Գործ թիվ ԵԷԴ/0075/01/10
2010թ

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղար Արմինե Արղամանյան
Մասնակցությամբ`
Մեղադրող Ալիկ Մուրադյան
Ամբաստանյալ Կարեն Արզումանյան
Ամբաստանյալի պաշտպան Ռաֆիկ Սաֆարյան

2010 թվականի օգոստոսի 18-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում քննեց քրեական գործն ըստ մեղադրանքի
Կարեն Սամվելի Արզումանյանի ծնված 05.02.1973թ. Երևան քաղաքում, ազգությամբ հայ, Հայաստանի Հանրապետության քաղաքացի, միջնակարգ կրթությամբ, ամուրի, չի աշխատել, հաշվառված է Կոտայքի մարզ, ք. Բյուրեղավան, 4-րդ հանրակացարան 19 սենյակ, նախկինում հինգ անգամ դատված.
1. Կոտայքի մարզի առաջին ատյանի դատարանի 20.03.1999թ. դատավճռով ՀՀ քրեական օրենսգրքի 106-րդ հոդվածի 1-ին մասով դատապարտվել է ազատազրկման 2 տարի ժամկետով,
2.Կոտայքի մարզի առաջին ատյանի դատարանի 26.06.2000թ. դատավճռով ՀՀ քրեական օրենսգրքի 86-րդ հոդվածի 2-րդ մասով և ՀՀ քրեական օրենսգրքի 96-րդ հոդվածի 1-ին մասով, ՀՀ քրեական օրենսգրքի 38-րդ հոդվածի կիրառմամբ դատապարտվել է ազատազրկման 3 տարի 6 ամիս ժամկետով,
3. Լոռու մարզի առաջին ատյանի դատարանի 15.06.2004թ. դատավճռով ՀՀ քրեական օրենսգրքի 34-177-րդ հոդվածի 2-րդ մասի 1-ին, 2-րդ, 3-րդ և 4-րդ կետերով դատապարտվել է ազատազրկման 3 տարի ժամկետով,
4. Արմավիրի մարզի առաջին ատյանի դատարանի 17.10.2006թ. դատավճռով ՀՀ քրեական օրենսգրքի 175-րդ հոդվածի 3-րդ մասի 1-ին կետով, 235-րդ հոդվածի 2-րդ, 4-րդ մասերով, ՀՀ քրեական օրենսգրքի 66, 67-րդ հոդվածների կիրառմամբ դատապարտվել է ազատազրկման 10 տարի ժամկետով, ՀՀ վերաքննիչ քրեական դատարանի 23.11.2007թ. որոշմամբ պատժաչափը փոփոխվել և պատիժ է սահմանվել ազատազրկում 11 տարի ժամկետով,
5. Երևանի Էրեբունի և Նուբարաշեն վարչական շրջանների ընդհանուր իրավասության դատարանի 31.03.2010թ. դատավճռով ՀՀ քրեական օրենսգրքի 34-268-րդ հոդվածի 1-ին մասով, 34-268-րդ հոդվածի 3-րդ մասով և 34-266-րդ հոդվածի 4-րդ մասով, ՀՀ քրեական օրենսգրքի 66-րդ հոդվածի 4-րդ կետի համաձայն` հանցանքների համակցությամբ նշանակված պատիժները լրիվ գումարելու միջոցով պատիժ է նշանակվել ազատազրկում 3 /երեք/ տարի 6 /վեց/ ամիս ժամկետով և տուգանք 100.000 /մեկ հարյուր հազար/ ՀՀ դրամի չափով։
ՀՀ քրեական օրենսգրքի 67-րդ հոդվածի 1-ին կետի համաձայն` նշանակված պատժին մասնակիորեն գումարվել է ՀՀ վերաքննիչ քրեական դատարանի 2007թ. նոյեմբերի 23-ի դատավճռով նշանակված պատժի 3 /երեք/ տարի 2 /երկու/ ամիս 5 /հինգ/ օր ժամկետով ազատազրկման ձևով չկրած մասից 3 /երեք/ տարի ժամկետով ազատազրկումը և վերջնական պատիժ է նշանակվել ազատազրկում 6 /վեց/ տարի 6 /վեց/ ամիս ժամկետով և տուգանք 100.000 /մեկ հարյուր հազար/ ՀՀ դրամի չափով։
Պատժի սկիզբը հաշվվել է 2010թ. մարտի 31-ից։
ՀՀ Ան «Նուբարաշեն» ՔԿ հիմնարկի կալանավոր։
Մեղադրանք է առաջադրվել ՀՀ քրեական օրենսգրքի 34-268-րդ հոդվածի 2-րդ մասի 1-ին կետով և 34-268-րդ հոդվածի 3-րդ մասով։
Առաջադրված մեղադրանքում իրեն մեղավոր է ճանաչել մասնակի։

