Գործ թիվ ԵԷԴ/0081/01/10
2010թ

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղարությամբ Արմինե Արղամանյան
Մասնակցությամբ`
Մեղադրող Ալիկ Մուրադյան
Ամբաստանյալ Հակոբ Կարապետյան
Ամբաստանյալի պաշտպան Ամալյա Ավագյան

2010 թվականի հուլիսի 23-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում քննեց քրեական գործն ըստ մեղադրանքի՝
Հակոբ Գուրգենի Կարապետյանի ծնված 09.01.1973թ. Երևան քաղաքում,
ազգությամբ հայ, Հայաստանի Հանրապետության քաղաքացի, ութամյա կրթությամբ, ամուսնալուծված, խնամքին ոչ ոք, հաշվառված ք. Երևան, Իսակովի պողոտայի 44 շենքի 4 բնակարանում, նախկինում դատված.
1. Երևանի Շենգավիթ շրջանի ժողդատարանի 17.06.1996թ. դատավճռով ՀՀ քրեական օրենսգրքի 86-րդ հոդվածի 4-րդ մասով դատապարտվել է ազատազրկման 6 տարի ժամկետով, դատարանի 22.04.1998թ. որոշմամբ նրա արարքը ՀՀ քրեական օրենսգրքի 86-րդ հոդվածի 4-րդ մասից վերաորակվել է ՀՀ քրեական օրենսգրքի 86-րդ հոդվածի 2-րդ մասով և պատիժ է նշանակվել ազատազրկում 2 /երկու/ տարի 6 /վեց/ ամիս ժամկետով, ՀՀ ԱԺ «ՀՀ Սահմանադրության ընդունման կապակցությամբ համաներում հայտարարելու մասին» 26.09.1995թ. որոշման կիրառմամբ ազատվել է պատժի կրումից,
2. Երևանի Շենգավիթ համայնքի առաջին ատյանի դատարանի 27.04.2000թ. դատավճռով ՀՀ քրեական օրենսգրքի 87-րդ հոդվածի 2-րդ մասով և 89-րդ հոդվածի 2-րդ մասով, նույն օրենսգրքի 37-րդ հոդվածի կիրառմամբ դատապարտվել է ազատազրկման 4 /չորս/ տարի ժամկետով,
3. Երևանի Արաբկիր և Քանաքեռ-Զեյթուն համայնքների առաջին ատյանի դատարանի 15.01.2002թ. դատավճռով ՀՀ քրեական օրենսգրքի 86-րդ հոդվածի 2-րդ մասով, նույն օրենսգրքի 38-39-րդ հոդվածների կիրառմամբ դատապարտվել է ազատազրկման 5 /հինգ/ տարի ժամկետով,
4. Երևանի Արաբկիր և Քանաքեռ-Զեյթուն համայնքների առաջին ատյանի դատարանի 09.12.2002թ. դատավճռով ՀՀ քրեական օրենսգրքի 173-րդ հոդվածի 3-րդ մասով, նույն օրենսգրքի 37-րդ հոդվածի կիրառմամբ դատապարտվել է ազատազրկման 5 /հինգ/ տարի ժամկետով, Երևանի Արաբկիր և Քանաքեռ-Զեյթուն համայնքների առաջին ատյանի դատարանի 08.08.2003թ. որոշմամբ, նախորդ դատավճիռներում նշված արարքները համապատասխանեցվել են ՀՀ գործող քրեական օրենսգրքին և օրենսգրքի 66-րդ հոդվածի 6-րդ կետի կիրառմամբ վերջնական պատիժ է նշանակվել ազատազրկում 5 /հինգ/ տարի ժամկետով, պատժի կրումից պայմանական վաղաժամկետ ազատվել է 05.02.2004թ.,
5. ՀՀ Հյուսիսային քրեական դատարանի 17.12.2008թ. դատավճռով, ՀՀ քրեական օրենսգրքի 177-րդ հոդվածի 3-րդ մասի 3-րդ կետով և 235-րդ հոդվածի 4-րդ մասով, ՀՀ քրեական օրենսգրքի 66-րդ հոդվածի կիրառմամբ դատապարտվել է ազատազրկման 5 /հինգ/ տարի ժամկետով` անձնական գույքի բռնագրավմամբ, սակայն ոչ ավելի 16.000 /տասնվեց հազար/ ՀՀ դրամ գումարից, պատժի սկիզբը հաշվելով 07.10.2008թ-ից,
6. Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 20.04.2010թ. դատավճռով ՀՀ քրեական օրենսգրքի 268-րդ հոդվածի 2-րդ մասի 2-րդ կետով դատապարտվել է ազատազրկման 1 տարի 6 ամիս ժամկետով։ ՀՀ քրեական օրենսգրքի 67-րդ հոդվածի կիրառմամբ նշանակված պատժին մասնակիորեն գումարվել է ՀՀ Հյուսիսային քրեական դատարանի 17.12.2008թ. դատավճռով նշանակված պատժի չկրած մասից ազատազրկում 3 տարին և վերջնական պատիժ է նշանակվել ազատազրկում 4 /չորս/ տարի 6 /վեց/ ամիս ժամկետով, պատժի սկիզբը հաշվելով 17.12.2009թ., ՀՀ ԱՆ «Նուբարաշեն» ՔԿ հիմնարկի դատապարտյալ, սույն գործով խափանման միջոց չի կիրառվել, մեղադրվում է ՀՀ քրեական օրենսգրքի 34-268-րդ հոդվածի 3-րդ մասով։
Առաջադրված մեղադրանքում իրեն լիովին մեղավոր է ճանաչել։

