Գործ թիվ ԵԷԴ/0140/01/10
2011թ.

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղարությամբ Արմինե Արղամանյան
Թեհմինե Շահվերդյան
Մասնակցությամբ`
Մեղադրող Պավել Գյուլումյան
Ամբաստանյալ Սամվել Դավթյան
Ամբաստանյալի պաշտպան Մարինե Թովմասյան
Տուժող Վարդուհի Ալեքսանյան
Տուժողի ներկայացուցիչ Լուլիբերտ Չարխիֆալակյան

2011 թվականի մարտի 11-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում քննեց քրեական գործն ըստ մեղադրանքի
Սամվել Գրիշայի Դավթյանի ծնված 02.04.1980թ. Երևան քաղաքում, ազգությունը հայ, Հայաստանի Հանրապետության քաղաքացի, թերի բարձրագույն կրթությամբ, ամուսնալուծված, խնամքին մինչև 14 տարեկան մեկ երեխա` ծնված 18.05.2003թ., աշխատում է «Գրանտ Տոբակո» ՀՁ ՍՊԸ-ում որպես սննդի բաժնի պետ, չդատված, բնակվում է ք. Երևան, Նորքի 9-րդ զանգված 22 շենքի 101 բնակարանում, խափանման միջոցը` ստորագրություն չհեռանալու մասին, մեղադրվում է ՀՀ քրեական օրենսգրքի 117-րդ և 118-րդ հոդվածներով։
Առաջադրված մեղադրանքում իրեն մեղավոր չի ճանաչել։

1. Գործի դատավարական նախապատմությունը։
Ամբաստանյալ Սամվել Դավթյանը և տուժող Վարդուհի Ալեքսանյանը ամուսնացել են 2002 թվականին, համատեղ ամուսնական կյանքում ունեցել են մեկ երեխա` 18.05.2003թ. ծնված Նարեկ Դավթյանին։
2009թ, սկզբին ամբաստանյալը և տուժողը ամուսնալուծվել են, որի կապակցությամբ Երևանի Նոր-Նորքի ՔԿԱԳ բաժնի կողմից ամուսնալուծությունների ակտերի գրանցման գրքում 23.02.2009թ. կատարվել է թիվ 23 գրանցումը, տրվել է ամուսնալուծության ԱԱ 037247 վկայականը։ Սակայն մինչև 2010 թվականի սկիզբը ամբաստանյալ Սամվել Դավթյանը և տուժող Վարդուհի Ալեքսանյանը շարունակել են համատեղ տնտեսություն վարել` իրենց վարձակալած Երևանի Տիգրան Մեծ պողոտայի 71 շենքի 66 բնակարանում։
28.03.2010թ. ժամը 20.55-ին «Էրեբունի» բժշկական կենտրոնից ՀՀ ոստիկանության Էրեբունի բաժին հաղորդում է տրվել այն մասին, որ «քթոսկրի կոտրվածք առանց տեղաշարժի» ախտորոշմամբ բուժկենտրոն է տեղափոխվել Վարդուհի Ալեքսանյանը։
Վերջինս հայտարարություն է տվել այն մասին, որ նույն օրը ժամը 15.00-ի սահմաններում Երևանի Տիգրան Մեծ փողոցի 71 շենքի 117 հասցեում գտնվող գրենական պիտույքների խանութում` իր աշխատանքի վայրում, իրեն ծեծել և մարմնական վնասվածք է պատճառել նախկին ամուսինը` Սամվել Դավթյանը։
Փաստի առթիվ ոստիկանության Էրեբունու բաժնի կողմից նյութեր են նախապատրաստվել, Վարդուհի Ալեքսանյանին պատճառված մարմնական վնասվածքը դատաբժշկական փորձագետի կողմից գնահատվել է որպես կարճատև քայքայումով առողջությանը պատճառած թեթև մարմնական վնասվածք, Վարդուհի Ալեքսանյանի բողոքի առկայությամբ պայմանավորված` ՀՀ ոստիկանության ՔԳՎ Էրեբունու քննչական բաժնի 24.04.2010թ. որոշմամբ ՀՀ քրեական օրենսգրքի 117-րդ հոդվածով հարուցվել է թիվ 12116810 քրեական գործը և կատարվել է նախաքննություն։
Նախաքննության ընթացքում տուժող Վարդուհի Ալեքսանյանը ցուցմունք է տվել այն մասին, որ նշված դեպքից առաջ նույնպես` 01.01.2010թ. երեկոյան իրենց վարձակալած ` Երևանի Տիգրան Մեծի պողոտայի 71 շենքի 66-րդ բնակարանում Սամվել Դավթյանն իրեն ծեծի է ենթարկել բռունցքներով և ոտքերով։
17.09.2010թ. որոշմամբ Սամվել Գրիշայի Դավթյանը ներգրավվել է որպես մեղադրյալ։ Նրան մեղադրանք է առաջադրվել ՀՀ քրեական օրենսգրքի 117-րդ և 118-րդ հոդվածներով այն բանի համար, որ նա 2010 թվականի հունվարի 1-ի երեկոյան իրենց կողմից վարձակալած Երևան քաղաքի Տիգրան Մեծ պողոտայի 71 շենքի 66 բնակարանում կենցաղային հարցերի շուրջ վիճաբանել է նախկին կնոջ` Վարդուհի Ալեքսանյանի հետ, որի ընթացքում ծեծի է ենթարկել նրան, նա դիտավորյալ բռունցքով մի քանի անգամ հարվածել է Վ. Ալեքսանյանի դեմքին, իսկ ոտքերով հարվածել է մարմնի տարբեր մասերին։ Վ. Ալեքսանյանի նկատմամբ կատարված բռնի գործողությունները չեն առաջացրել ՀՀ քրեական օրենսգրքի 117-րդ հոդվածով նախատեսված հետևանքներ։
2010թ. մարտի 28-ին Երևան քաղաքի Տիգրան Մեծ պողոտայի 71 շենքի կիսանկուղային հարկում գտնվող գրենական պիտույքների խանութում սպասարկման սեղանի մոտ կենցաղային հարցերի շուրջ վիճաբանել է Վարդուհի Ալեքսանյանի հետ, որի ընթացքում դիտավորյալ ձեռքով հարվածել է վերջինիս դեմքին` պատճառել մարմնական վնասվածք քթի ոսկրերի փակ կոտրվածքի ձևով` Վ. Ալեքսանյանի առողջությանը պատճառելով թեթև վնաս, առողջության կարճատև քայքայումով։
Սամվել Դավթյանի նկատմամբ խափանման միջոց է ընտրվել ստորագրություն չհեռանալու մասին։
Մեղադրական եզրակացությունը հաստատվել է 25.10.2010թ.։
Քրեական գործը մեղադրական եզրակացությամբ 27.10.2010թ. ստացվել է Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանում։

