Դ Ա Տ Ա Վ Ճ Ի Ռ
ՀԱՆՈւՆ ՀԱՅԱՍՏԱՆԻ ՀԱՆՐԱՊԵՏՈւԹՅԱՆ
Գործ հմ. ԵԷԴ/0117/01/09
2009թ.
ք. Երևան
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը հետևյալ կազմով՝

ՆԱԽԱԳԱՀՈՂ ԴԱՏԱՎՈՐ՝ Ա. ՕՀԱՆՅԱՆ
ՔԱՐՏՈւՂԱՐ՝ Շ. ԴՈւՐՅԱՆԻ
ՄԵՂԱԴՐՈՂ-ԴԱՏԱԽԱԶ՝ Պ. ԳՅՈւԼՈւՄՅԱՆ
ՊԱՇՏՊԱՆ` Վ. ԱԹՈՅԱՆ
ՏՈւԺՈՂ` Ս. ՑՈւՑՈւԼՅԱՆ

2009թ. Դեկտեմբերի «15»-ին, Երևան քաղաքում.
Դռնբաց դատական նիստում քննեց գործն ըստ մեղադրանքի՝ Գագիկ Նշանի Անդոյանի /ծնված՝ 24.11.1988թ. Երևան քաղաքում, ազգությամբ հայ, Հայաստանի Հանրապետության քաղաքացի, միջնակարգ կրթությամբ, չամուսնացած, խնամքին ոչ ոք, չի աշխատում, ֆիզիկապես առողջ, նախկինում չդատապարտված, բնակվում է ք.Երևան, Սարի-Թաղի 5-րդ փողոցի թիվ 10 տանը/։
Սույն գործով արգելանքի տակ չի եղել։
Մեղադրվում է ՀՀ Քրեական օրենսգրքի 258 հոդվածի 3-րդ մասի 1-ին կետով։
Հայկ Վարդանի Բոյաջյանի /ծնված՝ 23.12.1987թ. Երևան քաղաքում, ազգությամբ հայ, Հայաստանի Հանրապետության քաղաքացի, 8-ամյա կրթությամբ, չամուսնացած, խնամքին ոչ ոք, չի աշխատում, վատառողջ, նախկինում չդատապարտված, հաշվառված է Սարի-Թաղի 6-րդ փողոցի, թիվ 9 տանը, փաստացի բնակվում է ք.Երևան, Սարի-Թաղի 21-րդ փողոցի թիվ 5 տանը/։
Սույն գործով արգելանքի տակ չի եղել։
Մեղադրվում է ՀՀ Քրեական օրենսգրքի 258 հոդվածի 3-րդ մասի 1-ին կետով։

1. Գործի դատավարական նախապատմությունը

Գագիկ Անդոյանի և Հայկ Բոյաջյանի կողմից խուլիգանություն կատարելու դեպքի առթիվ Սոֆյա Օնիկի Ցուցուլյանի հաղորդման հիման վրա 02.06.2009թ. ՀՀ Էրեբունի և Նուբարաշեն համայնքների դատախազությունում ՀՀ Քրեական օրենսգրքի 258 հոդվածի 3-րդ մասի 1-ին կետի հատկանիշներով քրեական գործ է հարուցվել և նախաքննություն կատարելու համար քրեական գործն ուղարկվել է ՀՀ Ոստիկանության քննչական գլխավոր վարչության Էրեբունու քննչական բաժին։

