Գործ թիվ ԵԷԴ/0022/01/10
2010թ


Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վ.Թ.ԳՐԻԳՈՐՅԱՆ
Քարտուղարությամբ Ա.ԱՐՂԱՄԱՆՅԱՆԻ

Մասնակցությամբ`
Մեղադրող Ա.ՄՈՒՐԱԴՅԱՆԻ
Ամբաստանյալներ Մ.ԱԶՄԱՆՅԱՆԻ
Մ.ՕՀԱՆՅԱՆԻ
Պաշտպան Կ.ՄԱՆՈՒՉԱՐՅԱՆԻ

2010 թվականի ապրիլի 9-ին Երևանի Էրեբունի և Նուբարաշեն վարչական շրջանների դատարանում, դռնբաց դատական նիստում քննեց քրեական գործն ըստ մեղադրանքի՝
1. Մամիկոն Համլետի /Գամուշի/ Ազմանյանի ծնված 07.09.1974թ. Երևան քաղաքում, ազգությամբ եզդի, Հայաստանի Հանրապետության քաղաքացի, ութամյա կրթությամբ, ամուսնացած, չի աշխատել, նախկինում դատված.
1. Թալինի ժողդատարանի 13.12.1994թ. դատավճռով ՀՀ քրեական օրենսգրքի 143-րդ հոդվածի 3-րդ մասով, 89-րդ հոդվածի 3-րդ մասով դատապարտվել է ազատազրկման 4 տարի ժամկետով, 26.07.1996թ. պատժի կրումից ազատվել է պայմանական վաղաժամկետ,
2. Ախուրյանի ժողդատարանի 09.12.1996թ. դատավճռով ՀՀ քրեական օրենսգրքի 86-րդ հոդվածի 2-րդ մասով և 231-րդ հոդվածով, 37-րդ հոդվածի կիրառմամբ դատապարատվել է ազատազրկման 5 տարի 6 ամիս ժամկետով,
3. Լոռու մարզի առաջին ատյանի դատարանի 04.06.2001թ. դատավճռով ՀՀ քրեական օրենսգրքի 87-րդ հոդվածի 2-րդ մասով, 203-րդ հոդվածով, 217-րդ հոդվածով դատապարտվել է ազատազրկման 4 տարի ժամկետով, ազատվել է պայմանական վաղաժամկետ 29.10.2003թ. պատժի չկրած մասը 1 տարի 4 ամիս 23 օր ժամկետով,
4. Շիրակի մարզի առաջին ատյանի դատարանի 27.10.2004թ. դատավճռով ՀՀ քրեական օրենսգրքի 177-րդ հոդվածի 2-րդ մասով, քրեական օրենսգրքի 67-րդ հոդվածի 1-ին մասի կիրառմամբ դատապարատվել է ազատազրկման 3 տարի ժամկետով։ Ազատվել է 27.10.2006թ. պայմանական վաղաժամկետ Կոտայքի մարզի առաջին ատյանի դատարանի կողմից քրեական օրենսգրքի 76-րդ հոդվածի կիրառմամբ 10 ամիս 17 օր չկրած մասով,
5. ՀՀ Հյուսիսային քրեական դատարանի 25.03.2008թ. դատավճռով ՀՀ քրեական օրենսգրքի 177-րդ հոդվածի 3-րդ մասի 3-րդ կետով դատապարտվել է ազատազրկման 5 տարի ժամկետով, պատժի սկիզբը հաշվվել է 20.12.2007թ.։
Բնակվել է ք. Երևան, Հարավ-Արևմտյան Ա-1 թաղամաս, 133 շենքի թիվ 52 բնակարանում։
Մեղադրվում է ՀՀ քրեական օրենսգրքի 34, 268-րդ հոդվածի 2-րդ մասի 2-րդ կետով։
Առաջադրված մեղադրանքում իրեն մեղավոր չի ճանաչել։

2. Մանթաշ Կարապետի Օհանյանի ծնված 29.08.1985թ. Աշտարակ քաղաքում, ազգությամբ հայ, Հայաստանի Հանրապետության քաղաքացի, միջնակարգ կրթությամբ, ամուսնացած, նախկինում դատված.
1. Սյունիքի մարզի առաջին ատյանի դատարանի 17.08.05թ. դատավճռով ՀՀ քրեական օրենսգրքի 361-րդ հոդվածի 4-րդ մասով, կարգապահական գումարտակում պահելով 1 տարի 6 ամիս ժամկետով, պատժի կրումից ազատվել է պայմանական վաղակետ 10 ամիս 24 օր չկրած,
2. Սյունիքի մարզի առաջին ատյանի դատարանի 29.01.2007թ. դատավճռով ՀՀ քրեական օրենսգրքի 361-րդ հոդվածի 1-ին մասի 1-ին կետով` կարգապահական գումարտակում պահելը 1 տարի ժամկետով, ՀՀ քրեական օրենսգրքի 66-րդ հոդվածի 2-րդ մասի կանոնով կարգապահական գումարտակում պահելով 1 տարի ժամկետով, ՀՀ քրեական օրենսգրքի 67-68-րդ հոդվածների կանոններով կարգապահական գումարտակում պահելով 1 տարի 3 ամիս ժամկետով, 17.04.2007թ. Կոտայքի մարզի առաջին ատյանի դատարանի որոշմամբ պատժի կրումից ազատվել է պայմանական վաղաժամկետ 4 ամիս 8 օր չկրած,
3. Երևանի քրեական դատարանի 18.03.2008թ. դատավճռով ՀՀ քրեական օրենսգրքի 182-րդ հոդվածի 2-րդ մասի 3-րդ կետով, քրեական օրենսգրքի 67-68-րդ հոդվածների կիրառմամբ ազատազրկում 6 տարի 4 ամիս ժամկետով, պատժի սկիզբը 11.07.2007թվ.։
Բնակվել է ՀՀ Արագածոտնի մարզ, Բյուրական գյուղում։
Մեղադրվում է ՀՀ քրեական օրենսգրքի 34, 38, 268-րդ հոդվածի 2-րդ մասի 2-րդ կետով։
Առաջադրված մեղադրանքում իրեն մեղավոր է ճանաչել 34, 268-րդ հոդվածի 2-րդ մասով։

