Գործ թիվ ԵԷԴ/0077/01/10
2010թ


Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղարությամբ Արմինե Արղամանյան
Մասնակցությամբ`
Մեղադրող Պավել Գյուլումյան
Ամբաստանյալ Գայանե Օհանյան
Ամբաստանյալի պաշտպաններ Անտոն Ղազարյան
Սիրանուշ Հարությունյան
Տուժողներ Գայանե Վարդանյան
Մկրտիչ Կարապետյան
Մարինե Ինթերզյան
Հռիփսիմե Չալիկյան
Նորա Գասպարյան
Պողոս Կարապետյան
Հովհաննես Առաքելյան
Գևորգ Դադյան

2010 թվականի հոկտեմբերի 29-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում քննեց քրեական գործն ըստ մեղադրանքի
Գայանե Լիպարիտի Օհանյանի ծնված 30.10.1964թ. Երևան քաղաքում, ազգությունը հայ, Հայաստանի Հանրապետության քաղաքացի, միջնակարգ կրթությամբ, ամուսնալուծված, չի աշխատել, չդատված, հաշվառված է եղել Երևան, Ֆրունզեի փող. 6/7 շենքի 27 բնակարանում, դատարանի վճռի հիման վրա 07.05.2002թ. հանվել է նշված հաշվառումից, որևէ հասցեում հաշվառված չէ, բնակվել է Երևան, Էրեբունի փողոց 34 շենքի, թիվ 62 բնակարանում։
ՀՀ ԱՆ ՔԿՎ «Աբովյան» ՔԿ հիմնարկի կալանավոր, կալանքի տակ է 15.04.2010թ-ից, մեղադրվում է ՀՀ քրեական օրենսգրքի 178-րդ հոդվածի 3-րդ մասի 1-ին կետով։
Առաջադրված մեղադրանքում իրեն լիովին մեղավոր է ճանաչել։

1.Գործի դատավարական նախապատմությունը։
19.12.2007թ. Պողոս Մկրտչի Կարապետյանը հայտարարություն է տվել ՀՀ ոստիկանության Էրեբունու բաժնին այն մասին, որ 2007թվականի սեպտեմբեր- հոկտեմբեր ամիսների ընթացքում իրեն և մի շարք անձանց Ամերիկայի Միացյալ Նահանգներ տանելու պատրվակով Գայանե Օհանյանն իրենցից վերցրել է ընդամենը 6630 ԱՄՆ դոլլար կանխիկ գումար և խաբեությամբ տիրացել այդ գումարին։
Հայտարարության կապակցությամբ ՀՀ ոստիկանության Էրեբունու բաժնի կողմից նյութեր են նախապատրաստվել,ՀՀ ոստիկանության ՔԳՎ Էրեբունու քննչական բաժնի 25.12.2007թ. որոշմամբ ՀՀ քրեական օրենսգրքի 178-րդ հոդվածի 2-րդ մասի 2-րդ կետի հատկանիշներով հարուցվել է թիվ 12118607 քրեական գործը և նախաքննություն է կատարվել։
12.03.2008թ. որոշումներ են կայացվել Գայանե Լիպարիտի Օհանյանին ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցանքը կատարելու համար որպես մեղադրյալ ներգրավելու և նրա նկատմամբ հետախուզում հայտարարելու մասին։
Երևանի Էրեբունի և Նուբարաշեն համայնքների ընդհանուր իրավասության դատարանը 13.03.2008թ. որոշմամբ բավարարել է նախաքննական մարմնի միջնորդությունը և մեղադրյալ Գայանե Լիպարիտի Օհանյանի նկատմամբ որպես խափանման միջոց ընտրել կալանավորումը։
Մեղադրյալին հայտնաբերելուն ուղղված քննչական և օպերատիվ-հետախուզական միջոցառումները դրական արդյունք չեն տվել, մեղադրյալի գտնվելու վայրն անհայտ լինելու և քննությունից նրա թաքնվելու հիմքով ՀՀ քրեական դատավարության օրենսգրքի 31-րդ հոդվածի 1-ին մասի 2-րդ կետով 24.04.2008թ. նախաքննությունը կասեցվել է։
2010թվականի ապրիլի 15-ին Գայանե Լիպարիտի Օհանյանն ինքնակամ ներկայացել է ՀՀ ոստիկանության Էրեբունու բաժին։
16.04.2010թ. քրեական գործով նախաքննությունը վերսկսվել է։ Նույն օրը նրան մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով։ 16.04.2010թ. Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը, քննության առնելով կալանավորումը որպես խափանման միջոց ընտրելու վերաբերյալ միջնորդությունը, որոշում է կայացրել այն վերահաստատելու մասին, կալանքի ժամկետը հաշվելով 15.04.2010թ.։
08.06.2010թ. քրեական գործն ստացվել է Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանում։

