11-14, 33-36, 43-44, 39, 62-63, 154-159,
դատաքննության արձանագրություն

Տուժող Կլարա Ասատրյանը ցուցմունք է տվել և ամբաստանյալ Հայկազ Թությանին առերես պնդել է, որ 2005թվականից սկսած ամբաստանյալի հետ գույքային բնույթի վեճ է ունեցել, այն քննվել է դատական տարբեր ատյաններում։ Գույքային բնույթի վեճի հողի վրա իրենց փոխհարաբերությունները լարվել են։ ՀՀ վճռաբեկ դատարանի որոշմամբ վեճը լուծվել է իր օգտին։
2010 թվականի հոկտեմբերի 12-ին ժամը 10-ի սահմաններում Հայկազ Թությանը հարբած վիճակում գալով իր տուն, վիճաբանության մեջ է մտել իր հետ հողատարածքն իբր թե խլելու վերաբերյալ, որի ժամանակ, շուրջ 30 րոպե շարունակ ձեռքերով և ոտքերով, ինչպես նաև իր տան միջանցքում գտնվող աթոռով բազմաթիվ հարվածներ է հասցրել իր գլխի և մարմնի տարբեր մասերին, իրեն պատճառելով ուժեղ ցավ, մարմնական և հոգեկան տառապանքներ։ Ցավին չդիմանալով ինքը կորցրել է գիտակցությունը, ընկել գետնին և ուշքի է եկել մոտ 30 րոպե անց։ Ուշքի գալով ցանկացել է զանգահարել ոստիկանություն, սակայն ուժասպառ լինելու պատճառով չի կարողացել։ Քիչ անց տուն է վերադարձել որդին` Սերգեյ Գնունին և օգնություն է ցույց տվել իրեն։ Հաջորդ օրը` 13.10.2010թ. գնացել է ոստիկանության Էրեբունու բաժին և հաղորդում է տվել Հ. Թությանի կողմից իրեն ծեծի ենթարկելու մասին։
Այնուհետև, 2010թ. հոկտեմբերի 21-ին ժամը 03.00-ի սահմաններում ինքն ու տղան` Սերգեյ Գնունին, գտնվել են իրենց` Երևան քաղաքի Մ. Խորենացի փողոցի 3-րդ նրբանցքի 32 տանը։
Քնած ժամանակ պայթյունի ձայն լսելով, արթնացել են և տեսել, որ իրենց տան մուտքի դուռը տան ներսից վառվում է։ Այդ պահին նրանք դույլով ջուր են բերել և մարել են կրակը։ Կրակը մարելուց հետո իրենք դուրս են եկել փողոց, որտեղ տեսել են Հ. Թությանին, որն իրենց ասելով «Իմացա՞ք ով ա», հեռացել է։ Այդ պահին զանգահարել են ոստիկանություն, մի քանի րոպե անց եկել են ոստիկանության աշխատակիցները և Հ. Թությանին բերման են ենթարկել ոստիկանության Էրեբունու բաժին, ինքն ու որդին ևս գնացել են ոստիկանություն և հաղորդում է տվել կատարվածի մասին։
Նշված ցուցմունքը տուժողը պնդել է ամբաստանյալ Հ. Թությանին առերես։

Հատոր 1 Գ.Թ. 19-21,39, 59-60, 120-139,
դատաքննության արձանագրություն

Վկա Սերգեյ Գնունին ցուցմունք է տվել այն մասին, որ 2010 թվականի հոկտեմբերի 12-ին, կեսօրին տուն վերադառնալով տեսել է մորը` Կլարա Ասատրյանին արնաշաղախ և ծեծված վիճակում։ Մորից տեղեկացել է, որ նույն օրը ժամը 10.00-ի սահմաններում Հ. Թությանը գալով իրենց տուն, վիճաբանել է մոր հետ, որի ընթացքում աթոռով ծեծի է ենթարկել նրան։
Այնուհետև, 2010 թվականի հոկտեմբերի 21-ին ժամը 03.00-ի սահմաններում ինքն ու մայրը գտնվել են իրենց` Երևան քաղաքի Մ. Խորենացու փողոցի 3-րդ նրբանցքի 32 տանը։ Քնած ժամանակ պայթյունի ձայն լսելով, արթնացել են և տեսել, որ իրենց տան մուտքի դուռը տան ներսից վառվում է։ Այդ պահին իրենք դույլով ջուր են բերել և մարել կրակը։ Կրակը մարելուց հետո իրենք դուրս են եկել փողոց, որտեղ տեսել են Հ. Թությանին, որն իրենց ասելով «Իմացա՞ք ով ա», հեռացել է։ Այդ պահին մայրը զանգահարել է ոստիկանություն, մի քանի րոպե անց եկել են ոստիկանության աշխատակիցները և Հ. Թությանին բերման ենթարկել ոստիկանության Էրեբունու բաժին, ինքն ու Կ. Ասատրյանը ևս գնացել են ոստիկանություն, որտեղ մայրը հաղորդում է տվել կատարվածի մասին։