1. Գործի դատավարական նախապատմությունը։
ՀՀ ԱՆ «Նուբարաշեն» ՔԿ հիմնարկի թիվ 60 խցում իրենց պատիժն են կրել դատապարտյալներ, սույն գործով մեղադրյալներ Մամիկոն Համլետի /Գամուշի/ Ազմանյանը և Մանթաշ Կարապետի Օհանյանը։
Իրենց տրամադրության տակ ունենալով բջջային մի քանի հեռախոսներ, նրանք անարգել կապ են հաստատել իրենց մտերիմների և ծանոթների հետ, վերջիններին պատվիրել իրենց համար հանձնուքներ բերել ՔԿ հիմնարկ, դրանց մեջ գործով չպարզված անձի միջոցով գաղտնի տեղադրել տալով նաև իրենց օգտագործման համար նախատեսված թմրամիջոցներ։ Իրենց հանցավոր մտադրության գաղտնիությունն ապահովելու և տեղեկատվության արտահոսքը բացառելու նպատակով նրանք այդ գործին են ներգրավել մի քանի հոգու, նրանց պատվիրելով իրականացնել որոշակի կարճ գործողություններ և օգտագործելով նրանց անտեղյակությունը թմրամիջոցների առկայության մասին, փորձել են ի վերջո հասնել իրենց հանցավոր դիտավորության իրականացմանը` անձնական օգտագործման համար ապօրինի ձեռք բերել թմրամիջոցներն ու այն օգտագործել կալանախցում։
Այսպես.
Ամբաստանյալ Մամիկոն Ազմանյանը մինչև ազատազրկվելը ծանոթացել և մտերիմ հարաբերությունների մեջ է գտնվել Երևանի Վարդաշեն թաղամասի բնակչուհի Մարիաննա Ժամկոչյանի հետ, վերջինս ազատազրկման վայրում այցելել է Մ. Ազմանյանին և նրա համար հանձնուքներ է տարել։
Քրեակատարողական հիմնարկում պատիժը կրելու ընթացքում Մամիկոն Ազմանյանը հեռախոսային կապով ծանոթացել է Երևանի «Աթանեսյան գնդապետ Կամո» սուպերմարկետի վաճառողուհի Վարդանուշ Մնացականյանի հետ, նրա հետ հեռախոսակապ է հաստատել, նրանից նույնպես հանձնուքներ է ստացել։
Վկա Մարիաննա Ժամկոչյանը, աշխատելով արտասահմանյան կազմակերպություններից մեկում որպես թարգմանչուհի, չի կարողացել բացակայել աշխատանքից և հաճախ գնալ քրեակատարողական հիմնարկ։ Ամբաստանյալ Մամիկոն Ազմանյանի միջոցով նա 2009թ. սեպտեմբերի սկզբին «Էրեբունի» թանգարանի մոտ 300 ԱՄՆ դոլլար գումար է տվել Վարդանուշ Մնացականյանին, որպեսզի վերջինս այդ գումարով հոգա Մամիկոն Ազմանյանին հանձնուք ուղարկելու և նրա բջջային հեռախոսը լիցքավորելու հոգսերը։
02.10.2009թ. Վարդանուշ Մնացականյանը Մամիկոն Ազմանյանի խնդրանքով գնել է նրա պատվիրած ապրանքները։ Իր համախցեցի դատապարտյալ Տիգրան Մելիքսեթյանի միջոցով Մամիկոն Ազմանյանը հեռախոսով ծանոթացել է Տիգրան Մելիքսեթյանի թաղի բնակիչ «Կառմել» տաքսի ծառայության ավտովարորդ վկա Արա Սահակյանի հետ և բացատրելով նրան Վարդանուշ Մնացականյանի աշխատանքի վայրը, պատվիրել է նրան որոշակի վարձատրության դիմաց Վարդանուշ Մնացականյանից հանձնուքը ստանալ և բերել քրեակատարողական հիմնարկ։ Գործողությունների կոնսպիրացիան ապահովելու նպատակով պատվիրվել է հանձնուքը ձևակերպել Մանթաշ Օհանյանի անվամբ։ Արա Սահակյանին հանձնուքը փոխադրելու համար վճարել է Վարդանուշ Մնացականյանը, նշված օրը հանձնուքը հանձնվել է։
Այսպիսով, ստեղծելով և փորձարկելով հանձնուքը ստանալու նշված մեխանիզմը, ամբաստանյալներ Մամիկոն Ազմանյանը և Մանթաշ Օհանյանն արդեն ձեռնամուխ են եղել թմրամիջոց ձեռք բերելու և այն քրեակատարողական հիմնարկ տեղափոխելու գործին։
Ամբաստանյալ Մամիկոն Ազմանյանը 06.10.2009թ. վերստին Վարդանուշ Մնացականյանից պահանջել է իրեն նույն ավտովարորդի միջոցով հանձնուք ուղարկել` թվարկելով անհրաժեշտ սննդամթերքի և այլ առարկաների ցանկը։ Սակայն պայմանավորվել է Վարդանուշ Մնացականյանի հետ` վերջինիս նախապատրաստած հանձնուքի հետ ուղարկել նաև իր ծանոթի միջոցով ուղարկվող բաղնիքի հողաթափերը։
Վարդանուշ Մնացականյանն անհրաժեշտ գնումներն անելով, սպասել է Մամիկոն Ազմանյանի ծանոթին։ Որոշ ժամանակ անց մեկ այլ տաքսի ավտոմեքենա է եկել խանութ, որի ավտովարորդը Վարդանուշ Մնացականյանին տվել է մի փաթեթ, որի մեջ եղել են բաղնիքի մեկ զույգ հողաթափեր։ Ոչինչ չկասկածելով, Վարդանուշ Մնացականյանը նշված երկու փաթեթները հանձնել է խանութ եկած տաքսի մեքենայի վարորդ Արա Սահակյանին, վճարելով նրա փոխադրավարձը։
Նշված բոլոր գործողությունների ընթացքը հեռախոսային կապով վերահսկվել է Մամիկոն Ազմանյանի կողմից։ Այն պահին, երբ Արա Սահակյանը դեպի քրեակատարողական հիմնարկ է տեղափոխել հանձնուքը, նրան մի քանի անգամ զանգահարել են Մամիկոն Ազմանյանը և Մանթաշ Օհանյանը և պատվիրել են հանձնուքը ձևակերպել Մանթաշ Օհանյանի անվամբ։
Մանթաշ Օհանյանը դատարանին հայտնել է, որ քրեակատարողական հիմնարկում իր անվամբ ձևակերպված հանձնուքները իրենց խուց են տարվում անհապաղ` առանց ձգձգումների։
Ինչպես Վարդանուշ Մնացականյանը, այնպես էլ` Արա Սահակյանը հանձնուքում հողաթափերի մեջ թաքցված թմրամիջոցների առկայության մասին տեղյակ չեն եղել։
2009թվականի հոկտեմբերի 06-ին ժամը 15.25-ի սահմաններում, Երևանի Մ. Մելիքյան փող. 36 տան բնակիչ Արա Կամոյի Սահակյանը ՀՀ ԱՆ ՔԿՎ «Նուբարաշեն» քրեակատարողական հիմնարկի հանձնուքների ընդունման սենյակում թիվ 60 խցի դատապարտյալ Մանթաշ Կարապետի Օհանյանի անվամբ հանձնել է սննդամթերք, ծխախոտ, անձնական հիգիենայի առարկաներ և մեկ զույգ հողաթափեր։
ՔԿ հիմնարկի աշխատողների կողմից աջ ոտքի հողաթափի մեջ հայտնաբերվել է ներբանում կատարված փորվածքում թաքցված 2 հատ պոլիէթիլենային թաղանթով փաթեթավորված կասկածելի նյութի պարունակությամբ փաթեթներ` բուսական զանգվածով։ Դրանցից առաջինը կշռել է 8,8գրամ, երկրորդը` 3,0գրամ։
Հայտնաբերվածը դատավարական կարգի պահպանմամբ առգրավվել, փաթեթավորվել և կնքվել է։
Գ. Թ. 1-7

