Գործ ԵԷԴ/0103/01/10



Ո Ր Ո Շ ՈՒ Մ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ`

ՆԱԽԱԳԱՀՈՂ ԴԱՏԱՎՈՐ Մ.ՌԵՀԱՆՅԱՆ
ԴԱՏԱՎՈՐՆԵՐ Ա.ԴԱՆԻԵԼՅԱՆ
Մ.ԱՐՂԱՄԱՆՅԱՆ

ՔԱՐՏՈՒՂԱՐՈՒԹՅԱՄԲ` Մ.ՄԵԼՔՈՆՅԱՆԻ

Մասնակցությամբ`

ՊԱՇՏՊԱՆ` Ղ.ՊԱՊՈՅԱՆԻ

2010թ. նոյեմբերի 22-ին ք.Երևան

Դռնբաց դատական նիստում, քննության առնելով ամբաստանյալ Նելսոն Սերյոժայի Իսունցի վերաքննիչ բողոքն իր վերաբերյալ` ՀՀ քրեական օրենսգրքի 178-րդ հոդվածի 3-րդ մասի 1-ին կետով, ՀՀ քրեական օրենսգրքի 184-րդ հոդվածի 2-րդ մասի 1-ին կետով և ՀՀ քրեական օրենսգրքի 325-րդ հոդվածի 1-ին մասով, Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 2010թ. հոկտեմբերի 05-ի դատավճռի դեմ,

Պ Ա Ր Զ Ե Ց

1.Գործի դատավարական նախապատմությունը
Վրաստանի Հանրապետության քաղաքացի Նուգզար Բոլկվաձեն 29.09.2009թ. դիմում է ներկայացրել ՀՀ ոստիկանության պետին այն մասին, որ հանդիսանալով «Օրբի-XXI» ՍՊԸ ներկայացուցիչ, 21.11.2008թ. Հայաստանի Հանրապետությունում գրանցված «Էրլա-աստղ» ՍՊԸ-ի հետ կնքել է 45.000 ԱՄՆ դոլարի ընդհանուր արժողության 180մ3 եզրահան փայտանյութի /տախտակի/ վաճառքի պայմանագիր։
Նշված ապրանքը 28.11.2008թ. ներկրվել է Հայաստան, սակայն ապրանքի արժեքը չի վճարվել։
2009թ. նոյեմբերի 03-ին, ՀՀ ոստիկանության ՔԳՎ ՀԿԳ քննության վարչության կողմից` ՀՀ քրեական օրենսգրքի 178-րդ հոդվածի 3-րդ մասի 1-ին կետով, հարուցվել է թիվ 69108309 քրեական գործը:
2009թ. նոյեմբերի 09-ին Նելսոն Սերյոժայի Իսունցը ձերբակալվել է։
2009թ. նոյեմբերի 11-ին Նելսոն Իսունցին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով։

2009թ. նոյեմբերի 12-ին նախաքննական մարմնի կողմից միջնորդություն է հարուցվել Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան` Նելսոն Սերյոժայի Իսունցի նկատմամբ` որպես խափանման միջոց, կալանավորում կիրառելու մասին, որը դատարանի նույն օրվա որոշմամբ բավարարվել է։
2010թ. հուլիսի 09-ին Նելսոն Իսունցին առաջադրված մեղադրանքը փոփոխվել և լրացվել է և նրան մեղադրանք առաջադրվել` ՀՀ քրեական օրենսգրքի 178-րդ հոդվածի 3-րդ մասի 1-ին կետով, ՀՀ քրեական օրենսգրքի 184-րդ հոդվածի 2-րդ մասի 1-ին կետով և ՀՀ քրեական օրենսգրքի 325-րդ հոդվածի 1-ին մասով:
2010թ. հուլիսի 23-ին Նելսոն Սերյոժայի Իսունցի վերաբերյալ թիվ 69108309 քրեական գործն ուղարկվել է Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարան:
