Գործ թիվ ԵԷԴ/0025/01/10/
2010թ.


Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վ.Թ.ԳՐԻԳՈՐՅԱՆ
Քարտուղարությամբ Ա.ԱՐՂԱՄԱՆՅԱՆԻ
Մասնակցությամբ՝
Մեղադրող Ա.ՍՏԵՓԱՆՅԱՆ
Ամբաստանյալ Ա.ԱՅՎԱԶՅԱՆ

2010թ. մարտի 15-ին Երևան քաղաքի Էրեբունի և Նուբարաշեն վարչական շրջանների դատարանում, դռնբաց դատական նիստում, քննեց քրեական գործն ըստ մեղադրանքի՝
Ավագ Հերբերտի Այվազյանի, ծնված 05.10.1977թ. ՀՀ Արարատի մարզի Այնթափ գյուղում, հայ, Հայաստանի Հանրապետության քաղաքացի, ութամյա կրթությամբ, ամուսնացած, դատված
1. Մասիսի ժողդատարանի 30.06.1995թ. դատավճռով ՀՀ քրեական օրենսգրքի 86-րդ հոդվածի 2-րդ մասով ազատազրկման 2 տարի ժամկետով, 11.10.95թ. պատժի կրումից ազատվել է «ՀՀ Սահմանադրության ընդունման կապակցությամբ համաներում հայտարարելու մասին» ՀՀ Ազգային ժողովի 26.09.95թ. որոշման համաձայն,
2. Երևան քաղաքի Արաբկիրի շրջանի ժողդատարանի 28.02.1997թ. դատավճռով ՀՀ քրեական օրենսգրքի 254-րդ հոդվածի «ա» կետով և 86-րդ հոդվածի 2-րդ մասով, ՀՀ քրեական օրենսգրքի 37-րդ հոդվածի համաձայն, դատապարտվել է ազատազրկման 3 տարի 6 ամիս ժամկետով, պատժի կրման ժամկետի սկիզբը հաշվելով 07.01.97թ. Հրազդանի ժող. դատարանի 27.03.98թ. որոշմամբ պատժի չկրած մասով` 2 տարի 3 ամիս 10 օր ժամկետով տեղափոխվել է գաղութ բնակավայր,
3. Մասիսի ժողդատարանի 31.08.1998թ. դատավճռով ՀՀ քրեական օրենսգրքի 38-39 հոդվածների համաձայն, դատապարտվել է ազատազրկման 3 տարի 6 ամիս ժամկետով, պատժի կրման ժամկետի սկիզբը հաշվելով 22.06.98թ.։ Արարատի մարզի առաջին ատյանի դատարանի 13.07.2001թ. որոշմամբ արարքը ՀՀ քրեական օրենսգրքի 86-րդ հոդվածի 2-րդ մասից վերաորակվել է ՀՀ քրեական օրենսգրքի 92-րդ հոդվածի 2-րդ մասով, սահմանվել է պատիժ 1 տարի ժամկետով ազատազրկում, ՀՀ քրեական օրենսգրքի 38-39 հոդվածների համաձայն վերջնական պատիժ է սահմանվել 1 տարի 6 ամիս ժամկետով և նա ազատվել է պատժի կրումից` պատիժը փաստացի կրած լինելու հիմքով,
4. Արարատի մարզի առաջին ատյանի դատարանի 06.12.2001թ. դատավճռով ՀՀ քրեական օրենսգրքի 88-րդ հոդվածի 2-րդ, 17-112-1 հոդվածի 2-րդ, 232-րդ հոդվածի 1-ին մասով, ՀՀ քրեական օրենսգրքի 37-րդ հոդվածի կիրառմամբ դատապարտվել է ազատազրկման 10 տարի ժամկետով, պատժի կրման ժամկետի սկիզբը հաշվելով 11.03.2001թ.։
Նույն դատարանի դատավճիռը վերանայելու մասին 09.09.2003թ. որոշմամբ արարքը համապատասխանեցվել է գործող ՀՀ քրեական օրենսգրքի 175-րդ հոդվածի 2-րդ մասի 1-ին, 4-րդ, 5-րդ կետերին, ՀՀ քրեական օրենսգրքի 38-139 հոդվածի 2-րդ մասի 1-ին կետին, 235-րդ հոդվածի 1-ին մասին և պատիժ է սահմանվել ազատազրկում 6 տարի ժամկետով։
Կոտայքի մարզի առաջին ատյանի դատարանի 20.11.03թ. որոշմամբ պայմանական վաղաժամկետ 2 տարի 11 ամիս 1 օր ժամկետով ազատվել է պատիժը կրելուց։
5. Արարատի մարզի 1-ին ատյանի դատարանի 12.04.2005թ. դատավճռով ՀՀ քրեական օրենսգրքի 34, 177-րդ հոդվածի 3-րդ մասի 3-րդ կետով դատապարտվել է ազատազրկման 4(չորս) տարի 6(վեց) ամիս ժամկետով` առանց գույքի բռնագրավման։ ՀՀ քրեական օրենսգրքի 67-րդ հոդվածի կիրառմամբ պատժին մասնակիորեն գումարվել է Արարատի մարզի 1-ին ատյանի դատարանի 06.12.2001թ. դատավճռով և նույն դատարանի դատավճիռը վերանայելու մասին 09.09.2003թ. որոշմամբ նշանակված պատժի չկրած մասից 2 տարի 11 ամիս 1 օրից վեց ամիսը և սահմանվել է վերջնական ազատազրկում 5 (հինգ) տարի ժամկետով` առանց գույքի բռնագրավման։ Պատիժը կրելու ժամկետի սկիզբը հաշվվել է 2005 թվականի փետրվարի 09-ից, բնակվել է Արարատի մարզի Այնթափ գյուղում։

