Գործ թիվ ԵԷԴ/0028/01/10
2010թ


Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վ.Թ.ԳՐԻԳՈՐՅԱՆ
Քարտուղարությամբ Ա.ԱՐՂԱՄԱՆՅԱՆ
Մասնակցությամբ`
Մեղադրողներ Ա. ՍՏԵՓԱՆՅԱՆ
Հ. ՀԱՐՈՒԹՅՈՒՆՅԱՆ
Ամբաստանյալներ Ա. ՕՀԱՆՅԱՆ
Ա. ՄԱՐՏԻՐՈՍՅԱՆ
Ամբաստանյալների
պաշտպաններ Ա. ՔԱԼԱՇՅԱՆ
Հ. ԲԱՂԴԱՍԱՐՅԱՆ

2010 թվականի հուլիսի 07-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում քննեց քրեական գործն ըստ մեղադրանքի՝
1. Արեգ Հակոբի Օհանյանի ծնված 16.10.1982թ. Երևան քաղաքում, ազգությամբ հայ, Հայաստանի Հանրապետության քաղաքացի, միջնակարգ-մասնագիտական կրթությամբ, ամուսնացած, խնամքին մինչև 14 տարեկան երկու երեխաներ` ծնված 2005 և 2008 թվականներին, նախկինում չդատված, աշխատել է ՀՀ ԱՆ «Էրեբունի» ՔԿ հիմնարկում որպես բժշկական սպասարկման 3-րդ կարգի մասնագետ, հաշվառված է ք. Երևան, Նոր-Արեշ 19 փող. 3/1 տանը, փաստացի բնակվել է ք. Երևան, Բաշինջաղյան 2-րդ փող. 2-րդ ավտոտնակում։
Արգելանքի տակ է եղել 1 օր` 2009թ. դեկտեմբերի 30-ից 31-ը, կալանքի տակ է 2010թ. հունվարի 25-ից, ներկայումս ՀՀ ԱՆ «Նուբարաշեն» ՔԿ հիմնարկի կալանավոր է։
Մեղադրվում է ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերով։
Առաջադրված մեղադրանքում իրեն մեղավոր չի ճանաչել։
2. Առուշան Մնացականի Մարտիրոսյանի ծնված 30.03.1966թ. Կոտայքի մարզի Քարաշամբ գյուղում, ազգությամբ հայ, Հայաստանի Հանրապետության քաղաքացի, միջնակարգ կրթությամբ, ամուսնացած, խնամքին մեկ անձ, նախկինում 3 անգամ դատված.
1. Նաիրիի շրջանի ժողդատարանի 20.01.1989թ. դատավճռով ՀՀ քրեական օրենսգրքի 143-րդ հոդվածի 3-րդ մասով դատապարտվել է ազատազրկման 3 տարի ժամկետով, ազատվել է պայմանական վաղաժամկետ 13.07.1990թ. 1 տարի 4 ամիս 27 օր ՀՀ քրեական օրենսգրքի 49-րդ հոդվածի կիրառմամբ։
2. Նաիրիի շրջանի ժողդատարանի 09.10.1996թ. դատավճռով ՀՀ քրեական օրենսգրքի 229-րդ հոդվածի 5-րդ մասով դատապարտվել է ազատազրկման 6 ամիս ժամկետով։ Ազատվել է 21.01.1997թ. պատժի ժամկետը լրանալուց հետո։
3. Կոտայքի մարզի ժողդատարանի 09.07.1999թ. դատավճռով ՀՀ քրեական օրենսգրքի 99-րդ հոդվածի 6-րդ կետով դատապարատվել է ազատազրկման 11 տարի ժամկետով։ 04.08.2003թ. արարքը համապատասխանեցվել է ՀՀ քրեական օրենսգրքի 104-րդ հոդվածի 2-րդ մասի 5-րդ կետին` սահմանելով ազատազրկում 11 տարի ժամկետով, դատապարտյալը ներկայումս ՀՀ ԱՆ «Նուբարաշեն» ՔԿ հիմնարկի կալանավոր է, խափանման միջոցն ընտրվել է կալանավորում 2010թ. փետրվարի 05-ից։
Մեղադրվում է ՀՀ քրեական օրենսգրքի 34-268-րդ հոդվածի 2-րդ մասի 1-ին և 2-րդ կետերով և 34-266-րդ հոդվածի 4-րդ մասով։
Առաջադրված մեղադրանքում իրեն մեղավոր չի ճանաչել։

1. Գործի դատավարական նախապատմությունը։
ա/ 2009թ. դեկտեմբերի 15-ի դրվագով
ՀՀ ԱՆ «Էրեբունի» քրեակատարողական հիմնարկի վարչական շենքի 1-ին մուտքի շքամուտք կարելի է մուտք գործել դրսից երկրորդ հարկ բարձրացող աստիճանավանդակով։ Մուտքն ազատ է նաև քաղաքացիների համար։
Աստիճաններից բարձրանալով 2-րդ հարկ, աջից մուտքի առաջին դուռը «Էրեբունի» ՔԿ հիմնարկի տնտեսական ապահովման բաժնի պետ Մանվել Պետրոսյանի աշխատասենյակի դուռն է։
2009 թվականի նոյեմբեր ամսին չճշտված օրերին աշխատանքային օրվա ավարտին երկու անգամ ՎԱԶ-2107 մակնիշի տաքսի ավտոմեքենայի վարորդը, ձեռքին ունենալով ջրի դատարկ տարա, աստիճանավանդակով մուտք է գործել քրեակատարողական հիմնարկի 1-ին շքամուտք` ավտոմեքենայի համար ջուր վերցնելու պատրվակով։ Ավտովարորդը վարչական շենքում «ոտքը կախ է գցել»` հապաղել է շենքից դուրս գալ։ Տնտեսական ապահովման բաժնի պետն այդ մասին զեկուցել է ՔԿ հիմնարկի պետին։ Կասկածանք է առաջացել այն մասին, որ տաքսի ավտոմեքենայի վարորդի միջոցով ՔԿ հիմնարկ թմրամիջոց է փոխադրվում։ Ձեռնարկվել են համապատասխան օպերատիվ-հետախուզական միջոցառումներ։
Օպերատիվ տվյալներ են ստացվել այն մասին, որ տաքսի ավտոմեքենայի վարորդը ծխախոտատուփի մեջ դրված թմրամիջոցն աննկատ տեղադրում է մասնաշենքի միջանցքի վերջում դրված չօգտագործվող չհրկիզվող պահարանի տակ, որտեղից այն վերցվում և փոխանցվում է դատապարտյալներին։
Մասնավորապես օպերատիվ տվյալ է ստացվել այն մասին, որ նշված թաքստոցում տեղադրվելու է թմրամիջոց, որը ՔԿՀ բժշկական սպասարկման բաժնի 3-րդ կարգի մասնագետ Արեգ Օհանյանը պետք է վերցնի և հանձնի դատապարտյալ Առուշան Մարտիրոսյանին։
Օպերատիվ տվյալների իրացման միջոցառումը նախատեսված է եղել իրականացնել 15.12.2009թ.։ Նշված օրը առավոտյան ստուգվել է մասնաշենքի միջանցքի վերջում գտնվող չօգտագործվող չհրկիզվող պահարանի տակ, այնտեղ ոչինչ, այդ թվում` դրված ծխախոտատուփ առկա չի եղել։
15.12.2009թ. ժամը 12.30-ի սահմաններում «Էրեբունի» ՔԿ հիմնարկի վարչական մասնաշենքին է մոտեցել «Լադա» տաքսի ծառայության «ՎԱԶ-2107» մակնիշի սպիտակ գույնի ՏՏ 3116 դեղին պետհամարանիշով ավտոմեքենան, որը վարել է ավտովարորդ, գործով հետախուզվող մեղադրյալ Սամվել Սարգսյանը։ Ավտոմեքենայի մեջ ուղևոր չի եղել։ Ավտովարորդը բացել է ավտոմեքենայի շարժիչի ծածկոցը, ապա իր հետ վերցնելով ջրի տարան, բարձրացել է մասնաշենք, որոշ ժամանակ անց վերադարձել է ջրով լի տարայով, ջուր է լցրել ավտոմեքենայի մեջ և հեռացել։
Քիչ անց շքամուտք է մտել բուժաշխատող Արեգ Օհանյանը։
Օպերատիվ միջոցառումն իրականացնող խմբի անդամները դեռևս չեն կարողացել ճշտել, թե ավտովարորդի հեռանալուց հետո մասնաշենքի միջանցքում դրված չհրկիզվող պահարանի տակ ծխախոտատուփ տեղադրվել է, թե ոչ, երբ մասնաշենքից դուրս եկել և աստիճանավանդակից իջել են ՀՀ ԱՆ «Էրեբունի» ՔԿ հիմնարկի բժշկական ծառայության պետ, փոխգնդապետ Հայկ Հարությունյանը և նրա եղբորորդին, ՔԿ հիմնարկի բժշկական սպասարկման 3-րդ կարգի մասնագետ, ամբաստանյալ Արեգ Օհանյանը։
Ենթադրելով, որ Արեգ Օհանյանն արդեն վերցրել է ավտովարորդ Սամվել Սարգսյանի կողմից միջանցքի չհրկիզվող պահարանի տակ դրված, թմրամիջոց պարունակող ծխախոտատուփը, օպերատիվ միջոցառումն իրականացնող` ՀՀ ԱՆ ՔԿ վարչության աշխատակիցները, ձեռնաշղթաներ հագցնելով Արեգ Օհանյանին, նրան տարել են վարչական մասնաշենք և ենթարկել անձնական խուզարկության, որի ժամանակ Արեգ Օհանյանի մոտ թմրամիջոց և ծխախոտատուփ չեն հայտնաբերել, այլ հայտնաբերել են երկու կրակայրիչներ, թաշկինակ, բջջային հեռախոս և դրամապանակում գտնվող ընդամենը 145.000 ՀՀ դրամ` թղթադրամի տեսքով, բանկոմատի քարտ։
Այնուհետև տված բացատրության մեջ ընդունելով, որ չհրկիզվող պահարանի տակ դրված թմրամիջոցը պետք է վերցներ և հանձներ դատապարտյալ Առուշան Մարտիրոսյանին, սակայն հորեղբորը հանդիպելու պատճառով չի կարողացել վերցնել, Արեգ Օհանյանը մատնացույց է արել երկաթյա չհրկիզվող պահարանը, որի տակից հայտնաբերվել է «BOND» մակնիշի ծխախոտի տուփ, որի մեջ առկա է եղել պոլիէթիլենային փաթեթ` յուրահատուկ սուր հոտով չոր զանգվածով 1,2 գրամ քաշով։
Դատավարական կարգի համաձայն նշված գործողությունն արձանագրվել է, հայտնաբերված զանգվածն առգրավվել, կշռվել, լուսանկարահանվել, փաթեթավորվել և կնքվել է։
Բերման ենթարկվել և խուզարկվել է ավտովարորդ Սամվել Սարգսյանը, ով բացատրություն տալուց հետո բաց է թողնվել և դիմել է փախուստի։
Դատաքիմիական փորձաքննության 17.12.2009թ. թիվ 623Ֆ եզրակացության համաձայն` հայտնաբերված զանգվածը 1,85 գրամ չոր քաշով մուգ շագանակագույն փոշեբյուրեղային նյութը հանդիսանում է «Ացետիլացված ափիոն» տեսակի թմրամիջոց։
Նախապատրաստված նյութերը 24.12.2009թ. հանձնվել են ՀՀ հատուկ քննչական ծառայությանը։
Փաստի առթիվ ՀՀ հատուկ քննչական ծառայության կողմից 26.12.2009թ. ՀՀ քրեական օրենսգրքի 266-րդ հոդվածի 2-րդ մասի 2-րդ կետով հարուցվել է թիվ 62209709 քրեական գործը և կատարվել է նախաքննություն։
30.12.2009թ. Արեգ Օհանյանը ձերբակալվել է։
31.12.2009թ. Արեգ Օհանյանին մեղադրանք է առաջադրվել ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերով։
31.12.2009թ. Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը մերժել է ՀՀ հատուկ քննչական ծառայության քննիչի միջնորդությունը` Արեգ Հակոբի Օհանյանի նկատմամբ կալանավորումը որպես խափանման միջոց կիրառելու մասին։
31.12.2009թ. նախաքննական մարմնի կողմից որպես խափանման միջոց է ընտրվել ստորագրություն չհեռանալու մասին։
25.01.2010թ. որոշմամբ ՀՀ քրեական վերաքննիչ դատարանը բավարարել է Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 31.12.2009թ. որոշման դեմ ՀՀ գլխավոր դատախազության բողոքը, բեկանել է նշված որոշումը և Արեգ Օհանյանի նկատմամբ որպես խափանման միջոց է ընտրել կալանավորումը։
29.01.2010թ. Առուշան Մնացականի Մարտիրոսյանին մեղադրանք է առաջադրվել ՀՀ քրեական օրենսգրքի 34-268-րդ հոդվածի 2-րդ մասի 2-րդ կետով, խափանման միջոց չի ընտրվել, նա շարունակել է պատիժը կրել ՀՀ ԱՆ «Էրեբունի» ՔԿ հիմնարկում։
22.02.2010թ. որոշումներ են կայացվել տաքսի ավտոմեքենայի ավտովարորդ Սամվել Ալբերտի Սարգսյանին ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերով որպես մեղադրյալ ներգրավելու, հետախուզում հայտարարելու մասին։
22.02.2010թ. Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի որոշմամբ Սամվել Ալբերտի Սարգսյանի նկատմամբ որպես խափանման միջոց ընտրվել է կալանավորումը։
05.03.2010թ. Արեգ Օհանյանին մեղադրանք է առաջադրվել ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերով, իսկ 09.03.2010թ. Առուշան Մարտիրոսյանին մեղադրանք է առաջադրվել ՀՀ քրեական օրենսգրքի 34-268-րդ հոդվածի 2-րդ մասի 2-րդ կետով։
09.03.2010թ. քրեական գործից անջատվել է հետախուզման մեջ գտնվող ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերով մեղադրվող Սամվել Ալբերտի Սարգսյանի մասը, անջատված մասին շնորհվել է 62201910 քրեական գործի համարը։
Մեղադրական եզրակացությունը հաստատվել է 12.03.2010թ., քրեական գործը Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանում մուտք է եղել 15.03.2010թ., շնորհվել է ԵԷԴ/0028/01/10 համարը։
Քրեական գործը դատարանի վարույթ է ընդունվել 17.03.2010թ.։ Դատարանի 22.03.2010թ. որոշմամբ դատական քննությունը նշանակվել է 2010թ. ապրիլի 1-ին։ Նշված օրը սկսվել է դատաքննությունը։