1. Գործի դատավարական նախապատմությունը։
2010թվականի մարտի 18-ին ժամը 15.15-ին ՀՀ ԱՆ «Նուբարաշեն» ՔԿ հիմնարկի հանձնուքների ընդունման սենյակում Սվետլանա Կարապետի Կարապետյանը հանձնուք է հանձնել դատապարտյալ Արթուր Ֆերդինանտի Մանուկյանի անվամբ։ Ի թիվս այլ ապրանքների` հանձնուքում եղել են մեկ զույգ սպիտակ գույնի կոշիկներ։ Դրանցից աջ կոշիկի ներբանի մեջ պատրաստված փոսի մեջ ՔԿ հիմնարկի աշխատակիցներ Հովհաննես Մանջիկյանի և Մուշեղ Դիլանյանի կողմից հայտնաբերվել են թվով երեք հատ, իսկ ձախ կոշիկի ներբանի թաքստոցում` թվով 2 հատ պոլիէթիլենային թաղանթներով փաթեթներ։
Աջ կոշիկի ներբանի միջից հայտնաբերված փաթեթներում հայտնաբերվել է.
1. մուգ շագանակագույն յուրահատուկ սուր հոտով փոշենման զանգված 4 գրամ քաշով,
2. մուգ շագանակագույն սուր հոտով պինդ և փոշենման զանգվածներ ընդամենը 2,4 գրամ քաշով,
3. թվով 3 հատ յուրաքանչյուրը 0,2 գրամ քաշով սպիտակ, կլոր, նույնատիպ, տափակ դեղահատեր, 1 հատ նույնատիպ դեղահատի կտոր և սպիտակ փոշենման զանգված, որոնց ընդհանուր քաշը կազմել է 0,2 գրամ։
Ձախ կոշիկի ներբանի մեջ թաքցված փաթեթներում առկա են եղել.
1. սպիտակ գույնի օվալաձև 0,4 գրամ քաշով «B8» գործարանային դաջվածքով 1 հատ դեղահատ,
2. երկու հատ յուրաքանչյուրը 0,2 գրամ քաշով սպիտակ գույնի օվալաձև դեղահատի կտորներ, որոնցից մեկի վրա առկա է «B» տառի դաջվածք, իսկ երկրորդի վրա` «8» թվանշանի դաջվածք։ Վերոնշվածը դատավարական կարգի պահպանմամբ փաթեթավորել, կնքել և առգրավել են։
Դատաքիմիական փորձաքննությամբ պարզվել է, որ առգրավվածը հանդիսանում են հաստատուն քաշով յուրահատուկ հոտով գորշ գույնի զանգվածը` տնայնագործական եղանակով պատրաստված «ացետիլացված ափիոն» տեսակի թմրամիջոց ընդամենը 5,656 գրամ քաշով և ընդամենը 0,0152 գրամ «բուպրենորֆին» տեսակի թմրամիջոց։
Փաստի առթիվ ՀՀ ոստիկանության Էրեբունու քննչական բաժնի կողմից 23.03.2010թ. ՀՀ քրեական օրենսգրքի 266-րդ հոդվածի 1-ին մասի, 2-րդ մասի 3-րդ կետի և 3-րդ մասի 2-րդ կետի հատկանիշներով հարուցվել է թիվ 13113110 քրեական գործը և նախաքննություն է կատարվել։
17.05.2010թ. Կարեն Սամվելի Արզումանյանին մեղադրանք է առաջադրվել ՀՀ քրեական օրենսգրքի 34-268-րդ հոդվածի 2-րդ մասի 1-ին կետով և 34-268-րդ հոդվածի 3-րդ մասով։ Խափանման միջոց չի ընտրվել, քանի որ Կարեն Արզումանյանը, որպես դատապարտյալ, պատիժ է կրել ՔԿ հիմնարկում։
Քրեական գործը մեղադրական եզրակացությամբ 02.06.2010թ. ստացվել է Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանում։
Քրեական գործը դատարանի վարույթ է ընդունվել 03.06.2010թ.։
03.06.2010թ. դատարանը որոշում է կայացրել ՀՀ քրեական դատավարության օրենսգրքի 292-րդ հոդվածի և 296-րդ հոդվածի կարգով քրեական գործը մեղադրողին վերադարձնելու մասին։
09.06.2010թ. մեղադրողը բողոք է բերել ՀՀ քրեական վերաքննիչ դատարան, ՀՀ քրեական վերաքննիչ դատարանը 17.06.2010թ. դատախազի վերաքննիչ բողոքը թողել է առանց քննության։
07.07.2010թ. Էրեբունի և Նուբարաշեն վարչական շրջանների դատարանում ստացվել է քրեական գործը, դատարանի վարույթ է ընդունվել 2010թ. հուլիսի 08-ին։