2. Դատաքննությամբ ձեռք բերված ու հետազոտված ապացույցները։
Դատաքննությամբ հետազոտվել են այն բոլոր ապացույցները, որոնք թվարկված են մեղադրական եզրակացության մեջ։
Ապահովելով դատաքննության լրիվությունը, բազմակողմանիությունը և օբյեկտիվությունը և ղեկավարվելով գործի արդար քննությանը վերաբերող սահմանադրական և դատավարական նորմերի դրույթներով, հիմնվելով պատշաճ ընթացակարգի շրջանակներում դատական քննության ընթացքում գործի հանգամանքների հետազոտման արդյունքի վրա, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով, դատարանը գտնում է, որ ամբաստանյալ Սամվել Դավթյանի նկատմամբ պետք է կայացվի մեղադրական դատավճիռ և նրա նկատմամբ պետք է քրեական պատիժ կիրառվի։
Դատաքննությամբ ձեռք բերված և հետազոտված ապացույցներով դատարանը հիմնավորված է համարում հետևյալը.
Ամբաստանյալ Սամվել Դավթյանը և տուժող Վարդուհի Ալեքսանյանը ամուսնացել են 2002 թվականին, համատեղ ամուսնական կյանքի ընթացքում ունեցել են մեկ երեխա` 18.05.2003թ. ծնված Նարեկ Դավթյանին։ 2009թ. փետրվարին ամբաստանյալն ու տուժողն ամուսնալուծվել են, ամուսնալուծությունը 23.02.2009թ. գրանցվել է Երևանի Նոր-Նորք համայնքի ՔԿԱԳ բաժնում, նրանց տրվել է ամուսնալուծության վկայական։ Սակայն նրանք շարունակել են մինչև 2010 թվականի փետրվար ամիսը համատեղ տնտեսություն վարել` բնակվելով վարձակալած Երևանի Տիգրան Մեծ պողոտայի 71 շենքի 66 բնակարանում։
Նշված շենքի կիսանկուղային հարկում է գտնվում տուժող Վարդուհի Ալեքսանյանին պատկանող գրենական պիտույքների խանութը, որտեղ Վարդուհի Ալեքսանյանը որպես անհատ ձեռնարկատեր իրականացրել է ձեռնարկատիրական գործունեություն` գրենական պիտույքների և ձայներիզների, ինքնաթիռի տոմսերի առուվաճառք և ֆոտոլուսանկարչություն։
2010թ. հունվարի 1-ին, օրվա առաջին կեսին, ամբաստանյալ Սամվել Դավթյանը և տուժող Վարդուհի Ալեքսանյանն իրենց երեխայի հետ այցելել են երեխայի կնունքի քավոր Արշավիր Մամյանի բնակարան` Ամանորը շնորհավորելու կապակցությամբ, որտեղից օրվա երկրորդ կեսին վերադարձել են Երևանի Տիգրան Մեծ պողոտայի 71 շենքի 68 բնակարան` առանց երեխայի, քանի որ վերջինս մնացել է քավորի տանը։
Տուժող Վարդուհի Ալեքսանյանն առաջարկել է ամբաստանյալ Սամվել Դավթյանին` այցելել իր ծնողների տուն, քանի որ Ամանորի տոնից բացի ավանդաբար այդ օրը հարազատներով նշելու էին իր հոր` Համլետ Ալեքսանյանի ծննդյան տարելիցը։ Ամբաստանյալ Սամվել Դավթյանը նշված առաջարկությանն առարկել է, այդ առիթով ամուսինների միջև վիճաբանություն է ծագել, որի ընթացքում ամբաստանյալ Սամվել Դավթյանը ֆիզիկական բռնություն գործադրելով տուժող Վարդուհի Ալեքսանյանի նկատմամբ, ծեծի է ենթարկել նրան` ձեռքերով և ոտքերով հարվածելով տուժողի մարմնի տարբեր մասերին` պատճառելով ֆիզիկական ցավ և առաջացնելով կապտոցներ։
2010 թվականի փետրվար ամսին ամբաստանյալ Սամվել Դավթյանը դադարել է տուժողի հետ համատեղ տնտեսություն վարելուց և հեռացել է նշված բնակարանից։