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը, արագացված դատական քննության կարգով, 2010թ. հոկտեմբերի 05-ի դատավճռով ամբաստանյալ Նելսոն Սերյոժայի Իսունցը մեղավոր է ճանաչվել ՀՀ քրեական օրենսգրքի 178-րդ հոդվածի 3-րդ մասի 1-ին կետով, ՀՀ քրեական օրենսգրքի 184-րդ հոդվածի 2-րդ մասի 1-ին կետով և ՀՀ քրեական օրենսգրքի 325-րդ հոդվածի 1-ին մասով նախատեսված հանցանքները կատարելու մեջ և նշված հոդվածների սանկցիաներով կիրառվել է քրեական պատիժներ` ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցանքը կատարելու համար նշանակվել է ազատազրկում 5 /հինգ/ տարի ժամկետով` առանց գույքի բռնագրավման, ՀՀ քրեական օրենսգրքի 184-րդ հոդվածի 2-րդ մասի 1-ին կետով` նախատեսված հանցանքը կատարելու համար նշանակվել է ազատազրկում 1 /մեկ/ տարի ժամկետով, ՀՀ քրեական օրենսգրքի 325-րդ հոդվածի 1-ին մասով նախատեսված հանցանքը կատարելու համար նշանակվել է ազատազրկում 1 /մեկ/ տարի ժամկետով։
ՀՀ քրեական օրենսգրքի 66-րդ հոդվածի 4-րդ մասի հիմքով` հանցանքների համակցությամբ, պատիժները լրիվ կամ մասնակիորեն գումարելու միջոցով, ՀՀ քրեական օրենսգրքի 178-րդ հոդվածի 3-րդ մասի 1-ին կետով նշանակված 5 /հինգ/ տարի ժամկետով ազատազրկմանը մասնակիորեն գումարվել է ՀՀ քրեական օրենսգրքի 184-րդ հոդվածի 2-րդ մասի 1-ին կետով նշանակված 1 /մեկ/ տարի ազատազրկման ժամկետից 6 /վեց/ ամիս ազատազրկման ժամկետը և ՀՀ քրեական օրենսգրքի 325-րդ հոդվածի 1-ին մասով նշանակված 1 /մեկ/ տարի ազատազրկման ժամկետից 6 /վեց/ ամիս ազատազրկման ժամկետը և վերջնական պատիժ է նշանակվել ազատազրկում 6 /վեց/ տարի ժամկետով` առանց գույքի բռնագրավման։
Պատիժը կրելու սկիզբը է հաշվել 09.11.2009թ.։
Քաղաքացիական հայցի հարցը համարվել է լուծված։
Մինչև դատավճռի օրինական ուժի մեջ մտնելը ամբաստանյալ Նելսոն Սերյոժայի Իսունցի նկատմամբ` որպես խափանման միջոց, ընտրված կալանավորումը թողնվել է անփոփոխ։
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի դատավճռի դեմ վերաքննիչ բողոք է բերել ամբաստանյալ Նելսոն Իսունցը:
2. Գործի փաստական հանգամանքները
