Գործ թիվ ԵԷԴ/0114/01/10
2010թ


Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղարությամբ Արմինե Արղամանյան
Մասնակցությամբ`
Մեղադրող Ալեքսան Մուրադյան
Ամբաստանյալ Սարգիս Հարությունյան
Ամբաստանյալի պաշտպան Ամալյա Ավագյան

2010 թվականի սեպտեմբերի 28-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում քննեց քրեական գործն ըստ մեղադրանքի
Սարգիս Ներսեսի Հարությունյանի ծնված 07.03.1978թ. Երևան քաղաքում,
ազգությամբ հայ, Հայաստանի Հանրապետության քաղաքացի, բարձրագույն կրթությամբ, ամուսնացած, խնամքին մինչև 14 տարեկան 2 երեխա` ծնված 18.10.2004թ. և 16.09.2009թ., չի աշխատել, հաշվառված է Բուռնազյան փող. 114 տուն, նախկինում դատված`
1. Տավուշի ժողդատարանի 15.10.1998թ. դատավճռով ՀՀ քրեական օրենսգրքի 254-րդ հոդվածի «գ» կետով դատապարտվել է ազատազրկման 3 տարի ժամկետով, 15.09.1998թ. համաներում հայտարարելու մասին որոշմամբ ազատվել է պատժի կրումից,
2. Տավուշի մարզի առաջին ատյանի դատարանի 07.04.1999թ. դատավճռով ՀՀ քրեական օրենսգրքի 86-րդ հոդվածի 2-րդ մասով, 88-րդ հոդվածի 2-րդ մասով, 106-րդ հոդվածի 1-ին մասով և 109-րդ հոդվածի 1-ին մասով, քրեական օրենսգրքի 37-րդ հոդվածի կիրառմամբ դատապարտվել է ազատազրկման 9 տարի 6 ամիս ժամկետով,
3. Շիրակի մարզի առաջին ատյանի դատարանի 23.07.2001թ. դատավճռով ՀՀ քրեական օրենսգրքի 2033-րդ հոդվածի 2-րդ մասով քրեական օրենսգրքի 38-39-րդ հոդվածների կիրառմամբ դատապարտվել է ազատազրկման 1 տարի 6 ամիս ժամկետով,
4. Մալաթիա-Սեբաստիա համայնքի առաջին ատյանի դատարանի 21.09.2005թ. դատավճռով ՀՀ քրեական օրենսգրքի 268-րդ հոդվածի 1-ին մասով` քրեական օրենսգրքի 66-րդ հոդվածի կիրառմամբ դատապարտվել է ազատազրկման 6 ամիս ժամկետով,
5. Շենգավիթ համայնքի առաջին ատյանի դատարանի 06.01.2006թ. դատավճռով ՀՀ քրեական օրենսգրքի 34-177-րդ հոդվածի 2-րդ մասի 4-րդ կետով դատապարտվել է ազատազրկման 3 տարի ժամկետով։ Դատվածությունը չմարված։
Կալանավորվել է 13.08.2009թ., մեղադրվում է ՀՀ քրեական օրենսգրքի 177-րդ հոդվածի 3-րդ մասի 1-ին, 2-րդ, 3-րդ կետերով, 34-177-րդ հոդվածի 3-րդ մասի 2-րդ, 3-րդ կետերով, 324-րդ հոդվածի 1-ին մասով, 235-րդ հոդվածի 3-րդ և 4-րդ մասերով, 268-րդ հոդվածի 2-րդ մասի 1-ին և 2-րդ կետերով և 266-րդ հոդվածի 4-րդ մասով։
Նշված քրեական գործը գտնվում է Կենտրոն և Նորք-Մարաշ վարչական շրջանների ընդհանուր իրավասության դատարանի վարույթում։
ՀՀ ԱՆ «Նուբարաշեն» ՔԿ հիմնարկի կալանավոր։
Սույն գործով մեղադրվում է ՀՀ քրեական օրենսգրքի 34-268-րդ հոդվածի 2-րդ մասի 1-ին կետով։
Առաջադրված մեղադրանքում իրեն լիովին մեղավոր է ճանաչել։