2010 թվականի մարտի 28-ին ժ.1500-ի սահմաններում ամբաստանյալ Սամվել Դավթյանն այցելել է Երևանի Տիգրան Մեծ պողոտայի 71 շենքի կիսանկուղային հարկում գործող, Վարդուհի Ալեքսանյանին պատկանող խանութ և պահանջել, որպեսզի տուժող Վարդուհի Ալեքսանյանը դուրս գա խանութից` նրա հետ առանձին զրուցելու և որոշ հարցեր պարզաբանելու համար։ Սկզբում Վ. Ալեքսանյանը հրաժարվել է դուրս գալ, սակայն հետո դուրս է եկել խանութի մուտքի աստիճանների վրա` ամբաստանյալի հետ զրուցելու համար։ Այդ պահին տուժողի բջջային հեռախոսի վրա զանգ է գրանցվել, որպիսի հանգամանքից ամբաստանյալ Սամվել Դավթյանը ջղայնանալով, տուժողի ձեռքից վերցրել է բջջային հեռախոսը և գցել է գետնին, որի հետևանքով հեռախոսը ջարդվել է։ Տուժողը վերադարձել է խանութ, ամբաստանյալը խանութի սրահում հետապնդել է տուժողին։ Խանութի աշխատակիցներ, վկաներ Օֆելյա Կիրակոսյանը և Անդրանիկ Հայրապետյանը ակտիվ միջամտություն են ցուցաբերել` տուժողի նկատմամբ ամբաստանյալ Սամվել Դավթյանի ոտնձգություններն ու ֆիզիկական հնարավոր բռնությունը բացառելու համար, սակայն դա նրանց չի հաջողվել` ամբաստանյալ Սամվել Դավթյանը, հայհոյանքներ տալով, բռունցքով դիտավորյալ հարվածել է տուժող Վարդուհի Ալեքսանյանի դեմքին և տուժողին դիտավորությամբ պատճառել մարմնական վնասվածք քթոսկրերի փակ կոտրվածքի ձևով` Վ. Ալեքսանյանի առողջությանը պատճառելով թեթև վնաս` առողջության կարճատև քայքայումով։ Այնուհետև Սամվել Դավթյանը ձեռքով հարվածել է սպասարկման սեղանի մոտ գտնվող համակարգչի տեսատիպին և գլոբուսին, գցել գետնին և վնասել դրանք և բռնելով իր 7-ամյա որդու ձեռքը, հեռացել է դեպքի վայրից։ Խանութի աշխատողները առաջին օգնությունն են ցուցաբերել տուժողին` թաց թրջոցների միջոցով փորձելով կանգնեցնել քթից արնահոսությունը, այնուհետև կանչել են շտապ օգնության բրիգադ։ Որոշ ժամանակ անց տուժողի հարազատները Վարդուհի Ալեքսանյանին տեղափոխել են հիվանդանոց։
ՀՀ քրեական օրենսգրքի 117-րդ և 118-րդ հոդվածներով նախատեսված հանցանքները կատարելու համար առաջադրված մեղադրանքում դատաքննության ժամանակ ամբաստանյալ Սամվել Դավթյանն իրեն մեղավոր չի ճանաչել, թեև նախաքննության ընթացքում իրեն մեղավոր էր ճանաչել մասնակի` միայն ՀՀ քրեական օրենսգրքի 117-րդ հոդվածով առաջադրված մեղադրանքում։
Ամբաստանյալ Սամվել Դավթյանին առաջադրված մեղադրանքը դատարանը հիմնավորված է համարում հետևյալ ապացույցներով.
Տուժող Վարդուհի Ալեքսանյանի ցուցմունքներով այն մասին, որ ամբաստանյալ Սամվել Դավթյանի հետ ամուսնացել է 2002 թվականին և նրա հետ համատեղ ամուսնական կյանքում ունեցել են մեկ երեխա` 2003թ. ծնված Նարեկ Դավթյանին։ 2009թ. փետրվարին ամուսնալուծվել են, սակայն մինչև 2010թ. փետրվար ամիսը բնակվել են միասին, համատեղ տնտեսություն են վարել։
