ԵԷԴ/0102/01/10

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ` Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ` Լ. ՄԻՐԶՈՅԱՆ

Մասնակցությամբ`

ՄԵՂԱԴՐՈՂ` Վ. ՄՈւՐԱԴՅԱՆ
ՊԱՇՏՊԱՆ` Գ. ԱՆՏՈՆՅԱՆ

2010թ. հոկտեմբերի 11-ին դատարանում
Դռնբաց դատական նիստում քննեց քրեական գործն ըստ մեղադրանքի` Արա Մարտունու Ավետիսյանի, ծնված 07.02.1968թ., Արմավիրի մարզ գ.Գետաշեն, ազգությամբ հայ, ՀՀ քաղաքացի, միջնակարգ-մասնագիտական կրթությամբ, ամուսնացած, նախկինում չդատված, աշխատել է ՀՀ ԱՆ «Նուբարաշեն» ՔԿՀ-ում որպես ՏԱ բաժնի կրտսեր մասնագետ, բնակվել է ք.Երևան Նոր-Նորքի 6 զանգված, Լյուքսեմբուրգի 4 շենք, թիվ 22 բնակարանում։
Մեղադրվում է ՀՀ քր. օր-ի 266 հոդվածի 2-րդ մասի 2-րդ և 3-րդ կետերով։
Սույն գործով կալանքի տակ է 04.05.2010թ.։
Դատաքննությամբ և գործի տվյալներով պարզվեց հետևյալը.
Նախաքննական մարմինն ամբաստանյալ Արա Ավետիսյանին ՀՀ քր. օր-ի 266 հոդվածի 2-րդ մասի 2-րդ և 3-րդ կետերով մեղադրանք է առաջադրել այն բանի համար, որ 2009թ. հուլիսից աշխատելով ՀՀ ԱՆ «Նուբարաշեն» քրեակատարողական հիմնարկի տնտեսական ապահովման բաժնում որպես կրտսեր մասնագետ, ազատազրկման վայրում թմրամիջոցներ իրացնելու նպատակով 2010թ. մայիսի 3-ին, ժամը 0800-ի սահմաններում Երևան քաղաքի Նոր-Նորքի 6-րդ զանգվածում հանդիպել է ինքնությունը չպարզված անձի հետ և նրանից ձեռք է բերել խոշոր չափի` 1.035 գրամ «ացետիլացված ափիոն» տեսակի թմրամիջոց, որը թաքցված է եղել «Նոկիա-1200» տեսակի բջջային հեռախոսի դիմային կափարիչի տակ։ Այնուհետև, թմրամիջոցը պահել, փոխադրել է ՀՀ ԱՆ «Նուբարաշեն» ՔԿ հիմնարկի հարակից տարածք, որտեղ և հայտնաբերվել է ՔԿ հիմնարկի օպերատիվ բաժնի աշխատակիցների կողմից։
Դատաքննությամբ առաջադրված մեղադրանքում ամբաստանյալ Արա Ավետիսյանը ՀՀ քր. օր-ի 266 հոդվածի 2-րդ մասի 2-րդ և 3-րդ կետերով իրեն մեղավոր չճանաչեց և ցուցմունք տվեց այն մասին, որ 2009թ. հուլիսից աշխատում է ՀՀ ԱՆ «Նուբարաշեն» ՔԿ հիմնարկում որպես տնտեսական մասի կրտսեր մասնագետ։ 2010թ. մայիսի 3-ին ՀՀ ԱՆ «Նուբարաշեն» ՔԿ հիմնարկի օպերատիվ բաժնի աշխատակիցների կողմից «Նոկիա-1200» բջջային հեռախոսի դիմային կափարիչի տակ հայտնաբերված 1.035 գրամ «ացետիլացված ափիոն» տեսակի թմրամիջոցը ամիսներ առաջ գտել է իրենց շենքի մուտքից, որը գործածելու համար ապօրինաբար պահել է իր մոտ։ Նշված թմրամիջոցը աշխատանքի վայրում գործածելու նպատակով 2010թ. մայիսի 3-ին թաքցրել է «Նոկիա-1200» տեսակի բջջային հեռախոսի դիմային կափարիչի տակ և տարել է ՔԿ հիմնարկ, որտեղ օպերատիվ բաժնի աշխատակիցների կողմից հայտնաբերվել ու առգրավվել է։ Ինքը թմրամիջոցը իրացնելու նպատակ չի ունեցել, այլ ձեռք է բերել իր օգտագործման համար։