2006թ. հունիսի 11-ին Նելսոն Իսունցն ուրիշի գույքը խարդախությամբ հափշտակելու դիտավորությամբ, չարաշահելով Կոտայքի մարզի Արագյուղի բնակիչ Ալվարդ Մկրտչյանի վստահությունը, 1կգ-ը 100 դրամով գնելու և մի քանի օրից գումարը վճարելու պատրվակով, նույն գյուղում նրանից ստացել և խաբեությամբ հափշտակել է զգալի չափի 310.000 ՀՀ դրամ արժողության 3100կգ ցորեն, այն չպարզված «Գազ-53» մակնիշի ավտոմեքենայով տեղափոխել է իր կնոջ ծնողների Եղվարդ քաղաքի ԳՄԳ մանկապարտեզի շենք և վաճառել։ Ստացած գումարը Նելսոն Իսունցը ծախսել է իր անձնական կարիքների համար։
Բացի այդ, Նելսոն Իսունցն ուրիշի զգալի չափի գույքի հափշտակության դիտավորությամբ, 2006թ. հունիս ամսին չարաշահելով Կոտայքի մարզի Արագյուղի բնակիչ Ժորժիկ Մկրտչյանի վստահությունը, 1կգ-ը 100 դրամով գնելու և մի քանի օրից գումարը վճարելու պատրվակով նրանից ստացել և կրկին անգամ խաբեությամբ հափշտակել է զգալի չափի 450.000 ՀՀ դրամ արժողության 4500կգ ցորեն, այն չպարզված «Գազ-53» մակնիշի ավտոմեքենայով տեղափոխել է իր կնոջ ծնողների Եղվարդ քաղաքի ԳՄԳ մանկապարտեզի շենք և վաճառել։ Ստացած գումարը Նելսոն Իսունցը ծախսել է իր անձնական կարիքների համար։
Այնուհետև` 10.01.2007թ. Նելսոն Իսունցը 2006թ. սեպտեմբեր-հոկտեմբեր ամիսներին խարդախությամբ Մանվել Մկրտչյանի խոշոր չափի գույքի հափշտակության կատարելու համար Կոտայքի մարզի առաջին ատյանի դատարանի կողմից ՀՀ քրեական օրենսգրքի 178-րդ հոդվածի 2-րդ մասի 2-րդ կետով դատապարտվել է 3 տարի ժամկետով ազատազրկման։ 27.05.2008թ. 1 տարի 4 ամիս 23 օր պայմանական վաղաժամկետ ազատվելով պատժի կրումից և պատիժն ամբողջությամբ չկրած, կատարել է նոր հանցագործություններ` Նելսոն Իսունցը 2008թ. օգոստոսի 9-ին «Քարդան Սիստեմ» ՍՊ ընկերության տնօրեն Լորիկ Սարկիսյանի վստահությունը չարաշահելու եղանակով` իրացնելու և գումարը նշված ընկերության դրամարկղ վճարելու պատրվակով, «Քարդան Սիստեմ» ՍՊԸ-ն Երևան քաղաքի Այվազովսկու փող. 4 հասցեի բազայից ստացել և խաբեությամբ, կրկին անգամ, հափշտակել է խոշոր չափի 2.464.000 ՀՀ դրամ արժողության 25,5 խմ եզրահան տախտակ, այն իրացրել է, իսկ ստացած գումարը «Քարդան Սիստեմ» ՍՊԸ-ի դրամարկղ չի վճարել, ծախսել է իր կարիքների համար։
Այնուհետև «Քարդան Սիստեմ» ՍՊԸ-ին խաբեությամբ առանձնապես խոշոր չափի գույքային վնաս պատճառելու դիտավորությամբ Նելսոն Իսունցը Լորիկ Սարկիսյանին հայտնել է, որ կարող է Վրաստանից եզրահան տախտակ ներկրել, որի ընթացքում կվերականգնի ընկերությունից ստացած տախտակի գումարը, միաժամանակ առաջարկել է «Քարդան Սիստեմ» ՍՊ ընկերության համար Վրաստանից տախտակ ներկրել։ Լորիկ Սարկիսյանը հավատալով ու վստահելով նրան, համաձայնվել է ընկերության համար եզրահան տախտակ ձեռք բերել և այդ նպատակով Նելսոն Իսունցին է տվել 11,936.000 ՀՀ դրամ կանխիկ գումար։
