ԵԷԴ/0100/01/10

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ` Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ` Լ. ՄԻՐԶՈՅԱՆ

Մասնակցությամբ`

ՄԵՂԱԴՐՈՂ` Ա. ՄՈւՐԱԴՅԱՆ
ՊԱՇՏՊԱՆ` Ի. ՊԵՏՐՈՍՅԱՆ

2010թ. հոկտեմբերի 12-ին դատարանում
Դռնբաց դատական նիստում քննեց քրեական գործն ըստ մեղադրանքի` Արման Սուրենի Չախոյանի, ծնված 23.05.1978թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնալուծված, չի աշխատել, նախկինում երկու անգամ դատված`
1. Երևան քաղաքի Ավան և Նոր-Նորք համայնքների առաջին ատյանի դատարանի 29.10.2007թ. դատավճռով ՀՀ քր. օր-ի 177 հոդվածի 1-ին մասով, 177 հոդվածի 2-րդ մասի 4-րդ կետով և 178 հոդվածի 2-րդ մասի 3-րդ կետով, 64 և 66 հոդվածների կիրառմամբ դատապարտվել է ազատազրկման` 6 ամիս ժամկետով և տուգանքի` 200.000 ՀՀ դրամի չափով,
2. Երևանի քրեական դատարանի 06.05.2008թ. դատավճռով ՀՀ քր. օր-ի 177 հոդվածի 2-րդ մասի 4-րդ կետով, 178 հոդվածի 2-րդ մասի 3-րդ կետով և 271 հոդվածի 1-ին մասով, 66 հոդվածի կիրառմամբ դատապարտվել է ազատազրկման` 3 տարի 6 ամիս ժամկետով և տուգանքի` 80.000 ՀՀ դրամի չափով։ Երևանի քրեական դատարանի 18.09.2008թ. որոշմամբ ազատվել է ՀՀ քր. օր-ի 271 հոդվածի 1-ին մասով նշանակված պատժից։ 10.07.2009թ. կիրառվել է համաներում, պատժաչափի չկրած մասը կրճատվել է 1/3-ով և վերջնական պատժաչափ է թողնվել կրելու` 2 տարի 9 ամիս 23 օր, բնակվել է ք.Երևան Կոմիտաս 1 շենք, բն. 104, ներկայումս ՀՀ ԱՆ «Նուբարաշեն» քրեակատարողական հիմնարկի դատապարտյալ։
Մեղադրվում է ՀՀ քր. օր-ի 34-268 հոդվածի 3-րդ մասով։
Դատաքննությամբ և գործի տվյալներով պարզվեց հետևյալը.
Արման Սուրենի Չախոյանը Երևանի քրեական դատարանի 06.05.2008թ. դատավճռով ՀՀ քր. օր-ի 177 հոդվածի 2-րդ մասի 4-րդ կետով և 178 հոդվածի 2-րդ մասի 3-րդ կետով նախատեսված հանցագործություն կատարելու համար դատապարտված լինելով, և պատիժը ՀՀ ԱՆ «Նուբարաշեն» քրեակատարողական հիմնարկում կրելու ընթացքում, 2010թ. ապրիլի 6-ին, քննությամբ չպարզված անձից, առանց իրացնելու նպատակի` իր գործածման համար, փորձել է ապօրինաբար ձեռք բերել առանձնապես խոշոր չափերի` ընդհանուր 0.37 գրամ հերոին տեսակի թմրամիջոց։
Այսպես. Արման Չախոյանը պատիժը կրելու ընթացքում իր գործածման համար ապօրինաբար թմրամիջոցներ ձեռք բերելու համար զանգահարել է քննությամբ չպարզված անձնավորությանը և խնդրել է ՔԿ հիմնարկ առաքել առանձնապես խոշոր չափերի` 0.37 գրամ հերոին տեսակի թմրամիջոց։ Այդ նպատակով իր խցակից` Հարություն Վարդապետյանին խնդրել է վերջինիս հոր` Հրանտ Վարդապետյանի միջոցով հանձնուք փոխանցել ՀՀ ԱՆ «Նուբարաշեն» ՔԿ հիմնարկ։
