ԵԷԴ/0166/01/10

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ` Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ` Լ. ՄԻՐԶՈՅԱՆ

Մասնակցությամբ`

ՄԵՂԱԴՐՈՂ` Պ. ԳՅՈւԼՈւՄՅԱՆ
ՏՈւԺՈՂ` Ս. ԿԱՐԱՊԵՏՅԱՆ

2011թ. հունվարի 21-ին դատարանում
Դռնբաց դատական նիստում քննեց քրեական գործն ըստ մեղադրանքի` Տիգրան Էդիկի Պետրոսյանի, ծնված 18.01.1970թ., ք.Երևան, ազգությամբ հայ, ՀՀ քաղաքացի, 8-ամյա կրթությամբ, ամուսնացած, չի աշխատել, նախկինում մեկ անգամ դատված` Վայոց Ձորի մարզի առաջին ատյանի դատարանի 08.04.1999թ. դատավճռով 07.03.1961թ. ՀՀ քր. օր-ի 213 հոդվածի 3-րդ, 89 հոդվածի 2-րդ, 88 հոդվածի 2-րդ մասերով, 15-99 հոդվածի 1-ին և 7-րդ կետերով, 37 հոդվածի կիրառմամբ դատապարտվել է ազատազրկման` 11 տարի ժամկետով` անձնական ողջ գույքի բռնագրավմամբ։ Վայոց Ձորի մարզի առաջին ատյանի դատարանի 15.09.2003թ. որոշմամբ 07.03.1961թ. ՀՀ քր. օր-ի 213 հոդվածի 3-րդ, 89 հոդվածի 2-րդ, 88 հոդվածի 2-րդ մասերով, 15-99 հոդվածի 1-ին և 7-րդ կետերով արարքները համապատասխանեցվել է 18.04.2003թ. ՀՀ քր. օր-ի 178 հոդվածի 2-րդ մասին, 175 հոդվածի 2-րդ մասին, 325 հոդվածի 2-րդ մասին, 34-104 հոդվածի 2-րդ մասի 8-րդ կետին և 66 հոդվածի կիրառմամբ վերջնական պատիժ է սահմանվել ազատազրկում` 10 տարի ժամկետով, հաշվառված է ք.Երևան Բուռնազյան 143 տանը, փաստացի բնակվել է ք.Երևան Ա. Խաչատրյան 11 շենք, թիվ 1 բնակարանում։
Մեղադրվում է ՀՀ քր. օր-ի 179 հոդվածի 2-րդ մասի 4-րդ կետով։
Սույն գործով կալանքի տակ է 05.11.2010թ.։
Դատաքննությամբ և գործի տվյալներով պարզվեց հետևյալը.
Ամբաստանյալ Տիգրան Էդիկի Պետրոսյանը 2010թ. հոկտեմբերի կեսերից մինչև հոկտեմբերի 28-ն ընկած ժամանակահատվածում իր վարձակալած` Երևան քաղաքի Սարի թաղ 10-րդ շարքի, 29 տանից հափշտակել է տանտեր Սիրուշ Կարապետյանի կողմից իրեն վստահված զգալի չափի` 134.040 ՀՀ դրամ ընդհանուր արժողության` «Սամսունգ» տեսակի հեռուստացույցն իր 15.000 ՀՀ դրամ արժողության «Հորիզոնտ» տեսակի հեռակառավարման վահանակով, 10.000 ՀՀ դրամ արժողության 2 հատ գորգերը, 500 ՀՀ դրամ արժողության 1 հատ մրգամանը, 8.000 ՀՀ դրամ արժողության 4 հատ աղանդների տարողությունները, 1.500 ՀՀ դրամ արժողության 1 հատ ծաղկամանը, 1.500 ՀՀ դրամ արժողության 2 հատ աղանդների տարողությունները, 3.000 ՀՀ դրամ արժաղության 2 հատ աղանդների տարողությունները, 1.000 ՀՀ դրամ արժողության 1 հատ աղանդների տարողությունները, 4.000 ՀՀ դրամ արժաղության 24 հատ ափսեները, 3.000 ՀՀ դրամ արժողության 3 հատ ափսեների կոմպլեկտը, 