1. Գործի դատավարական նախապատմությունը
Սարգիս Ներսեսի Հարությունյանը նախկինում դատապարտվել է 5 անգամ, այդ թվում 4-րդ անգամ դատապարտվել է Մալաթիա-Սեբաստիա համայնքի առաջին ատյանի դատարանի 21.09.2005թ. դատավճռով ՀՀ քրեական օրենսգրքի 268-րդ հոդվածի 1-ին մասով` քրեական օրենսգրքի 66-րդ հոդվածի կիրառմամբ դատապարտվել է ազատազրկման 6 ամիս ժամկետով։ Դատվածությունը չի մարվել։
Կալանավորվել է 13.08.2009թ., մեղադրվում է ՀՀ քրեական օրենսգրքի 177-րդ հոդվածի 3-րդ մասի 1-ին, 2-րդ, 3-րդ կետերով, 34-177-րդ հոդվածի 3-րդ մասի 2-րդ, 3-րդ կետերով, 324-րդ հոդվածի 1-ին մասով, 235-րդ հոդվածի 3-րդ և 4-րդ մասերով, 268-րդ հոդվածի 2-րդ մասի 1-ին և 2-րդ կետերով և 266-րդ հոդվածի 4-րդ մասով։
Քրեական գործը գտնվում է Կենտրոն և Նորք-Մարաշ վարչական շրջանների ընդհանուր իրավասության դատարանի վարույթում։
ՀՀ ԱՆ «Նուբարաշեն» ՔԿ հիմնարկի կալանավոր է։
Սույն քրեական գործով մեղադրվում է ՀՀ քրեական օրենսգրքի 34-268-րդ հոդվածի 2-րդ մասի 1-ին կետով այն բանի համար, որ դատվածությունը չմարված, հանդիսանալով խրոնիկ թմրամոլ և կալանքը կրելով ՀՀ ԱՆ «Նուբարաշեն» ՔԿ հիմնարկում, 2010թ. մայիսի 18-ին, առանց իրացնելու նպատակի, իր գործածման համար, կրկին անգամ փորձել է ապօրինի ձեռք բերել զգալի չափի` 0,028 գրամ քաշով տնայնագործական եղանակով պատրաստված «Ացետիլացված ափիոն» տեսակի թմրամիջոց, որը տեղադրված է եղել մակարոնի մեջ։ Այն ՔԿ հիմնարկի դատապարտյալ Թեմուր Վալիևի կողմից Սարգիս Հարությունյանին փոխանցելու նպատակով կալանախուց տեղափոխելու ճանապարհին հայտնաբերվել է «Նուբարաշեն» ՔԿ հիմնարկի աշխատակիցների կողմից և ամբաստանյալ Սարգիս Հարությունյանի կամքից անկախ հանգամանքներով հանցագործությունն իր ավարտին չի հասցվել։
Ամբաստանյալ Սարգիս Հարությունյանին մեղադրանք է առաջադրվել 2010թ. հուլիսի 06-ին։
Մեղադրական եզրակացությունը հաստատվել է 2010թ. օգոստոսի 27-ին։
Քրեական գործը մեղադրական եզրակացությամբ 02.09.2010թ. ստացվել է Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանում։

