ԵԷԴ/0074/01/10

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ` Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ` Լ. ՄԻՐԶՈՅԱՆ

Մասնակցությամբ`

ՄԵՂԱԴՐՈՂ` Ա. ՄՈւՐԱԴՅԱՆ
ՊԱՇՏՊԱՆ` Ա. ՂԱԶԱՐՅԱՆ

2010թ. հուլիսի 19-ին դատարանում
Դռնբաց դատական նիստում քննեց քրեական գործն ըստ մեղադրանքի` Տիգրան Զավենի Ղանդիլյանի, ծնված 26.12.1970թ., ք.Երևան, ազգությամբ հայ, ՀՀ քաղաքացի, բարձրագույն կրթությամբ, չամուսնացած, չի աշխատում, նախկինում դատված` Երևանի Էրեբունի և Նուբարաշեն վարչական շրջանների ընդհանուր իրավասության դատարանի 16.02.2010թ. դատավճռով ՀՀ քր. օր-ի 268 հոդվածի 2-րդ մասի 2-րդ կետով, 69 հոդվածի կիրառմամբ դատապարտվել է ազատազրկման` 11 ամիս 25 օր ժամկետով, հաշվառված է ք.Երևան Ավանեսովի 8 շենք, բն. 10, ներկայումս ՀՀ ԱՆ «Նուբարաշեն» քրեակատարողական հիմնարկի դատապարտյալ։
Մեղադրվում է ՀՀ քր. օր-ի 34-268 հոդվածի 3-րդ մասով։
Դատաքննությամբ և գործի տվյալներով պարզվեց հետևյալը.
Տիգրան Զավենի Ղանդիլյանը Երևանի Էրեբունի և Նուբարաշեն վարչական շրջանների ընդհանուր իրավասության դատարանի 2010թ. փետրվարի 16-ի դատավճռով ՀՀ քր. օր-ի 268 հոդվածի 2-րդ մասի 2-րդ կետով նախատեսված հանցագործություն կատարելու համար դատապարտված լինելով, և պատիժը ՀՀ ԱՆ «Նուբարաշեն» քրեակատարողական հիմնարկում կրելու ընթացքում, 2010թ. մարտի 22-ին, առանց իրացնելու նպատակի` իր գործածման համար, կրկին անգամ առանձնապես խոշոր չափերի թմրամիջոց ձեռք բերելու նպատակով զանգահարել է իր եղբորը` Արթուր Ղանդիլյանին և խնդրել է իր ծանոթից` քննությամբ չպարզված ոմն Կարենից, Էրեբունի բժշկական կենտրոնի մոտից իր համար նախատեսված հանձնուքը վերցնել, փոխադրել ՔԿ հիմնարկ և փոխանցել իրեն։
Նույն օրը, ժամը 1700-ի սահմաններում Արթուր Ղանդիլյանը պայմանավորված վայրում հանդիպել է գործով չպարզված անձնավորությանը, նրանից վերցրել է Տիգրան Ղանդիլյանի համար նախատեսված հանձնուքը և այն փոխադրել ՀՀ ԱՆ «Նուբարաշեն» քրեակատարողական հիմնարկ։
ՀՀ ԱՆ «Նուբարաշեն» քրեակատարողական հիմնարկում կատարված խուզարկությամբ հանձնուքում գտնվող փքաբլիթներով լցված ստվարաթղթե տուփի միջից հայտնաբերվել է առաձնապես խոշոր չափի` 0,53 գրամ մաքուր քաշով, տնայնագործական եղանակով պատրաստված «հերոին» տեսակի թմրամիջոցը։
Վերը նշված հանցավոր արարքի կատարման համար Տիգրան Զավենի Ղանդիլյանին մեղադրանք է առաջադրվել ՀՀ քր. օր-ի 34-268 հոդվածի 3-րդ մասով։
Դատաքննությամբ առաջադրված մեղադրանքում ամբաստանյալ Տիգրան Ղանդիլյանը իրեն լիովին մեղավոր ճանաչեց, և օգտվելով իր սահմանադրական իրավունքից, հրաժարվեց դատաքննությամբ ցուցմունք տալուց։
Նախաքննության ընթացքում Տիգրան Ղանդիլյանը ցուցմունք է տվել այն մասին, որ 2010թ. մարտի 22-ին հեռախոսազրույց է ունեցել իր մոսկվայաբնակ ընկերոջ` քննությամբ չպարզված Վահագ անունով անձնավորության հետ, և նրանից պահանջել է իրեն թմրամիջոց ուղարկել։ Վերջինս չմերժելով, իրեն հայտնել է, որ չի կարող անձամբ փոխանցել թմրամիջոցը, և խնդրել է գտնել մեկ այլ անձի, որը կարող է այն տեղափոխել քրեակատարողական հիմնարկ։ Դրանից հետո, կապնվել է իր ծանոթ Կարենի հետ և նրան խնդրել է որպեսզի Վահագից վերցնի հանձնուքը և տեղափոխի քրեակատարողական հիմնարկ։ Մի առ ժամանակ անց Կարենը զանգահարել է իրեն և հայտնել, որ անձնագիր չունենալու պատճառով հանձնուքը չի կարող հանձնել։ Այդ ժամանակ, ինքը զանգահարել է իր եղբորը` Արթուր Ղանդիլյանին, և խնդրել է Կարենից վերցնի հանձնուքը և տեղափոխի ՀՀ ԱՆ «Նուբարաշեն» քրեակատարողական հիմնարկ։ Նույն օրը տեղեկացել է, որ իր անվամբ ներկայացված հանձնուքի խուզարկությամբ հանձնուքում առկա փքաբլիթներով լցված ստվարաթղթի տուփի մեջ հայտնաբերվել է թմրամիջոց։
Բացի ամբաստանյալի խոստովանական ցուցմունքից, նրա կատարած արարքը հիմնավորվեց գործով ձեռք բերված հետևյալ ապացույցներով.
Վկա` Արթուր Ղանդիլյանի ցուցմունքով այն մասին, որ 2010թ. մարտի 22-ին, ժամը 1600-ի սահմաններում հեռախոսազրույց է ունեցել իր եղբոր` Տիգրան Ղանդիլյանի հետ, որը իրեն խնդրել է հանդիպել իր ծանոթին, նրանից վերցնել հանձնուք և այն փոխանցել ՀՀ ԱՆ «Նուբարաշեն» քրեակատարողական հիմնարկ։ Նույն օրը, ժամը 1700-ի սահմաններում «Էրեբունի» բժշկական կենտրոնի մոտ հանդիպել է իրեն անծանոթ մի անձնավորության, նրանից վերցրել է հանձնուքը, և եղբորը հանձնելու համար, տեղափոխել է ՀՀ ԱՆ «Նուբարաշեն» քրեակատարողական հիմնարկ։ Քրեակատարողական հիմնարկի հանձնուքների ընդունման սենյակում ՔԿՀ աշխատակիցների կողմից կատարված հանձնուքի զննության ժամանակ, հանձնուքում գտնվող փքաբլիթներով լցված ստվարաթղթե տուփի միջից հայտնաբերվել է «հերոին» տեսակի թմրամիջոց։