բ/ 2010թ. փետրվարի 02-ի դրվագով

ՀՀ հատուկ քննչական ծառայության վարույթում քննվող քրեական գործով ՀՀ քրեական օրենսգրքի 34-268-րդ հոդվածի 2-րդ մասի 2-րդ կետով մեղադրվող Առուշան Մնացականի Մարտիրոսյանը ՀՀ ԱՆ «Էրեբունի» ՔԿ հիմնարկում շարունակել է կրել Կոտայքի մարզի ընդհանուր իրավասության դատարանի 09.07.1999թ. դատավճռով նշանակված պատիժը։
2010 թվականի փետրվարի 02-ին ժամը 11.30-ի սահմաններում բնակելի գոտում «Էրեբունի» ՔԿ հիմնարկի օպերատիվ բաժնի պետ Հ.Ասատրյանին է մոտեցել դատապարտյալ Արամ Գեղամի Եղիազարյանը, ով մշտապես բնակելի գոտուց դուրս իրականացրել է շրջակայքի սանիտարական մաքրման աշխատանքները։ Վերջինս հայտնել է Հ.Ասատրյանին, որ դատապարտյալ Առուշան Մարտիրոսյանը նույն օրը ժամը 08.30-ին իրենից պահանջել է, որպեսզի ինքը բնակելի գոտուց դուրս գալուց հետո մուտքի աստիճանների տակ դրված աղբարկղից վերցնի ծխախոտի տուփը, որի մեջ թմրամիջոց կա և իր հետ բերի բնակելի գոտի։
ՔԿ հիմնարկի օպերատիվ բաժնի պետ Հ.Ասատրյանը այդ մասին զեկուցագիր է գրել ՔԿ հիմնարկի պետին, նույն օրը 02.02.2010թ. ժ.1155-ին դատավարական կարգի պահպանմամբ հետաքննիչի կողմից տեղազննություն է կատարվել։ Դատապարտյալ Արամ Եղիազարյանի ցույց տված վայրից` հիմնարկի վարչական մասնաշենքի մուտքի աստիճանավանդակի տակ դրված, հողին ամրացված մետաղյա աղբամանի մեջ հայտնաբերվել է Davidoff Gold մակնիշի ծխախոտի տուփ` փաթեթավորված կպչուն ժապավենով, որի մեջ առկա են եղել երկու ներարկիչներ, որոնցից մեկի մեջ լցված է եղել 10մլ ծավալի անգույն հեղուկ, երկրորդում` 4մլ ծավալի մուգ շագանակագույն` սևին հարող զանգված։ Ներարկիչների ծայրերը եղել են հալեցված-փակված վիճակում։ Նշվածը դատավարական կարգի պահպանմամբ առգրավվել, փաթեթավորվել և կնքվել են, դեպքի վայրն ու հայտնաբերված առարկաները լուսանկարահանվել են։
Նշված տեղազննությունից հետո Առուշան Մարտիրոսյանը ՀՀ հատուկ քննչական ծառայության ՀԿԳ քննիչի հանձնարարությամբ 02.02.2010թ. տեղափոխվել է ՀՀ ԱՆ «Նուբարաշեն» ՔԿ հիմնարկ, 62209709 քրեական գործով 05.02.2010թ. նրա նկատմամբ որպես խափանման միջոց ընտրվել է կալանավորումը։
Թմրամիջոցների քրեագիտական հետազոտության արդյունքում փորձագետի 03.02.2010թ. թիվ 02501005 եզրակացության համաձայն, 02.02.2010թ. «Էրեբունի» ՔԿՀ աղբամանում հայտնաբերված ծխախոտատուփի մեջ գտնված ներարկիչներից մեկում առկա է 11մլ ծավալով, սուր հոտով թափանցիկ հեղուկ, որը հանդիսանում է «Քացախաթթվի անհիդրիդ» տեսակի պրեկուրսոր, իսկ երկրորդ ներարկիչում առկա 5,585 գրամ մաքուր քաշով գորշ գույնի կոշտ զանգվածը հանդիսանում է 5,56 գրամ հաստատուն քաշով, տնայնագործական եղանակով պատրաստված «Ափիոն» տեսակի թմրամիջոց։
Նախապատրաստված նյութերն ուղարկվել են ըստ քննչական ենթակայության, ՀՀ ոստիկանության ՔԳՎ Էրեբունու քննչական բաժնի կողմից 10.02.2010թ. ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերով և 266-րդ հոդվածի 4-րդ մասով հարուցվել է թիվ 12104710 քրեական գործը և կատարվել է նախաքննություն։
06.04.2010թ. Առուշան Մարտիրոսյանին մեղադրանք է առաջադրվել ՀՀ քրեական օրենսգրքի 34-268-րդ հոդվածի 2-րդ մասի 1-ին և 2-րդ կետերով և 34-266-րդ հոդվածի 4-րդ մասով։ Քրեական գործից թմրամիջոցը իրացնողի վերաբերյալ մաս է անջատվել, հարուցվել է քրեական գործ, այն անջատվել է առանձին վարույթում քննելու համար։ Քրեական գործը մեղադրական եզրակացությամբ 05.05.2010թ. մուտք է եղել Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարան, որին շնորհվել է թիվ ԵԷԴ/0043/01/10 համարը։
Քրեական գործը վարույթ է ընդունվել 06.05.2010թ.։
2010թ. մայիսի 10-ին դատարանը որոշում է կայացրել երկու` թիվ ԵԷԴ/0028/01/10 և թիվ ԵԷԴ/0043/01/10 քրեական գործերը միացնելու և քրեական գործին թիվ ԵԷԴ/0028/01/10 համար շնորհելու մասին։
2010թ. մայիսի 17-ին դատական նիստի ժամանակ դատաքննությունը վերսկսվել է։
ՀՀ քրեական դատավարության օրենսգրքի 34-րդ, 54-րդ, 309-րդ և 3091-րդ հոդվածների հիմքով մեղադրող կողմը ամբաստանյալ Առուշան Մարտիրոսյանին առաջադրված մեղադրանքը փոփոխել և նրան նոր մեղադրանք է առաջադրել ՀՀ քրեական օրենսգրքի 34-268-րդ հոդվածի 2-րդ մասի 1-ին և 2-րդ կետերով և 34-266-րդ հոդվածի 4-րդ մասով։