2008թ. նոյեմբերի 21-ին Նելսոն Իսունցը խարդախությամբ առանձնապես խոշոր չափի հափշտակություն կատարելու դիտավորությամբ Վրաստանի Բաթումի քաղաքում գրանցված «Օրբի-XXI» ՍՊԸ-ի փոխտնօրեն Նուգզար Բոլկվաձեին ներկայացել է որպես ՀՀ-ում գրանցված «Էրլա Աստղ» ՍՊԸ-ի տնօրեն և օգտագործելով չգործող «Էրլա-Աստղ» ՍՊԸ-ի կլոր կնիքը, նույն օրը «Օրբի-XXI» ՍՊԸ-ի աշխատակիցների հետ կնքել է եզրահան տախտակ գնելու մասին պայմանագիր` ստորագրել է այն, կեղծելով իր անուն ազգանունը, հանդես է եկել որպես ընկերության տնօրեն Արմեն Հարությունյան։ Իրականացնելով իր հանցավոր դիտավորությունը, չարաշահելով Նուգզար Բոլկվաձեի վստահությունը, Նելսոն Իսունցը տախտակի արժեքը ՀՀ ներկրելուց հետո վճարելու պատրվակով, նշված պայմանագրի հիման վրա, 28.11.2008թ. ՀՀ տարածքում նրանից ստացել և խաբեությամբ, կրկին անգամ հափշտակել է առանձնապես խոշոր չափերի հասնող 13,102.518 ՀՀ դրամին համարժեք 45.000 ԱՄՆ դոլար արժողությամբ 180 խմ եզրահան տախտակ, որն իր անձնական պարտքի դիմաց հանձնել է «Քարդան Սիստեմ» ՍՊ ընկերությանը, որով «Օրբի-XXI» ՍՊԸ-ին պատճառել է առանձնապես խոշոր չափի գույքային վնաս։
Նելսոն Իսունցը «Քարդան Սիստեմ» ՍՊԸ-ի տնօրեն Լորիկ Սարկիսյանի վստահությունը չարաշահելու եղանակով ընկերությանն առանձնապես խոշոր չափի գույքային վնաս պատճառելու դիտավորությունն իրականացնելու նպատակով, 2008թ. դեկտեմբերի սկզբին Լորիկ Սարկիսյանին առաջարկել է Բագրատաշեն մաքսակետ հասած 180 խմ եզրահան տախտակը մաքսազերծել «Քարդան սիստեմ» ՍՊԸ-ի անունով։ 05.11.2008թ. «Էրլա-Աստղ» ՍՊԸ-ի և «Քարդան Սիստեմ» ՍՊԸ-ի միջև եզրահան տախտակ մատակարարելու մասին պայմանագրի հիման վրա 05.12.2008թ. Լորիկ Սարկիսյանը 180 խմ եզրահան տախտակը մաքսազերծել է «Քարդան Սիստեմ» ՍՊԸ-ի անունով և քանի որ Նելսոն Իսունցը վրացական ընկերությանը տախտակի արժեքը, ինչպես նաև այն տեղափոխած թվով 5 ավտոմեքենաների վարորդների փոխադրավարձը չի վճարել, իսկ Լորիկ Սարկիսյանից այդ նպատակով ստացած 11,936.000 ՀՀ դրամը ծախսել է իր անձնական կարիքների համար, ապա «Քարդան Սիստեմ» ՍՊԸ-ում մուտքագրված նշված քանակության տախտակի արժեքը ձևակերպվել է որպես «Օրբի-XXI» ՍՊԸ-ի հանդեպ 13,806.600 ՀՀ դրամի կրեդիտորական պարտք, որով Նելսոն Իսունցը Լորիկ Սարկիսյանի վստահությունը չարաշահելու եղանակով «Քարդան Սիստեմ» ՍՊԸ-ին խաբեությամբ պատճառել է առանձնապես խոշոր չափի 13,806.600 ՀՀ դրամի գույքային վնաս։