Մեղադրվում է ՀՀ քրեական օրենսգրքի 268-րդ հոդվածի 1-ին մասով։ Առաջադրված մեղադրանքում իրեն մեղավոր չճանաչեց։
Ամբաստանյալի նկատմամբ 08.02.2010թ. խափանման միջոց է ընտրվել կալանավորումը։

1. Գործի դատավարական նախապատմությունը.
Ամբաստանյալ Ավագ Այվազյանը Արարատի մարզի ընդհանուր իրավասության դատարանի 12.04.2005թ. դատավճռով դատապարտվել է ազատազրկման 5 (հինգ) տարի ժամկետով, պատիժը կրել է «Էրեբունի» քրեակատարողական հիմնարկում։ Ամբաստանյալ Ա. Այվազյանը ազդոսկրը կոտրվելու կապակցությամբ բուժվել է «Դատապարտյալների հիվանդանոց» ՔԿ հիմնարկում։
2009թվականի հոկտեմբերի 29-ին ամբաստանյալ Ա. Այվազյանը «Դատապարտյալների հիվանդանոց» ՔԿ հիմնարկից «Էրեբունի» ՔԿ հիմնարկ փոխադրվելու ընթացքում քննությամբ չպարզված անձից առանց իրացնելու նպատակի ապօրինի ձեռք բերել և իր ձախ ոտքի կիսագուլպայի մեջ պահել է 0.345 գրամ մաքուր քաշով բուսական զանգված, որը հանդիսացել է կանեփ ցեղի խոտաբույսերի մնացորդներից տնայնագործական եղանակով պատրաստված «մարիխուանայի» ու թութուն ցեղի խոտաբույսերի տերևների մնացորդներից բաղկացած անհամասեռ մանր խառնուրդ, որի բաղադրության մեջ պարունակվել է 0,0072 գրամ «տետրահիդրոկանաբինոլ» թմրամիջոց։ Նշված սպեցիֆիկ սուր հոտով բուսական խառնուրդը լցվել է ծխախոտի փայլաթիթեղի (ֆոլգա) մեջ, փաթաթվել է կապույտ գույնի պոլիէթիլենով ու պահվել է ամբաստանյալի ձախ ոտքի կիսագուլպայի մեջ։
Թմրամիջոցը հայտնաբերվել է «Էրեբունի» ՔԿ հիմնարկում` ամբաստանյալ Ավագ Այվազյանի անձնական խուզարկությամբ։
Փաստի առթիվ ՀՀ ոստիկանության ՔԳՎ Էրեբունու քննչական բաժնի կողմից 05.11.09թ. ՀՀ քրեական օրենսգրքի 268-րդ հոդվածի 1-ին մասով հարուցվել է 12138609 քրեական գործը և նախաքննություն է կատարվել։
04.02.2010թ. որոշում է կայացվել Ավագ Հերբերտի Այվազյանին ՀՀ քրեական օրենսգրքի 268-րդ հոդվածի 1-ին մասով որպես մեղադրյալ ներգրավելու մասին, իսկ 08.02.2010թ. դատարանի որոշմամբ բավարարվել է նախաքննական մարմնի միջնորդությունը` մեղադրյալ Ավագ Այվազյանի նկատմամբ որպես խափանման միջոց է ընտրվել կալանավորումը։
09.02.2010թ. դրությամբ Ավագ Այվազյանը կրել է Արարատի մարզի ընդհանուր իրավասության դատարանի 12.04.2005թ. դատավճռով նշանակված պատիժը։
Անհայտ անձի կողմից նշված թմրամիջոցը իրացնելու մասով քրեական գործից մաս է անջատվել։
ՀՀ քրեական օրենսգրքի 268-րդ հոդվածի 1-ին մասով ամբաստանյալ Ավագ Այվազյանն իրեն մեղավոր չի ճանաչել։