2010թ. ապրիլի 6-ին Հրանտ Վարդապետյանը ընդառաջելով խնդրանքին, «Բելաջո» ռեստորանային համալիրի մոտ հանդիպել է քննությամբ չպարզված անձին, վերցրել հանձնուքը և ներկայացրել ՀՀ ԱՆ «Նուբարաշեն» ՔԿ հիմնարկ, որտեղ կատարված խուզարկությամբ հանձնուքում առկա «Սևգարդ» տեսակի օճառի մեջ հայտնաբերվել է 0.37 գրամ «հերոին» տեսակի թմրամիջոց։
Վերը նշված հանցավոր արարքի կատարման համար Արման Սուրենի Չախոյանին մեղադրանք է առաջադրվել ՀՀ քր. օր-ի 34-268 հոդվածի 3-րդ մասով։
Դատաքննությամբ առաջադրված մեղադրանքում ամբաստանյալ Արման Չախոյանն իրեն լիովին մեղավոր ճանաչեց, և օգտվելով իր սահմանադրական իրավունքից, հրաժարվեց դատաքննությամբ ցուցմունք տալուց։
Նախաքննության ընթացքում Արման Չախոյանը հայտնել է, որ 2010թ. ապրիլի սկզբներին զանգահարել է իր վաղեմի ընկեր Արթուրը և պայմանավորվել թմրամիջոցներ առաքել իրեն։ Այդ նպատակով Արթուրին տվել է իր խցակից Հրանտ Վարդապետյանի հոր հեռախոսահամարը և հայտնել, որ թմրամիջոցը այնպես թաքցնի հանձնուքի մեջ, որ չնկատվի և փոխանցի նրան։
2010թ. ապրիլի 6-ին ՔԿ հիմնարկի աշխատակիցներից տեղեկացել է, որ Հարություն Վարդապետյանի հոր կողմից ներկայացված հանձնուքում հայտնաբերվել է թմրամիջոցը։
Ամբաստանյալ Արման Չախոյանի կատարած արարքը հիմնավորվեց գործով ձեռք բերված հետևյալ ապացույցներով.
Վկա` Սուրեն Խաչատրյանի ցուցմունքով այն մասին, որ 2010թ. ապրիլի 6-ին, ժամը 1300-ի սահմաններում օգնել է իր հարևան Հրանտ Վարդապետյանին որպեսզի վերջինս հանձնուք տեղափոխի որդուն` ՀՀ ԱՆ «Նուբարաշեն» ՔԿ հիմնարկի դատապարտյալ Հարություն Վարդապետյանին։ Ճանապարհին` «Բելաջիո» ռեստորանային համալիրի մոտ, հանդիպել են մի երիտասարդի, որը ևս հանձնուք է տվել իրենց, որը ներկայացրել են ՀՀ ԱՆ «Նուբարաշեն» ՔԿ հիմնարկի հանձնուքների ընդունման կետ։ Շահենի հետ դրսում մոտ մեկ ժամ սպասելուց հետո, Հրանտ Վարդապետյանը կանչել է հանձնուքների ընդունման կետ և հայտնել է, որ փոխանցված հանձնուքում առկա օճառի մեջ հայտնաբերվել է թմրամիջոց։
Վկա` Հրանտ Վարդապետյանի ցուցմունքով այն մասին, որ 2010թ. ապրիլի 6-ին իր որդու` Հարություն Վարդապետյանի ծննդյան օրվա կապակցությամբ հանձնուք է պատրաստել, որի ընթացքում զանգահարել է Հարությունը, տվել է բջջային հեռախոսի համար ու խնդրել է զանգահարել այդ համարով և ՀՀ ԱՆ «Նուբարաշեն» ՔԿ հիմնարկ այցելելու ճանապարհին խցակցի համար հանձնուք վերցնել և փոխանցել ՔԿ հիմնարկ։ Զանգահարել է այդ համարով և Արման անունով մի երիտասարդի հետ պայմանավորվել է հանդիպել «Բելաջիո» ռեստորանային համալիրի մոտ։ Հանձնուքը ծանր լինելու պատճառով, խնդրել է իր եղբորորդուն` Շահեն Վարդապետյանին և