Հատոր 1 Գ.Թ. 22-23, 64, դատաքննության արձանագրություն

Վկա Արամ Զաքարյանի ցուցմունքով այն մասին, որ աշխատում է Մ. Խորենացի 112 հասցեում գտնվող ավտոլվացման կետում, որին կից գործում է «Ֆլեշ» բենզալցակայանը։ Ճանաչում է Հայկազ Թությանին։ 2010 թվականի հոկտեմբերի 21-ին ժամը 03.00-ի սահմաններում, գտնվելով աշխատավայրում, իրեն է մոտեցել Հ. Թությանը և ասել, որ իր մեքենայի բենզինը վերջացել է և գումար չունի, որպեսզի բենզին գնի։ Հ. Թությանի խնդրանքով ինքը ձայն է տվել հարակից տարածքում գտնվող «Ֆլեշ» բենզալցակայանի աշխատակից Սամվելին` ասելով, որ Հ. Թությանին բենզին տա, որի գումարը ինքը կվճարի։ Հ. Թությանը վերցնելով բենզինը և շնորհակալություն հայտնելով իրեն, հեռացել է։

Հատոր 1 Գ.Թ. 67-68, դատաքննության արձանագրություն

Վկա Սամվել Ղազարյանի ցուցմունքով այն մասին, որ 2006 թվականից աշխատում է Մ. Խորենացի 112 հասցեում գտնվող «Ֆլեշ» բենզալցակայանում որպես ավագ օպերատոր։ 2010թ. հոկտեմբերի 21-ին ինքն աշխատել է գիշերային հերթափոխով։ Նույն օրը ժամը 03.00-ի սահմաններում «Ֆլեշ» բենզալցակայանի հարևանությամբ գտնվող ավտոլվացման կետի աշխատող Արամը ձայն է տվել իրեն, խնդրելով իր ծանոթին, որին ինքը չի ճանաչել, 1 լիտր բենզին տալ, խոստանալով, որ բենզինի արժեքը հետո կվճարի։ Ինքն Արամի խնդրանքով անծանոթին տվել է 1 լիտր բենզին` շշով, որից հետո անծանոթը հեռացել է։


Հատոր 1 Գ.Թ. 69, դատաքննության արձանագրություն

ՀՀ ոստիկանության Էրեբունի բաժին 13.10.2010թ. ժամը 12.30-ին մեղայականով ներկայանալու մասին արձանագրությամբ այն մասին, որ Հայկազ Սարգսի Թությանը հայտարարել է, որ սպանել է Երևանի Մ. Խորենացի փող. 3-րդ նրբանցքի 32 տան բնակչուհի Կլարա Ասատրյանին։