Վկաներ` ՀՀ ԱՆ «Նուբարաշեն» քրեակատարողական հիմնարկի աշխատակիցներ Մուշեղ Դիլանյանի և Հովհաննես Մանջիկյանի նախաքննությամբ տրված և դատաքննությամբ հետազոտված նույաբովանդակ ցուցմունքներով այն մասին, որ 2010թ. մարտի 22-ին, ժամը 1745-ին ՀՀ ԱՆ «Նուբարաշեն» քրեակատարողական հիմնարկի հանձնուքների հանձնման և ընդունման սենյակում կատարել են Արթուր Զավենի Ղանդիլյանի կողմից իր եղբոր` Տիգրան Զավենի Ղանդիլյանի անվամբ բերված հանձնուքի զննություն, որի մեջ գտնվող փքաբլիթներով լցված ստվարաթղթե տուփի միջից հայտնաբերել են առանձնապես խոշոր չափի` 0.53 գրամ մաքուր քաշով, տնայնագործական եղանակով պատրաստված «հերոին» տեսակի թմրամիջոց։
Տիգրան Ղանդիլյանի հանցանքը հիմնավորվեց նաև դատաքիմիական փորձաքննության թիվ Հմ 08331005 եզրակացությամբ, համաձայն որի փորձաքննությանը ներկայացված 0.53 գրամ մաքուր քաշով, յուրահատուկ հոտով, կաթնագույն երանգի փոշեզանգվածը հանդիսանում է տնայնագործական եղանակով պատրաստված «հերոին» տեսակի թմրամիջոց։
Տոկսիկոքիմիական փորձաքննության թիվ 10-0918 եզրակացությամբ, համաձայն որի Տիգրան Ղանդիլյանի մեզի փորձանմուշում հայտնաբերվել են ափիոնի խմբին պատկանող թմրամիջոցի թմրալկալոիդների հետքեր։
ՀՀ ԱՆ «Նուբարաշեն» քրեակատարողական հիմնարկի դատապարտյալ Տիգրան Զավենի Ղանդիլյանի անվամբ բերված հանձնուքի զննությամբ հայտնաբերված իրերի և նյութերի զննության, կշռման և փաթեթավորման վերաբերյալ կազմված արձանագրությամբ, իրեղեն ապացույց ճանաչված և քրեական գործին կցված 0.53 գրամ մաքուր քաշով «հերոին» տեսակի թմրամիջոցով, ինչպես նաև գործով ձեռք բերված այլ փաստական տվյալներով։
Այսպիսով դատարանը ապացուցված համարեց, որ Տիգրան Զավենի Ղանդիլյանը կատարել է արարք, որը նախատեսված է ՀՀ քր. օր-ի 34-268 հոդվածի 3-րդ մասով, որով և պետք է ենթարկվի քրեական պատասխանատվության։
Պատիժ նշանակելիս դատարանը հաշվի է առնում արարքի հասարակական վտանգավորությունը, ամբաստանյալի ինքնությունը և գործի ողջ հանգամանքները։
Տիգրան Ղանդիլյանի պատասխանատվությունը և պատիժը ծանրացնող հանգամանք է դիտվում հանցանքը կատարելու ռեցիդիվը։
Դատարանն ամբաստանյալի պատասխանատվությունը և պատիժը մեղմացնող հանգամանքներ չհայտնաբերեց։
Նկատի ունենալով, որ ՀՀ ԱՆ «Հոգեբուժական բժշկական կենտրոն» ՓԲԸ նարկոլոգիական կլինիկայի դատանարկոլոգիական հանձնաժողովի 16.12.2009թ. եզրակացության համաձայն Տիգրան Զավենի Ղանդիլյանը տառապում է ափիոնային թմրամոլությամբ, ուստի հարկադիր բուժման կարիք ունի, որի համար հակացուցումներ չկան, հետևաբար դատարանը գտնում է, որ պատիժը կրելու ընթացքում Տիգրան Ղանդիլյանի նկատմամբ պետք է նշանակել հարկադիր բուժում` ափիոնային թմրամոլության դեմ։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված «հերոին» տեսակի 0.53 գրամ մաքուր քաշով թմրամիջոցը պետք է ոչնչացնել, իսկ Տիգրան Ղանդիլյանին պատկանող «Նոկիա» տեսակի 359829017280289 գործարանային համարով բջջային հեռախոսը` վերադարձնել վերջինիս եղբորը` Արթուր Ղանդիլյանին։
Երևանի Էրեբունի և Նուբարաշեն վարչական շրջանների ընդհանուր իրավասության դատարանի 16.02.2010թ. դատավճռով Տիգրան Ղանդիլյանը ՀՀ քր. օր-ի 268 հոդվածի 2-րդ մասի 2-րդ կետով դատապարտվել է ազատազրկման` 11 ամիս 25 օր ժամկետով, նոր հանցանքը կատարել է մինչև պատժի լրիվ կրումը, ուստի դատարանը գտնում է, որ նոր նշանակվող պատժին մասնակիորեն պետք է գումարել վերը նշված դատավճռով նշանակված և նրա կողմից պատժի չկրած մասը։
ՀՀ ոստիկանության ՔԳՎ Էրեբունու քննչական բաժնի 19.05.2010թ. որոշմամբ թիվ 12113210 քրեական գործից պատճենահանման եղանակով անջատվել և առանձին վարույթ է առանձնացվել Տ. Ղանդիլյանին ապօրինաբար առանձնապես խոշոր չափերի` 0.53 գրամ «հերոին» տեսակի թմրամիջոց իրացրած անհայտ անձի մասը, որի գործողություններում առկա է ՀՀ քր. օր-ի 266 հոդվածի 3-րդ մասի 2-րդ կետով նախատեսված հանցագործության հատկանիշներ։
Ղեկավարվելով ՀՀ քր. դատ. օր-ի 357-360 հոդվածներով, դատարանը

