Գործ թիվ ԵԷԴ/0027/01/10
2010թ


Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վ.Թ.ԳՐԻԳՈՐՅԱՆ
Քարտուղարությամբ Ա.ԱՐՂԱՄԱՆՅԱՆԻ

Մասնակցությամբ`
Մեղադրող Ա. ՄՈՒՐԱԴՅԱՆԻ
Ամբաստանյալ Գ.ԲԱՂԴԱՍԱՐՅԱՆԻ

2010 թվականի ապրիլի 1-ին Երևանի Էրեբունի և Նուբարաշեն վարչական շրջանների դատարանում, դռնբաց դատական նիստում քննեց քրեական գործն ըստ մեղադրանքի` Գոռ Թաթուլի Բաղդասարյանի ծնված 18.02.1975թ. Երևան քաղաքում,ազգությամբ հայ, Հայաստանի Հանրապետության քաղաքացի, միջնակարգ կրթությամբ, ամուսնացած, բնակվել է Երևան, Նոր Նորքի 9 -րդ զանգված 23 շենք ,բնակ. 76, նախկինում դատված
1.ՌԴ Վոլգոգրադի ժողդատարանի 11.07.1996թ. դատավճռով ՌԴ քրեական օրենսգրքի 15, 102-րդ հոդվածի «ա» կետով, 146 հոդվածի 2-րդ մասի «ա», «բ», «վ» կետերով, 40-րդ հոդվածի 1-ին մասի կիրառմամբ ազատազրկման 13 տարի ժամկետով,
2.Երևանի Ավան և Նոր-Նորք համայնքների առաջին ատյանի դատարանի 28.06.2000թ. դատավճռով ՀՀ քրեական օրենսգրքի 88-րդ հոդվածի 2-րդ մասով, քրեական օրենսգրքի 37-րդ հոդվածի կիրառմամբ 13 տարի ժամկետով ազատազրկման։ ՀՀ քրեական օրենսգրքի 37-րդ հոդվածի 3-րդ մասի կիրառմամբ հաշվարկելով Վոլգոգրադի ժողդատարանի 11.07.1996թ. դատավճռով նշանակված պատժի կրած մասը վերջնական ժամկետ է նշանակվել ազատազրկում 6 տարի 11 ամիս 19 օր ժամկետով,
3.Երևանի Ավան և Նոր-Նորք համայնքների առաջին ատյանի դատարանի 18.04. 2005թ. դատավճռով ՀՀ քրեական օրենսգրքի 235-րդ հոդվածի 1-ին մասով, քրեական օրենսգրքի 67-րդ հոդվածի 1-ին մասի կիրառմամբ ազատազրկման 3 տարի 6 ամիս ժամկետով։ Ազատվել է 04.06.2008թ.,
4.Կալանավորվել է 12.02.2009թ. Արագածոտնի մարզի ընդհանուր իրավասության դատարանի որոշմամբ ՀՀ քրեական օրենսգրքի 104-րդ հոդվածի 2-րդ մասի 5-րդ, 7-րդ և 8-րդ կետերով, 175-րդ հոդվածի 2-րդ մասի 1, 3, 4 կետերով և 238-րդ հոդվածի 3-րդ մասի 1-ին կետով, դատաքննությունը դեռևս չի ավարտվել։
Մեղադրվում է ՀՀ քրեական օրենսգրքի 34, 268-րդ հոդվածի 3-րդ մասով։ Առաջադրված մեղադրանքում իրեն լիովին մեղավոր է ճանաչել։

