ԵԷԴ/0103/01/09

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

Նախագահությամբ դատավոր` Ա. ԳԱԲՐԻԵԼՅԱՆ
Քարտուղարությամբ` Լ. ՄԻՐԶՈՅԱՆ

Մասնակցությամբ`

Մեղադրող` Վ. ՀՈՎՀԱՆՆԻՍՅԱՆ
Պաշտպան` Մ. ՓԻԼԻՊՈՍՅԱՆ
Տուժող` Մ. ԳՐԻԳՈՐՅԱՆ

2009թ. նոյեմբերի 4-ին դատարանում
Դռնբաց դատական նիստում քննեց քրեական գործն ըստ մեղադրանքի` Ռիմմա Սարոյի Հակոբովայի, ծնված 23.04.1952թ., ք.Թբիլիսի, ազգությամբ հայ, ՀՀ քաղաքացի, միջնակարգ կրթությամբ, այրի, աշխատում է «Հարավ-Կովկասյան երկաթուղի» ՓԲԸ-ում որպես տոմսային գանձապահ, նախկինում չդատված, բնակվում է ք.Երևան Երկաթգծի 4-րդ բարակում։
Մեղադրվում է ՀՀ քր. օր-ի 212 հոդվածի 1-ին մասով։
Սույն գործով կալանքի տակ չի եղել։
Դատաքննությամբ և գործի տվյալներով պարզվեց հետևյալը.
Ռիմմա Սարոյի Հակոբովան, հանդիսանալով բնակչությանը ծառայություններ մատուցող կազմակերպության` «Հարավ-Կովկասյան երկաթուղի» ՓԲ ընկերության տոմսային գանձապահ` 2009թ. օգոստոսի 5-ին, ժամը 1530-ի սահմաններում «Երևան» կայարանի թիվ 6 դրամարկղից ուղևորային տոմսեր վաճառելու ընթացքում, զգալի չափով խաբել է երկաթուղու ուղևորային տոմսեր գնող Միսակ Կարապետի Գրիգորյանին` 2.583/երկու հազար հինգ հարյուր ութսուներեք/ ՀՀ դրամ թերհաշվելով Երևան-Մախինջաուրի երկաթուղային չվերթի 3 հատ տոմսի իրական, սահմանված արժեքը` ընդհանուր առմամբ 21.417/քսանմեկ հազար չորս հարյուր տասնյոթ/ ՀՀ դրամի փոխարեն նրանից գանձելով 24.000/քսանչորս հազար/ ՀՀ դրամ։
Վերը նշված հանցավոր արարքի կատարման համար Ռիմմա Սարոյի Հակոբովային մեղադրանք է առաջադրվել ՀՀ քր. օր-ի 212 հոդվածի 1-ին մասով։
Դատաքննությամբ առաջադրված մեղադրանքում Ռիմմա Հակոբովան իրեն մեղավոր չճանաչեց և ցուցմունք տվեց այն մասին, որ 1973թ. աշխատում է ներկայիս «Հարավ-Կովկասյան երկաթուղի» ՓԲԸ-ում որպես դրամարկղի գանձապահ։ 2009թ. օգոստոսի 5-ին, ժամը 1530-ի սահմաններում «Երևան» կայարանի վարչական շենքի թիվ 6 տոմսարկղում կատարել է իր աշխատանքը, երբ տոմսարկղին է մոտեցել մի տղամարդ, և առանց տոմսերի արժեքը հարցնելու, դողդողալով, մի տեսած լարված փորձել է շտապ իրեն տալ երեք հատ 10.000-ոց դրամանիշ, այսինքն` 30.000 ՀՀ դրամ և խնդրել Երևան-Բաթումի գնացքի երեք հատ տոմս։ Ինքը նրան ասել է, որ գումարը դեռ պետք չէ տալ, համբերի մինչև տոմսերը լրացնի նոր գումարը կվճարի, սակայն վերջինս ամեն գնով փորձել է գումարը թողնել իր մոտ։ Այդ պահից սկսած ինքը կասկածել է, որ ինչ-որ բան այն չէ, քանի որ տուժողը ներկայացրել է, որ տոմսերը գնում է որդու և հարսի համար, քանի որ նրանք նոր են ամուսնացել և նրանց համար անակնկալ է ուզում մատուցի, սակայն ինքը մտածել է, որ այդ դեպքում հայրը ինչի է նրանց հետ գնում։ Բացի այդ, ինքը զարմացել է, թե ինչի է տուժողը համաձայնվում որպեսզի նոր ամուսնացած զույգը գնա պլասկարդ վագոնով, և նույնիսկ իրեն ասել է, որ տարբերություն չկա։ Այսինքն, տուժողին այդ տոմսերը պետք չեն եղել, այլ վերջինս ամեն