Գործ հ. ԵԷԴ/0069/ 01/10

Ո Ր Ո Շ ՈՒ Մ

Հ Ա Ն Ո Ւ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ Ո Ւ Թ Յ Ա Ն

11 նոյեմբերի 2011թ. ք.Երևան

Հայաստանի Հանրապետության վերաքննիչ քրեական դատարանը
/այսուհետ` Վերաքննիչ դատարան/ հետևյալ կազմով`

ՆԱԽԱԳԱՀՈՂ ԴԱՏԱՎՈՐ` Ա.ՀՈՎՀԱՆՆԻՍՅԱՆ
ԴԱՏԱՎՈՐՆԵՐ` Ե.ԴԱՐԲԻՆՅԱՆ
Ս.ՉԻՉՈՅԱՆ
ՔԱՐՏՈՒՂԱՐՈՒԹՅԱՄԲ` Տ.ՀԱԿՈԲՅԱՆԻ

ՄԱՍՆԱԿՑՈՒԹՅԱՄԲ`
ՄԵՂԱԴՐՈՂ` Վ.ԳԵՎՈՐԳՅԱՆԻ
ՊԱՇՏՊԱՆ` Ռ.ՀՈՎՀԱՆՆԵՍՅԱՆԻ
ՏՈՒԺՈՂԻ ՆԵՐԿԱՅԱՑՈՒՑԻՉ` Կ.ՊԵՏՐՈՍՅԱՆԻ

Դռնբաց դատական նիստում, վճռաբեկ վարույթի կանոններով, քննության առնելով Վաղարշակ Սաշայի Խուրշուդյանի նկատմամբ ՀՀ քրեական օրենսգրքի 178-րդ հոդվածի 3-րդ մասի 1-ին կետով, Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 2011 թվականի օգոստոսի 08-ի դատավճռի դեմ բերված պաշտպանի և տուժողի ներկայացուցչի վերաքննիչ բողոքները


Պ Ա Ր Զ Ե Ց

1. Գործի դատավարական նախապատմությունը.
Թիվ 69105807 քրեական գործը հարուցվել է 19.11.2007թ. ՀՀ քր. օր-ի 178-րդ հոդ. 3-րդ մասի 1-ին կետով:
20.12.2007թ. որոշում է կայացվել Վաղարշակ Խուրշուդյանին ՀՀ քր. օր-ի 178-րդ հոդ. 3-րդ մասի 1-ին կետով որպես մեղադրյալ ներգրավելու մասին:
20.12.2007թ. Երևան քաղաքի Կենտրոն և Նորք-Մարաշ համայնքների առաջին ատյանի դատարանը բավարարել է Վաղարշակ Խուրշուդյանի նկատմամբ որպես խափանման միջոց կալանավորում կիրառելու միջնորդությունը:
20.12.2007թ. Վաղարշակ Խուրշուդյանին հայտնաբերելու նպատակով հայտարարվել է հետախուզում:
19.05.2008թ. Վաղարշակ Խուրշուդյանին առաջադրված մեղադրանքը լրացվել է և որոշում է կայացվել նրան ՀՀ քր. օր-ի 178-րդ հոդ. 3-րդ մասի 1-ին կետով որպես մեղադրյալ ներգրավելու մասին:
30.05.2008թ. թիվ 69105807 քրեական գործով վարույթը կասեցվել է:
02.07.2009թ. հետախուզվող մեղադրյալ Վաղարշակ Խուրշուդյանը հայտնաբերվել և կալանավորվել է ՌԴ Սանկտ Պետերբուրգի տրանսպորտային ՆԳ վարչության կողմից։
Այնուհետև, ՙՄոսկվա-Երևան՚ չվերթով բերվել և ՀՀ ոստիկանության ՔՀԳՎ ուղեկցող խմբի կողմից ՙԶվարթնոց՚ օդանավակայանից 02.11.2009թ. տեղափոխվել է ՀՀ ոստիկանության Արարատի բաժնի ՁՊՎ։
04.11.2009թ. թիվ 69105807 քրեական գործով վարույթը վերսկսվել է:
05.11.2009թ. Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը քննության առնելով մեղադրյալ Վաղարշակ Խուրշուդյանի նկատմամբ խափանման միջոցի հարցի կրկնակի քննարկում նշանկելու մասին միջնորդությունը, այն բավարարել է` մեղադրյալ Վաղարշակ Խուրշուդյանի նկատմամբ խափանման միջոցը թողել է կալանավորումը` 2 ամիս ժամանակով, որի սկիզբը հաշվել է 2009թ. նոյեմբերի 2-ից:
20.05.2010թ.-ին քրեական գործը մեղադրական եզրակացությամբ ուղարկվել է Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարան:
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը 2011 թվականի օգոստոսի 08-ի դատավճռով ամբաստանյալ
Վաղարշակ Սաշայի Խուրշուդյանին մեղավոր է ճանաչել ՀՀ քր. օր-ի 178 հոդվածի 3-րդ մասի 1-ին կետով և դատապարտել է ազատազրկման` 5/հինգ/ տարի 6/վեց/ ամիս ժամկետով` առանց գույքի բռնագրավման։
ՀՀ քր. օր-ի 69 հոդվածի կիրառմամբ ազատազրկման ձևով նշանակված պատժի մեջ հաշվակցել է ձերբակալման ձևով արգելանքի տակ գտնվելու 4/չորս/ ամիսը` մեկ օրը հաշվելով մեկ օրվա դիմաց, վերջնական պատիժ սահմանել ազատազրկում՝ 5/հինգ/ տարի 2/երկու/ ամիս ժամկետով` առանց գույքի բռնագրավման։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել 02.11.2009թ.։
Վաղարշակ Խուրշուդյանի նկատմամբ ընտրված խափանման միջոց` կալանքը, թողնվել է անփոփոխ մինչև դատավճռի օրինական ուժի մեջ մտնելը։
ՀՀ ԱԺ ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ 26.05.2011թ. որոշման 8-րդ կետի 5-րդ ենթակետի հիման վրա` Վաղարշակ Սաշայի Խուրշուդյանի պատժաչափի չկրած մասը ենթակա է կրճատման մեկ քառորդով։
Վճռվել է նաև` Վաղարշակ Սաշայի Խուրշուդյանից հօգուտ ՙՎՏԲ-Հայաստան բանկ՚ ՓԲԸ-ի բռնագանձել 46850851.7 ՀՀ դրամ գումար որպես հանցագործությամբ պատճառված վնասի հատուցում։
ՙՍեֆ ինտերնեյշնլ՚ Ունիվերսալ Վարկային Կազմակերպություն ՍՊԸ-ի և ՙԱրդշինինվեստբանկ՚ ՓԲԸ-ի կողմից քաղաքացիական հայց չներկայացնելու պատճառով, այդ հարցը համարվել է լուծված։
Դատավճիռն օրինական ուժի մեջ մտնելուց հետո ՀՀ ոստիկանության ՔԳՎ ՀԿԳ քննության վարչության 08.01.2008թ. որոշմամբ Արարատ քաղաքի Խանջյան 47 շենքի, 19 բնակարանի համատեղ սեփականատեր Վաղարշակ Սաշայի Խուրշուդյանի բաժնեմասի և նրա այլ շարժական ու անշարժ /որտեղ էլ այդպիսին գտնվի/ գույքի վրա դրված կալանքը թողնվել է անփոփոխ։
Գործով իրեղեն ապացույց ճանաչված ՙՎՏԲ-Հայաստան բանկ՚ ՓԲԸ-ի 6-րդ մասնաճյուղից առգրավված թվով 15, ՙՀակէկոնոմբանկ՚ ԲԲԸ-ի ՙՍպանդարյան՚ և ՙԷրեբունի՚ մասնաճյուղերից և ՙԱնելիք բանկ՚ ՍՊԸ-ի ՙՇենգավիթ՚ մասնաճյուղից և ՙՍեֆ ինտերնեյշնլ՚ Ունիվերսալ Վարկային Կազմակերպություն ՍՊԸ-ից առգրավված թվով 7/ընդհանուր քանակով 22/ պարկերում առկա գրավները դատավճիռն օրինական ուժի մեջ մտնելուց հետո որպես եկամուտ հանձնել պետությանը։
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը 2011 թվականի օգոստոսի 08-ի դատավճռի դեմ վերաքննիչ բողոքներ են բերել ամբաստանյալ Վաղարշակ Խուրշուդյանի շահերի պաշտպան` Ռ.Հովհաննիսյանը և տուժողի ներկայացուցիչ` Կ.Պետրոսյանը, որոնք Վերաքննիչ քրեական դատարանի 2011թվականի սեպտեմբերի 22-ի որոշմամբ ընդունվել է վարույթ:
Դատավարության մյուս մասնակիցների կողմից այլ վերաքննիչ բողոքներ և գրավոր պատասխաններ չեն ներկայացվել:
Քրեական գործը ՀՀ Վերաքննիչ քրեական դատարանում ստացվել է 2011 թվականի սեպտեմբերի 16-ին:



2.Գործի փաստական հանգամանքները.

Դատաքննությամբ և գործի տվյալներով պարզվել է հետևյալը.
Վաղարշակ Սաշայի Խուրշուդյանը Երևան քաղաքում գործող տարբեր բանկերից խաբեությամբ առանձնապես խոշոր չափի վարկի գումարներ ստանալու և դրանք հափշտակելու հանցավոր դիտավորությամբ Երևան քաղաքի ՙԱնուշ՚ ՍՊԸ ոսկու շուկայում իր կողմից վարձակալած արհեստանոցում պղնձի, ցինկի, երկաթի, պալադիումի և չնչին քանակությամբ ոսկու պարունակությամբ համաձուլվածքից պատրաստել է դեղին և սպիտակ գույների տարբեր տեսակի զարդեր, որոնց արտաքին շերտերը պատել է դեղնակարմրավուն, ինչպես նաև սպիտակ գույնի համաձուլվածքներով, որոնք ոսկու հարգի ստուգման համար նախատեսված թթուների փոխազդեցության պայմաններում բանկերի մասնագետ-ոսկերիչների մոտ համոզմունք են ստեղծել, որ զարդերը պատրաստված են 583 հարգի ոսկու համաձուլվածքից։ Շարունակելով իրականացնել իր հանցավոր դիտավորությունը, Վաղարշակ Խուրշուդյանը 2007թ. մարտի 29-ից մինչև 2007թ. օգոստոսի 2-ն ընկած ժամանակահատվածում, չարաշահելով ՙՍեֆ ինտերնեյշնլ՚ ունիվերսալ վարկային կազմակերպություն ՍՊԸ-ի, ՙՎՏԲ-Հայաստան բանկ՚ ՓԲԸ-ի 6-րդ և ՙՇահումյան՚ մասնաճյուղերի, ՙԱնելիք Բանկ՚ ՍՊԸ-ի ՙՇենգավիթ՚ մասնաճյուղի, ՙՀայէկոնոմբանկ՚ ԲԲԸ-ի ՙՍպանդարյան՚ և ՙԷրեբունի՚ մասնաճյուղերի, ՙԱրդշինինվեստբանկ՚ ՓԲԸ-ի ՙԳործարանային՚ մասնաճյուղի մասնագետ-ոսկերիչների և մյուս պատասխանատու անձանց վստահությունը` 13185.7 գրամ ընդհանուր քաշի ցածր հարգի զարդերը իր, հարազատների, ընկերների և բազմաթիվ քաղաքացիների անուններով խաբեությամբ, ոսկու անվան տակ գրավադրել է նշված կազմակերպություններում, ստեղծել է վարկերի վերադարձելիության ապահովվածության պատրանք, ապա դրանց դիմաց ձևակերպված թվով 36 վարկային պայմանագրերով ստացել և կրկին անգամ խարդախությամբ հափշտակել է նշված կազմակերպություններին պատկանող առանձնապես խոշոր չափերի հասնող ընդհանուր 49.467.000 դրամ վարկի գումարը։
Այսպես. Վաղարշակ Խուրշուդյանը, չարաշահելով ՙՍեֆ ինտերնեյշնլ՚ ունիվերսալ վարկային կազմակերպություն ՍՊԸ-ի ոսկերիչ-մասնագետ Սամվել Ավետիսյանի և մյուս պատասխանատու աշխատակիցների վստահությունը 2007թ. մարտի 29-ին և 2007թ. ապրիլի 4-ին իր պատրաստած ընդհանուր քաշով 950 գրամ ցածր հարգի զարդերը խաբեությամբ ներկայացրել է իբրև 583 հարգի ոսկյա զարդեր, որոնց գրավադրմամբ իր և իր կնոջ` Նարինե Հակոբյանի անուններով ձևակերպված վարկային պայմանագրերով նշված կազմակերպությունից խաբեությամբ ստացել և հափշտակել է ընդհանուր 3.960.000 ՀՀ դրամ վարկի գումար։
Բացի այդ, Վաղարշակ Խուրշուդյանը, չարաշահելով ՙՎՏԲ-Հայաստան բանկ՚ ՓԲԸ-ի ՙՇահումյան՚ մասնաճյուղի ոսկերիչ-մասնագետ Կարինե Էվոյանի և մյուս պատասխանատու աշխատակիցների վստահությունը 2007թ. ապրիլի 12-ին և 13-ին իր պատրաստած ընդհանուր քաշով 1535.2 գրամ ցածր հարգի զարդերը խաբեությամբ ներկայացրել է իբրև 583 հարգի ոսկյա զարդեր, որոնց գրավադրմամբ իր և իր աներորդու` Աշոտ Հակոբյանի անուններով ձևակերպված թվով 3 վարկային պայմանագրերով նշված բանկից խաբեությամբ ստացել և կրկին անգամ հափշտակել է ընդհանուր 5.818.000 ՀՀ դրամ վարկի գումար։
Շարունակելով իրականացնել իր հանցավոր դիտավորությունը, Վաղարշակ Խուրշուդյանը, չարաշահելով ՙՎՏԲ-Հայաստան բանկ՚ ՓԲԸ-ի 6-րդ մասնաճյուղի ոսկերիչ-մասնագետ Արտակ Համբարձումյանի և մյուս պատասխանատու աշխատակիցների վստահությունը 2007թ. ապրիլի 27-ին իր պատրաստած ընդհանուր քաշով 790 գրամ ցածր հարգի զարդերը խաբեությամբ ներկայացրել է իբրև 583 հարգի ոսկյա զարդեր, որոնց գրավադրմամբ իր և իր աներորդու` Աշոտ Հակոբյանի անուններով կնքված թվով 2 վարկային պայմանագրերով նշված բանկից խաբեությամբ ստացել և կրկին անգամ հափշտակել է ընդհանուր 3.000.000 ՀՀ դրամ վարկի գումար։
Այնուհետև, Վաղարշակ Խուրշուդյանը ավելի մեծ քանակությամբ ցածր հարգի զարդերի գրավադրմամբ ՙՎՏԲ-Հայաստան բանկ՚ ՓԲԸ-ի 6-րդ մասնաճյուղից մեծ գումարի վարկեր ստանալու և հափշտակելու հանցավոր դիտավորությամբ իր ընկեր, Երևան քաղաքի բնակիչ Համլետ Ավագյանի միջոցով անձամբ ծանոթացել է նշված մասնաճյուղի ոսկերիչ-մասնագետ Արտակ Համբարձումյանի հետ, տեղեկացել է ոսկու գրավի ապահովմամբ վարկ ստանալու կարգի ու չափերի մասին, մասնավորապես, որ մեկ անձի անունով կարող է ձևակերպվել մեկ վարկ և տրամադրվել առավելագույնը` 1.500.000 դրամ վարկի գումար, որի համար անհրաժեշտ է 583 հարգի 395 գրամ ոսկու գրավ։ Վաղարշակ Խուրշուդյանը Արտակ Համբարձումյանի մոտ վստահություն է ձեռք բերել` ներկայանալով որպես ՙԱնուշ՚ շուկայում աշխատող բարձրորակ ոսկերիչ և ընդհանուր ծանոթ` Համլետ Ավագյանի մտերիմ ընկեր։ Վաղարշակ Խուրշուդյանը Համլետ Ավագյանին և Արտակ Համբարձումյանին խաբել է, թե ունի 583 հարգի ոսկուց պատրաստի իրեր և խնդրել է նրանց օգնել դրանք գրավադնելու նպատակով գրավառու-վարկառուներ ներգրավելու հարցում։ Դրանից հետո, 2007թ. ապրիլի 27-ից մինչև 2007թ. մայիսի 25-ն ընկած ժամանակահատվածում Վաղարշակ Խուրշուդյանը, չարաշահելով Արտակ Համբարձումյանի վստահությունը, ընդհանուր քաշով 8295 գրամ ցածր հարգի զարդերը շարունակաբար, խաբեությամբ նրան ներկայացրել է իբրև 583 հարգի ոսկյա զարդեր, և ստեղծելով վարկերի վերադարձելիության ապահովվածության պատրանք, իր հոր` Սաշա Խուրշուդյանի, քրոջ` Շուշան Խուրշուդյանի, կնոջ` Նարինե Հակոբյանի, ընկերներ` Նաիրի Աստվածատրյանի, Լևոն Բաղդասարյանի, Համլետ Ավագյանի, վերջինիս կնոջ` Եվգինե Հովհաննիսյանի, ընկերներ և ծանոթներ` Արթուր Գրիգորյանի, Ջիվան Մարկոսյանի, Գևորգ Մարկոսյանի, Լուսինե Մարկոսյանի, Կարեն Սիմոնյանի, Վարդգես Հովհաննիսյանի, Կարեն Թովմասյանի, Գրիգոր Ջրաղացպանյանի, Սեյրան Սիմոնյանի, Արա Խաչատրյանի, Սուրեն Հունանյանի, Հռիփսիմե Համբարձումյանի, Արման Համբարձումյանի և Յուրա Ավագյանի անուններով կնքված թվով 21 ոսկու գրավի ապահովությամբ վարկային պայմանագրերով ՙՎՏԲ-Հաստան բանկ՚ ՓԲ ընկերության 6-րդ մասնաճյուղից խաբեությամբ ստացել և կրկին անգամ հափշտակել է ընդհանուր 31.000.000 ՀՀ դրամ վարկի գումար։
Շարունակելով իրականացնել իր հանցավոր դիտավորությունը, Վաղարշակ Խուրշուդյանը 2007թ. մայիսի 31-ին և 2007թ. հունիսի 4-ին, չարաշահելով ՙԱնելիք Բանկ՚ ՍՊԸ-ի ՙՇենգավիթ՚ մասնաճյուղի ոսկերիչ-մասնագետ Ստեփան Էթեմեզյանի և մյուս պատասխանատու աշխատակիցների վստահությունը ոսկու անվան տակ խաբեությամբ գրավ է դրել 780 գրամ ցածր հարգի զարդեր, որի դիմաց իր և իր աներորդու` Աշոտ Հակոբյանի անուններով ձևակերպված 2 վարկային պայմանագրերով նշված մասնաճյուղից ստացել և կրկին անգամ հափշտակել է ընդհանուր 2.493.000 ՀՀ դրամ վարկի գումար։
Բացի այդ, Վաղարշակ Խուրշուդյանը 2007թ. հուլիսի 9-ին և 2007թ. օգոստոսի 2-ին, չարաշահելով ՙՀայէկոնոմբանկ՚ ԲԲԸ-ի ՙՍպանդարյան՚ մասնաճյուղի ոսկերիչ-Փորձագետ Վարդան Մարտիրոսյանի և մյուս պատասխանատու աշխատակիցների վստահությունը ոսկու անվան տակ խաբեությամբ գրավ է դրել ընդհանուր քաշով 169.5 գրամ ցածր հարգի զարդեր, որի դիմաց իր անունով ձևակերպված 2 վարկային պայմանագրերով նշված մասնաճյուղից ստացել և կրկին անգամ հափշտակել է ընդհանուր 610.000 ՀՀ դրամ վարկի գումար։
Բացի այդ, Վաղարշակ Խուրշուդյանը 2007թ. հուլիսի 13-ին, չարաշահելով ՙՀայէկոնոմբանկ՚ ԲԲԸ-ի ՙԷրեբունի՚ մասնաճյուղի ոսկերիչ-փորձագետ Աշոտ Ցոլակյանի և մյուս պատասխանատու աշխատակիցների վստահությունը 583 հարգի ոսկյա զարդերի փոխարեն խաբեությամբ գրավ է դրել իրենցից արժեք չներկայացնող, երկաթի հիմքով, այլ մետաղների համաձուլվածքից պատրաստված 82 գրամ զարդեր, որի դիմաց իր անունով ձևակերպված վարկային պայմանագրով նշված մասնաճյուղից ստացել և կրկին անգամ հափշտակել է 295.000 ՀՀ դրամ վարկի գումար։
Բացի այդ, Վաղարշակ Խուրշուդյանը 2007թ. հուլիսի 16-ին, չարաշահելով ՙԱրդշինինվեստբանկ՚ ՓԲԸ-ի ՙԳործարանային՚ մասնաճյուղի ոսկերիչ-փորձագետ Հակոբ Շիլաջյանի և մյուս պատասխանատու աշխատակիցների վստահությունը 583 հարգի ոսկյա զարդերի փոխարեն խաբեությամբ գրավ է դրել իր կողմից պատրաստված ընդհանուր քաշով 210 գրամ ցածր հարգի զարդեր, որի դիմաց իր անունով ձևակերպված վարկային պայմանագրով նշված մասնաճյուղից ստացել և կրկին անգամ հափշտակել է 941.000 ՀՀ դրամ վարկի գումար։
Բացի այդ, Վաղարշակ Խուրշուդյանը 2007թ. հուլիսի 10-ին և 2007թ. հուլիսի 20-ին, չարաշահելով ՙԱրարատ բանկ՚ ՓԲԸ-ի ՙՆաիրիտ՚ և ՙՍեբաստիա՚ մասնաճյուղերի ոսկերիչ-փորձագետ Վլադիմիր Աբրահամյանի և մյուս պատասխանատու աշխատակիցների վստահությունը 583 հարգի ոսկյա զարդերի փոխարեն խաբեությամբ գրավ է դրել իր կողմից պատրաստված ընդհանուր քաշով 374 գրամ ցածր հարգի զարդեր, որի դիմաց իր անունով ձևակերպված 2 վարկային պայմանագրերով նշված մասնաճյուղերից խաբեությամբ ստացել և կրկին անգամ խարդախությամբ հափշտակել է ընդհանուր 1.350.000 ՀՀ դրամ վարկի գումար։
Վերը նշված հանցավոր արարքի կատարման համար Վաղարշակ Սաշայի Խուրշուդյանին մեղադրանք է առաջադրվել ՀՀ քր. օր-ի 178-րդ հոդվածի 3-րդ մասի 1-ին կետով:



3.Վերաքննիչ բողոքների հիմքերը, հիմնավորումները և պահանջը.

ա/ Պաշտպան Ռ.Հովհաննիսյանի վերաքննիչ բողոքի հիմքերը, հիմնավորումները և պահանջը.
Պաշտպանը նշել է, որ դատավաճիռը օրինական չէ, չի բխում գործով ձեռք բերված ապացույցների, փաստական հանգամանքների, ինչպես նաև իր պաշտպանյալի մեղսագրվող արարքի հանցակազմի իրավական օբյեկտիվ վերլուծությունից, ստորև նշվող հետևյալ պատճառաբանություններով։
Դատարանը դատավճռի հիմքում դրել է մեղադրական եզրակացությունը գրեթե ամբողջությամբ և այն ամենը ինչ ձեռք է բերվել դատաքննության ընթացքում, չի ստացել իր արժանավույն իրավական գնահատականը։ Ապացույցների գնահատումը՝ սկսած Վաղինակ Խուրշուդյանի ցուցմունքից, ընդհուպ մինչև յուրաքանչյուր վկայի ցուցմունք սուբեկտիվորեն գնահատվել է ի վնաս Վաղարշակ Խուրշուդյանին։ Արդյունքում այն կարծիքն է ձևավորվում, որ դատարանն անգամ իրավական գնահատականի չի արժանացրել դատարանում որպես վկա փորձագետների ցուցմունքները և ապացուցողական նշանակություն ունեցող յուրաքանչյուր հանգամանք չի հետազոտվել բազմակողմանի լրիվ և հետևաբար, արդյուքնում կայացվել է ոչ արդարացի դատավճիռ։
- Դատարանը խախտել է ՀՀ քր. դատ. օր-ի 25-րդ հոդվածի պահանջը՝ ապացույցների ազատ գնահատումը, ուր սահմանվում է, որ դատավորը ապացույցները գնահատում է իր ներքին համոզմամբ և քրեական դատավարությունում, ոչ մի ապացույց նախապես հաստատված ապացույցի ուժ չունի։Դատավորը չպետք է կանխակալ մոտեցում ցուցաբերի ապացույցներին, չպետք է դրանց որոշ մասին, մյուսների նկատմամբ առավել կամ նվազ նշանակություն տա մինչև դրանց հետազոտումը պատշաճ իրավական ընթացակարգի շրջանակներում։
- Դատարանը խախտել է ՀՀ քրեական դատավարության օրենսգրքի 17-րդ հոդվածի պահանջը, քանզի չի իրականացրել արդարացի քննություն։Դատարանը բազմակողմանի լրիվ և օբյեկտիվ հետազոտության արդյունքում պարզելով ամբաստանյալի անմեղությունը հիմնավորող նրան արդարացնող հանգամանքները, չի փորձել դրանք արտացոլել դատավճռում և կայացնել օրինական դատավճիռ։ Մինչդեռ, դատաքննության ընթացքում ձեռք բերված ապացույցները բացարձակապես բավարար էին, արդարացման դատավճիռ հրապարակելուն։
- Դատարանի կողմից ամբաստանյալ Վաղարշակ Խուրշուդյանի արարքը որակվել և նրա նկատմամբ կիրառվել է ՀՀ քրեական օրենսգրքի 178-րդ հոդվածի 3-րդ մասի 1-ին կետը, որը չպետք է կիրառվեր, քանզի Վաղարշակ Խուրշուդյանի արարքում բացակայում է հիշյալ հոդվածով նախատեսված արարքի հանցակազմը։
Այսպիսով՝
1. Խարդախության օբյեկտը սեփականությունն է /պետական կոոպերատիվ անձնական/։ Խարդախության առարկաներ կարող են համարվել միայն ուրիշի գույքը, այլև գույքի նկատմամբ իրավունք ձեռք բերելը, որպես իրավաբանական կատեգորիա։ Այն կարող է ամրագրված լինել տարբեր փաստաթղթերում, օրինակ կտակում, այս կամ այն արժեքները ստանալու կապակցությամբ տրված լիազորագրերում։
Սույն քրեական գործով խարդախության օբյեկտը հանդիսացել է ՙՍեֆ ինտերենյշնլ՚ ունիվերսալ վարկային կազմակերպություն ՍՊԸ-ի, ՙԱրդշինինվեստբանկ՚ ՓԲԸ-ի ՙՎՏԲ-Հայաստան բանկ՚ ՓԲԸ-ի ՙՀԱՅԷԿՈՆՈՄ ԲԱՆԿ՚ ԲԲԸ-ի ՙԱպանդարյան և էրեբունի՚ մասնաճյուղերի, ՙԱնելիք բանկ՚ ԱՊԸ-ի Շենգավիթ մասնաճյուղի սեփականությունը՝ դրամական միջոցները։
2. Օբյեկտիվ կողմից, խարդախությունը կատարվում է խաբեության կամ վստահությունը չարաշահելու միջոցով։
3. Խաբեություն ասելով պետք է հասկանալ, որ հանցավորը գույքին տիրանալու կամ գույքի նկատմամբ իրավունք ձեռք բերելու համար դիմում է խորամանկությունների,
օրինակ՝ տուժողին հաղորդում է ոչ ճիշտ տեղեկություններ, այսինքն՝ ներկայացնում է սուտ տվյալներ, կեղծ փաստաթղթեր, հավատարմագրեր, լիագորագրեր և այլն, որոնց հետևանքով տուժողը կամ գույքը տնօրինողը մոլորության մեջ ընկնելով, պետական, հասարակական կամ անձնական գույքը կամ դրա իրավունքը զիջում է հանցավորին։
Ինչ վերաբերվում է Վաղարշակ Խուրշուդյանին, ապա պետք է ասել, որ գործով անցնող այսպես կոչված ՙվկաններ՚ Համլետ Ավագյանի և Արմեն Գրիգորյանի կողմից ընդամենը ոսկյա զարդեր պատրաստելու պատվեր ընդունած ոսկերիչ մասնագետ է։ Վերջինիս գործողությունները սկսվել են վերոնշյալ վկաների համար ոսկյա իրեր պատրաստելով և ավարտել վերջիններիս առաջարկով այդ զարդերը նրանց իսկ կողմից ներկայացրած բանկերում գրավադնելով, որպեսզի կարողանա ստանալ իր աշխատանքի դիմաց համապատասխան վարձատրություն։ Գործով հաստատվել և հիմնավորվել է, որ Վաղարշակ Խուրշուդյանը չի ճանաչել բանկերի որևէ աշխատակցի, թե կառավարչի և թե ոսկերչի, ի սկզբանե և այնուհետ նպատակ չի հետապնդել տիրանալ բանկերի գույքին, կամ դրանց նկատմամբ իրավունք ձեռքբերել, քանզի սույն քրեական գործով դարձյալ հինավորվում է, որ Վաղինակ Խուրշուդյանը բանկից որպես վարկ ստացած գումարները առձեռն հանձնել է ՙվկա՚ Համլետ Ավագյանին, Արմեն Գրիգորյանին։ Այդ կարևոր հանգամանքը, հաստատվում է ոչ միայն Վաղինակ Խուրուդյանի ցուցմունքներով, այլև վերջինիս կողմից ներգրավված վարկառուների՝ գործով վկաներ Աշոտ Հակոբյանի, Նարինե Հակոբյւսնի, Աաշա Խուրշուդյանի, Նաիրի Աստվածատրյանի. Շուշան Խուրշուդյանի, Լևոն Բաղդասարյանի նախաքննական և դատաքննական ցուցմունքներով։ Ի դեպ հարկ եմ համարում նշել, որ Վաղարշակ Խուրշուդյանի կողմից ներգրավված վարկառուները ընդամենը 6-ն են, իսկ Համլտ Ավագյանի կողմից ներգրավված վարկառուները 13 և Համլետ Ավագյանի խնդրանքով ոսկերիչ Արտակ Համբարձումյանի կողմից ներգրավված վարկառուները 3 են։ Մնացած բոլոր վարկառուները հիմնականում դարձյալ հաստատում են, այն կարևոր հանգամանքը, որ որպես վարկառուներ ներգրավվելով ՀԱմլետ Ավագյանի և Արտակ Համբարձումյանի կողմից վարկի գումարները առձեռն հանձնել են Համլետ Ավագյանին և Արմեն Գրիգորյանին։ Նրանցից որևէ մեկը չի վկայակոչում Վաղարշակ Խուրշուդյանի անունը, դեռ ավելին հենց ինքը Վաղարշակ Խուրշուդյանը Համլետ Ավագյանից ստացել է գումար որպես աշխատավարձ և այն էլ ոչ լրիվ :
Խարդախությունը կարող է կատարվել բանավոր, գրավոր և այլ գործողություններով։
Ի տարբերություն մի շարք հանցագործությունների, որոնց հատկանշական են սպառնալիքը, ֆիզիկական բռնությունը և այլն, խարդախությունը կատարվում է փաստաթղթերի կամ այլ հաղորդումների միջոցով, կամ արվում է մտերմական հարաբերությունների հողի վրա, որոնք ծագում են հանցավորի և տուժողի միջև։
Օրենսդիրը նախատեսում է խարդախությունը կատարվում է խաբեությամբ կամ վստահությունը չարաշահելու միջոցով։ Ինչ վերաբերվում է խաբեությանը, ապա պետք է ասել, որ Վաղինակ Խուրշուդյանը նախ չի փորձել տուժողների գույքին տիրանալ գույքի նկատմամբ իրավունք ձեռք բերել առավել ևս դրա համար դիմել խորամանկությունների տալ ոչ ճիշտ տեղեկություններ, սուտ տվյալներ և այլն։ Նա չի կատարել ոչ բանավոր և ոչ էլ գրավոր կամ այլ գործողություններ, որոնց հիմքում ընկած լինի խաբեությունը։ Հիրավի գործում առկա չէ որևէ ապացույց, որպեսզի դատարանին հիմք տալ կասկածելու Վաղարշակ Խուրշուդյանի կողմից խաբեության ճանապարհով խարդախություն կատարելուն։
4.Վստահության չարաշահումը հանցավորի կողմից դրսևորված վստահության, մտերմական հարաբերությունների օգտագործումն է` ի վնաս տուժողի իրավունքների ու շահերի։ Անհրաժեշտ է նկատի ունենալ, որ եթե արարքը, այսինքն վստահության չարաշահումը կամ խաբեությունը կատարվում է կույրերի, դեռահասների, անմեղսունակների և այլոց նկատմամբ, որոնք հանգամանքների բերումով չեն կարող ընկալել երևույթը, ապա առկա է ոչ թե խարդախության հանցակազմ, այլ միայն գողության։ Եթե անձը կեղծում է փաստաթղթերը կամ օգտագործում է կեղծ արժեթղթեր և հափշտակում է գույք, ապա արարքը ենթակա է որակման ըստ համակցության՝ որպես խարդախություն և որպես փաստաթղթերի կեղծում, կեղծ փաստաթղթերի, դրոշումների, կնիքների, բլանկների պատրաստում, օգտագործում կամ վաճառք, կամ, որպես կեղծ տարադրամի կամ արժեթղթերի պատրաստում կամ իրացում։
Գործով որպես վկաներ ոսկերիչ փորձագետներ, ոսկերիչ մասնագետներ ՙՍեֆ ինտերնեյշնլ՚ ՈՎԿ ՍՊԸ ոսկերիչ Սամվել Ավետիսյանի ՙՎՏԲ Հայստան՚ ՓԲԸ-ի, ՙՇահումյան՚ մասնաճյուղի ոսկերիչ Կարինե Էվոյանի նույն բանկի 6-րդ մասնաճյուղի ոսկերիչ մասնագետ Արտակ Համբարձումյանի, ՙԱնելիք Բանկ՚ ՍՊԸ Շենգավիթ մասնաճյուղի ոսկերիչ մասնագետ Ստեփան Էթեմեզյանի, ՙՀայէկոնոմբանկ՚ ԲԲԸ-ի ՙՍպանդարյան՚ մասնաճյուղի ոսկերիչ փորձագետ Վարդան Մարտիրոսյանի, ՙՀայէկոնոմբանկ՚ ԲԲԸ-ի Էրեբունի մասնաճյուղի ոսկերիչ փորձագետ Աշոտ Ցոլակյանի, ՙԱրարատ բանկ՚ ՓԲԸ ՙՆաիրիտ և Սեբաստիա՚ մասնաճյուղերի ոսկերիչ փորձագետ Վլադիմիր Աբրահամյանի ցուցմունքներով հաստատվել և հիմնավորվել է, որ Վաղարշակ Խուրշուդյանը նրանցից որևէ մեկին չի ճանաչել և երբևէ չի առնչվել։ Հետևաբար, ամբաստանյալը ցանկության դեպքում անգամ չէր կարող նրանցից որևէ մեկի վստահությունը չարաշահել, քանզի վստահության չարաշահումը հանցավորի կողմից դրսևորված վստահության, մտերմական հարաբերության օգտագործում է ի վնաս տուժողների իրավունքների ու շահերի։ Ամբաստնյալ Վաղարշակ Խուրշուդյանը և վերը թվարկված անձինք եղել են օտարներ։ Բնականաբար, Վաղարշակ Խուրշուդյանի արարքում բացակայում է հանցակազմի օբյեկտիվ կողմը, քանզի օբյեկտիվ կողմից խարդախությունը դրսևորվում է խաբեության կամ վստահությունը չարաշահելու միջոցով։
5. Օրենսդիրը նախատեսում է հանցակազմին 4 տարր՝ օբյեկտ, օբյեկտիվ կողմ, սյուբեկտ, սյուբելտիվ կողմ։ Սույն քրեական գործում բացակայում է Վաղինակ Խուրշուդյանի կատարած արարքում առկա հանցակազմի, ինչպես օբյեկտիվ կողմը, այնպես էլ սուբյեկտիվ կողմը, քանզի խարդախությունը սուբեկտիվ կողմից դրսևորվում է դիտավորությամբ։ Բավական է, հանցակազմի տարրերից որևէ մեկը բացակայի արարքում և գործողությունները կդադարեն դիտվել քրեորեն պատժելի։Սույն քրեական գործի շրջանականերում հիմնավորվում է, որ Վաղարշակ Խուրշուդյանի կողմից կատարած արարքները չեն կարող որակվել որպես խարդախություն և նրան դատապարտել ազատազրկման։
- Դատարանը չի կիրառել ՀՀ քրեական օրենսգրքի 18-րդ հոդվածի 2-րդ, 3-րդ, 4-րդ և 5-րդ կետերը, քանզի կասկածյալը կամ մեղադրյալը չէ, որ պարտավոր է ապացուցել իր անմեղությունը։ Նրանց անմեղության պարտականությունը դրվում է մեղադրանքի կողմի վրա և ոչ պաշտպանության կողմի։ Վաղարշակ Խուրշուդյանի հանցանք գործելու մեջ մեղավորության մասին հետևությունը չի կարող հիմնվել ենթադրությունների վրա, այն պետք է հաստատվի գործին վերաբերող փոխկապակցված հավաստի ապացույցների բավարար ամբողջությամբ։Եվ, վերջապես, մեղադրանքը ապացուցված լինելու վերաբերյալ կասկածները, որոնք չեն կարող փարատվել ՀՀ քր. օր-ի դրույթներին համապատասխան պատշաճ իրավական ընթացակարգի շրջանականերում, մեկնաբանվում են հօգուտ մեղադրյալի կամ կասկածյալի։
Մինչդեռ, սույն հոդվածը չկիրառելով հանդերձ դատարանը ոտնահարել է ամբաստանյալ Վաղարշակ Խուրշուդյանի սահմանադրական իրավունքները՝ արդար դատաքննության և անձնական ազատության, ազատության իրավունքը, որի արդյունքում վերջինիս նկատմամբ կիրառված խափանման միջոցը պարունակել է և շարունակում է պարունակել պատժի տարր, որն անթույլատրելի է։
Հետևաբար, պետք է ասել, որ դատարանը խախտել է ՙՄարդու իրավունքների եվրոպական կոնվենցիայի՚ 6-րդ հոդվածի և ՀՀ Սահմանադրության 16-րդ հոդվածի, 18-րդ հոդվածի դրույթները։
Պաշտպանը հղում կատարելով Կոնվենցիայի 6-րդ հոդվածին, ՀՀ Սահմանադրության 16-րդ, 18-րդ հոդվածներին նշել է, որ դատարանի կողմից ոչ արդարացի դատավճռի կայացումը և վերոնշյալ դատական ու նյութական իրավանորմերի խախտումը կամ չկիրառումը հանգեցրել է իր պաշտպանյալ Վաղինակ Խուրշուդյանի միջազգային նորմերով և ՀՀ Սահմանադրության սահմանվող ու նախատեսվող իրավունքների /արդար դատաքննության, իրավունքների դատական պաշտպանության և իրավունքների իրականացման/ ոտնահարմանը և ազդել է սույն գործի ելքի վրա։
Ելնելով վերոգրյալից պաշտպանը խնդրել է վերաքննիչ բողոքը ընդունել վարույթ, բեկանել Երևանի էրեբունի և Նուբարաշեն վարչական շրջանների ընդհանուր իրավասության դատարանի 08.08.2011թ. /թիվ ԵԷԴ/0069/01/10/ դատավճիռը ամբողջությամբ և Վաղինակ Սաշայի Խուրշուդյանին ճանաչել անպարտ և նրա նկատմամբ կայացնել արդարացման դատավճիռ։


