ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆ

Էրեբունի և Նուբարաշեն վարչական շրջանների ԵԷԴ/0034/01/10
ընդհանուր իրավասության առաջին ատյանի դատարանի
դատավճիռը կայացրած դատարանի
կազմը նախագահող դատավոր` Վ. Գրիգորյան

ՈՐՈՇՈՒՄ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

16 հունիսի 2010թ ք. Երևան

ՀՀ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ /այսուհետ`
վերաքննիչ դատարան/ ՀԵՏԵՎՅԱԼ ԿԱԶՄՈՎ`

նախագահող դատավոր` Ա. ՊԵՏՐՈՍՅԱՆ
դատավորներ` Ռ. ԱԶԱՐՅԱՆ
Հ. ՏԵՐ-ԱԴԱՄՅԱՆ

քարտուղարությամբ` Ե. ԱՌԱՔԵԼՅԱՆԻ
մասնակցությամբ`
մեղադրող` Ա. ՍՏԵՓԱՆՅԱՆԻ
ամբաստանյալ` Ռ. ԴԱՆԻԵԼՅԱՆԻ

դռնբաց դատական նիստում ամբաստանյալ Ռոբերտ Արմենի Դանիելյանի կողմից ներկայացրած վերաքննիչ բողոքի հիման վրա վճռաբեկության կարգով քննության առնելով քրեական գործն ըստ մեղադրանքի` Ռոբերտ Արմենի Դանիելյանի, մեղադրանք է առաջադրվել ՀՀ քրեական օրենսգրքի 34-268-րդ հոդվածի 2-րդ մասի 2-րդ կետով նախատեսված հանցանքի կատարման համար և վերանայելով դատական ակտը

ՊԱՐԶԵՑ

Գործի դատավարական նախապատմությունը.

1. ՀՀ ոստիկանության Էրեբունու քննչական բաժնի քննիչ Հ. Դելեյանի 2009 թվականի հոկտեմբերի 20-ի որոշմամբ` Կարապետ Հունանյանի կողմից ՀՀ ԱՆ <<Էրեբունի>> ՔԿ հիմնարկի դատապարտյալ Ռոբերտ Դանիելյանի անվամբ բերված հանձնուքում 24.952 գրամ խոշոր չափի հաստատուն քաշով չորացված <<մարիխուանա>> տեսակի թմրամիջոց հայտնաբերելու դեպքի առթիվ հարուցվել է քրեական գործ` ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերով: /Տես` հատոր 1, գ-թ 1/

2. Քննիչ Հ. Դելեյանի 2009 թվականի դեկտեմբերի 18-ի որոշմամբ` միջնորդություն է հարուցվել թիվ 12136409 քրեական գործի նախաքննության նկատմամբ հսկողություն իրականացնող դատախազին` քրեական գործի նախաքննության ժամկետը մեկ ամսով` մինչև 2010 թվականի հունվարի 20-ը երկարացնելու մասին:
ՀՀ գլխավոր դատախազության պատիժների և հարկադրանքի այլ միջոցների կիրառման օրինականության նկատմամբ հսկողություն իրականացնող վարչության ավագ դատախազ Ա. Ստեփանյանը թիվ 12136409 քրեական գործի նախաքննության ժամկետը երկարացրել է մեկ ամսով` մինչև 2010 թվականի հունվարի 20-ը: /տես` հ.1 գ-թ 128-129/

3. Քննիչ Հ. Դելեյանի 2010 թվականի հունվարի 18-ի որոշմամբ` միջնորդություն է հարուցվել թիվ 12136409 քրեական գործի նախաքննության նկատմամբ հսկողություն իրականացնող դատախազին` քրեական գործի նախաքննության ժամկետը մեկ ամսով` մինչև 2010 թվականի փետրվարի 20-ը երկարացնելու մասին:
ՀՀ գլխավոր դատախազության պատիժների և հարկադրանքի այլ միջոցների կիրառման օրինականության նկատմամբ հսկողություն իրականացնող վարչության ավագ դատախազ Ա. Ստեփանյանը թիվ 12136409 քրեական գործի նախաքննության ժամկետը երկարացրել է մեկ ամսով` մինչև 2010 թվականի փետրվարի 20-ը: /տես` հ.1 գ-թ 132-133/