1.Գործի դատավարական նախապատմությունը։

Ամբաստանյալ Գոռ Թաթուլի Բաղդասարյանը 2009 թվականի փետրվարի 12-ից Արագածոտնի մարզի ընդհանուր իրավասության դատարանի որոշմամբ նախնական կալանքի տակ է գտնվում ՀՀ քրեական օրենսգրքի 104-րդ հոդվածի 2-րդ մասի 5, 7, 8-րդ կետերով, 175-րդ հոդվածի 2-րդ մասի 1, 3, 4-րդ կետերով և 238-րդ հոդվածի 3-րդ մասի 1-ին կետով նախատեսված հանցագործություններ կատարելու մեղադրանքով, տեղափոխվել և պահվել է ՀՀ ԱՆ ՔԿՎ «Նուբարաշեն» ՔԿ հիմնարկում։
Քրեակատարողական հիմնարկում գտնվելու ընթացքում ամբաստանյալ Գոռ Բաղդասարյանը նպատակադրվել է թմրամիջոց ձեռք բերել և օգտագործել։ Թիվ 49 խցում գտնվելու ընթացքում նա իր տրամադրության տակ է ունեցել բջջային հեռախոս 098-618284 համարով, որով կապ է պահպանել իր ծանոթների հետ։ 2009թվականի սկզբներին նա հեռախոսային կապի միջոցով պայմանավորվածություն է ձեռք բերել իր ծանոթ, գործով ինքնությունը չպարզված անձնավորության հետ՝ նրա միջոցով թմրամիջոց ձեռք բերելու հարցի շուրջ։ Պայմանավորվածության համաձայն՝ թմրամիջոցը պետք է թաքցվեր որպես հանձնուք ուղարկվող որևէ իրի մեջ՝ այն հանձնուքի տեսքով իրեն փոխանցելու նպատակով։
2009թվականի դեկտեմբերի 10-ին ամբաստանյալ Գոռ Բաղդասարյանի և նրա մտերմուհի, վկա, Երևանի Հալաբյան փողոցի 35 շենքի 54 բնակարանի բնակչուհի Մարինե Թամոյանի միջև հեռախոսազրույցի ընթացքում վերջինս իր ցանկությունն է հայտնել ամբաստանյալին՝ նրա համար հանձնուք տանել քրեակատարողական հիմնարկ։ Ամբաստանյալ Գոռ Բաղդասարյանը համաձայնվել է՝ պահանջելով իր հետ քրեակատարողական հիմնարկ բերել նաև իր ծանոթի հանձնած իրերը, չասելով Մարինե Թամոյանին, որ դրանց մեջ կարող է թմրամիջոց թաքցված լինել։
Ամբաստանյալ Գոռ Բաղդասարյանի և վկա Մարինե Թամոյանի միջև բազմաթիվ փոխադարձ հեռախոսազանգերի ընթացքում ձեռք բերված պայմանավորվածությունների արդյունքում Երևանի Մերգելյան ինստիտուտի մոտակայքի ցայտաղբյուրի մոտ հանդիպել են Մարինե Թամոյանն ու ամբաստանյալ Գոռ Բաղդասարյանի հետ պայմանավորվածություն ունեցած անձնավորությունը, որի ինքնությունը քննությամբ չի պարզվել։ Վերջինս Մարինե Թամոյանին է հանձնել պոլիէթիլենային տոպրակ՝ տղամարդու ներքնաշորերի, երկու սրբիչների, կիսագուլպաների պարունակությամբ։
Գոռ Բաղդասարյանի ուղարկած անծանոթից նշված ապրանքներն ստանալու մասին Մարինե Թամոյանը բջջային հեռախոսով տեղյակ է պահել Գոռ Բաղդասարյանին։
Մարինե Թամոմյանը գործով վկա Վլադիմիր Սաֆարյանի հետ՝ վերջինիս վարած «ՎԱԶ-21114» մակնիշի Տ 7425 պետհամարանիշի տաքսի ավտոմեքենայով գնացել է ,,Նուբարաշեն,, քրեակատարողական հիմնարկ, ճանապարհին սուպերմարկետից իր կողմից գնելով ծխախոտ, տորթ, հյութեր, ջերմուկ, օճառ և այլ ապրանքներ և գործով չպարզված անձի տված ապրանքները նույնպես վերցնելով, մուտք է գործել քրեակատարողական հիմնարկ։ Այդ մասին նույնպես Մարինե Թամոյանը բջջային հեռախոսով հայտնել է Գոռ Բաղդասարյանին։
Ժ.1750-ին «Նուբարաշեն» ՔԿ հիմնարկի հանձնուքների սենյակում Մարինե Թամոյանը 49 խցի կալանավոր Գոռ Բաղդասարյանի անվամբ հանձնուք է ցանկացել հանձնել։ Նա լրացրել է սահմանված ձևի համապատասխան փաստաթղթերը, այնուհետև հանձնել է սննդամթերք, ներքնաշորեր, ծխախոտ, օճառ, երեսսրբիչ և բաղնիքի կապույտ գույնի ոսկեգույն նախշերով սրբիչ։ Քրեակատարողական հիմնարկի աշխատակիցները վերջին առարկայի եզրակարի մեջ հայտնաբերել են թաքցված թափանցիկ պոլիէթիլենային թաղանթով փաթեթավորված կասկածելի զանգված` բաց շագանակագույն փոշու տեսքով։ Էլեկտրոնային կշեռքի ցուցիչով նշված զանգվածի քաշը կազմել է 0,5 գրամ։ Այն լուսանկարահանվել, փաթեթավորվել, կնքվել և առգրավվել է, կազմվել է համապատասխան արձանագրություն։
Մարինե Թամոյանը հայտարարել է, որ չգիտի ի՞նչ զանգված է հայտնաբերվածը և որ կապույտ գույնի բաղնիքի սրբիչն իրեն է տվել Գոռ Բաղդասարյանի կինը` Շողիկը։ Հետագայում նա ժխտել է սրբիչը Շողիկից ստանալու հանգամանքը։