ՔԿ հիմնարկի 60 խցում կատարված ստուգմամբ Մանթաշ Օհանյանի մոտից հայտնաբերվել և առգրավվել են «Սամսունգ» և «Նոկիա» ֆիրմաների բջջային հեռախոսներ` բաժանորդային քարտերով և «Նոկիա» ֆիրմային հեռախոս` առանց բաժանորդի քարտի։
Գ. Թ. 9

Հողաթափից հայտնաբերված երկու փաթեթ կանաչ զանգվածն ուղարկվել է դատաքիմիական փորձաքննության։
Գ. Թ. 50

Նշված զանգվածների բուսաբանական և քրեագիտական հետազոտության արդյունքում ՀՀ փորձագիտական կենտրոնի 08.10.2009թ. Հմ-36120905 եզրակացության համաձայն փաթեթներում առկա համապատասխանաբար 7,795 գրամ և 2,625 գրամ ընդամենը 10,42 գրամ մաքուր քաշով յուրահատուկ հոտով անհամասեռ մանրացված բուսական զանգվածները տնայնագործական եղանակով պատրաստված «Մարիխուանա» տեսակի թմրամիջոց են համապատասխանաբար 7,615 գրամ և 2,58 գրամ (ընդամենը 10,195) գրամ հաստատուն քաշով։

Գ. Թ. 80-81

Իր քաշով նշված թմրամիջոցը համարվում է խոշոր չափ։
Փաստի առթիվ Էրեբունու քննչական բաժնի կողմից 12.10.2009թ. ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերի հատկանիշներով հարուցվել է թիվ 12135309 քրեական գործը և նախաքննություն է կատարվել։

Գ. Թ. 85

22.12.2009թ. որոշում է կայացվել Մամիկոն Ազմանյանին ՀՀ քրեական օրենսգրքի 34, 268-րդ հոդվածի 2-րդ մասի 2-րդ կետով որպես մեղադրյալ ներգրավելու մասին։
Գ. Թ. 258-259

Առաջադրված մեղադրանքում Մամիկոն Ազմանյանն իրեն մեղավոր չի ճանաչել և հրաժարվել է ցուցմունք տալ։
Գ. Թ. 260

25.12.2009թ. որոշում է կայացվել Մանթաշ Օհանյանին ՀՀ քրեական օրենսգրքի 34, 38, 268-րդ հոդվածի 2-րդ մասի 2-րդ կետով որպես մեղադրյալ ներգրավելու մասին։

Գ. Թ. 267-268

Առաջադրված մեղադրանքում Մանթաշ Օհանյանն իրեն մեղավոր չի ճանաչել և հրաժարվել է ցուցմունք տալ։
Գ. Թ. 270

Թմրամիջոցի ձեռքբերման աղբյուրը պարզված չլինելու հիմքով քրեական գործից մաս է անջատվել 12101610 քրեական գործի համարով` առանձին վարույթով քննություն կատարելու համար։
Գ. Թ. 299-300

01.02.2010թ. որոշումներ են կայացվել Մամիկոն Ազմանյանին առաջադրված մեղադրանքը լրացնելու և նրան ՀՀ քրեական օրենսգրքի 34, 268-րդ հոդվածի 2-րդ մասի 2-րդ կետով նոր մեղադրանք առաջադրելու մասին։

Գ. Թ. 315-316, 317-319

Մամիկոն Ազմանյանը հրաժարվել է առաջադրված հարցերի կապակցությամբ ցուցմունք տալ։
Գ. Թ. 320

2. Դատաքննությամբ ձեռք բերված ու հետազոտված ապացույցները
Դատաքննությամբ հետազոտվել են մեղադրանքի հիմքում դրված բոլոր այն ապացույցները, որոնք թվարկված են մեղադրական եզրակացության մեջ։
Ապահովելով դատաքննության լրիվությունը, բազմակողմանիությունն ու օբյեկտիվությունը և ղեկավարվելով գործի արդար քննությանը վերաբերող սահմանադրական և դատավարական նորմերի դրույթներով, հիմնվելով պատշաճ ընթացակարգի շրջանակներում դատական քննության ընթացքում գործի հանգամանքների հետազոտման արդյունքի վրա, ամբաստանյալների մեղավորության մասին չփարատվող բոլոր կասկածները նրանց օգտին մեկնաբանելով, դատարանը գտնում է, որ սույն քրեական գործով ամբաստանյալների մեղքը հիմնավորված է։
Ամբաստանյալ Մամիկոն Ազմանյանը դատաքննության ընթացքում ՀՀ քրեական օրենսգրքի 34,268-րդ հոդվածի 2-րդ մասի 2-րդ կետով առաջադրված մեղադրանքում իրեն մեղավոր չի ճանաչել և ցուցմունք է տվել այն մասին, որ ինքը հանձնուքում հայտնաբերված և հողաթափերում թաքցված թմրամիջոցի հետ առնչություն չունի, այն քրեակատարողական հիմնարկ ուղարկելու փաստից տեղյակ չի եղել։
Դատաքննության արձանագրություն

