Գործ թիվ ԵԷԴ/0119/01/10
2011թ.


Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղարությամբ Արմինե Արղամանյան
Մասնակցությամբ`
Մեղադրող Ալեքսան Մուրադյան
Ամբաստանյալ Կարեն Դավթյան
Ամբաստանյալի պաշտպան Սիրանուշ Հարությունյան
Թարգմանիչ Վարդուհի Շահինյան

2011թվականի հունվարի 17-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում քննեց քրեական գործն ըստ մեղադրանքի՝
Կարեն Գեորգիի Դավթյանի ծնված 26.08.1977թ. Թբիլիսի քաղաքում, ազգությունը հայ, Վրաստանի Հանրապետության քաղաքացի, միջնակարգ կրթությամբ, ամուրի, չի աշխատել, նախկինում դատված`
1. Թբիլիսի քաղաքի Իսանի Սամգորսկի շրջանի ժողդատարանի 12.07.2000թ. դատավճռով ՎՀ քրեական օրենսգրքի 96-րդ հոդվածի 2-րդ մասի 1-ին, 5-րդ և 6-րդ կետերով դատապարատվել է ազատազրկման 7/յոթ/ տարի ժամկետով։ Թբիլիսիի վերաքննիչ դատարանի 26.12.2000թ. որոշմամբ 96-րդ հոդվածի 2-րդ մասը վերաորակվել է ՎՀ քրեական օրենսգրքի 179-րդ հոդվածի 2-րդ մասի «ա, գ, դ» կետերով, ժամկետը թողնվել է անփոփոխ։
2. Երևանի Կենտրոն և Նորք-Մարաշ համայնքների առաջին ատյանի դատարանի 04.06.2007թ. դատավճռով ՀՀ քրեական օրենսգրքի 222-րդ հոդվածի 1-ին մասով և 215-րդ հոդվածի 2-րդ մասով, քրեական օրենսգրքի 66-րդ հոդվածի կիրառմամբ դատապարտվել է ազատազրկման 13 /տասներեք/ տարի ժամկետով։
3. Երևանի Էրեբունի և Նուբարաշեն համայնքների առաջին ատյանի 24.12.2008թ. դատավճռով ՀՀ քրեական օրենսգրքի 268-րդ հոդվածի 2-րդ մասով դատապարտվել է ազատազրկման 1 տարի ժամկետով։ ՀՀ քրեական օրենսգրքի 67-րդ հոդվածի կիրառմամբ նշանակված պատժին գումարվել է նախկինում նշանակված պատժի չկրած 10 /տասը/ տարի 1 /մեկ/ ամիս 4 /չորս/ օր ժամկետով ազատազրկումը և սահմանվել է ազատազրկում 11 /տասնմեկ/ տարի 1 /մեկ/ ամիս 4 /չորս/ օր ժամկետով։
Պատիժը կրում է ՀՀ ԱՆ ՔԿՎ «Նուբարաշեն» ՔԿ հիմնարկում, սույն քրեական գործով խափանման միջոց չի ընտրվել, մեղադրվում է ՀՀ քրեական օրենսգրքի 34-268-րդ հոդվածի 2-րդ մասի 1-ին կետով։
Առաջադրված մեղադրանքում իրեն լիովին մեղավոր է ճանաչել։