2.Դատաքննությամբ ձեռք բերված ու հետազոտված ապացույցները։
Դատաքննությամբ հետազոտվել են մեղադրանքի հիմքում դրված այն բոլոր ապացույցները, որոնք թվարկված են մեղադրական եզրակացության մեջ։
Ապահովելով դատաքննության լրիվությունը, բազմակողմանիությունը և օբյեկտիվությունը և ղեկավարվելով գործի արդար քննությանը վերաբերող սահմանադրական ու դատավարական նորմերի դրույթներով, հիմնվելով պատշաճ ընթացակարգի շրջանակներում դատական քննության ընթացքում գործի հանգամանքների հետազոտման արդյունքի վրա, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով, դատարանը գտնում է, որ քրեական գործով առաջադրված մեղադրանքում ամբաստանյալի մեղքը հիմնավորված է։
Նախաքննությամբ և դատաքննությամբ ձեռք բերված ու հետազոտված ապացույցներով հիմնավորվել է հետևյալը.
Գործով վկա Գոհար Հարությունյանը և տուժող Նորա Գասպարյանը «Հայէկոնոմբանկում» համատեղ աշխատանքային գործունեությունից ճանաչել են ամբաստանյալ Գայանե Օհանյանի մորը` Սեդա Պարոնյանին, ում անձի նկատմամբ խորը հարգանք և վստահություն են տածել։
Նշված հանգամանքն իր շահադիտական նպատակների համար օգտագործել է ամբաստանյալ Գայանե Օհանյանը` նշված անձանց և նրանց շրջապատի վստահությունը շահելու, այդ վստահությունից օգտվելու և խաբեությամբ քաղաքացիների գույքին տիրանալու հանցավոր դիտավորությամբ։ Այսպես.
2007թ. հուլիս ամսին վկա Գոհար Հարությունյանը ամբաստանյալ Գայանե Օհանյանի հետ գնացել է տուժող Նորա Գասպարյանի տուն, Գայանեին և Նորային ծանոթացրել միմյանց հետ։ Գայանե Օհանյանն զգացել է իր մոր անձի նկատմամբ Նորա Գասպարյանի ջերմ զգացմունքներն ու հարգանքը, որպիսի հանգամանքից ցանկացել է օգտվել` առանց առիթը բաց թողնելու։
Հարկ է նշել, որ ամբաստանյալ Գայանե Օհանյանը կարողացել է արագ կարգով անկաշկանդ փոխհարաբերությունների մեջ մտնել անծանոթ մարդկանց հետ, տարբեր ձևեր օգտագործելով` դրական կարծիք, համոզմունք և վստահություն ներշնչել իր անձի և իր ենթադրյալ հնարավորությունների նկատմամբ, մուտք գործել նրանց բնակարաններ և լսելով նրանց հուզող սոցիալական խնդիրների մասին, դրանք լուծելու սցենարներ կազմել և մարդկանց խաբել, նրանց վստահությունը չարաշահել ու նրանցից գումար հափշտակելով` տիրանալ նրանց գույքին։
2007թվականի ամռանը ամբաստանյալ Գայանե Օհանյանն իր դեռատի դստեր` Լուսինեի հետ գնացել է տուժող Նորա Գասպարյանի տուն։ Վերջինիս վրա ծանր տպավորություն են թողել ամբաստանյալի դստեր ձեռքերի վրայի այրվածքների խորը և արտահայտված հետքերը։ Այդ հանգամանքն իսկույն ամբաստանյալն օգտագործել է իր հանցավոր նպատակների համար, հայտնելով, որ ցանկանում է դստերը տանել Ամերիկայի Միացյալ Նահանգներ` վիրահատության, միաժամանակ իր խոսքին արժանահավատության երանգ տալու համար առաջարկել է տուժող Նորա Գասպարյանին` վերջինիս աղջկան` Թամարային, նույնպես տանել ԱՄՆ, քանի որ նա տիրապետում է անգլերեն լեզվին։
Զգալով տուժող Նորա Գասպարյանի կարեկից և բարյացակամ վերաբերմունքն իր նկատմամբ` ամբաստանյալ Գայանե Օհանյանը սկսել է շահադիտական նպատակներով օգտագործել նշված վերաբերմունքը։
Այսպես. տուժող Նորա Գասպարյանի վերաբերմունքը չարաշահելով, ամբաստանյալ Գայանե Օհանյանը ՀՀ զինված ուժերում ծառայող իր որդուն ուղարկելու պատրվակով պարտքի անվան տակ, կարճ ժամկետում վերադարձնելու պայմանով Նորա Գասպարյանից ստացել է 55.000 ՀՀ դրամ, մյուս անգամ` ԱՄՆ դեսպանատուն երեխային տանելու պատրվակով` որպես պարտք ևս 20.000 ՀՀ դրամ գումար, սակայն նշված գումարը չի վերադարձրել, տիրացել է դրան։ Վերջին 20.000 ՀՀ դրամը տուժող Նորա Գասպարյանը ստիպված պարտք է վերցրել հարևանուհուց` մյուս տուժող Գայանե Վարդանյանից և հանձնել ամբաստանյալին։ Նշված առիթն օգտագործելով, ամբաստանյալ Գայանե Օհանյանն արդեն ճարպկորեն հարաբերություն է հաստատել տուժող Գայանե Վարդանյանի հետ, գնացել-եկել է նրանց տուն։ Տուժող Գայանե Վարդանյանի ամուսինը գործով տուժող Պողոս Կարապետյանն է։
Վերջիններիս հետ ունեցած զրույցների ընթացքում ամբաստանյալը լսել է նրանց դժգոհությունը իրենց սոցիալական անապահով վիճակից, աշխատանք չունենալու հանգամանքից։ Ամբաստանյալ Գայանե Օհանյանի մոտ հանցավոր մտադրություն է առաջացել կազմել և գործողության մեջ դնել մի սցենար, այն հրամցնել որպես իրականություն, որպեսզի ինքը հնարավորություն ունենա կարճ ժամկետում խարդախությամբ հափշտակել առանձնապես խոշոր չափերի հասնող գումար։
Ամբաստանյալ Գայանե Օհանյանը տուժող Գայանե Վարդանյանի հետ զրուցելու ընթացքում զգացել է, որ իր դստերը ԱՄՆ տանելու մտադրությունը գրավել է տուժող Գայանե Վարդանյանի ուշադրությունը, նշված թեմայով Գայանե Օհանյանի խոսքը տուժողների կողմից արժանահավատորեն է ընդունվել։ Ինչպես տուժող Գայանե Վարդանյանը, այնպես էլ` տուժող Պողոս Կարապետյանը հետաքրքրվել են ԱՄՆ գնալու հեռանկարով։ Նրանցից տուժող Գայանե Վարդանյանը ցանկություն է հայտնել անձամբ գնալ ԱՄՆ, աշխատել այնտեղ և գումար վաստակել, դրանում տեսնելով իրենց ընտանիքի անբարվոք սոցիալական վիճակն ուղղելու ելքը։ Տուժող Գայանե Վարդանյանը ԲՈՒՀ-ում դասավանդել է անգլերեն լեզու։ Դա չի վրիպել ամբաստանյալ Գայանե Օհանյանի ուշադրությունից։ Նա տուժողների մոտ շարունակաբար հայտարարել է, որ իր ամուսինը` Մանուկը, հանդիսանում է հանրապետության բարձրաստիճան և ազդեցիկ պաշտոնատար անձանցից մեկի թիկնազորի պետը, իրենք նույնպես բնակվում են կառավարական «դաչայում», իր ամուսնու եղբայր Վադիմը բնակվում է Կանադայում, մեծահարուստ գործարար է և բարեգործ, ծրագիր ունի 15 հոգանոց խումբ կազմավորել և ոչ մեծ ծախսերի դիմաց նրանց տանել ԱՄՆ` աշխատելու։ Ամբաստանյալ Գայանե Օհանյանը հայտնել է նաև, որ նշված ոչ մեծ չափի գումարները օգտագործվելու են միայն ԱՄՆ դեսպանությունում թույլտվություն ստանալու հետ կապված ծախսերը հատուցելու համար, ինքը դեսպանատանը աշխատող Հասմիկ անունով ծանոթ ունի, ով լուծելու է մուտքի թույլտվություն ստանալու խնդիրները։ Մնացած ծախսերը հատուցելու է Վադիմը` բարեգործական հիմունքներով։
Յուրաքանչյուր անգամ տուժողների հետ հանդիպման ժամանակ, որը տեղի է ունեցել հիմնականում տուժողներ Պողոս Կարապետյանի և Գայանե Վարդանյանի` Երևանի Ազատամարտիկների /նախկին` Դիմիտրով/ փողոցի 87 շենքի 1-ին բնակարանում, ամբաստանյալ Գայանե Օհանյանը եկել է վկա Հրայր Եզխաթյանի արտասահմանյան մակնիշի ավտոմեքենաներով, ուշադրություն է դարձրել իր հագուստին և սանրվածքին, տպավորություն է ստեղծել բարձր դասի անձանց հետ առնչվելու, նրանց հետ հրավերքներին մասնակցելու մասին, տուժողների վրա տպավորություն է գործել և դրանով իսկ բթացրել նրանց զգոնությունը։
2007թ. սեպտեմբեր-հոկտեմբեր ամիսներին «խմբում» ընդգրկվել և ամբաստանյալ Գայանե Օհանյանին գումար են տվել գործով տուժողներ Գայանե Վարդանյանը, նրա ամուսին Պողոս Կարապետյանը և նրանց որդի Մկրտիչ Կարապետյանը, Պողոս Կարապետյանի հարևանուհի Նորա Գասպարյանը, Պողոս Կարապետյանի քրոջ խնամի Հռիփսիմե Չալիկյանը, Պողոս Կարապետյանի քրոջ դուստր Մարինե Ինթերզյանը, Մարինե Ինթերզյանի հորեղբոր թոռ Մինաս Ինթերեզյանը, Մարինե Ինթերզյանի աշխատանքային ընկեր Հովհաննես Առաքելյանը և Հովհաննես Առաքելյանի հորեղբայր Գևորգ Դադյանը։
Թվարկված տուժողների կողմից ամբաստանյալ Գայանե Օհանյանը մաս-մաս կամ միանգամից տարադրամով կամ ՀՀ դրամով ստացել է հետևյալ գումարը, որը կազմում է տուժողների ներկայացրած քաղաքացիական հայցը /տարադրամի համարժեք դրամը նշվում է հանցագործության օրվա կուրսով/.
1. Գայանե Վարդանյան - 800 ԱՄՆ դոլար /268.000 ՀՀ դրամին համարժեք/ և 93.000 ՀՀ դրամ,
2. Մինաս Ինթերեզյան - 700 ԱՄՆ դոլար /234.500 ՀՀ դրամին համարժեք/,
3. Մարինե Ինթերզյան - 500 ԱՄՆ դոլար /166.000 ՀՀ դրամին համարժեք/,
4. Հռիփսիմե Չալիկյան - 460 ԱՄՆ դոլար /152.260 ՀՀ դրամին համարժեք/ և 80.000 ՀՀ դրամ,
5. Նորա Գասպարյան - 35.000 ՀՀ դրամ, 250 ԱՄՆ դոլար /82.500 ՀՀ դրամին համարժեք/ և 211.000 ՀՀ դրամ,
6. Հովհաննես Առաքելյան - 1400 դոլար /455.000 ՀՀ դրամին համարժեք/ և 20.000 ՀՀ դրամ,
7. Գևորգ Դադյան - 1400 ԱՄՆ դոլար /455.000 ՀՀ դրամին համարժեք/,
8. Պողոս Կարապետյան - 1250 ԱՄՆ դոլար /406.250 ՀՀ դրամին համարժեք/ և 30.000 ՀՀ դրամ,
9. Մկրտիչ Կարապետյան - 1050 ԱՄՆ դոլար /338.100 ՀՀ դրամին համարժեք/։
Ամբաստանյալ Գայանե Օհանյանը խաբեությամբ և վստահությունը չարաշահելու միջոցով նշված տուժողներից ստացած գումարը հափշտակելով, նրանց պատճառել է առանձնապես խոշոր չափերի հասնող` 3.026.610 ՀՀ դրամի գույքային վնաս։ Ամբաստանյալ Գայանե Օհանյանը տուժողներին շտապեցրել է գումարը նրանցից ստանալու հարցում` այն պատճառաբանելով Վադիմի կողմից բարեգործական ակցիան շտապ իրականացնելու անհրաժեշտությամբ, հավաքել է տուժողների անձնագրերը, նրանցից պահանջել է շտապ լուսանկարվել և ամեն պահ պատրաստ լինել թռիչքի։
Տուժողները նշված գումարի մեծ մասը պարտք են վերցրել այլ անձանցից, ոսկեղեն են գրավ դրել գրավատանը։
Տուժող Պողոս Կարապետյանն ազատվել է աշխատանքից` ԱՄՆ մեկնելու ակնկալիքով, նրա որդին` տուժող Մկրտիչ Կարապետյանը, Մոսկվայում թողնելով իր զբաղմունքը վաճառելով իր արհեստագործական գործիքներն ու մյուս պարագաները` եկել է Երևան և սպասել ԱՄՆ մեկնելուն։
Տուժող Պողոս Կարապետյանի կրտսեր որդի Նարեկ Կարապետյանը շուրջ մեկ ամիս դասի չի գնացել։
Ամբաստանյալ Գայանե Օհանյանը տուժողներին բաժանել է ԱՄՆ դեսպանատուն կոնկրետ օրվա և ժամի ներկայանալու անվանական ծանուցումներ, նրանց հետ պայմանավորվել է դեսպանատուն գնալուց առաջ իրենց հանդիպման վայրը, տուժողները պատրաստվել են, սակայն ամբաստանյալը բազմիցս անհեթեթ պատճառներով հետաձգել է դեսպանատուն գնալը։ Տուժողներին ցույց է տվել մի կնոջ և հայտնել, որ նա Հասմիկն է, դեսպանատան աշխատակցուհին, ով կարգավորում է վիզայի հարցերը և անձնագրերը նրա մոտ են։ Տուժողներին նա ստիպել է ճամպրուկները պատրաստ պահել` ամեն պահի թռիչքի գնալու համար։ Կազմակերպել է բջջային հեռախոսի փակ համարով քննությամբ չպարզված մարդու` որպես Վադիմի և քննությամբ չպարզված կնոջ` որպես Հասմիկի հետ հեռախոսազրույցները, որոնց ընթացքում նրանք որոշակի հանգստացուցիչ երաշխիքներ են տվել տուժողներին։ Մի քանի անգամ ամբաստանյալ Գայանե Օհանյանը պայմանավորվել է տուժողների հետ` ինչ-որ ամառանոցում Վադիմի հետ հանդիպելու և նրա հետ միջոցառմանը մասնակցելու համար, սակայն սպասող տուժողներին վերջին պահին հայտնել է, որ Վադիմը Փոթի քաղաքում է, գտնվում է Մեղրի քաղաքի մաքսատանը, այլ վայրում, հետո կհանդիպեն նրա հետ։
Թվարկված և այլ դրսևորումներով օգտվելով տուժողների դյուրահավատությունից, ԱՄՆ աշխատանքի մեկնելով` իրենց սոցիալական վիճակը բարելավելու վերաբերյալ նրանց նպատակադրումից և տուժողների դրսևորած համբերատարությունից և իր անձի նկատմամբ տուժողների տածած վստահությունից, ամբաստանյալ Գայանե Օհանյանը տուժողներին երկար ժամանակ պահել է իրենից նվաստացուցիչ կախվածության մեջ։
Ամբաստանյալ Գայանե Օհանյանը տուժողներից մեկը մյուսի համեմատ միևնույն նպատակի` ԱՄՆ մեկնելու համար տարբեր չափի գումար ստանալու հանգամանքը պատճառաբանել է որոշ անձանց նկատմամբ անձնական համակրանքով զիջումներ անելու հանգամանքով։
Մշտական սպասողական վիճակը և ամբաստանյալի պահվածքը սկսել են կասկած հարուցել տուժողների մոտ։ Նրանք հանդիպել են ամբաստանյալի քրոջն ու մորը և պարզել, որ Գայանե Օհանյանը խարդախ է։
Պարզվել է նաև, որ նա որևէ հարաբերություն չունի իր հարազատների և երեխաների հետ, ամուսնալուծված է, Մանուկն ու Վադիմը հնարովի, գոյություն չունեցող կերպարներ են նշված սցենարում, ամբաստանյալն էլ բնակվում է գործով վկաներ Համլետ Բասեյանի և Անահիտ Համբարձումյանի տանը։ 2007 թվականի դեկտեմբերին տուժող Պողոս Կարապետյանի տանը հավաքված տուժողները ամբաստանյալ Գայանե Օհանյանից պահանջել են վերադարձնել իրենցից հափշտակած գումարն ու անձնագրերը։ Ամբաստանյալ Գայանե Օհանյանը զանգահարել է Անահիտ Համբարձումյանին, խնդրել է բերել անձնագրերը, դրանք հանձնվել են տուժողներին։ Խոստովանելով, որ ինքը տուժողներին խաբել ու նրանց տված գումարը հափշտակել է, ամբաստանյալ Գայանե Օհանյանը խոստացել է գումարը վերադարձնել։ Տարբեր օրերի գրել է պարտավորագրեր` դրանցում նշված կոնկրետ ժամկետներում գումարը վերադարձնելու մասին, այնուհետև գրել է հաջորդ և նորից` հաջորդ պարտավորագիրը, ապա դիմել է փախուստի, որից հետո տուժող Պողոս Կարապետյանը հայտարարություն է տվել ՀՀ ոստիկանության Էրեբունի բաժնին։
Նախաքննական մարմնի կողմից ամբաստանյալ Գայանե Լիպարիտի Օհանյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով։
Գայանե Օհանյանը նախաքննության ընթացքում առաջադրված մեղադրանքում իրեն լիովին մեղավոր է ճանաչել և ցուցմունք է տվել, հայտնելով, որ, իրոք, խաբեությամբ տիրացել է տուժողներից վերցրած ընդամենը 3.026.610 դրամին համարժեք գումարին, այն ծախսել է իր անձնական կարիքների համար, պարտավորվում է հատուցել տուժողներին պատճառված վնասը։