հարևան` Սուրեն Խաչատրյանին, օգնել իրեն։ Ժամը 1300-ի սահմաններում «Բելաջիո» ռեստորանային համալիրի մոտ հանդիպել է Արմանի հետ, նրանից վերցրել է հանձնուքը և իր կողմից պատրաստած հանձնուքի հետ միասին տեղափոխել ՔԿ հիմնարկ, որտեղ հանձնուքների ընդունման կետի աշխատակիցների կողմից կատարված խուզարկության ժամանակ հանձնուքում առկա «Սևգարդ» տեսակի օճառի մեջ հայտնաբերվել է ծխախոտի տուփի պոլիէթիլենային թաղանթի մեջ փաթեթավորված բաց շագանակագույն փոշիանման զանգված։
Վկաներ` ՀՀ ԱՆ «Նուբարաշեն» ՔԿ հիմնարկի աշխատակիցներ Հովհաննես Մանջիկյանի դատաքննությամբ տված և Մուշեղ Դիլանյանի նախաքննությամբ տրված և դատաքննությամբ հետազոտված նույնաբովանդակ ցուցմունքներով այն մասին, որ 2010թ. ապրիլի 6-ին ՀՀ ԱՆ «Նուբարաշեն» ՔԿ հիմնարկի հանձնուքների ընդունման կետում կատարել են Հրանտ Վարդապետյանի կողմից դատապարտյալ Հարություն Վարդապետյանի անվամբ ներկայացված հանձնուքի խուզարկությունը, որի ընթացքում հանձնուքում առկա «Սևգարդ» տեսակի օճառի մեջ հայտնաբերել են պոլիէթիլենային թափանցիկ թաղանթով փաթեթավորված շագանակագույն փոշիանման զանգված, որի կապակցությամբ Հրանտ Վարդապետյանը հայտարարել է, որ հանձնուքը որդու խնդրանքով իրեն է փոխանցել մի երիտասարդ։
Վկա` Շահեն Վարդապետյանի ցուցմունքով այն մասին, որ 2010թ. ապրիլի 6-ին օգնել է իր հորեղբորը` Հրանտ Վարդապետյանին, որդու` Հարություն Վարդապետյանի ծննդյան օրվա կապակցությամբ հանձնուք պատրաստել, որի ընթացքում հորեղբայրը խնդրել է սեղանի վրա դրված թղթի վրա գրված հեռախոսահամարը փոխանցել իրեն։ Փոխանցելու ընթացքում նկատել է, որ թղթի վրա գրված է Արման և նրա հեռախոսահամարը։ Հետաքրքրվել է, թե ով է Արմանը, հորեղբայրը պատասխանել է, որ Հարությունի խցակցի ծանոթն է, որից պետք է հանձնուք վերցնեն և տեղափոխեն ՀՀ ԱՆ «Նուբարաշեն» ՔԿ հիմնարկ։ Հանձնուքը ծանր լինելու պատճառով, խնդրել են նաև հարևան` Սուրեն Խաչատրյանին, օգնել իրենց։ Ժամը 1300-ի սահմաններում ուղևորվել են ՔԿ հիմնարկ։ Ճանապարհին` «Բելաջիո» ռեստորանային համալիրի մոտ, հանդիպել են մի երիտասարդի, որից վերցրել են հանձնուքը և փոխանցել ՔԿ հիմնարկ։ Սուրենի հետ դրսում մոտ մեկ ժամ սպասելուց հետո, Հրանտ Վարդապետյանը կանչել է հանձնուքների ընդունման կետ և հայտնել է, որ փոխանցված հանձնուքում առկա օճառի մեջ հայտնաբերվել է թմրամիջոց։