2. Դատաքննությամբ ձեռք բերված ու հետազոտված ապացույցները։
Դատաքննությամբ հետազոտվել են մեղադրանքի հիմքում դրված այն բոլոր ապացույցները, որոնք թվարկված են մեղադրական եզրակացության մեջ։
Ապահովելով դատաքննության լրիվությունը, բազմակողմանիությունը և օբյեկտիվությունը և ղեկավարվելով գործի արդար քննությանը վերաբերող սահմանդրական և դատավարական նորմերի դրույթներով, հիմնվելով պատշաճ ընթացակարգի շրջանակներում դատական քննության ընթացքում գործի հանգամանքների հետազոտման արդյունքի վրա, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով, դատարանը գտնում է, որ քրեական գործով առաջադրված մեղադրանքի ծավալը և քրեաիրավական որակումը ճշտելուց հետո ամբաստանյալ Կարեն Արզումանյանի նկատմամբ պետք է կայացվի մեղադրական դատավճիռ և նրա նկատմամբ պետք է քրեական պատիժ կիրառվի։
Նախաքննական մարմնի կողմից Կարեն Սամվելի Արզումանյանին ՀՀ քրեական օրենսգրքի 34-268-րդ հոդվածի 2-րդ մասի 1-ին կետով և 34-268-րդ հոդվածի 3-րդ մասով մեղադրանք է առաջադրվել այն մասին, որ մեղադրվելով ՀՀ քրեական օրենսգրքի 34-268-րդ հոդվածի 1-ին մասով, 34-268-րդ հոդվածի 3-րդ մասով և 34-266-րդ հոդվածի 4-րդ մասով և կալանքը կրելով ՀՀ ԱՆ «Նուբարաշեն» ՔԿ հիմնարկում, առանց իրացման նպատակի, իր անձնական օգտագործման համար, կրկին անգամ փորձել է ձեռք բերել առանձնապես խոշոր չափի` 5,656 գրամ քաշով «ացետիլացված ափիոն» տեսակի թմրամիջոց և 0,0152 գրամ քաշով զգալի չափի «բուպրենորֆին» տեսակի թմրամիջոց, սակայն իր կամքից անկախ հանգամանքներով հանցագործությունն ավարտին չի հասցվել, այն է` նշված թմրամիջոցները հանձնուքի մեջ հայտնաբերվել են ՀՀ ԱՆ «Նուբարաշեն» ՔԿ հիմնարկի հանձնուքների ընդունման սենյակում։
Առաջադրված մեղադրանքում Կարեն Արզումանյանն իրեն մասնակի մեղավոր է ճանաչել միայն ՀՀ քրեական օրենսգրքի 34-268-րդ հոդվածի 3-րդ մասով և ցուցմունք է տվել այն մասին, որ բջջային հեռախոսակապով իր ընկերոջից, որի ով լինելն ինքը չի հայտնի, խնդրել է իր անձնական օգտագործման համար ճարել և ՔԿ հիմնարկ ուղարկել «ափիոն» և «սուբուտեքս» տեսակի թմրամիջոցներ։ Նույն օրը տեղեկացել է, որ իր հետ միևնույն խցում պատիժը կրող դատապարտյալ Արթուր Մանուկյանից տեղեկացել է, որ վերջինիս մայրը հանձնուք է բերելու իր որդու համար, որոշել է նշված պատեհ առիթն օգտագործել և առանց Արթուր Մանուկյանին ու նրա մորը հայտնելու, որ թմրամիջոց է առաքվում իրեն, խնդրել է Արթուր Մանուկյանին, որպեսզի նրա մայրը մինչև ՔԿ հիմնարկ գալը Երևանի Ավ. Իսահակյանի արձանի մոտից 18.03.2010թ. ժամը 12.00-ին իր ծանոթից ստանա նրա տված հանձնուքը և դրանք նույնպես իր բերած հանձնուքի հետ հանձնի ՀՀ ԱՆ «Նուբարաշեն» ՔԿ հիմնարկ, այդպես էլ արվել է։ Սակայն ՔԿ հիմնարկի հանձնուքների ստուգման սենյակում իր ծանոթի կողմից իրեն հանձնելու նպատակով Սվետլանա Կարապետյանի կողմից Արթուր Մանուկյանի անվամբ ձևակերպված հանձնուքում հայտնաբերվել են մեկ զույգ սպիտակ կոշիկների մեջ թաքցված առանձնապես խոշոր չափերի հասնող 5,656 գրամ քաշով «ացետիլացված ափիոն» տեսակի և 0,0152 գրամ քաշով «բուպրենորֆին» տեսակի թմրամիջոցներ և առգրավվել են, այդ պատճառով, իր կամքից անկախ հանգամանքներով, ինքը չի կարողացել ձեռք բերել իր անվամբ առաքված թմրամիջոցները։ Ինքը չի իմացել, թե իր ծանոթը կոնկրետ ի՞նչ տեսակի և ի՞նչ քանակության թմրամիջոց է առաքել իր համար։