Հատոր 2 Գ.Թ. 227, 256

Դատաքննության ընթացքում ամբաստանյալ Գայանե Օհանյանն իրեն լիովին մեղավոր ճանաչելով առաջադրված մեղադրանքում, միջնորդել է կիրառել դատական քննության արագացված կարգ, սակայն դատարանը ՀՀ քրեական դատավարության օրենսգրքի 3751-րդ հոդվածի 3-րդ մասի հիմքով մերժել է միջնորդությունը և որոշում կայացրել ընդհանուր կարգով դատաքննություն անցկացնելու մասին։
Դատաքննության ընթացքում ամբաստանյալ Գայանե Օհանյանը, փոխելով իր դիրքորոշումը, ցուցմունք է տվել այն մասին, որ տուժողներից ինքը գումարի մի մասը վերցրել է տուժող Պողոս Կարապետյանի հետ հանցավոր համաձայնությամբ, քանի որ Պողոս Կարապետյանը գումարային խնդիրներ է ունեցել, այդ պատճառով, ըստ էության, առաջադրված մեղադրանքում իրեն մասնակի է մեղավոր ճանաչել և համաձայնվելով ներկայացված քաղհայցի մի մասի հետ, պատրաստակամություն է հայտնել վերականգնել տուժողներին պատճառված գույքային վնասի կեսը, այն պայմանով, որ մյուս կեսը վերականգնի տուժող Պողոս Կարապետյանը։
Միաժամանակ ամբաստանյալ Գայանե Օհանյանը ցուցմունք է տվել այն մասին, որ իրեն երթուղային տաքսուց իջեցրել և տարել են Պողոս Կարապետյանի տուն, տուժողները պահանջել են վերադարձնել իրենցից վերցրած անձնագրերն ու գումարը, փաստորեն` իրեն ապօրինի զրկել են ազատությունից։

