Գործ թիվ ԵԷԴ/0107/01/10
2010թ

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղարությամբ Արմինե Արղամանյան
Մասնակցությամբ`
Մեղադրող Պավել Գյուլումյան
Ամբաստանյալ Գառնիկ Կարապետյան
Ամբաստանյալի պաշտպան Նարինե Սարգսյան
Տուժողներ՝ Ռոման Նազարյան
Գևորգ Գևորգյան

2010 թվականի օգոստոսի 26-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում արագացված դատական քննության կարգով քննեց քրեական գործն ըստ մեղադրանքի
Գառնիկ Սամվելի Կարապետյանի ծնված 13.03.1987թ. Երևան քաղաքում,
ազգությամբ հայ, Հայաստանի Հանրապետության քաղաքացի, միջնակարգ կրթությամբ, ամուրի, չդատված, աշխատել է «Գորվետկա-Վան» ՍՊԸ-ում որպես ավտոէլեկտրիկ, բնակվում է Երևան, Գետառի փող. 12 տուն, մեղադրվում է ՀՀ քրեական օրենսգրքի 258-րդ հոդվածի 2-րդ մասով և 117-րդ հոդվածով։
Խափանման միջոցը ստորագրություն չհեռանալու մասին։
Առաջադրված մեղադրանքում իրեն մեղավոր է ճանաչել լիովին։

1. Գործի դատավարական նախապատմությունը։
19.04.2010թ.Ռոման Նազարյանը հայտարարություն է տվել ՀՀ ոստիկանության Էրեբունու բաժնին այն մասին, որ նույն օրը ժամը 16.00-ի սահմաններում Երևանի Գորվետկա 4 հասցեում իր աշխատանքային ընկեր Գառնիկ Կարապետյանը գլխով հարվածել է իր դեմքին` քթի շրջանում և իրեն պատճառել է մարմնական վնասվածք։
ՀՀ ոստիկանության Էրեբունու բաժնի հետաքննիչի կողմից նյութեր են նախապատրաստվել։ Գտնելով, որ առկա են ՀՀ քրեական օրենսգրքի 258-րդ հոդվածով նախատեսված հանցագործության հատկանիշներ, 30.04.2010թ. որոշմամբ նյութերն ուղարկվել են ՀՀ ոստիկանության ՔԳՎ Էրեբունու քննչական բաժին։
02.06.2010թ. քննչական բաժնի կողմից ՀՀ քրեական օրենսգրքի 117-րդ հոդվածով և 258-րդ հոդվածի 2-րդ մասով հարուցվել է թիվ 12121710 քրեական գործը և նախաքննություն է կատարվել։
23.07.2010թ. որոշում է կայացվել Գառնիկ Սամվելի Կարապետյանին ՀՀ քրեական օրենսգրքի 117-րդ հոդվածով և 258-րդ հոդվածի 2-րդ մասով որպես մեղադրյալ ներգրավելու մասին։ Խափանման միջոց է ընտրվել ստորագրություն չհեռանալու մասին։
Ամբաստանյալ Գառնիկ Սամվելի Կարապետյանը մեղադրվել է այն բանի համար, որ նա 19.04.2010թ. ժամը 17.00-ի սահմաններում Երևան քաղաքի Գետառի 4 հասցեում գտնվող «Գորվետկա-Վան» ՍՊԸ-ին պատկանող ավտոտեխսպասարկման կետի ավտոտնակի դուռը բաց թողնելու պատճառով վիճաբանելով տուժող Ռոման Նազարյանի հետ, դիտավորությամբ գլխով հարվածել է Ռ. Նազարյանի դեմքին` քթի շրջանում և նրան դիտավորությամբ պատճառել է թեթև վնասվածք` առողջության կարճատև քայքայումով` քթի հիմի շրջանի քերծվածքի, քթոսկրի կոտրվածքի ձևով։
Բացի այդ` նույն օրը ժամը 17.30-ի սահմաններում կոպտորեն խախտելով հասարակական կարգը և բացահայտ անհարգալից վերաբերմունք ցուցաբերելով հասարակության նկատմամբ, Գառնիկ Կարապետյանը շուրջ 10-15 րոպե տևողությամբ վիճաբանել է Ռոման Նազարյանի և մյուսների հետ, հայհոյել է նրանց, այն զուգորդելով Ռոման Նազարյանի, այնուհետև` Գևորգ Գևորգյանի նկատմամբ ֆիզիկական բռնություն գործադրելով` ձեռքերով նրանց հարվածելով։ Գառնիկ Կարապետյանի չարամիտ խուլիգանությունը դադարեցվել է միայն ականատեսների միջամտությամբ։
Մեղադրական եզրակացությունը հաստատվել է 03.08.2010թ.։
Քրեական գործը մեղադրական եզրակացությամբ 04.08.2010թ. մուտք է եղել Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարան։