Հատոր 1 Գ.Թ. 57

Դատաբժշկական փորձագետի 26.10.2010թ. թիվ 2661 եզրակացության համաձայն` 23.07.1935թ. ծնված Կլարա Ասատրյանի մոտ հետազոտության պահին 13.10.2010թ. առկա են եղել միջին, աջ և ձախ ճակատային շրջաններում անկանոն ձևի, ընդհանուր` 10,0 x 5,0սմ չափսի տեղամասով կապտամանուշակագույն, անհամասեռ արյունազեղում, որի պրոյեկցիայով շոշափվում են կիսաամուր և փափուկ համակազմվածքներով ենթամաշկային ուռածություններ։ Ձախ ճակատային-վերհոնքային շրջանում լայնաձիգ ուղղությամբ առկա է անհարթ եզրերով, անկանոն աղեղնաձև 1,8 x 0,3սմ չափսի չորացած արյան մուգ կարմիր մակարդուկներով պատված վերք։ Առկա են եղել նաև 2,0-2,5 x 0,3սմ չափսերով վերքեր ձախ ճակատային շրջանում, թմբուկային վերին եզրի պրոյեկցիայով թեք լայնաձիգ ուղղությամբ, միջին ճակատային ուղղությամբ, նույն ուղղությամբ` գագաթային շրջանում, միջին գծով, երկայնաձիգ ուղղությամբ, աջ գագաթային շրջանում` նույն ուղղությամբ, աջ նախաբազկի միջին երրորդականի հետին կողմնային մակերեսին` երկայնաձիգ ուղղությամբ, ձախ նախաբազկի ստորին երրորդականի մեջքային մակերեսին` միջային կեսում` լայնաձիգ ուղղությամբ։ Նշված վնասվածքների շուրջն արյունազեղված է` նույնանման, անկանոն ձևերով, համապատասխանաբար 6,0 x 4,0սմ և 4,0 x 3,0սմ չափսի տեղամասերով, շոշափելիս ` կիսաամուր համակազմվածքներով։ Նույնանման, մեկական անկանոն ձևերի արյունազեղումներ կան աջ դաստակի 4-րդ մատի շրջանում, բոլոր մակերեսներին համատարած, կրծքավանդակի աջ կողմնային մակերեսին 8-10-րդ կողերի մակարդակներին, միջին անութային գծով 6,0 x 5,0սմ չափսերով, որտեղ շոշափելիս` նշվում է սուր ցավ։ Շարժումներն աջ դաստակի մատներում, ձախ ճաճանչ-դաստակային հոդում` սահմանափակ ծավալով, ցավոտ։
Փորձագետը եզրահանգել է, որ նշված վնասվածքները հասցվել են բութ, կոշտ առարկաներով, վաղեմությամբ համընկնում են դեպքի օրվան և առաջացրել են առողջության թեթև վնաս` առողջության կարճատև քայքայումով։

Հատոր 1 Գ.Թ. 11-12

Դեպքի վայրի տեղազննության արձանագրությամբ և դրան կից լուսանկարներով այն մասին, որ 22.10.2010թ. ժամը 05.30-ին Երևանի Մ. Խորենացի փող. 3-րդ նրբանցքի 32 տան զննությամբ տան մուտքի փայտե դուռը ներսի և դրսի կողմերից եղել է այրված, այրվել է նաև դռան դիմաց գցված փալասը, նախասրահից նավթամթերքի սուր հոտ է եկել։
Տանտիրուհի Կլարա Ասատրյանը ներկայացրել է մեկ հատ 2լ և մեկ հատ 1լ տարողությամբ պլաստմասե դատարկ շշեր` նավթամթերքին բնորոշ հոտով։ Կլարա Ասատրյանը հայտարարել է, որ իր նախկին հարևան Հայկազ Թությանն է փորձել հրկիզել իրենց տունը` դռան վրա և դռնից ներս բենզին լցնելով և այն այրելով։ Ներկայացված երկու դատարկ շշերը և մուտքի դռան ներսի և դրսի կողմի այրված շորի կտորներն առգրավվել են։

Հատոր 1 Գ.Թ. 4-5, 6

Արձանագրությամբ այն մասին, որ 22.10.10թ. ժամը 04.00-ին Երևանի Մ. Խորենացի փողոցի 3-րդ նրբանցքի 34 տան մոտից ոստիկանության Էրեբունու բաժնի աշխատակիցները բերման են ենթարկել Հայկազ Սարգսի Թությանին` Կլարա Ասատրյանի տունը հրկիզելու կասկածանքով։

Հատոր 1 Գ.Թ. 7-8

22.10.2010թ. ժամը 7.15-ին «ՀԲԿ» ՓԲԸ Նարկոլոգիական կլինիկայում կազմված սթափության վիճակի զննության թիվ 498 արձանագրությամբ այն մասին, որ Հայկազ Սարգսի Թությանը գտնվել է ալկոհոլային հարբածության վիճակում։

Հատոր 1 Գ.Թ. 10

ՀՀ ոստիկանության փորձաքրեագիտական վարչության 12.11.2010թ. թիվ 861-ԱՊ դատաապրանքագիտական փորձաքննությամբ պարզվել է, որ Երևանի Մ. Խորենացու փող. 3-րդ նրբանցքի 32 տան դռները բարձր ջերմային ներգործության հետևանքով եղել են մրված և արատավորված փեղկերի ստորին հատվածներում, դռները ենթակա են վերանորոգման։ Տան մուտքի դռան փեղկերը հրկիզելու հետևանքով պատճառված նյութական վնասի չափը դեպքի օրվա դրությամբ գնահատվել է 1500 դրամ։