Դատաքննության արձանագրություն

Գործի նախաքննությամբ և դատաքննությամբ ձեռք բերված ապացույցների համատեքստում վերլուծելով և գնահատելով ամբաստանյալ Գայանե Օհանյանի վերը նշված պատճառաբանությունները, դատարանը գտնում է, որ ամբաստանյալի նշված պատճառաբանություններն անհիմն են, մտացածին, դրանցով ամբաստանյալը նպատակ է հետապնդում խուսափել իր կատարած հանցանքի ամբողջ ծավալի համար քրեական պատասխանատվությունից և հանցագործությամբ պատճառված գույքային վնասն ամբողջովին հատուցելու պարտավորությունից։ Դատարանը գտնում է, որ դեռևս հանցանքը կատարելու ժամանակ, երբ պահանջված գումարը տուժողները հանձնել են ամբաստանյալ Գայանե Օհանյանին, կանխազգալով իր կատարած հանցանքի համար հետագայում պատասխանատվության ենթարկվելու հավանականությունն ու հեռանկարը, հանցանքի կատարման մեջ իր մասնակցությունը բացառելու պատճառաբանություններ բերելու համար նախահիմքեր ստեղծելու նպատակով, օգտագործելով Պողոս Կարապետյանի և մյուսների դյուրահավատությունն ու խարդախության մեքենայություններում նրանց անտեղյակությունը և միամտությունը, ամբաստանյալ Գայանե Օհանյանը, տարբեր պատրվակներով, մասնավորապես` տուժողներ Հ. Առաքելյանի, Գ. Դադյանի և մյուսների հետ անծանոթ լինելը, տուժող Պողոս Կարապետյանին հակել է մյուս տուժողներից իր տանն անձամբ վերցնել և իրեն հանձնել իր պահանջած գումարները, որպիսին կատարվել է։ Նշված հանցանքը ամբաստանյալը դատաքննության ժամանակ մեկնաբանել է որպես խարդախության հարցում տուժող Պողոս Կարապետյանի հետ հանցակցություն, որպիսին դատարանը գնահատում է անհիմն և արհեստական փաստարկ։
Ինչ վերաբերում է իրեն ազատությունից ապօրինի զրկելու մասին ամբաստանյալ Գայանե Օհանյանի պատճառաբանություններին, ապա դատարանը գտնում է, որ այն նույնպես անհիմն է, քանի որ ամբաստանյալի փաստարկը վերաբերել է այն օրվան, երբ հերթական անգամ տուժող Պողոս Կարապետյանի տանը բոլոր տուժողների և ամբաստանյալի հանդիպման ժամանակ, համոզված լինելով իրենց խաբվածության մեջ, տուժողները պահանջել են ամբաստանյալ Գայանե Օհանյանից` վերադարձնել գոնե իրենց անձնագրերը։ Ամբաստանյալը զանգահարել է վկա Անահիտ Համբարձումյանին և խնդրել է նրա տանը գտնվող մահճակալի ներքնակի տակ պահած անձնագրերը բերել և հանձնել իրեն։ Վկա Անահիտ Համբարձումյանը ամբաստանյալի որդու հետ բերել է անձնագրերը, դրսում նրանց դիմավորել է ամբաստանյալ Գայանե Օհանյանը և անձնագրերը տուժողներին է բաժանել Պողոս Կարապետյանի բնակարանում, նկարվել է տուժողների հետ, խոստանալով վերականգնել նրանց պատճառված նյութական վնասը։
Դատաքննությամբ հիմնավորվել է, որ ամբաստանյալ Գայանե Օհանյանի հերթական անգամ գտնվելը Պողոս Կարապետյանի տանը կրել է կամավոր բնույթ, չի զուգորդվել նրա անձի նկատմամբ ֆիզիկական կամ հոգեբանական բռնությամբ, չեն սահմանափակվել ազատ տեղաշարժվելու նրա սահմանադրական և քաղաքացիական իրավունքները, հետևաբար` ամբաստանյալին ազատությունից զրկելու մասին նրա բերած փաստարկները նույնպես մտացածին ու անհիմն են։
Ամբաստանյալ Գայանե Օհանյանին առաջադրված մեղադրանքը հիմնավորվել է դատաքննությամբ հետազոտված հետևյալ ապացույցներով.
Տուժող Նորա Գասպարյանը ցուցմունք է տվել այն մասին, որ 2007 թվականի հուլիսին իր աշխատանքային ընկերուհի Գոհար Հարությունյանի միջոցով ծանոթացել է Գայանե Օհանյանի հետ, իմացել է, որ նա Սեդա Պարոնյանի դուստրն է։ Վերջինիս անձի նկատմամբ ունի խորը հարգանք, այդ պատճառով ինքը լավ է վերաբերվել Գայանե Օհանյանին։ Մի քանի անգամ Գայանե Օհանյանը եկել է իր տուն, այդ թվում նաև` իր աղջկա` Լուսինեի հետ, որի ձեռքերի վրայի այրվածքների խորը հետքերն իր մոտ խղճահարություն են առաջացրել։ Գայանե Օհանյանը հայտնել է, որ ցանկանում է աղջկան տանել ԱՄՆ` վիրահատության։ Առաջարկել է իր հետ ԱՄՆ տանել նաև աղջկան` Թամարային /Տոմային/, քանի որ նա տիրապետում է անգլերենին։ Երկու անգամ Գայանե Օհանյանը վերադարձնելու պայմանով` պարտքով, իրենից գումար է խնդրել և ստացել, առաջին անգամ` 55.000 ՀՀ դրամ, 2-րդ անգամ` 20.000 ՀՀ դրամ։ Վերջին անգամվա համար ինքը ցանկացել է 10.000 ՀՀ դրամ պարտքով վերցնել հարևանուհուց` Գայանե Վարդանյանից, վերջինս ունեցել է 20.000 ՀՀ դրամանիշ, այն հանձնել է Գայանե Օհանյանին։ Նշված 75.000 ՀՀ դրամ պարտքն այդպես էլ Գայանեն չի վերադարձրել իրեն։ Գայանե Օհանյանը մտերմացել է Գայանե Վարդանյանի հետ, հաճախակի է եկել նրանց տուն։ Զրույցների ընթացքում Գայանե Օհանյանը հայտնել է, որ իր ամուսինը` Մանուկը, հանրապետության բարձրաստիճան ազդեցիկ պաշտոնյայի թիկնազորի պետ է, նա ունի Վադիմ անունով կանադահայ մեծահարուստ բարերար եղբայր, վերջինս բարեգործական ծրագրեր ունի, այդ թվում` 15 հոգանոց խմբին իր հաշվին աշխատելու նպատակով ԱՄՆ տանելու համար։ Գայանե Օհանյանը հայտնել է, որ ԱՄՆ դեսպանատանն ունի Հասմիկ անունով ընկերուհի, ով կօգնի ԱՄՆ մուտքի վիզաները ձևակերպելու հարցում, որի համար գումար պետք է ծախսվի։ Մի քանի օրից լսել է, որ Գայանե Վարդանյանը 500 ԱՄՆ դոլար է տվել Գայանե Օհանյանին։ Վերջինիս առաջարկությամբ ինքն էլ իր ոսկյա զարդերն է գրավ դրել և ստանալով 70.000 ՀՀ դրամ` տվել է Գայանե Օհանյանին։ Այնուհետև 250 ԱՄՆ դոլար է տվել Գայանե Օհանյանին` ինչ-որ կենցաղային իրեր ձեռք բերելու համար, հետո նա իրենից վերցրել է ևս 35.000 ՀՀ դրամ գումար։ Ինքը լսել է, որ Գայանե Օհանյանը գործով մյուս տուժողներից նույնպես գումար է հավաքում` նրանց ԱՄՆ տանելու նպատակով։ Գայանե Օհանյանը վերցրել է նաև իր փաստաթղթերն ու լուսանկարները։ Որպես ԱՄՆ-ից ուղարկված նվերներ` իրեն և հարևան Պողոսին ու նրա կնոջը DVD սարքավորումներ և այլ ապրանքներ է բերել, սակայն Գրիգոր Շաշիկյան անունով մի մարդ եկել, դրանք պահանջել և տարել է։ Թեև Գայանե Օհանյանը թերթիկներ է բաժանել իրենց անուններով` դեսպանատուն գնալու մասին կամ հայտնել է, որ արդեն մեկնելու են, սակայն պարզվել է, որ այդ ամենը խաբեություն է, իրենց տված գումարը Գայանե Օհանյանը յուրացրել է, նա վերադարձրել է միայն իրենց անձնագրերը, գրավոր պարտավորագրեր է գրել գումարը վերադարձնելու մասին, հետո դիմել է փախուստի։ Իր կողմից ներկայացված քաղհայցը կազմում է ընդամենը 328.500 ՀՀ դրամ։
Տուժող Նորա Գասպարյանը նույն ցուցմունքը պնդել է ամբաստանյալ Գայանե Օհանյանին առերես։

Հատոր 1 Գ.Թ. 64-66, 68-71, հատոր 2 Գ.Թ. 148, 176,
դատաքննության արձանագրություն

Տուժող Գայանե Վարդանյանը ցուցմունք է տվել այն մասին, որ 2007 թվականի սեպտեմբեր ամսին իր հարևանուհի Նորա Գասպարյանի միջոցով ծանոթացել է Գ. Օհանյանի հետ։ Նշված օրը վերջինս իրենից խնդրել է 10.000 ՀՀ դրամ գումար ԱՄՆ դեսպանատանը հարցազրույց անցնելու նպատակով։ Ինքը նրան տվել է 20.000-անոց թղթադրամ, հայտնելով, որ մանր չունի։ Սեպտեմբեր ամսվա վերջին Ն. Գասպարյանի տանը կրկին տեսել է Գայանե Օհանյանին։ Խոսակցության ընթացքում նա իրեն հայտնել է, որ իր ամուսին Մանուկը վարչապետի թիկնազորի պետն է, իսկ նրա եղբայրը` կանադահայ բարեգործ Վադիմը, բարեգործական նպատակներով կազմակերպում է ԱՄՆ մեկնելը, իսկ ինքը ԱՄՆ դեսպանատանը Հասմիկ անունով ծանոթ ունի, որը կօգնի վիզաների վավերացման հարցում։ Գայանե Օհանյանն իրեն առաջարկել է ԱՄՆ մեկնել խմբի կազմում և դրա դիմաց իրեն տանելու համար պահանջել 300 ԱՄՆ դոլար։ Մի քանի օր անց ինքը Նորայենց բնակարանում երկու տարբեր օրերի ընթացքում Գայանե Օհանյանին է տվել ընդամենը 800 ԱՄՆ դոլար, իր անձնագիրը, 3 լուսանկար և որդու ծննդյան վկայականը։ Դեկտեմբեր ամսվա առաջին շաբաթվա ընթացքում Նորայենց տանը ինքը հանդիպել է Գայանեին և տեղեկացել, որ մի հոգի նույնպես պետք է մտնեն խմբի մեջ ԱՄՆ մեկնելու համար։ Գայանեն իրեն խնդրել է, որպեսզի վստահելի անձանց ճարի և իրենց հետ տանեն ԱՄՆ։ Ինքը և ամուսինն այդ մասին տեղեկացրել են ամուսնու քրոջ դստերը` Մարինեին։ Վերջինս համաձայնվել է և խնդրել, որ խմբի կազմում ընդգրկեն նաև իր զարմիկ Մինաս Ինթերեզյանին։ Մի քանի օր անց Մարինեն և Մինասն իրենց տանը Գայանեին տվել են համապատասխանաբար 500 և 700 ԱՄՆ դոլար։ Գայանեն ասել է, որ խումբը պետք է կազմված լինի 15 հոգուց և խնդրել, որ մի հոգի վստահելի անձինք էլ գտնեն։ Ինքն այդ մասին տեղյակ է պահել ամուսնու քրոջ դստեր խնամուն` Հռիփսիմե Չալիկյանին, ով ծանոթանալով Գայանեի հետ` մի քանի օր անց իրենց տանը վերջինիս տվել է 460, իսկ հետո ևս 240 ԱՄՆ դոլարին համարժեք 80.000 ՀՀ դրամ, իր անձնագիրը և լուսանկարները։ Հետագայում Մարինեի միջոցով խմբի կազմում ընդգրկվել են վերջինիս ծանոթ Հովհաննես Առաքելյանը և նրա հորեղբայր Գևորգ Դադյանը, ովքեր իր ամուսնուն` Պ. Կարապետյանին, տվել են 1400-ական ԱՄՆ դոլար, վերջինս էլ նշված գումարը տվել է Գայանեին։ Նոյեմբեր ամսի սկզբին Գայանեն Մոսկվայից ժամանած իր որդուց Մկրտիչ Կարապետյանից, ԱՄՆ գնալու համար ստացել է 1050 ԱՄՆ դոլար, իսկ մի քանի օր անց իրենց տանը Գայանեն ծանոթացել է իր քրոջ աղջկա Ալլայի և նրա ամուսնու Սերյոժայի հետ և նրանց առաջարկել գնալ ԱՄՆ, դրա դիմաց պահանջելով 73.000 ՀՀ դրամ և անձնագրեր։ Նրանց մոտ գումար չի եղել և ինքն է տվել Գայանեին նշված գումարը։ Հետագայում Ալլան և Սերյոժան հրաժարվել են ԱՄՆ գնալու մտքից։ Նույն ամսին տարբեր օրերի ընթացքում Գայանեն իր ամուսնուց տարբեր պատճառաբանություններով վերցրել է 1350 ԱՄՆ դոլար և խոստացել նրան անվճար ընդգրկել ԱՄՆ մեկնողների խմբում։ Նոյեմբեր ամսին Գայանեն իրենց տուն է բերել մեկ գունավոր հեռուստացույց, մեկ ջեռոց, մեկ միքսեր, մեկ տեսաձայնարկիչ, ասելով, որ դրանք ԱՄՆ-ից նվեր են ուղարկել, իսկ մի քանի ամիս անց նշված ապրանքների տերը` Գրիգոր Շաշիկյանը, եկել է իրենց տուն և վերցրել դրանք և պարզվել է, որ ձայնարկիչը մի քանի այլ ապրանքների հետ միասին Գայանեն վերցրել է Գրիգորից, խոստանալով դրա դիմաց վճարել, սակայն չի վճարել։
Որոշ ժամանակ հետո տեսնելով, որ ԱՄՆ գնալը չի ստացվում, ինքը և խմբի անդամները Գայանե Օհանյանից պահանջել են վերադարձնել իրենց գումարը, սակայն Գայանեն իրենց տանը հավաքելով խմբի անդամներին, նրանց է բաժանել թղթի կտորներ, որոնց վրա գրված է եղել «ներկայանալ ԱՄՆ դեսպանատուն», ասելով, որ դրանք դեսպանատան մուտքի հրավերներ են, ինչպես նաև թղթի կտորների վրա թելադրել է հինգնիշանոց համարներ, ասելով, որ դրանք դեսպանատան մուտքի ծածկագրերն են։
Իրենք չեն հավատացել Գայանեին և պահանջել են անձնագրերը, որոնք Գայանեն վերադարձրել է, իսկ գումարները պարտավորվել է վերադարձնել հետագայում։
Տուժող Գայանե Վարդանյանն իր ցուցմունքը պնդել է ամբաստանյալ Գայանե Օհանյանին առերես, տուժող Գայանե Վարդանյանը ներկայացրել է 361.000 ՀՀ դրամի քաղհայց։