2. Դատաքննությամբ ձեռք բերված ու հետազոտված ապացույցները։
Դատաքննությամբ հետազոտվել են մեղադրանքի հիմքում դրված այն բոլոր ապացույցները, որոնք թվարկված են մեղադրական եզրակացության մեջ։
Ապահովելով դատաքննության լրիվությունը, բազմակողմանիությունը և օբյեկտիվությունը և ղեկավարվելով գործի արդար քննությանը վերաբերող սահմանադրական և դատավարական նորմերի դրույթներով, հիմնվելով պատշաճ ընթացակարգի շրջանակներում դատական քննության ընթացքում գործի հանգամանքների հետազոտման արդյունքի վրա, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով, դատարանը գտնում է, որ քրեական գործով առաջադրված մեղադրանքում ամբաստանյալի մեղքը հիմնավորված է։
ՀՀ քրեական օրենսգրքի 34-268-րդ հոդվածի 2-րդ մասի 1-ին կետով առաջադրված մեղադրանքում ամբաստանյալ Սարգիս Հարությունյանն իրեն լիովին մեղավոր է ճանաչել և ցուցմունք է տվել այն մասին, որ ինքը խրոնիկ թմրամոլ է, ինքն իրեն թմրամիջոցներ է ներարկում ոտքերի երակներից, թմրամիջոցներից կախվածություն ունի, այդ պատճառով, գտնվելով «Նուբարաշեն» ՔԿ հիմնարկում, տարբեր անձանց միջոցով և տարբեր ուղիներով, որոնց վերաբերյալ հրաժարվում է ցուցմունք տալուց, իր անձնական օգտագործման համար, առանց իրացնելու նպատակի, ձեռք բերում և օգտագործում է թմրամիջոցներ։ Իր համար թմրամիջոց է առաքվել ՔԿ հիմնարկի թիվ 53 խուց, ինքն իմացել է, որ թմրամիջոցը գտնվել է մակարոնի տուփի մեջ։ 2010 թվականի մայիսի 18-ին խնդրել է ՔԿ հիմնարկում տեխնիկատնտեսական աշխատանքներ կատարող դատապարտյալ, ազգությամբ քուրդ Թեմուր Վալիևին` գնալ և 53 խցից թիվ 44 խուց մակարոն բերել իր համար, քանի որ ինքը սոված է։ Ինքը Թ.Վալիևին չի ասել, որ փաթեթում թմրամիջոց կա։ Թեմուր Վալիևը մակարոնի փաթեթն ստացել է 53 խցի կալանավոր Հովհաննես Ղազարյանից և ցանկացել է բերել թիվ 44 խուց, սակայն ՔԿ հիմնարկի աշխատակիցներն ստուգել են մակարոնի փաթեթն ու հայտնաբերել են ներարկիչի մեջ լցված թմրամիջոցը։ Հովհաննես Ղազարյանը նույնպես չի իմացել թմրամիջոցի առկայության մասին։

Գ.Թ. 102-108, 109, 127, 154, դատաքննության արձանագրություն

Ամբաստանյալ Սարգիս Հարությունյանին առաջադրված մեղադրանքը հիմնավորվել է նաև դատաքննությամբ հետազոտված հետևյալ ապացույցներով.
զննության արձանագրությամբ այն մասին, որ 18.05.2010թ. ՀՀ ԱՆ «Նուբարաշեն» ՔԿ հիմնարկի աշխատակիցներ Գագիկ Հարությունյանը, Սամվել Թունյանը և Միհրան Ներսիսյանը նույն օրը ժամը 12.00-ին «Նուբարաշեն» ՔԿ հիմնարկում ստուգել են տեխնիկատնտեսական աշխատանքներում ընդգրկված դատապարտյալ Թեմուր Վալիևի կողմից թիվ 53 խցից վերցված մեկ տուփ մակարոնի փաթեթը, որի մեջ հայտնաբերվել է մեկ հատ 3մլ տարողության մեկանգամյա օգտագործման ներարկիչ, որի իրանի և մխոցի հատվածները կտրված և հերմետիկ փակված են եղել հալեցման միջոցով։ Ներարկիչը ամբողջովին լցված է եղել մուգ շագանակագույն հեղուկով։ Թեմուր Վալիևը հայտարարել է, որ ինքը մակարոնի տուփի մեջ գտնված թմրամիջոցի առկայության մասին չի իմացել, իրեն թիվ 44 խցի կալանավոր Սարգիս Հարությունյանն է խնդրել մակարոնը բերել թիվ 53 խցից ու հանձնել իրեն։ Մակարոնի փաթեթն իրեն տվել է թիվ 53 խցի դատապարտյալ Հովհաննես Ղազարյանը` Սարգիս Հարությունյանին փոխանցելու համար։ Հայտնաբերված ներարկիչն իր պարունակությամբ փաթեթավորվել, կնքվել և առգրավվել է։

Գ. Թ. 2-3

Դատաքիմիական փորձաքննության թիվ 16311002 եզրակացության համաձայն, փորձաքննության ներկայացված ներարկիչում առկա 0,5մլ ծավալով մուգ շագանակագույն հեղուկն իր բաղադրության մեջ պարունակում է 0,028 գրամ մաքուր քաշով, տնայնագործական եղանակով պատրաստված «Ացետիլացված ափիոն» տեսակի թմրամիջոց։

Գ. Թ. 53-56

Նշված թմրամիջոցը և ներարկիչը ճանաչվել են իրեղեն ապացույց։
Տոքսիկոքիմիական փորձաքննության թիվ 0392 եզրակացության համաձայն, Սարգիս Հարությունյանի մեզի փորձանմուշում հայտնաբերվել են «Կանաբիսի» և «Ափիոնի» խմբերի թմրալկալոիդների հետքեր։

