ԵԷԴ/0091/01/10

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ` Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ` Լ. ՄԻՐԶՈՅԱՆ

Մասնակցությամբ`

ՄԵՂԱԴՐՈՂ` Պ. ԳՅՈւԼՈւՄՅԱՆ
ՏՈւԺՈՂՆԵՐ` Ա. ՆԱՀԱՊԵՏՅԱՆ
Ս. ՍԱՐԳՍՅԱՆ

2010թ. հուլիսի 19-ին դատարանում
Դռնբաց դատական նիստում քննեց քրեական գործն ըստ մեղադրանքի` Ռոբերտ Սուրենի Հովհաննիսյանի, ծնված 21.02.1956թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, հաշվառված է ք.Երևան Մ. Խորենացի 162։
Մեղադրվում է ՀՀ քր. օր-ի 177 հոդվածի 2-րդ մասի 1-ին, 2-րդ, 3-րդ և 4-րդ կետերով։
Սույն գործով կալանքի տակ է 24.03.2010թ.։
Դատաքննությամբ և գործի տվյալներով պարզվեց հետևյալը.
Ռոբերտ Սուրենի Հովհաննիսյանը 2009թ. օգոստոս-սեպտեմբեր ամիսների ընթացքում ապօրինի մուտք գործելով Երևան քաղաքի «Էրեբունի» այգեգործական ընկերության ամառանոցներ և կատարել է 4 դրվագ գողություն, իսկ 2010թ. մարտ ամսին Մելիք Արիստակեսյանի հետ նախնական համաձայնությամբ կատարել է 3 դրվագ գողություն, այն է`
2009թ. օգոստոս-սեպտեմբեր ամիսներին ապօրինի մուտք է գործել «Էրեբունի» այգեգործական ընկերության Հովհաննես Մկրտչյանին պատկանող 96 թաղամասի, 12 ամառանոց և այնտեղից գաղտնի հափշտակել զգալի չափի 6.000 ՀՀ դրամ ընդհանուր արժողությամբ լոմ, լինգ և քլունգ։
2009թ. օգոստոս-սեպտեմբեր ամիսներին կրկին անգամ գողություն կատարելու նպատակով ապօրինի մուտք է գործել «Էրեբունի» այգեգործական ընկերության 1-ին զանգվածի, 96 հասցեի Սերյոժա Հովակյանին պատկանող թիվ 4 ամառանոց, որտեղից գաղտնի հափշտակել է զգալի չափի` յուրաքանչյուրը 3.000 ՀՀ դրամ արժողությամբ 2 հատ 5 լիտրանոց և 4.000 ՀՀ դրամ արժողությամբ 1 հատ 3 լիտրանոց ալյումինե կաթսաներ` պատճառելով 10.000 ՀՀ դրամի գույքային վնաս։
2009թ. օգոստոս-սեպտեմբեր ամիսներին կրկին անգամ գողություն կատարելու նպատակով ապօրինի մուտք է գործել «Էրեբունի» այգեգործական ընկերության «Վագոնային Դեպոյի» Սպարտակ Գևորգյանին պատկանող թիվ 15 ամառանոց և այնտեղից գաղտնի հափշտակել 5.000 ՀՀ դրամ արժողությամբ լինգ, 3.000 ՀՀ դրամ արժողությամբ զնդան, ընդհանուր 2.000 ՀՀ դրամ արժողությամբ ալյումինե կաթսա, ափսե, բաժակ, գդալ` պատճառելով զգալի չափի` 15.000 ՀՀ դրամի գույքային վնաս։
2009թ. օգոստոս-սեպտեմբեր ամիսներին կրկին անգամ գողություն կատարելու նպատակով ապօրինի մուտք է գործել «Էրեբունի» այգեգործական ընկերության «Վագոնային Դեպոյի» 1-ին զանգվածի, 96 հողակտորի Ազատ Նահապետյանին պատկանող թիվ 22 ամառանոց և այնտեղից գաղտնի հափշտակել 1.500 ՀՀ դրամ արժողությամբ լինգ, 3.000 ՀՀ դրամ արժողությամբ կվալտ, 1.500 ՀՀ դրամ արժողությամբ լինգ, 1.000 ՀՀ դրամ արժողությամբ 10 մետր մետաղալար` պատճառելով զգալի չափի` 7.000 ՀՀ դրամի գույքային վնաս։