2010թ. հունվարի 01-ին ամուսիններով իրենց երեխայի հետ գնացել են քավորի տուն` Ամանորը շնորհավորելու։ Երեխան մնացել է քավորի տանը, իրենք երկուսով վերադարձել են տուն` Երևանի Տիգրան Մեծ պողոտայի 71 շենքի 66 բնակարան, որտեղ բնակվել են վարձակալական հիմունքներով։ Ինքն առաջարկել է Սամվել Դավթյանին` գնալ իր ծնողների տուն` ինչպես նրանց Ամանորը, այնպես էլ իր հոր ծննդյան տարելիցը շնորհավորելու համար, սակայն Սամվել Դավթյանի կողմից մերժում է ստացել։ Այդ կապակցությամբ իրենց միջև վիճաբանություն է սկսվել, որի ընթացքում ամբաստանյալ Սամվել Դավթյանը ծեծել է իրեն` ոտքերով և ձեռքերով /բռունցքներով/ հարվածելով իր մարմնի տարբեր մասերին, հարվածի տեղերում առաջացել են կապտուկներ, մարմնի ցավի պատճառով ինքը չի կարողացել տանից դուրս գալ, մեկ շաբաթ տևողությամբ պառկել է անկողնում, մի քանի օր բուժվել է տանը, իրեն տեսակցության են եկել իր աշխատակցուհին` Օֆելյա Կիրակոսյանը և քույրը` Տիգրանուհի Ալեքսանյանը։ Նշված միջադեպից որոշ ժամանակ անց 2010թ. փետրվարին, ամբաստանյալ Սամվել Դավթյանը հեռացել է բնակարանից և դադարել է իր հետ համատեղ տնտեսություն վարել։ Տուժողը հայտնել է նաև, որ 2010 թվականի մարտի 28-ի կեսօրին, երբ ինքը գտնվել է Երևանի Տիգրան Մեծ պողոտայի 71 շենքի կիսանկուղային հարկում գտնվող խանութում, ժ.1500-ի սահմաններում այնտեղ է եկել ամբաստանյալ Սամվել Դավթյանը և իրեն հրավիրել է խանութից դուրս` պարզաբանումներ ստանալու, թե ինչու՞ է առանց իր համաձայնության իրենց երեխային տարել իր քրոջ` Տիգրանուհի Ալեքսանյանի տուն։ Սկզբում ինքը վախեցել և հրաժարվել է զրուցել ամբաստանյալի հետ, հետո համաձայնվել և խանութից դուրս է եկել` նրա հետ աստիճանների վրա զրուցելու։ Զրույցի ընթացքում իր բջջային հեռախոսի վրա զանգ է եկել, ինքը զանգին պատասխանել է, որից վրդովված` ամբաստանյալ Սամվել Դավթյանն իր ձեռքից վերցրել է բջջային հեռախոսը և նետելով գետնին` կոտրել է այն։ Ինքը վրդովված` վերադարձել է խանութ։
Խանութում ամբաստանյալ Սամվել Դավթյանը շարունակել է վիճաբանել իր հետ` պահանջելով խանութից դուրս գալ, սակայն ինքը հրաժարվել է։ Թեև միջամտել են Օֆելյա Կիրակոսյանը և Անդրանիկ Հայրապետյանը, սակայն ամբաստանյալ Սամվել Դավթյանը դիտավորությամբ բռունցքով հարվածել է իր դեմքին` քթի շրջանում, պատճառել մարմնական վնասվածք` քթոսկրի ոսկրերի կոտրվածքի ձևով, սկզբում շտապ օգնության բրիգադն է խանութում իրեն անհետաձգելի բուժօգնություն ցույց տվել, այնուհետև հարազատներն իրեն տեղափոխել են հիվանդանոց` «Էրեբունի» բժշկական կենտրոն։
Ամբաստանյալը ձեռքով հարվածել է նաև խանութի սպասարկման սեղանի վրա դրված համակարգչի տեսատիպին և գլոբուսին և վնասել է դրանք։
Տուժողը ներկայացրել է 510.000 ՀՀ դրամի չափով քաղհայց, որպես ամբաստանյալի հանցավոր ոտնձգության արդյունքում իրեն պատճառված ֆիզիկական վնասի` քթոսկրերի փակ կոտրվածքի հետևանքների վերականգնման նպատակով անհրաժեշտ պարտադիր վիրահատական միջամտության վրա ծախսվող գումարի չափ։
Տուժողը ամբաստանյալի հետ չի հաշտվել, պահանջել է նրա նկատմամբ կիրառել քրեական պատիժ։
Տուժողը նույն ցուցմունքը պնդել է ամբաստանյալի հետ առերես հարցաքննության ժամանակ։