գնով փորձել է գումարը իրեն տալ։ Վերցնելով գումարը, ինքը նրան է վերադարձրել 8.500 ՀՀ դրամ, սակայն վերջինս փորձել է առանց գումարը վերցնելու հեռանա։ Երբ ինքը պահանջել է նրանից վերցնել գումարը, վերջինս վերցնելով 6.000 ՀՀ դրամ արագ հեռացել է` դրամարկղի սեղանին թողնելով 2.500 ՀՀ դրամ։ Տուժողի հեռանալուց երկու րոպե չանց, վկաների հետ միասին ներս են մտել ոստիկանության աշխատակիցները և փակել դրամարկղը, որից հետո իրեն տարել են ոստիկանության բաժին։
Ռիմմա Հակոբովայի պատճառաբանություններն անհիմն են ու մտածացին, որոնք նպատակ են հետապնդում խուսափելու քրեական պատասխանատվությունից և պատժից, իսկ նրա կատարած արարքը հիմնավորվեց գործով ձեռք բերված հետևյալ ապացույցներով.
Տուժող` Միսակ Գրիգորյանի ցուցմունքով այն մասին, որ 2009թ. օոգոստոսի 5-ին, ժամը 1530-ի սահմաններում իր, որդու և հարսի համար Երևան-Բաթումի երկաթուղային չվերթի տոմս գնելու նպատակով գնացել է «Երևան» կայարանի վարչական շենք և թիվ 6 դրամարկղի տոմսավաճառ Ռիմմա Հակոբովայից խնդրել երեք հատ տոմս։ Դրամարկղում, նախապես իմանալով տոմսերի մոտավոր արժեքը, նրան է տվել 30.000 ՀՀ դրամ։ Ռիմմա Հակոբովան տոմսերի հետ միասին իրեն է վերադարձրել 6.000 ՀՀ դրամ։ Դրամարկղից հեռանալուց հետո, նկատել է, որ տոմսերի վրա նշված գինը ավելի ցածր է, քան իրենից գանձել են։ Հասկանալով, որ իրեն խաբել են, վրդովված հայտարարություն է տվել ոստիկանության բաժնում։
Վկաներ` Ալբերտ Առաքելյանի և Յուրիկ Խանզադյանի նույնաբովանդակ ցուցմունքներով այն մասին, որ 2009թ. օոգոստոսի 5-ին, ժամը 1615-ի սահմաններում որպես ընթերակա մասնակցել են ոստիկանների կողմից «Երևան» կայարանի թիվ 6 դրամարկղում կատարվող զննությանը, որի ներկա է եղել նաև Ռիմմա Հակոբովան։ Այդ ընթացքում Ռիմմա Հակոբովան ներկայացրել է դրամարկղում առկա ընդհանուր առմամբ 349.590 ՀՀ դրամ գումարը և վաճառված ուղևորային տոմսերի կտրոնները, ինչի վերաբերյալ կազմվել է համապատասխան արձանագրություն, որը ստորագրել են իրենք և Ռիմմա Հակոբովան։
Ռիմմա Հակոբովայի հանցանքը հիմնավորվեց նաև անձին ճանաչման ներկայացնելու վերաբերյալ արձանագրությամբ այն մասին, որ 18.08.2009թ. ճանաչման ներկայացված անձանցից տուժող Միսակ Գրիգորյանը ճանաչել է Ռիմմա Հակոբովային, որը 05.08.2009թ. ուղևորային տոմսեր վաճառելու ընթացքում խաբել է իրեն և տոմսերի դիմաց իրենից գանձել է իրական արժեքից ավել` 2.583 ՀՀ դրամ գումար։
«Երևան» կայարանի թիվ 6 դրամարկղի զննության արձանագրությամբ այն մասին, որ 05.08.2009թ. Ռիմմա Հակոբովան թիվ 6 դրամարկղում ներկայացրել է ընդհանուր 43 հատ վաճառված ուղևորային տոմսերի կտրոն և դրանց վաճառքից իր մոտ գոյացած 349.590 ՀՀ դրամ գումարը։