բ/ Տուժող` ՙՎՏԲ-Հայաստան բանկ՚ ՖԲԸ-ի ներկայացուցիչ Կ.Պետրոսյանի վերաքննիչ բողոքի հիմքերը, հիմնավորումները և պահանջը

Երևանի էրեբունի և Նուբարաշեն վարչական շրջանների ընդհանուր իրավասության դատարանը 08.08.2011թ.-ի կայացված դատավճռով ամբաստանյալին դատապարտել է մեղմ պատժի, քանի որ ամբաստանյալի կողմից չի վերականգնվել տուժողին պատճառված վնասը: Հաշվի առնելով գործի մանրամասները, ինչպես նաև այն, որ տուժողի վնասները չեն վերականգնվել, դատարանը պետք է խիստ պատժի ենթարկեր ամբաստանայլին:
Մասնավորապես ամբաստանյալ Վաղարշակ Խուրշուդյանի կողմից կատարված արարքով տուժող ՙՎՏԲ-Հայաստան բանկ՚ ՖԲԸ-ին պատճառվել է 46.850.851,7 ՀՀ դրամի չափով վնաս և դատաքննության ընթացքում որևէ վերականգնում կամավոր չի կատարվել և հավանաբար ամբաստանյալը մտադրություն չունի վերականգնելու վնասը:
Դատաքննությամբ հիմնավորվել է ամբաստանյալի մեղավորությունը և ինչպես վկաների, այնպես էլ իրեղեն ապացուցներով հիմնավորվել է հանցանքը: Սակայն այս պարագայում դատարանը հաշվի չառնելով կատարված արարքի հասրակության համար վտանգավորության աստիճանը և ամբաստանայլի գործողությունները, պատճառված վնասի չափը նշանակել է ակնհայտ մեղմ պատիժ, որը չի համապատասխանում կատարված արարքի ծանրությանն ու բնույթին:
Գտնում է, որ պատիժը պետք է լիներ խիստ, որն ավելի արդյունավետ կլիներ ամբաստանյալի ուղղվելու համար, քանի որ բանկի կրած վնասը չի վերականգնվել նույնիսկ մասնակի վճարումներ չի արվել:
Ելնելով վերոգրյալից տուժողի ներկայացուցիչը Վերաքննիչ դատարանից խնդրել է վերաքննիչ բողոքը բավարարել ամբողջությամբ` բեկանել Երևանի էրեբունի և Նուբարաշեն վարչական շրջանների ընդհանուր իրավասության դատարանի 08.08.2011թ.-ի դատավճիռը նշանակված պատժի մասով և խստացնել պատիժը` Վաղարաշակ Խուրշուդյանի նկատմամբ:



4.Վերաքննիչ դատարանի պատճառաբանությունները և եզրահանգումը.
Վերաքննիչ բողոքում նշված հիմքերի ու հիմնավորումների սահմաններում վերլուծելով գործի նյութերը, լսելով պաշտպանի և տուժողի ներկայացուցչի կողմից իրենց վերաքննիչ բողոքների հիմնավորումները, ամբաստանյալի բացատրությունները, դատական ակտը չբողոքարկած հակառակ կողմի` մեղադրողի պատասխանը, ՀՀ Վերաքննիչ քրեական դատարանը գտնում է, որ պաշտպանի և տուժողի ներկայացուցչի վերաքննիչ բողոքները պետք է մերժել հետևյալ պատճառաբանությամբ:
ՀՀ քր. դատ. օր.-ի 385հդ.-ի 1-ին մասի համաձայն` Վերաքննիչ քրեական դատարանը դատական ակտը վերանայում է Վերաքննիչ բողոքի հիմքերի և հիմնավորումների սահմաններում, նույն հոդվածի 3-րդ մասի համաձայն` Վերաքննիչ դատարանում բողոքի քննության ժամանակ առաջին ատյանի դատարանում հաստատված փաստական հանգամանքներն ընդունվում են որպես հիմք, բացառությամբ այն դեպքի, երբ բողոքում վիճարկվում է որևէ փաստական հանգամանք և Վերաքննիչ քրեական դատարանը հանգում է այն հետևության, որ տվյալ փաստական հանգամանքի վերաբերյալ եզրակացության հանգելիս առաջին ատյանի դատարանն այն ճիշտ չի գնահատել:
Քրեական պատասխանատվության հիմքը ամրագրած ՀՀ քրեական օրենսդրության հիմնարար սկզբունք հանդիսացող ՀՀ քր. օր.-ի 3-րդ հոդ.-ի 1-ին մասի համաձայն` քրեական պատասխանատվության միակ հիմքը հանցանք, այսինքն` այնպիսի արարք կատարելն է, որն իր մեջ պարունակում է քրեական օրենքով նախատեսված հանցակազմի բոլոր հատկանիշները:
Անմեղության կանխավարկածի սկզբունքն ամրագրած ՀՀ քր. դատ. օր.-ի 18-րդ հոդ.-ի 3-րդ մասի համաձայն` հանցանք գործելու մեջ անձի մեղավորության մասին հետևությունը չի կարող հիմնվել ենթադրությունների վրա, այն պետք է հաստատվի գործին վերաբերող փոխկապակցված հավաստի ապացույցների բավարար ամբողջությամբ:
Ապացույցների ազատ գնահատման սկզբունքն ամրագրած ՀՀ քր. դատ. օր.-ի 25-րդ հոդ.-ի 1-ին մասի համաձայն` դատավորը, ինչպես նաև հետաքննության մարմինը, քննիչը, դատախազը ապացույցները գնահատում են իրենց ներքին համոզմամբ, նույն հոդվածի 2-րդ մասի համաձայն` քրեական դատավարությունում ոչ մի ապացույց նախապես հաստատված ապացույցի ուժ չունի: Դատավորը, ինչպես նաև հետաքննության մարմինը, քննիչը, դատախազը չպետք է կանխակալ մոտեցում ցուցաբերեն ապացույցներին, չպետք է դրանց որոշ մասին մյուսների նկատմամբ առավել կամ նվազ նշանակություն տան` մինչև դրանց հետազոտումը պատշաճ իրավական ընթացակարգի շրջանակներում:
ՀՀ քր. դատ. օր.-ի 124-րդ հոդ.-ի 1-ին մասի համաձայն` ապացուցումը գործի օրինական, հիմնավորված և արդարացի լուծման համար նշանակություն ունեցող հանգամանքներ բացահայտելու նպատակով ապացույցներ հավաքելը, ստուգելը և գնահատելն է:
ՀՀ քր. դատ. օր.-ի 126-րդ հոդ.-ի համաձայն` գործով հավաքված ապացույցները ենթակա են բազմակողմանի և օբյեկտիվ ստուգման` ձեռք բերված ապացույցի վերլուծության, այն այլ ապացույցների հետ համադրելու, նոր ապացույցներ հավաքելու, ապացույցների ձեռքբերման աղբյուրներն ստուգելու միջոցով:
ՀՀ քր. դատ. օր.-ի 127-րդ հոդ.-ի համաձայն` յուրաքանչյուր ապացույց ենթակա է գնահատման` վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, նույն հոդվածի 2-րդ մասի համաձայն` հետաքննության մարմնի աշխատակիցը, քննիչը, դատախազը, դատավորը, ղեկավարվելով օրենքով, ապացույցները գնահատում են ապացույցների համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ:
ՀՀ քր. դատ. օր.-ի 107-րդ հոդ.-ի համաձայն` միայն ապացույցների հիման վրա են հաստատվում`
1/ դեպքը և հանգամանքները/կատարման ժամանակը, տեղը, եղանակը և այլն/.
2/ կասկածյալի և մեղադրյալի առնչությունը դեպքին.
3/ հանցագործության` քրեական օրենքով նախատեսված հատկանիշները.
4/ անձի մեղավորությունը քրեական օրենքով չթույլատրված արարքը կատարելու մեջ.
5/ քրեական օրենքով նախատեսված պատասխանատվությունը մեղմացնող կամ խստացնող հանգամանքները.
6/ այն հանգամանքները, որոնցով դատավարության մասնակիցը կամ քրեական դատավարությանը մասնակցող այլ անձը հիմնավորում է իր պահանջները, եթե այլ բան նախատեսված չէ օրենքով:
Ընդհանուր իրավասության դատարանի դատաքննությամբ ՀՀ քր. օր.-ի 178-րդ հոդ.-ի 3-րդ մասի 1-ին կետով առաջադրված մեղադրանքում Վաղարշակ Խուրշուդյանն իրեն մեղավոր չի ճանաչել և ցուցմունք է տվել այն մասին, որ առաջադրված մեղադրանքը չի համապատասխանում իրականությանը։Նախ և առաջ ոսկու ստուգման լուծույթը պարզում է միայն ոսկու առկայությունը, այն մյուս մետաղների վրա քսելիս` ցույց չի տալիս, որը և չէր կարող ոսկերիչների մոտ թյուրիմացություն առաջացներ, հետևաբար ոսկերիչը նշված լուծույթով զարդերը ստուգելիս չէր կարող սխալվել և ոսկին խառներ այլ մետաղների հետ։ Իր կողմից ներկայացրած զարդերը պատրաստված են եղել տարբեր մետաղներից` պալադիում, պղինձ և այլն, այսինքն, դրանք 583 հարգի ոսկի չեն պարունակել, հետևաբար ոսկերիչը դրանք ստուգելիս պիտի պարզեր, որ դետալներից այն, որը ոսկուց է եղել 583 հարգի է, իսկ այն դետալները, որոնք որ այլ մետաղներից են եղել պատրաստված, երբ լուծույթը քսեր դրանց վրա հստակ պետք է ցույց տար, որ այն ոսկի չէ, այլ կերպ հնարավոր չէ։ Հետևաբար, ինքը չի չարաշահել ոսկերիչների վստահությունը, քանի որ ինքը նրանց մոտ երբեք վստահություն ձեռք չի էլ բերել, որ այն չարաշահեր, որովհետև նախկինում նրանց չի ճանաչել, բացի այդ յուրաքանչյուր դեպքում նրանց տեղյակ է պահել, որ զարդերի մեջ տարբեր մետաղների առկայություն կա, որ դրանց դետալների մի մասը ոսկուց չէ, և նրանք իմանալով դրա մասին որպես գրավ ընդունել են այդ զարդերը։ Նույնիսկ փորձագիտական եզրակացությունը տվել է, որ 5 գրամ ոսկով պատրաստվել է 400 գրամ զարդ, որը հնարավոր չէ` 5 գրամ ոսկով հնարավոր չէ 400 գրամ զարդը այնպես փակել, որ ոսկերիչը չհասկանա և այն ընդունի 583 հարգ ոսկու դիմաց։ Յուրաքանչյուր դեպքում մոտ 400 գրամ ոսկի պետք է գրավադրվեր բանկում որպեսզի 1.500.000 դրամ վարկ վերցներ, սակայն ինքը այդ 400 գրամ զարդերի վրա օգտագործել է մոտ 5-ից 20 գրամ ոսկի։ Ինքը ոսկերիչներին չի խաբել, նրանց վստահությունը չի չարաշահել, քանի որ ի սկզբանե նրանց տեղյակ է պահել, որ այդ զարդերը լիարժեք ոսկուց չեն։
Առաջին անգամ իր մոտ եկել են Համլետ Ավագյանը և Արմեն Գրիգորյանը, քանի որ Արմենին մինչ այդ ճանաչել է, վերջինս էլ իրեն ծանոթացրել է Համլետի հետ։ Համլետը իրեն առաջարկել է զարդեր պատրաստել, որոնց բաղադրությունը այլ մետաղներից լինի` վրան ոսկով պատած, քանի որ դրանք ցանկանում է տանել Ռուսաստան։ Ինքը նրան պատասխանել է, որ կարող է նման զարդեր պատրաստել, որ այլ մետաղների պարունակություն ունենա, և կարող է նաև դրանք ոսկով պատել, սակայն չի անի նման բան։ Կարող է միայն այլ մետաղների պարունակությամբ զարդեր պատրաստել, սակայն ոսկով չի պատի, քանի որ պատրաստվող զարդի պարունակությունը պետք է երևա որպեսզի ստուգելիս հստակ երևա, թե այն ինչ մետաղից է պատրաստված։ Համլետը ցանկացել է, որ պատրաստվող զարդերի մեջի պարունակությունը լինի այլ մետաղներից, իսկ վրան պատած ոսկով, որը ինքը չի համաձայնվել պատրաստել, քանի որ դա անթույլատրելի է: Իսկ տարբեր մետաղներից զարդեր պատրաստելը արգելված չէ, եթե հնարավոր է հստակ որոշել դրա ինչ մետաղից պատրաստված լինելը։ Ի վերջո Համլետը համաձայնվել է իր ասած տարբերակով զարդեր պատրաստել և պատվիրել է պատրաստել մատանիներ և ականջօղեր։
Համլետ Ավագյանը առաջին անգամ իրեն 190 գրամ ոսկի է տվել որպեսզի մոտ 1կգ զարդ պատրաստվի, այսինքն զարդի մի մասնիկը ոսկի է լինում, իսկ մնացած մասերը այլ մետաղներ, որոնք հստակ երևում է և ստուգմամբ հնարավոր է պարզել։ Քանի որ բացի ոսկուց, ինքը այդ զարդերը պատրաստելիս օգտագործել է նաև պալադիում, պղինձ և նմանատիպ այլ մետաղներ, որոնք բոլորն էլ ազնիվ մետաղներ են, ուստի արտաքին տեսքով այդ մետաղները ոսկու են նմանվում և առանց ստուգման հնարավոր չէ ասել, որ այն ոսկի չէ, այն միայն լուծույթով ստուգելիս կարող է պարզվել, որ ոսկի չէ, իսկ անզեն աչքով չես կարող տարբերել ոսկուց։ Իրենից պահանջվել է մոտ 10 օր ժամանակ որպեսզի կարողանա այդ քանակության զարդեր պատրաստի, քանի որ դրանց դետալները տարբեր մետաղներից է պատրաստվել, այսինքն ամբողջական մեկ մետաղից չի եղել, որ միանգամից պատրաստվեր, ուստի և տարբեր մետաղները իրար միացնելը բարդ պրոցես է։
Մոտ մեկ շաբաթ անց Համլետը եկել և ասել է, որ գումար է պարտք, ուստի առաջարկել է ինչքան որ պատրաստել է, դրանք տա տանի որպեսզի ինչ որ տեղ գրավադնի և գումար վերցնի։ Ապրանքները կիսաֆաբրիկատ վիճակում վերցրել և տարել է։ Գնալուց հետո, մոտ 40 րոպե անց Համլետը զանգահարել է իրեն և խնդրել է շտապ գնալ ՙՍեֆ ինտերնեյշնլ՚ բանկ։ Բանկի մոտ Համլետը դիմավորել է իրեն և ասել է, որ բանկի ոսկերիչ Սամվելը իր հետ ցանկանում է խոսել զարդերի հետ կապված, բացի այդ ասել է, որ ինքը արդեն խոսել է Սամվելի հետ և վերջինս համաձայնվել է իրեն օգնել։ Ասել է, որ այդ զարդերը ցանկանում է գրավադնել բանկում և գումար վերցնել, սակայն քանի որ զարդերի քանակությունը շատ է մեկ անձի անունով հնարավոր չէ գրավադնել, բացի այդ մեկ անձին առավելագույնը 1.500.000 դրամի վարկ են տալիս, և իր անունով էլ արդեն մեկ վարկ կա ձևակերպած, իսկ Արմեն Գրիգորյանը ապառիկով մեքենա է վերցրել, ուստի իրեն խնդրեցին իր անձնագրով այդ զարդերը գրավադնել բանկում և գումար վերցնել։ Ինքը նրանց պատասխանել է, որ կհամաձայնվի միայն Սամվելի հետ խոսելուց հետո։ Նրանք իրեն խնդրեցին ևս մեկ անձի էլ կանչի որպեսզի նրա անձնագրով էլ գրավադնեն, սակայն ինքը պատասխանել է, որ չի կարող։ Համլետը առաջարկել է իր աշխատողներից մեկի անունով ևս ձևակերպվի վարկ, սակայն պատասխանել է, որ անձամբ ինքը նրանցից ոչ մեկին չի ասի, բացի այդ իրենք էլ են նրանց ճանաչում և շփվում են նրանց հետ, ուստի եթե ցանկանում են, կարող են իրենք նրանց ասել։ Դրանից հետո, միասին գնացել են իր աշխատավայր, որտեղ նրանք Արթուրին առաջարկել են իր անձնագրով այդ զարդերը գրավադնել բանկում։ Արթուրը նայել է իրեն և զարմացել է, թե ոնց կարա բանկը այդ զարդերը գրավ վերցնի և գումար տա։ Ինքը պատասխանել է Արթուրին, որ բանկի աշխատողը նրանց ծանոթն է, ուստի աջակցում է նրանց։ Արթուրը համաձայնվել է և միասին եկել են բանկ։ Բանկում ինքը խոսել է ոսկերիչ Սամվելի հետ։ Վերջինս իրեն ասել է, որ 3 օրվա ընթացքում այդ վարկը կվերաձևակերպեն Համլետի և Արթուրի անունով։ Այդ պայմանով ինքը համաձայնվել է աջակցել նրանց, որից հետո ձևակերպել են վարկը, գումարը ստացել են ինքը և Արթուրը և անմիջապես տվել են Համլետին։ Դրանից հետո, ինքը գնացել է Արարատ։ Արարատից զանգահարել է իր արտադրամաս և տեղեկացել է, որ իր բացակայության ընթացքում Համլետը գնացել է արտադրամաս և իր աշխատողներից 2 աղջկա ասել է, որ Վաղարշակը տեղյակ է, ուստի խնդրել է իրենց անձնագրերով գնալ բանկ որպեսզի նրանց անուններով վարկ ձևակերպվի։ Աղջիկներից մեկի աձնագիրը մոտը չի եղել, Նարինեինը, որը ներկայումս իր կինն է, / այդ ժամանակ իրենք ամուսնացած չեն եղել/ անձնագիրը մոտն է եղել, ուստի Նարինեն ասել է, քանի որ Վաղարշակը տեղյակ է, խնդիր չկա կարող են գնալ։ Ինքը զանգել է Նարինեին, վերջինս ասել է, որ արդեն բանկից դուրս են եկել և վարկը ձևակերպել են։Շտապ եկել է Երևան և հանդիպել է Նարինեին։ Վերջինս իրեն ասել է, որ կարող է տեղյակ չէ այդ ամենից, սակայն պատասխանել է, որ տեղյակ է, անհանգստանալու կարիք չկա, որպեսզի Նարինեն չընկնի մտածմունքի մեջ։ Դրանից հետո, զանգել է Համլետին, վերջինս արդարացել է, որ անհանգստանալու կարիք չկա, Նարինեն իրենց քույրն է, հետևաբար նրան վատություն չի կարող անել, պարզապես այդ պահին համար մարդ չի եղել, ուստի նրա անունով են ձևակերպել։ Հետագայում Սամվելը իրենից պահանջել է մարել վարկի գումարը։ Ինքը նրան ասել է, որ Համլետի հետ լուծի խնդիրները, սակայն Սամվելը իրեն պատասխանել է, որ իր անունով է ձևակերպած վարկը, ուստի ինքն էլ պիտի մարի այն։ 3 օր անց Համլետի և Արմենի հետ գնացել են բանկ որպեսզի վարկը վերաձևակերպվի նրանց անունով, սակայն Սամվելը պատասխանել է, որ պետք է վարկի գումարը ամբողջությամբ մարվի, որից հետո նոր կարող են վարկը վերաձևակերպել նրանց անուններով։ Ինքը պատասխանել է, որ գումար չունի։ Սամվելը ասել է, որ գոնե պիտի տոկոսները փակվի, այլապես խնդիրներ կառաջանան։ Այդ պահին Արմենը իր մոտից հանել է դուխու տուփի մեջ լցրած սպիտակ ոսկուց զարդեր` շղթաներ, մատանիներ և այլ զարդեր, և առաջարկել է Սամվելին, որ եթե դրանք գրավադնեն բանկում և ստացած գումարից փակեն տոկոսները, ինչքան ժամանակ կարող է համբերել, վերջինս պատասխանել է, որ քանի ամսվա, որ փակեն, այնքան էլ կսպասի։ Այդ ժամանակ իր հետ եղել է նաև իրենց թաղամասի բնակիչ Պողոսը, ուստի այդ ոսկյա զարդերը ձևակերպել են նրա անունով։ Ինքը համաձայնվել է որպեսզի Պողոսի անունով ձևակերպվի վարկը, քանի որ Արմենի կողմից գրավադրվող ոսկյա զարդերը իր պատրաստածներից չէր, հետևաբար այն պետք է ոսկի լիներ։ Դրանից հետո, ձևակերպել են վարկը և ստացած գումարը Պողոսը տվել է Համլետին և Արմենին, սակայն վերջիններս չեն մարել ՙՍեֆ ինտերնեյշնլ՚ բանկի տոկոսները, այդ մասին ինքը իմացել է Սամվելից: Դրանից հետո վերջինս զանգահարել է իրեն և ասել, որ կրկին խաբել ենք նրան և տոկոսները չենք մարել։ Քանի որ Պողոսի անունով ձևակերպած վարկի համար գրավադրված ոսկյա զարդերը իրականում ոսկուց են եղել, ուստի այդ վարկի գումարը հետագայում տեղյակ չէ թե ով, սակայն մարել և ոսկյա զարդերը հանել է։ Հետագայում ինքը տեղեկացել է, որ Համլետը իրեն խաբել է, թե իբր իր անունով արդեն վարկ կա ձևակերպած, ուստի չի կարող իր անունով նորից ձևակերպի, ինքը Սամվելից տեղեկացել է, որ Համլետի անունով ընդհամենը 200.000 ՀՀ դրամի վարկ է ձևակերպած եղել ՙՍեֆ ինտերնեյշնլ՚ բանկում, ուստի դեռ 1.300.000 ՀՀ դրամի կարող էր ձևակերպել։ Դրանից հետո, ինքը գնացել և տեսել է Համլետին և Արմենին որպեսզի նրանցից պարզի, թե այդքան գումարները ինչ են արել։Նրանք իրեն ասել են, որ խնդիրներ ունեն, որ հանգիստ լինի մոտ ժամանակում ամեն բան իր տեղը կընկնի։