Գ.Թ. 26-27, 54-55, 98-100, 146-147, 200-204, 251-252,
դատաքննության արձանագրություն

Դատաբժշկական փորձաքննության 29.03.2010թ. թիվ 674 և ի լրումն 21.04.2010թ. տրված և հանձնաժողովային 10-1841 եզրակացությունների համաձայն` Վարդուհի Ալեքսանյանի 28.03.2010թ. ստացած մարմնական վնասվածքը` քթի ոսկրերի փակ կոտրվածքի ձևով, հասցվել է բութ առարկայով, հնարավոր է նշված օրը և տուժողի կողմից նշված հանգամանքներում, տուժող Վարդուհի Ալեքսանյանին պատճառվել է առողջության թեթև վնաս` առողջության կարճատև քայքայումով։
Վարդուհի Ալեքսանյանին պատճառված քթի վնասվածքը առաջացրել է քթային շնչառության միակողմանի առաջին-երկրորդ աստիճանի /աննշան չափավոր/ խանգարում ձախից։

Հատոր 1 Գ.Թ. 15-16, 20, 179-181

Վկա Օֆելյա Կիրակոսյանը ցուցմունք է տվել այն մասին, որ աշխատել է գրենական պիտույքների խանութում որպես օպերատոր, ճանաչել է ամուսիններ Սամվել Դավթյանին և Վարդուհի Ալեքսանյանին։ Սկզբում նրանք իր վրա միմյանց սիրող ամուսինների տպավորություն են թողել, սակայն 2009թ. հոկտեմբերին Սամվել Դավթյանի կողմից իր կնոջ` Վարդուհի Ալեքսանյանի նկատմամբ կիրառված ֆիզիկական բռնության դեպքից հետո իր նշված կարծիքը փոխվել է։ Հետագայում ինքն իրազեկ է եղել նրանց փոխհարաբերությունների բազմաթիվ կոնֆլիկտային դրսևորումներից։
2010 թվականի հունվարի 1-ին ինքը զանգահարել է Վարդուհի Ալեքսանյանին` նրա Ամանորը շնորհավորելու։ Վարդուհու ձայնի մեջ ինքն զգացել է «տարօրինակ հյուծվածություն»։ Վարդուհին իրեն ասել է նաև, որ Լուսակերտ չի գնացել, ծնողներին չի այցելել, չի պատրաստվում նրանց տուն գնալ, այլ գտնվում է իր տանը։ Որոշ ժամանակ անց ինքը գնացել է Վարդուհու տուն։ Դուռը բացել է Վարդուհին, նա հազիվ է շարժվել, այնուհետև նա գնացել և պառկել է իր անկողնում։ Վարդուհին իրեն պատմել է, որ ինքն առաջարկել է Սամվել Դավթյանին` այցելել իր ծնողներին, սակայն Սամվելն առարկել է իրեն և իրեն դաժանորեն ծեծի է ենթարկել։ Ինքը Վարդուհու մարմնի վրա` դեմքին, կրծքավանդակին և ոտքերի վրա տեսել է կապտուկներ, մշակել է նրա վերքերը` դեղատնից դեղորայք գնելով, կերակրել է Վարդուհուն և գնացել է նրա տանից։ Դրանից մոտ մեկ շաբաթ անց միայն Վարդուհին իջել է խանութ` աշխատելու, աչքերին մուգ ակնոցներ է կրել` կապտուկները քողարկելու նպատակով։ 2010թ. փետրվարին հարևանուհի Ելենա Մանուկյանի ահազանգով գնացել է Վարդուհու տուն, բնակարանում տեսել է անսթափ վիճակում հատակին պառկած Սամվել Դավթյանին, ով գոռգոռացել