Հատոր 1 Գ.Թ. 27-31, 32, հատոր 2 Գ.Թ. 72-73, 76,151,172,
դատաքննության արձանագրություն

Տուժող Պողոս Կարապետյանի ցուցմունքներով այն մասին, որ 2007թ. սեպտեմբեր ամսին իր կնոջ` Գայանե Վարդանյանի միջոցով ծանոթացել է Գայանե Օհանյանի հետ, որն իրեն հայտնել է, որ կարող է մի քանի հոգուց բաղկացած խումբ տանել ԱՄՆ։ Վերջինս հայտնել է նաև, որ ԱՄՆ մեկնելը կազմակերպում է իր ամուսին Մանուկը և նրա եղբայր, կանադահայ բարերար Վադիմը, իսկ ինքը ԱՄՆ դեսպանատանը Հասմիկ անունով ծանոթ ունի, որը կօգնի վիզաների վավերացման հարցում։ Մի քանի օր անց իր որդուն Նարեկին և կնոջը Գայանեին ԱՄՆ տանելու համար Գ. Օհանյանը ստացել է 800 ԱՄՆ դոլար, լուսանկարներ, կնոջ անձնագիրը և որդու ծննդյան վկայականի պատճենը։ Հետագա ամիսների ընթացքում իր միջոցով Գայանեն հավաքագրել է խմբի անդամ հանդիսացող ևս մի քանի հոգու։ 2007թ. հոկտեմբերի 08-ին Գայանեն իրենից իբրև թե ամառանոցի վերանորոգման աշխատանքները ավարտելու համար պահանջել է 100.000 ՀՀ դրամ գումար։ Մի քանի օր անց Գայանեն իրենից խնդրել է 300 ԱՄՆ դոլար, հայտնելով, որ իր ամուսնու եղբայրը` Վադիմը, նշված գումարով ԱՄՆ-ի իր դստերը բուժող բժշկի համար դաշույն պետք է գնի։ Ինքը չի մերժել վերջինիս խնդրանքը և նրան տվել է նշված գումարը։ Մի քանի օր անց Գայանեն իրենից խնդրել է 250 ԱՄՆ դոլար և ինքը կրկին չմերժելով` տվել է։ Գայանեն իրեն ասել է, որ 200 ԱՄՆ դոլար պետք է տա դեսպանատան աշխատակից Հասմիկին, իսկ 50 ԱՄՆ դոլարը` իր տաքսու վարորդին։ Ժամանակի ընթացքում իր միջոցով ԱՄՆ մեկնողների խմբի կազմում ընդգրկվել են իր քրոջ խնամի Հռիփսիմեն, իր քենու դուստրը և դստեր ամուսինը` Ալլան և Սերյոժան, Մարինե Ինթերզյանի ծանոթներ Հովհաննես Առաքելյանը և Գևորգ Դադյանը, որոնց մեկնման համար Գայանեն վերցրել է համապատասխանաբար 460 ԱՄՆ դոլար և 80.000 ՀՀ դրամ, 73.000 ՀՀ դրամ, 1400-ական ԱՄՆ դոլար և 20.000 ՀՀ դրամ։ Իր քենու դստեր և ամուսնու համար գումարը վճարել է կինը` Գայանե Վարդանյանը։ Նոյեմբերի 01-ին Մոսկվայից եկել է իր որդի Մկրտիչ Կարապետյանը և տեղեկանալով, որ ԱՄՆ մեկնող խումբ կա, ցանկացել է ինքն էլ մեկնել։ Գայանեն որդու համար պահանջել և ստացել է 1050 ԱՄՆ դոլար և անձնագիրը։ Հետագա մի քանի օրերի ընթացքում Գայանեն տարբեր պատճառաբանություններով իրենից ստացել է 30.000 ՀՀ դրամ և 200 ԱՄՆ դոլար, ասելով, որ իրեն ԱՄՆ կտանի առանց որևէ գումարի։ Նոյեմբեր ամսին Գայանեն եկել է իրենց տուն և բաժանել թղթի կտորներ, որոնց վրա գրված է եղել «Ներկայանալ ԱՄՆ դեսպանատուն» և հինգնիշանոց թվեր, և ըստ Գայանեի` դրանք ԱՄՆ դեսպանատան մուտքի հրավերն ու մուտքի ծածկագրերն են եղել։ Դեկտեմբեր ամսի սկզբին իրենց տանը Գայանեն իրեն և խմբի անդամներին հայտնել է, որ խաբել է նրանց և գումարները յուրացրել։ Նույն օրը նա վերադարձրել է անձնագրերը, իսկ գումարները պարտավորվել է վերադարձնել հետագայում։
Տուժողը ներկայացրել է 436.500 ՀՀ դրամի քաղհայց։
Տուժող Պողոս Կարապետյանը ցուցմունք է տվել այն մասին, որ տուժողներ Հովհաննես Առաքելյանի և Գևորգ Դադյանի 1400-ական ԱՄՆ դոլար գումարը` ընդամենը 2800 ԱՄՆ դոլարը, իր միջոցով է հանձնվել Գայանե Օհանյանին, քանի որ վերջիններս անծանոթ էին Գայանե Օհանյանին, իր հետ բարեկամական կապերի մեջ չէին գտնվում, այդ պատճառով Գայանե Օհանյանը ձեռնպահ է մնացել անձամբ նրանցից գումար վերցնելուց։
Տուժողն իր ցուցմունքը պնդել է ամբաստանյալ Գայանե Օհանյանին առերես։

Հատոր 1 Գ.Թ. 77-80, 89, հատոր 2 Գ.Թ. 93-94, 149, 170,
դատաքննության արձանագրություն

Տուժող Մկրտիչ Կարապետյանի ցուցմունքներով այն մասին, որ 2007թ. նոյեմբերի 01-ին Մոսկվա քաղաքից եկել է Երևան և տեղեկանալով, որ հոր ծանոթ Գայանեն խումբ է տանում ԱՄՆ, ցանկացել է անդամագրվել խմբին։ Գայանե Օհանյանը հայտնել է, որ ԱՄՆ մեկնելը կազմակերպում է իր ամուսին Մանուկը և նրա եղբայր, կանադահայ բարերար Վադիմը, իսկ ինքը ԱՄՆ դեսպանատանը Հասմիկ անունով ծանոթ ունի, Հասմիկը կօգնի վիզաների վավերացման հարցում։ Դրա համար Գայանեն իրենից պահանջել է 1050 ԱՄՆ դոլար, անձնագիր, զինգրքույկ և լուսանկար։ Մի քանի օր անց տեղեկացել է, որ խմբի մեջ ուրիշ անձինք էլ կան և նրանց ԱՄՆ տանելու համար Գայանեն նույնպես գումար է վերցրել։ Հետագայում պարզվել է, որ Գայանեն իրենց խաբել է, վերադարձրել է միայն անձնագրերը, իսկ գումարը պարտավորվել է տալ հետագայում։
Տուժողը ներկայացրել է 338.100 ՀՀ դրամի քաղհայց։
Տուժողն իր ցուցմունքը պնդել է ամբաստանյալ Գայանե Օհանյանին առերես։