Դրանից հետո, 2010թ. մարտի սկզբներին, նախնական համաձայնության գալով Մելիք Արիստակեսյանի հետ, Երևան քաղաքի Էրեբունի այգեգործական ընկերության 48 զանգվածի, 28 տան երկրորդ հարկի պատուհանի ապակին կոտրելով ապօրինի մուտք են գործել տուն և գաղտնի հափշտակել Ս. Սարգսյանին պատկանող 20.000 ՀՀ դրամ արժողությամբ հագուստները, ապա նկուղի պատուհանից ապօրինի մուտք են գործել և գողացել 550.000 ՀՀ դրամ արժողությամբ խոտ հնձելու, հող վարելու մեքենա, 30.000 ՀՀ դրամ արժողությամբ խորոված պատրաստելու համար նախատեսված 15 հատ շշեր, 15.000 ՀՀ դրամ արժողությամբ ծառեր սրսկելու համար նախատեսված ագրեգատ` լատունե ձողով և 50 մետր մալուխով, ինչպես նաև 10.000 ՀՀ դրամ արժողությամբ 10 լիտր ծիրանի օղի` Ս. Սարգսյանին պատճառելով խոշոր չափի` 661.500 ՀՀ դրամի գույքային վնաս։
Դրանից հետո, 2010թ. մարտ ամսին, կրկին անգամ գողություն կատարելու համար նախնական համաձայնության գալով Մելիք Արիստակեսյանի հետ, ապօրինի մուտք են գործել Երևան քաղաքի Էրեբունի այգեգործական ընկերության 48 զանգվածի, 28 տան նկուղ և այնտեղից գաղտնի հափշտակել են 2.000 ՀՀ դրամ արժողությամբ փականագործի բանալի, 1.000 ՀՀ դրամ արժողությամբ հարթաշուրթեր, 10.000 ՀՀ դրամ արժողությամբ 10 լիտր գինի և 5.000 ՀՀ դրամ արժողությամբ 5 լիտր ծիրանի օղի` պատճառելով զգալի չափի` 18.000 ՀՀ դրամի գույքային վնաս։
Այնուհետև, 2010թ. մարտի կեսերին կրկին անգամ գողություն կատարելու համար նախնական համաձայնության գալով Մելիք Արիստակեսյանի հետ Էրեբունի այգեգործական ընկերության «Օդաչուների» ամառանոցային տարածքում գտնվող Վարդգես Ավետիսյանին պատկանող թիվ 22 ամառանոցի նկուղի ճաղավանդակը սղոցելու և ձեռքով տեղահան անելու միջոցով ապօրինի մուտք են գործել և այնտեղից գաղտնի հափշտակել 10.000 ՀՀ դրամ ընդհանուր արժողությամբ 10 հատ պղնձե վինտիլ, 800 ՀՀ դրամ արժողությամբ փականագործի բանալի, 800 ՀՀ դրամ արժողությամբ խողովակի բանալի, 1.000 ՀՀ դրամ արժողությամբ սղոց, 10.000 ՀՀ դրամ արժողությամբ 50 մետր երկարացման լար, 18.000 ՀՀ դրամ արժողությամբ աշխատանքային գործիքների հավաքածու, 1.500 ՀՀ դրամ արժողությամբ ծառ կտրելու մկրատ, 10.000 ՀՀ դրամ արժողությամբ 8 հատ բանալի և 3.000 ՀՀ դրամ արժողությամբ այրման զոդման սարք` Վ. Ավետիսյանին պատճառելով զգալի չափի` 55.100 ՀՀ դրամի գույքային վնաս։
Վերը նշված հանցավոր արարքների կատարման համար Ռոբերտ Սուրենի Հովհաննիսյանին մեղադրանք է առաջադրվել ՀՀ քր. օր-ի 177 հոդվածի 2-րդ մասի 1-ին, 2-րդ, 3-րդ և 4-րդ կետերով։