Գ.Թ. 88, 60-61

Ամբաստանյալ Կարեն Արզումանյանին առաջադրված մեղադրանքը հիմնավորելու ուղղությամբ նախաքննությամբ և դատաքննությամբ ձեռք բերվել և հետազոտվել են հետևյալ ապացույցները.
Դատարանի որոշմամբ ՀՀ քրեական դատավարության օրենսգրքի 122-րդ հոդվածի հիմքով որպես ապացույց ճանաչված այլ փաստաթղթերով` ՀՀ ԱՆ «Նուբարաշեն» ՔԿ հիմնարկի պետին հասցեագրած 18.03.2010թ. զեկուցագրով, նույն օրվա ամսաթվով հանձնուքի ստացման մասին արձանագրությամբ, հանձնուքը հանձնելու մասին դիմումով և նախազգուշացման թերթիկով այն մասին, որ 18.03.2010թ. քաղաքացի Սվետլանա Կարապետյանը որդու` թիվ 35 խցի դատապարտյալ Արթուր Մանուկյանի անվամբ հանձնուք է բերել «Նուբարաշեն» ՔԿ հիմնարկ։ Դիմումը և նախազգուշացման թերթիկը լրացնելուց և ստորագրելուց հետո 17 անուն ապրանքների հանձնուքը ժամը 15.15-ին տրամադրվել է հանձնուքների սենյակի աշխատակիցներ Հովհաննես Մանջիկյանին և Մուշեղ Դիլանյանին։ Հանձնուքում եղել են նաև մեկ զույգ սպիտակ գույնի կոշիկներ։ Դրանց ստուգմամբ աջ կոշիկի ներբանի մեջ թաքցված` թվով 2 հատ կասկածելի փաթեթներ։
Աջ ոտքի կոշիկից հայտնաբերվել են պոլիէթիլենային և մեկուսիչ ժապավեններով փաթեթներ`
1-ին փաթեթում` մուգ շագանակագույն յուրահատուկ սուր հոտով փոշենման զանգված` 4,0 գրամ քաշով,
2-րդ փաթեթում` մուգ շագանակագույն յուրահատուկ սուր հոտով պինդ և փոշենման զանգվածներ ընդամենը 2,4 գրամ քաշով։
3-րդ փաթեութում` երեք հատ յուրաքանչյուրը 0,2 գրամ քաշով սպիտակ կլոր և տափակ դեղահատեր, մեկ հատ նույնանման դեղահատի կտոր և սպիտակ փոշենման զանգված` ընդհանուր 0,2 գրամ քաշով։
Ձախ կոշիկի ներբանից հայտնաբերվել են.
1-ին փաթեթում` 0,4 գրամ քաշով սպիտակ գույնի օվալաձև «B8» գործարանային դաջվածքով մեկ հատ դեղահատ,
2-րդ փաթեթում` երկու հատ յուրաքանչյուրը 0,2 գրամ քաշով սպիտակ գույնի օվալաձև դեղահատի կտորներ, որոնցից մեկի վրա առկա են «B» տառի, մյուսի վրա` «8» թվանշանի դաջվածքները։
Փաթեթներում հայտնաբերվածը և կոշիկները դատավարական կարգի պահպանմամբ փաթեթավորվել, կնքվել և առգրավվել են։
Հանձնուքը ներկայացրած Սվետլանա Կարապետյանը հայտարարել է, որ իր որդու` Արթուր Մանուկյանի խնդրանքով նշված կոշիկները Երևան քաղաքի Ավետիք Իսահակյանի արձանի մոտ ստացել է մի անծանոթ կնոջից։