է, դատարկ դույլը շպրտել Վարդուհու վրա։ Ինքը մի կերպ Սամվելին տարել է լողասենյակ, սառը ցնցուղ պահել նրա գլխին և նրան պառկեցրել է անկողնում, վերջինս քնել է։ Դրանից բացի 2010 թվականի մարտի 28-ին ժամը 15.00-ի սահմաններում Երևանի Տիգրան Մեծի պողոտայի 71 շենքի տակ գտնվող գրենական պիտույքների խանութ է եկել ամբաստանյալ Սամվել Դավթյանը։ Խանութում վիճաբանություն է ծագել Սամվել Դավթյանի և Վարդուհի Ալեքսանյանի միջև, ինքը և լուսանկարիչ Անդրանիկ Հայրապետյանը ակտիվ միջամտություն են ցուցաբերել` կանխելու նրա կողմից Վարդուհի Ալեքսանյանին հարվածելու փորձերը, սակայն նրա ձեռքի հարվածներից մեկը կպել է իր ձեռքին։ Սամվել Դավթյանը, այնուամենայնիվ, կարողացել է ձեռքով հարվածել Վարդուհի Ալեքսանյանի դեմքին և վնասել նրա քիթը և որդու ձեռքը բռնած` հեռացել է խանութից ձեռքով հարվածելով և վնասելով համակարգչի մոնիտորն ու գլոբուսը։ Վարդուհի Ալեքսանյանի քթից արյուն է հոսել, ինքը սառը թրջոցներ է դրել` արյունահոսությունը կանխելու համար, Վարդուհու մոտ նյարդային ցնցումներ են սկսվել, հրավիրվել է շտապ օգնության բրիգադ, որն անհետաձգելի օգնություն է ցուցաբերել տուժողին։ Որոշ ժամանակ անց տուժողի հարազատների նախաձեռնությամբ Վարդուհի Ալեքսանյանը տեղափոխվել է «Էրեբունի» բժշկական կենտրոն, ինքը լսել է, որ հարվածի հետևանքով կոտրվել են Վարդուհու քթոսկրերը։
Վկան նույն ցուցմունքը պնդել է նախաքննության և դատաքննության ընթացքում ամբաստանյալ Սամվել Դավթյանին առերես։

Հատոր 1 Գ.Թ. 28-29, 56-57, 101-103, 250, 253-256,
դատաքննության արձանագրություն

Տուժողի քույրը` վկա Տիգրանուհի Ալեքսանյանը, նախաքննության և դատաքննության ժամանակ ցուցմունք է տվել և ամբաստանյալ Սամվել Դավթյանին առերես պնդել է, որ 2010թ. հունվարի 1-ին քույրը` Վարդուհի Ալեքսանյանը, չի եկել իր ծնողների տուն` Ամանորը և հոր ծնունդը շնորհավորելու համար, ինքը հասկացել է, որ քրոջ ու նրա ամուսին Սամվել Դավթյանի միջև վերստին վիճաբանություն է տեղի ունեցել։ Ինքը զանգահարել է քրոջը` Վարդուհուն, վերջինս հայտնել է, որ ինքը լրիվ կապտուկների մեջ է և այդ տեսքով չի կարող գալ։ Ինքը զանգահարել է փեսային` Սամվել Դավթյանին, վերջինս խաբել է իրեն, ասելով, թե իբր, Վարդուհին թունավորվել է, և ինքը գնում է դեղատնից դեղ գնի։ Քանի որ գիտեր, թե իրականում ի՞նչ է տեղի ունեցել, ինքը գնացել է Վարդուհու տուն և քրոջը տեսել է կապտուկների մեջ։ Վկան նշել է, որ իր քրոջ ամուսինը անուղղելի և դաժան անձնավորություն է։