Վ Ճ Ռ Ե Ց

Տիգրան Զավենի Ղանդիլյանին մեղավոր ճանաչել ՀՀ քր. օր-ի 34-268 հոդվածի 3-րդ մասով և դատապարտել ազատազրկման` 3/երեք/ տարի 6/վեց/ ամիս ժամկետով։
ՀՀ քր. օր-ի 67 հոդվածի կիրառմամբ նոր նշանակված պատժի ժամկետին մասնակիորեն գումարել Երևանի Էրեբունի և Նուբարաշեն վարչական շրջանների ընդհանուր իրավասության դատարանի 16.02.2010թ. դատավճռով նշանակված պատժի չկրած մասից` ազատազրկման 6/վեց/ ամիս ժամկետը և վերջնական պատիժ նշանակել ազատազրկում` 4/չորս/ տարի ժամկետով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել դատավճռի հրապարակման օրվանից` 19.07.2010թ.։
Պատիժը կրելու ընթացքում Տիգրան Զավենի Ղանդիլյանի նկատմամբ ՀՀ քր. օր-ի 97 հոդվածով նշանակել հարկադիր բուժում` ափիոնային թմրամոլության դեմ։
Գործով իրեղեն ապացույց ճանաչված «հերոին» տեսակի 0.53 գրամ մաքուր քաշով թմրամիջոցը դատավճիռն օրինական ուժի մեջ մտնելուց հետո ոչնչացնել, իսկ Տիգրան Ղանդիլյանին պատկանող «Նոկիա» տեսակի 359829017280289 գործարանային համարով բջջային հեռախոսը` վերադարձնել վերջինիս եղբորը` Արթուր Ղանդիլյանին։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