Մի 2 օր անց Համլետը եկել է իր մոտ և ասել, որ նեղ վիճակում է, այս պահին Սամվելի հետ խնդիրներ չկան, ուստի խնդրել է մի փոքր համբերել, վարկի գումարը կփակեն։ Համլետը իրենց տանը բոլորի ներկայությամբ վստահեցրել է իրեն, որ մոտ 10 օրվա ընթացքում քավորը ամերիկայից 100.000 դոլար է ուղարկելու որպեսզի դնեն գործի մեջ, ինքը այդ գումարից բոլոր պարտքերը կմարի։ Իսկ մինչ այդ գումարի ուղարկելը, ասել է, որ մեկ այլ բանկում Արտակ անունով ոսկերիչ ծանոթ ունի, որը իր մանկության ընկերն է, ուստի խնդրել է այդ նույն զարդերից պատրաստի, դրանք կգրավադնեն նրանց բանկում և ստացած վարկի գումարը կբերեն և ՙՍեֆ ինտերնեյշնլ՚ բանկում իրենց անուններով ձևակերպած վարկի գումարը կփակեն։Հավատալով նրան, և որ մի օր շուտ ցանկացել է ազատվել այդ վարկերից, համաձայնվել է կրկին պատրաստել այդ զարդերից։ Այդ անգամ ինքն ու իր աներորդի` Աշոտը Համլետի հետ միասին գնացել են ՙՎՏԲ-Հայաստան բանկ՚-ի Էրեբունու փողոցի վրա գտնվող 6-րդ մասնաճյուղ և հանդիպել են Արտակի հետ, որին նախկինում չի ճանաչել։ Այդ ժամանակ Համլետը իրեն ասել է, որ խոսել է Արտակի հետ, վերջինս տեղյակ է այդ զարդերի որակի մասին և համաձայնվել է օգնել իրենց, ուստի միասին գնացել են բանկ և ձևակերպել են վարկը։ Արտակը այդ զարդերը ստուգելիս բնական է, որ լուծույթը քսել է զարդի ոսկուց պատրաստած դետալին, համոզված լինելով, որ ցույց կտա, որ 583 հարգի ոսկի է, սակայն եթե լուծույթը քսեր զարդի մյուս դետալներին, որոնք ոսկի չէին, կերևար, որ դրանք ուրիշ մետաղներից են պատրաստված։Պարզ է, որ Արտակը նույնպես տեղյակ է եղել Համլետից, թե ինչ տեսակի զարդեր են և լուծույթը քսել է զարդի այն մասին դետալին, որը ոսկուց է։Լուծույթը որտեղ պետք է այնտեղ է քսել, դա արել է զուտ ձևական նկատառումներից ելնելով, որպեսզի բանկի կառավարիչը և մյուս աշխատողները չկասկածեն, որ դրանք լիարժեք ոսկուց չեն։ Արտակի մոտ վարկը ձևակերպել են իր և Աշոտի անունով։Վարկի գումարը վերցրել են, որից հետո Համլետին ասել է, որ տանեն Սամվելի մոտի վարկի գումարը փակեն, սակայն Համլետը իրեն ասել է այդ գումարը տանի Սիմոնի պարտքը տա, որպեսզի և նրա պարտքի ժամկետը կերկարի և նրանից նորից կկարողանա ոսկի վերցնել, այն կտանեն շուկայում կվաճառեն, որից ստացած գումարը ՙՍեֆ ինտերնեյշնլ՚ բանկի իրենց անունով ձևակերպած վարկը կմարեն, իսկ դրանից հետո ինքն ու Արտակը կլուծեն իրենց խնդիրները, ինքը այլևս գործ չի ունենա։ Ինքը համաձայնվել է և միասին գնացել են Սիմոնի մոտ։Համլետը մտել է Սիմոնի մոտ, նրան է տվել պարտքի գումարը, որից հետո դուրս է եկել և ասել, որ Սիմոնի մոտ ոսկի չկար, որ վերցնի։ Այդ ժամանակ ինքը հասկացել է, որ Համլետը և Արտակը կեղծ խաղեր են խաղում, որը իրեն դուր չի գալիս։
Արտակի մոտ վարկը ձևակերպելուց հետո, Համլետը զանգահարել է իրեն և ասել է, որ Արտակը իմացել է, որ դրանք ոսկի չեն, ուստի ցանկանում է քեզ տեսնի։ Ինքը Համլետին ասել է, որ ասել ես, որ Արտակը տեղյակ է զարդերի մասին։ Համլետը իրեն պատասխանել է, որ Արտակին ասել է, որ ցածր հարգի ոսկի է, բայց չի ասել, որ լրիվ ուրիշ մետաղներից է պատրաստված այդ զարդերը։ Ինքը շտապ գնացել է նրանց մոտ, Արտակը իրեն ասել է, որ այդ զարդերը տարել շուկայում ստուգել և պարզել է, որ դրանք ոսկի չեն, ուստի պիտի հետ վերցնեք։ Այդ խոսակցության ժամանակ իրենք եղել են չորս հոգով` ինքը, Համլետ Ավագյանը, Արտակ Համբարձումյանը և Արմեն Գրիգորյանը։ Ինքը Արտակին ասել է, որ այդ զարդերի վրա 10 տոկոսն է ոսկի, մնացածը պալադիում, պղինձ, լատուն մետաղներից է։ Այդ ժամանակ Համլետը ասել է, որ կհանեն զարդերը։ Մի 2 օր անց զանգահարել են իրեն և կանչել են Արտակենց բակ։ Ինքը գնացել է նրանց բակ և տեսել է, որ Արտակը Համլետի հետ բակում գարեջուր են խմում։ Այդ ժամանակ Արտակը իրեն ասել է, որ խնդիր չունես, այդ զարդերից կրկին պատրաստի, բացի այդ նրանք իրեն ասել են, որ եթե իրենց հետ չհամագործակցի, ապա իրեն չեն օգնի իր անունով ձևակերպած վարկերը մարելու հարցում։ Ինքը նրանց ասել է, որ ՙբա էն օրը խնդիր կար, հիմա էլ չկա՚, Արտակը պատասխանել է, որ ինքը էտ բանկի և կառավարիչն է, և ոսկերիչը, և ասողը, և փող տվողը։ Քանի որ ինքը արդեն կախվածության մեջ էր ընկել նրանցից, և ցանկանում էր փակել իր անունով ձևակերպած վարկերը, համաձայնվեց կրկին պատրաստել նմանատիպ զարդեր։ Ինքը այդ ժամանակ ծրագրել է իր արհեստանոցում նոր գործ սկսել, որը հետաքրքրել է Համլետին և Արտակին, ուստի նրանք իրեն առաջարկել են նմանատիպ զարդեր պատրաստի, դրանք կգրավադնեն, որից ստացած վարկի գումարներից իր անունով վարկերը կփակեն և իրեն էլ գումար կտան որպեսզի իր գործը սկսի։ Քանի որ Արտակը վստահեցրել է, որ խնդիրներ չեն առաջանա, ինքը համաձայնվել է կրկին նմանատիպ զարդեր պատրաստել և օգնել է նրանց և իր ընկերների և ծանոթների անուններով ևս ձևակերպել են վարկեր, քանի որ Արտակը վստահեցրել է, որ ինքը այդ ամենը կլուծի։ Դրանից հետո ինքը Արտակին չի տեսել։ Համլետը իրեն 1կգ ոսկի է տվել, պատվիրել է զարդերը, ինքը պատրաստել է, իսկ Համլետը դրանք տարել է։ բացի իր և իր աներորդի` Աշոտի անուններից, ՙՎՏԲ-Հայաստան բանկ՚-ում վարկեր են ձևակերպել նաև իր հոր, քրոջ, Նարինե Հակոբյանի և իր ընկերներ` Լևոնի և Նաիրիի անուններով։ Այդ մյուս վարկերը ձևակերպելուց ինքը բանկ չի մտել և Արտակին չի տեսել, ինքը միայն իր հարազատներին և ընկերներին է բերել բանկ, սակայն բանկ չի մտել, քանի որ վստահ է եղել, որ խնդիրներ չեն առաջանա, որովհետև Արտակը վստահեցրել է դրա մասին։
Ինքը ոսկերիչներին չի խաբել և ոսկի չի կեղծել, քանի որ եթե ցանկանար նման բան անել, այդ զարդերը այլ մետաղներից կպատրաստեր և կպատեր ոսկով և նույնիսկ ստուգելիս չէին կարող պարզել, որ դրանց մեջ ոսկի չէ, ուստի դա կլիներ խաբել։ Սակայն ոսկերիչները հստակ իմացել են, թե զարդերի որ մասն է եղել ոսկուց և որ մասը այլ մետաղներից։ Արտակի տված երաշխիքը իր համար հիմք է եղել, քանի որ վերջինս բանկի աշխատող էր և գիտեր, թե ինչ զարդեր է վերցնում, հետևաբար վստահ էր, որ իր ծանոթները խնդիրներ չէին ունենա։Ինքը իր հարազատների և ընկերների անուններով համաձայնվել է վարկեր ձևակերպել, որովհետև Համլետը և Արտակը իրեն խոստացել են այդ գումարներից իր անունով ձևակերպած վարկերը փակել։ Քանի որ ինքը այլ տարբերակ չի ունեցել, որովհետև այլ տեղից չէր կարող գումար ճարել և վարկերը փակել, համաձայնվել է նրանց առաջարկած պայմաններին։Բացի այդ, Արտակը ևս իր հարազատների և ծանոթների անուններով վարկեր է ձևակերպել, ուստի ինքը ավելի հանգիստ է եղել, որ խնդիրներ չեն առաջանա, այսինքն Արտակը ցանկացած խնդիր կլուծի։Ինքը ոչ մեկին չէր խաբում, Արտակը ամեն ինչից տեղյակ էր և ցանկանում էր նման զարդեր գրավ վերցնել։ Իր կողմից խարդախություն չկա, որովհետև ինքը բացահայտ ասել է, որ զարդերը ոսկուց չեն, նրանք վերցրել են, և ավելին վարկի գումարները ինքը չի տնօրինել։ Այդ զարդերը կեղծ չեն եղել, քանի որ եթե կեղծ լիներ, դրանց մեջ այլ մետաղներ կլիներ` վրան ոսկով պատած, հակառակ դեպքում, եթե հստակ երևում է, որ զարդը ինչ մետաղից է պատրաստած, էլ դրա կեղծ լինելը որն է։ Եվ հետո կեղծ ոսկին էլ է իր վրա պռոբ ունենում խփած, որը այդ զարդերի վրա չի եղել։ Իր սարքածը կեղծ ոսկի չէ` այն զարդեղեն է, բիժուտերիա կամ պարզապես ձուլակտոր։
Դրանից մի քանի օր հետո, իրեն լավ չի զգացել, անընդհատ տաքություն է ունեցել։ Արմենը ասել է, որ ծանոթ բժիշկ ունի, ուստի Համլետի հետ միասին մեքենայով իրեն տարել են բժշկի մոտ։ Ճանապարհին Համլետի ձեռքի հեռախոսին զանգ է եկել։ Պատասխանելուց հետո, Համլետը իրենց ասել է, որ գլխամասից եկել և բանկում ստուգումներ են անցկացրել և պարզել են, որ զարդերը ոսկուց չեն։ Իրենք անմիջապես գնացել են Արտակի մոտ։ Համլետը իրեն ներկայացրել է նրանց, որ ինքն է այդ զարդերը պատրաստել և կապացուցի, որ դրանք ոսկուց են, իսկ նրանք պատասխանել են, որ իրենց չի հետաքրքում ոչ իր պատրաստած զարդերը, և ոչ էլ ապացուցելը, քանի որ իրենց մասնագետները արդեն պարզել են, որ դրանք ոսկի չեն։ Այդ ժամանակ ինքը նրանցից հետաքրքրվել է, թե հետագան ինչպես է լինելու, նրանք պատասխանել են, որ եթե վարկերը մարեն, ոչինչ չի լինի, եթե ոչ, ապա կենթարկվեն պատասխանատվության։ Այդ ժամանակ ինքը խոսել է Արտակի հետ, վերջինս իրեն ասել է, որ արդեն ընկել են պատմության մեջ, ուստի պիտի մի բան անեն որպեսզի փակեն վարկերը, այլապես բոլորն էլ կտուժեն։ Դրանից հետո, ինքը, Համլետը, Արտակը, նրա եղբայր Արմեն Համբարձումյանը և Համլետի ընկեր Արմեն Գրիգորյանը միասին հավաքվել են որպեսզի տեսնեն, թե ինչ են անելու։ Որոշել են, որ տները գրավ դնեն, որ կարողանան վարկերը մարել, սակայն բանկը մերժել է։ Բանկը իրենց մեկ ամիս ժամանակ է տվել որպեսզի կարողանան փակել վարկերը։ Հաջորդ օրը զանգահարել են իրեն և ասել են, որ խոսացել են բանկի ղեկավարության հետ և վերջիններս համաձայնվել են գրավի առարկաները տալ իրենց, իրենք դրանք տանեն այլ բանկերում գրավադնեն և գումարները բերեն ՙՎՏԲ-Հայաստան՚ բանկի վարկերը մարեն։ Իրենք վերցրել են ապրանքները, քանի որ ցանկանում էին ժամանակ շահել, որպեսզի տեսնեն, թե ոնց են փակելու վարկերը։ Գրավի առարկաները վերցրել է Արտակը և բերել տվել է իրեն։ Ինքը դրանք տարել և այլ բանկերում գրավադրել է, որից ստացված գումարները տվել է Արմենին, որն դրանք տարել և ՙՎՏԲ-Հայաստան՚ բանկում իր և իր կողմից ներգրավված անձանց անուններով ձևակերպած վարկի գումարներն է փակել։ Այդ ապրանքները գրավադրել են ՙԱնելիք՚ բանկում, ՙԱրարատ՚ բանկում։ Գրավադնելու հաջորդ օրը Համլետը և Արտակը եկել են իր հետևից և ասել են, որ ՙԱրարատ՚ բանկից իրեն կանչում են։ Ինքը նրանց հետ գնացել է ՙԱրարատ՚ բանկ։ Դա երեկոյան ժամը 21.00-ի սահմաններում է եղել։ Բանկում միայն իրեն բարձրացրել են վերև։ Բանկի կառավարիչի սենյակում` սեղանի վրա լցրած էին իրենց կողմից գրավադրած զարդերը։ Իրեն հարցրին, թե բանկի ոսկերիչը ինչպես է այդ զարդերը որպես գրավ վերցրել, ինքն էլ պատասխանել է նրանց, որ այդ հարցը նրան տվեք։ Իրենից պահանջել են շտապ փակել վարկի գումարը և հետ ստանալ զարդերը։ ՙԱրարատ՚ և ՙԱնելիք՚ բանկերի վարկերը մարել են Արմենը և Համլետը։Դրանից հետո ինքը գնացել է Մոսկվա, որի մասին տեղյակ են եղել և Համլետը և Արտակը և մյուս տղաները։
Արտակի եղբայր Արմեն Համբարձումյանը ևս շահագրգռված է եղել, որ իր եղբայրը խնդիրներ չունենա։ Արմեն Համբարձումյանն ու Համլետ Ավագյանն են ամեն անգամ բանկերի ոսկերիչների հետ պայմանավորվել, որ այդ զարդերը գրավ վերցնեն, հակառակ դեպքում նրանք չէին վերցնի։ Ամեն անգամ գրավադնելիս ինքը նրանց տեղյակ է պահել, որ դրանք ոսկի չեն, այլ այս-այս մետաղներից են, սակայն նրանք իրենց անձնական շահերից ելնելով, քանի որ վարկի ստացված գումարներից Արմենն ու Համլետը նրանց գումարներ են տվել, որի դիմաց նրանք համաձայնվել են որպես գրավ ընդունել այդ զարդերը։ Իր և իր կողմից ներգրավված անձանց անուններով ձևակերպած վարկերը փակելուց հետո, ինքը այլևս չի ցանկացել խառնվել դրանց մեջ, սակայն Արմեն Համբարձումյանը մի անգամ էլ է զանգահարել իրեն և խնդրել է վերջին անգամ գնալ և զարդերը գրավադնել իր կնոջ բանկում։ Ինքը համաձայնվել է, որ դա կլինի վերջին անգամ։ Արմենը կնոջը զգուշացրել է, ինքը այդ զարդերը տարել և տվել է կնոջը, նա վերցրել է դրանք և ձևակերպել է վարկը, որից հետո ինքը այլևս չի խառնվել դրանց մեջ։ Ինքը ինչքան կարողացել է վարկերից մարումներ է կատարել: ՙՎՏԲ-Հայաստան՚ բանկի 6-րդ մասնաճյուղի վարկերը ինքն է մարել` այդ բանկի զարդերը այլ բանկերում գրավադնելով։
Ապացուցման ենթակա հանգամանքների և քրեադատավարական ապացուցման տարրեր հանդիսացող ապացույցների ստուգման և գնահատման` ՀՀ քրեադատավարական օրենսդրության վերը նշված հիմնարար իրավադրույթների համատեքստում քննության առնելով քրեական գործով ձեռք բերված ապացույցների համակցությունը, ՀՀ Վերաքննիչ քրեական դատարանը գտնում է, որ ամբաստանյալի պատճառաբանություններն անհիմն է, նպատակ է հետապնդում ազատվել քրեական պատասխանատվությունից և պատժից, Վաղարշակ Խուրշուդյանի կողմից ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցանք կատարելը և նրա մեղքը հաստատված, իսկ պատճառաբանությունները հերքված են քրեական գործով պատշաճ իրավական ընթացակարգի շրջանակներում ձեռք բերված և ընդհանուր իրավասության դատարանում հետազոտված հետևյալ ապացույցներով.
