ԵԷԴ/0155/01/10




ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«17» հոկտեմբերի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղարներ Ռ.Ավետյան
Կ.Կարապետյան
մեղադրող Պ.Գյուլումյան
տուժող Ս.Հակոբյան
պաշտպան Ա.Ումրշատյան

դռնբաց դատական նիստում քննեց քրեական գործն ըստ մեղադրանքի`
Սուսաննա Վասակի Ավագյանի` ծնված 1951 թվականի մարտի 18-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնալուծված, չի աշխատում, նախկինում դատապարտված, հաշվառված է Արտաշատ քաղաքի Իսակովի փողոցի 99-րդ շենքի 13-րդ բնակարանում, բնակվել է Երևան քաղաքի Գյուլբենկյան փողոցի 38ա շենքի 40-րդ բնակարանում, մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2010 թվականի մայիսի 12-ին ՀՀ ոստիկանության Էրեբունու քննչական բաժնի քննիչ Հ.Դելեյանի որոշմամբ ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցագործության հատկանիշներով հարուցվել և վարույթ է ընդունվել թիվ 12118810 քրեական գործը:
2010 թվականի հունիսի 25-ին ՀՀ ոստիկանության Էրեբունու քննչական բաժնի քննիչ Հ.Դելեյանի որոշմամբ թիվ 12118810 քրեական գործով Սուսաննա Վասակի Ավագյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով:
2010 թվականի նոյեմբերի 26-ին ՀՀ ոստիկանության Էրեբունու քննչական բաժնի ավագ քննիչ Հ.Դելեյանի որոշմամբ թիվ 12118810 քրեական գործով Սուսաննա Վասակի Ավագյանին առաջադրված մեղադրանքը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով:
2010 թվականի դեկտեմբերի 8-ին Սուսաննա Վասակի Ավագյանի վերաբերյալ թիվ 12118810 քրեական գործը մեղադրական եզրակացությամբ ուղարկվել է Երևան քաղաքի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարան, որին շնորհվել է ԵԷԴ/0155/01/10 համարը:
2010 թվականի դեկտեմբերի 15-ին Երևան քաղաքի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանի դատավոր Ա.Օհանյանի որոշմամբ թիվ ԵԷԴ/0155/01/10 քրեական գործն ընդունվել է վարույթ:
2010 թվականի դեկտեմբերի 28-ին Երևան քաղաքի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանի որոշմամբ թիվ ԵԷԴ/0155/01/10 քրեական գործն ըստ ընդդատության ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան:
2011 թվականի հունվարի 12-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դատավոր Մ.Պապոյանի որոշմամբ թիվ ԵԷԴ/0155/01/10 քրեական գործն ընդունվել է վարույթ:
Սուսաննա Վասակի Ավագյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով` այն արարքի համար, որ նա, նախկինում խաբեությամբ կատարած լինելով ուրիշի գույքի առանձնապես խոշոր չափերի հափշտակություն, Սիրանուշ Հակոբյանին սեփականության իրավունքով պատկանող` Երևան քաղաքի Տիգրան Մեծի պողոտայի 36-րդ շենքի 177-րդ բնակարանին խաբեությամբ տիրանալու նպատակով գործով չպարզված հանգամանքներում և անձից ձեռք է բերել իրավունք վերապահող ակնհայտ կեղծ փաստաթուղթ` ՌԴ Սամարա քաղաքի նոտար Նատալյա Իլյինայի կողմից 2008 թվականի հուլիսի 25-ին հաստատված լիազորագիր` այն մասին, որ իբր Սիրանուշ Հակոբյանը լիազորել է Սուսաննա Ավագյանին օտարել հիշյալ բնակարանը, և այդ կերպ իրավունք է ձեռք բերել առանձնապես խոշոր չափի` 18.300.000 ՀՀ դրամ արժողության բնակարանի նկատմամբ: Սուսաննա Այվազյանը կեղծ լիազորագրի օգտատործմամբ հանդես է եկել որպես Սիրանուշ Հակոբյանի ներկայացուցիչ և վերջինի բնակարանը գրավադրելու ու տոկոսով գումար ստանալու նպատակով 2008 թվականի հոկտեմբերի 9-ին «Կենտրոն» նոտարական գրասենյակում հիշյալ բնակարանի առուվաճառքի շինծու գործարք է կնքել Արթուր Յորդանյանի հետ, սակայն իրականում նրանից որպես պարտք վերցրել է առանձնապես խոշոր չափի` 24.000.000 ՀՀ դրամ` ամսեկան 5 տոկոս տոկոսադրույքով:
2. Ապացույցների հետազոտում և գնահատում.