Վկա` Հարություն Վարդապետյանի նախաքննությամբ տրված և դատաքննությամբ հետազոտված ցուցմունքով այն մասին, որ 2010թ. ապրիլի 5-ին իր խցակից Արման Չախոյանը, տեղեկանալով, որ հաջորդ օրը իր ծննդյան օրվա կապակցությամբ հայրը հանձնուք է փոխանցելու, խնդրել է վերջինիս միջոցով ծանոթից հանձնուք վերցնել և փոխանցել իրեն։ Վստահելով Ա. Չախոյանին, 2010թ. ապրիլի 6-ին խնդրել է հորը խցակցի համար ՀՀ ԱՆ «Նուբարաշեն» ՔԿ հիմնարկի ճանապարհին հանձնուք վերցնել` տալով բջջային հեռախոսահամարը, որը իրեն տվել է Ա. Չախոյանը` հանձնուքը փոխանցող անձի հետ կապնվելու և այն վերցնելու նպատակով։ 2010թ. ապրիլի 6-ին, ժամը 1800-ի սահմաններում խցում կատարվել է խուզարկություն, ապա իրենից բացատրություն են վերցրել, որի ընթացքում տեղեկացել է, որ հանձնուքում առկա «Սևգարդ» տեսակի օճառի մեջ թմրամիջոց է հայտնաբերվել։
Արման Չախոյանի հանցանքը հիմնավորվեց նաև դատաքիմիական փորձաքննության թիվ 10171005 եզրակացությամբ, համաձայն որի փորձաքննությանը ներկայացված 0.37 գրամ մաքուր քաշով դարչնագույն փոշենման զանգվածը հանդիսանում է տնայնագործական եղանակով պատրաստված «հերոին» տեսակի թմրամիջոց։
Հանձնուքի խուզարկությամբ հայտնաբերված իրերի զննության, կշռման, առգրավման և կնքման վերաբերյալ արձանագրությամբ։
Իրեղեն ապացույց ճանաչված և քրեական գործին կցված 0.37 գրամ «հերոին» տեսակի թմրամիջոցով, ինչպես նաև իրեղեն ապացույց ճանաչված «Սևգարդ» տեսակի օճառով, այլ փաստաթուղթ ճանաչված Արման Սուրենի Չախոյանի բացատրության արձանագրությամբ։
Դատանարկոլոգիական փորձաքննության թիվ 204/10 եզրակացությամբ, համաձայն որի Արման Սուրենի Չախոյանը տառապում է ափիոնային թմրամոլություն դադարի շրջանում, ուստի հարկադիր բուժման կարիք չունի, կանաբինոիդային թմրանյութերի գործածումը կրում է էպիզոդիկ բնույթ, ուստի հարկադիր բուժման կարիք չունի, ինչպես նաև գործով ձեռք բերված այլ փաստական տվյալներով։
Այսպիսով դատարանը ապացուցված համարեց, որ Արման Սուրենի Չախոյանը կատարել է արարք, որը նախատեսված է ՀՀ քր. օր-ի 34-268 հոդվածի 3-րդ մասով, որով և պետք է ենթարկվի քրեական պատասխանատվության։
Պատիժ նշանակելիս դատարանը հաշվի է առնում արարքի հասարակական վտանգավորությունը, ամբաստանյալի ինքնությունը և գործի ողջ հանգամանքները։
Արման Չախոյանի պատասխանատվությունը և պատիժը ծանրացնող հանգամանք է դիտվում հանցանքը կատարելու առանձնապես վտանգավոր ռեցիդիվը։
Դատարանն ամբաստանյալի պատասխանատվությունը և պատիժը մեղմացնող հանգամանք է համարում այն, որ վերջինս երիտասարդ է, զղջացել է կատարած արարքի համար և ընդունել մեղքը։
Երևանի քրեական դատարանի 06.05.2008թ. դատավճռով Արման Չախոյանը ՀՀ քր. օր-ի 177 հոդվածի 2-րդ մասի 4-րդ կետով, 178 հոդվածի 2-րդ մասի 3-րդ կետով և 271 հոդվածի 1-ին մասով դատապարտվել է ազատազրկման` 3 տարի 6 ամիս ժամկետով և տուգանքի` 80.000 ՀՀ դրամի չափով։ 10.07.2009թ. կիրառվել է համաներում, պատժաչափի չկրած մասը կրճատվել է 1/3-ով և վերջնական պատժաչափ է թողնվել կրելու` 2 տարի 9 ամիս 23 օր, նոր հանցանքը կատարել է մինչև պատժի լրիվ կրումը, ուստի դատարանը գտնում է, որ նոր նշանակվող պատժին մասնակիորեն պետք է գումարել վերը նշված դատավճռով սահմանված և նրա կողմից պատժի չկրած մասը։