Ամբաստանյալ Մանթաշ Օհանյանը դատաքննության ընթացքում իրեն մեղավոր է ճանաչել ոչ թե առաջադրված մեղադրանքում` ՀՀ քրեական օրենսգրքի 34,38,268-րդ հոդվածի 2-րդ մասի 2-րդ կետով, այլ ՀՀ քրեական օրենսգրքի 34, 268-րդ հոդվածի 2-րդ մասի 2-րդ կետով, ցուցմունք տալով այն մասին, որ ամբաստանյալ Մամիկոն Ազմանյանը տեղյակ չի եղել հողաթափում հայտնաբերված թմրամիջոցից, այլ ինքն է ցանկացել իր օգտագործման համար ձեռք բերել նշված թմրամիջոցը, ինքն է կազմակերպել դրա առաքումը քրեակատարողական հիմնարկ, սակայն թմրամիջոցի հայտնաբերմամբ իր հանցավոր դիտավորությունը մինչև վերջ իր կամքից անկախ պատճառներով չի հասցվել մինչև վերջ։

Դատաքննության արձանագրություն

Դատարանը գտնում է, որ ամբաստանյալներ Մամիկոն Ազմանյանին և Մանթաշ Օհանյանին առաջադրված մեղադրանքը հիմնավորված է հետևյալ ապացույցներով.
ՀՀ ԱՆ «Նուբարաշեն» ՔԿ հիմնարկում 06.10.2009թ. կազմված արձանագրություններով այն մասին, որ 06.10.2009թ. Արա Կամոյի Սահակյանի կողմից ՔԿ հիմնարկի թիվ 60 խցի դատապարտյալ Մանթաշ Օհանյանի անվամբ բերված հանձնուքի ընդունման ընթացքում ռենտգեն ապարատով ստուգվել են հանձնուքում եղած մեկ զույգ հողաթափերը։ Աջ ոտքի հողաթափի մեջ հայտնաբերվել է կասկածելի զանգված։ Ներբանի արտաքին ծածկույթը բացելուց հետո ներբանում կատարված փորվածքի խոռոչում հայտնաբերվել են երկու հատ փաթեթներ` կապույտ և վարդագույն պոլիէթիլենային թաղանթներով փաթեթավորված։ Դրանց մեջ համապատասխանաբար հայտնաբերվել, կշռվել, փաթեթավորվել և կնքվել են 8,8գրամ և 3,0գրամ քաշով կանաչ գույնի բուսական զանգված։
Նշվածն առգրավվել է։
Գ. Թ. 2, 3-4

Հանձնուքում պարունակվող սննդամթերքի և այլ իրերի ցուցակով, դրանք 60 խցի դատապարտյալ Մանթաշ Օհանյանին Արա Սահակյանի կողմից հանձնելու մասին դիմումով, որոնց գրառումներով պարզվել է, որ 06.10.2009թ. ՔԿ հիմնարկ բերված հանձնուքում եղել են մեկ զույգ հողաթափեր։

Գ. Թ. 4-6

Թիվ 60 խցի ստուգման արձանագրությամբ այն մասին, որ դատապարտյալ Մանթաշ Օհանյանից առգրավվել են «Սամսունգ», «Նոկիա» մակնիշի 3 բջջային հեռախոսներ, որոնցից 2-ի մեջ եղել են բաժանորդային քարտեր։

Գ. Թ. 9

Հողաթափի մեջ թաքցված երկու հատ պոլիէթիլենային թաղանթներով փաթեթավորված բուսական կանաչ զանգվածներն ուղարկվել են դատաքիմիական փորձաքննության։
ՀՀ ԳԱԱ «Փորձագիտական կենտրոն» ՊՈԱԿ-ի 08.10.2009թ. թիվ 36120905 եզրակացության համաձայն` դատաքիմիական փորձաքննությամբ պարզվել է, որ փորձաքննությանը ներկայացված նմուշներն ունեցել են 7,795գրամ և 2,625գրամ /ընդամենը` 10,42գրամ/ մաքուր քաշ, դրանք յուրահատուկ հոտով անհամասեռ մանրացված բուսական զանգված են, որոնք համապատասխանաբար 7,615գրամ և 2,58գրամ /ընդամենը 10,195գրամ/ հաստատուն քաշով տնայնագործական եղանակով պատրաստված «Մարիխուանա» տեսակի թմրամիջոց են։

Գ. Թ. 80-81

Նշված թմրամիջոցը ճանաչվել է իրեղեն ապացույց։

Գ. Թ. 106

Վկա Արա Սահակյանը բացատրություններ և ցուցմունքներ է տվել այն մասին, որ ինքը վարում է տաքսի ավտոմեքենա, օգտվում է 093-514031 բջջային հեռախոսահամարից։ 02.10.2009թ. իր բջջային հեռախոսին զանգ է ստացվել 093-108398 հեռախոսահամարից, զանգահարողն եղել է իր թաղի բնակիչ, ՔԿ հիմնարկում պատիժը կրող դատապարտյալ Տիգրան Մելիքսեթյանը։ Վերջինս իր հետ զրուցելուց հետո հայտնել է, որ հեռախոսը փոխանցում է իր համախցեցի կալանավոր Մամիկոն Ազմանյանին։
Վերջինս հեռախոսով իրեն առաջարկել է որպես տաքսի ավտոմեքենայի վարորդ պատվեր ընդունել իրենից, գնալ «Էրեբունի» հիվանդանոցի մոտ գտնվող «Գնդապետ Կամո» խանութ, Վարդուհի անունով մի աղջիկ իրեն հանձնուք կտա, այն անհրաժեշտ է բերել «Նուբարաշեն» ՔԿ հիմնարկ և հանձնել Մանթաշ Օհանյանի անվամբ։ Ինքը Վարդուհի անունով մի աղջկանից ստացել և Մանթաշ Օհանյանի անվամբ որպես հանձնուք հանձնել է սննդամթերք և այլ իրեր։
Երկրորդ անգամ 2009թվականի հոկտեմբերի 6-ին ժամը 14.20-ի սահմաններում վերստին բջջային հեռախոսով իրեն զանգահարել է դատապարտյալ Տիգրան Մելիքսեթյանը և հեռախոսը փոխանցել է Մամիկոն Ազմանյանին։ Վերջինս իրեն խնդրել է նորից գնալ նույն խանութ և Վարդուհուց հանձնուք ստանալ ու բերել ՔԿ հիմնարկ, հանձնել Մանթաշ Օհանյանի անվամբ։ Իր վարած տաքսի ավտոմեքենայով գնացել և Վարդուհի Մնացականյանից ստացել է հանձնման ենթակա սննդամթերքն ու այլ իրերը, այդ թվում` մեկ զույգ հողաթափերը, Վարդուհին իրեն տվել է նաև հանձնուքի անվանացանկին վերաբերող ցուցակը, վճարել է իրեն տաքսու փոխադրավարձը, նշված հանձնուքը ինքը տարել է «Նուբարաշեն» քրեակատարողական հիմնարկ և լրացրել է դիմումի ձևը` դրա մեջ թվարկելով Վարդուհու տված ապրանքի տեսակն ու քանակը։ Մինչև ՔԿ հիմնարկ հասնելը և հանձնուքը ձևակերպելը Մամիկոն Ազմանյանը և Մանթաշ Օհանյանը բազմիցս զանգահարել են իրեն և հետաքրքրվել, թե ու՞ր է հասել ինքը, ճանապարհի ո՞ր հատվածում է գտնվում և ինչու՞ է ուշանում։ Հանձնուքը ձևակերպել է Մանթաշ Օհանյանի անվամբ, քանի որ Մամիկոնը և Մանթաշը այդպես էին պատվիրել իրեն։
Հանձնուքի ընդունման սենյակում ՔԿ հիմնարկի աշխատակիցն ստուգել է իր տարած ապրանքը և աջ ոտքի հողաթափի ներբանի կտորը բացելով, դրա տակից, խոռոչում հայտնաբերել է երկու փաթեթ` կանաչ բուսական զանգվածով, որի գոյության մասին ինքը չի իմացել։ Հետագայում իմացել է, որ այն թմրամիջոց է եղել, հողաթափի ներբանում թմրամիջոցը թաքցնելու մասին ինքը տեղեկություն չի ունեցել։
Գ. Թ.12-13, 14-15, 89-91, 231-232,
դատաքննության արձանագրություն