2.Դատաքննությամբ ձեռք բերված և հետազոտված ապացույցները.
Դատաքննությամբ հետազոտվել են մեղադրանքի հիմքում դրված բոլոր այն ապացույցները, որոնք թվարկված են մեղադրական եզրակացության մեջ։
Ապահովելով դատաքննության լրիվությունը, բազմակողմանիությունն ու օբյեկտիվությունը և ղեկավարվելով գործի արդար քննությանը վերաբերող սահմանադրական և դատավարական նորմերի դրույթներով, հիմնվելով պատշաճ իրավական ընթացակարգի շրջանակներում դատական քննության ընթացքում գործի հանգամանքների հետազոտման արդյունքի վրա, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով, դատարանը գտնում է, որ սույն քրեական գործով ամբաստանյալի մեղքը հիմնավորված է։
Դատարանի նշված եզրահանգման համար հիմք են հանդիսանում հետևյալ ապացույցները.
ամբաստանյալ Ավագ Այվազյանին «Դատապարտյալների հիվանդանոց» քրեակատարողական հիմնարկից «Էրեբունի» քրեակատարողական հիմնարկ տեղափոխելուց հետո վերջին վայր ընդունելիս կատարված անձնական խուզարկության 29.10.2009թ. արձանագրությամբ այն մասին, որ սահմանված կարգին համաձայն` դատապարտյալ Ավագ Այվազյանին առաջարկվել է հանձնել իր մոտ ունեցած` օրենքով արգելված իրերն ու առարկաները։ Ավագ Այվազյանը հայտարարել է, որ այդպիսիք իր մոտ չկան։ Որից հետո կատարվել է անձնական խուզարկություն։ Ավագ Այվազյանի ձախ ոտքի ոտնաթաթի տակ` կիսագուլպայի մեջ, հայտնաբերվել է կապույտ գույնի պոլիէթիլենային փաթեթ, որի մեջ եղել է ծխախոտի փայլաթիթեղի (ֆոլգա) մեջ լցված կանաչ գույնի չոր զանգված յուրահատուկ սուր հոտով։ Այն կշռվել է, քաշը կազմել է 0,3 գրամ, այն առգրավվել, փաթեթավորվել և կնքվել է։ Հայտնաբերվել է նաև բջջային հեռախոսի մեկ հատ քարտ։
Անձնական խուզարկությամբ հայտնաբերվածը լուսանկարահանվել է։

Գ. Թ. 4, 5-7

Ամբաստանյալ Ավագ Այվազյանի անձնական խուզարկությամբ հայտնաբերված սուր հոտով կանաչ գույնի չոր զանգվածը հետաքննության մարմնի որոշմամբ ուղարկվել է դատանյութագիտական փորձաքննության։
ՀՀ փորձագիտական կենտրոնի 2009թ. նոյեմբերի 02-ի ՀՄ-39490905 եզրակացության համաձայն` իրականացվել է փորձաքննություն` երկու մասից` կատարվել է բուսաբանական և թմրանյութերի քրեագիտական հետազոտություն։
Փորձաքննությանը ներկայացված 0,345 գրամ մաքուր քաշով բուսական զանգվածը չորացվել է չորացնող պահարանում 1100C-ի պայմաններում, մինչև հետազոտվող նմուշի հաստատուն կշիռ ձեռք բերելը, այն վերջնականապես կազմել է 0,32 գրամ։ Փորձաքննությամբ մորֆոլոգիական և անատոմիական հետազոտության արդյունքում պարզվել է, որ բուսական զանգվածը հանդիսանում է կանեփ ցեղի խոտաբույսերի տերևների, սերմերի, պտղակից թեփուկների մնացորդներից և թութուն ցեղի խոտաբույսերի տերևների մնացորդներից բաղկացած անհամասեռ մանր խառնուրդ։
Փորձաքննության ներկայացված 0,32 գրամ հաստատուն կշռով բուսական զանգվածը տնայնագործական եղանակով պատրաստված «մարիխուանա» տեսակի թմրամիջոց է, որի խառնուրդում պարունակվում է 0,0072 գրամ «տետրահիդրո- կանաբինոլ» տեսակի թմրամիջոց։
Հետազոտության ընթացքում փորձագետների կողմից բուսական զանգվածից օգտագործվել է 0,09 գրամ։