4. Քննիչ Հ. Դելեյանը 2010 թվականի հունվարի 22-ին զեկուցագիր է ներկայացրել Էրեբունու քննչական բաժնի պետ Ա. Մկրտչյանին և խնդրել է արձակուրդ մեկնելու կապակցությամբ թիվ 12136409 քրեական գործի նախաքննության կատարումը հանձնարարել մեկ այլ քննիչի: /տես` հ1 գ-թ 134/

5. ՀՀ ոստիկանության Էրեբունու քննչական բաժնի քննիչ Ա. Պետրոսյանը 2010 թվականի հունվարի 29-ի որոշմամբ` թիվ 12136409 քրեական գործն ընդունել է վարույթ և շարունակել նախաքննությունը: /տես` հ.1, գ-թ 135/

6. Քննիչ Ա. Պետրոսյանը 2010 թվականի փետրվարի 10-ին զեկուցագրով խնդրել է Էրեբունու քննչական բաժնի պետին ծանրաբեռնվածությունից ելնելով թիվ 12136409 քրեական գործի նախաքննության կատարումը հանձնարարել մեկ այլ քննիչի: /տես` հ1 գ-թ 136/

7. Էրեբունու քննչական բաժնի քննիչ Հ. Դելեյանը 2010 թվականի փետրվարի 11-ի որոշմամբ` թիվ 12136409 քրեական գործն ընդունել է վարույթ և շարունակել նախաքննությունը: /տես` հ.1, գ-թ 137/

8. Քննիչ Հ. Դելեյանի 2010 թվականի փետրվարի 17-ի որոշմամբ` միջնորդություն է հարուցվել թիվ 12136409 քրեական գործի նախաքննության նկատմամբ հսկողություն իրականացնող դատախազին` քրեական գործի նախաքննության ժամկետը մեկ ամսով` մինչև 2010 թվականի մարտի 20-ը երկարացնելու մասին:
ՀՀ գլխավոր դատախազության պատիժների և հարկադրանքի այլ միջոցների կիրառման օրինականության նկատմամբ հսկողություն իրականացնող վարչության ավագ դատախազ Ա. Ստեփանյանը թիվ 12136409 քրեական գործի նախաքննության ժամկետը երկարացրել է մեկ ամսով` մինչև 2010 թվականի մարտի 20-ը: /տես` հ.1 գ-թ 141-142/

9. Քննիչ Հ. Դելեյանի 2010 թվականի մարտի 16-ի որոշմամբ` Ռոբերտ Արմենի Դանիելյանը ներգրավվել է որպես մեղադրյալ ՀՀ քրեական օրենսգրքի 34-268 հոդվածի 2-րդ մասի 2-րդ կետով: /տես` հ.1 գ-թ 158/

10. Քննիչ Հ. Դելեյանի 2010 թվականի մարտի 16-ի որոշմամբ մեղադրյալ Ռ. Դանիելյանի նկատմամբ խափանման միջոց չի կիրառվել: /հ.1, գ-թ 160/

11. 2010 թվականի մարտի 24-ին քրեական գործը մեղադրական եզրակացությամբ ուղարկվել է առաջին ատյանի դատարան` ըստ էության քննելու համար: /տես` հ.2 գ-թ 2/

12. Առաջին ատյանի դատարանի 2010 թվականի մարտի 29-ի, 2010 թվականի ապրիլի 7-ի որոշումներով քրեական գործն ընդունվել է վարույթ և գործը նշանակվել է դռնբաց դատական նիստում քննության 2010 թվականի ապրիլի 14-ին, նախագահող դատավոր` Վ. Գրիգորյան: /տես` հ.2 գ-թ-3, 13/

13. Առաջին ատյանի դատարանը, արագացված դատաքննությամբ, 2010 թվականի ապրիլի 21-ի դատավճռով` Ռոբերտ Արմենի Դանիելյանին մեղավոր է ճանաչել ՀՀ քրեական օրենսգրքի 34-268 հոդվածի 2-րդ մասի 2-րդ կետով նախատեսված հանցանքում և դատապարտել է ազատազրկման 1 /մեկ/ տարի 6 /վեց/ ամիս ժամկետով: ՀՀ քրեական օրենսգրքի 67 հոդվածի 1–ին կետի համաձայն, նշանակված պատժին մասնակիորեն գումարել է ՀՀ Սյունիքի մարզի ընդհանուր իրավասության դատարանի 26.12.2008թ. դատավճռով նշանակված պատժի 1 տարի 7 ամիս 3 օր ժամկետով ազատազրկման ձևով չկրած մասից 1 տարի 6 ամիս ժամկետով ազատազրկումը և Ռոբերտ Արմենի Դանիելյանի նկատմամբ վերջնական պատիժ է նշանակել ազատազրկում 3 /երեք/ տարի ժամկետով, պատժի սկիզբը հաշվելով դատավճռի հրապարակման պահից` 2010թվականի ապրիլի 21-ից: /տես` հ.2 գ-թ 34-35/