Վկա Վարդանուշ /նույնը` Վարդուհի/ Սերյոժայի Մնացականյանի ցուցմունքով։
Վկան հայտնել է, որ աշխատում է «Աթանեսյանի գնդապետ Կամո» անվանումը կրող «Սուպերմարկետում» որպես վաճառող, իր բջջային հեռախոսի համարն է 093-22-04-16։ 2009թ. ամռանը բջջային հեռախոսային կապով ծանոթացել է «Նուբարաշեն» ՔԿ հիմնարկի դատապարտյալ Մամիկոն Ազմանյանի հետ, երբեմն նրան հանձնուք է տարել։ Հեռախոսով մշտական կապի մեջ են գտնվել միմյանց հետ։
2009թ. սեպտեմբերի վերջերին Մամիկոն Ազմանյանի խնդրանքով «Էրեբունի» թանգարանի մոտ հանդիպել է մի անծանոթ կնոջ, վերջինս իրեն է փոխանցել 300 ԱՄՆ դոլլար գումար, որով, ըստ Մամիկոն Ազմանյանի հետ ունեցած բանավոր պայմանավորվածության, ինքը պետք է գներ և քրեակատարողական հիմնարկ ուղարկեր սննդամթերք և այլ անհրաժեշտ առարկաներ, վճարեր Մ. Ազմանյանի հեռախոսային խոսակցությունների ծախսերը։
2009թ. հոկտեմբերի 2-ին Մամիկոն Ազմանյանը զանգահարել է իրեն և թվարկելով իրեն անհրաժեշտ իրերի ու սննդամթերքի ցանկը, խնդրել է հանձնուք պատրաստել, այն տվել է մի անծանոթ տաքսու վարորդի, որին Մամիկոն Ազմանյանն էր ուղարկել իր մոտ, վճարել է տաքսու վարորդին։ Տաքսին եղել է կարմիր գույնի։ Մի քանի ժամ անց Մամիկոն Ազմանյանը զանգահարել է իրեն և շնորհակալություն հայտնել հանձնուքն առաքելու համար։
Մի քանի օր անց` 2009թ. հոկտեմբերի 6-ին ժ.12-ի սահմաններում զանգահարել է Մամիկոն Ազմանյանը և վերստին խնդրել է հանձնուք ուղարկել` թվարկելով առաքվելիք իրերի ցանկը։ Մամիկոն Ազմանյանն ասել է, որ իրեն բաղնիքի հողաթափեր են անհրաժեշտ, այն իր ընկերը կբերի և խանութում կհանձնի իրեն, թող ինքը այն իր գնած ապրանքների հետ միասին ուղարկի ՔԿ հիմնարկ։
Ինքը աշխատանքի վայրից` սուպերմարկետից, գնել է Մամիկոն Ազմանյանի պատվիրած սննդամթերքը և մյուս ապրանքները։ Նույն օրը ժ.13-ի սահմաններում սպիտակ գույնի ՎԱԶ-2107 մակնիշի տաքսի ավտոմեքենայով խանութ է եկել մի անծանոթ տղամարդ և իրեն է տվել փաթեթ` մեջը բաղնիքի հողաթափեր։ Դրանք դրել է իր գնած ապրանքի մեջ, չիմանալով, որ դրանց մեջ թաքցված թմրամիջոց կա։
Այնուհետև եկել է կարմիր գույնի նույն տաքսի ավտոմեքենայի վարորդը, որի անունը Արա էր, ապրանքները տոպրակով, որի մեջ եղել են նաև հողաթափերը, հանձնել է նրան` ուղարկելով «Նուբարաշեն» ՔԿ հիմնարկ, դրա համար վճարել է տաքսու վարորդին, Արային է տվել նաև իր ձեռքով գրված առաքվող ապրանքների անվանացանկը։ Այդ մասին հեռախոսով հայտնել է Մամիկոն Ազմանյանին։
Որոշ ժամանակ անց անծանոթ հեռախոսահամարից իր բջջային հեռախոսի վրա զանգահարել է Մամիկոն Ազմանյանը և տեղեկացրել իրեն, որ հողաթափի մեջ արգելված իր է հայտնաբերվել ստուգման ընթացքում, նախազգուշացրել է իրեն, որ այդ մասին իրեն հարցնելու ժամանակ թող ինքը հերքի հանձնուքի մեջ հողաթափեր դնելու փաստը` այն վերագրելով տաքսու վարորդին։

Գ. Թ. 17-18, 92-94, 202-203, 218 և
դատաքննության արձանագրություն

Վկա Վարդանուշ /Վարդուհի/ Մնացականյանը նույն ցուցմունքը պնդել է ամբաստանյալ Մամիկոն Ազմանյանին առերես։