Հատոր 1 Գ.Թ. 37-40, դատաքննության արձանագրություն

Տուժող Մարինե Ինթերզյանի ցուցմունքներով այն մասին, որ 2007թ. հոկտեմբերի 14-ին իր մորեղբայր Պողոս Կարապետյանից տեղեկացել է, որ վերջինիս ծանոթ Գայանե անունով անձնավորությունը 700 ԱՄՆ դոլարով խումբ է տանում ԱՄՆ։ Ինքը նույնպես ցանկացել է ընդգրկվել այդ խմբի կազմում, սակայն ասել է, որ ունի 500 ԱՄՆ դոլար։ Նույն օրը գնացել է մորեղբոր տուն, ծանոթացել Գայանեի հետ և նրան տվել 500 ԱՄՆ դոլար, երկու լուսանկար և անձնագիրը։ Գայանեն իրեն ասել է, որ ԱՄՆ մեկնելը կազմակերպում է իր ամուսին Մանուկը և նրա եղբայր, կանադահայ բարերար Վադիմը, իսկ ինքը ԱՄՆ դեսպանատանը Հասմիկ անունով ծանոթ ունի, որը կօգնի վիզաների վավերացման հարցում։ Մի քանի օր անց Գայանեն իրեն հայտնել է, որ խմբի անդամներից երկուսը դատվածություն ունեն, նրանց չի կարող տանել, խնդրել է գտնել երկու վստահելի անձանց և նրանց ընդգրկել խմբի մեջ։ Այդ հարցով ինքը դիմել է իր զարմիկին` Մինաս Ինթերեզյանին և իր ծանոթ Հովհաննես Առաքելյանին, որոնք համաձայնվել են և ԱՄՆ մեկնելու համար Գայանեին տվել են համապատասխանաբար 700 և 1400-ական ԱՄՆ դոլար գումար։ Բացի այդ Հ. Առաքելյանի հորեղբայրը` Գևորգ Դադյանը, նույնպես ընդգրկվել է խմբի կազմում և Պ. Կարապետյանի միջոցով Գայանեին տվել է 1400 ԱՄՆ դոլար։ Որոշ ժամանակ անց գնացել է մորեղբոր տուն և նկատել խմբի անդամներին, որոնք Գայանեից պահանջել են վերադարձնել իրենց անձնագրերը։ Գայանեն իրենց տվել է թղթի կտորներ, որոնց վրա գրված է եղել «Ներկայանալ ԱՄՆ դեսպանատուն» և հինգնիշանոց թվեր, և ըստ Գայանեի` ԱՄՆ դեսպանատան մուտքի հրավերն ու մուտքի ծածկագրերն են եղել։ Որոշ ժամանակ անց Գայանեն նորից խմբի անդամներին հավաքելով մորեղբոր տանը, հայտնել է, որ խաբել է բոլորին, իսկ անձնագրերը գտնվում են իր ծանոթ Համոյի տանը։ Նույն օրը Գայանեն անձնագրերը վերադարձրել է, իսկ գումարը պարտավորվել է վերադարձնել հետագայում, սակայն չի վերադարձրել։ Ինքը ներկայացնում է 166.000 ՀՀ դրամի քաղհայց։
Տուժողն իր ցուցմունքը պնդել է ամբաստանյալ Գայանե Օհանյանին առերես։

Հատոր 1 Գ.Թ. 43-45, 47, հատոր 2 Գ.Թ. 67, 188
դատաքննության արձանագրություն

Տուժող Մինաս Ինթերեզյանի նախաքննական ցուցմունքներով այն մասին, որ 2007թ. սեպտեմբեր ամսին իր զարմուհի Մարինե Ինթերզյանից տեղեկացել է, որ նրա մորեղբոր` Պողոս Կարապետյանի ծանոթ Գայանե անունով անձնավորությունը խումբ է հավաքում ԱՄՆ տանելու համար։ Ինքը ևս համաձայնվել է գնալ ԱՄՆ աշխատելու և Մարինեից տեղեկանալով, որ մեկնելը արժի 700 ԱՄՆ դոլար, նույն օրը վերցրել է իր հետ դրան համարժեք 234.500 ՀՀ դրամ, գնացել է Պ. Կարապետյանի տուն։ Այնտեղ տեսել է Գայանեին և վերջինս նրանից պահանջել է իր մոտ եղած դրամը վերածել ԱՄՆ դոլարի, բերել է նաև անձնագիրը և լուսանկարներ։ Ինքը կատարել է Գայանեի պահանջը, նրան է հանձնել 700 ԱՄՆ դոլար ու փաստաթղթերը` լուսանկարներով։ Գ. Օհանյանն իրեն ասել է, որ կմեկնի ԱՄՆ, ավելացրել, որ ԱՄՆ մեկնելը կազմակերպում են իր ամուսին Մանուկը և նրա եղբայր, կանադահայ բարեգործ Վադիմը, իսկ ինքը ԱՄՆ դեսպանատանը Հասմիկ անունով ծանոթ ունի, որը կօգնի վիզաների վավերացման հարցում։ Հետագայում տեղեկացել է, որ բացի իրենից խմբի մեջ ընդգրկվել են նաև այլ անձինք։ Մի քանի օր անց գնացել է Պ. Կարապետյանի տուն և նկատել խմբի անդամներին, որոնք Գայանեից պահանջել են վերադարձնել իրենց անձնագրերը։ Գայանեն իրենց տվել է թղթի կտորներ, որոնց վրա գրված է եղել «Ներկայանալ ԱՄՆ դեսպանատուն» և հինգնիշանոց թվեր։ Ըստ Գայանեի` դրանք ԱՄՆ դեսպանատան մուտքի հրավերն ու մուտքի ծածկագրերն են եղել։ Մի քանի օր անց խմբի անդամներն նորից հավաքվել են Պ. Կարապետյանի տանը և Գայանեից պահանջել անձնագրերը, նա պատասխանել է, որ դրանք գտնվում են իր ամուսին Մանուկի մոտ, իսկ որոշ ժամանակ հետո Գայանեն անձնագրերը վերադարձրել է։
Տուժողը ներկայացրել է 234.500 ՀՀ դրամի քաղհայց։

Հատոր 1 Գ.Թ. 22-24, հատոր 2 Գ.Թ. 201

Տուժող Հռիփսիմե Չալիկյանի ցուցմունքներով այն մասին, որ 2007թ. հոկտեմբերի 18-ին իր խնամու մորեղբայրը` Պ. Կարապետյանը, իրեն տեղեկացրել է, որ Գայանե անունով ծանոթ ունի, որը կազմակերպում է խմբի կազմում ԱՄՆ տանելու գործընթաց, ավելացրել, որ դրա համար անհրաժեշտ է անձնագիր, լուսանկար և 500 ԱՄՆ դոլար գումար։ Նույն օրը ինքը գնացել է Պ. Կարապետյանի տուն և ծանոթանալով Գայանե Օհանյանի հետ, նրան է տվել 460 ԱՄՆ դոլար, իր անձնագիրը և երկու լուսանկար։ Գայանեն իրեն ասել է, որ ԱՄՆ մեկնելը կազմակերպում է իր ամուսին Մանուկը և նրա եղբայր, կանադահայ բարերար Վադիմը, իսկ ինքը ԱՄՆ դեսպանատանը Հասմիկ անունով ծանոթ ունի, որը կօգնի վիզաների վավերացման հարցում։ Պ. Կարապետյանն իրեն հայտնել է, որ պետք է գումար ավելացնի, քանի որ ԱՄՆ մեկնելը, ըստ Գայանեի, կազմում է 700 ԱՄՆ դոլար։ Հաջորդ օրը ինքը որդու Կարենի միջոցով Մարինե Ինթերզյանին Պ. Կարապետյանի միջոցով Գայանեին փոխանցելու համար տվել է 80.000 ՀՀ դրամ գումար, հավելյալ 240 ԱՄՆ դոլարի փոխարեն։ Որոշակի ժամանակահատված հետո ինքը տեղեկացել է, որ խմբի մեջ ընդգրկվել են այլ անձինք և մի քանի անգամ այցելել է Պողոսի տուն, որտեղ ներկա գտնվող Գայանե Օհանյանը հայտնել է, որ ԱՄՆ գնալը ձգձգվում է։ Հերթական այցելություններից մեկի ժամանակ Գայանեն իրենց տվել է թղթի կտորներ, որոնց վրա գրված է եղել «Ներկայանալ ԱՄՆ դեսպանատուն» և հինգնիշանոց թվեր։ Ըստ Գայանեի` դրանք ԱՄՆ դեսպանատան մուտքի հրավերն ու մուտքի ծածկագրերն են եղել։ 2007թ. նոյեմբերի 23-ին ինքը և Պողոսի որդին Մկրտիչ Կարապետյանը դեսպանատուն մտնելու համար հանդիպել են ԱՄՆ դեսպանատան մոտ, որտեղ եկել է նաև Գայանեն և ասել, որ իր ամուսնու եղբայր Վադիմը դեսպանատանից արդեն անձնագրերը վերցրել է։ Հետագայում ինքը տեղեկացել է, որ Գայանեն իրենց խաբել է, վերադարձրել է անձնագրերը, իսկ գումարը պարտավորվել է վերադարձնել հետագայում։
Տուժողը ներկայացրել է 232.260 ՀՀ դրամի քաղհայց։
Տուժողն իր ցուցմունքը պնդել է ամբաստանյալ Գայանե Օհանյանին առերես։