Նելսոն Իսունցը խաբեությամբ «Քարդան Սիստեմ» ՍՊԸ-ին առանձնապես խոշոր չափի գույքային վնաս պատճառելու, իսկ «Օրբի-XXI» ՍՊԸ-ից խարդախությամբ առանձնապես խոշոր չափի գույքի հափշտակությունն իրականացնելու համար կեղծ փաստաթղթեր կազմելու և կնիքելու նպատակով իր աներորդի Էդգար Հարությունյանին հայտնել է, որ հանդիսանում է «Էրլա-Աստղ» ՍՊԸ-ի հիմնադիրը, ընկերության տնօրեն Ա.Հարությունյանը ժամանակավորապես բացակայում է հանրապետությունից, նրան աշխատանքի է ընդունել այդ ընկերությունում և ստանալով վերջինիս համաձայնությունը, Էդգար Հարությունյանին է տվել «Էրլա-Աստղ» ՍՊԸ-ի կնիքը և լիազորել է ընկերության տնօրեն Ա.Հարությունյանի անունից ստորագրել անհրաժեշտ փաստաթղթեր։
Էդգար Հարությունյանը, չիմանալով Նելսոն Իսունցի հանցավոր դիտավորության մասին, վերջինիս հանձարարությամբ «Էրլա-Աստղ» ՍՊԸ-ի տնօրեն Ա.Հարությունյանի անունից Բաթումի քաղաքում «Օրբի-XXI» ՍՊԸ-ի տնօրենի հետ 13.11.2008թ. թվագրությամբ ստորագրել է եզրահան տախտակ մատակարարելու մասին պայմանագիր, իսկ Երևան քաղաքում 05.11.2008թ. թվագրմամբ` «Էրլա-Աստղ» ՍՊԸ-ի կողմից «Քարդան Սիստեմ» ՍՊԸ-ին 180 խմ եզրահան տախտակ մատակարարելու մասին պայմանագիր։
«Էրլա-Աստղ» ՍՊԸ-ի անունով ստացված եզրահան տախտակը «Քարդան Սիստեմ» ՍՊԸ-ի անունով մաքսազերծելու նպատակով Նելսոն Իսունցը Երևան քաղաքի Կենտրոն վարչական տարածքում գործող, չպարզված համակարգչային ծառայության աշխատակցին ներկայանալով որպես «Էրլա-Աստղ» ՍՊԸ-ի տնօրեն, տրամադրել է «Օրբի-XXI» ՍՊԸ-ի կողմից «Էրլա-Աստղ» ՍՊԸ-ին 180 խմ եզրահան տախտակ վաճառելու մասին թիվ 1 հաշվի /ինվոյսի/ և թվով 5 միջազգային ապրանքա-տրանսպորտային բեռնագրերի բնօրինակները, հայտնել է, որ Վրաստանում փաստաթղթերը ձևակերպելու ժամանակ ընկերության անվանումը շփոթել են և պատվիրել է պատրաստել «Օրբի-XXI» ՍՊԸ-ի կողմից «Քարդան Սիստեմ» ՍՊԸ-ին 180 խմ եզրահան տախտակ վաճառելու մասին թիվ 1 հաշիվ և թվով 5 միջազգային ապրանքա-տրանսպորտային բեռնագրեր, ինչպես նաև պատվիրել է պատրաստել «Քարդան Սիստեմ» ՍՊԸ-ի 14.400.000 ՀՀ դրամը 12.12.2008թ. «Էրլա-Աստղ» ՍՊԸ-ի դրամարկղ մուտքագրելու մասին թիվ 32 օրդերի անդորրագիր։