1.Գործի դատավարական նախապատմությունը։
Ամբաստանյալ Հակոբ Գուրգենի Կարապետյանը պատիժը կրել է ՀՀ ԱՆ «Նուբարաշեն» քրեակատարողական հիմնարկում։
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 20.04.2010թ. դատավճռով Հակոբ Կարապետյանը դատապարտվել է ՀՀ քրեական օրենսգրքի 268-րդ հոդվածի 2-րդ մասի 2-րդ կետով նախատեսված հանցանք կատարելու մեջ և նրա նկատմամբ քրեական պատիժ է նշանակվել ազատազրկում 4 /չորս/ տարի 6 /վեց/ ամիս ժամկետով։
Հակոբ Կարապետյանը կախման մեջ է գտնվել թմրամիջոցներից, դատարանի դատավճռով նրա նկատմամբ կիրառվել է բժշկական բնույթի հարկադիր բուժում թմրամոլության դեմ։
Պատիժը ՔԿ հիմնարկում կրելու ընթացքում` նախքան վերը նշված դատավճիռը կայացնելը, ամբաստանյալ Հակոբ Կարապետյանը փորձել է կրկին անգամ առանց իրացնելու նպատակի` իր օգտագործման համար ձեռք է բերել առանձնապես խոշոր չափերի` 1,87 գրամ քաշով «Հերոին» տեսակի թմրամիջոց, սակայն 10.04.2010թ. իր անվամբ ՔԿ հիմնարկ հանձնուքի մեջ թաքցրած վիճակում իրեն փոխանցելու փորձի ընթացքում` հանձնուքի զննությամբ, թմրամիջոցը ՔԿ հիմնարկի աշխատակիցների կողմից հայտնաբերվել է, դրանով իսկ` հանցագործությունը ավարտին չի հասցվել ամբաստանյալ Հակոբ Կարապետյանի կամքից անկախ հանգամանքներով։
Փաստի առթիվ ՀՀ ոստիկանության ՔԳՎ Էրեբունու քննչական բաժնի կողմից 13.04.2010թ. ՀՀ քրեական օրենսգրքի 266-րդ հոդվածի 3-րդ մասի 2-րդ կետով հարուցվել է թիվ 12115910 քրեական գործը և նախաքննություն է կատարվել։
13.05.2010թ. Հակոբ Գուրգենի Կարապետյանին մեղադրանք է առաջադրվել ՀՀ քրեական օրենսգրքի 34-268-րդ հոդվածի 3-րդ մասով։ Առաջադրված մեղադրանքում Հակոբ Կարապետյանն իրեն լիովին մեղավոր է ճանաչել։
Քրեական գործը մեղադրական եզրակացությամբ 16.06.2010թ. ստացվել է Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանում։