Դատական քննության ընթացքում ամբաստանյալ Սուսաննա Ավագյանն առաջադրված մեղադրանքում իրեն լիովին մեղավոր ճանաչեց և օգտվելով իր իրավունքից` հրաժարվեց ցուցմունք տալ:
Նախնական քննության ընթացքում Սուսաննա Ավագյանը, որպես մեղադրյալ, ցուցմունք է տվել այն մասին, որ 2008 թվականի սեպտեմբերին ինքը բնակվել է Երևան քաղաքի Տիգրան Մեծի պողոտայի 36-րդ շենքի 176-րդ բնակարանում, իսկ նույն շենքի 177-րդ բնակարանում բնակվել է Սիրանուշ Հակոբյանը: Այդ ժամանակ իր մոտ մտադրություն է առաջացել Սիրանուշի բնակարանի միջոցով գումար վաստակել, քանի որ «Գինդ» թերթում կարդացել էր, որ Երևան քաղաքում անշարժ գույքի դիմաց 5 տոկոսով գումար են տալիս: Այդ հայտարարությունը տրված է եղել Մուկուչի անվամբ: Քանի որ ինքն իր անվամբ գրանցված գույք չի ունեցել, որոշել է կեղծ փաստաթղթերի միջոցով Սիրանուշի բնակարանի նկատմամբ իրավունք ձեռք բերել: Այդ նպատակով ինքը որոշել է նոտարական վավերացմամբ կեղծ լիազորագիր ձեռք բերել, որի համար զանգահարել է Սամարա քաղաքում բնակվող Նադյաին և խնդրել, որ վերջինն իր համար լիազորագիր ձեռք բերի, համաձայն որի իբր Սիրանուշ Հակոբյանը լիազորում է իրեն օտարել նրա բնակարանը: Նադյան ասել է, որ կարող է իրեն օգնել, և 2008 թվականի սեպտեմբերին ինքնաթիռով ուղարկել է լիազորագրի մեկ օրինակ` վավերացված Սամարա քաղաքի նոտարի կողմից, իսկ լիազորագրի բնօրինակը մնացել է նոտարի մոտ: Լիազորագրի վրա առկա Սիրանուշ Հակոբյանի ստորագրությունը կատարվել է Սամարայում, սակայն չգիտի, թե ում կողմից է: Լիազորագիրը ստանալուց հետո ինքը զանգահարել է Մուկուչին, ասել, որ թղթերը պատրաստ են և կարող են կատարել գործարքը: Մուկուչն իրեն ասել է, որ Արթուր Յորդանյանն իրեն կարող է գումար տալ, սակայն դրա դիմաց ինքը պետք է բնակարանը գրավ դնի, իսկ գրավադրումը պետք է կատարվի առուվաճառքի ձևով: Այսինքն` իբր ինքը բնակարանը վաճառում Արթուրին, իսկ վերջինը դրա դիմաց իրեն տալիս է գումար` մեկ տարի ժամկետով, իսկ մեկ տարի անց, երբ ինքը վերադարձներ Արթուրի գումարը, վերջինը բնակարանը պետք է ետ վաճառեր իրեն: 2008 թվականի հոկտեմբերի 9-ին «Կենտրոն» նոտարական գրասենյակում ինքը հանդիպել է Արթուրին: Քանի որ լիազորագիրը եղել է ռուսերեն լեզվով, ինքն այն տվել է թարգմանության, որից հետո ինքը, Արթուրը և Մուկուչը նոտարի մոտ կնքել են Սիրանուշի բնակարանի առուվաճառքի պայմանագիրը: Դրանից հետո իրենք նստել են Արթուրին պատկանող «Ջիպ» տեսակի սև մեքենան, որտեղ Արթուրն իրեն տվել է 55.000 ԱՄՆ դոլարին համարժեք ՀՀ դրամ: Արթուրի ներկայությամբ ինքը Մուկուչին տվել է 2.500 ԱՄՆ դոլարին համարժեք ՀՀ դրամ` որպես միջնորդի գումար: Այդ ժամանակ Արթուրն իրեն տվել է նրա հեռախոսահամարը և ասել, որ ինքը տոկոսները պետք է վճարի անձամբ նրան և Մուկուչի հետ որևէ գործ չունի:
Տուժող Սիրանուշ Հակոբյանը դատական քննության ընթացքում ցուցմունք տվեց այն մասին, որ Երևան քաղաքի Տիգրան Մեծի պողոտայի 36-րդ շենքի 177-րդ բնակարանը սեփականության իրավունքով պատկանել է իրեն: Նույն շենքում բնակվել է նաև Սուսաննա Ավագյանը, ում հետ ունեցել է մտերիմ հարաբերություններ: 2008 թվականին (օրը կոնկրետ չի հիշում) Սուսաննան եկել է իր տուն, իրեն տվել մի դատարկ թուղթ և ասել, որպեսզի ինքն այդ թղթի վրա գրի իր անունը և ազգանունը, անձնագրի համարն ու ստորագրի: Սուսաննան ասել է, որ այդ փաստաթուղթը նրան անհրաժեշտ է այդ շենքում վարձով ապրելու հանգամանքը հաստատելու համար, որպեսզի կարողանա օգտվել պոլիկլինիկայից: Սուսաննան նաև ասել է, որ թղթի վրա ոչինչ չի գրել, քանի որ չգիտի, թե քանի անձ պետք է այն ստորագրի: Ինքը վստահել է Սուսաննային և թղթի վրա գրել նրա ասած տվյալներն ու ստորագրել: 2010 թվականի մարտի 15-ին ինքը գնացել է վճարելու իր բնակարանի գույքահարկը: Ինքը մինչ այդ դիմում է գրել, որ միայնակ է ապրում, և իրեն ազատել են գույքահարկից, սակայն այդ անգամ իր դիմումը մերժվել է, քանի որ իր բնակարանում գրանցված է եղել Յորդանյան ազգանունով մի անձ: Դրանից հետո ինքը գնացել է կադաստր, որտեղ պարզվել է, որ իր կողմից տրված լիազորագրով իր բնակարանը վաճառել են: Ինքը որևէ մեկին իր բնակարանը վաճառելու համար լիազորագիր չի տվել և չի ցանկացել վաճառել իր բնակարանը: Ինքը երբևէ Հայաստանից չի մեկնել այլ երկիր:
Վկա Լիլի Բաբայանը դատական քննության ընթացքում ցուցմունք տվեց այն մասին, որ Երևան քաղաքի Տիգրան Մեծի պողոտայի 36-րդ շենքի 175-րդ բնակարանը պատկանում է իրեն: Նույն շենքի 177-րդ բնակարանը պատկանում է Սիրանուշ Հակոբյանին, իսկ 176-րդ բնակարանում բնակվել է Սուսաննա Ավագյանը: Սիրանուշը և Սուսաննան գտնվել են մտերիմ հարաբերությունների մեջ: Իրենց շենքում ապրելու առաջին 2-3 օրերի ընթացքում Սուսաննան իրեն և վերևի հարևան Անահիտին խնդրել է ստորագրել ինչ-որ թղթի վրա` ասելով որ դա անհրաժեշտ է այդ շենքում նրա ապրելու փաստը հաստատելու համար, որպեսզի կարողանա օգտվել պոլիկլինիկայից: Ինքը և Անահիտը ստորագրել են այդ թուղթը, սակայն այդ ժամանակ Սիրանուշը ներկա չի եղել: Դրանից մեկ տարի անց ինքը Սիրանուշից իմացել է, որ նա ստորագրել է Սուսաննայի տված դատարկ թղթի վրա: Սիրանուշը երբևէ չի բացակայել տնից, պարազպես երկու անգամ 15 և 20 օրով բուժում է ստացել Երևան քաղաքի հիվադանոցներում: Սիրանուշը երբևէ բնակարանը վաճառելու կամ այլ բնակարան գնելու մտադրություն չի հայտնել:
Վկա Անահիտ Բալասանյանը դատական քննության ընթացքում ցուցմունք տվեց այն մասին, որ Երևան քաղաքի Տիգրան Մեծի պողոտայի 36-րդ շենքի 176-րդ բնակարանը պատկանում է իրեն, իսկ նույն շենքում` մեկ հարկ վերև, բնակվում է Սիրանուշ Հակոբյանը: 2007-2009 թվականներին ինքն իր բնակարանը վարձակալությամբ տրամադրել է Սուսաննա Ավագյանին: Մի անգամ Սիրանուշը զանգահարել է իրեն և հարցրել Սուսաննայի ազգանունը` ասելով, որ վերջինը յուրացրել է նրա բնակարանը: Սիրանուշն իրեն ասել է նաև, որ ստորագրել է Սուսաննայի տված մի թղթի վրա, քանի որ Սուսաննան ասել է, որ դա նրան անհրաժեշտ է պոլիկլինիկայից օգտվելու համար: Ինքը երբևէ չի լսել, որ Սիրանուշը ցանկանա վաճառել բնակարանը:
Վկա Մուկուչ Նշանյանը դատական քննության ընթացքում ցուցմուք տվեց այն մասին, որ 2008 թվականին Սուսաննա Ավագյանն իրեն ասել է, որ «Գայանե» հանրախանութի շենքում վաճառքի ենթակա բնակարան կա, և խնդրել, որպեսզի գնորդ լինելու դեպքում ինքն այդ մասին հայտնի նրան: Սուսաննան իրեն ասել է, որ այդ բնակարանը պատկանում է նրա մորաքրոջը, ով Հայաստանում չի գտնվում և ցանկանում է վաճառել այն, իսկ բնակարանը լիազորագրով վաճառելու է նա (Սուսաննան): Ինքը ճանաչել է Արթուր Յորդանյանին, ով ասել է, որ ցանկանում է գնել 70.000-80.000 ԱՄՆ դոլար արժողության բնակարան: Ինքն Արթուրին ասել է, որ Սուսաննան բնակարան է վաճառում, որից հետո 2008 թվականի ամռանը նրանց ծանոթացրել է միմյանց հետ, սակայն նրանց խոսակցությանը ներկա չի եղել: Դրանից հետո Սուսաննան և Արթուրը, առանց իրեն տեղյակ պահելու, կնքել են բնակարանի առուվճառքի պայմանագիր: Հետագայում իրեն հայտնի է դարձել, որ այդ, ինչպես նաև «Զեյթուն» թաղամասում գտնվող բնակարանները Սուսաննան վաճառել է կեղծ լիազորագրերով: Ինքը Սիրանուշ Հակոբյանին չի ճանաչել, նրա բնակարանի փաստաթղթերը և լիազորագիրը չի տեսել:
Վկա Արթուր Յորդանյանը նախնական քննության ընթացքում ցուցմուք է տվել այն մասին, որ 2008 թվականի հոկտեմբերի սկզբին ինչ-որ ընկերության բրոքեր իրեն առաջարկել է գնել Երևան քաղաքի Տիգրան Մեծի պողոտայի 36-րդ շենքի 177-րդ բնակարանը, և ինքը համաձայնել է այն գնել 24.000.000 ՀՀ դրամով: Բրոքերի միջնորդությամբ 2008 թվականի հոկտեմբերի 6-ից 8-ն ընկած ժամանակահատվածում «Կենտրոն» նոտարական գրասենյակի մոտ ինքը հանդիպել է Սուսաննա Ավագյանին և զրուցել բնակարանի առուվաճառքի շուրջ: Սուսաննան իրեն ասել է, որ հանդիսանում է այդ բնակարանի սեփականատեր Սիրանուշ Հակոբյանի քրոջ դուստրը և բնակարանը վաճառելու համար ունի վերջինի կողմից տրված լիազորագիր: Ինքն այդ ժամանակ Սուսաննային առաջարկել է գնալ և տեսնել բնակարանը, սակայն վերջինն իրեն ասել է, որ նրա մորաքույր Սիրանուշը ծանր հիվանդությամբ պառկած է, և խնդրել չանհանգստացնել: Իրենք պայմանավորվել են 2008 թվականի հոկտեմբերի 9-ին հանդիպել նույն նոտարական գրասենյակի մոտ և կնքել պայմանագիր: Նշված օրը «Կենտրոն» նոտարական գրասենյակում ինքը և Սուսաննան կնքել են պայմանագիր, և ինքը նրան առձեռն տվել է 24.000.000 ՀՀ դրամ: Նոտարական գրասենյակում ինքը տեսել է Սուսաննայի լիազորագիրը, սակայն այն չի ընթերցել: Սուսաննան միաժամանակ խնդրել է սպասել վեց ամիս, որպեսզի բնակարանը ազատեն: Վեց ամիս անց` 2009 թվականի ապրիլին, ինքը զանգահարել է Սուսաննային և հարցրել է թե երբ են ազատելու բնակարանը, իսկ Սուսաննան խնդրել է սպասել ևս երկու ամիս` պատճառաբանելով, որ Սիրանուշը գտնվում է ծանր վիճակում և նպատակահարմար չէ նրան տնից հանել: Մոտ երկու ամիս անց ինքը կրկին զանգահարել է Սուսաննային, սակայն Սուսաննան կրկին ասել է, որ մորաքույրը շատ ծանր հիվանդ է, և խնդրել ևս երկու ամիս ժամանակ: Այդ ժամանակ ինքը Սուսաննային առաջարկել է ետ վերադարձնել իր գումարը` ասելով, որ ինքը բնակարանը ետ կվաճառի նրան: Սուսաննան համաձայնել է, և իրենք պայմանավորվել են մի քանի օր անց հանդիպել նոտարական գրասենյակում: Մի քանի օր անց ինքը զանգահարել է Սուսաննային, սակայն վերջինն ասել է, որ չի կարողացել անհրաժեշտ գումարը հավաքել, և առաջարկել է գումարը տալ ավելի ուշ:
2002 թվականի մարտի 15-ին տրված անշարժ գույքի սեփականության (օգտագործման) իրավունքի գրանցման թիվ 759837 վկայականի պատճենի համաձայն` Երևան քաղաքի Տիգրան Մեծի պողոտայի 36-րդ շենքի 177-րդ բնակարանը սեփականության իրավունքով պատկանում է Սիրանուշ Խորենի Հակոբյանին:
Անշարժ գույքի առուվաճառքի 2008 թվականի հոկտեմբերի 9-ի պայմանագրի պատճենի համաձայն` Սուսաննա Վասակի Ավագյանի, որը գործել է Սիրանուշ Հակոբյանի անունից լիազորագրով (հաստատված ՌԴ Սամարա քաղաքի նոտար Նատալյա Իլյինայի կողմից) (վաճառող) և Արթուր Վաչագանի Յորդանյանի (գնորդ) միջև կնքվել է անշարժ գույքի առուվաճառքի պայմանագիր, որի առարկա է հանդիսացել Երևան քաղաքի Տիգրան Մեծի պողոտայի 36-րդ շենքի 177-րդ բնակարանը:
2008 թվականի հոկտեմբերի 13-ին տրված անշարժ գույքի սեփականության (օգտագործման) իրավունքի գրանցման թիվ 2461900 վկայականի պատճենի համաձայն` Երևան քաղաքի Տիգրան Մեծի պողոտայի 36-րդ շենքի 177-րդ բնակարանը սեփականության իրավունքով պատկանում է Արթուր Վաչագանի Յորդանյանին:
ՌԴ Սամարա քաղաքի նոտար Նատալյա Իլյինայի կողմից 2008 թվականի հուլիսի 28-ին վավերացված լիազորագրի պատճենի համաձայն` Սիրանուշ Հակոբյանը լիազորել է Սուսաննա Վասակի Ավագյանին տնօրինել և օգտագործել իրեն պատկանող` Երևան քաղաքի Տիգրան Մեծի պողոտայի 36-րդ շենքի 177-րդ բնակարանը, վաճառել իր հայեցողությամբ ընտրված գնով ու պայմաններում և կատարել քաղաքացիաիրավական այլ գործողություններ:
ՀՀ ոստիկանության քրեական հետախուզության գլխավոր վարչության պետի տեղակալի 2010 թվականի ապրիլի 26-ի թիվ 1660 գրության համաձայն` ՍԷԿՏ համակարգում Սիրանուշ Հակոբյանի կողմից ՀՀ պետական սահմանը հատելու վերաբերյալ տեղեկություններ առկա չեն:
Փորձագետի 2010 թվականի հոկտեմբերի 1-ի թիվ 10-1699 եզրակացության համաձայն` Երևան քաղաքի Տիգրան Մեծի պողոտայի 36-րդ շենքի 177-րդ բնակարանի շուկայական արժեքը 2008 թվականի հոկտեմբերի 9-ի դրությամբ կազմել է 18.300.000 ՀՀ դրամ:
Փորձագետի 2010 թվականի հոկտեմբերի 1-ի թիվ 10-1699 եզրակացությանը կից հաշիվ-ապրանքագիր հանդիսացող հանձնման-ընդունման արձանագրության համաձայն` փորձաքննության համար վճարման ենթակա գումարը կազմում է 13.740 ՀՀ դրամ:
Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանի 2010 թվականի մայիսի 26-ի դատավճռի համաձայն` Սուսաննա Վասակի Ավագյանը մեղավոր է ճանաչվել ՀՀ քրեական օրենսգրքի 178-րդ հոդվածի 3-րդ մասի 1-ին կետով և 325-րդ հոդվածի 1-ին մասով և պատիժ է նշանակվել` ՀՀ քրեական օրենսգրքի 178-րդ հոդվածի 3-րդ մասի 1-ին կետով` ազատազրկում` 5 (հինգ) տարի ժամկետով, ՀՀ քրեական օրենսգրքի 325-րդ հոդվածի 1-ին մասով` տուգանք` նվազագույն աշխատավարձի երեքհարյուրապատիկի` 300.000 ՀՀ դրամի չափով: ՀՀ քրեական օրենսգրքի 66-րդ հոդվածով սահմանված կարգով` նշանակված պատիժները լրիվ գումարելու միջոցով, Սուսաննա Վասակի Ավագյանի նկատմամբ վերջնական պատիժ է նշանակել ազատազրկում` 5 (հինգ) տարի ժամկետով և տուգանք` նվազագույն աշխատավարձի երեքհարյուրապատիկի` 300.000 ՀՀ դրամի չափով: Պատժի կրման սկիզբը հաշվվել է այն փաստացի կրելու օրվանից:
ՀՀ ԱՆ «Աբովյան» քրեակատարողական հիմարկի պետի 2011 թվականի օգոստոսի 18-ի թիվ 1830 գրության համաձայն` Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանի 2010 թվականի մայիսի 26-ի դատավճռով Սուսաննա Վասակի Ավագյանի նկատմամբ նշանակված 300.000 ՀՀ դրամ տուգանքը Կոտայքի մարզի ընդհանուր իրավասության դատարանի 2011 թվականի ապրիլի 30-ի որոշմամբ փոխարինվել է 1.500 ժամ հանրային աշխատանքներով: Նույն դատավճռով Սուսաննա Վասակի Ավագյանի նկատմամբ նշանակված պատժի` 5 (հինգ) տարի ժամկետով ազատազրկման կրման սկիզբը հաշվվում է 2011 թվականի մարտի 17-ից: Այդ օրը Սուսաննա Վասակի Ավագյանը ՀՀ ոստիկանության Արաբկիրի բաժնի կողմից տեղափոխվել է ՀՀ ԱՆ «Աբովյան» քրեակատարողական հիմնարկ:
ՀՀ ԱՆ «Աբովյան» քրեակատարողական հիմարկի պետի 2011 թվականի սեպտեմբերի 16-ի թիվ 2086 գրության համաձայն` Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանի 2010 թվականի մայիսի 26-ի դատավճռով Սուսաննա Վասակի Ավագյանը դատապարտվել է ազատազրկման` 5 (հինգ) տարի ժամկետով և տուգանքի` 300.000 ՀՀ դրամի չափով, որը փոխարինվել է 1.500 ժամ հանրային աշխատանքներով: 2011 թվականի սեպտեմբերի 16-ին Սուսաննա Վասակի Ավագյանի նկատմամբ կիրառվել է «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման 8-րդ կետի 5-րդ ենթակետը, որից հետո վերջնական պատժաչափը կազմել է 3 (երեք) տարի 9 (ինը) ամիս 17 (տասնյոթ) օր ժամկետով ազատազրկում: Պատժի կրման սկիզբը հաշվվել է 2011 թվականի մարտի 17-ից:
ՀՀ ոստիկանության ինֆորմացիոն կենտրոնի պահանջագրի համաձայն` Սուսաննա Վասակի Ավագյանը.