Տուժող` ՙՎՏԲ-Հայաստան բանկ՚ ՓԲԸ ներկայացուցիչ Կամո Պետրոսյանի ցուցմունքով այն մասին, որ 2007թ. ապրիլ-մայիս ամիսների ընթացքում Վաղարշակ Խուրշուդյանը` իր կողմից պատրաստված ցածր հարգի ոսկիները իր և այլ անձանց անուններով գրավադրել է ՙՎՏԲ-Հայաստան բանկ՚ ՓԲԸ-ի 6-րդ մասնաճյուղում և ստացել է 34.000.000 ՀՀ դրամ գումարի չափով վարկ։ Հետագայում պարզվել է, որ գրավադրված ոսկիները ավելի ցածր հարգի են եղել, քան դրանք գնահատվել են։ Ընթացքում վարկի գումարի մի մասը վերականգնվել է և մնացել է 20.793.000 ՀՀ դրամ։ 03.05.2010թ. դրությամբ բանկին պատճառվել է 46.850.851.7 ՀՀ դրամի վնաս, որից 20.793.000 ՀՀ դրամը վարկի մնացորդն է, իսկ 26.057.851.7 ՀՀ դրամը` հաշվարկված տոկոսները։
Վաղարշակ Խուրշուդյանը նույն եղանակով իր և իր աներորդու` Աշոտ Հակոբյանի անուններով, ՙՎՏԲ-Հայաստան բանկ՚ ՓԲԸ-ի ՙՇահումյան՚ մասնաճյուղից ևս ստացել է 5.818.000 ՀՀ դրամ գումարի չափով վարկ, սակայն հետագայում ՙՇահումյան՚ մասնաճյուղում ձևակերպված նշված վարկի գումարը մարվել է և գրավի առարկաները հետ են վերադարձվել։
Տուժող` ՙՍեֆ Ինտերնեյշնլ՚ Ունիվերսալ Վարկային Կազմակերություն ՍՊԸ ներկայացուցիչ Վարդուհի Գրիգորյանի ցուցմունքով այն մասին, որ 2007թ. մարտ-ապրիլ ամիսների ընթացքում Վաղարշակ Խուրշուդյանը` իր կողմից պատրաստված ցածր հարգի ոսկիները իր և Նարինե Հակոբյանի անուններով գրավադրել է ՙՍեֆ Ինտերնեյշնլ՚ Ունիվերսալ Վարկային Կազմակերություն ՍՊԸ-ում, և չարաշահելով իրենց ընկերության ոսկերիչ-մասնագետ Սամվել Ավետիսյանի և մյուս պատասխանատու աշխատակիցների վստահությունը, ստացել է 3.960.000 ՀՀ դրամ գումարի չափով վարկ։ Հետագայում պարզվել է, որ գրավադրված ոսկիները ավելի ցածր հարգի են եղել, քան դրանք գնահատվել են։Վարկային պարտավորությունները ոչ պատշաճ կատարելու հետևանքով, նրանց պարտքը կազմում է 6.062.207 ՀՀ դրամ, որից 3.960.000 ՀՀ դրամը վարկի մնացորդն է, իսկ 2.102.207 ՀՀ դրամը` հաշվարկված տոկոսները։ Նշված գումարները բռնագանձելու պահանջով իրենք դիմել են Արարատի մարզի առաջին ատյանի դատարան, որի 07.12.2007թ. վճռով իրենց հայցը բավարարվել է։
Տուժող` ՙԱրդշինինվեստբանկ՚ ՓԲԸ ներկայացուցիչ Տիգրան Խաչատրյանի ցուցմունքով այն մասին, որ 2007թ. հուլիսի 16-ին Վաղարշակ Խուրշուդյանը` իր կողմից պատրաստված ցածր հարգի ոսկիները գրավադրել է ՙԱրդշինինվեստբանկ՚ ՓԲԸ ՙԳործարանային՚ մասնաճյուղում, և չարաշահելով նշված մասնաճյուղի ոսկերիչ-մասնագետ Հակոբ Շիլաջյանի և մյուս պատասխանատու աշխատակիցների վստահությունը, ստացել է 941.000 ՀՀ դրամ գումարի չափով վարկ։ ՙԳործարանային՚ մասնաճյուղում ձևակերպված նշված վարկի գումարը 03.08.2007թ. մարվել է և գրավի առարկա զարդերը հետ են վերադարձվել։
Վկա` Լիլիթ Դարբինյանի ցուցմունքով այն մասին, որ հանդիսացել է ՙՎՏԲ-Հայաստան բանկ՚ ՓԲԸ-ի 6-րդ մասնաճյուղի կառավարիչը։ 2006թ. փետրվար ամսից ՙՎՏԲ-Հայաստան բանկ՚ ՓԲԸ-ի 6-րդ մասնաճյուղում որպես ոսկերիչ է նշանակվել Արտակ Համբարձումյանը։ Նրա պարտականությունների մեջ մտել է կշռել որպես գրավ ներկայացվող ոսկյա զարդերը, որոշել հարգը, հաշվել քանակը և կազմել գրավի գնահատման ակտը։Մասնաճյուղի կողմից ոսկու գրավի դիմաց մեկ անձի անունով տրամադրվող վարկի առավելագույն սահմանաչափը 2007թ. եղել է 1.500.000 ՀՀ դրամ։Վարկառուն բանկ է ներկայացել անձնագրով և ոսկու գրավով։ Ոսկու գնահատման ակտը ստորագրել է ինքը, ոսկերչն ու հաճախորդը։
Քանի որ ՙՎՏԲ-Հայաստան բանկ՚ ՓԲԸ-ն ոսկու գրավի դիմաց վարկեր է տրամադրել, ուստի Վաղարշակ Խուրշուդյանը և Համլետ Ավագյանը ոսկու գրավով եկել են 6-րդ մասնաճյուղ գրավի դիմաց վարկեր ստանալու։ Դա եղել է 2007թ. մայիս ամսին և ինքը առաջին անգամ նրանց հանդիպել է մասնաճյուղում, որից հետո տեղեկացել է, որ ոսկերիչ Արտակ Համբարձումյանը և Համլետ Ավագյանը համադասարանցիներ են եղել։ Արտակ Համբարձումյանը նրանց ներկայությամբ ստուգել է գրավադրվող ոսկյա զարդերը, և հավաստիացնելով, որ դրանք պահանջվող հարգի ոսկյա իրեր են, ձևակերպել են վարկերը։ Քանի որ Վաղարշակի և Համլետի կողմից ներկայացրած ոսկյա զարդերը քանակով շատ են եղել, ուստի վերջիններս որպես գրավատու-վարկառու ներկայացրել են նաև իրենց հարազատներին և ընկերներին։ Նրանց միջոցով քանակությունը չկարողանալով ապահովել, Արտակ Համբարձումյանը ընկերոջը օգնելու նպատակով բանկ է հրավիրել նաև իր եղբորն ու հարսին և վարկերը ձևակերպել է նաև նրանց և բանկի ոստիկանի անուններով։Իր մոտ այդ փաստը որևէ կասկած չի հարուցել, քանի որ յուրաքանչյուր ոսկյա զարդը ստուգելուց հետո ոսկերիչ Արտակ Համբարձումյանը իրեն հավաստիացրել է, որ այն 583 հարգի է, բացի այդ Համլետը նրա ընկերն է։ Վարկերը ձևակերպելու ժամանակ Համլետը ասել է, որ զբաղվում է ոսկու առք ու վաճառքով, իսկ Վաղարշակը` Մալաթիա շուկայում ոսկու արհեստանոց ունի, ուստի այդ ամենը իր համոզմունքը ավելի է խորացրել, որ վարկը ապահովված է։ Իսկ ինչ վերաբերվում է ոսկյա զարդերի քանակին, այդ փաստը իրեն ավելի է ուրախացրել, քանի որ բանկի վարչությունը քաջալերել է վարկային պորտֆելի մեծացմանը։
Ինքը որպես կառավարիչ անպայման տեսել է գրավի առարկան, որից հետո միայն ստորագրել է գրավի գնահատման ակտը և մյուս փաստաթղթերը։ Վարկառուներին ներկայացրել են Համլետ Ավագյանը և Վաղարշակ Խուրշուդյանը։ Դրանք եղել են նրանց հարազատները` հայրը, քույրը, համաքաղաքացիներ, ընկերներ։ Գրավառուները անպայման ներկա են եղել վարկի ձևակերպման ժամանակ, սակայն պատահել է, որ գումարը հանձնելու ժամանակ նրանք չեն սպասել և գնացել են։ Բոլոր դեպքերում գրավի առարկան ներկայացրել են Համլետը և Վաղարշակը, հետևաբար գրավատու-վարկառուները գիտակցել են, որ վարկը ձևակերպում են նրանց համար, ուստի գումարները վերցրել են Համլետը և Վաղարշակը։Եթե ինչ-որ բան այնպես չլիներ, ապա Արտակը իր եղբորը և հարսին այդ գործի մեջ չէր ներքաշի։
Վկա` Արտակ Համբարձումյանի ցուցմունքով այն մասին, որ 2006թ. փետրվար ամսին տեղեկանալով, որ ՙՎՏԲ-Հայաստան բանկ՚ ՓԲԸ-ի 6-րդ մասնաճյուղում ոսկերիչի հաստիքի թափուր տեղ կա, Էրեբունի մասնաճյուղի ոսկերիչի մոտ փորձշրջան է անցել և 2006թ. փետրվարի 27-ին աշխատանքի է նշանակվել 6-րդ մասնաճյուղում որպես ոսկերիչ-փորձագետ։ Իր պարտականությունների մեջ մտել է կշռել որպես գրավ ներկայացվող ոսկյա զարդերը, որոշել հարգը, հաշվել քանակը և կազմել գրավի գնահատման ակտը։
27.04.2007թ. Վաղարշակ Խուրշուդյանը և Աշոտ Հակոբյանը ոսկու գրավով եկել են 6-րդ մասնաճյուղ գրավի դիմաց վարկեր ստանալու։ Ինքը առաջին անգամ նրանց հանդիպել է մասնաճյուղում։ Ստուգելով ներկայացված ոսկյա զարդերը և համոզվելով, որ դրանք 583 հարգի են, դրանք ընդունել է որպես գրավ, որից հետո յուրաքանչյուրն իր անունով ձևակերպված պայմանագրերով ստացել է 1.500.000 դրամ վարկ։ Հաջորդ անգամ Վաղարշակ Խուրշուդյանը բանկ է եկել իր դպրոցական ընկեր` Համլետ Ավագյանի հետ։ Վերջինս իրեն հայտնել է, որ Վաղարշակը ՙԱնուշ՚ ոսկու շուկայում արհեստանոց ունի և ցանկանում է ոսկյա զարդերի գրավադրմամբ վարկ վերցնել։Ինքը պատասխանել է, որ խնդիր չկա, եթե ոսկյա զարդերը 583 հարգի են, ապա կարող են ստանալ։Գրավի առարկաները ներկայացրել են Վաղարշակը, Համլետը կամ Աշոտը։ Քանի որ, մեկ անձի անունով կարող է ձևակերպվել միայն մեկ վարկ, ուստի Վաղարշակն ու Համլետը վարկերը ձևակերպել են նաև իրենց հարազատների անուններով։ Նրանց խնդրանքով ինքը որպես գրավառու-վարկառու է ձևակերպել նաև իր հարազատ եղբորն ու հարսին, ինչպես նաև մասնաճյուղի հերթապահ ոստիկանին։Յուրաքանչյուր անգամ ստուգել է գրավադրվող ոսկյա զարդերը, և համոզվելով, որ դրանք 583 հարգի ոսկյա իրեր են, ձևակերպել են վարկերը։ Եթե իր մոտ կասկած հարուցեր այն փաստը, որ ներկայացվող ոսկյա զարդերը ցածր հարգի են, դրանք գրավ չէր ընդունի, քանի որ հանդիսացել է նյութական պատասխանատու անձ և հակառակ դեպքում ինքը պետք է մարեր վարկերը, բացի այդ դրա մեջ չէր ներքաշի նաև իր հարազատներին։
Հետագայում տղեկացել է, որ Վաղարշակ Խուրշուդյանի կողմից ներկայացրած և իր կողմից որպես գրավ ընդունած ոսկյա զարդերը եղել են ցածր հարգի։ Դրանք ինքը ստուգել է միայն 583 հարգի լուծույթով, որը ցույց չի տվել դրանց ցածր հարգի լինելը։ Անհրաժեշտ է եղել ստուգել նաև այլ մեթոդներով, որին ինքը չի տիրապետել։
Վկա` Սամվել Ավետիսյանի ցուցմունքով այն մասին, որ 2002թ. աշխատում է ՙՍեֆ Ինտերնեյշնլ՚ ունիվերսալ վարկային կազմակերպություն ՍՊԸ-ում որպես ոսկերիչ-փորձագետ։Ոսկյա իրերի գրավադրմամբ վարկեր ձևակերպելու ժամանակ, գրավի առարկա իրերը ստուգել է ընկերության կողմից տրամադրված լուծույթներով։ Հարգ որոշումը կատարել է բանկերում ընդունված եղանակով, այն է` գրավի իրերը քսել է փորձաքարի վրա, ապա թողնված մետաղի մասնիկների վրա կաթեցրել է հարգորոշող լուծույթը։Եթե մետաղը չի գունափոխվել, ապա կնշանակի, որ այն համապատասխանել է հարգորոշող լուծույթի հարգին, եթե սևացել կամ այրել է, ուրեմն իրերի հարգը ցածր է։
29.03.2007թ. և 04.04.2007թ. ոսկու գրավադրմամբ Վաղարշակ Խուրշուդյանի և նրա կնոջ` Նարինե Հակոբյանի անուններով ձևակերպել են վարկեր։ Յուրաքանչյուր անգամ ստուգել է գրավադրվող ոսկյա զարդերը, և համոզվելով, որ դրանք 583 հարգի ոսկյա իրեր են, ձևակերպել են վարկերը։ Եթե իր մոտ կասկած հարուցեր այն փաստը, որ ներկայացվող ոսկյա զարդերը ցածր հարգի են, դրանք գրավ չէր ընդունի, քանի որ հանդիսացել է նյութական պատասխանատու անձ և հակառակ դեպքում ինքը պետք է մարեր վարկերը։ Եղել են դեպքեր, երբ ներկայացված ոսկյա զարդերը ստուգելուց հետո, պարզել է, որ դրանց հարգը փոքր ինչ ցածր է։ Այդ մասին հայտնել է բանկի ղեկավարությանը, քանի որ ի վերջո նրանք են վերջնական որոշում նման պայմաններով վարկ տրամադրել, թե ոչ և ստանալով նրանց համաձայնությունը, ձևակերպել է վարկը, սակայն ցածր գնով։
Վաղարշակ Խուրշուդյանը և Նարինե Հակոբյանը չեն կատարել վարկային պայմանագրերով ստանձնած իրենց պարտականությունները, որի պատճառով ՙՍեֆ Ինտերնեյշնլ՚ ՈւՎԿ ՍՊԸ Վաղարշակ Խուրշուդյանից և Նարինե Հակոբայնից վարկի գումարները բռնագանձելու հայցով դիմել է Արարատի մարզի առաջին ատյանի դատարան։Դատարանը հայցը բավարարել է` բռնագանձումը տարածելով նաև Վաղարշակ Խուրշուդյանի և Նարինե Հակոբյանի անուններով գրավադրված գույքի վրա։
Նշված վճռի հիման վրա տրված կատարողական թերթի կատարման շրջանակներում ՀՀ ԱՆ ԴԱՀԿ ծառայության Արարատի մարզային բաժինը նշանակել է ապրանքագիտական փորձաքննություն, որը կատարվել է ՙԱրմէքսպերտիզա՚ ՍՊԸ և Երևան քաղաքի ոսկերչական գործարան-1 ՙԳնոմոն՚ ԲԲԸ մասնագետների կողմից։ Վերջիններիս կողմից տրված եզրակացության համաձայն նշված վարկերի գրավները չեն համապատասխանել 583 հարգին։
Հետագայում տղեկացել է, որ Վաղարշակ Խուրշուդյանի կողմից ներկայացրած և իր կողմից որպես գրավ ընդունած ոսկյա զարդերը եղել են ցածր հարգի: Դրանք ինքը ստուգել է միայն 583 հարգի լուծույթով, որը ցույց չի տվել դրանց ցածր հարգի լինելը։ Անհրաժեշտ է եղել ստուգել նաև այլ մեթոդներով, որին ինքը չի տիրապետել։
Վկա` Աշոտ Ցոլակյանի ցուցմունքով այն մասին, որ 2002թ. աշխատում է ՙՀայէկոնոմբանկ՚ ՓԲԸ-ի ՙԷրեբունի՚ մասնաճյուղում որպես ոսկերիչ-փորձագետ։ Ոսկյա իրերի գրավադրմամբ վարկեր ձևակերպելու ժամանակ, գրավի առարկա իրերը ստուգել է ընկերության կողմից տրամադրված լուծույթներով։ Հարգորոշումը կատարել է բանկերում ընդունված եղանակով, այն է` գրավի իրերը քսել է փորձաքարի վրա, ապա թողնված մետաղի մասնիկների վրա կաթեցրել է հարգորոշող լուծույթը։ Եթե մետաղը չի գունափոխվել, ապա կնշանակի, որ այն համապատասխանել է հարգորոշող լուծույթի հարգին, եթե սևացել կամ այրել է, ուրեմն իրերի հարգը ցածր է։
13.07.2007թ. ՙԷրեբունի՚ մասնաճյուղ է եկել Վաղարշակ Խուրշուդյանը, հայտնել է, որ աշխատում է Մալաթիա ոսկու շուկայում որպես ոսկերիչ, ներկայացրել է իր կողմից պատրաստված ոսկյա կիսապատրաստի կուլոնները և խնդրել է դրանց գրավադրմամբ իրեն վարկ տրամադրել, քանի որ ցանկանում է շտապ հումք ձեռք բերել, սակայն այդ պահին գումար չունի։ Ինքը ստուգել է գրավադրվող կուլոնները, և համոզվելով, որ դրանք 583 հարգի ոսկյա իրեր են, ձևակերպել են վարկը, որի դիմաց տրամադրվել է 295.000 ՀՀ դրամ։Վաղարշակ Խուրշուդյանը չի կատարել վարկային պայմանագրով ստանձնած պարտավորությունները, որի պատճառով բանկի պահանջով ինքն է մարել վարկի գումարը։Եթե իր մոտ կասկած հարուցեր այն փաստը, որ ներկայացվող ոսկյա զարդերը ցածր հարգի են, դրանք գրավ չէր ընդունի, քանի որ հանդիսացել է նյութական պատասխանատու անձ և հակառակ դեպքում ինքը պետք է մարեր վարկերը։
Հետագայում տղեկացել է, որ Վաղարշակ Խուրշուդյանի կողմից ներկայացրած և իր կողմից որպես գրավ ընդունած ոսկյա զարդերը եղել են ցածր հարգի:Դրանք ինքը ստուգել է միայն 583 հարգի լուծույթով, որը ցույց չի տվել դրանց ցածր հարգի լինելը։ Անհրաժեշտ է եղել ստուգել նաև այլ մեթոդներով, որին ինքը չի տիրապետել։
Վկաներ` Ռուզաննա Մինասյանի և Արմեն Եդիգարյանի նույնաբովանդակ ցուցմունքներով այն մասին, որ աշխատում են ՙՀայէկոնոմբանկ՚ ՓԲԸ-ի ՙԷրեբունի՚ մասնաճյուղում` համապատասխանաբար որպես վարկային մասնագետ և կառավարիչ։ 13.07.2007թ. ներկա են եղել, երբ մասնաճյուղի ոսկերիչ-փորձագետ Աշոտ Ցոլակյանը ստուգել է Վաղարշակ Խուրշուդյանի կողմից ներկայացրած գրավի իրերը, որից հետո ձևակերպել են վարկը և գումարը ստացել է Վաղարշակ Խուրշուդյանը։ Այդ ընթացքում Վաղարշակ Խուրշուդյանը հայտնել է, որ աշխատում է Մալաթիա ոսկու շուկայում որպես ոսկերիչ, և որ ներկայացրած զարդերը ինքն անձամբ է պատրաստել։