Հատոր 1 Գ.Թ. 86

«ՀՀ փորձաքննությունների ազգային բյուրո» ՊՈԱԿ կողմից 17.12.2010թ. տրված թիվ 10-2975 հրդեհատեխնիկական փորձաքննության եզրակացությամբ այն մասին, որ փորձաքննության օբյեկտներ են հանդիսացել Երևանի Մ. Խորենացի 3-րդ նրբանցքի 32 առանձնատան մուտքի փայտե դուռը, դռնից դուրս և ներս գցված այրված գործվածքների /փալասների/ կտորները և 1լ ու 2լ տարողության դատարկ շշերը։
Փորձաքննությամբ պարզվել է, որ նշված առանձնատան մուտքի փայտե դռան փեղկերի միջնամասը` փակման հատվածը, ջերմահարված է, արտաքին ներկածածկույթը գունափոխված է, տեղ-տեղ` արտափքված, ածխացած։ Դռան փեղկերի միջնամասում` արտաքին մակերեսին, ջերմահարման ընդհանուր մակերեսը կազմել է 70 x 80սմ, նշված հատվածում դռան փեղկի միջնափայտը նույնպես մակերեսայնորեն ածխացած է մինչև 30սմ բարձրության վրա։ Մակերեսային ջերմահարման` գունափոխման և մակերեսային ածխացման է ենթարկվել նաև դռան միջնահատվածն առանձնատան նախասրահի կողմից` 50 x 130սմ ընդհանուր մակերեսով։
Դռան ներսի և դրսի հատվածներից վերցված գործվածքների /փալասների/ հետազոտությամբ փորձագետն արձանագրել է, որ գործվածքները տեղ-տեղ այրված, ածխացած են, կրում են բարձր ջերմահարման հետքեր, գործվածքների թելիկները մակահալված և շեզջաքարացված են։
Երկու պոլիմերային շշերի հետազոտությամբ պարզվել է, որ դրանցից զգացվել է նավթամթերքին բնորոշ հոտ, հետքերի քրոմատագրման արդյունքում դիագրամների վրա ի հայտ են եկել բաց նավթամթերքին` բենզինին, բնորոշ հետքեր /պիկետ C8-C14/։
Փորձագետը հանգել է այն հետևության, որ առանձնատան մուտքի դռան վրա առկա ջերմային ազդեցության համակցված պատկերից ելնելով և հետազոտված օբյեկտների վրա բաց նավթամթերքի` բենզինի, հետքերի առկայությունն ի նկատի ունենալով, Երևանի Մ. Խորենացի փող. 3-րդ նրբանցքի 32 առանձնատանը հրդեհի օջախը գտնվել է մուտքի դռան արտաքին ստորին հատվածում։ Հրդեհի առաջացման պատճառ է հանդիսացել բաց կամ քիչ կալորիականություն ունեցող կրակի աղբյուրը /օրինակ` այրվող լուցկի, կրակայրիչ և այլն/ բաց նավթամթերքի` բենզինի առկայության պայմաններում։ Հրդեհի բոցը բռնկվելով դռան արտաքին ստորին հատվածում, տարածվել է դեպի վերև և դեպի ներս ուղղություններով։ փորձաքննությանը ներկայացված 1լ և 2լ տարողությամբ պոլիմերային շշերում առկա են նավթամթերքի` բենզինի հետքեր։
Փորձագետի եզրակացությանը կից առկա է հետազոտված օբյեկտների ֆոտոաղյուսակ։

Հատոր 1 Գ.Թ. 114-119

«ՀՀ փորձաքննությունների ազգային բյուրո» ՊՈԱԿ կողմից 21.12.2010թ. տրված թիվ 10-3221 դատաապրանքագիտական փորձաքննության եզրակացությամբ այն մասին, որ դեպքի օրվա` 22.10.2010թ. դրությամբ Երևանի Մ. Խորենացի փող. 3-րդ նրբանցքի 32 տան շուկայական արժեքը կազմել է 8.100.000 ՀՀ դրամ։

Հատոր 1 Գ.Թ. 122-126, 127-128

Դեպքի վայրից առգրաված` բենզինի հետքերով պոլիմերային 1լ և 2լ տարողության դատարկ շշերը այրված տեղամասերով գետնաշորերը ճանաչվել են իրեղեն ապացույց։