Գ.Թ. 1, 2-3, 4-5

Դատարանի որոշմամբ որպես վկաներ հարցաքննված` ՀՀ ԱՆ «Նուբարաշեն» ՔԿ հիմնարկի աշխատակիցներ Հովհաննես Մանջիկյանը և Մուշեղ Դիլանյանը ցուցմունք են տվել այն մասին, որ 18.03.2010թ. ժամը 15.15-ին ՀՀ ԱՆ «Նուբարաշեն» ՔԿ հիմնարկի հանձնուքների ընդունման սենյակ է եկել Սվետլանա Կարապետյանը` հանձնուք բերելով որդու` դատապարտյալ Արթուր Մանուկյանի համար։ Փաստաթղթերը լրացնելուց հետո 17 անուն հանձնուքում գտնված սպիտակ գույնի մեկ զույգ կոշիկների ներբանների մեջ թաքցված հայտնաբերվել են թվով հինգ հատ փաթեթներ` դեղահատերի և յուրահատուկ սուր հոտով պինդ և փոշենման զանգվածների պարունակությամբ։ Սվետլանա Կարապետյանը հայտարարել է, որ իր որդու` Արթուր Մանուկյանի խնդրանքով կոշիկները վերցրել է Ավ. Իսահակյանի արձանի մոտ մի անծանոթ կնոջից։ Կազմվել է համապատասխան արձանագրություն, հայտնաբերվածը և կոշիկները դատավարական կարգի պահպանմամբ փաթեթավորվել, կնքվել և առգրավվել են։

Դատաքննության արձանագրություն

Թիվ 35 խցի խուզարկության մասին արձանագրությամբ այն մասին, որ հայտնաբերվել են 2 հատ «Սամսունգ» և 1 հատ «Նոկիա» տեսակի բջջային հեռախոսներ` իրենց քարտերով։

Գ.Թ. 6-7

ՀՀ փորձագիտական կենտրոնի ՊՈԱԿ կողմից տրված 22.03.2010թ. թիվ 07801005 եզրակացության համաձայն` դատաքիմիական փորձաքննությամբ պարզվել է, որ սպիտակ գույնի կոշիկների ներբանների թաքստոցներից հանված յուրահատուկ սուր հոտով գորշ գույնի զանգվածը տնայնագործական եղանակով պատրաստված ընդամենը 5,656 գրամ քաշով «ացետիլացված ափիոն» տեսակի թմրամիջոց է, իսկ դեղահատերը և դրա կտորներն իրենց բաղադրության մեջ պարունակում են 0,0152 գրամ ընդհանուր քաշով «բուպրենորֆին» տեսակի թմրամիջոց։

Գ.Թ. 35-38, 39-42

Նշված թմրամիջոցները և մեկ զույգ սպիտակ կոշիկները քննիչի 24.03.2010թ. որոշմամբ ճանաչվել են իրեղեն ապացույց և կցվել են քրեական գործին։