Գ. Թ. 216-217 և դատաքննության արձանագրություն

Ամբաստանյալ Մամիկոն Ազմանյանի ընկերուհի, վկա Մարիաննա Ժամկոչյանը ցուցմունք է տվել այն մասին, որ պատիժը կրելու ընթացքում Մամիկոն Ազմանյանը հաճախ է 093-108389 հեռախոսահամարից զանգահարել իր 098-777029 բջջային հեռախոսահամարի վրա։ 2009թ. սեպտեմբերի վերջին ինքը Մամիկոն Ազմանյանի առաջարկով «Էրեբունի» թանգարանի մոտակայքում հանդիպել է մի անծանոթ կնոջ և նրան է փոխանցել 300 ԱՄՆ դոլլար գումար` հանձնուք ուղարկելու համար։


Գ. Թ. 200-201 և
դատաքննության արձանագրություն

Վկա Աննա Հակոբյանը ցուցմունք է տվել այն մասին, որ նույն սուպերմարկետում աշխատում է վաճառողուհի Վարդանուշ /Վարդուհի/ Մնացականյանի հետ։ 2009թ. հոկտեմբերի սկզբին Վ. Մնացականյանը մթերք է գնել` ընկերոջն ուղարկելու համար։ Ինքն իմացել է, որ Վարդանուշը ընկերություն է արել ՔԿ հիմնարկներից մեկում պատիժը կրող դատապարտյալ Մամիկոն անունով անձնավորության հետ։ Խանութ է եկել մի կարմիր գույնի տաքսի ավտոմեքենա, նրա միջոցով Վարդանուշ Մնացականյանն ընկերոջն է ուղարկել իր գնած ապրանքը։
Դրանից 4 օր անց Վարդանուշը բջջային հեռախոսով խոսել է ընկերոջ` Մամիկոնի հետ, վերջինս թելադրել և Վարդուհին գրել է Մամիկոնին անհրաժեշտ ապրանքների ցանկը։ Այն Վարդանուշը գրել է թղթի կտորի վրա։ Այնուհետև Վարդանուշը խանութից գնել է Մամիկոնի թվարկած սննդամթերքն ու մյուս ապրանքները, որոնք լցրել է տոպրակների մեջ։ Այնուհետև իրենց խանութին է մոտեցել սպիտակ գույնի «ՎԱԶ-2107» մակնիշի տաքսի ավտոմեքենան, որին մոտեցել է Վարդանուշ Մնացականյանը և վարորդից վերցրել է մեկ փաթեթ, որի պարունակությունն ինքը չի տեսել։ Դրանից հետո մոտավորապես մեկ ժամ անց կրկին եկել է կարմիր գույնի տաքսի ավտոմեքենան, որի վարորդը Վարդանուշից /Վարդուհուց/ վերցրել է ինչպես անծանոթ սպիտակ տաքսի վարորդի բերած փաթեթը, այնպես էլ խանութից Վարդանուշի գնած ապրանքները և հեռացել է։ Հետագայում Վարդանուշ Մնացականյանից տեղեկացել է, որ սպիտակ գույնի ՎԱԶ-2107 մակնիշի տաքսի մեքենայի վարորդի բերած փաթեթում հողաթափեր են եղել, որոնց մեջ թմրամիջոց է հայտնաբերվել, դրա առկայության մասին Վարդանուշը տեղյակ չի եղել։

Գ. Թ. 219-220 և դատաքննության արձանագրություն

ՀՀ ԱՆ «Նուբարաշեն» ՔԿ հիմնարկի անվտանգության բաժնի մասնագետ, վկա Հովհաննես Մանջիկյանը ցուցմունք է տվել այն մասին, որ 2009 թվականի հոկտեմբերի 6-ին ժամը 15-ի սահմաններում ՔԿ հիմնարկի հանձնուքների ընդունման սենյակում ստուգել է դատապարտյալ Մանթաշ Օհանյանի անվամբ Արա Սահակյանի կողմից բերված հանձնուքը, բաղնիքի հողաթափի ներբանի միջից հայտնաբերել է երկու հատ կասկածելի բուսական զանգվածի պարունակությամբ փաթեթ` փաթեթավորված պոլիէթիլենային թաղանթով։ Նշված զանգվածը օրենքով սահմանված կարգով կշռվել, փաթեթավորվել և կնքվել է։

Գ. Թ. 303-304

Նույնաբովանդակ ցուցմունք է տվել նաև ՀՀ ԱՆ «Նուբարաշեն» ՔԿ հիմնարկի անվտանգության ապահովման բաժնի մասնագետ, վկա Մուշեղ Դիլանյանը։

Գ. Թ. 305-306

«Ղ-Տելեկոմ» ՓԲԸ թիվ 2709 գրությամբ ստացվել են «Նուբարաշեն» ՔԿՀ թիվ 60 խցի խուզարկությամբ հայտնաբերված, ինչպես նաև` վկաներ Վարդանուշ Մնացականյանի և Արա Սահակյանի բջջային հեռախոսներից կատարված մուտքային և ելքային հեռախոսազանգերի վերծանումները, կազմվել է զննության արձանագրություն։ Պարզվել է, որ 2009թվականի հոկտեմբերի 2-ին և 6-ին Վարդանուշ Մնացականյանի 093-220416, Արա Սահակյանի 093-514031, ամբաստանյալ Մամիկոն Ազմանյանի 093-108389 հեռախոսահամարների միջև տեղի է ունեցել ակտիվ երկկողմանի հեռախոսակապ, որն ընդհատվել է հողաթափերում թմրամիջոցը հայտնաբերելուց հետո։ Ընդ որում, վկա Արա Սահակյանի 093-514031 հեռախոսահամարին զանգահարել են ինչպես Մամիկոն Ազմանյանը 093-108389, այնպես էլ` Մանթաշ Օհանյանը 093-818816 հեռախոսահամարներից։