8.000 ՀՀ դրամ արժողության 2 հատ թեյնիկները, 5.000 ՀՀ դրամ արժողության 36 հատ հյութի բաժակները, 800 ՀՀ դրամ արժողության 6 հատ թեյի բաժակները, 300 ՀՀ դրամ արժողության 4 հատ սուրճի բաժակներն իրենց 6 հատ տակդիր ափսեներով, 35 ՀՀ դրամ արժողության 7 հատ օղու բաժակները, 300 ՀՀ դրամ արժողության 1 հատ սափորը, 50 ՀՀ դրամ արժողության 2 հատ աղամանները, 200 ՀՀ դրամ արժողության 2 հատ ձիթապտղի համար նախատեսված տարաները, 200 ՀՀ դրամ արժողության 1 հատ տարան, 400 ՀՀ դրամ արժողության 1 հատ խոհանոցային շերեփը, 50 ՀՀ դրամ արժողության 1 հատ ճաշի գդալը, 450 ՀՀ դրամ արժողության 5 հատ պատառաքաղերը, 180 ՀՀ դրամ արժողության 6 հատ թեյի գդալները, 60 ՀՀ դրամ արժողության 2 հատ դանակները, 1.000 ՀՀ դրամ արժողության 1 հատ աղանդների տարողությունը, 3.000 ՀՀ դրամ արժողության 4 հատ սփռոցները, 400 ՀՀ դրամ արժողության 2 հատ վարագույրները, 10.000 ՀՀ դրամ արժողության 1 հատ վարագույրը, 2.000 ՀՀ դրամ արժողության 1 հատ անկողնային կոմպլեկտը` 1 հատ բարձի երես, 2 հատ սավան և 1 հատ վերմակասավան, 15.000 ՀՀ դրամ արժողության «Մինսկ» տեսակի սառնարանը, 15.000 ՀՀ դրամ արժողության ռուսական արտադրության գազօջախը և 30.000 ՀՀ դրամ արժողության 2 բյուրեղապակյա ջահերը։
Վերը նշված հանցավոր արարքի կատարման համար Տիգրան Էդիկի Պետրոսյանին մեղադրանք է առաջադրվել ՀՀ քր. օր-ի 179 հոդվածի 2-րդ մասի 4-րդ կետով։
Դատաքննությամբ առաջադրված մեղադրանքում ամբաստանյալ Տիգրան Պետրոսյանը իրեն լիովին մեղավոր ճանաչեց և ցուցմունք տվեց այն մասին, որ 2010թ. սեպտեմբերի 1-ից մինչև հոկտեմբերի 28-ն ընկած ժամանակահատվածում վարձակալաական հիմունքներով բնակվել է Սիրուշ Կարապետյանին պատկանող Երևան քաղաքի Սարի թաղ 10-րդ շարքի, թիվ 29 տանը։ Վերջինս իրեն թույլատրել է տիրություն անել տանը, վերանորոգել այն և օգտվել տանը գտնվող գույքից։
2010թ. հոկտեմբերի կեսերին Սասունցի Դավթի կայարանամերձ հրապարակում հանդիպել է իրեն անծանոթ երկու անձանց, որոնք ցանկություն են հայտնել 10.000 ՀՀ դրամ գումարով գնել սովետական արտադրության գազօջախը և սառնարանը։ Նշված ապրանքները «Մոսկվիչ» մակնիշի ավտոմեքենայի մեջ բեռնելու ընթացքում, նկատել է այդ ժամանակ տանը գտնվող Սիրուշ Կարապետյանի դուստրը` Ռուզան Կարապետյանը, որին ինքը հավաստիացրել է, որ դրանք ուղարկում է վերանորոգելու։