Գ. Թ. 4-5, 2, 6-7

Քրեակատարողական հիմնարկի աշխատակիցներ Հովհաննես Մանջիկյանի և Մուշեղ Դիլանյանի կողմից Գոռ Բաղդասարյանի անվամբ որպես հանձնուք ձևակերպված և հանձնված սրբիչի եզրակարերի մեջ թաքցված թմրամիջոցի հայտնաբերմամբ Գոռ Բաղդասարյանի կամքից անկախ պատճառներով նրա կողմից խոշոր չափերի հասնող թմրամիջոցի ապօրինի ձեռք բերելը ավարտին չի հասցվել։
Նշանակվել է դատաքիմիական փորձաքննություն, հայտնաբերված և առգրավված զանգվածն ուղարկվել է ՀՀ փորձագիտական կենտրոն։

Գ. Թ. 23

Փորձագետի 11.12.2009թ. 45020905 եզրակացության համաձայն` 0,24 գրամ մաքուր քաշով, յուրահատուկ հոտով բաց դարչնագույն փոշենման զանգվածը հանդիսանում է տնայնագործական եղանակով պատրաստված «Հերոին» տեսակի թմրամիջոց։

Գ. Թ. 26-28

Փաստի առթիվ 11.12.2009թ. Էրեբունու քննչական բաժնի կողմից ՀՀ քրեական օրենսգրքի 34, 268-րդ հոդվածի 3-րդ մասով հարուցվել է 12142409 քրեական գործը և կատարվել է նախաքննություն։

Գ. Թ. 1

22.01.2010թ. որոշում է կայացվել Գոռ Թաթուլի Բաղդասարյանին ՀՀ քրեական օրենսգրքի 34, 268-րդ հոդվածի 3-րդ մասով որպես մեղադրյալ ներգրավելու մասին։