Գ.Թ.51

«Հոգեբուժական բժշկական կենտրոն» ՓԲԸ Նարկոլոգիական կլինիկայի կողմից կատարված տոքսիկոքիմիական փորձաքննության 26.03.2010թ. 0206/1, 0207/2 եզրակացության համաձայն` Կարեն Սամվելի Արզումանյանի մեզի փորձանմուշում հայտնաբերվել են կանաբիսի խմբի թմրամիջոցի թմրալկալոիդներ, իսկ դատապարտյալ Արթուր Ֆերդինանտի Մանուկյանի մեզի փորձանմուշում թմրամիջոցների հետքեր չեն հայտնաբերվել։

Գ.Թ. 76

Վկա, ՀՀ ԱՆ «Նուբարաշեն» ՔԿ հիմնարկում պատիժը կրող դատապարտյալ Արթուր Մանուկյանը ցուցմունք է տվել այն մասին, որ իր պատիժը կրում է «Նուբարաշեն» ՔԿ հիմնարկում։ 2010թ. մարտի 17-ին և 18-ին ինքը և Կարեն Արզումանյանը պատիժը կրել են 35 խցում։ Իր մոտ բջջային հեռախոս է ունեցել, որով 17.03.2010թ. խոսել է մոր` Սվետլանա Կարապետյանի հետ` վերջինիս 094-71-42-16 համարով, խնդրել է հանձնուք բերել։ Մայրը հայտնել է, որ գումար չունի։ Իրենց խոսակցությանը միջամտել է Կարեն Արզումանյանը, առաջարկելով, որպեսզի իր մայրը Ավետիք Իսահակյանի արձանի մոտ հանդիպի իր ուղարկած կնոջը, նա իր մորը կտա 8000 դրամ և իր համար նախատեսված հագուստն ու կոշիկները, այդ գումարով էլ թող սննդամթերք գնի և ամբողջ հանձնուքը բերի հանձնի ՔԿ հիմնարկ։ Ինքն այդ առաջարկության մասին հայտնել է մորը` Սվետլանա Կարապետյանին։ Վերջինս համաձայնվել է, 18.03.2010թ. պայմանավորված ժամին` ժ.1200-ին Ավ. Իսահակյանի արձանի մոտ մայրը հանդիպել է այդ կնոջը, որի հետ հեռախոսով պայմանավորվել էր Կարեն Արզումանյանը, նրանից վերցրել է Կարենի համար նախատեսված իրերը, այդ թվում` կոշիկները և բերելով ՔԿ հիմնարկ` իր անվամբ հանձնուք է ձևակերպել։ Ինքը և իր մայրը թմրամիջոցի առկայության մասին չեն իմացել։ Եթե ինքն իմանար թմրամիջոցի առկայության մասին, ապա իր մորը չէր խնդրի այն բերել ՔԿ հիմնարկ։

Գ.Թ. 13-14, 77-78, դատաքննության արձանագրություն

Վկա Սվետլանա Կարապետյանը ցուցմունք է տվել այն մասին, որ որդին` Արթուր Մանուկյանը, դատապարտյալ է, իր պատիժը կրում է ՀՀ ԱՆ «Նուբարաշեն» ՔԿ հիմնարկում։ 2010թ. մարտի 17-ին իրեն զանգահարել է որդին և խնդրել որպես հանձնուք սպիտակեղեն և սափրվելու պարագաներ տանել ՔԿ հիմնարկ։ Ինքը պատասխանել է, որ փող չունի, հարևանից կփորձի պարտք վերցնել։ Նշված հեռախոսազրույցից կարճ ժամանակ անց որդին` Արթուր Մանուկյանը, կրկին զանգահարել և իրեն ասել է, որպեսզի հաջորդ օրը` 18.03.2010թ. ժամը 12.00-ին ինքը գնա Ավետիք Իսահակյանի արձանի մոտ, այնտեղ իրեն կսպասի իր հետ միևնույն խցում պատիժ կրող տղաներից մեկի ծանոթը, իրեն հանձնուք և 8000 ՀՀ դրամ կտա, որով ինքը գնումներ կկատարի ու կտանի ՔԿ հիմնարկ։ 18.03.2010թ. ժամը 12.00-ին ինքը մոտեցել է արձանին, զանգահարել է որդին ու հայտնել իր համախցեցու` Կարենի նկարագրությամբ արտաքինով կնոջը, ինքը մոտեցել է փաթեթը ձեռքին կնոջը, վերցրել է փաթեթը, իր պատրաստած հանձնուքի հետ միացնելով` գնացել է ՔԿ հիմնարկ և բոլորը հանձնել է` որդուն փոխանցելու համար։ Իր համար անսպասելի` անծանոթ կնոջից վերցրած մեկ զույգ սպիտակ կոշիկների ներբաններից հայտնաբերվել են փաթեթավորված նյութեր, կասկածելով, որ դրանք թմրամիջոցներ են։ Իր որդին թմրամոլ չէ, ինքն անակնկալի է եկել, եթե իմանար, որ հանձնուքում թմրամիջոց կար, այն չէր տանի ՔԿ հիմնարկ։
Արձանագրություն է կազմվել, որի ընթացքում ինքը հայտարարել է, որ սպիտակ գույնի կոշիկները վերցրել է անծանոթ կնոջից` Ավ. Իսահակյանի արձանի մոտ։
Գ.Թ. 16-17, 55-56, դատաքննության արձանագրություն