Գ. Թ. 136-185, 322

Դեպքից հետո` 08.10.2009թ. ՀՀ ԱՆ «Նուբարաշեն» ՔԿ հիմնարկի 60 խցի թվով 13 կալանավորներից վերցվել են մեզի փորձանմուշներ և ուղարկվել Նարկոլոգիական կլինիկա` տոքսիկոքիմիական փորձաքննության։ Փորձագետի 19.10.2009թ. եզրակացության համաձայն` նրանցից 9-ի, այդ թվում` ամբաստանյալներ Մամիկոն Ազմանյանի և Մանթաշ Օհանյանի մեզի փորձանմուշներում հայտնաբերվել են կանաբիսի և ափիոնի խմբի թմրամիջոցների հետքեր։ Նշվածով հիմնավորվում է ամբաստանյալներ Մամիկոն Ազմանյանի և Մանթաշ Օհանյանի կողմից թմրամիջոց օգտագործելու հանգամանքը։

Գ. Թ. 253-254

Քրեակատարողական հիմնարկի կողմից տրված բնութագրերի համաձայն` դատապարտյալ Մամիկոն Ազմանյանը ունի լրջախոհ, շփվող, արագ կողմնորոշվելու հատկանիշներ, բնութագրվում է բացասական։ Իսկ դատապարտյալ Մանթաշ Օհանյանը բնավորությամբ անկայուն է, դյուրագրգիռ, կոնֆլիկտային, բազմիցս ենթարկվել է կարգապահական տույժերի, դրսևորել է բացասական վարքագիծ և ուղղման ճանապարհին կանգնած չէ։
Գ. Թ. 248, 288

Այսպիսով` գործով ձեռք բերված և դատաքննությամբ բազմակողմանի, օբյեկտիվ և լրիվ քննությամբ ստուգված և վերլուծված ապացույցները գնահատելով իրենց ամբողջության և բոլոր ապացույցների համակցության մեջ` հիմնված ներքին համոզմամբ, դատարանը հիմնավոր եզրահանգման է գալիս այն մասին, որ նշված դիտավորյալ հանցագործությունը կատարելուն ամբաստանյալներ Մամիկոն Ազմանյանը և Մանթաշ Օհանյանը դրսևորել են համատեղ մասնակցություն, այն է` հանցակցություն, իրենց նպատակին հասնելու խնդրում դերերի որոշակի բաշխմամբ` օգտագործելով արտաքին աշխարհի մարդկանց հետ ունեցած իրենց փոխհարաբերությունները և իրենց նպատակներին նրանց ծառայեցնելու հնարավորությունները։ Ամբաստանյալ Մամիկոն Ազմանյանը թմրամիջոցը ձեռք բերելու, այլ հանձնուքի մեջ տեղադրելու, հանձնուք գնելու և փոխադրամիջոցի ֆինանսավորման նպատակով անհրաժեշտ դրամական միջոցներ հայթայթելու համար կարողացել է օգտագործել իր ծանոթ կանանց` վկաներ Վարդանուշ Մնացականյանի և Մարիաննա Ժամկոչյանի դյուրահավատությունը, անփորձությունը, իր նկատմամբ նրանց ներշնչած վստահությունը և դատապարտյալների միջավայրում տիրող բարքերից նրանց անտեղյակությունը։ Թմրամիջոցը քրեակատարողական հիմնարկ հասցնելը նա վստահել է վարձու փոխադրամիջոցի` տաքսի ավտոմեքենայի վարորդին` վճարելով նրան փոխադրելու համար։ Նշված շղթայի յուրաքանչյուր օղակ, տիրապետելով սահմանափակ տեղեկատվության, անտեղյակ է եղել այն բանից, որ իր կամքից անկախ, փաստորեն նպաստել է թմրամիջոցը քրեակատարողական հիմնարկ քողարկված տեսքով փոխադրելուն։
Ամբաստանյալ Մամիկոն Ազմանյանը, լինելով առավել հավասարակշիռ, փորձառու, զգույշ և շրջահայաց անձնավորություն, ի նկատի ունենալով նաև թմրամիջոցի առաքման փաստի բացահայտման հնարավորությունը, օգտագործելով ամբաստանյալ Մանթաշ Օհանյանի իմպուլսիվությունը, անկայունությունը և անշրջահայացությունը, թույլ է տվել, որպեսզի իր համար 02.10.09թ. և 06.10.09թ. հանձնուքները ՔԿ հիմնարկում ձևակերպվեն և թիվ 60 խուց բերվեն ամբաստանյալ Մանթաշ Օհանյանի անվամբ` հնարավոր բացահայտման դեպքում պատասխանատվությունից խուսափելու նպատակով։
Հողաթափերի մեջ թաքցված թմրամիջոցը ՔԿ հիմնարկի աշխատակիցների կողմից հայտնաբերելու հետևանքով ամբաստանյալների կամքից անկախ պատճառներով հանցագործությունը ավարտին չի հասցվել, ամբաստանյալները չեն կարողացել իրականացնել իրենց հանցավոր մտադրությունը` իրենց օգտագործման համար ձեռք բերելու խոշոր չափերի հասնող թմրամիջոցը։
Իր հերթին ամբաստանյալ Մանթաշ Օհանյանը, համաձայնվելով հանձնուքը ձևակերպել իր անվամբ և հանձնել իրեն, դրսևորել է օժանդակություն։
Ամբաստանյալ Մանթաշ Օհանյանն իրեն մեղավոր ճանաչելով ոչ թե առանց իրացնելու նպատակի խոշոր չափերի թմրամիջոց ձեռք բերելու հանցափորձին օժանդակելու, այլ ՀՀ քրեական օրենսգրքի 34,268-րդ հոդվածի 2-րդ մասի 2-րդ կետով, նպատակ է հետապնդում նպաստել նշված հոդվածի սանկցիայով Մամիկոն Ազմանյանին պատասխանատվությունից և պատժից ազատելուն։ Դրա պատճառը ոչ միայն քրեակատարողական հիմնարկում դատապարտյալների շրջանում չհեղինակազրկվելու միտումն է, այլև այն, որ ներկայումս Էրեբունու քննչական բաժնում քննվող մեկ այլ քրեական գործով նույնպես Մամիկոն Ազմանյանը նույնանման հանցագործություն կատարելու համար ներգրավված է որպես մեղադրյալ։