Դատաքննությամբ առաջադրված մեղադրանքում ամբաստանյալ Ռոբերտ Հովհաննիսյանն իրեն լիովին մեղավոր ճանաչեց և ցուցմունք է տվեց այն մասին, որ 2009թ. հունիս ամսից բնակվում է իր ընկերոջ Անտոն Ստեփանյանին պատկանող Էրեբունու այգեգործական ընկերության ամառանոցում։ 2009թ. օգոստոս-սեպտեմբեր ամիսներին միայնակ նույն այգեգործական ընկերության թվով 9 ամառանոցներից գողացել է գունավոր մետաղներ։
2009թ. ապրիլ ամսին Ա. Ստեփանյանի միջոցով ծանոթացել է Մելիք-Արիստակեսյանի հետ, և 2010թ. մարտի 10-ից միասին բնակվել են Ա. Ստեփանյանի ամառանոցում։ 2010թ. մարտի սկզբներին Մ. Արիստակեսյանը առաջարկել է ամառանոցային տարածքից գողություն կատարել։ Համաձայնվել է նրա հետ, որից հետո դուրս են եկել հարմար առանձնատուն փնտրելու։ Ճանապարհին նկատել են կարմիր տուֆից պատրաստված երկհարկանի ամառանոց, և մտածելով, որ այնտեղ արժեքավոր իրեր կլինեն, ցանկապատով մուտք են գործել առանձնատան բակ, ապա մոտեցել նկուղի պատուհաններին, մի կողմ հրել պատուհանին դրված թիթեղը ու մտել նկուղ։ Նախապես իրենց հետ վերցրած լապտերով զննելով տարածքը նկատել են խմիչքներ և տարբեր տեսակի աշխատանքային գործիքներ։ Գողանալով գինի, օղի, աշխատանքային գործիքներ և խորոված պատրաստելու համար նախատեսված 16 հատ շիշ` նույն ճանապարհով դուրս գալով, գողոնը տեղափոխել են իրենց բնակության վայր։
Դրանից մի քանի օր անց, կրկին մտել են նույն առանձնատան նկուղ` պատուհանի ճաղավանդակը երկաթյա ձողով կոտրելու միջոցով, գողացել են 3 լիտր գինի և 3 լիտր օղի։ Շաբաթ օրը գողացված ապրանքը տեղափոխել են Վերնիսաժ և այնտեղ վաճառել, որից առաջացած 8.000 ՀՀ դրամ գումարը բաժանել են։
Դրանից հետո, մոտ 5 օր անց կրկին Մ. Արիստակեսյանի հետ նախկին առանձնատնից մոտ 50 մետր հեռավորության վրա նկատել են երկհարկանի եվրոպատուհաններով առանձնատուն, ցանկապատով մտել են բակ, տեսնելով նկուղի պատուհանները, մոտեցել են և իրենց հետ նախապես վերցրած մետաղահատ սղոցով, կտրել են ճաղավանդակը։ Մ. Արիստակեսյանը մտել է նկուղ, ապա ներսի կողմից բացել դուռը, որից հետո ինքը ևս մտել է նկուղ և միասին գողացել են տարբեր տեսակի գործիքներ, վինտիլներ, սղոց և կապոցով պղնձե լար ու այն տեղափոխել են տուն։ Գողացված ապրանքը շաբաթ օրը տարել են Վերնիսաժ և վաճառել։
2010թ. մարտի 24-ին ինքը կրկին ուղևորվել է վերնիսաժ` գողացված սղոցը վաճառելու համար, սակայն չկարողանալով վաճառել, վերադարձել է տուն։ Ճանապարհին` Խանջյան փողոցում, իրեն են մոտեցել ոստիկանության աշխատակիցները և բերման են ենթարկել ոստիկանության Նուբարաշենի բաժանմունք։
Բացի ամբաստանյալի խոստովանական ցուցմունքից, նրա կատարած արարքը հիմնավորվեց գործով ձեռք բերված հետևյալ ապացույցներով.