2. Արագացված դատական քննություն։
Մինչև դատաքննությունն սկսելը ամբաստանյալ Գառնիկ Սամվելի Կարապետյանը միջնորդեց դատական քննությունն անցկացնել արագացված կարգով և հայտնեց, որ առաջադրված մեղադրանքում իրեն լիովին մեղավոր է ճանաչում, միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է իր կողմից ներկայացված միջնորդության բնույթն ու հետևանքները։
Դատարանը համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին։
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Գառնիկ Սամվելի Կարապետյանը կատարել է հանցանք, որը նախատեսված է ՀՀ քրեական օրենսգրքի 117-րդ հոդվածով և 258-րդ հոդվածի 2-րդ մասով։

3. Դատարանի իրավական վերլուծությունը։
Դատարանն արագացված կարգով իրականացված դատական քննության ընթացքում ուսումնասիրելով ամբաստանյալի անձը բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքները, հաշվի առնելով այն, որ առաջադրված մեղադրանքում ամբաստանյալ Գառնիկ Սամվելի Կարապետյանի մեղքը ՀՀ քրեական օրենսգրքի 117-րդ հոդվածով և 258-րդ հոդվածի 2-րդ մասով նախատեսված հանցանքները կատարելու մեջ հիմնավորված է, գտնում է, որ ամբաստանյալի նկատմամբ նշված հոդվածների սանկցիայով պետք է քրեական պատիժ նշանակվի։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված` պատասխանատվությունը և պատիժը մեղմացնող ու ծանրացնող հանգամանքները։ Դրանք բնութագրելով ամբաստանյալի անձնավորության ու կատարված հանցագործության հանրային վտանգավորության աստիճանը, հնարավորություն են տալիս անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ կոնկրետ դեպքով ամբաստանյալ Գառնիկ Սամվելի Կարապետյանի կողմից հանցանքը կատարելու ծանրացուցիչ հանգամանք չկա։
Որպես մեղմացուցիչ հանգամանք դատարանը հաշվի է առնում ամբաստանյալի երիտասարդ և նախկինում արատավորված չլինելը, դրական բնութագրվելը, անկեղծորեն զղջալը։
Դատարանը հաշվի է առնում նաև այն հանգամանքը, որ ամբաստանյալ Գառնիկ Կարապետյանը մանկուց հաշմանդամ է,ունի անժամկետ հաշմանդամության 3-րդ կարգ, որի կապակցությամբ նա ազատվել է իսկական զինծառայությունից` տառապելով «արյունային /հեմատոգեն/ օստեոմիելիտ, ձախ ուսային բազուկոսկրի դիաֆիզի դեֆորմացիայով, ճաճանչոսկրի միջին երրորդականի` ճաճանչային ծուռթաթության զարգացմամբ, ֆունկցիայի արտահայտված խանգարումով»։
Ամբաստանյալի խնամքին են գտնվում նրա ծնողները։ Նրանցից հայրը` Սամվել Կարապետյանը, Աֆղանական պատերազմի մասնակից է, տառապում է «Վիրուսային հեպատիտ «C», լյարդի ցիռոզ, կերակրափողի երակների վարիկոզ լայնացում, ստամոքսաաղիքային արյունահոսություն» հիվանդություններով, ունի երկրորդ կարգի անժամկետ հաշմանդամության կարգ։ Մայրը` Մարիետա Կարապետյանը, գտնվում է ՀՀ ԱՆ ուռուցքաբանության ազգային կենտրոնում հաշվառման մեջ «կրծքագեղձերի դիֆուզ ֆիբրոզ մաստոպատիա» ախտորոշմամբ։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալ Գառնիկ Սամվելի Կարապետյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, քրեական գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր հետևության, որ ամբաստանյալ Գառնիկ Կարապետյանի ուղղվելը հնարավոր է առանց պատիժը կրելու և նրա նկատմամբ անհրաժեշտ է որոշում կայացնել նշանակված պատիժը պայմանականորեն չկիրառելու մասին, սահմանելով փորձաշրջան, նրա վարքագծի նկատմամբ վերահսկողության իրականացնելը հանձնարարելով ազատությունից զրկելու հետ չկապված պատիժների կատարման ստորաբաժանմանը։
Դատարանը պատիժ նշանակելիս հաշվի է առնում այն հանգամանքը, որ ՀՀ քրեական օրենսգրքի 20-րդ հոդվածի 1-ին մասի 1-ին կետի և 66-րդ հոդվածի հիմքով առկա է հանցանքների համակցություն։ ՀՀ քրեական օրենսգրքի 117-րդ հոդվածով և 258-րդ հոդվածի 2-րդ մասով նախատեսված հանցանքները ՀՀ քրեական օրենսգրքի 19-րդ հոդվածի համաձայն համարվում են ոչ մեծ ծանրության հանցանքներ, ուստի պատիժ պետք է նշանակվի ՀՀ քրեական օրենսգրքի 66-րդ հոդվածի 2-րդ մասի հիմքով։
ՀՀ քրեական դատավարության օրենսգրքի 3751-րդ հոդվածի 6-րդ մասի հիմքով անդրադառնալով քաղաքացիական հայցի խնդրին, դատարանն արձանագրում է, որ տուժող Գևորգ Գևորգյանը ամբաստանյալ Գառնիկ Կարապետյանի նկատմամբ գույքային պահանջ չներկայացրեց, իսկ տուժող Ռոման Նազարյանը ներկայացրեց 300.000 ՀՀ դրամի չափով քաղաքացիական հայց` որպես հանցագործությամբ ամբաստանյալ Գառնիկ Կարապետյանի կողմից իրեն պատճառված մարմնական վնասվածքի` քթոսկրի կոտրվածքի վերացման նպատակով ապագայում կատարվելիք վիրահատական միջամտության հնարավոր ծախսերի հատուցում։
Դատարանը գտնում է, որ նշված քաղաքացիական հայցը պետք է թողնել առանց քննության` քաղաքացիական հայցվոր Ռոման Նազարյանին բացատրելով քաղաքացիական դատավարության կարգով հետագայում հայց ներկայացնելու նրա իրավունքը, քանի որ նշված վիրահատությունը դեռևս կատարված չէ, մինչդեռ վիրահատության իրականացումից հետո միայն անհրաժեշտ հիմքերի առկայությամբ հնարավոր կլինի որոշել կատարված ծախսերի չափը և քաղաքացիական հայցի հիմնավորված լինելը։
Հիմք ընդունելով վերոգրյալը և ՀՀ քրեական օրենսգրքի 51-րդ, 59-րդ, 70-րդ հոդվածների, ՀՀ քրեակատարողական օրենսգրքի 24-րդ և 120-րդ հոդվածների պահանջները և ղեկավարվելով ՀՀ քրեական դատավարության օրենսգրքի 41, 44, 155, 357-358, 360, 365, 369-372, 376, 3761, 379, 3751-3754-րդ հոդվածներով և ՀՀ դատական օրենսգրքի 20-րդ հոդվածով, դատարանը.