2010թ. հոկտեմբերի 28-ի, առավոտյան ժամը 0500-ի սահմաններում տաքսի ծառայության պատահական ավտոմեքենայով Սիրուշ Կարապետյանի տանից իր նոր վարձակալած` Երևան քաղաքի Ա. Խաչատրյան 11 շենքի, թիվ 1 բնակարան է տեղափոխել «Սամսունգ» տեսակի հեռուստացույցը, 2 հատ գորգերը, 1 հատ մրգամանը, աղանդների տարողությունները, 1 հատ ծաղկամանը, ափսեներ, թեյնիկներ, բաժակներ, գդալներ, պատառաքաղեր, սփռոցներ, վարագույրներ և այլ կենցաղային նշանակության իրեր։ Հաջորդ օրը իրեն է զանգահարել Սիրուշ Կարապետյանը և հետաքրքրվել է, թե ուր են իր տան ապրանքները, ինքը պատասխանել է, որ մեկնում է ՌԴ և անմիջապես անջատել է հեռախոսը։
Բացի ամբաստանյալի խոստովանական ցուցմունքներից, նրա կատարած արարքը հիմնավորվեց գործով ձեռք բերված հետևյալ ապացույցներով.
Տուժող` Սիրուշ Կարապետյանի ցուցմունքով այն մասին, որ 2010թ. օգոստոսի վերջերին իրեն պատկանող` Երևան քաղաքի Սարի թաղ 10 շարքի, 29 հասցեի տունը վարձակալությամբ տվել է Տիգրան Պետրոսյանին և վերջինիս թույլատրել է օգտվել նրանում գտնվող գույքից։
2010թ. հոկտեմբերի վերջերին իր դուստր` Ռուզանը, հայտնել է, որ տանն է գտնվել այն ժամանակ, երբ Տիգրանը «Մոսկվիչ» մակնիշի ավտոմեքենայի մեջ է բեռնել իրենց տան սովետական արտադրության սառնարանը և գազօջախը։ Վերջինս Ռուզանին հավաստիացրել է, որ դրանք գտնվում են անսարք վիճակում, ուստի ուղարկում է վերանորոգման։
2010թ. հոկտեմբերի 28-ին, ժամը 1000-ի սահմաններում դստեր` Ռուզանի հետ միասին եկել են իրենց տուն և հայտնաբերել են, որ տան ապրանքների մի մասը բացակայում են։ Հասկացել են, որ Տիգրանն է դրանք հափշտակել։ Անմիջապես զանգահարել է Տիգրանին, սակայն վերջինս մեկ ասել է, որ գտնվում է Եղեգնաձոր քաղաքում, մեկ` Աբովյանում, հետո էլ պատասխանել է, որ մեկնում է ՌԴ և պահանջել է, որ իրեն այլևս չզանգահարել։
Վկա` Ռուզաննա Կարապետյանի նախաքննությամբ տրված և դատաքննությամբ հետազոտված ցուցմունքով այն մասին, որ 2010թ. օգոստոսի վերջերին մայրը` Ս. Կարապետյանը հայտնել է, որ Սարի թաղում պատահական հանդիպելով Տիգրան անունով մի անձնավորության, տեղեկացել է, որ վերջինս վարձով տուն է փնտրում, և քանի որ իրենց Սարի թաղի 10-րդ շարքի, 29 հասցեի տանը ոչ-ոք չի բնակվել, համաձայնվել է ամսեկան 30.000 ՀՀ դրամ գումարով այն հատկացնել նրան։ 2010թ. օգոստոսի 1-ից տունը հանձնել են Տիգրանին և թույլատրել են օգտագործել դրանում գտնվող իրենց գույքը։
2010թ. հոկտեմբերի 16-ին ինքն անձնական գործերով գնացել է իրենց Սարի թաղի տուն և նկատել է, որ Տիգրանը տանը գտնվող օգտագործված սառնարանը և գազօջախը բեռնում է «Մոսկվիչ» մակնիշի մի ավտոմեքենայի մեջ։ Իր հարցին, թե ինչ է անում, վերջինս պատասխանել է, որ դրանք չեն աշխատում, ուղարկում է վերանորոգման, ինչին ինքը հավատացել է։ Դրանից մի քանի օր անց, երբ մոր հետ միասին են գնացել իրենց տուն, նկատել են, որ հյուրասենյակի առաստաղի ջահը բացակայում է։ Տիգրանը իրենց ցույց տալով ջահի կտորտանքը, հավաստիացրել է, որ այն ընկել և կոտրվել է, ինքն էլ տարել է վերանորոգման։