Նախաքննության մարմնի 03.08.2009թ. որոշմամբ Հայկ Վարդանի Բայաջյանը ներգրավվել է որպես մեղադրյալ և նրան մեղադրանք է առաջադրվել ՀՀ Քրեական օրենսգրքի 258 հոդվածի 3-րդ մասի 1-ին կետով, այն բանի համար որ. «2009թ. մայիսի 15-ին, ժամը 18։30-ի սահմաններում, Երևան քաղաքի Սարի-Թաղ 5-րդ փողոցի 21 հասցեում գտնվող հացի խանութի մոտ Գագիկ Անդոյանի հետ հայհոյանքներ են տվել «Ֆոլկսվագեն-Պասսատ» մակնիշի 09 ՕՍ 494 պետհամարանիշի ավտոմեքենայով ընթացող Սոֆիա և Ստելլա Ցուցուլյանների հասցեին, այնուհետև Հ.Բոյաջյանը ոտքով հարվածել է մեքենայի թափքի հետևի աջակողմյան հատվածին, իսկ Գ.Անդոյանը թքել է ավտոմեքենայի վրա, որից հետո Ս.Ցուցուլյանը մեքենան վարելով հեռացել է։ Վիրավորվելով Հ.Բոյաջյանի և Գ.Անդոյանի խուլիգանական գործողություններից` վերջիններիս կարգի հրավիրելու նպատակով Ս.Ցուցուլյանը ավտոմեքենայով գնացել է Գ.Անդոյանենց տան մոտ, դուրս է կանչել վերջինիս մորը և խնդրել որդուն կարգի հրավիրել։ Այդ ընթացքում Հ.Բոյաջյանը և Գ.Անդոյանը գնացել են տան մոտ, շարունակելով իրենց խուլիգանական գործողությունները, խուլիգանական հայհոյանքներ են տվել Ցուցուլյան քույրերի հասցեին, որի ընթացքում կրկին ոտքերով հարվածներ են հասցրել ավտոմեքենայի թափքի տարբեր մասերին։ Ս.Ցուցուլյանը ավտոմեքենան վարելով` փախել է, Գ.Անդոյանը քար է նետել ավտոմեքենայի վրա, որը դիպել է ավտոմեքենայի ետնամասին»։
Նախաքննության մարմնի 03.08.2009թ. որոշմամբ Գագիկ Նշանի Անդոյանը ներգրավվել է որպես մեղադրյալ և նրան մեղադրանք է առաջադրվել ՀՀ Քրեական օրենսգրքի 258 հոդվածի 3-րդ մասի 1-ին կետով, այն բանի համար որ. «2009թ. մայիսի 15-ին, ժամը 18։30-ի սահմաններում, Երևան քաղաքի Սարի-Թաղ 5-րդ փողոցի 21 հասցեում գտնվող հացի խանութի մոտ Հայկ Բոյաջյանի հետ հայհոյանքներ են տվել «Ֆոլկսվագեն-Պասսատ» մակնիշի 09 ՕՍ 494 պետհամարանիշի ավտոմեքենայով ընթացող Սոֆիա և Ստելլա Ցուցուլյանների հասցեին, այնուհետև Գ.Անդոյանը թքել է ավտոմեքենայի վրա, իսկ Հ.Բոյաջյանը ոտքով հարվածել է մեքենայի թափքի հետևի աջակողմյան հատվածին, որից հետո Ս.Ցուցուլյանը մեքենան վարելով հեռացել է։ Վիրավորվելով Հ.Բոյաջյանի և Գ.Անդոյանի խուլիգանական գործողություններից` վերջիններիս կարգի հրավիրելու նպատակով Ս.Ցուցուլյանը ավտոմեքենայով գնացել է Գ.Անդոյանենց տան մոտ, դուրս է կանչել վերջինիս մորը և խնդրել որդուն կարգի հրավիրել։ Այդ ընթացքում Գ.Անդոյանը և Հ.Բոյաջյանը գնացել են տան մոտ, շարունակելով իրենց խուլիգանական գործողությունները, խուլիգանական հայհոյանքներ են տվել Ցուցուլյան քույրերի հասցեին, որի ընթացքում կրկին ոտքերով հարվածներ են հասցրել ավտոմեքենայի թափքի տարբեր մասերին։ Ս.Ցուցուլյանը ավտոմեքենան վարելով` փախել է, Գ.Անդոյանը քար է նետել ավտոմեքենայի վրա, որը դիպել է ավտոմեքենայի ետնամասին»։
Քրեական գործը 27.10.2009թ. կազմված և 30.10.2009թ. հաստատված մեղադրական եզրակացությամբ Երևան քաղաքի Էրեբունի և Նուբարաշեն համայնքների ընդհանուր իրավասության դատարան է ստացվել 02.11.2009թ.-ին։