Վկաներ` ՀՀ ԱՆ «Նուբարաշեն» քրեակատարողական հիմնարկի օպերատիվ բաժնի աշխատակիցներ Գագիկ Հարությունյանը և Եգոր Հակոբյանը նույնաբովանդակ ցուցմունքներ են տվել այն մասին, որ 2010թ. օպերատիվ տեղեկություններ են ստացել, որ ՀՀ ԱՆ «Նուբարաշեն» ՔԿ հիմնարկի աշխատակից Արա Ավետիսյանը բջջային հեռախոսի մեջ թաքցրած թմրամիջոց է մուտք անելու քրեակատարողական հիմնարկ։ 2010թ. մայիսի 3-ի առավոտյան ՔԿ հիմնարկի հսկիչ-անցագրային կետում սպասել են Արա Ավետիսյանին, սակայն երբ վերջինս մտել է ներս նրա անձնական խուզարկությամբ որևէ արգելված իր չեն հայտնաբերել։ Ճշտելով, որ Արա Ավետիսյանը աշխատանքի է եկել գործընկերոջ` Գրիգոր Սարգսյանի ավտոմեքենայով, սուգման են ենթարկել Գրիգորի ավտոմեքենան և հետևի նստատեղի վրա հայտնաբերել են Արա Ավետիսյանի կողմից թողած համազգեստի բաճկոնը։ Այնուհետև, որպես ընթերակա հրավիրված քաղաքացիների ներկայությամբ, զննման են ենթարկել բաճկոնի գրպանից հայտնաբերված «Նոկիա-1200» տեսակի բջջային հեռախոսը, որի դիմային կափարիչի տակ հայտնաբերել են սև գույնի, շուրջ 1 գրամ քաշ ունեցող զանգված, որը հետագայում պարզվել է, որ «ափիոն» տեսակի թմրամիջոց է։
Վկա` Գրիգոր Սարգսյանը ցուցմունք է տվել այն մասին, որ աշխատում է ՀՀ ԱՆ «Նուբարաշեն» ՔԿ հիմնարկի տնտեսական ապահովման բաժնում որպես կրտսեր մասնագետ և աշխատելու ընթացքում ճանաչել է նույն բաժնի աշխատակից Արա Ավետիսյանին։ Ամեն օր աշխատանքի գնալու ժամանակ, եթե ճանապարհին հանդիպել է Արա Ավետիսյանին, նրան իր հետ վերցրել է։ 2010թ. մայիսի 3-ի առավոտյան Արա Ավետիսյանին իր հետ բերել է ՔԿ հիմնարկ։ Քիչ անց, իրեն է մոտեցել ՔԿ հիմնարկի օպերատիվ բաժնի աշխատակիցներից մեկը և ստուգման համար խնդրել է բացել ավտոմեքենան։ Ավտոմեքենայի ստուգմամբ սրահից հայտնաբերել են Արա Ավետիսյանի կողմից թողած համազգեստի բաճկոնը, որի գրպանից հայտնաբերել են «Նոկիա-1200» տեսակի բջջային հեռախոսը։ Այնուհետև, ընթերականների ներկայությամբ զննվել է հեռախոսը և դիմային կափարիչի տակից հայտնաբերվել է սև գույնի, տհաճ հոտով զանգված, որի քաշը կազմել է շուրջ 1 գրամ։
Վկա` Հրաչիկ Գևորգյանը ցուցմունք է տվել այն մասին, որ 2008թ. հունիսի 13-ից պատիժ է կրում ՀՀ ԱՆ «Նուբարաշեն» քրեակատարողական հիմնարկի տնտեսական մասում։ 2009թ. ամառվանից ճանաչել է հսկիչ Արա Ավետիսյանին, որի հետ գտնվել է նորմալ փոխհարաբերությունների մեջ։ Արա Ավետիսյանի հետ երբևէ որևէ գործարքի մեջ չի մտել, նրան երբեք չի խնդրել դրսից հեռախոս բերել և 2010թ. մայիսի 3-ին նրա մոտ հայտնաբերված «Նոկիա-1200» բջջային հեռախոսի մասին որևէ տեղեկություն չի ունեցել։