Հատոր 1 Գ.Թ. 205-206, 248-249, դատաքննության արձանագրություն

Վկա, լուսանկարիչ Անդրանիկ Հայրապետյանը ցուցմունք է տվել այն մասին, որ 2010 թվականի մարտի 28-ին ինքը գտնվել է Երևանի Տիգրան Մեծի պողոտայի 71 շենքի կիսանկուղային հարկի խանութում, ֆոտոստուդիայի հատվածում, որտեղից դուրս է եկել խանութի ընդհանուր տարածք, սպասելով, որ ֆոտոմոդելը փոխի իր հագուստը։ Այդ պահին տեսել է, որ Սամվել Դավթյանը փորձել է Վարդուհի Ալեքսանյանին ձեռքով քաշել դեպի դուրս։ Ինքը միջամտել է` կանգնելով Սամվելի և Վարդուհու մեջտեղում, որպեսզի թույլ չտա, որ Սամվելը անխոհեմ քայլեր կատարի։ Սամվելը փորձել է նորից Վարդուհու թևից քաշել։ Այդ պահին Վարդուհին սկսել է բղավել, որ Սամվելն իրեն խփել է։ Խփելու պահն ինքը չի նկատել, քանի որ ինքը կանգնած է եղել նրանց մեջտեղում` դեմքով դեպի Սամվելը, և իրեն թվացել է, թե Սամվելն ուզում էր բռնել Վարդուհու թևից։ Դրանից հետո Վարդուհին, թաշկինակով փակելով քիթը, գնացել և նստել է սեղանի մոտ, իսկ Սամվելը երեխայի հետ հեռացել է։ Որոշ ժամանակ անց Վարդուհին վատացել է, սկսել է ցնցվել։ Հրավիրել են շտապ օգնություն, Վարդուհուն բուժօգնություն է ցույց տրվել։

Հատոր 1 Գ.Թ. 30-31, դատաքննության արձանագրություն

Նախաքննական մարմնի կողմից առգրավվել է գրենական պիտույքների խանութի 28.03.2010թ. անվտանգության տեսախցիկի տեսաձայնագրությունը, որը կրող տեսասկավառակը ճանաչվել է իրեղեն ապացույց, կցվել է քրեական գործին, իսկ տեսագրության այն հատվածը, որը վերաբերում է խանութում ամբաստանյալ Սամվել Դավթյանի գործողություններին, վերարտադրվել, որպես ֆոտոաղյուսակ իր մեկնաբանություններով կցվել է քրեական գործին։ Ֆոտոաղյուսակի լուսապատկերներով հիմնավորվում է վկա Անդրանիկ Հայրապետյանի ցուցմունքն այն մասին, որ ինքը միջամտել է Սամվել Դավթյանի գործողություններին, ցանկանալով կանխել նրան տուժողի նկատմամբ ոտնձգություններից, և որ ամբաստանյալը ձեռքերի շարժումներով ակտիվ գործողությունների է ցանկացել դիմել /նկար 14-22, 23, 24-32/։

Հատոր 1 Գ.Թ. 38-39, 40, 41-50

3. Դատարանի իրավական վերլուծությունը։
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Սամվել Գրիշայի Դավթյանի մեղքը ՀՀ քրեական օրենսգրքի 117-րդ և 118-րդ հոդվածներով նախատեսված հանցանքները կատարելու մեջ հիմնավորված է և նշված հոդվածների սանկցիաներով նրա նկատմամբ պետք է քրեական պատիժ կիրառվի։
ՀՀ քրեական օրենսգրքի 19-րդ հոդվածի 2-րդ մասի հիմքով` ՀՀ քրեական օրենսգրքի 117-րդ և 118-րդ հոդվածներով նախատեսված արարքները դասակարգվում են որպես ոչ մեծ ծանրության հանցագործություններ։
ՀՀ քրեական օրենսգրքի 66-րդ հոդվածի 1-ին և 2-րդ մասերի հիմքով եթե հանցանքների համակցությունն ընդգրկում է միայն ոչ մեծ ծանրության հանցանքներ, ապա վերջնական պատիժը նշանակվում է նվազ խիստ պատիժն ավելի խիստ պատժով կլանելու կամ պատիժները լրիվ կամ մասնակիորեն գումարելու միջոցով։ Ընդ որում, գումարելիս վերջնական պատիժը չի կարող գերազանցել կատարված հանցանքներից առավել ծանրի համար նախատեսված առավելագույն պատիժը։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված` պատասխանատվությունը և պատիժը մեղմացնող ու ծանրացնող հանգամանքները։ Դրանք բնութագրելով ամբաստանյալի անձնավորության ու կատարված հանցագործության հանրային վտանգավորության աստիճանը, հնարավորություն են տալիս անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ կոնկրետ դեպքերով ամբաստանյալ Սամվել Դավթյանի պատասխանատվությունը կամ պատիժը ծանրացնող հանգամանքներ առկա չեն։
Քրեական գործով Սամվել Դավթյանի նկատմամբ պատասխանատվությունը և պատիժը մեղմացնող հանգամանքներ են համարվում այն, որ ամբաստանյալը նախկինում դատապարտված չի եղել, նրա խնամքին է գտնվում մինչև 14 տարեկան` 18.05.2003թ. ծնված երեխան։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարան գտնում է, որ ամբաստանյալ Սամվել Գրիշայի Դավթյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, տվյալ գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր եզրակացության, որ ամբաստանյալի նկատմամբ որպես պատիժ անհրաժեշտ է նշանակել տուգանք պատժատեսակը, որի կատարումը ՀՀ քրեակատարողական օրենսգրքի 24-րդ հոդվածի հիմքով ապահովում է տուգանքի դատապարտված անձի բնակության վայրի ՔԿ ծառայության տարածքային մարմինը` ազատությունից զրկելու հետ չկապված պատիժների կատարման ստորաբաժանումը։
Քննության առնելով տուժող Վարդուհի Ալեքսանյանի կողմից ներկայացված քաղհայցը ամբաստանյալից հօգուտ իրեն 510.000 ՀՀ դրամ բռնագանձելու պահանջի մասին, դատարանը գտնում է, որ այն հիմնավոր է և ՀՀ քրեական դատավարության օրենսգրքի 154-155, 163-րդ հոդվածների կարգով ենթակա է հատուցման` որպես հանցագործությամբ տուժողի առողջությանը պատճառված վնասի հատուցում։
Մինչև դատավճիռն օրինական ուժի մեջ մտնելը ամբաստանյալ Սամվել Դավթյանի նկատմամբ որպես խափանման միջոց ընտրված չհեռանալու մասին ստորագրությունը անհրաժեշտ է թողնել անփոփոխ։
Որպես իրեղեն ապացույց ճանաչված DVD լազերային կրիչը անհրաժեշտ է պահել քրեական գործում։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 14, 41, 357-358, 360, 365, 369-372, 376, 3761, 379-րդ և ՀՀ դատական օրենսգրքի 20-րդ հոդվածի պահանջներով, դատարանը