2. Ապացույցների հետազոտում և գնահատում

Վերլուծելով ու գնահատելով դատաքննության ընթացքում հետազոտված ապացույցները՝ գործի հանգամանքների, մեղադրանքի ապացուցվածության և ամբաստանյալների մեղավորության մասին, դատարանն եկավ հետևության, որ արարքը, որի կատարման մեջ մեղադրվում են ամբաստանյալները՝ ապացուցված է։
Դատարանի հետևությունները հիմնված են դատաքննությամբ հետազոտված հետևյալ ապացույցների վրա։
Ամբաստանյալ Գագիկ Նշանի Անդոյանը դատաքննությամբ հրաժարվեց ցուցմունքներ տալուց, սակայն պնդեց նախաքննության ընթացքում տված ցուցմունքները, որոնցով հայտնել է, որ 2009թ. մայիսի «15»-ին, ժամը 18։30-ի սահմաններում Երևան քաղաքի Սարի-Թաղ 5-րդ փողոցի, թիվ 21 հասցեում գտնվող հացի խանութի մոտ Հայկ Բոյաջյանի հետ քայլելիս տեսել է մեքենայով ընթացող Սոֆյա և Ստելլա Ցուցուլյաններին, որոնք վիրավորական արտահայտություններ են արել։ Ինքը մտածելով, որ այդ խոսքերը իրենց են ուղղված վիրավորվել ու ոտքով հարվածել է մեքենային, իսկ երբ Ցուցուլյանները մեքենան վարել են իրենց տան ուղղությամբ, մոտեցել և ոտքերով հարվածներ են հասցրել ավտոմեքենային։ Այնուհետև գնացել են աղջիկների տան մոտ և ոտքերով հարվածել են տան դարպասին, ավտոմեքենային և նրանց խանութի դռանը։ Դատաքննությամբ ամբաստանյալ Գ.Անդոյանը հայտնեց, որ հետագայում հասկանալով, որ իրենց կատարածն անմտություն է Հ.Բոյաջյանի հետ գնացել են Ցուցուլյանների տուն, ներողություն խնդրել և վերականգնել պատճառված վնասը։
Ամբաստանյալ Հայկ Վարդանի Բոյաջյանը դատաքննությամբ հրաժարվեց ցուցմունքներ տալուց, սակայն պնդեց նախաքննության ընթացքում տված ցուցմունքները, որոնցով հայտնել է, որ 2009թ. մայիսի «15»-ին, ժամը 18։30-ի սահմաններում Երևան քաղաքի Սարի-Թաղ 5-րդ փողոցի, թիվ 21 հասցեում գտնվող հացի խանութի մոտ Գագիկ Անդոյանի հետ քայլելիս տեսել է մեքենայով ընթացող Սոֆյա և Ստելլա Ցուցուլյաններին, որոնք վիրավորական արտահայտություններ են արել։ Ինքը մտածել է, որ այդ խոսքերը իրենց են ուղղված բարկացել ու թքել է մեքենայի վրա։ Երբ Ցուցուլյանները մեքենան վարել են դեպի Գ.Անդոյանի տան ուղղությամբ, իրենք մտածել են, որ աղջիկները կատարվածի առիթով ցանկանում են ծնողներին գանգատվել, մոտեցել և սկսել են ոտքերով հարվածներ հասցրել ավտոմեքենային։ Այնուհետև Գ.Անդոյանենց տանից գնացել են աղջիկների տան մոտ և ոտքերով հարվածել են տան դարպասին, ավտոմեքենային և նրանց խանութի դռանը։ Դատաքննությամբ ամբաստանյալ Հ.Բոյաջյանը հայտնեց, որ հետագայում հասկանալով, որ իրենց կատարածն անմտություն է Գ.Անդոյանի հետ գնացել են Ցուցուլյանների տուն, ներողություն խնդրել նրանցից և վերականգնել պատճառված վնասը։
Տուժող` Սոֆիա Օնիկի Ցուցուլյանի ցուցմունքով այն մասին, որ 2009թ. մայիսի «15»-ին, ժամը 18։30-ի սահմաններում Երևան քաղաքի Սարի-Թաղ 5-րդ փողոցի, թիվ 21 հասցեում գտնվող հացի խանութի մոտով քրոջ` Ստելլա Ցուցուլյանի հետ իր անձնական ավտոմեքենայով ընթանալիս տեսել է իրենց թաղամասի բնակիչներ Հայկ Բոյաջյանին և Գագիկ Անդոյանին, ովքեր իրեն անհասկանալի պատճառներով հայհոյանքներ են ուղղել իրենց հասցեին, Հայկը թքել, իսկ Գագիկը ոտքով հարվածել է ավտոմեքենայի թափքին։ Տղաների գործողություններից վիրավորված ինքը մեքենան վարել է դեպի Գագիկ Անդոյանի տուն ու դուրս կանչելով նրա մորը` խնդրել է որդուն կարգի հրավիրել։ Այդ ընթացքում ամբաստանյալները կրկին մոտեցել են ու սկսել են հայհոյանքներ տեղալ իրենց հասցեին ու ոտքերով հարվածել են մեքենային, իսկ երբ ինքը մեքենան վարել է նրանց ուղղությամբ Գագիկ Անդոյանը ձեռքի քարը