Գ. Թ. 82

Դատանարկոլոգիական փորձաքննության թիվ 247/10 եզրակացության համաձայն, Սարգիս Հարությունյանը տառապում է ափիոնային թմրամոլությամբ, հարկադիր բուժման կարիք ունի, որի համար հակացուցումներ չկան։

Գ. Թ. 150-151

Գործով վկա ՀՀ ԱՆ «Նուբարաշեն» քրեակատարողական հիմնարկի անվտանգության ապահովման բաժնի աշխատակից Սամվել Թունյանի ցուցմունքով այն մասին, որ 2010թ. մայիսի 18-ին ժամը 11.45-ի սահմաններում ՔԿ հիմնարկի թիվ 3-րդ մասնաշենքում ծառայություն իրականացնելիս նկատել է, որ տեխնիկատնտեսական աշխատանքներում ընդգրկված դատապարտյալ Թեմուր Վալիևն առանց թույլտվության մոտեցել է թիվ 53 խցի կերակրադռնակին, այնտեղից վերցրել պոլիէթիլենային տոպրակով մակարոն և հեռացել։ Անմիջապես մոտեցել է նրան և հետաքրքրվել նրա ձեռքում եղած փաթեթի պարունակության մասին։ Թ.Վալիևը պատասխանել է, որ թիվ 44 խցի կալանավոր Սարգիս Հարությունյանի խնդրանքով մակարոնը վերցրել է թիվ 53 խցի կալանավոր Հովհաննես Ղազարյանից, որպեսզի փոխանցի նրան։ Թ.Վալիևին ուղեկցել է նույն մասնաշենքում գտնվող աշխատասենյակ, որտեղ ՔԿ հիմնարկի անվտանգության ապահովման բաժնի աշխատակիցներ Գագիկ Հարությունյանի և Միհրան Ներսիսյանի ներկայությամբ կատարված խուզարկությամբ մակարոնի տուփում հայտնաբերվել է ներարկիչի մեջ լցված մուգ շագանակագույն հեղուկ, կազմվել է համապատասխան արձանագրություն, հայտնաբերվածը փաթեթավորվել, կնքվել և առգրավվել է։

Գ. Թ. 87-88, 48-49, դատաքննության արձանագրություն

ՀՀ ԱՆ «Նուբարաշեն» քրեակատարողական հիմնարկի անվտանգության ապահովման բաժնի աշխատակիցներ, գործով վկաներ Գագիկ Հարությունյանը և Միհրան Ներսիսյանը նույնաբովանդակ ցուցմունքներ են տվել այն մասին, որ 2010թ. մայիսի 18-ին ժամը 11.45-ի սահմաններում ՔԿ հիմնարկի թիվ 3-րդ մասնաշենքում ծառայություն իրականացնելիս նկատել են, որ Սամվել Թունյանը տեխնիկատնտեսական աշխատանքներում ընդգրկված դատապարտյալ Թեմուր Վալիևին ուղեկցել է աշխատասենյակ։ Մոտեցել են նրանց, Թ.Վալիևից հետաքրքրվել են նրա ձեռքում եղած մակարոնի տուփի պարունակության մասին։ Վերջինս հայտնել է, որ թիվ 44 խցի կալանավոր Սարգիս Հարությունյանի խնդրանքով մակարոնը վերցրել է թիվ 53 խցի կալանավոր Հովհաննես Ղազարյանից, որպեսզի փոխանցի նրան։ Թ.Վալիևին ուղեկցել են նույն մասնաշենքում գտնվող աշխատասենյակ, որտեղ խուզարկությամբ մակարոնի միջից հայտնաբերվել է ներարկիչի մեջ լցված մուգ շագանակագույն հեղուկ։ Հայտնաբերվածի վերաբերյալ կազմել են համապատասխան արձանագրություն, հայտնաբերվածը փաթեթավորվել, կնքվել և առգրավվել է։