2.Դատաքննությամբ ձեռք բերված ու հետազոտված ապացույցները։
Դատաքննությամբ հետազոտվել են մեղադրանքի հիմքում դրված բոլոր այն ապացույցները, որոնք թվարկված են մեղադրական եզրակացության մեջ։
Ապահովելով դատաքննության լրիվությունը, բազմակողմանիությունն ու օբյեկտիվությունը և ղեկավարվելով գործի արդար քննությանը վերաբերող սահմանադրական և դատավարական նորմերի դրույթներով, հիմնվելով պատշաճ ընթացակարգի շրջանակներում դատական քննության ընթացքում գործի հանգամանքների հետազոտման արդյունքի վրա, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով, դատարանը գտնում է, որ սույն քրեական գործով պետք է կայացվի մեղադրական դատավճիռ։
Ամբաստանյալ Արեգ Օհանյանը ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերով առաջադրված մեղադրանքում իրեն մեղավոր չի ճանաչել և նախաքննության ու դատաքննության ժամանակ ցուցմունք է տվել այն մասին, որ ավտովարորդ Սամվել Սարգսյանին չի ճանաչել, նրա հետ երբևէ հեռախոսազրույց չի ունեցել, նրանից թմրամիջոց ձեռք չի բերել։
Ինքն աշխատել է ՀՀ ԱՆ «Էրեբունի» ՔԿ հիմնարկում որպես բժշկական սպասարկման 3-րդ կարգի մասնագետ, իր աշխատանքի բերումով ճանաչել է դատապարտյալ Առուշան Մարտիրոսյանին։ Իր և վերջինիս միջև որոշակի մտերիմ հարաբերություններ են ստեղծվել։ 2009թ. դեկտեմբերի 7-ին Առուշան Մարտիրոսյանն իրեն ասել է, որ մարդ է գալու և վարչական շենքի 2-րդ հարկի չհրկիզվող պահարանի տակ թմրամիջոց է դնելու, խնդրել է այն վերցնել և հանձնել իրեն, որի համար վարձահատույց լինելու մասին իրենց միջև որևէ խոսակցություն չի եղել և պայմանավորվածություն ձեռք չի բերվել։ Ինքը մերժել է Առուշան Մարտիրոսյանին։ Որոշ ժամանակ անց իր բջջային 091-35-55-05 հեռախոսահամարին 094-49-14-34 հեռախոսահամարից կարճ հաղորդագրություն է ստացվել այն մասին, որ «արդեն սեյֆի տակ ա»։ Որոշ ժամանակ անց Առուշան Մարտիրոսյանն իրեն զանգահարել է նույն խնդրանքով, ինքը կտրականապես մերժել է նրան, իսկ բնակելի գոտի գնալուց հետո խոսել է Առուշան Մարտիրոսյանի հետ, որպեսզի այլևս թմրամիջոցի հարցով իրեն չդիմի։
2009թ. դեկտեմբերի 15-ին ժամը 08.30-ի սահմաններում վերստին զանգ է ստացել Առուշան Մարտիրոսյանից այն մասին, որպեսզի չհրկիզվող պահարանի տակից վերցնի և իրեն փոխանցի թմրամիջոցը, ինքը մերժել է նրա խնդրանքը։
Ժամը 11-ի սահմաններում Առուշան Մարտիրոսյանը մոտեցել և նույն խնդրանքով դիմել է իրեն, սակայն նորից մերժում է ստացել։ Ժամը 13.30-ի սահմաններում, երբ ինքը դուրս է եկել ռեժիմային գոտուց և գնացել վարչական մասնաշենք, հանդիպել է հորեղբորը` բուժծառայության պետ Հայկ Հարությունյանին, ում հետ դուրս են եկել` ընդմիջման համար խանութից սննդամթերք գնելու, իրեն են մոտեցել քրեակատարողական վարչության աշխատակիցները, ձեռնաշղթաներ են հագցրել իրեն, իրեն ենթարկել են անձնական խուզարկության, սակայն իր մոտից որևէ արգելված իր չի հայտնաբերվել։ Ինքը ՔԿ վարչության աշխատակիցներին հայտնել է Առուշան Մարտիրոսյանի կողմից իրեն արած առաջարկության մասին, ցույց է տվել չհրկիզվող պահարանը, որտեղ պետք է լիներ թմրամիջոցը, այն հայտնաբերվել է։ Թմրամիջոցը Առուշան Մարտիրոսյանին հանձնելու մտադրության մասին ինքը խոստովանական բացատրություն է տվել իր նկատմամբ իրականացված հոգեբանական ներգործության արդյունքում, ինչպես նաև իր աշխատանքային ընկեր հետաքննիչ Կ.Կիրակոսյանի հորդորով ու նրան հավատալով։

Հատոր 1 Գ.Թ. 53-55, 66, 97-98, 207-209, 271-272, 283,
դատաքննության արձանագրություն

Ամբաստանյալ Առուշան Մարտիրոսյանը ՀՀ քրեական օրենսգրքի 34-268-րդ հոդվածի 2-րդ մասի 1-ին և 2-րդ կետերով և 34-266-րդ հոդվածի 4-րդ մասով առաջադրված մեղադրանքում իրեն մեղավոր չի ճանաչել, ժխտել է իր առնչությունը 15.12.2009թ. «Էրեբունի» ՔԿ հիմնարկի վարչական մասնաշենքի միջանցքի չհրկիզվող պահարանի տակ ծխախոտատուփի մեջ հայտնաբերված խոշոր չափի` 1,85 գրամ «Ացետիլացված ափիոն» տեսակի թմրամիջոցի, ինչպես նաև` 2010թ. փետրվարի 2-ին նույն ՔԿ հիմնարկի ազատ գոտու աղբամանում դրված ծխախոտատուփի մեջ հայտնաբերված խոշոր չափի 5,56 գրամ «Ափիոն» տեսակի թմրամիջոցի և 11մլ ծավալով պրեկուրսոր հանդիսացող քացախաթթվի անհիդրիդի հետ։ Ամբաստանյալ Առուշան Մարտիրոսյանը ժխտել է նաև տաքսի ավտոմեքենայի վարորդ Սամվել Սարգսյանին ճանաչելու, նրա հետ հեռախոսային կապ պահպանելու և նրա միջոցով թմրամիջոց իրացնելու, նշված թմրամիջոցն իրեն հանձնելու հարցով Արեգ Օհանյանին դիմելու, ինչպես նաև` 02.02.2010թ. թմրամիջոցն աղբարկղից բերելու և իրեն հանձնելու մասին դատապարտյալ Արամ Եղիազարյանին դիմելու հանգամանքները։
Մեղադրանքի 2-րդ դրվագի փաստով հարուցված թիվ 12104710 քրեական գործով նախաքննության ժամանակ Առուշան Մարտիրոսյանն ընդհանրապես հրաժարվել է ցուցմունք տալուց։

Հատոր 1 Գ.Թ. 94-95, 97-98, 124, 224-225, 271-272, 273, 292
Հատոր 2 Գ.Թ. 30, 62, 69, դատաքննության արձանագրություն

Նախաքննությամբ ու դատաքննությամբ ձեռք բերված և ստուգված ապացույցները հետևյալներն են.