-1988 թվականի սեպտեմբերի 22-ին 26 կոմիսարների շրջանի ժողովրդական դատարանի դատավճռով մեղավոր է ճանաչվել Քրեական օրենսգրքի 17-186-րդ հոդվածի 1-ին մասով և պատիժ է նշանակվել ազատազրկում` 1 տարի ժամկետով: Քրեական օրենսգրքի 42-րդ հոդվածի կիրառմամբ պատժի կրումը հետաձգվել է 1 տարի ժամկետով,
-1995 թվականի դեկտեմբերի 12-ին ՀՀ Գերագույն դատարանի դատավճռով մեղավոր է ճանաչվել Քրեական օրենսգրքի 90-րդ հոդվածի 4-րդ մասով, 89-րդ հոդվածի 4-րդ մասով և Քրեական օրենսգրքի 37-րդ հոդվածով սահմանված կարգով վերջնական պատիժ է նշանակվել ազատազրկում` 7 տարի ժամկետով: 2000 թվականի օգոստոսի 22-ին պայմանական վաղաժամկետ ազատվել է պատժի մնացած մասը` 1 տարի 9 ամիս 5 օրը կրելուց,
-2010 թվականի մայիսի 26-ին Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանի դատավճռով մեղավոր է ճանաչվել ՀՀ քրեական օրենսգրքի 178-րդ հոդվածի 3-րդ մասի 1-ին կետով, 325-րդ հոդվածի 1-ին մասով և ՀՀ քրեական օրենսգրքի 66-րդ հոդվածով սահմանված կարգով վերջնական պատիժ է նշանակվել ազատազրկում` 5 տարի ժամկետով և տուգանք` 300.000 ՀՀ դրամի չափով: Կոտայքի մարզի ընդհանուր իրավասության դատարանի 2011 թվականի ապրիլի 30-ի որոշմամբ 300.000 ՀՀ դրամի չափով տուգանքը փոխարինվել է 1.500 ժամ հանրային աշխատանքներով: 2011 թվականի սեպտեմբերի 20-ին 2011 թվականի մայիսի 26-ին ընդունված համաներման ակտի կիրառմամբ ազատվել է հանրային աշխատանքների կրումից:
Բժշկական փաստաթղթերի և ՀՀ ԱՆ «Աբովյան» քրեակատարողական հիմարկի պետի գրությունների համաձայն` Սուսաննա Վասակի Ավագյանը վատառողջ է:
Գույքի վրա կալանք դնելու մասին 2010 թվականի օգոստոսի 16-ի որոշման համաձայն` կալանք է դրվել Երևան քաղաքի Տիգրան Մեծի պողոտայի 36-րդ շենքի 177-րդ բնակարանի վրա:
3. Դատարանի իրավական վերլուծությունները.