Գ.Թ. 77-78, 121-122, 50-51, 46-47,
դատաքննության արձանագրություն

Գործով որպես վկա հարցաքննված դատապարտյալ Թեմուր Վալիևը ցուցմունք է տվել այն մասին, որ 2010թ. մայիսի 18-ին ժամը 11.30-ի սահմաններում ՔԿ հիմնարկի հանձնուքների ընդունման սենյակից վերցրել է կալանավորների անվամբ բերված հանձնուքները, տեղափոխել է թիվ 3-րդ մասնաշենք և բաժանել կալանավորներին։ Ետ վերադառնալիս թիվ 44 խցի կալանավոր Սարգիսը կանչել է իրեն խցի կերակրադռնակի մոտ և խնդրել, որ գնա թիվ 53 խուց, կալանավոր Հովհաննես Ղազարյանից վերցնի տուփով մակարոն և փոխանցի իրեն։ Ինքը մերժել է և շարունակել հանձնուքները փոխադրել ու բաժանել կալանավորներին։ Հերթական այցի ժամանակ Սարգիսը կրկին իրեն կանչել է խցի կերակրադռնակի մոտ, ասել, որ քաղցած է և խնդրել, որ գնա ու թիվ 53 խցից մակարոնը բերի, միաժամանակ վստահեցրել, որ նրանում արգելված ոչինչ չկա թաքցրած։ Ինքը համաձայնել է, գնացել թիվ 53 խուց, Հովհաննեսին կանչել կերակրադռնակի մոտ և ասել, որ թիվ 44 խցի կալանավոր Սարգիսը խնդրել է խցում եղած տուփով մակարոնը փոխանցել իրեն։ Հովհաննեսը կերակրադռնակի վերևի հատվածից վերցրել է պոլիէթիլենային տոպրակով մակարոնը և փոխանցել իրեն։ Վերցնելով մակարոնը քայլել է թիվ 44 խցի ուղղությամբ, սակայն ճանապարհին իրեն են մոտեցել «Նուբարաշեն» ՔԿ հիմնարկի աշխատակիցները, հրավիրել աշխատասենյակ, որտեղ կատարված խուզարկությամբ մակարոնի միջից հայտնաբերել են ներարկիչի մեջ լցված մուգ գույնի հեղուկ։ Ինքը մակարոնի մեջ գտնված թմրամիջոցի մասին չի իմացել։

Գ.Թ. 97-101, 152-153, 12, դատաքննության արձանագրություն

Գործով որպես վկա հարցաքննված դատապարտյալ Հովհաննես Ղազարյանը ցուցմունք է տվել այն մասին, որ 2010թ. մայիսի 18-ին ժամը 12.00-ի սահմաններում իրենց խցի կերակրադռնակին է մոտեցել դատապարտյալ Թեմուրը, իրեն մոտ կանչել և ասել, որ թիվ 44 խցի կալանավոր Սարգիսը խնդրել է խցում եղած մակարոնը փոխանցել իրեն։ Կարծելով, որ Սարգիսն իր նախկին ծանոթներից է, խնդրանքը չի մերժել և նկատելով, որ կերակրադռնակի վերևի հատվածում պոլիէթիլենային տոպրակով մակարոն է դրված, վերցրել և փոխանցել է Թեմուրին։ Շուրջ կես ժամ անց խուց են եկել ՔԿ հիմնարկի աշխատակիցները, հայտնել, որ Թեմուրին փոխանցած մակարոնի միջից թմրամիջոցին նմանվող զանգված են հայտնաբերել, այնուհետև սկսել են խցում կատարել խուզարկություն։ Ինքը մակարոնի մեջ գտնված թմրամիջոցի մասին չի իմացել։