ա/ 2009թվականի դեկտեմբերի 15-ի դրվագով.
2009թվականի դեկտեմբերի 15-ին Արեգ Օհանյանը բացատրություն է տվել /այն անձամբ է գրառել/ այն մասին, որ աշխատելով ՀՀ ԱՆ «Էրեբունի» ՔԿ հիմնարկում որպես բուժծառայության 3-րդ կարգի մասնագետ, ճանաչել է դատապարտյալ Առուշան Մարտիրոսյանին։ Վերջինս իմացել է իր ոչ կանոնադրական պահվածքի, այն է` մի քանի դատապարտյալների գումար, բջջային հեռախոս փոխանցելու մասին, իր ունեցած տեղեկատվությունն օգտագործելով, իր նկատմամբ բարոյական ճնշում է գործադրել, պահանջելով, որպեսզի ինքն ազատ ելումուտ ունենալու հանգամանքից օգտվելով, բաց գոտուց, կոնկրետ` վարչական մասնաշենքի միջանցքում դրված չհրկիզվող պահարանի տակ դրված ծխախոտատուփով թմրամիջոցը 15.12.2009թ. վերցնի, բերի բնակելի գոտի և հանձնի իրեն։ Ինքը չի իմացել, թե ո՞վ էր բերելու թմրամիջոցը և իր ծառայության համար Առուշանից գումար չէր ստանալու։ Ինքը համաձայնվել է Առուշանի առաջարկին, 15.12.2009թ. երկու անգամ բջջային հեռախոսով խոսել է Առուշանի հետ նրա 094-49-14-34 հեռախոսահամարից, սակայն վարչական մասնաշենքում իրեն է հանդիպել հորեղբայրը` բժշկական ծառայության պետ Հակ Հարությունյանը, այդ պատճառով չի կարողացել վերցնել թմրամիջոցը։ Նրա առաջարկով դուրս են եկել մասնաշենքից` ընդմիջման համար սննդամթերք գնելու, դրսում իր համար անակնկալ կարգով ՔԿ վարչության աշխատողներն իրեն տարել և անձնական խուզարկության են ենթարկել։

Հատոր 1 Գ.Թ. 7-8

Քննիչի որոշմամբ ՀՀ քրեական դատավարության օրենսգրքի 122-րդ հոդվածի կարգով նշված բացատրությունը ճանաչվել է ապացույց` այլ փաստաթուղթ։

Հատոր 1 Գ.Թ. 49

ՀՀ ԱՆ «Էրեբունի» ՔԿ հիմնարկի վարչական մասնաշենքի միջանցքի և դրա վերջնամասում գտնվող չհրկիզվող երկաթյա պահարանի զննությամբ այն մասին, որ Արեգ Օհանյանի մատնանշած վայրում` ՔԿՀ վարչական մասնաշենքի 2-րդ հարկի միջանցքի վերջում գտնվող չհրկիզվող պահարանի տակ հայտնաբերվել է «BOND» մակնիշի ծխախոտի տուփ, որի մեջ պոլիէթիլենային փաթեթով առկա է եղել մուգ գույնի յուրահատուկ սուր հոտով չոր զանգված, այն կշռել է 1,2 գրամ։ Նշված զանգվածը փաթեթավորվել և կնքվել է։ Կազմվել են շինության և օբյեկտի զննության արձանագրություններ, որոնց մեջ Արեգ Օհանյանն իր ձեռքով հայտարարություններ է գրել այն մասին, որ նշված չհրկիզվող պահարանի տակից պետք է վերցներ և Առուշանին փոխանցեր թմրամիջոցը, սակայն չի կարողացել դա անել, քանի որ հորեղբոր` Հայկ Հարությունյանի աշխատասենյակի դուռը բաց էր, ինքը ներս է մտել աշխատասենյակ, իսկ մնացածի մասին մանրամասն նշել է իր բացատրության մեջ։ Նշված արձանագրություններին կցվել են կատարված գործողության ընթացքը և հայտնաբերված թմրամիջոցը պատկերող լուսանկարները։

Հատոր 1 Գ.Թ. 10, 11-13, 14, 15-17

Դատաքիմիական փորձաքննության 17.12.2009թ. թիվ 623Ֆ եզրակացության համաձայն` չհրկիզվող պահարանի տակից ծխախոտատուփով հայտնաբերված չոր զանգվածը հանդիսանում է 1,85 գրամ չոր քաշով մուգ շագանակագույն փոշեբյուրեղային նյութ` «Ացետիլացված ափիոն» տեսակի թմրամիջոց։

Հատոր 1 Գ.Թ. 38-39

Նշված թմրամիջոցը և «BOND» տեսակի ծխախոտի տուփը ճանաչվել են իրեղեն ապացույց։
Հատոր 1 Գ.Թ. 262-263

Ամբաստանյալ Արեգ Օհանյանի նախաքննական և դատաքննական ցուցմունքներով այն մասին, որ Առուշան Մարտիրոսյանն իրեն մի քանի անգամ խնդրել է ինչպես անձնական հանդիպումների ժամանակ, այնպես էլ` 094-49-14-34 հեռախոսհամարից իր բջջային հեռախոսհամարին զանգահարելու միջոցով վերցնել վարչական մասնաշենքի չհրկիզվող պահարանի տակ դրված թմրամիջոցը և հանձնել իրեն, սակայն ինքը հրաժարվել է Ա.Մարտիրոսյանի պահանջը կատարելուց։
Նույն ցուցմունքը նա պնդել է ամբաստանյալ Առուշան Մարտիրոսյանի հետ առերես հարցաքննության ժամանակ։

Հատոր 1 Գ.Թ. 7-8, 53-55, 207-209, 271-272,
դատաքննության արձանագրություն

Գործով վկաներ, ՀՀ ԱՆ ՔԿ վարչության և «Էրեբունի» ՔԿ հիմնարկի աշխատակիցներ Գուրգեն Մադոյանը, Վազգեն Առաքելյանը, Պետրոս Մուշեղյանը և Հրանտ Քալանթարովը նախաքննության և դատաքննության ժամանակ ցուցմունքներ են տվել այն մասին, որ ստացված օպերատիվ տվյալների համաձայն 2009 թվականի դեկտեմբերի 15-ին տաքսի ավտոմեքենայի ավտովարորդ Սամվելը թմրամիջոց էր բերելու «Էրեբունի» ՔԿ հիմնարկի վարչական մասնաշենք, այն թաքցնելու, երկրորդ հարկի միջանցքի չհրկիզվող պահարանի տակ։ Թմրամիջոցը նախատեսված էր լինելու դատապարտյալ Առուշան Մարտիրոսյանի համար։ Թմրամիջոցը չհրկիզվող պահարանի տակից պետք է վերցներ և բնակելի գոտի տաներ բուժաշխատող Արեգ Օհանյանը և հանձներ Առուշան Մարտիրոսյանին։ Ստացված օպերատիվ հաղորդման կապակցությամբ կազմվել է օպերատիվ խումբ, որը վարչական շենքի մոտ դարանակալել և սպասել է տաքսի ավտոմեքենայի վարորդ Սամվել Սարգսյանին։ Վերջինիս սպասել են ժամը 12.00-ի սահմաններում։ Մինչև ավտովարորդի գալը Գուրգեն Մադոյանը մուտք է գործել վարչական շենք, անձամբ զննել և համոզվել է, որ միջանցքի չհրկիզվող պահարանի տակ որևէ իր կամ առարկա չկա։
Ժամը 12.30-ի սահմաններում «Լադա» տաքսի ծառայության «ՎԱԶ-2107» մակնիշի ավտոմեքենայով եկել է Սամվել Սարգսյանը, ջուր վերցնելու պատրվակով մտել է մասնաշենքի առաջին մուտք, բարձրացել 2-րդ հարկ, կարճ ժամանակ անց ջրով լի տարայով վերադառնալով, ջուրը լցրել է ավտոմեքենայի շարժիչի մոտ գտնվող ջրամանի մեջ և ավտոմեքենայով հեռացել ՔԿ հիմնարկի տարածքից։ Ավտովարորդի հեռանալուց հետո վարչական մասնաշենքի նշված մուտք է մտել Արեգ Օհանյանը, քիչ անց նա շենքից դուրս է եկել հորեղբոր` բժշկական մասի պետ Հայկ Հարությունյանի հետ միասին։ Կարծելով, որ Արեգ Օհանյանն արդեն հասցրել է չհրկիզվող պահարանի տակից հանել թմրամիջոցը և այն արդեն Արեգ Օհանյանի մոտ է, օպերատիվ խմբի անդամները մոտեցել են Արեգ Օհանյանին, նրա ձեռքերին ձեռնաշղթաներ հագցրել և տարել են աշխատասենյակներից մեկը, ենթարկել անձնական խուզարկության, սակայն Արեգ Օհանյանի մոտ թմրամիջոց չի հայտնաբերվել։
Որոշ ժամանակ անց Արեգ Օհանյանը բացատրություն է տվել այն մասին, որ թմրամիջոցը նախատեսված է եղել Առուշան Մարտիրոսյանի համար, վերջինիս խնդրանքով ինքը պետք է այն վերցներ և բնակելի գոտում հանձներ Առուշան Մարտիրոսյանին, սակայն մինչև չհրկիզվող պահարանին մոտենալը հանդիպել է հորեղբորը` բուժմասի պետ Հայկ Հարությունյանին, այդ պատճառով չի կարողացել թմրամիջոցը վերցնել։
Արեգ Օհանյանն այնուհետև մատնացույց է արել չհրկիզվող պահարանը, որի տակից «BOND» տեսակի ծխախոտատուփից հայտնաբերվել և առգրավվել է թմրամիջոցը։

Հատոր 1 Գ.Թ. 160-162, դատաքննության արձանագրություն

Գործով վկա, ՀՀ ԱՆ ՔԿՎ «Էրեբունի» ՔԿ հիմնարկի դատապարտյալ Արսեն Պողոսյանը ցուցմունք է տվել այն մասին, որ աշխատելով ազատ գոտում, 2009թ. դեկտեմբերի 15-ին առավոտյան ժամը 08.30-ի սահմաններում մաքրել է վարչական շենքի 2-րդ հարկի միջանցքը, այնտեղ տեղադրված չհրկիզվող պահարանի տակ ոչինչ չի եղել։