3.Դատարանի իրավական վերլուծությունը
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և դրանք գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Մամիկոն Համլետի /Գամուշի/ Ազմանյանի մեղքը ՀՀ քրեական օրենսգրքի 34,268-րդ հոդվածի 2-րդ մասի 2-րդ կետով և Մանթաշ Կարապետի Օհանյանի մեղքը ՀՀ քրեական օրենսգրքի 34,38,268-րդ հոդվածի 2-րդ մասի 2-րդ կետով նախատեսված հանցագործությունը կատարելու մեջ հիմնավորված է և նրանք պետք է ենթարկվեն քրեական պատասխանատվության ու նշված հոդվածների սանկցիայով նրանց նկատմամբ պետք է պատիժ նշանակվի։
Պատիժ նշանակելիս և այն կրելու նպատակահարմարության հարցը քննարկելիս, դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված պատասխանատվությունը մեղմացնող ու ծանրացնող հանգամանքները։ Դրանք բնութագրում են ամբաստանյալների անձնավորությունը և հնարավորություն են տալիս գործով անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ ամբաստանյալներ Մամիկոն Ազմանյանի և Մանթաշ Օհանյանի մոտ, որպես պատիժը ծանրացնող հանգամանք, առկա է հանցանքը կատարելու ռեցիդիվը, քանի որ նրանց նախկին դատվածությունը մարված չէ։ Որպես բնութագրական հանգամանք դատարանը հաշվի է առնում նաև այն, որ ամբաստանյալները քրեակատարողական հիմնարկում պատիժը կրելիս բնութագրվում են բացասական։
Քրեական գործով ամբաստանյալներ Մամիկոն Ազմանյանի և Մանթաշ Օհանյանի նկատմամբ պատասխանատվության և պատիժը մեղմացնող հանգամանքներ առկա չեն։
Դատարանը ղեկավարվում է նաև ՀՀ քրեական օրենսգրքի 65-րդ հոդվածի պահանջներով` չավարտված հանցագործությունների` հանցափորձի և հանցագործության նախապատրաստման համար պատիժ նշանակելիս օրենքով սահմանված պահանջներով։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալներ Մամիկոն Ազմանյանի և Մանթաշ Օհանյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, դատարանը գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս հանգում է այն հիմնավոր եզրակացության, որ ամբաստանյալներ Մամիկոն Ազմանյանի և Մանթաշ Օհանյանի նկատմամբ որպես պատիժ անհրաժեշտ է նշանակել ազատազրկում որոշակի ժամկետով։
Դատարանը նաև ի նկատի է ունենում այն հանգամանքը, որ ամբաստանյալներ Մամիկոն Ազմանյանը և Մանթաշ Օհանյանը քրեակատարողական հիմնարկում պատիժ են կրում և հանցագործությունը, որի համար սույն գործով մեղադրվում են, կատարել են դատավճռով նշանակված պատիժը դեռևս լրիվ չկրած, հետևաբար վերջնական պատիժ պետք է նշանակել ՀՀ քրեական օրենսգրքի 67-րդ հոդվածով նախատեսված դատավճիռների համակցությամբ։
Դատարանը միաժամանակ գտնում է, որ նախաքննական մարմինը ամբաստանյալներ Մամիկոն Ազմանյանին և Մանթաշ Օհանյանին առաջադրված մեղադրանքում թմրամիջոցի չափաքանակը սխալ է նշել։ Ամբաստանյալներին մեղադրանք է առաջադրվել ընդամենը 10,42 գրամ չորացված «Մարիխուանա» տեսակի թմրամիջոց ձեռք բերելու հանցափորձի և դրա օժանդակության համար։ Մինչդեռ փորձաքննությամբ հիմնավորվել է, որ նշված քաշը չորացված թմրամիջոցին չի վերաբերում։ Թմրամիջոցը չորացված տեսքով ձեռք է բերել ընդամենը 10,195գրամ /2,58գրամ և 7,615գրամ/ հաստատուն քաշ։ Այն նույնպես համարվում է խոշոր չափի, քաշի նշված փոփոխությունը արարքի քրեաիրավական որակման փոփոխություն չի առաջացնում։ Նշված 10,195գրամ հաստատուն քաշով թմրամիջոցից փորձաքննությունն իրականացնելիս օգտագործվել է 0,05գրամը, մնացած 10,145 գրամ «Մարիխուանա» տեսակի թմրամիջոցը ենթակա է ոչնչացման դատավճիռն օրինական ուժի մեջ մտնելուց հետո։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 357-358, 360, 365, 368-372-րդ հոդվածներով և դատական օրենսգրքի 20-րդ հոդվածով դատարանը.

Վ Ճ Ռ Ե Ց

Ամբաստանյալ Մամիկոն Համլետի /Գամուշի/ Ազմանյանին մեղավոր ճանաչել ՀՀ քրեական օրենսգրքի 34,268-րդ հոդվածի 2-րդ մասի 2-րդ կետով և նշված հոդվածի սանկցիայով նրան դատապարտել ազատազրկման 1/մեկ/ տարի 6/վեց/ ամիս ժամկետով։ ՀՀ քրեական օրենսգրքի 67-րդ հոդվածի կարգով ՀՀ Հյուսիսային քրեական դատարանի 25.03.2008թ. դատավճռով նշանակված և չկրած պատժից մասնակի գումարելով 2/երկու/ տարի ազատազրկումը նոր նշանակված պատժին, վերջնական պատիժ սահմանել ազատազրկում 3/երեք/ տարի 6/վեց/ ամիս ժամկետով։
Պատժի սկիզբը հաշվել 09.04.2010թ.։
Ամբաստանյալ Մանթաշ Կարապետի Օհանյանին մեղավոր ճանաչել ՀՀ քրեական օրենսգրքի 34,38,268-րդ հոդվածի 2-րդ մասի 2-րդ կետով և նշված հոդվածի սանկցիայով նրան դատապարտել ազատազրկման 1/մեկ/ տարի 6/վեց/ ամիս ժամկետով։ Երևան քաղաքի քրեական դատարանի 18.03.2008թ. դատավճռով նշանակված և չկրած պատժից մասնակի գումարելով 3/երեք/ տարի ազատազրկումը նոր նշանակված պատժին, վերջնական պատիժ սահմանել ազատազրկում 4/չորս/ տարի 6/վեց/ ամիս ժամկետով։
Պատժի սկիզբը հաշվել 09.04.2010թ.։
Իրեղեն ապացույց ճանաչված և փորձաքննությունից հետո մնացած չորացված 10,145 գրամ հաստատուն քաշով «Մարիխուանա» տեսակի թմրամիջոցը դատավճիռն օրինական ուժի մեջ մտնելուց հետո ոչնչացնել։
Դատավարության մասնակիցների կողմից դատավճիռը կարող է բողոքարկվել ՀՀ քրեական վերաքննիչ դատարան` հրապարակման պահից մեկամսյա ժամկետում։

ԴԱՏԱՎՈՐ Վ. Թ. ԳՐԻԳՈՐՅԱՆ