Գ. Թ. 121-123

Առաջադրված մեղադրանքում Գոռ Թաթուլի Բաղդասարյանն իրեն լիովին մեղավոր է ճանաչել։

Գ. Թ. 126-128

ՀՀ առողջապահության նախարարության «Հոգեբուժական բժշկական կենտրոն» ՓԲԸ նարկոլոգիական կլինիկայի դատանարկոլոգիական հանձնաժողովի 02.02.2010թ. թիվ 32/10 եզրակացության համաձայն Գոռ Թաթուլի Բաղդասարյանը տառապում է ափիոնային թմրամոլությամբ, ունի հարկադիր բուժման կարիք, բուժմանը հակացուցումներ չկան։

Գ. Թ. 176-177

26.02.2010թ. քրեական գործից մաս է անջատվել թմրամիջոցի իրացման աղբյուրը պարզելու համար։

Գ. Թ. 183-184

2.Դատաքննությամբ ձեռք բերված ու հետազոտված ապացույցները։

Դատաքննությամբ հետազոտվել են մեղադրանքի հիմքում դրված բոլոր այն ապացույցները, որոնք թվարկված են մեղադրական եզրակացության մեջ։
Ապահովելով դատաքննության լրիվությունը, բազմակողմանիությունն ու օբյեկտիվությունը և ղեկավարվելով գործի արդար քննությանը վերաբերող սահմանադրական և դատավարական նորմերի դրույթներով, հիմնվելով պատշաճ ընթացակարգի շրջանակներում դատական քննության ընթացքում գործի հանգամանքների հետազոտման արդյունքի վրա, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով, դատարանը գտնում է, որ սույն քրեական գործով ամբաստանյալի մեղքը հիմնավորված է։
Նշված եզրահանգման համար հիմք են հանդիսանում հետևյալ ապացույցները.
ՀՀ ԱՆ «Նուբարաշեն» ՔԿ հիմնարկի աշխատակիցների կողմից 10.12.2009թ. կազմած արձանագրությամբ այն մասին, որ 2009թ. դեկտեմբերի 10-ին ժ. 1750-ին «Նուբարաշեն» ՔԿ հիմնարկի հանձնուքների ընդունման սենյակում Մարինե Ազատի Թամոյանը ձևակերպել է 17 անուն ընդամենը 30 կտոր սննդամթերքի, ներքնաշորերի, ծխախոտի, օճառի, ինչպես նաև մեկական երեսսրբիչի և բաղնիքի սրբիչի ընդունման դիմում` նշված ապրանքները թիվ 49 խցի կալանավոր Գոռ Թաթուլի Բաղդասարյանին հանձնելու համար։
Հանձնուքն ընդունող, «Նուբարաշեն» ՔԿՀ աշխատակից Հովհաննես Մանջիկյանը կապույտ գույնի ոսկեգույն նախշերով բաղնիքի սրբիչի եզրակարերի մեջ հայտնաբերել է թաքցված թափանցիկ պոլիէթիլենային թաղանթով փաթեթ` բաց շագանակագույն փոշենման զանգվածի պարունակությամբ։ Այն կշռվել, փաթեթավորվել, կնքվել, լուսանկարահանվել և առգրավվել է, կազմվել է համապատասխան արձանագրություն։

Գ. Թ. 4-5, 6-7

ՀՀ փորձագիտական կենտրոնը, իրականացնելով թմրանյութերի քրեագիտական փորձաքննությունը և հետազոտելով նշված փոշենման զանգվածը, 11.12.2009թ. տվել է 45020905 եզրակացությունն այն մասին, որ 0,24 գրամ մաքուր քաշով յուրահատուկ հոտով բաց դարչնագույն փոշենման զանգվածը հանդիսանում է տնայնագործական եղանակով պատրաստված «Հերոին» տեսակի թմրամիջոց։