3. Դատարանի իրավական վերլուծությունը։

Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Կարեն Սամվելի Արզումանյանին առաջադրված մեղադրանքի ծավալը ենթակա է փոփոխության, քանի որ չնայած փաթեթում տարբեր տեսակի և չափերի թմրամիջոցների ամբողջության առկայությանը, և' իրացնողի, և' ձեռք բերողի մասով այն մեկ միասնական գործողություն է, հետևաբար` ՀՀ քրեական օրենսգրքի 20-րդ հոդվածի կարգով արհեստականորեն հանցագործությունների համակցություն ստեղծելը` հանցանքը միաժամանակ, ըստ թմրամիջոցների չափերի` ՀՀ քրեական օրենսգրքի 34-268-րդ հոդվածի 2-րդ մասի 1-ին կետով և 34-268-րդ հոդվածի 3-րդ մասով որակելը, դատարանը համարում է սխալ։
Դատարանը գտնում է, որ մեղադրանքի այն մասը, որը վերաբերում է ՀՀ քրեական օրենսգրքի 34-268-րդ հոդվածի 2-րդ մասի 1-ին կետին, պետք է ներառնվի /կլանվի/ մեղադրանքի ՀՀ քրեական օրենսգրքի 34-268-րդ հոդվածի 3-րդ մասի ծավալում և Կարեն Արզումանյանի նկատմամբ քրեական պատիժ պետք է կիրառվի ՀՀ քրեական օրենսգրքի 34-268-րդ հոդվածի 3-րդ մասով նախատեսված հանցանքի կատարման համար։
Նույնաբովանդակ միջնորդություն է կատարել նաև գործով մեղադրողը։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված` պատասխանատվությունը և պատիժը մեղմացնող ու ծանրացնող հանգամանքները։ Դրանք բնութագրելով ամբաստանյալի անձնավորության ու կատարված հանցագործության հանրային վտանգավորության աստիճանը, հնարավորություն են տալիս անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ կոնկրետ դեպքով ամբաստանյալ Կարեն Արզումանյանի մոտ որպես պատասխանատվությունը և պատիժը ծանրացնող հանգամանքներ են հանդիսանում ՀՀ քրեական օրենսգրքի 63-րդ հոդվածի 1-ին և 4-րդ կետերով նախատեսված հանգամանքները` հանցանքը կատարելու ռեցիդիվը և հանցագործության մեջ առավել ակտիվ դերը։
Ամբաստանյալ Կարեն Արզումանյանի նկատմամբ պատասխանատվությունը և պատիժը մեղմացնող հանգամանք է համարվում անկեղծորեն զղջալը։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալ Կարեն Սամվելի Արզումանյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, քրեական գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր եզրակացությանը, որ ամբաստանյալի նկատմամբ որպես պատիժ անհրաժեշտ է նշանակել ազատազրկում որոշակի ժամկետով։
Դատարանը հաշվի է առնում նաև այն հանգամանքը, որ ամբաստանյալ Կարեն Արզումանյանը սույն հանցանքը կատարել է մինչև նախորդ դատավճռով նշանակված պատժի լրիվ կրելը, այն է` հանցանքը կատարել է 18.03.2010թ., իսկ Երևանի Էրեբունի և Նուբարաշեն վարչական շրջանների ընդհանուր իրավասության դատարանի թիվ ԵԷԴ/0129/01/09 դատավճիռը հրապարակվել է 31.03.2010թ., հետևաբար` պատիժ նշանակելիս դատարանը պետք է ղեկավարվի ՀՀ քրեական օրենսգրքի 66-րդ հոդվածի 6-րդ և 4-րդ մասերի դրույթներով` վերջնական պատիժը նշանակվում է պատիժները լրիվ կամ մասնակիորեն գումարելու միջոցով և վերջնական պատժին հաշվակցվում է առաջին դատավճռով նշանակված պատժի կրած մասը։
Դատարանը հաշվի է առնում նաև ՀՀ քրեական օրենսգրքի 65-րդ հոդվածի պահանջը` հանցափորձի համար ազատազրկման ձևով պատժի ժամկետը հաշվարկելու վերաբերյալ։
Իրեղեն ապացույց ճանաչված` 5,656 գրամ քաշով առանձնապես խոշոր չափի «ացետիլացված ափիոն» տեսակի թմրամիջոցը, զգալի չափի 0,0152 գրամ քաշով «բուպրենորֆին» տեսակի թմրամիջոցը և մեկ զույգ սպիտակ գույնի կոշիկները ենթակա են ոչնչացման դատավճիռն օրինական ուժի մեջ մտնելուց հետո։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 44, 357-358, 360, 368-372, 376, 3761, 379-րդ հոդվածների և ՀՀ դատական օրենսգրքի 20-րդ հոդվածի պահանջներով, դատարանը.