2008թ. նոյեմբերի 05-ին «Էրլա-Աստղ» ՍՊԸ-ի և «Քարդան Սիստեմ» ՍՊԸ-ի միջև եզրահան տախտակ մատակարարելու մասին կեղծ պայմանագիրը Նելսոն Իսունցն օգտագործել է` ներկայացրել «Բագրատաշեն» մաքսակետ, որի հիման վրա լրացված փոխադրման ամփոփագրերով թույլատրվել է 180 խմ տախտակը տեղափոխել «Հայք» մաքսային պահեստ, իսկ «Էրլա-Աստղ» ՍՊԸ-ի և «Օրբի-XXI» ՍՊԸ-ի միջև կնքված առուվաճառքի մասին կեղծ պայմանագիրը օգտագործվել է Վրաստանի մաքսատանը` 180 խմ եզրահան տախտակն արտահանելու համար։
Իրավունք վերապահող կեղծ թիվ 1 հաշվի և 5 միջազգային ապրանքատրանսպորտային բեռնագրերի քսերոպատճենները Նելսոն Իսունցը 180 խմ եզրահան տախտակը մաքսազերծելու նպատակով օգտագործել` տվել է «Քարդան Սիստեմ» ՍՊԸ-ի լիազոր անձ Հովհաննես Գևոնյանին և հայտնել, որ դրանք ստացել է «Օրբի-XXI» ՍՊԸ-ի ղեկավարությունից։ Վերջինս նշված փաստաթղթերը ներկայացրել է ՀՀ ԿԱ ՊԵԿ «Արարատյան» մաքսատուն, որոնց հիման վրա 180 խմ եզրահան տախտակը մաքսազերծվել է «Քարդան Սիստեմ» ՍՊԸ-ի անունով։ Իսկ թիվ 32 օրդերի անդորրագիրն Էդգար Հարությունյանի կողմից ստորագրելուց հետո, Նելսոն Իսունցն այն օգտագործել, տվել է «Քարդան Սիստեմ» ՍՊԸ-ի տնօրեն Լորիկ Սարկիսյանին։
3.Վերաքննիչ բողոքի հիմքերը, փաստարկները և պահանջը.
Վերաքննիչ բողոքը քննվում է հետևյալ հիմքերի սահմաններում ներքոհիշյալ հիմնավորումներով.
Վերաքննիչ բողոքում ամբաստանյալը նշել է, որ դատարանը որպես ծանրացնող հանգամանք է դիտել հանցանքը կատարելու ռեցիդիվը, իսկ մեղմացնող հանգամանք` խնամքին գտնվող մանկուց հաշմանդամ երեխան, ընտանիքի ծանր սոցիալական վիճակը, հանրակացարանում բնակվելը, հանցանքը կյանքի ծանր հանգամանքների զուգորդման հետևանքով կատարելը, խնչպես նաև անկեղծորեն զղջալը, իր նկատմամբ նշանակվել է խիստ պատիժ, ուստի խնդրում է հաշվի առնել քրեական գործում առկա բազմաթիվ փաստաթղթերը, որոնք հիմք են հանդիսանում իր նկատմամբ նշանակելու նախատեսվածից ավելի ցածր պատիժ կամ կիրառել պայմանական ազատազրկում:
4 Վերաքննիչ դատարանի պատճառաբանությունները և եզրահանգումը
Քննելով վերաքննիչ բողոքը նշված հիմքերի սահմաններում, ՀՀ վերաքննիչ քրեական դատարանը գտնում է, որ Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 2010թ. հոկտեմբերի 05-ի դատական ակտը պետք է թողնել անփոփոխ, իսկ ամբաստանյալի վերաքննիչ բողոքը մերժել հետևյալ պատճառաբանությամբ.