2.Դատաքննությամբ ձեռք բերված ու հետազոտված ապացույցները։
Դատաքննությամբ հետազոտվել են մեղադրանքի հիմքում դրված այն բոլոր ապացույցները, որոնք թվարկված են մեղադրական եզրակացության մեջ։
Ապահովելով դատաքննության լրիվությունը, բազմակողմանիությունը և օբյեկտիվությունը և ղեկավարվելով գործի արդար քննությանը վերաբերող սահմանդրական և դատավարական նորմերի դրույթներով, հիմնվելով պատշաճ ընթացակարգի շրջանակներում դատական քննության ընթացքում գործի հանգամանքների հետազոտման արդյունքի վրա, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով, դատարանը գտնում է, որ քրեական գործով առաջադրված մեղադրանքում ամբաստանյալի մեղքը հիմնավորված է։
Հակոբ Գուրգենի Կարապետյանին նախաքննական մարմինը ՀՀ քրեական օրենսգրքի 34-268-րդ հոդվածի 3-րդ մասով մեղադրանք է առաջադրել այն բանի համար, որ նա 17.12.2009թ. Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճռով դատապարտված լինելով և պատիժը կրելով ՀՀ ԱՆ «Նուբարաշեն» ՔԿ հիմնարկում, կրկին անգամ փորձել է առանց իրացնելու նպատակի` իր օգտագործման համար ձեռք բերել առանձնապես խոշոր չափերի հասնող 1,87 գրամ քաշով «Հերոին» տեսակի թմրամիջոց, որը 10.04.2010թ. քրեակատարողական հիմնարկի հանձնուքների ընդունման սենյակում հայտնաբերվել է հանձնուքի մեջ թաքցրած վիճակում, որի պատճառով հանցագործությունը ավարտին չի հասցվել Հակոբ Կարապետյանի կամքից անկախ հանգամանքներով։
Առաջադրված մեղադրանքում իրեն լիովին մեղավոր ճանաչելով, ամբաստանյալ Հակոբ Կարապետյանը նախաքննության և դատաքննության ժամանակ հրաժարվել է ցուցմունք տալուց։

Գ.Թ. 119, դատաքննության արձանագրություն

Ամբաստանյալ Հակոբ Կարապետյանին առաջադրված մեղադրանքը հիմնավորված է դատաքննությամբ հետազոտված հետևյալ ապացույցներով.
10.04.2010թ. ՀՀ ԱՆ «Նուբարաշեն» ՔԿ հիմնարկում հանձնուքը զննելու մասին արձանագրությամբ այն մասին, որ 10.04.2010թ. ժամը 13.00-ի սահմաններում «Նուբարաշեն» ՔԿ հիմնարկում դատապարտյալ Հակոբ Կարապետյանի անվամբ Անահիտ Խաչատրյանի կողմից ներկայացված 15 անուն ապրանքների շարքում առկա մեկ զույգ սև գույնի զամշից երկու կոշիկների ներբաններում` կրունկների մեջ կատարված փորվածքներում հայտնաբերվել են ընդամենը 5 հատ նույնպես զամշից կտորներով փաթեթներում` պոլիէթիլենային թաղանթներով համապատասխանաբար 0,5 գրամ, 0,3 գրամ, 0,2 գրամ, 0,5 գրամ և 0,5 գրամ քաշով, ընդամենը` 2,0 գրամ քաշով բաց շագանակագույն փոշենման զանգվածներ։ Դատավարական կարգի պահպանմամբ դրանք կշռվել, փաթեթավորվել, կնքվել և առգրավվել են։ Փաթեթավորվել և կնքվել են նաև մեկ զույգ զամշե կոշիկները։
Հանձնուքը բերած Անահիտ Խաչատրյանը հայտարարել է, որ չի իմացել հայտնաբերված փոշենման զանգվածի մասին, իսկ մեկ զույգ զամշից կոշիկները դատապարտյալ Հակոբ Կարապետյանի խնդրանքով 10.04.2010թ. մինչև ՔԿ հիմնարկ գալը վերցրել է «Էրեբունի» թանգարանի դիմացից` իրեն անծանոթ մի անձնավորությունից` Հակոբ Կարապետյանին փոխանցելու համար։

Գ.Թ. 5-6

Անահիտ Խաչատրյանի կողմից դատապարտյալ Հակոբ Կարապետյանի անվամբ հանձնուք ընդունելու մասին դիմումով և նախազգուշացման թերթիկով այն մասին, որ 2010թ. ապրիլի 10-ին հանձնուքների սենյակ են հանձնվել 15 անուն հագուստ, ծխախոտ և սննդամթերք, այդ թվում նաև` մեկ զույգ կոշիկ։

Գ.Թ. 7-8

10.04.2010թ. ժամը 14.30-ին ՀՀ ԱՆ «Նուբարաշեն» ՔԿ հիմնարկի 60 խցում կատարվել է ոչ պլանային խուզարկություն, սառնարանի միջից հայտնաբերվել է «Նոկիա» տեսակի բջջային հեռախոս։