Հատոր 1 Գ.Թ. 53-57, 59, հատոր 2 Գ.Թ. 66, 174
դատաքննության արձանագրություն

Տուժող Հովհաննես Առաքելյանի և Գևորգ Դադյանի նույնաբովանդակ ցուցմունքներով այն մասին, որ 2007թ. հոկտեմբեր ամսի վերջերին Մարինե Ինթերզյանի միջոցով Պողոս Կարապետյանի տանը ծանոթացել են Գայանե Օհանյանի հետ։ Վերջինս հայտնել է, որ կարող է իրենց խմբի կազմում տանել ԱՄՆ և ավելացրել, որ ԱՄՆ մեկնելը կազմակերպում է իր ամուսին Մանուկը և նրա եղբայր, կանադահայ բարերար Վադիմը, իսկ ինքը ԱՄՆ դեսպանատանը Հասմիկ անունով ծանոթ ունի, որը կօգնի վիզաների վավերացման հարցում։ ԱՄՆ մեկնելու համար Գայանեն իրենցից Պողոսի միջոցով պահանջել և յուրաքանչյուրից ստացել է 1400-ական ԱՄՆ դոլար, ընդամենը 2800 ԱՄՆ դոլար և 20.000 ՀՀ դրամ, իրենց անձնագրերը, երկուական լուսանկար։ Դրանից հետո տեղեկացել են, որ խմբի մեջ այլ անձինք էլ են ընդգրկվել, շաբաթական երկու անգամ գնացել են Պողոսենց տուն, որտեղ Գայանեն անընդհատ պատճառաբանել է, որ ԱՄՆ մեկնելը ձգձգվում է։ Նոյեմբեր ամսի վերջին Պողոսենց տանը Գայանեն իրենց բաժանել է թղթի կտորներ, որոնց վրա գրված է եղել «Ներկայանալ ԱՄՆ դեսպանատուն» և հինգնիշանոց թվեր։ Ըստ Գայանեի` դրանք ԱՄՆ դեսպանատան մուտքի հրավերն ու մուտքի ծածկագրերն են եղել։ Հետագայում տեղեկացել են, որ Գայանեն իրենց խաբել է։ Իրենց երկուսի քաղհայցը միասին կազմում է 930.000 ՀՀ դրամ։
Տուժողները իրենց ցուցմունքները պնդել են ամբաստանյալ Գայանե Օհանյանին առերես։

Հատոր 1 Գ.Թ. 95-97, 100-104, հատոր 2 Գ.Թ. 63, 65, 160,166
դատաքննության արձանագրություն

Վկա Ռուզաննա Միրոյանը ցուցմունք է տվել այն մասին, որ 2007թ. սեպտեմբեր ամսին իր տուն է եկել իր մորեղբոր կինը` Գայանե Վարդանյանը և հայտնել, որ ծանոթացել է Գայանե անունով մի անձնավորության հետ, որն իր դստերը տանում է ԱՄՆ բուժելու և կարող է իր հետ խումբ տանել։ Գայանեն իրենից խնդրել է տալ 400 ԱՄՆ դոլար, իսկ մի քանի օր հետո եկել է մորեղբայրը և խնդրել 400 ԱՄՆ դոլար` ասելով, որ այն նախատեսված է որդու Նարեկի համար ԱՄՆ մեկնելու նպատակով։ Մի քանի օր հետո, երբ ինքը գտնվել է մորեղբոր տանը իր մորաքրոջ աղջիկ Մարինեն Գայանեին տվել է 500 ԱՄՆ դոլար` ԱՄՆ մեկնելու համար։ Հետագայում տեղեկացել է, որ խմբի մեջ ուրիշ անձինք էլ կան ընդգրկված, որոնցից Գայանեն տարբեր չափերի գումարներ է վերցրել։ 2007թ. դեկտեմբեր ամսին ինքը գտնվել է մորեղբոր տանը, որտեղ են եղել նաև ԱՄՆ մեկնող խմբի անդամները, որից հետո բոլորը միասին եկել են իր տուն, որտեղ Գայանեն ասել է, որ ստել է, իսկ հավաքված գումարները` ծախսել։ Նույն օրը վերադարձրել է անձնագրերը, իսկ գումարները պարտավորվել է վերադարձնել հետագայում։

Հատոր 1 Գ.Թ. 50-51, դատաքննության արձանագրություն

Վկա Գրիգոր Շաշիկյանի ցուցմունքով այն մասին, որ 2007թ. նոյեմբեր ամսին Գայանե Օհանյանն իրենից վերցրել է մեկ «Սոնի» տեսակի հեռուստացույց, երեք տեսաձայնագրիչ, մեկ ջեռոց, մեկ հարիչ և խոսատցել մեկ ամսում գումարը վճարել։ Երբ վերջինս խոստումը չի կատարել, ինքը Գայանեի հետ միասին գնացել է Պողոսի և Նորայի տուն և հետ վերցրել ապրանքները։

Հատոր 1 Գ.Թ. 62-63, հատոր 2 Գ.Թ. 68,
դատաքննության արձանագրություն

Վկա Կարեն Եսայանի ցուցմունքով այն մասին, որ 2007թ. հոկտեմբեր ամսին իր մայրը` Հռիփսիմե Չալիկյանը ԱՄՆ մեկնելու համար Գայանե անունով անձնավորությանը տվել է 460 ԱՄՆ դոլար, իսկ մի քանի օր անց Մարինե Ինթերզյանին է տվել ևս 80.000 ՀՀ դրամ։

Հատոր 1 Գ.Թ. 91, դատաքննության արձանագրություն

Վկա Ալլա Հովհաննիսյանի ցուցմունքով այն մասին, որ 2007թ. սեպտեմբեր ամսին ինքն ամուսնու հետ միասին գտնվել է մորաքրոջ Գայանե Վարդանյանի տանը և ծանոթացել Գայանե անունով մի անձնավորության հետ։ Նախկինում իր մորաքույրն իրենից պարտքով գումար է խնդրել ԱՄՆ մեկնելու համար, սակայն չունենալու պատճառով` մերժել է։ Ինքը հարցրել է Գայանեին ԱՄՆ մեկնելու համար և վերջինս ասել է, որ 200 ԱՄՆ դոլարով կարող է նրանց տանել։ Իրենց մոտ գումար չի եղել և մորաքույրը իրենց փոխարեն տվել է 73.000 ՀՀ դրամ և անձնագրերը։ Հետագայում իրենք հրաժարվել են ԱՄՆ գնալու մտքից և հետ վերցրել անձանգրերը։

Հատոր 2 Գ.Թ. 80-81, դատաքննության արձանագրություն

Նույնաբովանդակ ցուցմունք է տվել Ա. Հովհաննիսյանի ամուսին Սերյոժա Խուդաբաշյանը։

Հատոր 2 Գ.Թ. 82-83, դատաքննության արձանագրություն

Վկաներ, ամուսիններ Անահիտ Համբարձումյանի և Համլետ Բասեյանի ցումունքներով այն մասին, որ 2007թ. ամռանը և աշնանը ամբաստանյալ Գայանե Օհանյանը բնակվել էր իրենց 2 սենյականոց բնակարանում, սակայն իրենք չեն իմացել, թե նա ինչ գործունեությամբ է զբաղվում։ 2007թ. դեկտեմբերին իրենց տուն է զանգահարել Գայանե Օհանյանը և Անահիտ Համբարձումյանին հայտնել է, որ նրանց տանը ներքնակի տակ անձնագրեր կան, խնդրել է բերել Պողոս Կարապետյանի տուն և հանձնել իրեն։ Նշված անձնագրերը հանձնվել են Գայանե Օհանյանին, վերջինս այն վերադարձրել է դրանց տերերին։

Հատոր 2 Գ.Թ. 86-87, 91-92, դատաքննության արձանագրություն

Դատաքննության ընթացքում գործով բոլոր տուժողները, վկաներ Անահիտ Համբարձումյանը և Համլետ Բասեյանը ցուցմունքներ են տվել և ամբաստանյալ Գայանե Օհանյանի հետ առերես պնդել են, որ Գայանե Օհանյանը անձնագրերը տուժողներին է վերադարձրել տուժող Պողոս Կարապետյանի բնակարանում, նրա նկատմամբ ներկա գտնվողները նորմալ են վերաբերվել, Գայանե Օհանյանի ազատ տեղաշարժվելը չի սահմանափակվել, նրա նկատմամբ ֆիզիկական կամ հոգեբանական բռնություն չի գործադրվել, Գայանե Օհանյանը ազատությունից ապօրինի չի զրկվել։