Հատոր 1 Գ.Թ. 99-100

Վերը նշված ցուցմունքներով հիմնավորվում է այն հանգամանքը, որ 15.12.2009թ. չհրկիզվող պահարանի տակ թմրամիջոցով «BOND» տեսակի ծխախոտատուփը հայտնվել է վարչական շենքում՝ ավտովարորդ Սամվել Սարգսյանի մուտք գործելուց հետո։
Նախաքննության և դատաքննության ընթացքում վկա, ՀՀ ԱՆ «Էրեբունի» ՔԿ հիմնարկի հետաքննիչ Կարեն Կիրակոսյանը ցուցմունք է տվել այն մասին, որ 2009 թվականի դեկտեմբերի 13-ի սահմաններում ՀՀ ԱՆ ՔԿՎ աշխատակիցներն իր աշխատասենյակ են բերել «Էրեբունի» ՔԿ հիմնարկի բուժակ Արեգ Օհանյանին, հայտնելով, որ վերջինս կասկածվում է դատապարտյալ Առուշան Մարտիրոսյանին թմրամիջոց իրացնելու մեջ։ Արեգ Օհանյանի անձնական խուզարկությամբ թմրամիջոց չի հայտնաբերվել։ Արեգ Օհանյանի նկատմամբ ֆիզիկական, հոգեբանական բռնություն չի գործադրվել, խորթ մեթոդներ չեն կիրառվել, Արեգ Օհանյանը բացատրություն է տվել և ընդունել, որ թաքստոցից թմրամիջոցը պետք է վերցներ և հանձներ դատապարտյալ Առուշան Մարտիրոսյանին, սակայն չի կարողացել իրենից անկախ պատճառով` հանդիպել է իր հորեղբորը և նրա հետ դուրս է եկել մասնաշենքից` գնումներ կատարելու նպատակով։
Այնուհետև Արեգ Օհանյանը մատնացույց է արել թաքստոցը` միջանցքի վերջնամասում գտնվող չհրկիզվող մետաղյա պահարանը, որի տակ հայտնաբերվել է «BOND» տեսակի ծխախոտի տուփ, որի մեջ պահված է եղել թմրամիջոցը։

Գ.Թ. 213-215, դատաքննության արձանագրություն

Պաշտպանվող անձ` վկա «Պողոս Պողոսյանի» ցուցմունքով այն մասին, որ 2009թ. դեկտեմբերի 15-ին «Լադա» տաքսի ծառայության ավտովարորդ Սամվել Սարգսյանը «Էրեբունի» ՔԿ հիմնարկի վարչական շենքի 1-ին մուտքի 2-րդ հարկի միջանցքում տեղադրված չհրկիզվող պահարանի տակ թմրամիջոց է թաքցրել, որտեղից հիմնարկի բուժակ Արեգ Օհանյանը պետք է վերցներ և հանձներ դատապարտյալ Առուշան Մարտիրոսյանին։

Հատոր 1 Գ.Թ. 274

Արեգ Օհանյանի անձնական խուզարկության 2009թ. դեկտեմբերի 15-ի արձանագրությամբ, զննում կատարելու մասին 2009թ. դեկտեմբերի 28-ի արձանագրությամբ, համակարգչատեխնիկական փորձաքննությամբ հիմնավորվել է, որ Արեգ Օհանյանի անձնական խուզարկությամբ առգրավված «SAMSUNG» տեսակի բջջային հեռախոսի 091-35-55-05 հեռախոսահամարին 07.12.2009թ. 093-41-41-23 բջջային հեռախոսահամարից ստացվել է «Ապե, սեյֆի տակա» կարճ հաղորդագրությունը։
Արեգ Օհանյանից առգրաված հեռախոսն ու բջջային քարտը ճանաչվել են իրեղեն ապացույց։

Հատոր 1 Գ.Թ. 25, 48, 49, 180-194

Դատապարտյալի /կալանավորված անձի/ կողմից ներքին կանոնակարգը խախտելու վերաբերյալ 2009թ. դեկտեմբերի 15-ի թիվ 7498 և 2010թ. հունվարի 8-ի թիվ 7516 արձանագրությունները, որոնց համաձայն Առուշան Մարտիրոսյանի անձնական ստուգմամբ նրա մոտ 2009թ. դեկտեմբերի 15-ին հայտնաբերվել է 093-66-89-25 բջջային հեռախոսահամարի քարտը, իսկ 2010թ. հունվարի 8-ին` «Նոկիա» տեսակի բջջային հեռախոս` 093-49-14-34 բջջային հեռախոսահամարի քարտով։ Հիշյալ արձանագրություններում Առուշան Մարտիրոսյանն իր ձեռքով գրել է, որ հայտնաբերված հեռախոսը և քարտերը պատկանում են իրեն։

Հատոր 1 Գ.Թ. 91-92

«Վիվասել» և «Արմենտել» ՓԲ ընկերություններից ստացված հեռախոսային խոսակցությունների վերծանումները պարունակող էլեկտրոնային կրիչների տվյալներից կատարված քաղվածքով, Առուշան Մարտիրոսյանից առգրավված «Նոկիա» տեսակի բջջային հեռախոսով, դրանում տեղադրված 093-49-14-34 բջջային հեռախոսահամարի քարտով, ինչպես նաև 093-66-89-25 բջջային հեռախոսահամարի քարտով, համաձայն որոնց Առուշան Մարտիրոսյանը և Արեգ Օհանյանը մշտապես գտնվել են հեռախոսային կապի մեջ, 2009թ. դեկտեմբերի 15-ին` ժամը 10.40-ին Առուշան Մարտիրոսյանը 094-49-14-34 բջջային հեռախոսահամարով նախ հեռախոսազրույց է ունեցել Սամվել Սարգսյանի հետ, այնուհետև 12.42-ին` Արեգ Օհանյանի հետ։

Հատոր 1 Գ.Թ. 248-252

Իրեղեն ապացույց ճանաչելու մասին 2010թ. փետրվարի 25-ի որոշումով, որով «Վիվասել» և «Արմենտել» ՓԲ ընկերություններից ստացված հեռախոսային խոսակցությունների վերծանումները պարունակող էլեկտրոնային հիշյալ կրիչները և դրանցում առկա տվյալներից կատարված քաղվածքը ճանաչվել են ապացույցներ, իսկ Առուշան Մարտիրոսյանից առգրավված «Նոկիա» տեսակի բջջային հեռախոսը, դրանում տեղադրված 093-49-14-34 բջջային հեռախոսահամարի քարտը, ինչպես նաև 093-66-89-25 բջջային հեռախոսահամարի քարտը` իրեղեն ապացույցներ։

Հատոր 1 Գ.Թ. 262-263

բ/ 2010 թվականի փետրվարի 02-ի դրվագով.
ՀՀ ԱՆ «Էրեբունի» ՔԿ հիմնարկի օպերատիվ բաժնի պետ Հ.Ասատրյանի զեկուցագրով այն մասին, որ 02.02.2010թ. ժամը 11.50-ին իրեն է մոտեցել դատապարտյալ Արամ Գեղամի Եղիազարյանը և հայտնել է, որ նույն օրը ժամը 08.30-ի սահմաններում բնակելի գոտում դատապարտյալ Առուշան Մնացականի Մարտիրոսյանն իրենից պահանջել է բնակելի գոտուց դուրս մուտքի աստիճանների տակ դրված աղբարկղից վերցնել և իր հետ բնակելի գոտի բերել ու իրեն հանձնել ծխախոտի տուփը` թմրամիջոցի պարունակությամբ։ Զեկուցագիրը ճանաչվել է ապացույց` այլ փաստաթուղթ։

Հատոր 2 Գ.Թ. 3, 49

Տեղազննության արձանագրությամբ, սխեմայով և լուսանկարներով այն մասին, որ 02.02.2010թ. դատապարտյալ Արամ Եղիազարյանի, ընթերակաների և օպերատիվ աշխատողների մասնակցությամբ հետաքննիչը զննել է «Էրեբունի» ՔԿ հիմնարկի վարչական մասնաշենքի մուտքի վանդակաճաղերով հարթակի տակ ամրացված աղբարկղը, որի մեջ հայտնաբերվել է թափանցիկ կպչուն ժապավենով փաթեթավորված «Davidoff Gold» տեսակի ծխախոտատուփ։ Բացելուց հետո ծխախոտատուփի մեջ հայտնաբերվել են երկու հատ ներարկիչներ` ծայրերը հալեցնելու միջոցով փակված վիճակում։ Դրանցից մեկի մեջ առկա է եղել 10մլ ծավալով անգույն հեղուկ, իսկ երկրորդի մեջ` շուրջ 4մլ, մուգ շագանակագույն, սևին հարող գույնի զանգված։ Դատավարական կարգի պահպանմամբ նշվածը փաթեթավորվել, կնքվել և առգրավվել է։

Հատոր 2 Գ.Թ. 4-6, 7-12

Գործով վկա, դատապարտյալ Արամ Եղիազարյանի բացատրությամբ, նախաքննական և դատաքննական ցուցմունքներով և դատաքննության ժամանակ ամբաստանյալ Առուշան Մարտիրոսյանի հետ առերես ցուցմունքով այն մասին, որ ինքն ամեն օր առավոտյան բնակելի հատվածից դուրս է գալիս բաց գոտի` սանմաքրման աշխատանքներ կատարելու։ 02.02.2010թ. ժամը 08.30-ին բնակելի գոտում իրեն է մոտեցել դատապարտյալ Առուշան Մարտիրոսյանը և իրենից պահանջել, որպեսզի բաց գոտու աստիճանների տակ դրված աղբարկղից իր հետ բնակելի գոտի բերի և իրեն հանձնի ծխախոտի տուփը, որի մեջ թմրամիջոց կա։ Ինքը մերժել է, Առուշանը ջղայնացել է, ինքը վախեցել է, որ նա իրեն կծեծի, ուստի համաձայնվել է։ Բայց երբ իրեն վերակարգով բաց գոտի են տարել, ինքը մոտեցել է ՔԿ հիմնարկի օպերատիվ բաժնի պետին և նրան հայտնել Առուշան Մարտիրոսյանի պահանջի մասին։ Հետաքննիչի և ընթերակաների հետ գնացել և շուռ են տվել աղբամանը, որտեղ ծխախոտատուփի մեջ հայտնաբերվել են երկու ներարկիչներ` թմրամիջոցներով։

Հատոր 2 Գ.Թ. 14-15, 44-45,
դատաքննության արձանագրություն

Դատաքիմիական փորձաքննության 03.02.2010թ. թիվ 02501005 եզրակացությամբ այն մասին, որ ներարկիչում առկա 11մլ ծավալով սուր հոտով թափանցիկ հեղուկը հանդիսանում է «Քացախաթթվի անհիդրիդ» տեսակի պրեկուրսոր, իսկ մյուս ներարկիչում առկա 5,585 գրամ մաքուր քաշով գորշ գույնի կոշտ զանգվածը հանդիսանում է 5,56 գրամ հաստատուն քաշով տնայնագործական եղանակով պատրաստված «Ափիոն» տեսակի թմրամիջոց։