ՀՀ քրեական օրենսգրքի 10-րդ և 61-րդ հոդվածների համաձայն` հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի, համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար: Պատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող և ծանրացնող հանգամանքներով:
ՀՀ քրեական օրենսգրքի 48-րդ հոդվածի 2-րդ մասի համաձայն` պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները:
Վերաքննիչ բողոքում ամբաստանյալը խնդրել է հաշվի առնել իր անձը բնութագրող տվյալները, մեղմացնող հանգամանքները և իր նկատմամբ պատիժ նշանակելիս ղեկավարվել ՀՀ քրեական օրենսգրքի 64-րդ հոդվածով կամ ՀՀ քրեական օրենսգրքի 70-րդ հոդվածով:
Վերաքննիչ դատարանն արձանագրում է, որ համաձայն ՀՀ քրեական օրենսգրքի 64-րդ հոդվածի 1-ին մասի` հանցանքի շարժառիթների ու նպատակների, հանցավորի դերի, հանցանքը կատարելիս ու դրանից հետո նրա վարքագծի և այլ հանգամանքների հետ կապված բացառիկ հանգամանքների առկայության դեպքում, որոնք էականորեն նվազեցնում են հանցանքի` հանրության համար վտանգավորության աստիճանը, ինչպես նաև խմբակային հանցագործության մասնակցի կողմից խմբի կատարած հանցանքը բացահայտելուն ակտիվորեն աջակցելու դեպքում, կարող է նշանակվել սույն օրենսգրքի Հատուկ մասի համապատասխան հոդվածով նախատեսված պատժի նվազագույն չափից ավելի ցածր պատիժ կամ ավելի մեղմ պատժատեսակ, քան նախատեսված է այդ հոդվածով, կամ չկիրառել որպես պարտադիր նախատեսված լրացուցիչ պատիժ:
Նույն հոդվածի 2-րդ մասի համաձայն` բացառիկ կարող են ճանաչվել ինչպես առանձին մեղմացնող հանգամանքներ, այնպես էլ այդ հանգամանքների համակցությունը:
Համաձայն նշվածի` օրենքով նախատեսվածից ավելի մեղմ պատիժ նշանակելու համար, պետք է հիմք հանդիսանան այնպիսի բացառիկ հանգամանքները, որոնք էականորեն նվազեցնում են հանցանքի` հանրության համար վտանգավորության աստիճանը:
ՀՀ քրեական օրենսգրքի 70-րդ հոդվածը սահմանում է. եթե դատարանը կալանքի, ազատազրկման կամ կարգապահական գումարտակում պահելու ձևով պատիժ նշանակելիս, հանգում է այն եզրակացության, որ դատապարտյալի ուղղվելը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մասին: Պատիժը պայմանականորեն չկիրառելիս հաշվի է առնում հանցավորի անձը բնութագրող տվյալները, պատասխանատվությունը և պատիժը մեղմացնող և ծանրացնող հանգամանքները:
Նշված հոդվածի կիրառումը հանցագործության տեսակի հետ կապված որևէ սահմանափակման չի ենթարկվում, դրա կիրառումը սահմանափակված չէ հանցավոր արարքի վտանգավորության ստիճանով և բնույթով, ինչպես նաև անձանց շրջանակով որոնց նկատմամբ այն չի կարող կիրառվել:
ՀՀ քրեական օրենսգրքի 70-րդ հոդվածի կիրառման հիմնական պայմանը պատճառաբանված լինելն է: Նշանակված պատիժը պայմանականորեն չկիրառելիս դատարանը պետք է հանգամանորեն քննության առնի ինչպես հանցագործության կատարման, այնպես էլ հանցավորի անձին վերաբերող բոլոր հանգամանքները: Կարևորն այն է, որ հանգի հիմնավոր եզրակացության, որ դատապարտյալի ուղղումը հնարավոր է առանց պատիժը կրելու:
Դատարանը նման հետևության հանգում է միայն գոյություն ունեցող տվյալների օբյեկտիվ վերլուծության հիման վրա, որոնք բնութագրում են արարքը, հանցավորի անձը և վկայում են պատիժը պայմանականորեն չկիրառելու հիմքերի առկայության մասին:
Պատիժը պայմանականորեն չկիրառելու մասին որոշում կայացնելիս, իրավասու դատարանը յուրաքանչյուր դեպքում պետք է քննարկի նաև պատժի` սոցիալական արդարության վերականգնման և պատժի ենթարկված անձի ուղղվելու նպատակների իրացման հարցը:
Ամբաստանյալ Նելսոն Իսունցի վերաքննիչ բողոքի առկայության պայմանում, քննության առնելով նրա նկատմամբ նշանակված պատժի հարցը, վերաքննիչ դատարանը գտնում է, որ ընդհանուր իրավասության դատարանն ամբաստանյալ Նելսոն Սերյոժայի Իսունցի նկատմամբ պատիժ նշանակելիս հաշվի է առել` որպես պատասխանատվությունը և պատիժը մեղմացնող հանգամանք` հանցավորի խնամքին մինչև 14 տարեկան` 13.11.2004թ. ծնված, մանկուց հաշմանդամ երեխայի առկայությունը, նրա ընտանիքի ծանր սոցիալական վիճակը և հանրակացարանում ապրելը, հանցանքը կյանքի ծանր հանգամանքների զուգորդման հետևանքով կատարելը և անկեղծորեն զղջալը, պատասխանատվությունը և պատիժը ծանրացնող հանգամանք է դիտել հանցանքը կատարելու ռեցիդիվը, այն է` հանցանք կատարելն այն անձի կողմից, ով դատվածություն ունի նախկինում դիտավորությամբ կատարված հանցանքի համար և նրա նկատմամբ նշանակել է համաչափ պատիժ:
Տվյալ դեպքում վերաքննիչ դատարանը Նելսոն Սերյոժայի Իսունցի նկատմամբ ՀՀ քրեական օրենսգրքի 64-րդ հոդվածի կիրառմամբ` նախատեսվածից ավելի մեղմ պատիժ նշանակելու համար, որևէ բացառիկ հանգամանք չի ճանաչում, ինչպես նաև արձանագրում է, որ ազատազրկման ձևով նշանակված պատիժը պայմանականորեն չկիրառելը չի կարող ապահովել պատժի նպատակները, և նման պայմաններում հանգում է հետևության, որ ամբաստանյալի ուղղվելը հնարավոր չէ առանց պատիժը կրելու:
ՀՀ Վերաքննիչ դատարանը գտնում է, որ Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի դատական ակտն ամբաստանյալ Նելսոն Սերյոժայի Իսունցի նկատմամբ հիմնավորված է, օրինական, հետևաբար վերաքննիչ բողոքում նշված պատճառաբանությունները հիմք չեն կարող հանդիսանալ այն բեկանելու, ամբաստանյալի նկատմամբ նշանակված պատիժը մեղմացնելու համար:
ՀՀ վերաքննիչ քրեական դատարանը` ղեկավարվելով ՀՀ Սահմանադրության 92-րդ հոդվածով, ՀՀ քրեական դատավարության օրենսգրքի 23-րդ, 390-րդ, 393-394-րդ, 402-րդ հոդվածներով,
Ո Ր Ո Շ Ե Ց

Ամբաստանյալ Նելսոն Սերյոժայի Իսունցի վերաբերյալ` ՀՀ քրեական օրենսգրքի 178-րդ հոդվածի 3-րդ մասի 1-ին կետով, ՀՀ քրեական օրենսգրքի 184-րդ հոդվածի 2-րդ մասի 1-ին կետով և ՀՀ քրեական օրենսգրքի 325-րդ հոդվածի 1-ին մասով, Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 2010թ. հոկտեմբերի 05-ի դատավճիռը թողնել անփոփոխ, իսկ ամբաստանյալի վերաքննիչ բողոքը մերժել:
Սույն որոշումը կարող է բողոքարկվել ՀՀ վճռաբեկ դատարան հրապարակման պահից մեկամսյա ժամկետում:


ՆԱԽԱԳԱՀՈՂ ԴԱՏԱՎՈՐ ստորագրություն
ԴԱՏԱՎՈՐՆԵՐ ստորագրություններ

Իսկականի հետ ճիշտ է:

ՆԱԽԱԳԱՀՈՂ ԴԱՏԱՎՈՐ Մ.ՌԵՀԱՆՅԱՆ