Նշել է նաև, որ 2010թ. հոկտեմբերի 28-ին, ժամը 1000-ի սահմաններում ինքը և մայրը, հասնելով իրենց Սարի թաղի տուն, նկատել են, որ տան մուտքի դուռը գտնվում է բաց վիճակում, իսկ լույսը` վառ։ Մտնելով տուն, պարզել են, որ բացակայում է «Սամսունգ» տեսակի հեռուստացույցը, սավանները, բարձի երեսները, բաժակները, ափսեները, գդալները, պատառաքաղերը, վազաները և այլ ապրանքներ։ Այնուհետև, մայրը հանդիպել է հարևան Վարդանին և նրանից տեղեկացել է, որ նույն գիշերը մինչև ժամը 0400-ի սահմանները Տիգրանը նրանց տանն է գտնվել։ Վերջինս Վարդանին հայտնել է, որ Տիգրանն իրենց խնդրանքով գույք է տեղափոխել Նոյակերտ գյուղ։ Քանի որ իրենք նման բան չեն խնդրել, հասկացել են, որ Տիգրանը գույքը հափշտակել է։ Իսկ, երբ զանգահարել են Տիգրանի բջջայինին, վերջինս հայտնել է, որ Մոսկվա է թռչում և անջատել է հեռախոսը։
Վկա` Սպարտակ Կարապետյանի նախաքննությամբ տրված և դատաքննությամբ հետազոտված ցուցմունքով այն մասին, որ 2010թ. սեպտեմբերի 1-ին իրենց` Սարի թաղի 10-րդ շարքի, 29 տունն իր ողջ գույքով, ամսեկան 30.000 ՀՀ դրամ վարձի դիմաց հանձնել են Տիգրանին։ Երբ 2010թ. հոկտեմբերի կեսերին գնացել է իր տուն, նկատել է, որ բացակայում են հյուրասենյակի և խոհանոցի ջահերը։ Այդ մասին հետաքրքրվել է Տիգրանից։ Վերջինս ցույց տալով հյուրասենյակի հախճապակու կտորները, հայտնել է, որ այն ընկել և կոտրվել է, իսկ խոհանոցի ջահը դրա հետ միասին տարել է վերանորոգման` ավելի լավ պատրաստելու համար։ Այդ դեպքից մի քանի օր անց տուն է վերադարձել դուստրը` Ռուզանը և հայտնել է, որ Տիգրանը տանը գտնվող գազօջախն ու սառնարանը բեռնել է մի «Մոսկվիչ» մակնիշի բեռնակիր ավտոմեքենայի մեջ և իրեն հավաստիացրել է, որ դրանք չեն աշխատում, ուստի ուղարկում է վերանորոգման։
2010թ. հոկտեմբերի 28-ի կոսօրին, գնալով իր Սարի թաղի տուն, կնոջից և դստերից տեղեկացել է, որ Տիգրանը հափշտակել է իր տան գույքի մի մասը` 1 հատ հատակի և 1 հատ բազմոցի խալիները, «Սամսունգ» ֆիրմայի հեռուստացույցն իր «Հորիզոնտ» տեսակի հեռակառավարման վահանակով, 6 հատ բարձի երեսները, նույնքան սավանները, սպիտակ կտորից վարագույրը, սպասքեղեն, կոբալտե երեք վազաները, 1 հատ մեծ «Մադոնա» ափսեն, 12 հատ սուրճի և նույնքան էլ թեյի բաժակները, 6-ական փոքր, միջին և մեծ չափերի ափսեներ, 40 հատ գդալներ և նույնքան էլ պատառաքաղեր։