Տուժող` Ազատ Նահապետյանի ցուցմունքով այն մասին, որ 2009թ. սկզբներին գնել է Էրեբունի այգեգործական ընկերության 96 թաղամասի, 22 հասցեի ամառանոցը։ 2010թ. մայիսի սկզբներին այցելել է ամառանոց և տեսել է, որ բաց դռնից մուտք գործելով առանձնատուն գողացել են լոմը, կվալտը և լինգը։
Տուժող` Սեյրան Սարգսյանի ցուցմունքով այն մասին, որ 2010թ. մարտի 10-ին գնացել է իրեն պատկանող Էրեբունի այգեգործական ընկերության 48 զանգվածի, 28 ամառանոց և տեսել է, որ դարպասի դռները բաց են։ Մտնելով ներս, տեսել է, որ երկրորդ հարկի պատուհանը կոտրված է։ Այնուհետև, մտնելով տուն, տեսել է, որ 2 հարկի պահարանից բացակայում են անկողնու համար նախատեսված 5 ձեռք սպիտակեղեն և իր անձնական հագուստները։ Իջնելով նկուղ, տեսել է, որ այնտեղից գողացել են խոտ հնձելու և հող վարելու կոմբայնը, աշխատանքային տարբեր տեսակի գործիքներ, խորոված պատրաստելու համար նախատեսված 15 հատ շշեր, ծառեր սրսկելու համար նախատեսված ագրեգատ` լատունե ձողով և 50 մետր մալուխով, ինչպես նաև 10 լիտր ծիրանի օղի։ Այդ մասին հայտարարություն է տվել ոստիկանության բաժնում, սակայն մի քանի օր անց կրկին այցելելով առանձնատուն, տեսել է, որ կրկին մուտք են գործել ամառանոցի նկուղ և գողացել աշխատանքային գործիքներ, ինչպես նաև 5 լիտր ծիրանի օղի և 10 լիտր գինի։
Տուժող` Վարդգես Ավետիսյանի նախաքննությամբ տրված և դատաքննությամբ հետազոտված ցուցմունքով այն մասին, որ շուրջ 20 տարի է հանդիսանում է «Էրեբունի» այգեգործական ընկերության «Օդաչուների» ամառանոցային տարածքում գտնվող թիվ 22 ամառանոցի սեփականատերը։ 2010թ. մարտի կեսերին իր հարևան Սուրիկը զանգահարել է և հայտնել, որ ամառանոցից գողություն է կատարվել։ Այցելելով ամառանոց, տեսել է, որ նկուղի պատուհանի ճաղավանդակը և նկուղի երկաթյա դռան կողպեքը տեղահան է արված և նկուղից գողացել են 10 հատ պղնձե վինտիլ, փականագործի բանալի, խողովակի բանալի, սղոց, 50 մետր երկարացման լար, աշխատանքային գործիքների հավաքածու, ծառ կտրելու մկրատ, 8 հատ բանալի և այրման զոդման սարք։
Տուժող` Հովհաննես Մկրտչյանի նախաքննությամբ տրված և դատաքննությամբ հետազոտված ցուցմունքով այն մասին, որ 2010թ. մարտի սկզբներին ոստիկանության աշխատակիցները հայտնել են, որ «Էրեբունի» այգեգործական ընկերության իրեն պատկանող 96 թաղամասի, 12 ամառանոցից գողություն է կատարվել։ Գնացել է ամառանոց և տեսել է, որ գողացել են լոմ, լինգ և քլունգ։
Տուժող` Սերյոժա Հովակյանի նախաքննությամբ տրված և դատաքննությամբ հետազոտված ցուցմունքով այն մասին, որ 2010թ. մարտի սկզբներին ոստիկանության աշխատակիցները հայտնել են, որ «Էրեբունի» այգեգործական ընկերության իրեն պատկանող 96 թաղամասի, 4 ամառանոցից գողություն է կատարվել։ Գնացել է ամառանոց և տեսել է, որ գողացել են 2 հատ 5 լիտրանոց և 1 հատ 3 լիտրանոց ալյումինե կաթսաներ։