Վկա` Ազատ Ազատյանը ցուցմունք է տվել այն մասին, որ 2006թ. պատիժ է կրում ՀՀ ԱՆ «Նուբարաշեն» քրեակատարողական հիմնարկի տնտեսական մասում։ Այդ ընթացքում ծանոթացել է դատապարտյալ Հրաչիկ Գևորգյանի և հսկիչ Արա Ավետիսյանի հետ։ Պատահական ներկա է գտնվել Հրաչիկ Գևորգյանի և Արա Ավետիսյանի խոսակցությանը, երբ վերջինս փորձել է համոզել Հրաչիկին հեռախոս փոխանցել իր բարեկամին։ Արա Ավետիսյանին խնդրել է այլևս նման հանձնարարություն չտա Հրաչիկին, իսկ Հրաչիկին էլ նախատել է, որ նման բան չանի։
Դատարանի կողմից հետազոտվեց Գ. Սարգսյանի ավտոմեքենայի և դրանում հայտնաբերված իրերի զննման վերաբերյալ 2010թ. մայիսի 3-ին կազմված արձանագրությունը, համաձայն որի ընթերականների ներկայությամբ Գրիգոր Սարգսյանին պատկանող «Վազ-2106» մակնիշի ավտոմեքենայի հետևի նստատեղից հայտնաբերված համազգեստային բաճկոնի գրպանում գտնվող «Նոկիա-1200» տեսակի բջջային հեռախոսի կափարիչի տակից հայտնաբերվել է չորս կտոր սև գույնի սուր հոտով պինդ զանգված, որոնց ընդհանուր քաշը կազմել է 1.1 գրամ։
Թմրանյութերի քրեագիտական փորձաքննության թիվ 13911005 եզրակացությունը, համաձայն որի փորձաքննությանը ներկայացված զանգվածը հանդիսանում է տնայնագործական եղանակով պատրաստված «ացետիլացված ափիոն» տեսակի թմրամիջոց և ունի 1.035 գրամ մաքուր քաշ։
2010թ. հունիսի 16-ի որոշումը, որով գործով իրեղեն ապացույց է ճանաչվել 1.035 գրամ մաքուր քաշ ունեցող «ացետիլացված ափիոն» տեսակի թմրամիջոցը, որը հայտնաբերվել է Արա Ավետիսյանին պատկանող բաճկոնի գրպանում գտնվող բջջային հեռախոսի կափարիչի տակ, ինչպես նաև գործով ձեռք բերված այլ փաստական տվյալները։
Դատաքննությամբ հաստատված հանգամանքները հաշվի առնելով մեղադրող-դատախազ Վ.Մուրադյանը հրաժարվեց ամբաստանյալ Արա Ավետիսյանի նկատմամբ ՀՀ քր. օր-ի 266 հոդվածի 2-րդ մասի 2-րդ և 3-րդ կետերով առաջադրված մեղադրանքից և դատարանում մեղադրանքը պաշտպանեց ՀՀ քր. օր-ի 268 հոդվածի 2-րդ մասի 2-րդ կետով, պատճառաբանելով, որ ինչպես նախաքննության, այնպես էլ դատաքննության ընթացքում այլ ապացույցներ ձեռք չեն բերվել Արա Ավետիսյանի կողմից թմրամիջոցը` իրացնելու նպատակով ձեռք բերելը և պահելը, իսկ դատաքննությամբ հետազոտված ապացույցներով հնարավոր չի եղել հերքել Արա Ավետիսյանի ցուցմունքները։