Վկա` Վարդան Ստեփանյանի նախաքննությամբ տրված և դատաքննությամբ հետազոտված ցուցմունքով այն մասին, որ Տիգրանին ճանաչում է 2010թ. սեպտեմբերի կեսերից որպես հարևան Ս. Կարապետյանի տանը վարձով բնակվողի։ Նրա հետ գտնվել է նորմալ հարևանական հարաբերությունների մեջ։ Տիգրանը 2010թ. հոկտեմբերի 27-ին, ժամը 1800-ի սահմաններում եկել է իրենց տուն և առաջարկել է նույն օրը, ժամը 2300-ի սահմաններում գնալ Սևան քաղաք` պարտք գումար վերցնելու։ Նշված ժամին կրկին գալով իրենց տուն, հայտնել է, որ պլանները փոխվել են` Սևան չի գնում, քանի որ տանտեր Սիրուշը իր տնից որոշ իրեր է ուզել, և որ հաջորդ օրը առավոտյան, ժամը 1000-ին պետք է դրանք տեղափոխի Արարատ։ 2010թ. հոկտեմբերի լույս 28-ի գիշերը, ժամը 0100-ի սահմաններում Տիգրանը կրկին այցելել է իրենց տուն, և միասին նստել են մինչև ժամը 0400-ի սահմանները, զրուցել և հեռուստացույց են դիտել, որից հետո Տիգրանը գնացել է։
Նույն օրը, ժամը 1000-ի սահմաններում իրենց տուն է եկել հարևան Սիրուշը և հետաքրքրվել, թե որտեղ է գտնվում Տիգրանը։ Ինքը հայտնել է, որ Տիգրանի ասելով, վերջինս պետք է տան գույքի մի մասը տեղափոխեր Արարատ։ Երբ Սիրուշի խնդրանքով ինքը զանգահարել է Տիգրանին, վերջինս պատասխանել է, որ Սևան քաղաքում է, կգա մի քանի ժամից։ Մի քանի ժամ անց կրկին իրենց տուն է եկել Սիրուշը և հայտնել է, որ Տիգրանն իր տանից գողացել է սառնարանը, հեռուստացույցը, գազօջախը, գորգը, վարագույրը և այլ իրեր։
Տիգրան Պետրոսյանի հանցանքը հիմնավորվեց նաև դատաապրանքագիտական փորձաքննության 17.11.2010թ. թիվ 873-ԱՊ եզրակացությամբ, համաձայն որի 28.10.2010թ. դրությամբ միջին շուկայական գներով «Սամսունգ» տեսակի հեռուստացույցն իր «Հորիզոնտ» տեսակի հեռակառավարման վահանակով գնահատվել է 15.000 դրամ, 2 հատ գորգերը` 10.000 դրամ, 1 մրգամանը` 500 դրամ, 4 հատ աղանդների տարողությունները` 8.000 դրամ, 1 հատ ծաղկամանը` 1.500 դրամ, 2 հատ աղանդների տարողությունները` 1.500 դրամ, 2 հատ աղանդների տարողությունները` 3.000 դրամ, 1 հատ աղանդների տարողությունը` 1.000 դրամ, 24 հատ ափսեները` 4.000 դրամ, 3 հատ ափսեների կոմպլեկտը` 3.000 դրամ, 2 հատ թեյնիկները` 800 դրամ, 36 հատ հյութի բաժակները` 5.000 դրամ, 6 հատ թեյի բաժակները` 800 դրամ, 4 հատ սուրճի բաժակներն իրենց 6 հատ տակդիր ափսեներով` 300 դրամ, 7 հատ օղու բաժակները` 35 դրամ, 1 հատ սափորը` 300 դրամ, 2 հատ աղամանները` 50 դրամ, 2 հատ ձիթապտղի համար