Վ Ճ Ռ Ե Ց

Ամբաստանյալ Սամվել Գրիշայի Դավթյանին մեղավոր ճանաչել ՀՀ քրեական օրենսգրքի 117-րդ և 118-րդ հոդվածներով նախատեսված հանցանքները կատարելու մեջ և նշված հոդվածների սանկցիայով նրա նկատմամբ քրեական պատիժ կիրառել։
Ամբաստանյալ Սամվել Գրիշայի Դավթյանին դատապարտել ՀՀ քրեական օրենսգրքի 117-րդ հոդվածով և նրա նկատմամբ նշանակել տուգանք նվազագույն աշխատավարձի հարյուրապատիկի` 100.000 /մեկ հարյուր հազար/ ՀՀ դրամի չափով։
Ամբաստանյալ Սամվել Գրիշայի Դավթյանին դատապարտել ՀՀ քրեական օրենսգրքի 118-րդ հոդվածով և նրա նկատմամբ նշանակել տուգանք նվազագույն աշխատավարձի հիսնապատիկի` 50.000 /հիսուն հազար/ ՀՀ դրամի չափով։
ՀՀ քրեական օրենսգրքի 66-րդ հոդվածի 1-ին և 2-րդ մասերի հիմքով` նշանակված պատիժները լրիվ կամ մասնակիորեն գումարելու միջոցով ՀՀ քրեական օրենսգրքի 117-րդ հոդվածի սանկցիայով նշանակված 100.000 ՀՀ դրամ տուգանքին լրիվ գումարել ՀՀ քրեական օրենսգրքի 118-րդ հոդվածի սանկցիայով նշանակված 50.000 ՀՀ դրամ տուգանքը և վերջնական պատիժ նշանակել տուգանք պատժատեսակը 150.000 /մեկ հարյուր հիսուն հազար/ ՀՀ դրամի չափով, որի կատարումը հանձնարարել ՀՀ ԱՆ ՔԿՎ դատապարտյալի բնակության վայրի ՔԿ ծառայության տարածքային մարմնին` ազատությունից զրկելու հետ չկապված պատիժների կատարման ստորաբաժանմանը։
Մինչև դատավճռի օրինական ուժի մեջ մտնելը որպես խափանման միջոց ընտրված չհեռանալու մասին ստորագրությունը թողնել անփոփոխ։
Ամբաստանյալ Սամվել Դավթյանից հօգուտ տուժող Վարդուհի Ալեքսանյանի բռնագանձել 510.000 ՀՀ դրամ, որպես հանցագործության հետևանքով վերջինիս առողջությանը պատճառված վնասի փոխհատուցման գումար։
Իրեղեն ապացույց ճանաչված DVD լազերային կրիչը թողնել քրեական գործում։
Դատավարության մասնակիցների կողմից դատավճիռը կարող է վերաքննության կարգով բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում։

ԴԱՏԱՎՈՐ Վ. Թ. ԳՐԻԳՈՐՅԱՆ