Գ. Թ. 26-28

ՀՀ քրեական օրենսգրքի 34, 268-րդ հոդվածի 3-րդ մասով առաջադրված մեղադրանքում Գոռ Բաղդասարյանն իրեն լիովին մեղավոր է ճանաչել և ցուցմունք է տվել այն մասին, որ իր խնդրանքով է թմրամիջոցն իրացրած անձնավորությունը, որի ինքնությունն ինքը չի բացահայտի, Մարինե Թամոյանին փոխանցել սրբիչի եզրակարերում թաքցված թմրամիջոցը, որը նախատեսված է եղել իր օգտագործման համար, սակայն հանձնուքների սենյակում այն հայտնաբերելու հետևանքով թմրամիջոցը հայտնաբերվել է։

Գ.Թ. 22, 126, 128,179,դատաքննությանարձանագրություն

Վկա Մարինե Թամոյանը ցուցմունք է տվել այն մասին, որ 2008 թվականի մայիսից ընկերություն է արել ամբաստանյալ Գոռ Բաղդասարյանի հետ։ 2009թ. աշնանը բջջային հեռախոսով 098-61-82-64 հեռախոսահամարից իրեն զանգահարել է Գոռ Բաղդասարյանը և հայտնել է, որ ինքը կալանավորված է, գտնվում է «Նուբարաշեն» քրեակատարողական հիմնարկում։ 2009թ. նոյեմբերի 23-ին իր նախաձեռնությամբ զանգահարել է Գոռ Բաղդասարյանին և նրա անվամբ հանձնուք է պատրաստել և տարել «Նուբարաշեն» քրեակատարողական հիմնարկ, տարել է սննդամթերք և այլ անհրաժեշտ ապրանքներ։
Հաջորդ անգամ ինքը 09.12.2009թ. կրկին զանգահարել է Գոռ Բաղդասարյանին և ցանկություն հայտնել նրա համար վերստին սնունդ և ծխախոտ տանել։ Գոռ Բաղդասարյանն իրեն պատվիրել է քրեակատարողական հիմնարկ գնալուց առաջ նախապես իրեն զանգահարել։ 10.12.2009թ. ժ. 1400-ի սահմաններում իրեն զանգահարել է Գոռ Բաղդասարյանը, ինքը հայտնել է, որ ցանկանում է տանել հանձնուքը։ Գոռ Բաղդասարյանը պատվիրել է գնալ Մերգելյան ինստիտուտի ցայտաղբյուրի մոտ, իրեն կմոտենա մի տղամարդ, նրա փոխանցածը թող ինքը իր հետ բերի և հանձնուքի հետ միասին հանձնի։ Ինքը զանգահարել է ծանոթ տաքսիստին` վկա Վլադիմիր Սաֆարյանին, նա եկել է իր վարած տաքսի ավտոմեքենայով, գնացել է ցայտաղբյուրի մոտ և զանգահարելով Գոռ Բաղդասարյանին, հայտնել է, որ գտնվում է պայմանավորված տեղը։ Գոռ Բաղդասարյանն ասել է իրեն, որ որոշ ժամանակ թող սպասի, իրեն մարդ կմոտենա, նրա տված փաթեթը թող իր հետ բերի քրեակատարողական հիմնարկ։
Պայմանավորված տեղում որոշ ժամանակ անց մոտեցել է մի տղամարդ, ինքն իջել է տաքսուց, ստացել է նրա տված փաթեթը, այդ մասին հեռախոսով հայտնել է Գոռ Բաղդասարյանին։ Նշված փաթեթում եղել են տղամարդու ներքնաշորեր, կիսագուլպա, ատամի մածուկ, երեսսրբիչ և բաղնիքի սրբիչ։ Ինքն էլ խանութից գնել է սննդամթերք, ծխախոտ, թեյ, լվացքի փոշի և անծանոթի տված ապրանքների հետ կազմելով մեկ փաթեթ, տաքսիով գնացել է «Նուբարաշեն» ՔԿՀ։
Ավտովարորդ Վլադիմիր Սաֆարյանն սպասել է դրսում, ինքը մուտք է գործել քրեակատարողական հիմնարկ, ձևակերպել է հանձնուքը հանձնելու դիմումը, տարած ապրանքները ցույց է տվել ՔԿ հիմնարկի աշխատակցին։ Վերջինս բաղնիքի սրբիչի եզրակարը քանդել է, և իր համար անսպասելի եզրակարի միջից դուրս է եկել թափանցիկ պոլիէթիլենով փաթաթված դեղնավուն զանգված։ Ինքն անակնկալի է եկել, հասկացել է, որ այն թմրամիջոց է։ Կանչել են ընթերակաների, հայտնաբերվածը կշռվել, փաթեթավորվել և կնքվել է, կազմվել է արձանագրություն։ Եթե ինքն իմանար, որ անծանոթի տված փաթեթում թմրամիջոց կար, ապա այն քրեակատարողական հիմնարկ չէր տանի։