Հատոր 1 Գ.Թ. 151

3. Դատարանի իրավական վերլուծությունը
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Հայկազ Սարգսի Թությանի մեղքը ՀՀ քրեական օրենսգրքի 119-րդ հոդվածի 1-ին մասով և 34-185-րդ հոդվածի 3-րդ մասի 1-ին կետով նախատեսված հանցանքները կատարելու մեջ հիմնավորված է, և նշված հոդվածների սանկցիայով նրա նկատմամբ պետք է քրեական պատիժ կիրառվի։
Դատարանը գտնում է, որ կոնկրետ դեպքով ամբաստանյալ Հայկազ Սարգսի Թությանի մոտ որպես նրա պատասխանատվությունը և պատիժը ծանրացնող հանգամանքներ առկա են ՀՀ քրեական օրենսգրքի 63-րդ հոդվածի 8-րդ և 14-րդ կետերով նախատեսված` խոշտանգման դրվագով 75-ամյա տուժող Կլարա Ասատրյանի անպաշտպան և անօգնական վիճակը և մեղադրանքում շարադրված երկու դրվագներով հանցանքն ալկոհոլի ազդեցության տակ կատարելը։
Որպես պատասխանատվությունը և պատիժը մեղմացնող հանգամանքներ են հանդիսանում անկեղծորեն զղջալը, նախկինում դատապարտված չլինելը, խնամքին 14.02.1996թ. և 18.08.1997թ. ծնված երկու անչափահաս երեխաներ ունենալը։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալ Հայկազ Սարգսի Թությանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, քրեական գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր եզրակացությանը, որ ամբաստանյալի նկատմամբ որպես պատիժ անհրաժեշտ է նշանակել ազատազրկում որոշակի ժամկետով։
Պատիժ նշանակելիս դատարանը հաշվի է առնում, որ ՀՀ քրեական օրենսգրքի 20-րդ հոդվածի հիմքով առկա է հանցագործությունների համակցություն, ընդ որում` ՀՀ քրեական օրենսգրքի 19-րդ հոդվածի հիմքով մեղադրանքի ՀՀ քրեական օրենսգրքի 119-րդ հոդվածի 1-ին մասով նախատեսված հանցանքը դասվում է ոչ մեծ ծանրության, իսկ մեղադրանքի մյուս դրվագի` ՀՀ քրեական օրենսգրքի 34-185-րդ հոդվածի 3-րդ մասի 1-ին կետով նախատեսված հանցանքը դասվում է ծանր հանցագործությունների շարքին։ Նշված երկու հոդվածներով պատիժ նշանակելիս դատարանը ղեկավարվում է ՀՀ քրեական օրենսգրքի 66-րդ հոդվածի 1-ին և 4-րդ մասերի դրույթներով` վերջնական պատիժը նշանակվում է պատիժների լրիվ կամ մասնակիորեն գումարելու միջոցով։
Դատարանը հաշվի է առնում նաև ՀՀ քրեական օրենսգրքի 65-րդ հոդվածի պահանջը` չավարտված հանցագործության համար պատիժ նշանակելու վերաբերյալ այն մասին, որ հանցափորձի համար ազատազրկման ձևով պատժի ժամկետը չի կարող գերազանցել հոդվածի մասի սանկցիայով ազատազրկման ձևով նախատեսված պատժի առավելագույն ժամկետի երեք քառորդը։
Ազատազրկման ձևով նշանակված պատժի ժամկետը հաշվարկելիս անհրաժեշտ է պատժի սկիզբ համարել 27.12.2010թ., այն է` ՀՀ վերաքննիչ քրեական դատարանի կայացրած որոշումից հետո ամբաստանյալ Հայկազ Թությանին կալանավորելու օրը, միաժամանակ ՀՀ քրեական օրենսգրքի 69-րդ հոդվածի կարգով նշանակված պատժին հաշվակցելով 2010 թվականի հոկտեմբերի 22-ից մինչև դեկտեմբերի 22-ն ընկած ժամանակահատվածում անազատության մեջ գտնվելու ընդամենը 62 օրը։
Դատարանը գտնում է, որ որ տուժողի քաղհայցը պետք է բավարարել և ամբաստանյալ Հայկազ Թությանից հօգուտ տուժող Կլարա Ասատրյանի բռնագանձել 1.500 ՀՀ դրամ, որպես հանցագործության հետևանքով պատճառված գույքային վնաս։
Դատավճիռն օրինական ուժի մեջ մտնելուց հետո իրեղեն ապացույց ճանաչված 1լ և 2լ տարողության պոլիմերային շշերը և կիսաայրված շորի կտորները ենթակա են ոչնչացման։
Մինչև դատավճռի օրինական ուժի մեջ մտնելը ամբաստանյալ Հայկազ Սարգսի Թությանի նկատմամբ որպես խափանման միջոց ընտրված կալանավորումն անհրաժեշտ է թողնել անփոփոխ։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 44, 357-358, 360, 365, 366, 368-372, 376, 3761, 379-րդ հոդվածներով և ՀՀ դատական օրենսգրքի 20-րդ հոդվածով, դատարանը.