նետել է մեքենայի վրա ու իրենք առանց կանգնելու մեքենան վարել են դեպի իրենց տուն։ Որոշ ժամանակ անց Հայկ Բոյաջյանը և Գագիկ Անդոյանը եկել են իրենց տան մոտ ու հայհոյանքները շարունակել արդեն այնտեղ` ոտքերով հարվածելով ավտոմեքենային, տան դարպասին և խանութի դռանը։ Հետագայում ամբաստանյալները եկել են իրենց տուն ներողություն խնդրել, վերականգնել պատճառված վնասը։ Տուժողը հայտնեց նաև, որ ամբաստանյալներից որևէ պարտք ու պահանջ չունի, կատարվածում գտնում է նաև իր մեղավորությունը և խնդրեց դատարանին մեղմ վարվել, քանի որ ամբաստանյալներն իր բակի տղաներն են և ինքը չի ցանկանում, որպեսզի նրանք դատապարտվեն։
Վկա` Ստելլա Օնիկի Ցուցուլյանի ցուցմունքով այն մասին, որ 2009թ. մայիսի «15»-ին, ժամը 18։30-ի սահմաններում քրոջ` Սոֆիա Ցուցուլյանի հետ վերջինիս ավտոմեքենայով Երևան քաղաքի Սարի-Թաղ 5-րդ փողոցի, թիվ 21 հասցեում գտնվող հացի խանութի մոտով ընթանալիս թաղամասի բնակիչներ Հայկ Բոյաջյանն և Գագիկ Անդոյանն իրենց հասցեին հայհոյանքներ են ուղղել, Հայկը թքել է, իսկ Գագիկը ոտքով հարվածել է ավտոմեքենայի թափքին։ Այդ գործողություններից վիրավորված քույրը մեքենան վարել է դեպի Գագիկ Անդոյանի տուն ու դուրս է կանչել նրա մորը` խնդրելով որդուն կարգի հրավիրել։ Այդ ընթացքում ամբաստանյալները կրկին մոտեցել են ու սկսել են հայհոյանքներ տալ իրենց հասցեին ու ոտքերով հարվածել մեքենայի թափքին, նույնիսկ Գագիկ Անդոյանը ձեռքի քարով հարվածել է մեքենային, որից հետո իրենք գնացել են տուն։ Որոշ ժամանակ անց Հայկ Բոյաջյանը և Գագիկ Անդոյանը եկել են իրենց տուն ու հայհոյանքները շարունակել արդեն իրենց տան մոտ` ոտքերով հարվածելով ավտոմեքենային, տան դարպասին և խանութի դռանը։ Հետագայում ամբաստանյալները եկել են իրենց տուն ներողություն խնդրել ու վերականգնել պատճառված վնասը։
Վկա` Լեյլի Կոլյայի Նագաևայի ցուցմունքով այն մասին, որ 2009թ. մայիսի «15»-ին, իր դուստրեր Սոֆիա և Ստելլա Ցուցուլյանները լացակումած տուն են եկել և պատմել, որ Երևան քաղաքի Սարի-Թաղ 5-րդ փողոցի, թիվ 21 հասցեում գտնվող հացի խանութի մոտ Հայկ Բոյաջյանը և Գագիկ Անդոյանն իրենց հասցեին հայհոյանքներ են ուղղել, թքել և ոտքով հարվածել են ավտոմեքենայի թափքին։ Տղաները կրկին եկել ու շարունակել են հայհոյանքները, ոտքերով մեքենային հարվածելը և նույնիսկ քարով են հարվածել։ Այդ ընթացքում տեսել է, որ Հայկ Բոյաջյանը և Գագիկ Անդոյանը իր դուստրերի հասցեին հայոյանքներ տալով դեպի իրենց տան ուղղությամբ են գալիս, իսկ հետո սկսել են նաև ոտքով հարվածել ավտոմեքենային, տան դարպասին և խանութի դռանը։ Ինքը դուրս գալով բակ այնտեղից փայտ է վերցրել ու նետել Գագիկի ուղղությամբ, որից հետո վերջիններս հեռացել են։ Հետագայում ամբաստանյալները եկել են իրենց տուն ներողություն խնդրել ու վերականգնել պատճառված վնասը։
Վկա` Ռայա Ավետիսի Մամիկոնյանի ցուցմունքով այն մասին, որ 2009թ. մայիսի «15»-ի երեկոյան Ցուցուլյանների տան մոտ հայհոյանքների ձայներ է լսել և տեսել է հավաքված ամբոխ, որոնց մեջ Հայկ Բոյաջյանը և Գագիկ Անդոյանը հայհոյանքներ են տվել ու ոտքերով հարվածել Ցուցուլյանների տան դարպասին, մեքենային ու խանութի դռանը։ Դեպքին ականատես են եղել նաև իրենց հարևանները։
Դատաապրանքագիտական փորձաքննության թիվ 435-ԱՊ եզրակացությամբ այն մասին, որ փորձաքննությանը տրամադրված «Ֆոլկսվագեն-Պասսատ» մակնիշի 09 ՕՍ 494 պետհամարանիշի ավտոմեքենային պատճառած նյութական վնասի չափի շուկայական գինը 15.05.2009թ. դրությամբ գործող շուկայական գներով գնահատվում է 192.000 /մեկ հարյուր իննսուներկու հազար/ դրամ։