Վ Ճ Ռ Ե Ց

Ամբաստանյալ Կարեն Սամվելի Արզումանյանին մեղավոր ճանաչել ՀՀ քրեական օրենսգրքի 34-268-րդ հոդվածի 3-րդ մասով նախատեսված հանցանքը կատարելու մեջ և նշված հոդվածի սանկցիայով կիրառել քրեական պատիժ` նշանակելով ազատազրկում 3 /երեք/ տարի ժամկետով։
ՀՀ քրեական օրենսգրքի 66-րդ հոդվածի 6-րդ և 4-րդ մասերի կարգով` հանցանքների համակցությամբ, նշանակված պատժից 2/երկու/ տարի ազատազրկումը մասնակիորեն գումարել նախորդ` Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 31.03.2010թ. թիվ ԵԷԴ/0129/01/09 դատավճռով նշանակված պատժին` 6 /վեց/ տարի 6 /վեց/ ամիս ազատազրկմանը և 100.000 /մեկ հարյուր հազար/ ՀՀ դրամ տուգանքին և վերջնական պատիժ նշանակել ազատազրկում 8 /ութ/ տարի 6 /վեց/ ամիս ժամկետով և 100.000 /մեկ հարյուր հազար/ ՀՀ դրամ տուգանք, որի մեջ հաշվակցել 31.03.2010թ. թիվ ԵԷԴ/0129/01/09 դատավճռով նշանակված պատժի կրած մասը։
Պատժի սկիզբը հաշվել 2010 թվականի մարտի 31-ից։
Պատիժը կրելու է ՀՀ ԱՆ ՔԿՎ համապատասխան քրեակատարողական հիմնարկում։
Դատավճիռն օրինական ուժի մեջ մտնելուց հետո իրեղեն ապացույց ճանաչված` 5,656 գրամ քաշով առանձնապես խոշոր չափի «ացետիլացված ափիոն» տեսակի թմրամիջոցը, զգալի չափի 0,0152 գրամ քաշով «բուպրենորֆին» տեսակի թմրամիջոցը և մեկ զույգ սպիտակ գույնի կոշիկները ոչնչացնել։
Դատավարության մասնակիցների կողմից դատավճիռը կարող է վերաքննության կարգով բողոքարկվել ՀՀ քրեական վերաքննիչ դատարան` հրապարակման պահից մեկ ամսվա ընթացքում։

ԴԱՏԱՎՈՐ Վ. Թ. ԳՐԻԳՈՐՅԱՆ