Գ.Թ. 10

Վկա Անահիտ Խաչատրյանը բացատրություն և ցուցմունք է տվել այն մասին, որ Հակոբ Կարապետյանի հետ գտնվում է փաստացի ամուսնական հարաբերությունների մեջ, վերջինս պատիժը կրում է ՔԿ հիմնարկում։ Իր 098-73-25-40 բջջային հեռախոսահամարով մշտապես կապ է հաստատել Հակոբ Կարապետյանի 093-10-20-91 բջջային հեռախոսահամարի հետ։ Նախկինում Հակոբ Կարապետյանի համար բազմիցս հանձնուք է տարել ՔԿ հիմնարկ։ Հանձնուք տանելիս հեռախոսով հետաքրքրվել է, թե ինչի՞ կարիք ունի Հակոբը։ 09.04.2010թ. ինքը զանգահարել է Հակոբին և հայտնել, որ հաջորդ օրը ցանկանում է նրա համար հանձնուք տանել։ Հակոբն իրեն ասել է, որ ՔԿ հիմնարկ գալիս ժամը 11.00-11.30-ին թող գնա «Էրեբունի» թանգարանի մոտ, Արթուր անունով մի տղա իրեն կոշիկներ կտա, թող դրանք դնի իր հանձնուքի հետ և հանձնի ՔԿ հիմնարկ` իրեն փոխանցելու համար։ 10.04.2010թ. պայմանավորված ժամին «Էրեբունի» թանգարանի մոտ նկատել է մոտ 40 տարեկան մի տղամարդու` սպիտակ գույնի տոպրակը ձեռքին։ Ինքը մոտեցել և հետաքրքրվել է, թե արդյոք նա՞ է Արթուրը, վերջինս փոխանցել է տոպրակը, որի մեջ մեկ զույգ սև գույնի զամշից կոշիկներ են եղել։ Դրանք վերցրել, երթուղային տաքսիով եկել է «Նուբարաշեն» ՔԿ հիմնարկ և իր տարած հանձնուքի` հագուստի, ներքնաշորերի, ծխախոտի և սնունդի հետ կոշիկները թվարկել է հանձնուք տալու մասին դիմումում, ստորագրելով այն մասին, որ այլ անձից վերցրած կամ անթույլատրելի իրեր չկան հանձնուքում։ Սակայն ՔԿ հիմնարկի աշխատողները, ստուգելով հանձնուքը, իր համար անսպասելի սև գույնի զամշե 2 կոշիկների կրունկներից հանել են թվով 5 հատ փաթեթներ` փոշենման զանգվածով, կասկածելով, որ դրանք թմրամիջոցներ են։ Ինքն անակնկալի է եկել, քանի որ թմրամիջոցի գոյության մասին տեղյակ չի եղել, եթե իմանար, կոշիկները չէր հանձնի։ Մինչև հանձնուքը տալը անընդհատ Հակոբը զանգահարել է իր բջջային հեռախոսին և հետաքրքրվել է կոշիկները ստանալու և հանձնուքը հանձնելու մասին։

Գ.Թ. 13-14, 54-55, 105-106, դատաքննության արձանագրություն

Վկաներ, ՀՀ ԱՆ «Նուբարաշեն» ՔԿ հիմնարկի աշխատակիցներ Հովհաննես Մանջիկյանը և Մուշեղ Դիլանյանը նախաքննության և դատաքննության ժամանակ ցուցմունք են տվել այն մասին, որ 10.04.2010թ. ժամը 13.00-ի սահմաններում «Նուբարաշեն» ՔԿ հիմնարկի հանձնուքների ընդունման սենյակ է եկել Անահիտ Կարապետյանը, սահմանված կարգով դիմումը և նախազգուշացման թերթիկները կազմել և ստորագրել է` թվարկելով դատապարտյալ Հակոբ Կարապետյանի համար հանձնուք ներկայացնելու մասին։ Հանձնուքի մեջ եղել են 1 զույգ սև զամշե կոշիկներ։ Հատուկ սարքավորման միջոցով դրանք զննվել են, կրունկների փորվածքից հայտնաբերվել են 2 կոշիկների մեջ թաքցրած ընդամենը 5 փաթեթ փոշե զանգված, որը կշռվել, փաթեթավորվել և կնքվել է։ Առգրավվել, փաթեթավորվել և կնքվել են նաև մեկ զույգ զամշե կոշիկները։ Իրենց հարցին Անահիտ Խաչատրյանը հայտարարել է, որ կոշիկների մեջ թաքցրած թմրամիջոցից տեղյակ չի եղել, կոշիկներն ինքը վերցրել է «Էրեբունի» թանգարանի մոտից Հակոբի խնդրանքով Արթուր անունով մի տղամարդուց` հանձնուքի հետ Հակոբ Կարապետյանին հանձնելու համար։