Տուժող` Սպարտակ Գևորգյանի նախաքննությամբ տրված և դատաքննությամբ հետազոտված ցուցմունքով այն մասին, որ 2010թ. մարտի սկզբներին ոստիկանության աշխատակիցները հայտնել են, որ «Էրեբունի» այգեգործական ընկերության «Վագոնային Դեպոյում» գտնվող իրեն պատկանող 15 ամառանոցից գողություն է կատարվել։ Գնացել է ամառանոց և տեսել է, որ բաց դռնից մուտք գործելով գողացել են կվալտ, զնդան, ալյումինե կաթսա, ափսե, բաժակ և գդալ։
Մելիք Արիստակեսյանի նախաքննությամբ տրված և դատաքննությամբ հետազոտված ցուցմունքով այն մասին, որ 2010թ. մարտ ամսից Ռոբերտ Հովհաննիսյանի հետ միասին բնակվել է իր ընկերոջ` Անտոն Ստեփանյանին պատկանող «Էրեբունի» այգեգործական ընկերության ամառանոցում։ 2010թ. մարտի սկզբներին Ռ. Հովհաննիսյանի հետ հաց ուտելու ընթացքում տեղեկացել է, որ Ռ. Հովհաննիսյանը 2009թ. ընթացքում կատարել է մի շարք գողություններ։ Սկսել է հարցուփորձ անել, և տեղեկանալով, որ կան առանձնատներ, որտեղից կարելի է գողություն կատարել, առաջարկել է միասին դուրս գալ և ուսումնասիրել ամառանոցային տարածքը։ Ժամը 2300-ի սահմաններում, նախապես իրենց հետ վերցնելով լապտեր, դուրս են եկել ամառանոցային տարածքը ուսումնասիրելու և հարմար առանձնատուն գտնելու և այնտեղից գողություն կատարելու։ Ճանապարհին նկատել են կարմիր տուֆից պատրաստված երկհարկանի ամառանոց, և մտածելով, որ այնտեղ արժեքավոր իրեր կլինեն, ցանկապատով մուտք են գործել առանձնատան բակ, ապա մոտեցել նկուղի պատուհաններին, մի կողմ հրել պատուհանին դրված թիթեղը ու մտել նկուղ։ Նախապես իրենց հետ վերցրած լապտերով զննելով տարածքը նկատել են խմիչքներ և տարբեր տեսակի աշխատանքային գործիքներ։ Գողանալով կոմբայն, գինի, օղի, աշխատանքային գործիքներ և պղնձե լար` նույն ճանապարհով դուրս գալով, գողոնը տեղափոխել են իրենց բնակության վայր։ Գողացված կոմբայնը հաջորդ շաբաթ վաճառել է Գում կոչվող շուկայի մոտ, որից ստացված 100.000 ՀՀ դրամից 35.000 ՀՀ դրամը տվել է Ռ. Հովհաննիսյանին։ Մնացած ապրանքները վաճառել են Վերնիսաժում։ Մի քանի օր անց կրկին մտել են նույն առանձնատան նկուղ` ճաղավանդակները մետաղյա ձողով ջարդելու միջոցով, գողացել են 3-ական լիտր օղի և գինի։ Դրանից հետո, մի քանի օր անց նույն փողոցի վրա գտնվող եվրոպատուհաններով առանձնատան մոտով անցնելիս որոշել են այնտեղից գողություն կատարել։ Ցանկապատով մտել են առանձնատան բակ, ապա մոտեցել նկուղի պատուհանին։ Նախապես վերցրած մետաղահատ սղոցով կտրել են պատուհանի ճաղավանդակը, որից հետո ինքը մտել է նկուղ, ներսից բացել է նկուղի դուռը և Ռ. Հովհաննիսյանը մտել է նկուղ։ Երկուսով այնտեղից գողացել են աշխատանքային գործիքներ, լատունե վինտիլներ և նույն ճանապարհով դուրս գալով, գողացված ապրանքը տեղափոխել են իրեն բնակության վայր, իսկ հաջորդ շաբաթ վաճառել Վերնիսաժում։ 2010թ. մարտի 27-ին, ժամը 1100-ի սահմաններում Տաշիր առևտրի կենտրոնի շրջակայքում իրեն են մոտեցել ոստիկանության աշխատակիցները և բերման են ենթարկել ոստիկանության Նուբարաշենի բաժանմունք։