14. Ամբաստանյալ Ռ. Դանիելյանը 2010 թվականի մայիսի 21-ին վերաքննիչ բողոք է ներկայացրել վերոհիշյալ դատավճռի դեմ: /տես` վերաքննիչ դատարանի նյութեր գ-թ 46/

15. Վերաքննիչ դատարանի 2010 թվականի հունիսի 1-ի որոշմամբ վերոհիշյալ վերաքննիչ բողոքն ընդունվել է վարույթ, նշանակվել է վերաքննիչ դատարանի դռնբաց դատական նիստում քննության: /տես` գ-թ 50-53/
Գործի փաստական հանգամանքները

16. Ամբաստանյալ Ռ. Դանիելյանը վերոհիշյալ դատավճռով մեղավոր է ճանաչվել այն բանի համար, որ ՀՀ քրեական օրենսգրքի 358 հոդվածի 1-ին մասով նախատեսված հանցագործություն կատարելու համար, ՀՀ Սյունիքի մարզի ընդհանուր իրավասության դատարանի 26.12.2008թ. թիվ. ՍԴ/0189/01/08/ դատավճռով, ՀՀ քրեական օրենսգրքի 67 հոդվածի կիրառմամբ դատապարտվել է ազատազրկման 3 /երեք/ տարի ժամկետով և 2009 թվականի մայիսի 5-ից պատիժ կրել ՀՀ ԱՆ ,,Էրեբունի,, քրեակատարողական հիմնարկում: Պատիժը կրելու ընթացքում, առանց իրացնելու նպատակի` իր օգտագործման համար, ամբաստանյալ Ռ. Դանիելյանը փորձել է ապօրինի ձեռք բերել ,,մարիխուանա,, տեսակի թմրամիջոց, որի համար զանգահարել է գործի քննությամբ չպարզված անձի և խնդրել թմրամիջոց հայթայթել: Վերջինս, 2009 թվականի հոկտեմբեր ամսին, նախաքննությամբ չպարզված անձից ձեռք է բերել խոշոր չափի` 24.952 գրամ չորացված մարիխուանա տեսակի թմրամիջոց, այն թաքցրել ,,Բոնուքս,, տեսակի լվացքի փոշու տուփի մեջ և մի քանի տուփ ծխախոտի, կրակայրիչի ու կենցաղային օգտագործման համար նախատեսված թղթի հետ, ամբաստանյալ Ռ. Դանիելյանին հանձնելու համար փոխանցել վերջինիս հորը` Արմեն Դանիելյանին: Տեղյակ չլինելով հանձնուքում թմրամիջոցի առկայության մասին և ֆինանսական հնարավորություն չունենալով հանձնուքն անձամբ որդուն տանելու համար, 2009 թվականի հոկտեմբերի 15-ին Ա.Դանիելյանն այն տվել է իր փեսային` Կարապետ Հունանյանին, որպեսզի վերջինս այցելի Ռ. Դանիելյանին և փոխանցի հանձնուքը: Այդ նպատակով 2009 թվականի հոկտեմբերի 15-ին ժամը 15-ի սահմաններում Կ. Հունանյանը եկել է ՀՀ ԱՆ ,,Էրեբունի,, քրեակատարողական հիմնարկ, որտեղ հիմնարկի աշխատակիցների կողմից կատարվել է հանձնուքի զննում և այդ ընթացքում էլ հայտնաբերվել է լվացքի փոշու տուփի մեջ թաքցված, խոշոր չափի` 24.952 գրամ չորացված մարիխուանա տեսակի թմրամիջոցը:

Վերաքննիչ բողոքի հիմքերը, հիմնավորումները և պահանջը

Վերաքննիչ բողոքը քննվում է հետևյալ հիմքերի սահմաններում ներքոհիշյալ հիմնավորումներով.
17. Վերաքննիչ բողոք բերողը` ամբաստանյալ Ռ. Դանիելյանը բողոքում մասնավորապես նշել է, որ ինքն իրեն լիովին մեղավոր է ճանաչել և զղջում է արածի համար:
Բողոքաբերը նշել է նաև, որ առաջին ատյանի դատարանում հաշվի չի առնվել այն, որ ինքը 20 տարեկան է, ունի հոգեկան խանգարումներ, որի համար հետազոտվել է Զինկոմիսարիատում և իրեն նշանակել են համապատասխան հիվանդության բուժում, ինչպես նաև հաշվի չի առնվել իր ընտանեկան վիճակը, որ ոչ հայրը և ոչ էլ մայրը չեն աշխատում, նրանք նույնպես ունեն խնդիրներ առողջության հետ կապված:

18. Վերոգրյալից ելնելով բողոք բեղողը խնդրել է վերանայել իր կատարած հանցանքը և կայացնել ավելի մեղմ պատիժ:

Վերաքննիչ դատարանի պատճառաբանությունները և եզրահանգումը
Վերաքննիչ դատարանը, քննության առնելով վերաքննիչ բողոքը` բողոքի հիմքերի և հիմնավորումների սահմաններում, ինչպես նաև ուսումնասիրելով, վերլուծելով գործի նյութերը, դրանք գնահատելով իրենց համակցությամբ, ղեկավարվելով ներքին համոզմամբ, հանգում է այն հետևության, որ վերաքննիչ բողոքը պետք է մերժել` դատական ակտը թողնելով օրինական ուժի մեջ, հետևյալ պատճառաբանությամբ.

19. ՀՀ քրեական դատավարության օրենսգրքի 360 հոդվածի 1-ին մասի համաձայն. <<Դատավճիռ կայացնելիս դատարանը ներկայացված հաջորդականությամբ լուծում է հետևյալ հարցերը`…
6/ ենթակա է արդյոք պատժի ամբաստանյալն իր կատարած հանցանքի համար.
7/ ինչ պատիժ պետք է նշանակվի ամբաստանյալի նկատմամբ.
8/ ամբաստանյալն արդյոք պետք է կրի իր նկատմամբ նշանակված պատիժը…>>:

20. ՀՀ քրեական օրենսգրքի 10-րդ հոդվածի 1-ին մասի համաձայն. <<1. Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար>>:

21. ՀՀ քրեական օրենսգրքի 48 հոդվածում սահմանված են պատժի հասկացությունը և նպատակները:
Համաձայն ՀՀ քրեական օրենսգրքի 48 հոդվածի. <<1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ:
2. Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները>>:

22. ՀՀ քրեական օրենսգրքի 61 հոդվածով սահմանված են պատիժ նշանակելու ընդհանուր սկզբունքները:
Վերոհիշյալ հոդվածի 1-ին մասի համաձայն. <<Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները>>:
Նույն հոդվածի 2-րդ մասի համաձայն. <<Պատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով>>:

23. ՀՀ քրեական օրենսգրքի 62 հոդվածի առաջին մասում նախատեսված են պատասխանատվությունը և պատիժը մեղմացնող հանգամանքները:
Նույն հոդվածի 2-րդ մասի համաձայն. <<Պատիժ նշանակելիս դատարանը կարող է հաշվի առնել նաև մեղմացնող այլ հանգամանքներ, որոնք նշված չեն սույն հոդվածի առաջին մասում>>:
23. ՀՀ քրեական օրենսգրքի 34-268 հոդվածի 2-րդ մասի 2-րդ կետով նախատեսված է պատիժ` առավելագույնը երեք տարի ժամկետով: ՀՀ քրեական օրենսգրքի 19 հոդվածի -րդ մասի համաձայն` այն դասվում է միջին ծանրության հանցագործությունների շարքին:

24. Համաձայն ՀՀ քրեական դատավարության օրենսգրքի 395 հոդվածի. <<Բողոքարկված դատական ակտը բեկանվում կամ փոփոխվում է, եթե թույլ է տրվել դատական սխալ, այն է`…
4/ դատավճռով նշանակված պատիժը չի համապատասխանում կատարված հանցանքի ծանրությանը և ամբաստանյալի անձին…>>:

25. ՀՀ քրեական դատավարության օրենսգրքի 399 հոդվածի 1-ին մասի համաձայն. <<Գտնելով, որ դատավճռում նշանակված պատիժն անարդարացի է ակնհայտ խիստ կամ ակնհայտ մեղմ լինելու պատճառով, չի համապատասխանում հանցագործության ծանրությանը և ամբաստանյալի անձին, վերաքննիչ դատարանը մեղմացնում կամ խստացնում է պատիժը` ղեկավարվելով պատիժ նշանակելու ընդհանուր սկզբունքներով>>:

26. Առաջին ատյանի դատարանը, ուսումնասիրելով ամբաստանյալի անձը բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքները, հաշվի առնելով առաջադրված մեղադրանքի հետ ամբաստանյալ Ռ. Դանիելյանի համաձայն լինելու փաստը, գտել է, որ ամբաստանյալ Ռ. Դանիելյանը կատարել է հանցանք, որը նախատեսված է ՀՀ քրեական օրենսգրքի 34-268 հոդվածի 2-րդ մասի 2-րդ կետով և նշված հոդվածով պետք է ենթարկվի պատասխանատվության:

27. Առաջին ատյանի դատարանը հանգելով ճիշտ հետևության, որ Ռոբերտ Դանիելյանին առաջադրված մեղադրանքը ապացուցված է, նրա նկատմամբ պատիժ է նշանակել, հաշվի առնելով կատարված հանցագործության բնույթն ու հանրության համար վտանգավորության աստիճանը, ամբաստանյալի անձը, այն, որ ամբաստանյալ Ռ. Դանիելյանը նախկինում արատավորված և երկու անգամ դատապարտված է եղել, հանցանքը կատարել է պատիժը կրելու ընթացքում, նախորդ դատավճռով նշանակված պատժից 21.04.2010թ. դրությամբ կրել է 1 տարի 4 ամիս 27 օր և ունի 1 տարի 7 ամիս 3 օր ժամկետով ազատազրկման ձևով պատժի չկրած մաս, ՀՀ ԱՆ <<Էրեբունի>> քրեակատարողական հիմնարկի վարչակազմի կողմից բնութագրվում է բացասական:
Ռոբերտ Դանիելյանի պատասխանատվությունը մեղմացնող հանգամանքներ առաջին ատյանի դատարանը չի հայտնաբերել:
Որպես պատասխանատվությունը ծանրացնող հանգամանք առաջին ատյանի դատարանը համարել է հանցանքը կատարելու ռեցիդիվը:

28. Վերաքննիչ դատարանը գտնում է, որ առաջին ատյանի դատարանը, պահպանելով ՀՀ քրեական օրենսգրքով նախատեսված պատիժ նշանակելու սկզբունքները, լիարժեք գնահատական տալով գործում առկա պատասխանատվությունը և պատիժը մեղմացնող հանգամանքներին, նշանակել է պատիժ, որը համապատասխանում է հանցագործության ծանրությանը և ամբաստանյալի անձին և, որ վերաքննիչ բողոքում նշված փաստարկները նշանակված պատիժը մեղմացնելու հիմք չեն կարող դառնալ:

29. Վերաքննիչ դատարանը գտնում է նաև, որ Ռոբերտ Դանիելյանն իր նկատմամբ նշանակված պատիժը պետք է կրի ազատազրկման ձևով:

30. Այսպիսով վերաքննիչ դատարանը նշված հիմքերով Երևան քաղաքի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանի 2010 թվականի ապրիլի 21-ի դատավճիռը համարում է ճիշտ, իսկ վերաքննիչ բողոքում նշված պատճառաբանություններն ու եզրահանգումներն` անհիմն:

Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-րդ հոդվածով, 394-րդ հոդվածի 1-ին մասի 1-ին կետով, 402-րդ, 404-րդ հոդվածներով, 412-րդ հոդվածի 1-ին մասով վերաքննիչ դատարանը

ՈՐՈՇԵՑ

1. Վերաքննիչ բողոքը մերժել:

2. Երևան քաղաքի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանի 2010 թվականի ապրիլի 21-ի դատավճիռը` Ռոբերտ Արմենի Դանիելյանի վերաբերյալ ՀՀ քրեական օրենսգրքի 34-268-րդ հոդվածի 2-րդ մասի 2-րդ կետով, թողնել օրինական ուժի մեջ:

3. Սույն որոշումն օրինական ուժի մեջ է մտնում հրապարակման պահից մեկամսյա ժամկետում:

4. Սույն որոշումը կարող է բողոքարկվել ՀՀ վճռաբեկ դատարան հրապարակման պահից մեկամսյա ժամկետում:

ՆԱԽԱԳԱՀՈՂ ԴԱՏԱՎՈՐ Ա. ՊԵՏՐՈՍՅԱՆ

ԴԱՏԱՎՈՐՆԵՐ Ռ. ԱԶԱՐՅԱՆ

Հ. ՏԵՐ-ԱԴԱՄՅԱՆ