1. Գործի դատավարական նախապատմությունը.
Երևան քաղաքի Էրեբունի և Նուբարաշեն համայնքների ընդհանուր իրավասության դատարանի 24.12.2008թ. դատավճռով Կարեն Գեորգիի Դավթյանը ՀՀ քրեական օրենսգրքի 268-րդ հոդվածի 2-րդ մասով, ՀՀ քրեական օրենսգրքի 67-րդ հոդվածի կիրառմամբ, դատապարտվել է ազատազրկման 11 /տասնմեկ/ տարի 1 /մեկ/ ամիս 4 /չորս/ օր ժամկետով, պատիժը կրել է ՀՀ ԱՆ «Նուբարաշեն» ՔԿ հիմնարկում։
Պատիժը ՔԿ հիմնարկում կրելու ընթացքում առանց իրացման նպատակի` անձնական օգտագործման համար փորձել է կրկին անգամ ձեռք բերել զգալի չափերի` 0,0068 գրամ քաշով «Բուպրենորֆին» տեսակի թմրամիջոց, սակայն իր համար նախատեսված հանձնուքի զննությամբ ՔԿ հիմնարկի աշխատակիցները թմրամիջոցը հայտնաբերել են, որի պատճառով հանցագործությունն ավարտին չի հասցվել իր կամքից անկախ հանգամանքներով։ ՀՀ ԱՆ «Նուբարաշեն» ՔԿ հիմնարկում պատիժը կրելու ընթացքում 28.06.2010թ. խցում իր մոտ ապօրինի պահվող բջջային հեռախոսի 098-52-77-77 հեռախոսահամարից զանգահարել է քննությամբ չպարզված անձնավորությանը և նրանից խնդրել իր անձնական օգտագործման համար թմրամիջոց ուղարկել իրեն։ Վերջինս համաձայնվել է թմրամիջոցը իրացնել` առաքել իրեն, հրաժարվելով այն անձամբ ՀՀ ԱՆ «Նուբարաշեն» ՔԿ հիմնարկ բերելուց։
Ամբաստանյալ Կարեն Դավթյանը նույն հեռախոսահամարից հեռախոսով զանգահարել է իր ծանոթ, գործով վկա Նվարդ Խաչատրյանի բջջային 093-56-96-33 հեռախոսահամարին և Նվարդ Խաչատրյանին խնդրել է Երևանի Կասյան փողոցի մոտակայքում գտնվող «Օրանժ» գրասենյակի մոտ նույն օրը` 28.06.2010թ. ժ.15-ի սահմաններում հանդիպել քննությամբ չպարզված անձնավորությանը և նրանից ստանալ դեղորայք ու բերել ՔԿ հիմնարկ և հանձնել իր անվամբ։
Ամբաստանյալ Կարեն Դավթյանը վկա Նվարդ Խաչատրյանին հայտնել է, որ իրեն փոխանցվող դեղորայքը նախատեսված է իր ստամոքսի ցավերի դեմ օգտագործելու համար։ Ամբաստանյալ Կարեն Դավթյանը վկա Նվարդ Խաչատրյանին չի հայտնել դեղորայքում թաքցված թմրամիջոցի առկայության մասին։
Նշված օրը և ժամին պայմանավորված վայրում քննությամբ չպարզված, թմրամիջոցը իրացնող անծանոթից վկա Նվարդ Խաչատրյանը վերցրել է նրա հանձնած փաթեթը, որի մեջ դեղամիջոցներ են եղել, և գնացել է ՀՀ ԱՆ «Նուբարաշեն» ՔԿ հիմնարկ, որտեղ սահմանված կարգի համաձայն դեղորայքը ձևակերպել է որպես հանձնուք դատապարտյալ Կարեն Դավթյանի անվամբ։
Փաթեթում գտնված դեղորայքի զննությամբ ՀՀ ԱՆ «Նուբարաշեն» ՔԿ հիմնարկի աշխատակիցները «Կրեոն» տեսակի դեղահատերի դեղապատիճների /կապսուլաների/ մեջ հայտնաբերել են 4 դեղահատի և փոշեզանգվածի ձևով խնամքով թաքցված զգալի չափի` ընդամենը 0,0068 գրամ քաշով «բուպրենորֆին» տեսակի թմրամիջոցը։ Հայտնաբերվածը դատավարական կարգի պահպանմամբ զննվել, կշռվել, փաթեթավորվել, կնքվել և առգրավվել է։
Դատաքիմիական փորձաքննության 30.06.2010թ. 21251005 եզրակացության համաձայն` թվով 4 հատ սպիտակ գույնի, համապատասխանաբար 0,145 գրամ, 0,085 գրամ, 0,055 գրամ և 0,025 գրամ քաշերով, ընդամենը 0,31 գրամ քաշով դեղահատի կտորները իրենց բաղադրության մեջ պարունակում են ընդհանուր 0,0062 գրամ քաշով «Բուպրենորֆին» տեսակի թմրամիջոց, իսկ 0,03 գրամ քաշով սպիտակ գույնի փոշեզանգվածը իր բաղադրության մեջ պարունակում է 0,0006 գրամ քաշով «Բուպրենորֆին» տեսակի թմրամիջոց։
Փաստի առթիվ 06.07.2010թ. ՀՀ ոստիկանության ՔԳՎ Էրեբունու քննչական բաժնի կողմից ՀՀ քրեական օրենսգրքի 266-րդ հոդվածի 2-րդ մասի 3-րդ կետով և 34-268-րդ հոդվածի 1-ին մասով հարուցվել է թիվ 12124110 քրեական գործը և նախաքննություն է կատարվել։
17.08.2010թ. Կարեն Գեորգիի Դավթյանին մեղադրանք է առաջադրվել ՀՀ քրեական օրենսգրքի 34-268-րդ հոդվածի 2-րդ մասի 1-ին կետով, նրա նկատմամբ խափանման միջոց չի ընտրվել։ Մեղադրական եզրակացությունը հաստատվել է 08.09.2010թ., քրեական գործը 15.09.2010թ. մուտք է եղել Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարան։