Գ. Թ. 17-18, 19

Առաջադրված մեղադրանքում Ավագ Այվազյանն իրեն մեղավոր չի ճանաչել, ցուցմունք է տվել այն մասին, որ ոտքը կոտրվելու պատճառով բուժվել է «Դատապարտյալների հիվանդանոց» ՔԿ հիմնարկում, իսկ 2009թ. հոկտեմբերի 29-ին տեղափոխվել է «Էրեբունի» ՔԿ հիմնարկ։
Ուղեկցող դասակի ավտոմեքենայի խցիկ մտնելիս հատակին նկատել է փաթեթ։ Ենթադրելով, որ դրա մեջ «քսիֆ» կարող է լինել, այն վերցրել և առանց պարունակությունն ստուգելու թաքցրել է ձախ ոտքի գուլպայի մեջ, չիմանալով, որ այն թմրամիջոց է։ Անձնական խուզարկության ժամանակ հայտարարել է, որ իր մոտ օրենքով արգելված որևէ իր կամ առարկա չկա, քանի որ մտածել է, թե իր կիսագուլպայի մեջ թաքցված փաթեթը չի հայտնաբերվի, սակայն այն անձնական խուզարկությամբ հայտնաբերվել ու առգրավվել է։
Ամբաստանյալը նշել է, որ ինքը չի իմացել, որ դա թմրամիջոց է, այն նախատեսված չի եղել որևէ մեկին հանձնելու համար և իրեն ոչ ոք չի խնդրել այն հանձնել մեկ այլ անձի։

Գ. Թ. 8-9, 113-114, դատաքննության արձանագրություն

Ամբաստանյալ Ավագ Այվազյանը 29.10.2009թ. իր բացատրության մեջ հետևյալ կերպ է բացատրել իր չխոստովանելը. «ես բացի այն, որ կալանավոր եմ, նաև այնքան ինքնասիրություն և արժանապատվություն ունեմ, որ ինձ թույլ չեմ տա կյանքում, որ ասեմ ինչ-որ մեկը ինձ բան է տվել կամ ինչ-որ մեկին բան եմ տալու»։

Գ. Թ. 8-9

Ամբաստանյալին անձնական խուզարկության ենթարկած «Էրեբունի» ՔԿ հիմնարկի աշխատակից Անուշավան Հարությունյանի և նույն ՔԿ հիմնարկի աշխատակից Գարեգին Հարությունյանի` որպես վկա հարցաքննվելիս տված ցուցմունքներով այն մասին, որ «Դատապարտյալների հիվանդանոց» ՔԿ հիմնարկից «Էրեբունի» ՔԿ հիմնարկ տեղափոխված դատապարտյալ Ավագ Այվազյանը 29.10.09թ. խուզարկվել է, նրա ձախ ոտքի ոտնաթաթի (ներբանի) տակից կիսագուլպայի մեջ հայտնաբերվել է կապույտ գույնի պոլիէթիլենային փաթեթ, որի մեջ ծխախոտի փայլաթիթեղով (ֆոլգա) փաթեթավորված եղել է յուրահատուկ սուր հոտով կանաչ գույնի չոր զանգված 0,3 գրամ քաշով, այն առգրավվել, փաթեթավորվել և կնքվել է։ Կալանավոր Ավագ Այվազյանը հայտարարել է, որ փաթեթը գտել է ուղեկցող դասակի ավտոմեքենայի մեջ և չգիտի, թե այն ի՞նչ պարունակություն ունի։

Գ. Թ. 15, 21, 30, 105-106, դատաքննության արձանագրություն

Ամբաստանյալ Ավագ Այվազյանի անձնական խուզարկությանը որպես ընթերականեր մասնակցած դատապարտյալներ, քրեական գործով որպես վկա հարցաքննված Արթուր Մկրտչյանը և Արթուր Վարդանյանը ցուցմունք են տվել, որ Ավագ Այվազյանի անձնական խուզարկությամբ նրա ձախ ոտքի կիսագուլպայից հայտնաբերվել, կշռվել, փաթեթավորվել, կնքվել և առգրավվել է կապույտ պոլիէթիլենային տոպրակում ծխախոտի փայլաթիթեղով (ֆոլգա) փաթեթավորված յուրահատուկ սուր հոտով կանաչ գույնի չոր զանգված 0,3 գրամ քաշով։ Ավագ Այվազյանը հայտարարել է, որ այն գտել է կալանավորներին ուղեկցող ավտոմեքենայի մեջ։
Գ. Թ. 20, 31, 14, 32