Վկա` Վարդան Մարտիրոսյանի ցուցմունքով այն մասին, որ աշխատում է ՙՀայէկոնոմբանկ՚ ՓԲԸ-ում որպես ոսկերիչ-փորձագետ։Ոսկյա իրերի գրավադրմամբ վարկեր ձևակերպելու ժամանակ, գրավի առարկա իրերը ստուգել է ընկերության կողմից տրամադրված լուծույթներով։Հարգորոշումը կատարել է բանկերում ընդունված եղանակով, այն է` գրավի իրերը քսել է փորձաքարի վրա, ապա թողնված մետաղի մասնիկների վրա կաթեցրել է հարգորոշող լուծույթը։Եթե մետաղը չի գունափոխվել, ապա կնշանակի, որ այն համապատասխանել է հարգորոշող լուծույթի հարգին, եթե սևացել կամ այրել է, ուրեմն իրերի հարգը ցածր է։
09.07.2007թ. և 02.08.2007թ. ՙՍպանդարյան՚ մասնաճյուղ է եկել Վաղարշակ Խուրշուդյանը, ներկայացրել է ընդհանուր 169.5 գրամ աստվածամոր պատկերով ոսկյա կուլոններ և գնդիկներով կանացի մատանիներ և խնդրել է դրանց գրավադրմամբ իրեն վարկ տրամադրել։Ինքը ստուգել է գրավադրվող ոսկյա իրերը, և համոզվելով, որ դրանք 583 հարգի ոսկյա իրեր են, ձևակերպել են վարկը, որի դիմաց տրամադրվել է 610.000 ՀՀ դրամ։Վաղարշակ Խուրշուդյանը չի կատարել վարկային պայմանագրվ ստանձնած պարտավորությունները, որի պատճառով բանկի պահանջով ինքն է մարել վարկի գումարը։ Եթե իր մոտ կասկած հարուցեր այն փաստը, որ ներկայացվող ոսկյա զարդերը ցածր հարգի են, դրանք գրավ չէր ընդունի, քանի որ հանդիսացել է նյութական պատասխանատու անձ և հակառակ դեպքում ինքը պետք է մարեր վարկերը։
Հետագայում տղեկացել է, որ Վաղարշակ Խուրշուդյանի կողմից ներկայացրած և իր կողմից որպես գրավ ընդունած ոսկյա զարդերը եղել են ցածր հարգի։ Դրանք ինքը ստուգել է միայն 583 հարգի լուծույթով, որը ցույց չի տվել դրանց ցածր հարգի լինելը։ Անհրաժեշտ է եղել ստուգել նաև այլ մեթոդներով, որին ինքը չի տիրապետել։
Վկա` Հակոբ Շիլաջյանի ցուցմունքով այն մասին, որ աշխատում է ՙԱրդշինինվեստբանկ՚ ՓԲԸ-ի ՙԳործարանային՚ մասնաճյուղում որպես ոսկերիչ-փորձագետ։Ոսկյա իրերի գրավադրմամբ վարկեր ձևակերպելու ժամանակ, գրավի առարկա իրերը ստուգել է ընկերության կողմից տրամադրված լուծույթներով։Հարգորոշումը կատարել է բանկերում ընդունված եղանակով, այն է` գրավի իրերը քսել է փորձաքարի վրա, ապա թողնված մետաղի մասնիկների վրա կաթեցրել է հարգորոշող լուծույթը։ Եթե մետաղը չի գունափոխվել, ապա կնշանակի, որ այն համապատասխանել է հարգորոշող լուծույթի հարգին, եթե սևացել կամ այրել է, ուրեմն իրերի հարգը ցածր է։
16.07.2007թ. ոսկու գրավի դիմաց Վաղարշակ Խուրշուդյանին տրամադրվել է 941.000 ՀՀ դրամի վարկ։ Ինքը ստուգել է գրավադրվող ոսկյա իրերը, և համոզվելով, որ դրանք 583 հարգի ոսկյա իրեր են, ձևակերպել են վարկը։ Եթե իր մոտ կասկած հարուցեր այն փաստը, որ ներկայացվող ոսկյա զարդերը ցածր հարգի են, դրանք գրավ չէր ընդունի, քանի որ հանդիսացել է նյութական պատասխանատու անձ և հակառակ դեպքում ինքը պետք է մարեր վարկերը։
Վկա` Վլադիմիր Աբրահամյանի ցուցմունքով այն մասին, որ 2006թ. աշխատում է ՙԱրարատ բանկ՚ ՓԲԸ-ի ՙՆաիրիտ՚ և ՙՍեբաստիա՚ մասնաճյուղերում որպես ոսկերիչ-փորձագետ։ Ոսկյա իրերի գրավադրմամբ վարկեր ձևակերպելու ժամանակ, գրավի առարկա իրերը ստուգել է ընկերության կողմից տրամադրված լուծույթներով։Հարգորոշումը կատարել է բանկերում ընդունված եղանակով, այն է` գրավի իրերը քսել է փորձաքարի վրա, ապա թողնված մետաղի մասնիկների վրա կաթեցրել է հարգորոշող լուծույթը։ Եթե մետաղը չի գունափոխվել, ապա կնշանակի, որ այն համապատասխանել է հարգորոշող լուծույթի հարգին, եթե սևացել կամ այրել է, ուրեմն իրերի հարգը ցածր է։
10.07.2007թ. ՙՆաիրիտ՚ մասնաճյուղում, իսկ 20.07.2007թ. ՙՍեբաստիա՚ մասնաճյուղում ոսկու գրավի դիմաց Վաղարշակ Խուրշուդյանին տրամադրվել է վարկ։ Ինքը ստուգել է գրավադրվող ոսկյա իրերը, և համոզվելով, որ դրանք 583 հարգի ոսկյա իրեր են, ձևակերպել են վարկը։ Եթե իր մոտ կասկած հարուցեր այն փաստը, որ ներկայացվող ոսկյա զարդերը ցածր հարգի են, դրանք գրավ չէր ընդունի, քանի որ հանդիսացել է նյութական պատասխանատու անձ և հակառակ դեպքում ինքը պետք է մարեր վարկերը։
Վկա` Ստեփան Էթեմեզյանի ցուցմունքով այն մասին, որ 2006թ. հուլիս ամսից աշխատում է ՙԱնելիք բանկ՚ ՍՊԸ-ի ՙՇենգավիթ՚ մասնաճյուղում որպես ոսկերիչ-փորձագետ։Ոսկյա իրերի գրավադրմամբ վարկեր ձևակերպելու ժամանակ, գրավի առարկա իրերը ստուգել է ընկերության կողմից տրամադրված լուծույթներով։Հարգորոշումը կատարել է բանկերում ընդունված եղանակով, այն է` գրավի իրերը քսել է փորձաքարի վրա, ապա թողնված մետաղի մասնիկների վրա կաթեցրել է հարգորոշող լուծույթը։ Եթե մետաղը չի գունափոխվել, ապա կնշանակի, որ այն համապատասխանել է հարգորոշող լուծույթի հարգին, եթե սևացել կամ այրել է, ուրեմն իրերի հարգը ցածր է։
31.05.2007թ. ՙՇենգավիթ՚ մասնաճյուղ է եկել Վաղարշակ Խուրշուդյանը և հայտնել է, որ ցանկանում է ոսկու գրավի դիմաց վարկ ստանալ։ Ինքը ստուգել է գրավադրվող ոսկյա զարդերը, և համոզվելով, որ դրանք 583 հարգի ոսկյա իրեր են, ձևակերպել են վարկը, որի դիմաց տրամադրվել է 1.498.000 ՀՀ դրամ։
Այնուհետև, 04.06.2007թ. ՙՇենգավիթ՚ մասնաճյուղ է եկել Աշոտ Հակոբյանը, և ոսկու գրավադրմամբ վարկ ստանալու նպատակով, ներկայացրել է ոսկյա զարդեր։ Ինքը նույն եղանակով ստուգել է գրավադրվող ոսկյա զարդերը, և համոզվելով, որ դրանք 583 հարգի ոսկյա իրեր են, ձևակերպել են վարկը, որի դիմաց տրամադրվել է 995.000 ՀՀ դրամ։
Ընդհանուր քաշով 780 գրամ ցածր հարգի զարդերի գրավադրմամբ Վաղարշակ Խուրշուդյանն ու նրա աներորդին` Աշոտ Հակոբյանը, ստացել են ընդհանուր` 2.493.000 դրամ վարկի գումար։
Վաղարշակ Խուրշուդյանը և Աշոտ Հակոբյանը չեն կատարել վարկային պայմանագրվ ստանձնած իրենց պարտավորությունները, որի պատճառով բանկի պահանջով ինքն է մարել վարկի գումարը` գրավադրելով իր բնակարանը։ Եթե իր մոտ կասկած հարուցեր այն փաստը, որ ներկայացվող ոսկյա զարդերը ցածր հարգի են, դրանք գրավ չէր ընդունի, քանի որ հանդիսացել է նյութական պատասխանատու անձ և հակառակ դեպքում ինքը պետք է մարեր վարկերը։
Հետագայում տղեկացել է, որ Վաղարշակ Խուրշուդյանի կողմից ներկայացրած և իր կողմից որպես գրավ ընդունած ոսկյա զարդերը եղել են ցածր հարգի։ Դրանք ինքը ստուգել է միայն 583 հարգի լուծույթով, որը ցույց չի տվել դրանց ցածր հարգի լինելը։ Անհրաժեշտ է եղել ստուգել նաև այլ մեթոդներով, որին ինքը չի տիրապետել։
Վկա` Կարինե Էվոյանի ցուցմունքով այն մասին, որ աշխատում է ՙՎՏԲ-Հայաստան բանկ՚ ՓԲԸ-ի ՙՇահումյան՚ մասնաճյուղում որպես ոսկերիչ-փորձագետ։ Ոսկյա իրերի գրավադրմամբ վարկեր ձևակերպելու ժամանակ, գրավի առարկա իրերը ստուգել է ընկերության կողմից տրամադրված լուծույթներով։ Հարգորոշումը կատարել է բանկերում ընդունված եղանակով, այն է` գրավի իրերը քսել է փորձաքարի վրա, ապա թողնված մետաղի մասնիկների վրա կաթեցրել է հարգորոշող լուծույթը։ Եթե մետաղը չի գունափոխվել, ապա կնշանակի, որ այն համապատասխանել է հարգորոշող լուծույթի հարգին, եթե սևացել կամ այրել է, ուրեմն իրերի հարգը ցածր է։
12.04.2007թ. և 13.04.2007թ. ՙՇահումյան՚ մասնաճյուղ է եկել Վաղարշակ Խուրշուդյանը և հայտնել է, որ ցանկանում է ոսկու գրավի դիմաց վարկ ստանալ։ Ինքը ստուգել է գրավադրվող ոսկյա զարդերը, և համոզվելով, որ դրանք 583 հարգի ոսկյա իրեր են, ձևակերպել են վարկերը, որի դիմաց տրամադրվել է 1.805.000 և 1.400.000 ՀՀ դրամ գումարներ։
Այնուհետև, 19.04.2007թ. ՙՇենգավիթ՚ մասնաճյուղ է եկել Աշոտ Հակոբյանը, և ոսկու գրավադրմամբ վարկ ստանալու նպատակով, ներկայացրել է ոսկյա շղթաներ ու մատանիներ։ Ինքը նույն եղանակով ստուգել է գրավադրվող ոսկյա զարդերը, և համոզվելով, որ դրանք 583 հարգի ոսկյա իրեր են, ձևակերպել են վարկը, որի դիմաց տրամադրվել է 2.613.000 ՀՀ դրամ։
Եթե իր մոտ կասկած հարուցեր այն փաստը, որ ներկայացվող ոսկյա զարդերը ցածր հարգի են, դրանք գրավ չէր ընդունի, քանի որ հանդիսացել է նյութական պատասխանատու անձ և հակառակ դեպքում ինքը պետք է մարեր վարկերը։
Վկա` Համլետ Ավագյանի ցուցմունքով այն մասին, որ ճանաչել է Վաղարշակ Խուրշուդյանին։ 2007թ. իմանալով, որ Վաղարշակ Խուրշուդյանը լավ ոսկերիչ է ոսկի է վերավաճառել իրեն և որոշակի քանակությամբ զարդեր պատվիրել։ Հետագայում, երբ զարդերի որակը իրեն չի գոհացրել, ապրանքը ետ է վերադարձրել և պահանջել է գումարը։Այդ դեպքից հետո ինքը միայն ոսկի է վերավաճառել Վաղարշակ Խուրշուդյանին։ Հետագայում Վաղարշակ Խուրշուդյանը դիմել է իրեն և հայտնել, որ իր հաճախորդներից մեկը ՌԴ-ում վաճառելու նպատակով մեծ քանակի ոսկյա զարդեր է պատվիրել, սակայն նրա հետ դեպք է պատահել, ուստի չի կարող պատրաստի զարդերը վերցնել, իսկ ինքը դրանք պատրաստելու համար պարտքով գումարներ է վերցրել, որոնք չի կարողանում փակել, ուստի խնդրել է իրեն օգնել այդ զարդերը բանկում գրավադնելու, գումարները վերցնելու և պարտքերը մարելու հարցում։Համլետ Ավագյանը համաձայնվել է օգնել Վաղարշակ Խուրշուդյանին, քանի որ իր շահը ևս այդտեղ եղել է` ինքը ևս թանկ գնով ոսկի է վաճառել Վաղարշակին և գումարային տարբերությունը որպես օգուտ մնացել է իրեն։ Այդ նպատակով Վաղարշակ Խուրշուդյանի հետ գնացել են մոտակա ՙՎՏԲ-Հայաստան բանկ՚ ՓԲԸ 6-րդ մասնաճյուղ, որտեղ ինքը իմացել է, որ որպես ոսկերիչ աշխատում է իր դպրոցական ընկեր` Արտակ Համբարձումյանը։ Արտակ Համբարձումյանը նրանց հայտնել է, որ եթե ներկայացվող ոսկյա զարդերը կհամապատասխանեն գրավի համար սահմանված բանկի պահանջներին` այն 583 հարգի կլինի, ապա այն ինքը կարող է ընդունել որպես գրավ և ձևակերպել վարկ։
03.05.2007թ. Վաղարշակ Խուրշուդյանի կողմից տրամադրված ոսկու գրավով իր և իր ընկեր` Սուրեն Հունանյանի անուններով ՙՎՏԲ-Հայաստան բանկ՚ ՓԲԸ 6-րդ մասնաճյուղում վարկեր են ձևակերպել, որի ընթացքում Արտակ Համբարձումյանը ստուգել է գրավադրվող ոսկյա զարդերը, և համոզվելով, որ դրանք 583 հարգի ոսկյա իրեր են, կազմել է համապատասխան գնահատման ակտ, որի հիման վրա էլ ձևակերպել են վարկը, որի դիմաց վերջիններիս տրամադրել են 1.500.000 ՀՀ դրամ։ Քանի որ մեկ անձի անունով միայն մեկ վարկ է հնարավոր եղել ձևակերպել, ուստի վարկեր ձևակերպելու նպատակով և ինքը և Վաղարշակ Խուրշուդյանը նշված մասնաճյուղ են հրավիրել իրենց հարազատներին, ընկերներին և ծանոթներին։ Իր խնդրանքով 10-11 ներգրավված վարկառուներից բոլորին չի ուղեկցել ինքը, այլ միայն նրանցից մի քանիսի հետ է բանկ գնացել, յուրաքանչյուր անգամ Վաղարշակի կողմից տրամադրված ոսկին գրավ է դրվել, յուրաքանչյուր անգամ Արտակ Համբարձումյանի կողմից ստուգվել է և միայն նոր վարկ ձևակերպվել։ Ստացված վարկերի գումարներից մոտավորապես 38.000 ԱՄՆ դոլլարին համարժեք դրամն է ինքը վերցրել` իր կողմից Վաղարշակ Խուրշուդյանին տված ՙչիստատայի՚ դիմաց, իսկ մնացած գումարը վերցրել է Վաղարշակ Խուրշուդյանը։
Յուրաքանչյուր անգամ Արտակ Համբարձումյանը ստուգել է գրավադրվող ոսկյա զարդերը, և համոզվելով, որ դրանք 583 հարգի ոսկյա իրեր են, ձևակերպել են վարկերը։Ինքը տեղյակ չի եղել, որ Վաղարշակ Խուրշուդյանի կողմից տրամադրված ոսկյա զարդերը ցածր հարգի են եղել։
Հետագայում, ՙՎՏԲ-Հայաստան բանկ՚ ՓԲԸ աշխատակիցները ստուգել են 6-րդ մասնաճյուղում գրավադրված իրերը և հայտնաբերել են, որ Վաղարշակ Խուրշուդյանի ոսկու գրավադրմամբ ձևակերպված վարկերի գրավի իրերը ցածր հարգի են։ Մասնաճյուղ հրավիրված Վաղարշակ Խուրշուդյանը վիճել է բանկի աշխատակիցների հետ և ապացուցել է, որ իր կողմից տրամադրված ոսկյա զարդերը 583 հարգի են, սակայն բանկը պահանջել է անկախ այն հանգամանքից դրանք 583 հագի են, թե ցածր երկու ամսում մարել վարկի գումարները և հետ ստանալ գրավադրված ոսկյա զարդերը։ Վաղարշակ Խուրշուդյանը 6-րդ մասնաճյուղից ստացած գրավի իրերի մի մասը վաճառել է տարբեր շուկաներում, իսկ մնացած մասը գրավադրել է այլ բանկերում, և արդարացել է, որ եթե դրանք 583 հարգի չէին, ինչպես են մյուս բանկերը դրանք վերցնում որպես գրավ։ Համատեղ ուժերով ՙՎՏԲ-Հայաստան բանկ՚ ՓԲԸ-ում ձևակերպած վարկի գումարներից մարել են 11.500.000 ՀՀ դրամ, որից հետո բանկի ղեկավարությունը նյութերը հանձնել է իրավապահ մարմիններին։ Հետագայում բոլորի համար անսպասելի Վաղարշակ Խուրշուդյանը` կնոջ և աներորդու հետ միասին, 2007թ. օգոստոսի վերջին մեկնել է ՌԴ։
Վկա` Նաիրի Աստվածատրյանի ցուցմունքով այն մասին, որ ինքը Վաղարշակ Խուրշուդյանի ոսկու արհեստանոցում աշխատել և ոսկերչություն է սովորել։ 2007թ. մայիսի 11-ին, ժամը 1500-ին զանգահարել է իր ընկեր Վաղարշակ Խուրշուդյանը և հայտնել է, որ ցանկանում է ոսկու գրավադրմամբ վարկ վերցնել, ուստի խնդրել է իրեն անձնագրով գնալ բանկ որպեսզի վարկը իր անունով ձևակերպվի։ Վստահելով Վաղարշակին, իր անձնագրով գնացել է ՙՎՏԲ-Հայաստան բանկ՚ ՓԲԸ-ի 6-րդ մասնաճյուղ, որտեղ ձևակերպել են վարկը, սակայն վարկի գումարը կոնկրետ ով է վերցրել, հստակ չի կարող ասել, քանի որ չի տեսել, բայց հստակ կարող է ասել, որ Վաղարշակը իր ներկայությամբ գումար չի վերցրել։
Վկաներ` Կարեն Սիմոնյանի և Վարդգես Հովհաննիսյանի դատաքննությամբ տված և Սեյրան Սիմոնյանի նախաքննությամբ տրված և դատաքննությամբ հետազոտված նույնաբովանդակ ցուցմունքներով այն մասին, որ իրենց ծանոթ Համլետ Ավագյանը զանգահարել և խնդրել է անձնագրերով ներկայանալ ՙՎՏԲ-Հայաստան բանկ՚ ՓԲԸ-ի 6-րդ մասնաճյուղ որպեսզի իրենց անունով ոսկու գրավի դիմաց վարկ ձևակերպվի։ Իրենց այն հարցին, թե ինչու վարկը իր անունով չի ձևակերպում, վերջինս պատասխանել է, որ իր անունով արդեն վարկ կա ձևակերպված, երկրորդը հնարավոր չի ձևակերպել։ Վստահելով Համլետին, գնացել են բանկ, ստորագրել են համապատասխան փաստաթղթերի տակ, սակայն վարկի գումարը իրենք չեն ստացել, թե ով է վերցրել գումարը և թե ինչ է գրավադրվել, իրենք տեղյակ չեն։