2. Դատաքննությամբ ձեռք բերված ու հետազոտված ապացույցները.
Դատաքննությամբ հետազոտվել են այն բոլոր ապացույցները, որոնք թվարկված են մեղադրական եզրակացության մեջ։
Ապահովելով դատաքննության լրիվությունը, բազմակողմանիությունը և օբյեկտիվությունը և ղեկավարվելով գործի արդար քննությանը վերաբերող սահմանադրական և դատավարական նորմերի դրույթներով, հիմնվելով պատշաճ ընթացակարգի շրջանակներում դատական քննության ընթացքում գործի հանգամանքների հետազոտման արդյունքի վրա, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով, դատարանը գտնում է, որ ամբաստանյալ Կարեն Դավթյանի նկատմամբ պետք է կայացվի մեղադրական դատավճիռ և նրա նկատմամբ պետք է քրեական պատիժ կիրառվի։
Դատարանի նշված եզրահանգման համար հիմք են հանդիսացել դատաքննությամբ հետազոտված հետևյալ ապացույցները.
Ամբաստանյալ Կարեն Գեորգիի Դավթյանը ՀՀ քրեական օրենսգրքի 34-268-րդ հոդվածի 2-րդ մասի 1-ին կետով իրեն առաջադրված մեղադրանքում դատաքննության ընթացքում իրեն լիովին մեղավոր է ճանաչել, սակայն հրաժարվել է ցուցմունք տալուց։

Դատաքննության արձանագրություն

ՀՀ քրեական դատավարության օրենսգրքի 122-րդ հոդվածի հիմքով ապացույց ճանաչված այլ փաստաթղթով` ՀՀ ԱՆ «Նուբարաշեն» ՔԿ հիմնարկի հետաքննիչին 28.06.2010թ. ամբաստանյալ Կարեն Դավթյանի բացատրությամբ այն մասին, որ 28.06.2010թ. ինքը խնդրել է իր ծանոթին իր համար ուղարկել «սուբուտեքս» / մեկ այլ անվանմամբ` «բուպրենորֆին» / տեսակի թմրամիջոց, այն թաքցնել «Կրիոն» տեսակի դեղամիջոցի դեղապատիճների /կապսուլաների/ մեջ և փոխանցել իր ընկերուհուն, որպեսզի վերջինս դեղամիջոցները բերի ՔԿ հիմնարկ և իր անվամբ հանձնի որպես հանձնուք։
28.06.2010թ. ժ.1200-ի սահմաններում իր 098-52-77-77 բջջային հեռախոսահամարից զանգահարել է ընկերուհուն` Նվարդ Գարեգինի Խաչատրյանին, նրան խնդրել է գնալ Կասյան փողոց և իր ծանոթից վերցնել դեղորայքը և բերել ՔԿ հիմնարկ, հանձնել իր անվամբ։ Սկզբում ընկերուհին հրաժարվել է` որպես պատրվակ բերելով իր զբաղվածությունը, սակայն այն բանից հետո, երբ ինքը շատ է խնդրել, ասելով, որ տանջվում է, ցավեր ունի, ընկերուհին խղճացել է իրեն և համաձայնվել է։ Սակայն երբ դեղորայքը չի հասել իրեն, ինքը հասկացել է, որ ՔԿ հիմնարկի աշխատակիցները թմրամիջոցը հայտնաբերել են։ Դեղորայքի մեջ թմրամիջոց թաքցնելու փաստից Նվարդ Խաչատրյանն իրազեկ չի եղել, այլապես դրանք ՔԿ հիմնարկ չէր բերի, ինքը օգտվել է ընկերուհու դյուրահավատությունից։ Թմրամիջոցն ինքը ցանկանում էր ձեռք բերել իր անձնական օգտագործման համար։