Երևանի քրեական դատարանի 18.09.2008թ. որոշմամբ Արման Սուրենի Չախոյանը ազատվել է Երևանի քրեական դատարանի 06.05.2008թ. դատավճռով ՀՀ քր. օր-ի 271 հոդվածի 1-ին մասով նշանակված պատժից։
ՀՀ ոստիկանության ՔԳՎ Էրեբունու քննչական բաժնի 06.07.2010թ. որոշմամբ թիվ 12115610 քրեական գործից պատճենահանման եղանակով անջատվել և առանձին վարույթ է առանձնացվել ՀՀ ԱՆ «Նուբարաշեն» ՔԿ հիմնարկի դատապարտյալ Արման Սուրենի Չախոյանին առանձնապես խոշոր չափերի` 0.37 գրամ «հերոին» տեսակի թմրամիջոց իրացնող անհայտ անձի մասը, որի գործողություններում առկա է ՀՀ քր. օր-ի 266 հոդվածի 3-րդ մասի 2-րդ կետով նախատեսված հանցագործության հատկանիշներ։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված «Սևգարդ» տեսակի օճառը և 0.37 գրամ «հերոին» տեսակի թմրամիջոցը պետք է վերադարձնել ՀՀ ոստիկանության ՔԳՎ Էրեբունու քննչական բաժին` թիվ 12115610 քրեական գործից անջատված մասին կից՝ անհայտ անձի նկատմամբ քննություն կատարելու համար, իսկ քրեական գործին կցված և ապացույց ճանաչված այլ փաստաթուղթ հանդիսացող` Ա. Չախոյանի բացատրությունը` թողնել քրեական գործում։
Ղեկավարվելով ՀՀ քր. դատ. օր-ի 357-360 հոդվածներով, դատարանը.

Վ Ճ Ռ Ե Ց

Արման Սուրենի Չախոյանին մեղավոր ճանաչել ՀՀ քր. օր-ի 34-268 հոդվածի 3-րդ մասով և դատապարտել ազատազրկման` 2/երկու/ տարի 6/վեց/ ամիս ժամկետով։
ՀՀ քր. օր-ի 67 հոդվածի կիրառմամբ նոր նշանակված պատժի ժամկետին մասնակիորեն գումարել Երևանի քրեական դատարանի 06.05.2008թ. դատավճռով ազատազրկման ձևով նշանակված պատժի չկրած մասից` 15/տասնհինգ/ օր ժամկետը և վերջնական պատիժ սահմանել ազատազրկում` 2/երկու/ տարի 6/վեց/ ամիս 15/տասնհինգ/ օր ժամկետով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել դատավճռի հրապարակման օրվանից` 12.10.2010թ.։
Գործով իրեղեն ապացույց ճանաչված «Սևգարդ» տեսակի օճառը և 0.37 գրամ «հերոին» տեսակի թմրամիջոցը դատավճիռն օրինական ուժի մեջ մտնելուց հետո վերադարձնել ՀՀ ոստիկանության ՔԳՎ Էրեբունու քննչական բաժին` թիվ 12115610 քրեական գործից անջատված մասին կից՝ անհայտ անձի նկատմամբ քննություն կատարելու համար, իսկ քրեական գործին կցված և ապացույց ճանաչված այլ փաստաթուղթ հանդիսացող` Ա. Չախոյանի բացատրությունը, թողնել քրեական գործում։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