Նախաքննության ընթացքում որպես վկա հարցաքննված` ՀՀ ԱՆ ՔԿՎ առաջատար մասնագետ Արթուր Իսահակյանի, մյուս աշխատակիցներ Ռաֆայել Հարությունյանի և Արման Աղաջանյանի ցուցմունքներով այն մասին, որ իրենց վերակարգն է ավտոմեքենայով տեղափոխել կալանավորներին մեկ ՔԿ հիմնարկից մեկ այլ ՔԿ հիմնարկ։ Կոնկրետ Ավագ Այվազյանին «Դատապարտյալների հիվանդանոց» ՔԿ հիմնարկից 29.10.09թ. տեղափոխել են «Էրեբունի» ՔԿ հիմնարկ։ Իրենք նախապես ստուգել են ավտոմեքենան, որի մեջ չէր կարող թմրամիջոց գցված լինել։ Թե ումի՞ց կամ որտեղի՞ց է դատապարտյալ Ավագ Այվազյանը ձեռք բերել թմրամիջոցը, իրենց հայտնի չէ։
Գ. Թ. 41-42, 39-40, 37-38

Հայտնաբերված թմրամիջոցը ճանաչվել է իրեղեն ապացույց։

Գ. Թ. 120

3.Դատարանի իրավական վերլուծությունը.
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և դրանք գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Ավագ Այվազյանի մեղքը ՀՀ քրեական օրենսգրքի 268-րդ հոդվածի 1-ին մասով նախատեսված հանցագործություն կատարելու մեջ հիմնավորված է և նա պետք է ենթարկվի քրեական պատասխանատվության և նշված հոդվածի սանկցիայով պետք է պատիժ նշանակվի։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված պատասխանատվությունը մեղմացնող ու ծանրացնող հանգամանքները։ Դրանք բնութագրում են հանցավորի անձնավորությունն ու կատարված հանցագործության հանրային վտանգավորության աստիճանը, հնարավորություն են տալիս կոնկրետ գործով անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Ավագ Այվազյանի նկատմամբ մեղմացուցիչ հանգամանքներ առկա չեն։ Որպես ծանրացուցիչ հանգամանք առկա է հանցանքը կատարելու ռեցիդիվը։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ անհրաժեշտ է գործով ամբաստանյալ Ավագ Այվազյանի նկատմամբ նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, դատարանը տվյալ գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս հանգում է այն հիմնավոր եզրակացության, որ ամբաստանյալի նկատմամբ անհրաժեշտ է նշանակել ազատազրկում։
Իրեղեն ապացույց ճանաչված և փորձագիտական հետազոտությունից հետո մնացած 0,23 գրամ կանաչավուն բուսական զանգված մարիխուանան տետրահիդրոկանաբինոլի պարունակությամբ, ենթակա է ոչնչացման։
Ամբաստանյալ Ավագ Հերբերտի Այվազյանի նկատմամբ որպես խափանման միջոց ընտրված կալանավորումը անհրաժեշտ է թողնել անփոփոխ։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 357–358, 360, 368-372-րդ հոդվածներով, դատարանը.

Վ Ճ Ռ Ե Ց

Ամբաստանյալ Ավագ Հերբերտի Այվազյանին մեղավոր ճանաչել ՀՀ քրեական օրենսգրքի 268-րդ հոդվածի 1-ին մասով նախատեսված հանցանքում և նշված հոդվածի սանկցիայով դատապարտել ազատազրկման 6 (վեց) ամիս ժամկետով, որը պետք է կրի ՀՀ արդարադատության նախարարության քրեակատարողական համապատասխան հիմնարկում։
Ավագ Հերբերտի Այվազյանի նկատմամբ նշանակված պատժի սկիզբը հաշվել 2010 թվականի փետրվարի 08-ից։
Ամբաստանյալ Ավագ Հերբերտի Այվազյանի նկատմամբ որպես խափանման միջոց ընտրված կալանավորումը թողնել անփոփոխ։
Դատավճիռն օրինական ուժի մեջ մտնելուց հետո, իրեղեն ապացույց ճանաչված և փորձագիտական հետազոտությունից հետո մնացած 0,23 գրամ կանաչավուն բուսական զանգված մարիխուանան տետրահիդրոկանաբինոլ թմրամիջոցի պարունակությամբ՝ ոչնչացնել։
Դատավճիռը դատավարության մասնակիցների կողմից կարող է բողոքարկվել հրապարակման պահից մեկամսյա ժամկետում՝ ՀՀ քրեական վերաքննիչ դատարան։


ԴԱՏԱՎՈՐ Վ. Թ. ԳՐԻԳՈՐՅԱՆ