Վ Ճ Ռ Ե Ց

Ամբաստանյալ Հայկազ Սարգսի Թությանին մեղավոր ճանաչել ՀՀ քրեական օրենսգրքի 34-185-րդ հոդվածի 3-րդ մասի 1-ին կետով և 119-րդ հոդվածի 1-ին մասով նախատեսված հանցանքների կատարման մեջ և նշված հոդվածների սանկցիայով նրա նկատմամբ քրեական պատիժ կիրառել։
ՀՀ քրեական օրենսգրքի 34-185-րդ հոդվածի 3-րդ մասի 1-ին կետով նախատեսված հանցանքի կատարման համար կիրառել քրեական պատիժ` նշանակելով ազատազրկում 4 /չորս/ տարի 6 /վեց/ ամիս ժամկետով,
ՀՀ քրեական օրենսգրքի 119-րդ հոդվածի 1-ին մասով նախատեսված հանցանքի կատարման համար կիրառել քրեական պատիժ նշանակելով ազատազրկում 1 /մեկ/ տարի 6 /վեց/ ամիս ժամկետով։
ՀՀ քրեական օրենսգրքի 66-րդ հոդվածի 1-ին և 4-րդ մասերի հիմքով` պատիժները լրիվ կամ մասնակիորեն գումարելու միջոցով ՀՀ քրեական օրենսգրքի 34-185-րդ հոդվածի 3-րդ մասի 1-ին կետով նախատեսված հանցանքի կատարման համար նշանակված 4 /չորս/ տարի 6 /վեց/ ամիս ազատազրկման ժամկետին մասնակիորեն գումարել ՀՀ քրեական օրենսգրքի 119-րդ հոդվածի 1-ին մասով նախատեսված հանցանքի կատարման համար նշանակված 1 /մեկ/ տարի 6 /վեց/ ամիս ազատազրկման ժամկետից 6 /վեց/ ամիս ժամկետով ազատազրկումը և վերջնական պատիժ նշանակել ազատազրկում 5 /հինգ/ տարի ժամկետով։
ՀՀ քրեական օրենսգրքի 69-րդ հոդվածի հիմքով նշանակված պատժին հաշվակցել 2010 թվականի հոկտեմբերի 22-ից մինչև դեկտեմբերի 22-ն ընկած ժամանակահատվածում ընդամենը 62-օր անազատության մեջ գտնվելու ժամկետը և վերջնական պատիժ նշանակել ազատազրկում 4 /չորս/ տարի 9 /ինը/ ամիս 28 /քսանութ/ օր ժամկետով։
Պատժի սկիզբը հաշվել 2010 թվականի դեկտեմբերի 27-ից։
Ամբաստանյալ Հայկազ Թությանը պատիժը պետք է կրի ՀՀ ԱՆ ՔԿՎ համապատասխան ՔԿ հիմնարկում։
Տուժող Կլարա Ասատրյանի քաղհայցը բավարարել և ամբաստանյալ Հայկազ Թությանից հօգուտ տուժողի բռնագանձել 1.500 ՀՀ դրամ, որպես հանցագործության հետևանքով պատճառված գույքային վնասի փոխհատուցման գումար։
Դատավճիռն օրինական ուժի մեջ մտնելուց հետո իրեղեն ապացույց ճանաչված 1լ և 2լ տարողության պոլիմերային շշերը և կիսաայրված շորի կտորները ոչնչացնել։
Մինչև դատավճռի օրինական ուժի մեջ մտնելը ամբաստանյալ Հայկազ Սարգսի Թությանի նկատմամբ որպես խափանման միջոց ընտրված կալանավորումը թողնել անփոփոխ։
Դատավարության մասնակիցների կողմից դատավճիռը կարող է վերաքննության կարգով բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում։

ԴԱՏԱՎՈՐ Վ. Թ. ԳՐԻԳՈՐՅԱՆ