Ռոբերտ Հովհաննիսյանի հանցանքը հիմնավորվեց նաև դատաապրանքագիտական փորձաքննության թիվ 373-ԱՊ եզրակացությամբ, համաձայն որի փորձաքննությանը ներկայացված հետևյալ ապրանքների շուկայական գները 2010թ. մարտ ամսվա դրությամբ կազմում են` 15 հատ խորովածի շշեր` 4.500 ՀՀ դրամ, 6 հատ արհեստագործական գործիք բանալիներ` 1.800 ՀՀ դրամ, 1 հատ արհեստագործական գործիք բանալի` 800 ՀՀ դրամ, զոդման սարք` 3.000 ՀՀ դրամ, թիթեղ կտրելու մկրատ` 1.500 ՀՀ դրամ, սղոց` 1.000 ՀՀ դրամ, աքցանը վնասված է և դեֆորմացված, առկա ապրանքային վիճակում իրենից սպառողական արժեք չի ներկայացնում, ուստի դրան շուկայական գին չի տրվում։
Ռ. Հովհաննիսյանի և Մ. Արիստակեսյանի մասնակցությամբ կատարված քննչական փորձարարությունների արձանագրություններով, իրեղեն ապացույց ճանաչված ապրանքներով, դեպքի վայրերի զննության արձանագրություններով, բերման ենթարկելու արձանագրություններով, ինչպես նաև գործով ձեռք բերված այլ փաստական տվյալներով։
Այսպիսով դատարանը ապացուցված համարեց, որ Ռոբերտ Սուրենի Հովհաննիսյանը կատարել է արարք, որը նախատեսված է ՀՀ քր. օր-ի 177 հոդվածի 2-րդ մասի 1-ին, 2-րդ, 3-րդ և 4-րդ կետերով, որով և պետք է ենթարկվի քրեական պատասխանատվության։
Պատիժ նշանակելիս դատարանը հաշվի է առնում արարքի հասարակական վտանգավորությունը, ամբաստանյալի ինքնությունը և գործի ողջ հանգամանքները։
Դատարանը Ռոբերտ Հովհաննիսյանի պատասխանատվությունը և պատիժը ծանրացնող, ինչպես նաև պատասխանատվությունը և պատիժը մեղմացնող հանգամանքներ չհայտնաբերեց։
Քննարկելով խափանման միջոցի հարցը, դատարանը գտնում է, որ ամբաստանյալ Ռ. Հովհաննիսյանի նկատմամբ ընտրված կալանք խափանման միջոցը պետք է թողնել անփոփոխ։
Տուժողների կողմից քաղաքացիական հայց չներկայացվել պատճառով, այդ հարցը պետք է համարել լուծված։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված 8 հատ փականագործի տարբեր բանալիները, 1 հատ գյուղատնտեսական մկրատը և 1 հատ այրման զոդման ապարատը պետք է վերադարձնել Վարդգես Ավետիսյանին, իսկ 15 հատ խորովածի շշերը` Սեյրան Սարգսյանին։
ՀՀ ոստիկանության ՔԳՎ Էրեբունու քննչական բաժնի 23.06.2010թ. որոշմամբ Մելիք Հովսեփի Արիստակեսյանի նկատմամբ ՀՀ քր. օր-ի 177 հոդվածի 2-րդ մասի 1-ին, 2-րդ, 3-րդ և 4-րդ կետերով քրեական հետապնդումը դադարեցվել է վերջինիս մահվան կապակցությամբ։
Ղեկավարվելով ՀՀ քր. դատ. օր-ի 357-360 հոդվածներով, դատարանը

Վ Ճ Ռ Ե Ց

Ռոբերտ Սուրենի Հովհաննիսյանին մեղավոր ճանաչել ՀՀ քր. օր-ի 177 հոդվածի 2-րդ մասի 1-ին, 2-րդ, 3-րդ և 4-րդ կետերով և դատապարտել ազատազրկման` 3/երեք/ տարի 6/վեց/ ամիս ժամկետով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել 24.03.2010թ.։
Կալանք խափանման միջոցը թողնել անփոփոխ մինչև դատավճռի օրինական ուժի մեջ մտնելը։
Քաղաքացիական հայցի հարցը համարել լուծված։
Գործով իրեղեն ապացույց ճանաչված 8 հատ փականագործի տարբեր բանալիները, 1 հատ գյուղատնտեսական մկրատը և 1 հատ այրման զոդման ապարատը դատավճիռն օրինական ուժի մեջ մտնելուց վերադարձնել Վարդգես Ավետիսյանին, իսկ 15 հատ խորովածի շշերը` Սեյրան Սարգսյանին։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