Գ. Թ. 11-13, 33-37, դատաքննության արձանագրություն

Վկա Մարինե Թամոյանը նույն ցուցմունքը պնդել է Գոռ Բաղդասարյանի հետ առերես հարցաքննության ընթացքում։

Գ. Թ. 170-171, դատաքննության արձանագրություն

Վկա Վլադիմիր Սաֆարյանը ցուցմունք է տվել այն մասին, որ աշխատել է «Պրեստիժ» տաքսի-սերվիս ծառայությունում որպես ավտովարորդ, վարել է «ՎԱԶ-2111» մակնիշի Տ 7425 պետհամարանիշի ավտոմեքենան։ Իր ավտոմեքենայի ծառայություններից որպես հաճախորդ օգտվել է Մարինե Թամոյանը, իր բջջային հեռախոսահամարն է 091-84-44-42։ Մարինե Թաոմյանն ունի իր հեռախոսային համարը։
2009թվականի դեկտեմբերի 10-ին ժ.1500-ի սահմաններում իր բջջային հեռախոսահամարով զանգահարել է Մարինե Թամոյանը, խնդրել է իրեն վերցնել Նիկոլ Դուման փողոցի 57 շենքի մոտից և տանել «Նուբարաշեն» քրեակատարողական հիմնարկ, որին Մարինեն անվանել է «Սովետաշենի բերդ»։ Ինքն ավտոմեքենայով գնացել է պայմանավորված վայրը, սպասել է նրան որոշ ժամանակ, եկել է Մարինեն, նստել ավտոմեքենան` պատվիրելով գնալ Մերգելյանի ցայտաղբյուրի մոտ։ Հասնելով նշված վայրը, Մարինեն ինչ-որ մեկին զանգահարել և հայտնել է, որ ինքն արդեն հասել է ցայտաղբյուրի մոտ, ապա իջել է ավտոմեքենայից, ինչ-որ անծանոթից վերցրել է պոլիէթիլենային տոպրակը, պատվիրել է գնալ Հալաբյան փողոց 35 շենք` իրենց տուն։ Նա տոպրակը թողել է ավտոմեքենայի մեջ, գնացել է տուն և շուտ վերադարձել է։ «Նուբարաշեն» ՔԿՀ ճանապարհին Մարինե Թամոյանը «Սթար» խանութ է մտել, վերադարձել է տոպրակի մեջ լցված գնումներով։ Հասնելով քրեակատարողական հիմնարկ, ինքն օգնել է Մարինեին տոպրակները ներս տանելու հարցում, ապա վերադարձել և տաքսի ավտոմեքենայի մեջ սպասել է Մարինեի վերադարձին։ Որոշ ժամանակ անց զինվորական համազգեստով մի տղամարդ իրեն հրավիրել է քրեակատարողական հիմնարկ, որտեղ իմացել է, որ Մարինեի բերած հանձնուքում թմրամիջոց է եղել, որի մասին ինքը չի իմացել։ Ինքը ՔԿՀ-ում տեսել է սրբիչի մեջից հանված պոլիէթիլենի մեջ եղած փոշենման ինչ-որ բան, Մարինեն լաց է եղել և հայտնել է, որ ինքը մեղավոր չէ, չի իմացել թմրամիջոցի առկայության մասին։

