ԵԷԴ/0061/01/10

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ` Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ` Լ. ՄԻՐԶՈՅԱՆ

Մասնակցությամբ`

ՄԵՂԱԴՐՈՂ` Պ. ԳՅՈւԼՈւՄՅԱՆ
ՊԱՇՏՊԱՆ` Վ. ԱԹՈՅԱՆ

2010թ. հունիսի 17-ին դատարանում
Դռնբաց դատական նիստում քննեց քրեական գործն ըստ մեղադրանքի` Կարեն Հայկի Խաչատրյանի, ծնված 25.07.1977թ., ք.Երևան, ազգությամբ հայ, ՀՀ քաղաքացի, բարձրագույն կրթությամբ, ամուսնացած, նախկինում չդատված, չի աշխատում, հաշվառված է Արմավիրի մարզի Ոսկեհատ գյուղում, փաստացի բնակվում է ք.Երևան Սարի-Թաղ 3 փողոց, 2/4 տանը։
Մեղադրվում է ՀՀ քր. օր-ի 268 հոդվածի 2-րդ մասի 1-ին և 2-րդ կետերով և 266 հոդվածի 4-րդ մասով։
Սույն գործով կալանքի տակ է 18.02.2010թ.։
Դատաքննությամբ և գործի տվյալներով պարզվեց հետևյալը.
Կարեն Հայկի Խաչատրյանը 2008թ. դեկտեմբերի վերջերին, մեկ շաբաթվա ընթացքում, տարբեր օրերի Երևան քաղաքի Արարատյան զանգվածում գտնվող «Լուս Աստղ» բենզալցակայանի մոտ, ապօրինաբար, առանց իրացնելու նպատակի` իր գործածման համար Իշխան Կիրակոսյանից ձեռք է բերել խոշոր չափի` 2 գրամ ընդհանուր քաշով «ափիոն» տեսակի թմրամիջոց, 1,0մլ «քացախաթթվի անհիդրիդ» տեսակի պրեկուրսոր և գործածել է։
2009թ. սեպտեմբեր ամսին Կարեն Խաչատրյանը Սուսաննա Գալստյանից առանց իրացնելու նպատակի` իր գործածման համար, կրկին անգամ ապօրինաբար ձեռք է բերել ու պահել խոշոր չափի` 3,0 գրամ «ափիոն» տեսակի թմրամիջոց և 5,0մլ «քացախաթթվի անհիդրիդ» տեսակի պրեկուրսոր, որից մի մասը գործածել է, իսկ մնացածը` հետագա գործածման համար պահել է տան լոգարանում։
Կարեն Խաչատրյանը 2010թ. փետրվարի 17-ին թմրամիջոց գործածելու նպատակով երեկոյան դուրս է եկել տանից` իր հետ վերցնելով թաքցրած «ափիոն» տեսակի թմրամիջոցը և «քացախաթթվի անհիդրիդ» տեսակի պրեկուրսորը։ Երևան քաղաքի Սարի-Թաղ թաղամասով, ապա Մ. Խորենացի փողոցով շրջելուց հետո, 2010թ. փետրվարի 18-ին, ժամը 0240-ին թմրամիջոց գործածելու կասկածանքով Մ. Խորենացի փողոցի թիվ 148 հասցեի մոտից ՀՀ ոստիկանության Էրեբունու բաժնի աշխատակիցների կողմից բերման է ենթարկվել և անձնական խուզարկության ընթացքում նրա սպորտային անդրավարտիքի ձախ գրպանից հայտնաբերվել է զգալի չափի` 0,43 գրամ «ափիոն» տեսակի թմրամիջոց, իսկ աջ ոտքի գուլպայի միջից` 1,8մլ ծավալով «քացախաթթվի անհիդրիդ» տեսակի պրեկուրսոր` ներարկիչով։
Վերը նշված հանցավոր արարքի կատարման համար Կարեն Հայկի Խաչատրյանին մեղադրանք է առաջադրվել ՀՀ քր. օր-ի 268 հոդվածի 2-րդ մասի 1-ին և 2-րդ կետերով և 266 հոդվածի 4-րդ մասով։
Դատաքննությամբ առաջադրված մեղադրանքում Կարեն Խաչատրյանը իրեն լիովին մեղավոր ճանաչեց և ցուցմունք տվեց այն մասին, որ 2008թ. դեկտեմբերի վերջերին Երևան քաղաքի Արարատյան զանգվածում գտնվող «Լուս Աստղ» բենզալցակայանի մոտ ծանոթացել է Իշխան Կիրակոսյանի հետ։ Վերջինից մեկ շաբաթվա ընթացքում` տարբեր օրերի առանց իրացնելու նպատակի` իր գործածման համար ձեռք է բերել և օգտագործել 2 գրամ «ափիոն» տեսակի թմրամիջոց և 1,0մլ «քացախաթթվի անհիդրիդ»։
2009թ. փետրվար ամսից փաստական ամուսնական հարաբերությունների մեջ է գտնվել Ստելլա Մարկոսյանի հետ, և նրա և վերջինիս մոր` Սուսաննա Գալստյանի հետ միասին բնակվել է վերջիններիս պատկանող` Երևան քաղաքի Սարի-Թաղ 3 փողոցի, թիվ 2/4 հասցեի տանը։ Սուսաննա Գալստյանից առանց իրացնելու նպատակի` իր գործածման համար ձեռք է բերել 3,0 գրամ «ափիոն» տեսակի թմրամիջոց և 5,0մլ «քացախաթթվի անհիդրիդ», որից մի մասը գործածել է, իսկ մնացած մասը պահել է նույն տան լոգարանում։
2010թ. փետրվարի 17-ին թմրամիջոց օգտագործելու նպատակով դուրս է եկել տանից` իր հետ վերցնելով «ափիոն» տեսակի թմրամիջոցը և «քացախաթթվի անհիդրիդը»` ներարկիչով։ Երևան քաղաքի Սարի-Թաղ թաղամասով, ապա Մ. Խորենացի փողոցով շրջելուց հետո, 2010թ. փետրվարի 18-ին, ժամը 0240-ի սահմաններում թմրամիջոց գործածելու կասկածանքով ՀՀ ոստիկանության Էրեբունու բաժնի աշխատակիցների կողմից բերման է ենթարկվել և անձնական խուզարկության ընթացքում իր սպորտային անդրավարտիքի ձախ գրպանից հայտնաբերվել է 043 գրամ «ափիոն» տեսակի թմրամիջոց, իսկ աջ ոտքի գուլպայի միջից` 1,8մլ «քացախաթթվի անհիդրիդ»` ներարկիչով։
Բացի ամբաստանյալի խոստովանական ցուցմունքից, նրա կատարած արարքը հիմնավորվեց գործով ձեռք բերված հետևյալ ապացույցներով.
Վկա` Ստելլա Մարկոսյանի ցուցմունքով այն մասին, որ մոր` Սուսաննա Գալստյանի հետ միասին բնակվել է Երևան քաղաքի Սար-Թաղ 3 փողոց, թիվ 2/4 տանը։ 2009թ. փետրվար ամսից փաստական ամուսնական հարաբերությունների մեջ է գտնվել Կարեն Խաչատրյանի հետ, որից հետո վերջինս իրենց հետ բնակվել է նույն հասցեում։ Մայրը գործածել է թմրամիջոցներ և հոգեմետ նյութեր պարունակող դեղորայք։ Կարենի մոտից հայտնաբերված «ափիոն» տեսակի թմրամիջոցը և «քացախաթթվի անհիդրիդը» վերջինս ձեռք է բերել մորից։
Կարեն Խաչատրյանի հանցանքը հիմնավորվեց նաև դատաքիմիական փորձաքննության 2010թ. փետրվարի 18-ի Հմ 81 Ք եզրակացությամբ, համաձայն որի փորձաքննությանը ներկայացված 0,43 գրամ հաստատուն քաշով նյութը հանդիսանում է «ափիոն» տեսակի թմրամիջոց, իսկ ներարկիչում առկա 1.8մլ ծավալով հեղուկը հանդիսանում է «քացախաթթվի անհիդրիդ»։
Տոկսիկոքիմիական փորձաքննության 2010թ. փետրվարի 22-ի Հմ 0118 եզրակացությամբ, համաձայն որի Կարեն Խաչատրյանի մեզի փորձանմուշում հայտնաբերվել է ափիոն խմբի թմրամիջոցի թմրալկալոիդներ։
Դատանարկոլոգիական փորձաքննության 2010թ. մարտի 4-ի թիվ 68/10 եզրակացությամբ, համաձայն որի Կարեն Հայկի Խաչատրյանը տառապում է ափիոնային թմրամոլությամբ, ուստի հարկադիր բուժման կարիք ունի, որի համար հակացուցումներ չկան։
Իրեղեն ապացույց ճանաչված 0,43 գրամ հաստատուն քաշով «ափիոն» տեսակի թմրամիջոցի և ներարկիչով 1.8մլ ծավալով «քացախաթթվի անհիդրիդ» տեսակի պրեկուրսորի հայտնաբերման, առգրավման արձանագրություններով, ինչպես նաև գործով ձեռք բերված այլ փաստական տվյալներով։
Այսպիսով դատարանը ապացուցված համարեց, որ Կարեն Հայկի Խաչատրյանը կատարել է արարք, որը նախատեսված է ՀՀ քր. օր-ի 268 հոդվածի 2-րդ մասի 1-ին և 2-րդ կետերով և 266 հոդվածի 4-րդ մասով, որով և պետք է ենթարկվի քրեական պատասխանատվության։
Պատիժ նշանակելիս դատարանը հաշվի է առնում արարքի հասարակական վտանգավորությունը, ամբաստանյալների ինքնությունը և գործի ողջ հանգամանքները։
Կարեն Խաչատրյանի պատասխանատվությունը և պատիժը ծանրացնող հանգամանքներ չկան։
Դատարանն ամբաստանյալի պատասխանատվությունը և պատիժը մեղմացնող հանգամանք է համարում այն, որ վերջինս երիտասարդ է, նախկինում արատավորված չի եղել, բնութագրվում է դրականորեն, զղջացել է կատարած արարքի համար և ընդունել մեղքը։
Քննարկելով խափանման միջոցի հարցը, դատարանը գտնում է, որ ամբաստանյալ Կ. Խաչատրյանի նկատմամբ ընտրված կալանք խափանման միջոցը պետք է թողնել անփոփոխ։
Նկատի ունենալով, որ ՀՀ ԱՆ «Հոգեբուժական բժշկական կենտրոն» ՓԲԸ նարկոլոգիական կլինիկայի դատանարկոլոգիական հանձնաժողովի 04.03.2009թ. եզրակացության համաձայն Կարեն Հայկի Խաչատրյանը տառապում է ափիոնային թմրամոլությամբ և հարկադիր բուժման կարիք ունի, որի համար հակացուցումներ չկան, հետևաբար դատարանը գտնում է, որ պատիժը կրելու ընթացքում Կարեն Խաչատրյանի նկատմամբ պետք է նշանակել հարկադիր բուժում` ափիոնային թմրամոլության դեմ։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված զգալի չափի` 0,43 գրամ հաստատուն քաշով «ափիոն» տեսակի թմրամիջոցը և 1,8մլ ծավալով «քացախաթթվի անհիդրիդ» տեսակի պրեկուրսորը` ներարկիչով պետք է ոչնչացնել։
ՀՀ ոստիկանության քննչական գլխավոր վարչության Էրեբունու քննչական բաժնի 05.05.2010թ. որոշմամբ Իշխան Վաչագանի Կիրակոսյանի նկատմամբ ՀՀ քր. օր-ի 266 հոդվածի 2-րդ մասի 2-րդ և 2.1 կետերով և Սուսաննա Խաչիկի Գալստյանի նկատմամբ ՀՀ քր. օր-ի 266 հոդվածի 2-րդ մասի 2-րդ կետով քրեական հետապնդում չի իրականացվել` մահվան հիմքով։
Ղեկավարվելով ՀՀ քր. դատ. օր-ի 357-360 հոդվածներով, դատարանը