3. Դատարանի իրավական վերլուծությունը


ՀՀ Քրեական օրենսգրքի 18 հոդվածի 1-ին մասի համաձայն հանցագործություն է համարվում մեղավորությամբ կատարված` հանրության համար վտանգավոր այն արարքը, որը նախատեuված է ՀՀ քրեական օրենսգրքով։
ՀՀ Քրեական օրենսգրքի 258 հոդվածի 3-րդ մասի 1-ին կետը, որով և նախաքննության մարմնի կողմից ամբաստանյալներին մեղադրանք է առաջադրվել, պատասխանատվություն է նախատեսում մի խումբ անձանց կամ կազմակերպված խմբի կողմից խուլիգանություն կատարելու, այսինքն, դիտավորությամբ հասարակական կարգը կոպիտ կերպով խախտելու համար, որն արտահայտվել է հասարակության նկատմամբ բացահայտ անհարգալից վերաբերմունքով և զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաև ուրիշի գույքը ոչնչացնելով կամ վնասելով, կամ հասարարական կարգը կոպիտ կերպով խախտելու համար, որը զուգորդվել է բացառիկ ցինիզմով։
ՀՀ Քրեական օրենսգրքի 41 հոդվածի 1-ին մասի համաձայն հանցանքը համարվում է մի խումբ անձանց կողմից առանց նախնական համաձայնության կատարված, եթե դրան մասնակցել են այնպիսի համակատարողներ, ովքեր չեն պայմանավորվել հանցանքը համատեղ կատարելու համար։
Նույն հոդվածի 3-րդ մասի համաձայն` հանցանքը համարվում է կազմակերպված խմբի կողմից կատարված, եթե դա կատարվել է այնպիսի անձանց կայուն խմբի կողմից, ովքեր նախապես միավորվել են մեկ կամ մի քանի հանցանքներ կատարելու համար։
Ինչպես վկայում են սույն գործի հանգամանքները, ամբաստանյալները դիտավորությամբ կոպիտ կերպով խախտել են հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունքով և զուգորդվել է ուրիշի գույքը վնասելով, որպիսի օրենքով չթույլատրված արարքը նախատեսված է ՀՀ քրեական օրենսգրքի 258 հոդվածով։ Միաժամանակ դատարանը գտնում է, որ ամբաստանյալների արարքը որակյալ դարձնող հանգամանք պետք է դիտել արարքը «մի խումբ անձանց կողմից կատարելու» հատկանիշը, քանի որ գործի փաստերից երևում է, որ ամբաստանյալները հանցանքը համատեղ կատարելու համար նախնական համաձայնություն չեն ունեցել և այն կատարել են հանգամանքների պատահական զուգորդմամբ, որը դուրս է կազմակերպված խմբով գործելու հասկացությունից։
Այսպիսով, դատարանը գործով ձեռք բերված բոլոր ապացույցները գնահատելով իրենց համակցության մեջ և դրանց բազմակողմանի, լրիվ, օբյեկտիվ քննության վրա հիմնված ներքին համոզմամբ գտնում է, որ Գագիկ Նշանի Անդոյանը և Հայկ Վարդանի Բոյաջյանը կատարել են արարք, որը նախատեսված է ՀՀ Քրեական օրենսգրքի 258 հոդվածի 3-րդ մասի 1-ին կետով, որով և պետք է ենթարկվեն քրեական պատասխանատվության։
Համաձայն ՀՀ Քրեական օրենսգրքի 61 հոդվածի 2-րդ կետի` պատժի տեuակը և չափը որոշվում են հանցագործության` հանրության համար վտանգավորության աuտիճանով և բնույթով, հանցավորի անձը բնութագրող տվյալներով, այդ թվում` պատաuխանատվությունը և պատիժը մեղմացնող կամ ծանրացնող հանգամանքներով։
Դատարանը հաշվի է առնում, որ ամբաստանյալները երիտասարդ են, բնութագրվում են դրականորեն, միջին ծանրության հանցանքը կատարել են առաջին անգամ հանգամանքների պատահական զուգորդմամբ, կատարած արարքի համար իրենց մեղավոր են ճանաչել և զղջացել են, որն արտահայտվում է նրանով, որ արարքը կատարելուց հետո կամովին ներկայացել են տուժողին, ներողություն խնդրել և հատուցել պատճառված նյութական վնասը, բացակայում են պատասխանատվությունը և պատիժը ծանրացնող հանգամանքները, բացի այդ ամբաստանյալներից Հայկ Բոյաջյանը վատառողջ է, որի հետևանքավ ազատվել է պարտադիր զինվորական ծառայությունից։
Դատարանը հաշվի առնելով այն, որ ՀՀ քրեական օրենսգրքի 258 հոդվածի 3-րդ մասի 1-ին կետի սանկցիան պատիժ է նախատեսում թե’ ազատազրկման և թե’ ազատազրկման հետ չկապված պատժի ձևով, ինչպես նաև սույն գործի հանգամանքները, ամբաստանյալների անձը բնութագրող տվյալները և նրանց պատաuխանատվությունը և պատիժը մեղմացնող հանգամանքները և ծանրացնող հանգամանքների բացակայությունը, գտնում է, որ Գագիկ Անդոյանի և Հայկ Բոյաջյանի ուղղվելը հնարավոր է առանց նրանց անազատության մեջ պահելու ձևով հասարակությունից մեկուսացնելու։
Քննարկելով քաղաքացիական հայցի հարցը, և հաշվի առնելով, որ տուժող Սոֆիա Ցուցուլյանը պատճառված վնասը հատուցված լինելու պատճառաբանությամբ հրաժարվեց քաղաքացիական հայցից, դատարանը գտնում է, որ ՀՀ քրեական դատավարության օրենսգրքի 161 հոդվածի 2-րդ մասի համաձայն քրեական դատավարությունում քաղաքացիական հայցով վարույթը պետք է կարճել։
Ելնելով վերոգրյալից և ղեկավարվելով ՀՀ Քրեական դատավարության օրենսգրքի 357-360 հոդվածներով, դատարանը
Վ Ճ Ռ Ե Ց