նախատեսված տարաները` 200 դրամ, 1 հատ տարան` 200 դրամ, 1 հատ խոհանոցային շերեփը` 400 դրամ, 1 հատ ճաշի գդալը` 50 դրամ, 5 հատ պատառաքաղերը` 450 դրամ, 6 հատ թեյի գդալները` 180 դրամ, 2 հատ դանակները` 60 դրամ, 1 հատ աղանդների տարողությունը` 1.000 դրամ, 4 հատ սփռոցները` 3.000 դրամ, 2 հատ վարագույրները` 400 դրամ, 1 հատ վարագույրը` 10.000 դրամ, 1 հատ անկողնային կոմպլեկտը` մեկ հատ բարձի երես, երկու հատ սավան և մեկ հատ վերմակասավան` 2.000 դրամ։
Իրեղեն ապացույց ճանաչելու և ի պահ հանձնելու մասին 06.12.2010թ. որոշմամբ և իրեղեն ապացույցն ի պահ հանձնելու մասին 06.12.2010թ. արձանագրությամբ։
Նաև հաղորդում ընդունելու մասին արձանագրությամբ, ՀՀ ոստիկանության ինֆորմացիոն կենտրոնի կողմից տրված տեղեկանքով, Վայոց Ձորի մարզի առաջին ատյանի դատարանի 08.04.1999թ. և ՀՀ քրեական և զինվորական գործերով վերաքննիչ դատարանի 14.07.1999թ. դատավճիռների պատճեներով, ինչպես նաև գործով ձեռք բերված այլ փաստական տվյալներով։
Այսպիսով, դատարանը ապացուցված համարեց, որ Տիգրան Էդիկի Պետրոսյանը կատարել է արարք, որը նախատեսված է ՀՀ քր. օր-ի 179 հոդվածի 2-րդ մասի 4-րդ կետով, որով և պետք է ենթարկվի քրեական պատասխանատվության։
Պատիժ նշանակելիս դատարանը հաշվի է առնում արարքի հասարակական վտանգավորությունը, ամբաստանյալի ինքնությունը և գործի ողջ հանգամանքները։
Տիգրան Պետրոսյանի պատասխանատվությունը և պատիժը ծանրացնող հանգամանք է դիտվում հանցանքը կատարելու ռեցիդիվը։
Դատարանն ամբաստանյալի պատասխանատվությունը և պատիժը մեղմացնող, ինչպես նաև անձը բնութագրող հանգամանք է համարում այն, որ վերջինս երիտասարդ է, զղջացել է կատարած արարքի համար և ընդունել մեղքը։
Քննարկելով խափանման միջոցի հարցը, դատարանը գտնում է, որ ամբաստանյալ Տ. Պետրոսյանի նկատմամբ ընտրված կալանք խափանման միջոցը պետք է թողնել անփոփոխ։
Տուժող` Սիրուշ Կարապետյանը, դատարանին խնդրել է ամբաստանյալ Տիգրան Էդիկի Պետրոսյանից հօգուտ իրեն բռնագանձել 90.000 ՀՀ դրամ որպես հանցագործությամբ պատճառված վնասի հատուցում։
Նկատի ունենալով, որ տուժող Սիրուշ Կարապետյանը գործի քննության ընթացքում հայցադիմում չի ներկայացրել, իսկ հայցադիմումի բացակայության պայմաններում միայն տուժողի ցուցմունքի հիման վրա քաղաքացիական հայցի բավարարումը չի բխում ՀՀ քր. դատ. օր-ի 158 հոդվածի 3-րդ մասի պահանջներից, ուստի դատարանը գտնում է, որ տուժող Սիրուշ Կարապետյանին իրավունք պետք է վերապահել քաղաքացիական հայց հարուցել քաղաքացիական դատավարության