Գ. Թ. 16-17, 38-42, դատաքննության արձանագրություն

Վկաներ, «Նուբարաշեն» ՔԿ հիմնարկի անվտանգության ապահովման բաժնի աշխատակիցներ Հովհաննես Մանջիկյանը և Մուշեղ Դիլանյանը ցուցմունք են տվել այն մասին, որ 10.12.2009թ. ժ.1750-ի սահմաններում Մարինե Թամոյանի կողմից կալանավոր Գոռ Բաղդասարյանի անվամբ բերված հանձնուքի մեջ դրված բաղնիքի սրբիչի եզրակարի մեջ հայտնաբերել են թափանցիկ պոլիէթիլենային թաղանթով փաթեթավորված բաց դարչնագույն փոշենման զանգված, այն կշռել, փաթեթավորել և կնքել են, կասկածելով, որ հայտնաբերածը թմրամիջոց է։ Փորձաքննությամբ հիմնավորվել է, որ այն հերոին է։

Գ. Թ. 111-112, 113-114, դատաքննության արձանագրություն

Տոքսիկոքիմիական փորձաքննությամբ 09-2671 հիմնավորվել է, որ Գոռ Բաղդասարյանի մազի փորձանմուշի մեջ առկա են ափիոնի խմբին պատկանող թմրամիջոցի թմրալկալոիդներ։

Գ. Թ. 95-96

Դատանարկոլոգիական փորձաքննության 02.02.2010թ. թիվ 32/10 եզրակացության համաձայն` Գոռ Թաթուլի Բաղդասարյանը տառապում է ափիոնային թմրամոլությամբ, ունի հարկադիր բուժման կարիք, որը հակացուցված չէ։

Գ. Թ. 176-177, 182

«Ղ-Տելեկոմ» ՓԲ ընկերությունից ստացված հեռախոսազանգերի վերծանումներով հիմնավորվել է դեպքի օրը` մինչև թմրամիջոցը ՔԿ հիմնարկում հայտնաբերելը, 10.12.2009թ. ամբաստանյալ Գոռ Բաղդասարյանի 098-61-82-64 և վկա Մարինե Թամոյանի 093-59-01-53 բջջային հեռախոսային բազմաթիվ խոսակցությունների փոխադարձ ինտենսիվ կապը` մինչև հանձնուքում թմրամիջոցը հայտնաբերելը։

Գ. Թ. 150-151, 155-156

Ամբաստանյալ Գոռ Բաղդասարյանի անվամբ 10.12.2009թ. հանձնուք ընդունելու մասին Մարինե Թամոյանի դիմումով և կալանավորի խցային քարտի պատճենով այն մասին, որ Մարինե Թամոյանը 10.12.2009թ. հանձնուք է բերել 49 խցի կալանավոր Գոռ Բաղդասարյանի համար, հանձնուքում եղել է բաղնիքի սրբիչ։

Գ. Թ. 6, 20-21

Թմրամիջոցների և հոգեմետ նյութերի զգալի, խոշոր և առանձնապես խոշոր չափերի վերաբերյալ ՀՀ քրեական օրենսգրքի հավելվածի համաձայն` 0,24 գրամ քաշը «Հերոին» տեսակի թմրամիջոցի համար համարվում է առանձնապես խոշոր չափ (հավելվածի 28-րդ կետ)։