Իրեղեն ապացույց` 3 ուղևորային տոմսերի կտրոններով և ուղևորային տոմսերի կտրոնների զննության մասին արձանագրությամբ այն մասին, որ «Երևան» կայարանի թիվ 6 դրամարկղում 05.08.2009թ. Ռիմմա Հակոբովայի կողմից ներկայացված վաճառված ուղևորային տոմսերի կտրոնների, այդ թվում Միսակ Գրիգորյանին վաճառված ու իրեղեն ապացույց ճանաչված երեք տոմսերի կտրոնների վրա առկա արժեքի հանրագումարն ընդհանուր առմամբ կազմում է 347.009 ՀՀ դրամ, ինչը պակաս է դրանց վաճառքից իր մոտ գոյացած գումարից 2.581 ՀՀ դրամով։
Ուղևորային տոմսեր ներկայացնելու և դրանք զննելու վերաբերյալ արձանագրություններով այն մասին, որ Միսակ Գրիգորյանի կողմից 05.08.2009թ. ներկայացված Երևան-Մախինջաուրի երկաթուղային չվերթի 3 հատ տոմսի զննությամբ պարզվել է, որ դրանք լրացված են Միսակ Գրիգորյանի, Տիգրան Գրիգորյանի և Անահիտ Ավագյանի անվամբ ու ըստ այդ տոմսերի վրա առկա գնի, դրանց ընդհանուր արժեքը կազմում է 21.417 ՀՀ դրամ։
«Երևան» կայարանի թիվ 3 դրամարկղի մատյանը զննելու վերաբերյալ արձանագրությամբ այն մասին, որ Ռիմմա Հակոբովայի անվամբ կազմված Երևան-Բաթումի ուղևորային տոմսերի հաշվառման մատյանում օգոստոսի 5-ի դրությամբ գրանցված է Միսակ Գրիգորյանի, Տիգրան Գրիգորյանի, Անահիտ Ավագյանի անվամբ Երևան-Մախինջաուրի երկաթուղային չվերթի ուղևորային տոմսեր վաճառելու վերաբերյալ տեղեկությունը, ինչպես նաև գործով ձեռք բերված այլ փաստական տվյալներով։
Այսպիսով դատարանը ապացուցված համարեց, որ Ռիմմա Սարոյի Հակոբովան կատարել է արարք, որը նախատեսված է ՀՀ քր. օր-ի 212 հոդվածի 1-ին մասով, որով և պետք է ենթարկվի քրեական պատասխանատվության։
Պատիժ նշանակելիս դատարանը հաշվի է առնում արարքի հասարակական վտանգավորությունը, ամբաստանյալի ինքնությունը և գործի ողջ հանգամանքները։
Ռիմմա Հակոբովայի պատասխանատվությունը և պատիժը ծանրացնող հանգամանքներ չկան։
Դատարանն ամբաստանյալի պատասխանատվությունը և պատիժը մեղմացնող հանգամանք է դիտում այն, որ վերջինս նախկինում արատավորված չի եղել, բնութագրվում է դրականորեն։
Քննարկելով խափանման միջոցի հարցը, դատարանը գտնում է, որ ամբաստանյալ Ռ. Հակոբովայի նկատմամբ ընտրված խափանման միջոցը` ստորագրություն չհեռանալու մասին, պետք է թողնել անփոփոխ։
Տուժողի կողմից քաղ. հայց չներկայացնելու պատճառով, այդ հարցը համարել լուծված։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված Մ. Գրիգորյանի կողմից ներկայացված թիվ 394184, 394185, 34186 Երևան-Մախինջաուրի երկաթուղային տոմսերը պետք է թողնել քրեական գործում։
Ղեկավարվելով ՀՀ քր. դատ. օր-ի 357-360 հոդվածներով, դատարանը

Վ Ճ Ռ Ե Ց

Ռիմմա Սարոյի Հակոբովային մեղավոր ճանաչել ՀՀ քր. օր-ի 212 հոդվածի 1-ին մասով և դատապարտել տուգանքով` նվազագույն աշխատավարձի հարյուրապատիկի` 100.000/հարյուր հազար/ ՀՀ դրամի չափով։
Խափանման միջոցը` ստորագրություն չհեռանալու մասին, թողնել անփոփոխ մինչև դատավճռի օրինական ուժի մեջ մտնելը։
Քաղ. հայցի հարցը համարել լուծված։
Գործով իրեղեն ապացույց ճանաչված Մ. Գրիգորյանի կողմից ներկայացված թիվ 394184, 394185, 34186 Երևան-Մախինջաուրի երկաթուղային տոմսերը թողնել քրեական գործում։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