Դատաքննության արձանագրություն

Դատաձեռագրաբանական փորձաքննության թիվ 08-0122 եզրակացությամբ, որի համաձայն 1ա կետում նշված խումբ 1 ձեռագիր գրառումների տակ տեղավորված ստորագրությունները հավանաբար կատարվել են Գայանե Օհանյանի կողմից։
Հատոր 2 Գ.Թ. 117-182

Գ. Օհանյանին առաջադրված մեղադրանքը հիմնավորվել է նաև, վերջինիս ձեռքով գրված ստացականներով, համաձայն որոնց Գ. Օհանյանը պարտավորվել է վերադարձնել ստացած գումարները և անձնագրերը։

Հատոր 1 Գ.Թ. 82-85

Դատարանի որոշմամբ ՀՀ քրեական դատավարության օրենսգրքի 122-րդ հոդվածի կարգով, որպես այլ փաստաթղթեր, դրանք ճանաչվել են ապացույց։


Դատաքննության արձանագրություն

Դատարանի որոշմամբ, ՀՀ քրեական դատավարության օրենսգրքի 122-րդ հոդվածի կարգով, տուժողների անվամբ լրացված կտրոնները` իբրև թե ԱՄՆ դեսպանության ներկայանալու օրվա և ժամի, ինչպես նաև` հնգանիշ կոդերի վերաբերյալ, ճանաչվել են այլ փաստաթղթեր` ապացույցներ։

Հատոր 1 Գ.Թ. 34, 86-87, 90

3.Դատարանի իրավական վերլուծությունը։
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և դրանք գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Գայանե Օհանյանի մեղքը ՀՀ քրեական օրենսգրքի 178-րդ հոդվածի 3-րդ մասով նախատեսված հանցանքը կատարելու մեջ հիմնավորված է և նշված հոդվածի սանկցիայով նրա նկատմամբ պետք է քրեական պատիժ կիրառվի։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված պատասխանատվությունը և պատիժը մեղմացնող ու ծանրացնող հանգամանքները։ Դրանք բնութագրում են հանցավորի անձնավորությունն ու կատարված հանցագործության հանրային վտանգավորության աստիճանը, հնարավորություն են տալիս կոնկրետ գործով անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ կոնկրետ դեպքով ամբաստանյալ Գայանե Լիպարիտի Օհանյանի մոտ, որպես պատասխանատվությունը և պատիժը ծանրացնող հանգամանքներ առկա չեն։
Քրեական գործով Գայանե Օհանյանի նկատմամբ պատասխանատվությունը և պատիժը մեղմացնող հանգամանքներ են համարվում այն, որ ամբաստանյալը կին է, նախկինում դատապարտված չի եղել, հանցանքը կատարել է կյանքի ծանր հանգամանքների զուգորդման հետևանքով, մինչև հանցագործություն կատարելը` 1995-2006թ. ծառայել է ՀՀ զինված ուժերում, այդ թվում` 1995-1997թթ.` առանձին բժշկական ջոկատում որպես վիրահատական ավագ բուժքույր։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ անհրաժեշտ է գործով ամբաստանյալ Գայանե Լիպարիտի Օհանյանի նկատմամբ նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, դատարանը տվյալ գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս հանգում է այն հիմնավոր եզրակացության, որ ամբաստանյալի նկատմամբ որպես պատիժ անհրաժեշտ է նշանակել ազատազրկում որոշակի ժամկետով։
Քննության առնելով տուժողների կողմից ներկայացված քաղհայցը, դատարանը գտնում է, որ այն ենթակա է լիովին բավարարման` ամբաստանյալ Գայանե Օհանյանի տնտեսությունից հօգուտ տուժողների բռնագանձելով.
1. տուժող Գայանե Վարդանյանի օգտին 361.000 /երեք հարյուր վաթսունմեկ հազար/ ՀՀ դրամ,
2. տուժող Մինաս Ինթերեզյանի օգտին 234.500 /երկու հարյուր երեսունչորս հազար հինգ հարյուր/ ՀՀ դրամ,
3. տուժող Մարինե Ինթերզյանի օգտին 166.000 /մեկ հարյուր վաթսունվեց հազար/ ՀՀ դրամ,
4. տուժող Հռիփսիմե Չալիկյանի օգտին 232.260 /երկու հարյուր երեսուներկու հազար երկու հարյուր վաթսուն/ ՀՀ դրամ,
5. տուժող Նորա Գասպարյանի օգտին 328.500 /երեք հարյուր քսանութ հազար հինգ հարյուր/ ՀՀ դրամ,
6. տուժող Գևորգ Դադյանի օգտին 455.000 /չորս հարյուր հիսունհինգ հազար/ ՀՀ դրամ,
7. տուժող Հովհաննես Առաքելյանի օգտին 475.000 /չորս հարյուր յոթանասունհինգ հազար/ ՀՀ դրամ,
8. տուժող Պողոս Կարապետյանի օգտին 436.250 /չորս հարյուր երեսունվեց հազար/ ՀՀ դրամ,
9. տուժող Մկրտիչ Կարապետյանի օգտին 338.100 /երեք հարյուր երեսունութ հազար հարյուր/ ՀՀ դրամ։
Դատարանը միաժամանակ գտնում է, որ ՀՀ քրեական օրենսգրքի 178-րդ հոդվածի 3-րդ մասի սանկցիայով նախատեսված լրացուցիչ պատիժը` գույքի բռնագրավումը, չպետք է կիրառել` նկատի ունենալով ամբաստանյալի գույքային դրությունը։
Ամբաստանյալ Գայանե Օհանյանի նկատմամբ չի կարող կիրառվել նաև «Համաներում հայտարարելու մասին» ՀՀ Ազգային ժողովի 19.06.2009թ. որոշումը, քանի որ նշված որոշման 8-րդ կետի 4-րդ ենթակետի համաձայն` որոշումն ընդունելիս ամբաստանյալը գտնվել է հետախուզման մեջ և մինչև 31.07.2009թ. չի ներկայացել իրավապահ մարմիններին։
Մինչև դատավճիռն օրինական ուժի մեջ մտնելը ամբաստանյալ Գայանե Օհանյանի նկատմամբ որպես խափանման միջոց ընտրված կալանավորումն անհրաժեշտ է թողնել անփոփոխ։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 44, 156-158, 163, 357-358, 360, 365, 368-372, 376, 3761 և 379-րդ հոդվածներով և ՀՀ դատական օրենսգրքի 20-րդ հոդվածով, դատարանը.

Վ Ճ Ռ Ե Ց

Ամբաստանյալ Գայանե Լիպարիտի Օհանյանին մեղավոր ճանաչել ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցանքի կատարման մեջ և նշված հոդվածի սանկցիայով նրա նկատմամբ քրեական պատիժ կիրառել` նշանակելով ազատազրկում 5 /հինգ/ տարի ժամկետով` առանց գույքի բռնագրավման, որը պետք է կրի ՀՀ ԱՆ ՔԿՎ համապատասխան քրեակատարողական հիմնարկում։
Պատժի սկիզբը հաշվել 2010թ. ապրիլի 15-ից։
Տուժողների կողմից ներկայացված քաղաքացիական հայցը լիովին բավարարել` ամբաստանյալ Գայանե Լիպարիտի Օհանյանից հօգուտ ներքոհիշյալ տուժողների բռնագանձել ընդամենը 3.026.610 /երեք միլիոն քսանվեց հազար վեց հարյուր տասը/ ՀՀ դրամ, որից
1. տուժող Գայանե Վարդանյանի օգտին 361.000 /երեք հարյուր վաթսունմեկ հազար/ ՀՀ դրամ,
2. տուժող Մինաս Ինթերեզյանի օգտին 234.500 /երկու հարյուր երեսունչորս հազար հինգ հարյուր/ ՀՀ դրամ,
3. տուժող Մարինե Ինթերզյանի օգտին 166.000 /մեկ հարյուր վաթսունվեց հազար/ ՀՀ դրամ,
4. տուժող Հռիփսիմե Չալիկյանի օգտին 232.260 /երկու հարյուր երեսուներկու հազար երկու հարյուր վաթսուն/ ՀՀ դրամ,
5. տուժող Նորա Գասպարյանի օգտին 328.500 /երեք հարյուր քսանութ հազար հինգ հարյուր/ ՀՀ դրամ,
6. տուժող Գևորգ Դադյանի օգտին 455.000 /չորս հարյուր հիսունհինգ հազար/ ՀՀ դրամ,
7. տուժող Հովհաննես Առաքելյանի օգտին 475.000 /չորս հարյուր յոթանասունհինգ հազար/ ՀՀ դրամ,
8. տուժող Պողոս Կարապետյանի օգտին 436.250 /չորս հարյուր երեսունվեց հազար/ ՀՀ դրամ,
9. տուժող Մկրտիչ Կարապետյանի օգտին 338.100 /երեք հարյուր երեսունութ հազար հարյուր/ ՀՀ դրամ։
Մինչև դատավճռի օրինական ուժի մեջ մտնելը ամբաստանյալ Գայանե Լիպարիտի Օհանյանի նկատմամբ որպես խափանման միջոց ընտրված կալանավորումը թողնել անփոփոխ։
Դատավարության մասնակիցների կողմից դատավճիռը վերաքննության կարգով կարող է բողոքարկվել ՀՀ քրեական վերաքննիչ դատարան` հրապարակման պահից մեկ ամսվա ընթացքում։

ԴԱՏԱՎՈՐ Վ. Թ. ԳՐԻԳՈՐՅԱՆ