Գագիկ Նշանի Անդոյանին մեղավոր ճանաչել ՀՀ Քրեական օրենսգրքի 258 հոդվածի 3-րդ մասի 1-ին կետով և դատապարտել տուգանքով` նվազագույն աշխատավարձի 200-ապատիկի /ՀՀ 200.000 դրամի/ չափով։
Գ.Անդոյանի նկատմամբ ընտված, ստորագրություն չհեռանալու մասին, խափանման միջոցը թողնել անփոփոխ, մինչև դատավճռի օրինական ուժի մեջ մնելը։
Հայկ Վարդանի Բոյաջյանին մեղավոր ճանաչել ՀՀ Քրեական օրենսգրքի 258 հոդվածի 3-րդ մասի 1-ին կետով և դատապարտել տուգանքով` նվազագույն աշխատավարձի 200-ապատիկի /ՀՀ 200.000 դրամի/ չափով։
Հ.Բոյաջյանի նկատմամբ ընտված, ստորագրություն չհեռանալու մասին, խափանման միջոցը թողնել անփոփոխ, մինչև դատավճռի օրինական ուժի մեջ մնելը։
Քրեական դատավարությունում քաղաքացիական հայցով վարույթը կարճել։
Դատավճիռը կարող է բողոքարկվել ՀՀ Վերաքննիչ քրեական դատարանին՝ հրապարակվելու օրվանից հետո` մեկամսյա ժամկետում։

ԴԱՏԱՎՈՐ Ա. ՕՀԱՆՅԱՆ