Գ.Թ. 76-77, 74-75

ՀՀ փորձագիտական կենտրոն ՊՈԱԿ կողմից 13.04.2010թ. թիվ 10831005 եզրակացության համաձայն` դատաքիմիական փորձաքննությամբ պարզվել է, որ կոշիկների միջից հայտնաբերված 5 փաթեթներում հայտնաբերվել են համապատասխանաբար 0,23 գրամ, 0,31 գրամ, 0,43 գրամ, 0,44 գրամ և 0,46 գրամ մաքուր քաշերով /ընդամենը 1,87 գրամ/ տնայնագործական եղանակով պատրաստված «Հերոին» տեսակի թմրամիջոց։

Գ.Թ. 27-29

Քննիչի որոշմամբ մեկ զույգ զամշե սև գույնի կոշիկները և հայտնաբերված 1,87 գրամ քաշով առանձնապես խոշոր չափի «Հերոին» տեսակի թմրամիջոցը ճանաչվել են իրեղեն ապացույց։

Գ.Թ. 102, 103

Իրեղեն ապացույց ճանաչված մեկ զույգ սև գույնի զամշե կոշիկների զննության արձանագրությամբ այն մասին, որ կոշիկների ներբաններում` կրունկների հատվածներում, առկա են բացվածքներ, որոնք որպես թաքստոց են օգտագործվել դրանց մեջ թմրամիջոցները տեղադրելու համար։

Գ.Թ. 101

Բջջային հեռախոսազանգերի վերծանումների տվյալներով այն մասին, որ ամբաստանյալ Հակոբ Կարապետյանի և վկա Անահիտ Խաչատրյանի միջև 2010թ. ապրիլի 9-ին և ապրիլի 10-ին մինչև ժամը 13-ը` թմրամիջոցը հանձնուքում հայտնաբերելը, երկկողմանի ինտենսիվ հեռախոսակապ է հաստատված եղել։

Գ.Թ. 78-90, 94-100, դատաքննության արձանագրություն

Հակոբ Կարապետյանի միակ բացատրությունը` տրված 10.04.2010թ. «Նուբարաշեն» ՔԿ հիմնարկի հետաքննիչին, նախաքննական մարմնի 20.05.2010թ. գ.թ. 146 որոշմամբ ՀՀ քրեական դատավարության օրենսգրքի 122-րդ հոդվածի կարգով ճանաչվել է ապացույց` այլ փաստաթուղթ։

Գ.Թ. 146

Հակոբ Կարապետյանն իր բացատրության մեջ հայտնել է, որ ինքն է խնդրել Անահիտ Խաչատրյանին` ստանալ և հանձնուքի հետ հանձնել կոշիկներ, Անահիտ Խաչատրյանը չի իմացել թմրամիջոցի առկայության մասին։ Թմրամիջոցը նախատեսված է եղել իր օգտագործման համար։ Հակոբ Կարապետյանը հրաժարվել է թմրամիջոցի ձեռքբերման աղբյուրը մատնանշելուց։