Վերոգրյալ ապացույցները վերլուծելու և համադրելու արդյունքում Դատարանը գալիս է այն եզրահանգման, որ Սուսաննա Վասակի Ավագյանը 2008 թվականի սեպտեմբերին կեղծ լիազորագիր ձեռք բերելու միջոցով, Սիրանուշ Խորենի Հակոբյանին սեփականության իրավունքով պատկանող առանձնապես խոշոր չափերի գույքի` 18.300.000 ՀՀ դրամ արժողությամբ Երևան քաղաքի Տիգրան Մեծի պողոտայի 36-րդ շենքի 177-րդ բնակարանի նկատմամբ ձեռք է բերել տնօրինման իրավունք և 2008 թվականի հոկտեմբերի 9-ին «Կենտրոն» նոտարական գրասենյակում կեղծ լիազորագրով նշված բնակարանի առուվաճառքի պայմանագիր կնքել Արթուր Յորդանյանի հետ: Այսինքն` Սուսաննա Վասակի Ավագյանը կատարել է խարդախություն, այն է` խաբեության եղանակով ուրիշի` առանձնապես խոշոր չափերով գույքի նկատմամբ ձեռք է բերել իրավունք, ինչը համապատասխանում է ՀՀ քրեական օրենսգրքի 178-րդ հոդվածի 3-րդ մասի 1-ին կետի հատկանիշներին:
Ապացուցված է Սուսաննա Վասակի Ավագյանի մեղավորությունը ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված արարքը կատարելու մեջ:
Սուսաննա Ավագյանի անձը դրականորեն բնութագրող հանգամանքներ են բարձրագույն կրթություն ունենալը, ինքնախոստովանական ցուցմունքներ տալը և կատարածի համար զղջալը:
Դատարանը գտնում է, որ Սուսաննա Ավագյանի պատասխանատվությունն ու պատիժը մեղմացնող հանգամանք պետք է դիտել նրա վատառողջ լինելը:
Դատարանը միաժամանակ արձանագրում է, որ ամբաստանյալ Սուսաննա Ավագյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Սուսաննա Ավագյանը ենթակա է քրեական պատասխանատվության և պատժի:
Դատարանը, հաշվի առնելով Սուսաննա Ավագյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքը, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Սուսաննա Ավագյանի կողմից կատարված արարքի համար ՀՀ քրեական օրենսգրքի 178-րդ հոդվածի 3-րդ մասի սանկցիայով նախատեսված է պատիժ միայն ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով: Ընդ որում` կատարված արարքի համար Սուսաննա Ավագյանի նկատմամբ չպետք է նշանակել ՀՀ քրեական օրենսգրքի 178-րդ հոդվածի 3-րդ մասի սանկցիայով նախատեսված լրացուցիչ պատիժը` գույքի բռնագրավումը:
Քանի որ Սուսաննա Ավագյանն իրեն վերագրվող արարքը կատարել է նախքան Երևան քաղաքի Ավան և Նոր Նորք վարչական շրջանների ընդհանուր իրավասության դատարանի 2010 թվականի մայիսի 26-ի դատավճռի կայացումը, ուստի կիրառելի է ՀՀ քրեական օրենսգրքի 66-րդ հոդվածի 6-րդ մասը, համաձայն որի` պատիժ նշանակվում է այդ հոդվածի կանոններով, եթե դատավճիռը կայացնելուց հետո պարզվի, որ դատապարտյալը մեղավոր է նաև մեկ այլ հանցանքի համար, որը նա կատարել է նախքան առաջին գործով դատավճիռ կայացնելը: Այս դեպքում վերջնական պատժի ժամկետին հաշվակցվում է առաջին դատավճռով նշանակված պատժի կրած մասը: Նույն հոդվածի 4-րդ մասի համաձայն` եթե հանցանքների համակցությունն ընդգրկում է ծանր կամ առանձնապես ծանր հանցանքներ, ապա վերջնական պատիժը նշանակվում է պատիժները լրիվ կամ մասնակիորեն գումարելու միջոցով: Այսինքն` Սուսաննա Ավագյանի նկատմամբ վերջնական պատիժ պետք է նշանակել սույն դատավճռով նշանակված պատիժը և Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանի 2010 թվականի մայիսի 26-ի դատավճռով նշանակված պատիժը` 5 (հինգ) տարի ժամկետով ազատազրկումը (որը «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման 8-րդ կետի 5-րդ ենթակետի կիրառմամբ կրճատվել է և կազմել 3 (երեք) տարի 9 (ինը) ամիս 17 (տասնյոթ) օր ժամկետով ազատազրկում) լրիվ կամ մասնակի գումարելու միջոցով: Դատարանը գտնում է, որ Սուսաննա Ավագյանի նկատմամբ վերջնական պատիժ նշանակելու հարցում կիրառելի է պատիժները մասնակիորեն գումարելու կանոնը, որի արդյունքում նշանակված պատիժը նա պետք է կրի: Նշանակվող վերջնական պատժի կրման սկիզբը պետք է հաշվել Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանի 2010 թվականի մայիսի 26-ի դատավճռով նշանակված պատժի կրման սկիզբից` 2011 թվականի մարտի 17-ից, որպիսի պայմաններում Երևան քաղաքի Ավան և Նոր Նորք վարչական շրջանների ընդհանուր իրավասության դատարանի 2010 թվականի մայիսի 26-ի դատավճռով նշանակված պատժի կրած մասը հաշվակցելու անհրաժեշտությունը բացակայում է:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման (այսուհետ նաև` Համաներման որոշում) 8-րդ կետի 5-րդ ենթակետի համաձայն` ՀՀ քրեական օրենսգրքի 178-րդ հոդվածի 3-րդ մասով նախատեսված հանցագործություն կատարելու համար դատապարտված անձանց պատժաչափի չկրած մասը պետք է կրճատել մեկ քառորդով:
Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը, սակայն սույն քրեական գործի նյութերում բացակայում է Համաներման որոշման 9-րդ կետում նշված այն սահմանափակումները, որոնք կարող են արգելք հանդիսանալ Սուսաննա Ավագյանի նկատմամբ Համաներման որոշման կիրառման համար:
Դատարանը, հիմք ընդունելով վերոգրյալը, գտնում է, որ Համաներման որոշման կիրառմամբ Սուսաննա Ավագյանի պատժաչափի չկարծ մասը պետք է կրճատել մեկ քառորդով:
Դատարանը գտնում է, որ Սուսաննա Ավագյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
ՀՀ քրեական դատավարության օրենսգրքի 360-րդ հոդվածի 1-ին մասի 11-րդ կետի համաձայն` դատարանը պետք է լուծի նաև գույքի վրա դրված կալանքը վերացնելու հարցը: Սույն գործով 2010 թվականի օգոստոսի 16-ին կայացվել է գույքի վրա կալանք դնելու մասին որոշում, համաձայն որի կալանք է դրվել Երևան քաղաքի Տիգրան Մեծի պողոտայի 36-րդ շենքի 177-րդ բնակարանի վրա: Դատարանը, նկատի ունենալով, որ վերացել է Երևան քաղաքի Տիգրան Մեծի պողոտայի 36-րդ շենքի 177-րդ բնակարանի վրա կալանք դնելուց բխող սահմանափակումների կիրառման անհրաժեշտությունը, գտնում է, որ դատավճիռն օրինական ուժի մեջ մտնելուց հետո` 2010 թվականի օգոստոսի 18-ի որոշմամբ այդ բնակարանի վրա դրված կալանքը պետք է վերացնել:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերը դատարանի նախաձեռնությամբ ամբաստանյալ Սուսաննա Ավագյանից ենթակա չեն բռնագանձման, քանի որ տուժողը, հնարավորություն ունենալով իր շահերը դատարանում ներկայացնել, ամբաստանյալին որևէ պահանջ չի ներկայացրել: Բռնագանձման ենթակա չեն նաև ՀՀ քրեական դատավարության օրենսգրքի 168-րդ հոդվածի 1-ին մասի 2-րդ և 4-6-րդ կետերով նախատեսված դատական ծախսերը, քանի որ 4-6-րդ կետերով նախատեսված դատական ծախսեր ընդհանրապես չկան, իսկ 2-րդ կետով նախատեսված ծախսերի վերաբերյալ տվյալները բացակայում են: Ավելին` նման պահանջ դատարանին չի ներկայացվել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 3-րդ կետով նախատեսված դատական ծախսին, ապա Դատարանը գտնում է, որ Սուսաննա Ավագյանից պետք է բռնագանձել դատաապրանքագիտական փորձաքննության համար վճարվելիք գումարը (հիմք` փորձագետի 2010 թվականի հոկտեմբերի 1-ի թիվ 10-1699 եզրակացությանը կից հաշիվ-ապրանքագիր հանդիսացող հանձնման-ընդունման արձանագրություն)` 13.740 ՀՀ դրամը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 169-րդ, 238-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Սուսաննա Վասակի Ավագյանին մեղավոր ճանաչել ՀՀ քրեական օրենսգրքի 178-րդ հոդվածի 3-րդ մասի 1-ին կետով և պատիժ նշանակել ազատազրկում` 5 (հինգ) տարի ժամկետով:
ՀՀ քրեական օրենսգրքի 66-րդ հոդվածի 6-րդ մասով սահմանված կանոններով` սույն դատավճռով նշանակված պատիժը` 5 (հինգ) ժամկետով ազատազրկումը և Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանի 2010 թվականի մայիսի 26-ի դատավճռով նշանակված պատիժը` 5 (հինգ) տարի ժամկետով ազատազրկումը (որը «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման 8-րդ կետի 5-րդ ենթակետի կիրառմամբ կրճատվել է և կազմել 3 (երեք) տարի 9 (ինը) ամիս 17 (տասնյոթ) օր ժամկետով ազատազրկում) գումարել մասնակիորեն և Սուսաննա Վասակի Ավագյանի նկատմամբ վերջնական պատիժ նշանակել ազատազրկում` 5 (հինգ) տարի 6 (վեց) ամիս ժամկետով` պատժի կրման սկիզբը հաշվելով 2011 թվականի մարտի 17-ից:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման 8-րդ կետի 5-րդ ենթակետի կիրառմամբ Սուսաննա Վասակի Ավագյանի պատժաչափի չկրած մասը կրճատել մեկ քառորդով:
Սուսաննա Վասակի Ավագյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո` 2010 թվականի օգոստոսի 18-ի որոշմամբ Երևան քաղաքի Տիգրան Մեծի պողոտայի 36-րդ շենքի 177-րդ բնակարանի վրա դրված կալանքը վերացնել:
Սուսաննա Վասակի Ավագյանից հօգուտ Հայաստանի Հանրապետության, որպես դատական ծախս, բռնագանձել 13.740 (տասներեք հազար յոթ հարյուր քառասուն) ՀՀ դրամ:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