3.Դատարանի իրավական վերլուծությունը։

Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և դրանք գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Գոռ Թաթուլի Բաղդասարյանի մեղքը ՀՀ քրեական օրենսգրքի 34, 268-րդ հոդվածի 3-րդ մասով նախատեսված հանցագործությունը կատարելու մեջ հիմնավորված է և նա պետք է ենթարկվի քրեական պատասխանատվության ու նշված հոդվածի սանկցիայով պետք է պատիժ նշանակվի։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված պատասխանատվությունը մեղմացնող ու ծանրացնող հանգամանքները։ Դրանք բնութագրում են հանցավորի անձնավորությունն ու կատարված հանցագործության հանրային վտանգավորության աստիճանը, հնարավորություն են տալիս կոնկրետ գործով անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ կոնկրետ դեպքով ամբաստանյալ Գոռ Թաթուլի Բաղդասարյանի մոտ, որպես պատասխանատվությունը և պատիժը ծանրացնող հանգամանք, առկա է հանցանքը կատարելու ռեցիդիվը, քանի որ ամբաստանյալի նախկին դատվածությունը մարված չէ։
Քրեական գործով Գոռ Թաթուլի Բաղդասարյանի նկատմամբ պատասխանատվությունը և պատիժը մեղմացնող հանգամանքներ առկա չեն։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ անհրաժեշտ է գործով ամբաստանյալ Գոռ Թաթուլի Բաղդասարյանի նկատմամբ նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, դատարանը տվյալ գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս հանգում է այն հիմնավոր եզրակացության, որ ամբաստանյալի նկատմամբ որպես պատիժ անհրաժեշտ է նշանակել ազատազրկում որոշակի ժամկետով։
ՀՀ քրեական օրենսգրքի 97-րդ հոդվածի 1-ին մասի 4-րդ կետի և 103-րդ հոդվածի հիմքով և ՀՀ քրեակատարողական օրենսգրքի 123-րդ և 126-րդ հոդվածներով սահմանված կարգով ամբաստանյալ Գոռ Թաթուլի Բաղդասարյանի նկատմամբ պետք է նշանակվի պատժի կատարման հետ միացված բժշկական բնույթի հարկադրանքի միջոց ազատազրկումը կրելու վայրում ափիոնային թմրամոլության դեմ, բուժման ժամկետը հաշվակցելով նշանակված պատժի ժամկետի մեջ։
Իրեղեն ապացույց ճանաչված և փորձաքննության հետազոտության ընթացքում 0,02 գրամ փորձանմուշ օգտագործելու արդյունքում մնացած 0,22 գրամ քաշով տնայանագործական եղանակով պատրաստված «Հերոին» տեսակի թմրամիջոցը ենթակա է ոչնչացման դատավճիռն օրինական ուժի մեջ մտնելուց հետո։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 357-358, 360, 365, 368-372-րդ հոդվածներով, դատարանը.

Վ Ճ Ռ Ե Ց

Ամբաստանյալ Գոռ Թաթուլի Բաղդասարյանին մեղավոր ճանաչել ՀՀ քրեական օրենսգրքի 34, 268-րդ հոդվածի 3-րդ մասով և նրա նկատմամբ քրեական պատիժ կիրառել ազատազրկում 3 (երեք) տարի ժամկետով, պատժի սկիզբը հաշվելով 2010 թվականի ապրիլի 01-ից։
Ամբաստանյալ Գոռ Թաթուլի Բաղդասարյանի նկատմամբ նշանակել պատժի կատարման հետ միացված բժշկական բնույթի հարկադրանքի միջոց ազատազրկումը կրելու վայրում` ափիոնային թմրամոլության դեմ, բուժման ժամկետը հաշվակցելով նշանակված պատժի ժամկետի մեջ։
Իրեղեն ապացույց ճանաչված և փորձաքննության արդյունքում մնացած 0,22 գրամ քաշով տնայնագործական եղանակով պատրաստված «Հերոին» տեսակի թմրամիջոցը դատավճիռն օրինական ուժի մեջ մտնելուց հետո ոչնչացնել։
Դատավարության մասնակիցների կողմից դատավճիռը կարող է բողոքարկվել ՀՀ քրեական վերաքննիչ դատարան` հրապարակման պահից մեկ ամսվա ընթացքում։

ԴԱՏԱՎՈՐ` Վ. Թ. ԳՐԻԳՈՐՅԱՆ