Վ Ճ Ռ Ե Ց

Ամբաստանյալ Գառնիկ Սամվելի Կարապետյանին մեղավոր ճանաչել ՀՀ քրեական օրենսգրքի 117-րդ հոդվածով և 258-րդ հոդվածի 2-րդ մասով նախատեսված հանցանքների կատարման մեջ և նշված հոդվածների սանկցիայով նրա նկատմամբ կիրառել քրեական պատիժ, այդ թվում` ՀՀ քրեական օրենսգրքի 117-րդ հոդվածով նշանակել տուգանք նվազագույն աշխատավարձի հիսնապատիկի չափով 50.000 /հիսուն հազար/ ՀՀ դրամ և ՀՀ քրեական օրենսգրքի 258-րդ հոդվածի 2-րդ մասով` ազատազրկում 6 /վեց/ ամիս ժամկետով։ Կիրառել ՀՀ քրեական օրենսգրքի 70-րդ հոդվածը և ազատազրկման ձևով նշանակված պատիժը պայմանականորեն չկիրառել` սահմանելով փորձաշրջան 1 /մեկ/ տարի ժամկետով։
Դատավճիռն օրինական ուժի մեջ մտնելուց հետո դատապարտյալի վարքագծի նկատմամբ վերահսկողությունը և տուգանքի կատարումը հանձնարարել ՀՀ ԱՆ ՔԿՎ ազատությունից զրկելու հետ չկապված պատիժների կատարման տարածքային ստորաբաժանման մարմնին։
Մինչև դատավճիռն օրինական ուժի մեջ մտնելը ամբաստանյալ Գառնիկ Սամվելի Կարապետյանի նկատմամբ որպես խափանման միջոց ընտրված չհեռանալու մասին ստորագրությունը թողնել անփոփոխ։
Տուժող Ռոման Նազարյանի ներկայացրած քաղաքացիական հայցը թողնել առանց քննության` տուժողին իրավունք վերապահելով այն հետագայում հարուցելու քաղաքացիական դատավարության կարգով։
Դատավարության մասնակիցների կողմից դատավճիռը վերաքննության կարգով կարող է բողոքարկվել ՀՀ քրեական վերաքննիչ դատարան` հրապարակման պահից մեկ ամսվա ընթացքում։

ԴԱՏԱՎՈՐ Վ. Թ. ԳՐԻԳՈՐՅԱՆ