կարգով։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված և տուժող Ս. Կարապետյանին ի պահ հանձնված «Սամսունգ» տեսակի հեռուստացույցն իր «Հորիզոնտ» տեսակի հեռակառավարման վահանակով, 2 հատ գորգերը, 1 հատ մրգամանը, 10 հատ տարբեր չափերի աղանդների տարողությունները, 1 հատ ծաղկամանը, 2 հատ անձեռոցիկի հարթակները, 24 հատ ափսեները, թվով 3 ափսեների կոմպլեկտը, 2 հատ թեյնիկները, 36 հատ հյութի տարբեր տեսակի բաժակները, 6 հատ թեյի տարբեր տեսակի բաժակները, 4 հատ սուրճի բաժակներն իրենց 6 հատ տակդիր ափսեներով, 7 հատ օղու բաժակները, 1 հատ սափորը, 2 հատ աղամանները, 2 հատ ձիթապտղի համար նախատեսված տարաները, 1 հատ տարան, 1 հատ խոհանոցային շերեփը, 9 հատ պատառաքաղերը, 1 հատ ճաշի և 6 հատ թեյի գդալները, 2 հատ դանակները, 4 հատ սփռոցները, 3 հատ տարբեր չափերի վարագույրները և 1 հատ անկողնային կոմպլեկտը` 1 հատ բարձի երես, 2 հատ սավան և 1 հատ վերմակասավան պետք է թողնել Սիրուշ Կարապետյանի տնօրինմանը։
Ղեկավարվելով ՀՀ քր. դատ. օր-ի 357-360 հոդվածներով, դատարանը.

Վ Ճ Ռ Ե Ց

Տիգրան Էդիկի Պետրոսյանին մեղավոր ճանաչել ՀՀ քր. օր-ի 179 հոդվածի 2-րդ մասի 4-րդ կետով և դատապարտել ազատազրկման` 3/երեք/ տարի ժամկետով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել 05.11.2010թ.։
Կալանք խափանման միջոցը թողնել անփոփոխ մինչև դատավճռի օրինական ուժի մեջ մտնելը։
Տուժող Սիրուշ Կարապետյանին իրավունք վերապահել քաղաքացիական հայց հարուցել քաղաքացիական դատավարության կարգով։
Գործով իրեղեն ապացույց ճանաչված և տուժող Ս. Կարապետյանին ի պահ հանձնված «Սամսունգ» տեսակի հեռուստացույցն իր «Հորիզոնտ» տեսակի հեռակառավարման վահանակով, 2 հատ գորգերը, 1 հատ մրգամանը, 10 հատ տարբեր չափերի աղանդների տարողությունները, 1 հատ ծաղկամանը, 2 հատ անձեռոցիկի հարթակները, 24 հատ ափսեները, թվով 3 ափսեների կոմպլեկտը, 2 հատ թեյնիկները, 36 հատ հյութի տարբեր տեսակի բաժակները, 6 հատ թեյի տարբեր տեսակի բաժակները, 4 հատ սուրճի բաժակներն իրենց 6 հատ տակդիր ափսեներով, 7 հատ օղու բաժակները, 1 հատ սափորը, 2 հատ աղամանները, 2 հատ ձիթապտղի համար նախատեսված տարաները, 1 հատ տարան, 1 հատ խոհանոցային շերեփը, 9 հատ պատառաքաղերը, 1 հատ ճաշի և 6 հատ թեյի գդալները, 2 հատ դանակները, 4 հատ սփռոցները, 3 հատ տարբեր չափերի վարագույրները և 1 հատ անկողնային կոմպլեկտը` 1 հատ բարձի երես, 2 հատ սավան և 1 հատ վերմակասավան դատավճիռն օրինական ուժի մեջ մտնելուց հետո թողնել Սիրուշ Կարապետյանի տնօրինմանը։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