Հատոր 1 Գ. Թ. 17-18, 98

Զննության արձանագրությամբ այն մասին, որ 28.06.2010թ. ժամը 16.30-ին ՀՀ ԱՆ «Նուբարաշեն» ՔԿ հիմնարկի աշխատակիցներ Մուշեղ Դիլանյանը, Հովհաննես Մանջիկյանը և Ստեփան Մշեցյանն ընթերակաների մասնակցությամբ հանձնուքների ընդունման սենյակում զննել են Նվարդ Խաչատրյանի կողմից ՔԿ հիմնարկում պատիժը կրող դատապարտյալ Կարեն Դավթյանի անվամբ բերված հանձնուքը` դեղամիջոցները։ Հանձնուքի մեջ գտնված «Կրեոն» տեսակի դեղահաբերից երեքում հայտնաբերվել են «B8» դաջվածքով սպիտակ գույնի դեղահատերի կտորներ, իսկ մեկում հայտնաբերվել է թափանցիկ պոլիէթիլենային թաղանթով փաթեթավորված սպիտակ փոշենման զանգված։
Նշվածը կշռվել, փաթեթավորվել, կնքվել և առգրավվել է։
Նվարդ Խաչատրյանը հայտարարել է, որ դեղորայքը դատապարտյալ Կարեն Դավթյանի խնդրանքով` նրան փոխանցելու համար, վերցրել է իրեն անծանոթ մի տղամարդուց, ինքը չգիտի, թե իրենցից ի՞նչ են ներկայացնում հայտնաբերված դեղահատի կտորները և փոշենման զանգվածը։

Հատոր 1 Գ.Թ. 5-6

Դատաքիմիական փորձաքննության 30.06.2010թ. թիվ 21251005 եզրակացության համաձայն` հանձնուքում հայտնաբերված դեղահատերում և սպիտակ գույնի փոշենման զանգվածի բաղադրության մեջ առկա է ընդամենը 0,0068 գրամ քաշով «Բուպրենորֆին» տեսակի թմրամիջոց։

Հատոր 1 Գ.Թ. 28-31

Նշված թմրամիջոցը ճանաչվել է իրեղեն ապացույց։

Հատոր 1 Գ.Թ. 99

Դատանարկոլոգիական փորձաքննությունների 06.07.2010թ. թիվ 0490 և 19.08.2010թ. թիվ 259/10 եզրակացությունների համաձայն` 29.06.2010թ. դատապարտյալ Կարեն Դավթյանից վերցված մեզի փորձանմուշում հայտնաբերվել են ափիոնիդային շարքի թմրամիջոցի` բուպրենորֆինի մետաբոլիտի հետքեր, իսկ քանի որ Կարեն Դավթյանի մոտ թմրամիջոցի գործածումը կրում է էպիզոդիկ բնույթ, ուստի նա հարկադիր բուժման կարիք չունի։