Հատոր 2 Գ.Թ. 21-24

Նշված թմրամիջոցը և պրեկուրսորը ճանաչվել են իրեղեն ապացույց։

Հատոր 2 Գ.Թ. 48

Տոքսիկոքիմիական փորձագետի 12.02.2010թ. թիվ 0080 եզրակացությամբ այն մասին, որ Առուշան Մարտիրոսյանից 04.02.2010թ. վերցված մազի և մեզի փորձանմուշներում հայտնաբերվել են ափիոնի խմբի թմրամիջոցի թմրալկալոիդներ։

Հատոր 2 Գ.Թ. 73-75

Վկա, ՀՀ ԱՆ «Էրեբունի» ՔԿ հիմնարկի օպերատիվ բաժնի պետ Հրայր Ասատրյանը նախաքննության և դատաքննության ժամանակ ցուցմունք է տվել այն մասին, որ 02.02.2010թ. ժամը 11.50-ի սահմաններում դատապարտյալ Արամ Եղիազարյանը մոտեցել է իրեն և հայտնել, որ բնակելի գոտում դատապարտյալ Առուշան Մարտիրոսյանն իրենից պահանջել է ազատ գոտի դուրս գալուց հետո վարչական շենքի շքամուտքի աստիճանավանդակի տակ դրված աղբամանից վերցնել, բնակելի գոտի բերել և իրեն հանձնել ծխախոտատուփը, որի մեջ թմրամիջոց կա։ Նշված հաղորդման կապակցությամբ ինքը զեկուցագիր է գրել ՔԿ հիմնարկի պետին, այնուհետև հետաքննիչի, ընթերակաների և դատապարտյալ Արամ Եղիազարյանի հետ զննել են աստիճանավանդակի տակ ամրացված աղբամանը, որի մեջ հայտնաբերվել է «Davidoff Gold» տեսակի ծխախոտատուփ, որի մեջ առկա են եղել երկու ներարկիչներում լցված հեղուկ և զանգված, կազմվել է արձանագրություն, հայտնաբերվածը փաթեթավորվել, կնքվել և առգրավվել է։

Հատոր 2 Գ.Թ. 37-38, դատաքննության արձանագրություն

Վկա, ՀՀ ԱՆ «Էրեբունի» ՔԿ հիմնարկի հետաքննիչ Արմեն Հովսեփյանը նախաքննության և դատաքննության ժամանակ ցուցմունքներ է տվել այն մասին, որ 02.02.2010թ. ժամը 11.55-ին «Էրեբունի» ՔԿ հիմնարկի օպերատիվ բաժնի պետ Հրայր Ասատրյանի, դատապարտյալ Արամ Եղիազարյանի և ընթերակաների մասնակցությամբ զննել է ՔԿ հիմնարկի վարչական մասնաշենքի շքամուտքի վանդակաճաղերով աստիճանավանդակի տակ ամրացված աղբարկղը, որի պարունակությունը շուռ տալուց հետո հայտնաբերվել է մեկ հատ «Davidoff Gold» տեսակի ծխախոտատուփ` փաթեթավորված թափանցիկ կպչուն պոլիէթիլենային թաղանթով։ Ծխախոտի տուփից հայտնաբերվել են հալեցված եզրերով ներարկիչներ` հեղուկով և մուգ զանգվածով, որոնք առգրավվել, փաթեթավորվել, կնքվել և ուղարկվել են դատաքիմիական փորձաքննության, պարզվել է, որ դրանք թմրամիջոց և պրեկուրսոր են։ Դատապարտյալ Արամ Եղիազարյանը հայտնել է, որ բնակելի գոտում դատապարտյալ Առուշան Մարտիրոսյանն իրենից պահանջել է ազատ գոտի դուրս գալուց հետո թմրամիջոցի պարունակությամբ ծխախոտատուփը տանել բնակելի գոտի և հանձնել իրեն։ Այդ մասին ինքը` Արամ Եղիազարյանը, հայտնել է օպերատիվ բաժնի պետ Հ.Ասատրյանին։

Հատոր 2 Գ.Թ. 42-43, դատաքննության արձանագրություն

Դատարանի նախաձեռնությամբ ՀՀ ԱՆ «Էրեբունի» և «Նուբարաշեն» քրեակատարողական հիմնարկներից ստացված գրություններով պարզվել է, որ ամբաստանյալ Առուշան Մարտիրոսյանը 2010թ. փետրվարի 02-ին «Էրեբունի» ՔԿ հիմնարկից տեղափոխվել է «Նուբարաշեն» ՔԿ հիմնարկ, որտեղ ընդունվել է նույն օրը ժամը 16.15-ին։
Դրանով հերքվում է ամբաստանյալ Առուշան Մարտիրոսյանի պատճառաբանությունն այն մասին, որ ինքը 2010թ. փետրվարի 02-ին «Էրեբունի» ՔԿ հիմնարկում պատիժը չի կրել, հետևաբար 02.02.2010թ. առավոտյան չէր կարող դատապարտյալ Արամ Եղիազարյանին պատվիրել վերցնել և իրեն հանձնել աղբամանի մեջ ծխախոտատուփով թաքցված թմրամիջոցը։

3.Դատարանի իրավական վերլուծությունը։
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ գործով ձեռք բերված ապացույցները բավարար են գործով ամբաստանյալներ Արեգ Հակոբի Օհանյանի և Առուշան Մնացականի Մարտիրոսյանի նկատմամբ մեղադրական դատավճիռ կայացնելու համար։ Ընդ որում, դատարանը գտնում է, որ ամբաստանյալ Առուշան Մարտիրոսյանին 17.05.2010թ. դատաքննության փուլում առաջադրված վերջնական մեղադրանքը ՀՀ քրեական օրենսգրքի 34-268-րդ հոդվածի 2-րդ մասի 1-ին և 2-րդ կետերով և 34-266-րդ հոդվածի 4-րդ մասով, որոնք վերաբերում են 15.12.2009թ. և 02.02.2010թ. կատարված հանցանքների դրվագներին, լիովին հիմնավոր է, նշված հանցանքները կատարելու մեջ նրա մեղավորությունն ամբողջական ապացուցված է, առաջադրված մեղադրանքի կապակցությամբ ամբաստանյալի բերած պատճառաբանություններն անհիմն են, նշված հանցանքների կատարման մեջ Առուշան Մնացականի Մարտիրոսյանի նկատմամբ այդ հոդվածների սանկցիաներով պետք է քրեական պատիժ կիրառվի։
Վերլուծելով և գնահատելով այն ապացույցները, որոնք դրվել են ամբաստանյալ Արեգ Օհանյանին ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերով առաջադրված մեղադրանքի հիմքում, դատարանը գտնում է, որ ամբաստանյալ Արեգ Օհանյանի արարքի քրեաիրավական ճիշտ որակումը տալու համար անհրաժեշտ է իրենց ամբողջության մեջ հաշվի առնել մի շարք գործոնների առկայությունը, մասնավորապես` հանցագործության կատարման մեխանիզմում նրա ունեցած դերը և այն փուլը, երբ նա ներգրավվել է հանցանքի կատարման մեջ, հաշվի առնելով հանցագործության կատարման շարժառիթն ու հանցավորի սուբյեկտիվ դիտավորությունը և գործի քննությամբ ձեռք բերված մյուս հանգամանքները։
Այսպես. նախաքննությամբ և դատաքննությամբ հիմնավորվել է, որ գործի քննությամբ չպարզված աղբյուրից թմրամիջոցը «Լադա» տաքսի ավտոմեքենայի ավտովարորդ, գործով մեղադրյալ Սամվել Սարգսյանի մասնակցությամբ իրացնելու, այն է` թմրամիջոցը ՀՀ ԱՆ «Էրեբունի» ՔԿ հիմնարկ փոխադրելու և այն վարչական մասնաշենքից երկրորդ հարկի չհրկիզվող պահարանի տակ տեղադրելու գործողությունները վերահսկվել են դատապարտյալ Առուշան Մարտիրոսյանի կողմից` վերջինիս մոտ ունեցած բջջային հեռախոսահամարներից ՔԿՀ բնակելի գոտուց արտաքին աշխարհի հետ ունեցած կապի միջոցով։
Սամվել Սարգսյանին և Առուշան Մարտիրոսյանին որպես մեղադրյալ ներգրավելու մասին որոշումներում նախաքննական մարմինը տարանջատել է իրացման փուլը, նշելով, որ Սամվել Սարգսյանը, դատապարտյալ Առուշան Մարտիրոսյանի հետ նախնական համաձայնության գալով, վերջինիս խոշոր չափի թմրամիջոց իրացնելու նպատակով քննությամբ չպարզված անձից ձեռք է բերել խոշոր չափի` 1,85 գրամ քաշով «Ացետիլացված ափիոն» տեսակի թմրամիջոց, որը թաքցնելով «BOND» տեսակի ծխախոտի տուփի մեջ, 15.12.2009թ. ժամը 12.30-ի սահմաններում այն տեղադրել է «Էրեբունի» ՔԿ հիմնարկի վարչական շենքի 1-ին մուտքի 2-րդ հարկի չհրկիզվող պահարանի տակ։