Վ Ճ Ռ Ե Ց

Կարեն Հայկի Խաչատրյանին մեղավոր ճանաչել ՀՀ քր. օր-ի 268 հոդվածի 2-րդ մասի 1-ին և 2-րդ կետերով և 266 հոդվածի 4-րդ մասով.
ՀՀ քր. օր-ի 268 հոդվածի 2-րդ մասի 1-ին և 2-րդ կետերով դատապարտել ազատազրկման` 1/մեկ/ տարի ժամկետով։
ՀՀ քր. օր-ի 266 հոդվածի 4-րդ մասով դատապարտել տուգանքով` նվազագույն աշխատավարձի հիսունապատիկի` 50.000/հիսուն հազար/ ՀՀ դրամի չափով։
ՀՀ քր. օր-ի 66 հոդվածի 3-րդ մասի համաձայն՝ պատիժները լրիվ գումարելու միջոցով, վերջնական պատիժ նշանակել ազատազրկում՝ 1/մեկ/ տարի ժամկետով և տուգանք` նվազագույն աշխատավարձի հիսունապատիկի` 50.000/հիսուն հազար/ ՀՀ դրամի չափով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել 18.02.2010թ.։
Կալանք խափանման միջոցը թողնել անփոփոխ մինչև դատավճռի օրինական ուժի մեջ մտնելը։
Պատիժը կրելու ընթացքում Կարեն Հայկի Խաչատրյանի նկատմամբ ՀՀ քր. օր-ի 97 հոդվածով նշանակել հարկադիր բուժում` ափիոնային թմրամոլության դեմ։
Գործով իրեղեն ապացույց ճանաչված զգալի չափի` 0,43 գրամ հաստատուն քաշով «ափիոն» տեսակի թմրամիջոցը և 1,8մլ ծավալով «քացախաթթվի անհիդրիդ» տեսակի պրեկուրսորը` ներարկիչով դատավճիռն օրինական ուժի մեջ մտնելուց հետո ոչնչացնել։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