Հատոր 1 Գ.Թ. 61, 140-141

Վկա Նվարդ Խաչատրյանը ցուցմունքներ է տվել այն մասին, որ 28.06.2010թ. իր բջջային 093-56-96-33 հեռախոսահամարին զանգահարել է իր ծանոթ, ՀՀ ԱՆ «Նուբարաշեն» ՔԿ հիմնարկում պատիժը կրող դատապարտյալ Կարեն Դավթյանը՝ իր բջջային 098-52-77-77 հեռախոսահամարից և հայտնել, որ ստամոքսի ուժգին ցավեր ունի, խնդրել է Երևանի Կասյան փողոցի մոտակայքում գտնվող «Օրանժ» գրասենյակի մոտ ժամը 15.00-ին հանդիպել իր ծանոթին, նրանից վերցնել իր համար նախատեսված դեղորայքը, ապա այն բերել «Նուբարաշեն» ՔԿ հիմնարկ և հանձնել իրեն։ Նշված ժամին և վայրում մի անծանոթից ինքն ստացել է դեղորայքը, գնացել է ՀՀ ԱՆ «Նուբարաշեն» ՔԿ հիմնարկ, լրացրել Կարեն Դավթյանի անվամբ հանձնուքի փոխանցման համար սահմանված փաստաթղթերը և հանձնուքների ընդունման սենյակում հանձնել դեղորայքը։ Դեղորայքի զննության ընթացքում ՔԿ հիմնարկի աշխատակիցները հայտնաբերել են «Կրեոն» տեսակի դեղահատերի մեջ թաքցված դեղահատի սպիտակ կտորներ և փոշենման սպիտակ զանգված, հայտնելով, որ այն թմրամիջոց է։ Ինքը չի իմացել թմրամիջոցի առկայության մասին։ Ինքը հայտարարել է, որ այն Կարեն Դավթյանի խնդրանքով վերցրել է մի անծանոթից և բերել է ՔԿ հիմնարկ։ Հայտնաբերվածն իր մասնակցությամբ կշռվել, փաթեթավորվել և կնքվել է։

Հատոր 1 Գ.Թ. 36-37, 40-41, 80-81, դատաքննության արձանագրություն

Վկաներ, ՀՀ ԱՆ «Նուբարաշեն» ՔԿ հիմնարկի անվտանգության ապահովման բաժնի աշխատակիցներ Մուշեղ Դիլանյանը, Հովհաննես Մանջիկյանը և Ստեփան Մշեցյանը նույնաբովանդակ ցուցմունքներ են տվել այն մասին, որ 28.06.2010թ. ժամը 16.30-ի սահմաններում ՀՀ ԱՆ «Նուբարաշեն» ՔԿ հիմնարկի հանձնուքների ընդունման սենյակում ստուգել են ՔԿ հիմնարկի դատապարտյալ Կարեն Դավթյանի անվամբ Նվարդ Խաչատրյանի կողմից որպես հանձնուք ներկայացված դեղորայքը, որտեղ գտնված «Կրեոն» տեսակի դեղահաբերից հայտնաբերել են դեղապատիճների /կապսուլաների/ մեջ թաքցված սպիտակ գույնի «B8» դաջվածքով դեղահատեր ու սպիտակ գույնի փոշենման զանգված։ Նշվածը կշռվել է. կազմվել է արձանագրություն, հայտնաբերվածը փաթեթավորվել, կնքվել և առգրավվել է։ Հանձնուքը ներկայացրած Նվարդ Խաչատրյանը հայտարարել է, որ իր կողմից որպես հանձնուք ներկայացված դեղամիջոցներն ինքը Կարեն Դավթյանի խնդրանքով վերցրել է մի անծանոթից ու բերել է ՔԿ հիմնարկ` Կարեն Դավթյանին հանձնելու համար, չիմանալով հանձնուքում թմրամիջոցի առկայության փաստի մասին։

Հատոր 1 Գ.Թ. 100-101, 102-103,
104-105, դատաքննության արձանագրություն

«Ղ-Տելեկոմ» ՓԲԸ ստացված վերծանումներով այն մասին, որ 28.06.2010թ. ամբաստանյալ Կարեն Դավթյանին պատկանող 098-52-77-77 և վկա Նվարդ Խաչատրյանին պատկանող 093-56-96-33 բջջային հեռախոսահամարների միջև ինտենսիվ փոխադարձ հեռախոսային կապ է հաստատվել։