Գ.Թ. 18-19, 146

3. Դատարանի իրավական վերլուծությունը։
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Հակոբ Գուրգենի Կարապետյանի մեղքը ՀՀ քրեական օրենսգրքի 34-268-րդ հոդվածի 3-րդ մասով նախատեսված հանցանքը կատարելու մեջ հիմնավորված է, և նշված հոդվածի սանկցիայով նրա նկատմամբ պետք է քրեական պատիժ կիրառվի։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված պատասխանատվությունը մեղմացնող և ծանրացնող հանգամանքները։ Դրանք բնութագրում են հանցավորի անձնավորությունն ու կատարված հանցագործության հանրային վտանգավորության աստիճանը, հնարավորություն են տալիս կոնկրետ գործով անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ կոնկրետ դեպքով ամբաստանյալ Հակոբ Կարապետյանի մոտ որպես պատասխանատվությունը և պատիժը ծանրացնող հանգամանքներ են հանդիսանում ՀՀ քրեական օրենսգրքի 63-րդ հոդվածի 1-ին և 4-րդ կետերով նախատեսված հանգամանքները` հանցանքը կատարելու ռեցիդիվը և հանցագործության մեջ առավել ակտիվ դերը։
Ամբաստանյալ Հակոբ Կարապետյանի նկատմամբ պատասխանատվությունը և պատիժը մեղմացնող հանգամանքներ առկա չեն։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալ Հակոբ Գուրգենի Կարապետյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, քրեական գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր եզրակացությանը, որ ամբաստանյալի նկատմամբ որպես պատիժ անհրաժեշտ է նշանակել ազատազրկում որոշակի ժամկետով։
Դատարանը հաշվի է առնում նաև այն հանգամանքը, որ ամբաստանյալ Հակոբ Կարապետյանը սույն հանցանքը կատարել է մինչև նախորդ դատավճռով նշանակված պատժի լրիվ կրելը, այն է` հանցանքը կատարել է 10.04.2010թ., իսկ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի թիվ ԵԿԴ/0033/01/10 դատավճիռը հրապարակվել է 20.04.2010թ., հետևաբար` պատիժ նշանակելիս դատարանը պետք է ղեկավարվի ՀՀ քրեական օրենսգրքի 66-րդ հոդվածի 6-րդ և 4-րդ մասերի դրույթներով` վերջնական պատիժը նշանակվում է պատիժները լրիվ կամ մասնակիորեն գումարելու միջոցով և վերջնական պատժին հաշվակցվում է առաջին դատավճռով նշանակված պատժի կրած մասը։
Դատարանը հաշվի է առնում նաև ՀՀ քրեական օրենսգրքի 65-րդ հոդվածի պահանջը` հանցափորձի համար ազատազրկման ձևով պատժի ժամկետը հաշվարկելու վերաբերյալ։
Իրեղեն ապացույց ճանաչված` 1,87 գրամ առանձնապես խոշոր չափերի հասնող «Հերոին» տեսակի թմրամիջոցը և մեկ զույգ զամշե սև գույնի կոշիկները ենթակա են ոչնչացման դատավճիռն օրինական ուժի մեջ մտնելուց հետո։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 357-358, 360, 368-372, 376, 3761, 379-րդ հոդվածների և ՀՀ դատական օրենսգրքի 20-րդ հոդվածի պահանջներով, դատարանը.

Վ Ճ Ռ Ե Ց

Ամբաստանյալ Հակոբ Գուրգենի Կարապետյանին մեղավոր ճանաչել ՀՀ քրեական օրենսգրքի 34-268-րդ հոդվածի 3-րդ մասով նախատեսված հանցանքը կատարելու մեջ և նշված հոդվածի սանկցիայով կիրառել քրեական պատիժ` նշանակելով ազատազրկում 3 /երեք/ տարի ժամկետով։
ՀՀ քրեական օրենսգրքի 66-րդ հոդվածի 6-րդ և 4-րդ մասերի կարգով` հանցանքների համակցությամբ, նշանակված պատժից 2/երկու/ տարի ազատազրկումը մասնակիորեն գումարել նախորդ` Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 20.04.2010թ. թիվ ԵԿԴ/0033/01/10 դատավճռով նշանակված պատժին` 4 /չորս/ տարի 6 /վեց/ ամիս ժամկետով ազատազրկմանը և վերջնական պատիժ նշանակել ազատազրկում 6 /վեց/ տարի 6 /վեց/ ամիս ժամկետով, որի մեջ հաշվակցել 20.04.2010թ. թիվ ԵԿԴ/0033/01/10 դատավճռով նշանակված պատժի կրած մասը։
Պատժի սկիզբը հաշվել 2009 թվականի դեկտեմբերի 17-ից։
Պատիժը կրելու է ՀՀ ԱՆ ՔԿՎ համապատասխան քրեակատարողական հիմնարկում։
Դատավճիռն օրինական ուժի մեջ մտնելուց հետո իրեղեն ապացույց ճանաչված` 1,87 գրամ քաշով «Հերոին» տեսակի թմրամիջոցը և մեկ զույգ զամշե սև գույնի կոշիկները ոչնչացնել։
Դատավարության մասնակիցների կողմից դատավճիռը կարող է վերաքննության կարգով բողոքարկվել ՀՀ քրեական վերաքննիչ դատարան` հրապարակման պահից մեկ ամսվա ընթացքում։

ԴԱՏԱՎՈՐ Վ. Թ. ԳՐԻԳՈՐՅԱՆ