Հատոր 1 Գ.Թ. 229 և 17.05.2010թ. մեղադրանք
առաջադրելու մասին որոշումներ

Վերոնշված որոշումների շարադրանքից երևում է, որ Արեգ Օհանյանը թմրամիջոցի իրացման այս փուլում մասնակցություն չունի, քննությամբ հիմնավորվել է, որ Արեգ Օհանյանն ու Սամվել Սարգսյանը միմյանց չեն ճանաչել, նրանք նույնիսկ միմյանց հետ հեռախոսային կապ չեն ունեցել։
Այս առումով գործի քննությամբ ձեռք բերված ապացույցներից չբխող եզրահանգմամբ հատոր 2 Գ.Թ. 278 և 279 մեղադրանքի ծավալը լրացնելու և որպես մեղադրյալ ներգարվելու մասին որոշումներում միանգամայն անհիմն նշվել է, որ «Քրեական գործի քննությամբ հիմնավորվել է, որ Արեգ Օհանյանը նշված թմրամիջոցը ձեռք է բերել «Լադա» տաքսի ծառայության վարորդ Սամվել Ալբերտի Սարգսյանից» և որ «ի կատարումն պայմանավորվածության` 15.12.2009թ. իրացնելու նպատակով «Լադա» տաքսի ծառայության վարորդ Սամվել Սարգսյանից Արեգ Օհանյանը ձեռք է բերել խոշոր չափի` 1,85 գրամ քաշով «Ացետիլացված ափիոն» տեսակի թմրամիջոց, որը նույն օրը մինչև Առուշան Մարտիրոսյանին իրացնելը հայտնաբերվել է . . .»։
Նշված երեք որոշումների շարադրանքի համեմատությամբ ակնհայտ է մեղադրանքի ծավալում թմրամիջոցի իրացման մեջ Արեգ Օհանյանի հանցակցության անհամապատասխանությունն ու նրան առաջադրված մեղադրանքի ակնհայտ անճշտությունը։
ՀՀ քրեական դատավարության օրենսգրքի 18-րդ հոդվածով նախատեսված է, որ հանցանք գործելու մեջ անձի մեղավորության մասին հետևությունը չի կարող հիմնվել ենթադրությունների վրա, այն պետք է հաստատվի գործին վերաբերող փոխկապակցված հավաստի ապացույցների բավարար ամբողջությամբ։ Մեղադրանքի ապացուցված չլինելու բոլոր կասկածները, որոնք չեն կարող փարատվել ՀՀ քրեական դատավարության օրենսգրքի դրույթներին համապատասխան պատշաճ ընթացակարգի սահմաններում, մեկնաբանվում են հօգուտ մեղադրյալի։
ՀՀ քրեական օրենսգրքի 8-րդ հոդվածի համաձայն` անձը ենթակա է քրեական պատասխանատվության միայն անձամբ իր կատարած հանցանքի համար։
ՀՀ քրեական օրենսգրքի 9-րդ հոդվածը սահմանում է, որ անձը ենթակա է քրեական պատասխանատվության միայն հանրության համար վտանգավոր այնպիսի գործողության կամ անգործության համար, որոնց վերաբերյալ նրա մեղքը հաստատված է իրավասու դատարանի կողմից։
Առուշան Մարտիրոսյանին և Արեգ Օհանյանին որպես մեղադրյալ ներգրավելու մասին 05.03.2010թ. հատոր 1 Գ. Թ. 279 և 17.05.2010թ. /դատաքննություն/ որոշումներով հաստատված է համարվել այն, որ Արեգ Օհանյանը ներգրավվել է հանցագործության կատարման 2-րդ փուլում` ըստ Առուշան Մարտիրոսյանի հետ նախնական պայմանավորվածության, նա պետք է չհրկիզվող պահարանի տակից թմրամիջոցը վերցներ և հանձներ Առուշան Մարտիրոսյանին, որպիսին չի կարողացել կատարել իր կամքից անկախ հանգամանքներով։
Հատկանշական է, որ Արեգ Օհանյանի նշված գործողության վերաբերյալ նախաքննական մարմինը տարբեր գնահատականներ է տվել, այսպես` Արեգ Օհանյանին որպես մեղադրյալ ներգարվելու մասին որոշման մեջ թմրամիջոցը հանձնելը որակվել է որպես իրացում, իսկ Առուշան Մարտիրոսյանին որպես մեղադրյալ ներգրավելու մասին որոշման մեջ` որպես հանձնում։
Արեգ Օհանյանին մեղադրանք է առաջադրվել ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերով։
ՀՀ քրեական օրենսգրքի 266-րդ հոդվածի 1-ին մասը որպես ձևական հանցակազմ նախատեսում է, որ արարքը ավարտված է համարվում իրացնելու նպատակով թմրամիջոցը ձեռք բերելու պահից։
Ձեռք բերումը ենթադրում է որևէ մեկի կողմից այն ստանալը, ունենալը, իր տրամադրության տակ անցնելը, որպիսին Արեգ Օհանյանի մասով գործի կոնկրետ տվյալներով առկա չէ։ Արեգ Օհանյանի և Առուշան Մարտիրոսյանի միջև առկա է եղել նախնական պայմանավորվածություն, կոնկրետ Արեգ Օհանյանի կողմից` նախապես տրված խոստում այն մասին, որ թմրամիջոցը թաքստոցում հայտնվելուց հետո ինքը կօժանդակի Առուշան Մարտիրոսյանին` այն ձեռք բերելու հարցում, օգտագործելով իր ծառայողական դիրքը, քանի որ որպես բուժակ ինքն իրավունք և անարգել հնարավորություն է ունեցել ազատ գոտուց մուտք գործել դատապարտյալների բնակելի գոտի և կարող էր իր հետ տանել թմրամիջոցն ու այն հանձնել Առուշան Մարտիրոսյանին։
ՀՀ քրեական օրենսգրքի 38-րդ հոդվածի 5-րդ մասի հիմքով` օժանդակող է համարվում այն անձը, ով հանցագործությանն օժանդակել է խոչընդոտները վերացնելով և դա նախապես խոստացված է եղել, որպիսին առկա է կոնկրետ դեպքով։
Կոնկրետ դեպքով թմրամիջոցն Արեգ Օհանյանի կողմից Առուշան Մարտիրոսյանին հանձնելու օժանդակությունն ավարտին չի հասցվել իրենից անկախ պատճառներով, այն է` Արեգ Օհանյանը հանդիպել է հորեղբորը և այդ պատճառով չի կարողացել մոտենալ թաքստոցին ու վերցնել թմրամիջոցը։
ՀՀ քրեական օրենսգրքի 34-րդ հոդվածը սահմանում է, որ հանցափորձ է համարվում ուղղակի դիտավորությամբ կատարված այն գործողությունը /անգործությունը/, որն անմիջականորեն ուղղված է հանցանք կատարելուն, եթե հանցագործությունն ավարտին չի հասցվել անձի կամքից անկախ հանգամանքներով։
Իրացումը ենթադրում է թմրամիջոցի վաճառքը, նվիրատվությունը, փոխանակումը, որպիսին կոնկրետ դեպքով առկա չէ։
Կոնկրետ դեպքով կարևոր նշանակություն ունի դրդապատճառը, թե ինչու՞ է Արեգ Օհանյանը համաձայնվել կատարել Առուշան Մարտիրոսյանի կամքը` խոստանալով նրան հանձնել թմրամիջոցը։
Այդ մասին Արեգ Օհանյանն իր (հատոր 1 Գ. Թ. 7-8) բացատրության մեջ խոստովանել է, որ դատապարտյալ Առուշան Մարտիրոսյանն իրազեկ է եղել իր` որպես ՔԿ հիմնարկի ծառայողի, ոչ կանոնադրական պահվածքի մի քանի դրվագներից, որի պատճառով իր նկատմամբ հոգեբանական ներգործության է դիմել` դրդելով օժանդակելու իրեն թմրամիջոցը ձեռք բերելու հարցում, ինքն էլ ստիպված համաձայնվել է, որպեսզի իր նկատմամբ Առուշան Մարտիրոսյանի տիրապետած տեղեկատվությունը չփոխանցվի իր վերադասին և ծառայողական առումով ինքը խնդիրներ և բարդություններ չունենա։
Փաստորեն, հոգեբանական կախվածության պահով, այլ ոչ թե շահադիտական դրդումներով է պայմանավորված եղել Արեգ Օհանյանի ներգրավվածությունը հանցագործության կատարմանը։
Նախաքննական մարմինը 05.03.2010թ. կայացնելով (հատոր 1 Գ. Թ. 277) որոշում՝ քրեական հետապնդում չիրականացնելու մասին, Արեգ Օհանյանի կողմից Առուշան Մարտիրոսյանին թմրամիջոց իրացնելու կամ հանձնելու այլ դեպքերով չհիմնավորված կասկածներն ի օգուտ մեղադրյալների գնահատելով, քրեական գործը կրկին անգամ թմրամիջոց իրացնելու մասով նրանց նկատմամբ կարճել է։ Դրանով ըստ էության գնահատական է տրվել նրան, որ 07.12.2009թ. բջջային հեռախոսով Արեգ Օհանյանի հեռախոսահամարին կարճ հաղորդումը` «սեյֆի տակ» թմրամիջոցի առկայության մասին, չի գնահատվել որպես մեկ անգամ ևս Արեգ Օհանյանի կողմից թմրամիջոց տեղափոխելու և հանձնելու փաստի ապացույց։
Վերոնշվածի հիմնավորմամբ դատարանը գտնում է, որ Արեգ Օհանյանին առաջադրված մեղադրանքը ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերից ենթակա է վերաորակման ՀՀ քրեական օրենսգրքի 34-38-268-րդ հոդվածի 2-րդ մասի 2-րդ կետով, և նշված հոդվածի սանկցիայով նրա նկատմամբ պետք է պատիժ նշանակվի, որի ժամանակ պետք է պահպանվեն ՀՀ քրեական օրենսգրքի 65-րդ հոդվածի պահանջները։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված պատասխանատվությունը մեղմացնող ու ծանրացնող հանգամանքները։ Դրանք բնութագրում են հանցավորի անձնավորությունն ու կատարված հանցագործության հանրային վտանգավորության աստիճանը, հնարավորություն են տալիս կոնկրետ գործով անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ ամբաստանյալ Առուշան Մարտիրոսյանի մասով, որպես պատասխանատվությունը և պատիժը ծանրացնող հանգամանք, առկա է հանցանքը կատարելու ռեցիդիվը, քանի որ ամբաստանյալի նախկին դատվածությունը մարված չէ։
Որպես բնութագրական հանգամանք դատարանը հաշվի է առնում նաև այն, որ ամբաստանյալը քրեակատարողական հիմնարկում պատիժը կրելիս բնութագրվում է բացասական։
Դատարանը գտնում է, որ Արեգ Օհանյանի մասով պատասխանատվությունը և պատիժը ծանրացնող հանգամանքներ առկա չեն։
Քրեական գործով ամբաստանյալ Առուշան Մարտիրոսյանի մասով պատասխանատվությունը և պատիժը մեղմացնող հանգամանքներ չկան, իսկ Արեգ Օհանյանի մասով որպես մեղմացուցիչ հանգամանք է հանդիսանում այն, որ ամբաստանյալի խնամքին են գտնվում մինչև 14 տարեկան` 2005 և 2008 թվականներին ծնված երեխաները, որոնցից մեկը տառապում է շաքարախտի ծանր տեսակով, ընտանիքը բնակվում է ավտոտնակում, Արեգ Օհանյանը նախկինում դատապարտված չի եղել, բնութագրվում է դրական։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալներ Առուշան Մարտիրոսյանի և Արեգ Օհանյանի նկատմամբ պետք է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, դատարանը տվյալ գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս հանգում է այն հիմնավոր եզրակացության, որ ամբաստանյալներ Առուշան Մարտիրոսյանի և Արեգ Օհանյանի նկատմամբ որպես պատիժ անհրաժեշտ է նշանակել ազատազրկում որոշակի ժամկետով։
Դատարանը նաև ի նկատի է ունենում այն հանգամանքը, որ ամբաստանյալ Առուշան Մարտիրոսյանը քրեակատարողական հիմնարկում պատիժ է կրում և հանցագործությունը, որի համար սույն գործով մեղադրվում է, կատարել է դատավճռով նշանակված պատիժը դեռևս լրիվ չկրած, հետևաբար վերջնական պատիժ պետք է նշանակել ՀՀ քրեական օրենսգրքի 67-րդ հոդվածով նախատեսված կարգով` դատավճիռների համակցությամբ։
Ամբաստանյալ Առուշան Մարտիրոսյանի նկատմամբ Կոտայքի մարզի դատարանի 09.07.1999թ. դատավճռով նշանակված պատժի ժամկետը լրանալու էր 21.02.2010թ., մինչդեռ մինչև նշված պատիժը լրանալը 05.02.2010թ. նրա նկատմամբ խափանման միջոց է ընտրվել կալանք, այսինքն` կալանավորման օրվա դրությամբ ունեցել է չկրած պատիժ 16 օրացուցային օր ժամկետ, իսկ ամբաստանյալ Արեգ Օհանյանը 2009թ. դեկտեմբերի 30-ից 31-ը` 1օր, ձերբակալված լինելու կապակցությամբ, գտնվել է անազատության մեջ, կալանքի տակ է 2010թ, հունվարի 25-ից։
Դատարանը գտնում է, որ մինչև դատավճռի օրինական ուժի մեջ մտնելը ամբաստանյալներ Արեգ Օհանյանի և Առուշան Մարտիրոսյանի նկատմամբ որպես խափանման միջոց ընտրված կալանավորումը պետք է թողնել անփոփոխ։
Դատավճիռն օրինական ուժի մեջ մտնելուց հետո 15.12.2009թ. և 02.02.2010թ. հայտնաբերված և իրեղեն ապացույց ճանաչված առգրավված թմրամիջոցները, պրեկուրսորը, ծխախոտատուփերը և ներարկիչները ենթակա են ոչնչացման, լազերային սկավառակները և փաստաթղթերն անհրաժեշտ է պահել քրեական գործի հետ, Արեգ Օհանյանից առգրաված 145.000 /մեկ հարյուր քառասունհինգ հազար/ ՀՀ դրամը և բջջային հեռախոսը քարտով, ինչպես նաև Առուշան Մարտիրոսյանի անձնական բջջային հեռախոսը քարտերով անհրաժեշտ է վերադարձնել ամբաստանյալների հարազատներին։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 357-358, 360, 365, 368-372, 376, 3761, 379-րդ հոդվածներով և ՀՀ դատական օրենսգրքի 20-րդ հոդվածով, դատարանը.