Հատոր 1 Գ.Թ. 65-76

3. Դատարանի իրավական վերլուծությունը.
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Կարեն Գեորգիի Դավթյանի մեղքը ՀՀ քրեական օրենսգրքի 34-268-րդ հոդվածի 2-րդ մասի 1-ին կետով նախատեսված հանցանքը կատարելու մեջ հիմնավորված է, նա պետք է ենթարկվի քրեական պատասխանատվության և նշված հոդվածի սանկցիայով նրա նկատմամբ պետք է քրեական պատիժ կիրառվի։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված` պատասխանատվությունը և պատիժը մեղմացնող ու ծանրացնող հանգամանքները։ Դրանք բնութագրելով ամբաստանյալի անձնավորության ու կատարված հանցագործության հանրային վտանգավորության աստիճանը, հնարավորություն են տալիս անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ որպես պատասխանատվությունը և պատիժը ծանրացնող հանգամանք է հանդիսանում հանցանքը կատարելու ռեցիդիվը, այն է` դիտավորությամբ հանցանք կատարելը ամբաստանյալ Կ. Դավթյանի կողմից, ով դատվածություն ունի նախկինում դիտավորությամբ կատարված հանցանքի համար, ինչպես նաև` հանցագործության մեջ նրա առանձնապես ակտիվ դերը։
Դատարանը հաշվի է առնում նաև ամբաստանյալի անձը բնութագրող այնպիսի հատկանիշներ, ինչպիսիք են ՔԿ հիմնարկում պատիժը կրելու ընթացքում ամբաստանյալ Կարեն Դավթյանի բացասական բնութագրվելը, ուղղման ճանապարհի վրա չկանգնելը, նրա բացասական ազդեցությունը մյուս դատապարտյալների նկատմամբ։
Դատարանը գտնում է նաև, որ ամբաստանյալի նկատմամբ պատասխանատվությունը և պատիժը մեղմացնող հանգամանքներ գործում առկա չեն։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալ Կարեն Գեորգիի Դավթյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, քրեական գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր եզրակացության, որ ամբաստանյալ Կարեն Դավթյանի նկատմամբ որպես քրեական պատիժ անհրաժեշտ է նշանակել ազատազրկում որոշակի ժամկետով։
Դատարանը հաշվի է առնում նաև ՀՀ քրեական օրենսգրքի 65-րդ հոդվածի պահանջը չավարտված հանցագործության համար պատիժ նշանակելու մասին, նկատի ունենալով այն հանգամանքը, որ հանցափորձի համար ազատազրկման ձևով պատժի ժամկետը չի կարող գերազանցել ՀՀ քրեական օրենսգրքի Հատուկ մասի համապատասխան հոդվածի մասով որոշակի ժամկետով ազատազրկման ձևով նախատեսված պատժի առավելագույն ժամկետի երեք քառորդը։
Դատարանը հաշվի է առնում նաև այն հանգամանքը, որ տվյալ դեպքում պետք է պատիժ նշանակվի դատավճիռների համակցությամբ, քանի որ մինչև կոնկրետ քննարկվող սույն դեպքով հանցանք կատարելը ամբաստանյալ Կարեն Դավթյանը Երևանի Էրեբունի և Նուբարաշեն համայնքների ընդհանուր իրավասության դատարանի 24.12.2008թ. օրինական ուժի մեջ մտած ԵԷԴ/0044/01/08 դատավճռով ՀՀ քրեական օրենսգրքի 268-րդ հոդվածի 2-րդ մասով ՀՀ քրեական օրենսգրքի 67-րդ հոդվածի կիրառմամբ դատապարտվել է ազատազրկման 11 /տասնմեկ/ տարի 1 /մեկ/ ամիս 4 /չորս/ օր ժամկետով, պատժի սկիզբը հաշվվել է 2008 թվականի հուլիսի 23-ը և մինչև պատիժը լրիվ կրելը նոր հանցանք է կատարել։ Սույն դատավճիռը կայացնելու օրվա դրությամբ նշանակված պատժից կրել է 2 տարի 5 ամիս 24 օր և մնացել է կրելու ազատազրկում 8 /ութ/ տարի 7 /յոթ/ ամիս 10 /տասը/ օր ժամկետով։ Դատարանը նոր դատավճռով նշանակված պատժին լրիվ կամ մասնակիորեն պետք է գումարի նախորդ դատավճռով նշանակված պատժի չկրած մասը։
Դատավճիռն օրինական ուժի մեջ մտնելուց հետո գործով իրեղեն ապացույց ճանաչված թվով 4 /չորս/ կտոր սպիտակ դեղահատերի կտորները և սպիտակ փոշու զանգվածը, որոնք իրենց բաղադրության մեջ պարունակում են ընդամենը 0,0068 գրամ քաշով «Բուպրենորֆին» տեսակի թմրամիջոց, ենթակա են ոչնչացման։ Նախաքննական մարմնի կողմից քրեական գործի հետ դատարան ուղարկված այն դեղորայքը, որն առգրավվել է 28.06.2010թ. Նվարդ Խաչատրյանից ՀՀ ԱՆ «Նուբարաշեն» ՔԿ հիմնարկի աշխատակիցների կողմից հանձնուքի զննության ժամանակ և որը կապ չունի առաջադրված մեղադրանքի հետ, դատավճիռն օրինական ուժի մեջ մտնելուց հետո անհրաժեշտ է վերադարձնել նախաքննական մարմնին՝ ի տնօրինություն։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 44, 357-358, 360, 365, 369-372, 376, 3761, 379-րդ հոդվածների և ՀՀ դատական օրենսգրքի 20-րդ հոդվածի պահանջներով, դատարանը.