Գ.Թ. 103-108, 16-17, դատաքննության արձանագրություն

3. Դատարանի իրավական վերլուծությունը։
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Սարգիս Ներսեսի Հարությունյանի մեղքը ՀՀ քրեական օրենսգրքի 34-268-րդ հոդվածի 2-րդ մասի 1-ին կետով նախատեսված հանցանքի կատարման մեջ հիմնավորված է և նշված հոդվածի սանկցիայով նրա նկատմամբ պետք է քրեական պատիժ կիրառվի։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված` պատասխանատվությունը և պատիժը մեղմացնող ու ծանրացնող հանգամանքները։ Դրանք բնութագրելով ամբաստանյալի անձնավորության ու կատարված հանցագործության հանրային վտանգավորության աստիճանը, հնարավորություն են տալիս անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ կոնկրետ դեպքով ամբաստանյալ Սարգիս Ներսեսի Հարությունյանի մոտ, որպես պատասխանատվությունը և պատիժը ծանրացնող հանգամանք, առկա է հանցանքը կատարելու ռեցիդիվը, քանի որ ամբաստանյալի նախկին դատվածությունը մարված չէ։
Քրեական գործով Սարգիս Ներսեսի Հարությունյանի նկատմամբ պատասխանատվությունը և պատիժը մեղմացնող հանգամանքներ են այն, որ նրա խնամքի տակ են գտնվում մինչև 14 տարեկան 2 երեխաները` 18.10.2004թ.և 16.09.2009թ., ինչպես նաև ամբաստանյալի կողմից անկեղծորեն զղջալը։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալ Սարգիս Ներսեսի Հարությունյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, տվյալ գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր եզրակացության, որ ամբաստանյալի նկատմամբ որպես պատիժ անհրաժեշտ է նշանակել ազատազրկում որոշակի ժամկետով։
Պատիժ նշանակելիս և պատժաչափը որոշելիս դատարանը նկատի է առնում ՀՀ քրեական օրենսգրքի 65-րդ հոդվածի պահանջը` չավարտված հանցագործության, կոնկրետ` հանցափորձի համար պատիժ նշանակելու վերաբերյալ, այն է` հանցափորձի համար ազատազրկման ձևով պատժի ժամկետը չի կարող գերազանցել ՀՀ քրեական օրենսգրքի հատուկ մասի համապատասխան հոդվածով կամ հոդվածի մասով որոշակի ժամկետով ազատազրկման ձևով նախատեսված պատժի առավելագույն ժամկետի երեք քառորդը։
ՀՀ քրեական օրենսգրքի 97-րդ հոդվածի 1-ին մասի 4-րդ կետի և 103-րդ հոդվածի հիմքով և ՀՀ քրեակատարողական օրենսգրքի 123-րդ և 126-րդ հոդվածների սահմանված կարոգվ ամբաստանյալ Սարգիս Ներսեսի Հարությունյանի նկատմամբ պետք է նշանակվի պատժի կատարման հետ միացված բժշկական բնույթի հարկադրանքի միջոց ազատազրկումը կրելու վայրում ափիոնային թմրամոլության դեմ, բուժման ժամկետը հաշվակցելով նշանակված պատժի ժամկետի մեջ։
Իրեղեն ապացույց ճանաչված` 0,028 գրամ քաշով «Ացետիլացված ափիոն» տեսակի թմրամիջոցը և ներարկիչը ենթակա են ոչնչացման դատավճիռն օրինական ուժի մեջ մտնելուց հետո։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 44, 357-358, 360, 365, 368-372, 376, 3761, 379-րդ հոդվածների և ՀՀ դատական օրենսգրքի 20-րդ հոդվածի պահանջներով, դատարանը

Վ Ճ Ռ Ե Ց

Ամբաստանյալ Սարգիս Ներսեսի Հարությունյանին մեղավոր ճանաչել ՀՀ քրեական օրենսգրքի 34-268-րդ հոդվածի 2-րդ մասի 1-ին կետով նախատեսված հանցանքը կատարելու մեջ և նշված հոդվածի սանկցիայով նրա նկատմամբ քրեական պատիժ կիրառել նշանակելով ազատազրկում 2/երկու/ տարի ժամկետով, որը պետք է կրի ՀՀ ԱՆ ՔԿՎ համապատասխան ՔԿ հիմնարկում։
Պատժի սկիզբը հաշվել 2010 թվականի սեպտեմբերի 28-ից։
Ամբաստանյալ Սարգիս Ներսեսի Հարությունյանի նկատմամբ նշանակել պատժի կատարման հետ միացված բժշկական բնույթի հարկադրանքի միջոց ազատազրկումը կրելու վայրում` ափիոնային թմրամոլության դեմ, բուժման ժամկետը հաշվակցելով նշանակված պատժի ժամկետի մեջ։
Իրեղեն ապացույց ճանաչված 0,028 գրամ քաշով «Ացետիլացված ափիոն» տեսակի թմրամիջոցը և ներարկիչը ոչնչացնել դատավճիռն օրինական ուժի մեջ մտնելուց հետո։
Դատավարության մասնակիցների կողմից դատավճիռը կարող է վերաքննության կարգով բողոքարկվել ՀՀ քրեական վերաքննիչ դատարան` հրապարակման պահից մեկ ամսվա ընթացքում։

ԴԱՏԱՎՈՐ Վ. Թ. ԳՐԻԳՈՐՅԱՆ