Գնահատելով դատաքննությամբ հետազոտված բոլոր ապացույցները, դրանք համադրելով իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված, ինչպես նաև ներքին համոզմամբ, դատարանը գտնում է, որ մեղադրող Վ. Մուրադյանի կողմից Արա Ավետիսյանին ՀՀ քր. օր-ի 268 հոդվածի 2-րդ մասի 2-րդ կետով նոր մեղադրանք առաջադրելը, հիմնավոր է, այն բխում է գործի դատաքննությամբ ձեռք բերված տվյալների ամբողջական վերլուծությունից և ապացույցների իրավական ճիշտ գնահատումից։
Դատարանը նույնպես գտնում է, որ ամբաստանյալ Արա Ավետիսյանի կատարած արարքին տրվել է ճիշտ իրավական որակում, քանի որ ինչպես նախաքննությամբ, այնպես էլ դատաքննությամբ հետազոտված բոլոր ապացույցները վկայում են, որ ամբաստանյալ Արա Ավետիսյանի կատարած քրեորեն հետապնդելի բոլոր գործողություններն ուղղված են եղել ոչ թե իրացնելու նպատակով խոշոր չափի թմրամիջոց ձեռք բերելուն, այլ առանց իրացնելու նպատակով ապօրինաբար խոշոր չափի թմրամիջոց ձեռք բերելուն, պահելուն և հետագայում գործածելուն։
Այսպիսով դատարանը ապացուցված համարեց, որ Արա Մարտունու Ավետիսյանը կատարել է արարք, որը նախատեսված է ՀՀ քր. օր-ի 268 հոդվածի 2-րդ մասի 2-րդ կետով, որով և պետք է ենթարկվի քրեական պատասխանատվության։
Պատիժ նշանակելիս դատարանը հաշվի է առնում արարքի հասարակական վտանգավորությունը, ամբաստանյալի ինքնությունը և գործի ողջ հանգամանքները։
Արա Ավետիսյանի պատասխանատվությունը և պատիժը ծանրացնող հանգամանքներ չկան։
Դատարանն ամբաստանյալի պատասխանատվությունը և պատիժը մեղմացնող հանգամանք է համարում այն, որ վերջինս երիտասարդ է, նախկինում արատավորված չի եղել, զղջացել է կատարած արարքի համար և ընդունել մեղքը։
Քննարկելով խափանման միջոցի հարցը, դատարանը գտնում է, որ ամբաստանյալ Ա. Ավետիսյանի նկատմամբ ընտրված կալանք խափանման միջոցը պետք է թողնել անփոփոխ։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված 1.035 գրամ մաքուր քաշով «ացետիլացված ափիոն» տեսակի թմրամիջոցը պետք է ոչնչացնել։
Ղեկավարվելով ՀՀ քր. դատ. օր-ի 357-360 հոդվածներով, դատարանը.

Վ Ճ Ռ Ե Ց

Արա Մարտունու Ավետիսյանին մեղավոր ճանաչել ՀՀ քր. օր-ի 268 հոդվածի 2-րդ մասի 2-րդ կետով և դատապարտել ազատազրկման` 1/մեկ/ տարի 6/վեց/ ամիս ժամկետով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել 04.05.2010թ.։
Կալանք խափանման միջոցը թողնել անփոփոխ մինչև դատավճռի օրինական ուժի մեջ մտնելը։
Գործով իրեղեն ապացույց ճանաչված 1.035 գրամ մաքուր քաշով «ացետիլացված ափիոն» տեսակի թմրամիջոցը դատավճիռն օրինական ուժի մեջ մտնելուց հետո ոչնչացնել։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