Վկա` Մետաքսիա Մադաթյանի ցուցմունքով այն մասին, որ Գրիգոր Ջրաղացպանյանի մայրն է, ով Համլետ Ավագյանի մանկական ընկերն է։ Համլետ Ավագյանը խնդրել է Գրիգորին օգնել ընկերոջը, քանի որ վերջինս ոսկու գրավի դիմաց ցանկանում է բանկից գումար վերցնել։Քանի որ Համլետ Ավագյանը որդու մտերիմ ընկերն է, ուստի Գրիգորը համաձայնվել է օգնել, սակայն նրա այն հարցին, թե կարող է հետագայում խնդիրներ առաջանան, Համլետը պատասխանել է, որ հանգիստ լինի, քանի որ իր և իր կնոջ անուններով ևս վարկեր կան ձևակերպած, բայց բանկը մեկ անձի անունով միայն մեկ վարկ է ձևակերպում և առավելագույն վարկի գումարը 1.500.000 դրամ է, իսկ նրա ոսկու քանակությունը շատ է: Գրիգորը անձնագրով գնացել է Էրեբունու փողոցի վրա գտնվող ՙՎՏԲ-Հայաստան բանկ՚-ի 6-րդ մասնաճյուղ, որտեղ վերջինիս սպասել է Համլետը և տեսել, որ ոսկերիչի սեղանին արդեն իսկ ոսկու մի փաթեթ կա, սակայն թե ինչ զարդեր են եղել չի տեսել։Բանկում ստորագրել է համապատասխան փաստաթղթերի տակ, որից հետո Համլետը ստացել է վարկի գումարը։Մի քանի օր անց, բանկի աշխատակիցները զանգահարել և Գրիգորին հրավիրել են բանկ, որտեղ տեղեկացրել են, որ գրավադրված ոսկյա իրերի հարգը ցածր է, որից հետո պահանջել են մարել վարկի գումարը։ Գրիգորն այդ մասին հայտնել է Համլետ Ավագյանին, իսկ վերջինս հավաստիացրել է, որ հանգիստ լինի, սակայն այդպես էլ չմարելով վարկի գումարը, հետագայում իրենց ընտանիքը, խնդիրներ չունենալու համար 3500 ԱՄՆ դոլարին համարժեք ՀՀ դրամ է հավաքել և մարել բանկի վարկի գումարը։
Վկաներ` Լուսինե Մարկոսյանի դատաքննությամբ տված և Գևորգ Մարկոսյանի նախաքննությամբ տրված և դատաքննությամբ հետազոտված նույնաբովանդակ ցուցմունքներով այն մասին, որ Համլետ Ավագյանը իրենց ծանոթն է։ Համլետի խնդրանքով անձնագրերով` Լուսինե Մարկոսյանը, իր եղբոր Գևորգ Մարկոսյանի և նրա ընկեր Համլետ Ավագյանի հետ միասին գնացել են Էրեբունու փողոցի վրա գտնվող ՙՎՏԲ-Հայաստան բանկ՚-ի 6-րդ մասնաճյուղ, որտեղ Համլետը ծանոթացրել է բանկի ոսկերիչ Արտակի հետ, որի սեղանին եղել են ոսկյա զարդեր։Արտակը ստուգել է ոսկյա զարդերը, որից հետո իրենք ստորգարել են համապատասխան փաստաթղթերի տակ և դուրս եկել բանկից։ Վարկի գումարը ստացել է Համլետ Ավագյանը, քանի որ գրավի իրերը ինքն է ներկայացրել բանկին։
Հետագայում, տեղեկացել են, որ բանկում իրեն փորձաքննության եզրակացությամբ, համաձայն որի առգրավված թվով 22 գրավի փաթեթներում առկա բոլոր դեղին գույնի մետաղներից պատրաստված հատվածները ի հայտ են գալիս որպես 583 հարգի ոսկու համաձուլվածք, իսկ իրերի սպիտակ գույնի մետաղից պատրաստված հատվածները` ոչ թանկարժեք մետաղների համաձուլվածք են։Սպիտակ ոսկու համաձուլվածքները /583 և 750 հարգերի/ արծաթի, պլատինի կամ ոչ թանկարժեք մետաղների համաձուլվածքների հետ չշփոթելու համար, հարգորոշումը պետք է իրականացվի ինչպես ոսկու «Քլորային լուծույթե հակազդուկի, այնպես էլ ցածր և բարձր հարգերի ոսկու համաձուլվածքների համար նախատեսված թթվային հակազդուկների միջոցով։ Փորձաքննության մասնակից ոսկերիչներ Արտակ Համբարձումյանը, Ստեփան Էթեմեզյանը, Վարդան Մարտիրոսյանն ու Սամվել Ավետիսյանը հայտարարել են, որ իրենք երկու դեպքում էլ կիրառել են միևնույն մեթոդը` հարգերը որոշել են 583 հարգի ոսկու համաձուլվածքի համար նախատեսված լուծույթը և սպիտակ ոսկու հարգորոշման վերը նշված մեթոդին չեն տիրապետել։
ՙՍեֆ ինտերնեյշնլ՚ ՈւՎԿ ՍՊԸ-ում Վաղարշակ Խուրշուդյանի և Նարինե Հակոբյանի անուններով գրավադրված իրերի վերաբերյալ ՙԱրմէքսպերտիզա՚ ՍՊԸ-ի տեղեկանքով և Երևան քաղաքի ոսկերչական գործարան-1 ՙԳնոմոն՚ ԲԲԸ-ի եզրակացությամբ։
ՙՍեֆ ինտերնեյշնլ՚ ՈւՎԿ ՍՊԸ-ում, ՙՎՏԲ-Հայաստան բանկ՚ ՓԲԸ-ի 6-րդ և ՙՇահումյան՚ մասնաճյուղերում, ՙԱնելիք բանկ՚ ՍՊԸ-ի ՙՇենգավիթ՚ մասնաճյուղում, ՙՀայէկոնոմբանկ՚ ԲԲԸ-ի ՙՍպանդարյան՚ և ՙԷրեբունի՚ մասնաճյուղերում, ՙԱրարատբանկ՚ ՓԲԸ-ի ՙՆիրիտ՚ և ՙՍեբաստիա՚ մասնաճյուղերում և ՙԱրդշինինվեստբանկ՚ ՓԲԸ-ի ՙԳործարանային՚ մասնաճյուղում Վաղարշակ Խուրշուդյանի պատրաստած ցածր հարգի ոսկյա զարդերի գրավադրմամբ ձևակերպված վարկային փաթեթներով և որպես իրեղեն ապացույց ճանաչված ընդհանուր թվով 22 գրավի իրերով։
ՙՀայէկոնոմբանկ՚ ԲԲԸ-ի վարչության նախագահի գրությամբ քննությանը տրամադրված ակտերով, համաձայն որոնց ընկերության հանձնաժողովը ստուգման ենթարկելով Վաղարշակ Խուրշուդյանի կողմից 13.07.2007թ. ՙԷրեբունի՚ մասնաճյուղում տրամադրված 265.000 ՀՀ դրամ վարկի դիմաց գրավադրված ոսկյա իրերը պարզել է, որ արտաքին տեսքով նման են սպիտակ ոսկու համաձուլվածքի, սակայն պատրաստված են ոսկու համաձուլվածք չպարունակող մետաղներից և գնահատվում են 0 ՀՀ դրամ։ Ոսկերիչ Աշոտ Ցոլակյանը պարզաբանել է, որ ստուգումն իրականացրել է ոսկու ստուգման համար նախատեսված 583 հարգի թթվի փոխազդեցության մեթոդով։
Նույն հանձնաժողովն ուսումնասիրելով ՙՍպանդարյան՚ մասնաճյուղում 09.07.2007թ. և 02.08.2007թ. տրամադրված 439.000 և 171.000 ՀՀ դրամ վարկի դիմաց գրավադրված առարկաները պարվել է, որ զարդերի արտաքին շերտի պատրաստման համար օգտագործված դեղնակարմրավուն համաձուլվածքներն իրենց որակական հատկանիշներով համապատասխանում են 500-583 հարգին: Զարդերի գլանաձև և կիսագլանաձև դետալները հնարավոր է, որ լցված լինեն ոչ թե ոսկյա, այլ էժանագին մետաղներով կամ համաձուլվածքներով, ինչը հաստատելու դեպքում կկազմի գրավի շուրջ 50 տոկոսը։
ՙՎՏԲ-Հայաստան բանկ՚ ՓԲԸ-ի գլխավոր տնօրեն-տնօրինության նախագահի գրությամբ քննությանը տրամադրված հաշվետվությամբ, համաձայն որի 29.05.2007թ. ընկերության հանձնաժողովը կատարել է 6-րդ մասնաճյուղում գրավադրված ոսկյա իրերի փաստացի իրավիճակի ստուգում, որի ժամանակ պարզվել է, որ 25 դեպքով /որից 2-ը կապ չունեն Վաղարշակ Խուրշուդյանի կողմից գրավադրված իրերի հետ/ տրամադրված վարկերի դիմաց վարկառուներից ընդունված ոսկյա իրերը չեն համապատասխանել ՙՎՏԲ-Հայաստան բանկ՚ ՓԲԸ ոսկու գրավով վարկավորման կարգի պահանջներով սահմանված հատկանիշներին: Գրավի պարկերում առկա զարդերի մի մասն ընդհանրապես ոսկի չի եղել, իսկ մի մասում առկա է եղել ոսկու որոշակի պարունակություն, ինչպես նաև գործով ձեռք բերված այլ փաստական տվյալներով։
ՀՀ քր. օր.-ի 178-րդ հոդվածը խարդախությունը բնորոշում է որպես խաբեության կամ վստահությունը չարաշահելու եղանակով ուրիշի գույքի զգալի չափերով հափշտակություն կամ ուրիշի գույքի նկատմամբ իրավունքի ձեռք բերում, նույն հոդվածի 3-րդ մասի 1-ին կետը քրեական պատասխանատվություն է նախատեսում ուրիշի գույքի հափշտակության համար, որը կատարվել է առանձնապես խոշոր չափերով: Խարդախության օբյեկտիվ կողմի յուրահատկությունը դրսևորվում է նրանով, որ հափշտակությունն իրականացվում է խաբեության կամ վստահությունը չարաշահելու միջոցով:
Խարդախությունը կատարվում է խաբեությամբ կամ վստահությունը չարաշահելու միջոցով, որի ազդեցության տակ գույքը տնօրինող անձը գույքը կամ գույքի նկատմամբ իրավունքը հանձնում է այլ անձի:
Խաբեությունը դիտավորությամբ իրականությունը խեղաթյուրելն է, կոնկրետ փաստերի խեղաթյուրումը, կեղծ փաստեր հաղորդելը, իրականում գոյություն չունեցող փաստերի առկայությունը հաստատելը, գոյություն ունեցող փաստերը ժխտելը, բանավոր խոսքի միջոցով` որպես պաշտոնատար անձ, որևէ հիմնարկի աշխատակից ներկայանալը, որևէ պաշտոնատար անձի ընկեր կամ հարազատ ներկայանալը: Խաբեության արդյունքը պետք է լինի անձի մոլորությունը այն փաստերի վերաբերյալ, որոնք նշանակություն ունեն գույքը հանձնելու մասին որոշում ընդունելիս:
Վստահության չարաշահումը դրսևորվում է նրանով, որ հանցավորը իր իրական մտադրություների մասին մոլորության մեջ է գցում գույքի սեփականատիրոջը կամ օրինական տիրապետողին, նրանց մեջ վստահություն է առաջացնում իր իրական վարքագծի կապակցությամբ, իր այդ վարքագծով ազդում է տուժողի գիտակցության և կամքի վրա և դրա արդյունքում վերջինս, իր կամքով գույքը հանձնում է հանցավորին, համոզված լինելով, որ այն կվերադարձվի, կամ հանձնված գույքի, գույքային արժեքի դիմաց` կմատուցվի համապատասխան ծառայություն:
Վստահության չարաշահման ամենատարածված եղանակը խոստումներ տալն է: Այս դեպքում հանցավորը խոստանում է որոշակի վարքագիծ, որոշակի գործողության կատարում, ծառայության մատուցում, ի սկզբանե գիտակցելով, որ իրականում դա չի անելու, որ դա անհրաժեշտ է դիմացինի վստահությունը չարաշահելու, նրա մոտ իր անձի նկատմամբ վստահություն առաջացնելու համար:
Վստահությունը չարաշահելու միջոցով ուրիշի գույքի հափշտակությունը սուբյեկտիվ կողմից դրսևորվում է ուղղակի դիտավորությամբ, հանցավորը նախատեսում է, որ խաբեության կամ վստահությունը չարաշահելու միջոցով հափշտակում է ուրիշի գույքը, նախատեսում ու ցանկանում է այդ: Խարդախության սուբյեկտիվ կողմի առանձնահատկությունը այն է, որ հանցավորը, մինչև գույքը կամ գույքի նկատմամբ իրավունքը ձեռք գցելը, ի սկզբանե նպատակ է ունենում հափշտակել գույքը, չվերադարձնել այն, չկատարել խոստումը կամ պայմանագրային պարտավորությունները, գիտակցում է, որ այդ գույքը չի վերադարձնելու:
ՀՀ քրեական և քրեադատավարական օրենսդրության` քրեական պատասխանատվության հիմքի, հանցագործության քրեաիրավական բնորոշման, հանցանք կատարման մեջ անձի մեղավորությունը հիմնավորող ապացույցների, ապացույցների ուժի, դրանց գնահատման, խարդախության քրեաիրավական բնութագրի վերաբերյալ` վերը նշված իրավադրույթների համատեքստում քննության առնելով քրեական գործով ձեռք բերված ապացույցները իրենց համակցության մեջ, ՀՀ Վերաքննիչ քրեական դատարանը գտնում է, որ քրեական գործով հաստատված ճանաչված փաստական հանգամանքերի նկատմամբ նախաքննական մարմինը և ընդհանուր իրավասության դատարանը ճիշտ են կիրառել քրեական օրենքը, այդ փաստական հանգամանքները համապատասխանում են ամբաստանյալ` Վաղարշակ Խուրշուդյանի կողմից ՀՀ քր. օր-ի 178-րդ հոդ. 3-րդ մասի 1-ին կետով նախատեսված հանցանքի հատկանիշներին:
Քննության առնելով պաշտպանի վերաքննիչ բողոքի պահանջը` ամբաստանյալ Վաղարշակ Խուրշուդյանի նկատմամբ արդարացման դատական ակտ կայացնելու վերաբերյալ, ՀՀ Վերաքննիչ քրեական դատարանը գտնում է, որ այն անհիմն է, քանի որ ամբաստանյալ Վաղարշակ Խուրշուդյանի կողմից ՀՀ քր. օր-ի 178-րդ հոդ. 3-րդ մասի 1-ին կետով նախատեսված հանցանքը կատարելը և նրա մեղքը հիմնավորված է քրեական գործով ձեռք բերված և ընդհանուր իրավասության դատարանում հետազոտված փոխկապակցված հավաստի ապացույցների բավարար ամբողջությամբ, այդ առումով քրեական գործով չփարատված կասկածներ չկան, հետևաբար արդարացման հիմքեր նունյպես չկան:
Ինչ վերաբերում է տուժողի ներկայացուցչի վերաքննիչ բողոքի պատճառաբանություններին և պահանջին, որ պետք է բեկանել Երևանի էրեբունի և Նուբարաշեն վարչական շրջանների ընդհանուր իրավասության դատարանի 08.08.2011թ.-ի դատավճիռը` Վաղարաշակ Խուրշուդյանի նկատմամբ նշանակված պատիժը խստացնելու առումով, նույնպես անհիմն է և ենթակա է մերժման:
Քննության առնելով ամբաստանյալ Վաղարշակ Խուրշուդյանի նկատմամբ նշանակված պատժի հարցը, Վերաքննիչ քրեական դատարանը գտնում է, որ ընդհանուր իրավասության դատարանն ամբաստանյալի նկատմամբ պատիժ նշանակելիս, պատժի տեսակը և չափը որոշելիս պահպանել է ՀՀ քր. օր.-ի 61-րդ հոդվածով նախատեսված պատիժ նշանակելու ընդհանուր սկզբունքները, հաշվի է առել հանցագործության` հանրության համար վտանգավորության աստիճանը և բնույթը, հանցավորի անձը բնութագրող տվյալները, պատասխանատվությունը և պատիժը մեղմացնող և ծանրացնող հանգամանքները, նշանակել է համաչափ պատիժ, որի միջոցով հնարավոր է հասնել ՀՀ քրեական օրենսգրքի 48-րդ հոդվածով նախատեսված պատժի նպատակներին, այն է` սոցիալական արդարության վերականգնմանը, պատժի ենթարկված անձանց ուղղմանը և հանցագործությունների կանխմանը: Այն բխում է նաև ՀՀ քրեական օրենսգրքի 10-րդ հոդվածով սահմանված արդարության և պատասխանատվության անհատականացման սկզբունքից :
ՀՀ Վերաքննիչ քրեական դատարանը գտնում է, որ Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 2011 թվականի օգոստոսի 08-ի դատավճիռը` ամբաստանյալ Վաղարշակ Սաշայի Խուրշուդյանի նկատմամբ ՀՀ քրեական օրենսգրքի 178-րդ հոդվածի 3-րդ մասի 1-ին կետով, օրինական, հիմնավորված և պատճառաբանված է, իսկ պաշտպանի և տուժողի ներկայացուցչի վերաքննիչ բողոքների փաստարկները` անհիմն են և չեն կարող բավարար հիմք հանդիսանալ դատավճիռը բեկանելու կամ փոփոխելու համար:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-րդ, 394-րդ, 402-րդ, 418-րդ հոդվածներով, Վերաքննիչ քրեական դատարանը


Ո Ր Ո Շ Ե Ց

Պաշտպանի և տուժողի ներկայացուցչի վերաքննիչ բողոքները մերժել:
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 2011 թվականի օգոստոսի 08-ի դատավճիռը` Վաղարշակ Սաշայի Խուրշուդյանի նկատմամբ ՀՀ քրեական օրենսգրքի 178-րդ հոդվածի 3-րդ մասի 1-ին կետով, թողնել օրինական ուժի մեջ:
Որոշումը կարող է բողոքարկվել ՀՀ վճռաբեկ դատարան` հրապարակման պահից մեկամսյա ժամկետում:

ՆԱԽԱԳԱՀՈՂ ԴԱՏԱՎՈՐ` ստորագրություն
ԴԱՏԱՎՈՐՆԵՐ` ստորագրություններ
Իսկականի հետ ճիշտ


ՆԱԽԱԳԱՀՈՂ ԴԱՏԱՎՈՐ` Ա. ՀՈՎՀԱՆՆԻՍՅԱՆ