Վ Ճ Ռ Ե Ց

Ամբաստանյալ Կարեն Գեորգիի Դավթյանին մեղավոր ճանաչել ՀՀ քրեական օրենսգրքի 34-268-րդ հոդվածի 2-րդ մասի 1-ին կետով նախատեսված հանցանքի կատարման մեջ և նշված հոդվածի սանկցիայով նրա նկատմամբ քրեական պատիժ կիրառել` նշանակելով ազատազրկում 2 /երկու/ տարի ժամկետով։
ՀՀ քրեական օրենսգրքի 67-րդ հոդվածի 1-ին մասի կիրառմամբ` դատավճիռների համակցությամբ, սույն դատավճռով նշանակված պատժին մասնակիորեն գումարել Երևանի Էրեբունի և Նուբարաշեն համայնքների ընդհանուր իրավասության դատարանի 24.12.2008թ. ԵԷԴ/0044/01/08 դատավճռով նշանակված պատժի չկրած մասից 8 /ութ/ տարի 6 /վեց/ ամիս ազատազրկման ժամկետը և վերջնական պատիժ նշանակել ազատազրկում 10 /տասը/ տարի 6 /վեց/ ամիս ժամկետով, որը պետք է կրի ՀՀ ԱՆ ՔԿՎ համապատասխան ՔԿ հիմնարկում։
Պատժի սկիզբը հաշվել 2011 թվականի հունվարի 17-ից։
Դատավճիռն օրինական ուժի մեջ մտնելուց հետո գործով իրեղեն ապացույց ճանաչված 4 /չորս/ կտոր սպիտակ դեղահատերը և սպիտակ գույնի փոշեզանգվածը, որոնց բաղադրությունը պարունակում է 0,0068 գրամ քաշով «Բուպրենորֆին» տեսակի թմրամիջոց, ոչնչացնել։
Քրեական գործի հետ դատարան ուղարկված մյուս դեղամիջոցները, որոնք առգրավվել են 28.06.2010թ. ՀՀ ԱՆ «Նուբարաշեն» ՔԿ հիմնարկի աշխատակիցների կողմից Նվարդ Խաչատրյանից, մեղադրանքի հետ կապ չունենալու պատճառաբանությամբ վերադարձնել նախաքննական մարմնին։
Դատավարության մասնակիցների կողմից դատավճիռը կարող է վերաքննության կարգով բողոքարկվել ՀՀ քրեական վերաքննիչ դատարան` հրապարակման պահից մեկ ամսվա ընթացքում։

ԴԱՏԱՎՈՐ Վ. Թ. ԳՐԻԳՈՐՅԱՆ