Վ Ճ Ռ Ե Ց

1.Ամբաստանյալ Առուշան Մնացականի Մարտիրոսյանին մեղավոր ճանաչել ՀՀ քրեական օրենսգրքի 34-268-րդ հոդվածի 2-րդ մասի 1-ին և 2-րդ կետերով և 34-266-րդ հոդվածի 4-րդ մասով նախատեսված հանցանքների կատարման մեջ և նրա նկատմամբ քրեական պատիժ կիրառել` դատապարտելով նրան
• ՀՀ քրեական օրենսգրքի 34-268-րդ հոդվածի 2-րդ մասի 1-ին և 2-րդ կետերով ազատազրկման 2 /երկու/ տարի ժամկետով և
• ՀՀ քրեական օրենսգրքի 34-266-րդ հոդվածի 4-րդ մասով տուգանքի նվազագույն աշխատավարձի հարյուրապատիկի` 100.000 /մեկ հարյուր հազար/ ՀՀ դրամի չափով։
ՀՀ քրեական օրենսգրքի 66-րդ հոդվածի կարգով` պատիժները լրիվ գումարելու միջոցով, պատիժ նշանակել 2 /երկու/ տարի ժամկետով, ինչպես նաև տուգանք նվազագույն աշխատավարձի հարյուրապատիկի` 100.000 /մեկ հարյուր հազար/ ՀՀ դրամի չափով։
ՀՀ քրեական օրենսգրքի 67-րդ հոդվածի 1-ին մասի կարգով` դատավճիռների համակցությամբ նշանակված պատժին լրիվ գումարել նախորդ դատավճռով նշանակված պատժի չկրած 16 /տասնվեց/ օրը և վերջնական պատիժ նշանակել ազատազրկում 2 /երկու/ տարի 16 /տասնվեց/ օր ժամկետով և տուգանք նվազագույն աշխատավարձի հարյուրապատիկի` 100.000 /մեկ հարյուր հազար/ ՀՀ դրամի չափով։
Պատժի սկիզբը հաշվել 2010թ. փետրվարի 05-ից։
Պատիժը պետք է կրի ՀՀ ԱՆ ՔԿՎ համապատասխան հիմնարկում։
Ամբաստանյալի նկատմամբ որպես խափանման միջոց ընտրված կալանավորումը մինչև դատավճռի օրինական ուժի մեջ մտնելը թողնել անփոփոխ։
2.Ամբաստանյալ Արեգ Հակոբի Օհանյանին մեղավոր ճանաչել ՀՀ քրեական օրենսգրքի 34-38-268-րդ հոդվածի 2-րդ մասի 2-րդ կետով նախատեսված հանցանքի կատարման մեջ և նրա նկատմամբ քրեական պատիժ կիրառել` դատապարտելով ազատազրկման 1 /մեկ/ տարի ժամկետով։
ՀՀ քրեական օրենսգրքի 69-րդ հոդվածի կիրառմամբ նշանակված պատժի մեջ հաշվակցել ձերբակալվելու կապակցությամբ անազատության մեջ գտնվելու 1 /մեկ/ օր ժամկետը և վերջնական պատիժ սահմանել 11 /տասնմեկ/ ամիս 29 /քսանինը/ օր։
Պատժի սկիզբը հաշվել 2010թ. հունվարի 25-ից։
Պատիժը պետք է կրի ՀՀ ԱՆ ՔԿՎ համապատասխան հիմնարկում։
Մինչև դատավճռի օրինական ուժի մեջ մտնելը նրա նկատմամբ որպես խափանման միջոց ընտրված կալանավորումը թողնել անփոփոխ։
Դատավճիռն օրինական ուժի մեջ մտնելուց հետո ամբաստանյալ Արեգ Օհանյանի գույքի վրա դրված կալանքը վերացնել։
Իրեղեն ապացույց ճանաչված փաստաթղթերը և լազերային սկավառակները թողնել քրեական գործում։
Դատավճիռն օրինական ուժի մեջ մտնելուց հետո 15.12.2009թ. և 02.02.2010թ. առգրաված և իրեղեն ապացույց ճանաչված «BOND» և «Davidoff Gold» տեսակի ծխախոտատուփերը, 1,85 գրամ քաշով «Ացետիլացված ափիոն» տեսակի թմրամիջոցը, 5,56 գրամ քաշով «Ափիոն» տեսակի թմրամիջոցը, 11մլ ծավալով պրեկուրսոր հանդիսացող «Քացախաթթվի անհիդրիդը» ոչնչացնել։
Ամբաստանյալ Արեգ Օհանյանի անձնական խուզարկությամբ առգրաված 145.000 /հարյուր քառասունհինգ հազար/ ՀՀ դրամը վերադարձնել ամբաստանյալի հարազատներին, առգրաված «SAMSUNG» տեսակն բջջային հեռախոսն իր քարտով վերադարձնել ամբաստանյալ Արեգ Օհանյանի, իսկ «NOKIA» տեսակի բջջային հեռախոսն իր քարտերով՝ Առուշան Մարտիրոսյանի հարազատներին։
Դատավարության մասնակիցների կողմից դատավճիռը վերաքննության կարգով կարող է բողոքարկվել ՀՀ քրեական վերաքննիչ դատարան` հրապարակման պահից մեկ ամսվա ընթացքում։

ԴԱՏԱՎՈՐ Վ. Թ. ԳՐԻԳՈՐՅԱՆ