ԵԷԴ/0097/01/09

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն համայնքների ընդհանուր իրավասության դատարանը՝

Նախագահությամբ դատավոր` Ա. ԳԱԲՐԻԵԼՅԱՆ
Քարտուղարությամբ` Լ. ՄԻՐԶՈՅԱՆ

Մասնակցությամբ`

Մեղադրող` Ա. ԲԱՐՍԵՂՅԱՆ
Պաշտպան` Հ. ԲԱՂԴԱՍԱՐՅԱՆ
Տուժող` Մ. ԿԻՐԱԿՈՍՅԱՆ

2009թ. հոկտեմբերի 16-ին դատարանում
Դռնբաց դատական նիստում դատական քննության արագացված կարգի կիրառմամբ քննեց քրեական գործն ըստ մեղադրանքի` Համլետ Միխայիլի Ստեփանյանի, ծնված 10.11.1968թ., ք.Կիրովաբադ, ազգությամբ հայ, ՀՀ քաղաքացի, միջնակարգ կրթությամբ, ամուսնացած, նախկինում չդատված, չի աշխատում, բնակվում է ք.Երևան Նուբարաշեն 15 փողոց, 24ա տանը։
Մեղադրվում է ՀՀ քր. օր-ի 112 հոդվածի 1-ին մասով։
Սույն գործով կալանքի տակ է 18.06.2009թ.։
Դատաքննությամբ և գործի տվյալներով պարզվեց հետևյալը.
Ամբաստանյալ Համլետ Ստեփանյանը որդուն նախատելու հարցի շուրջ 2009թ. հունիսի 16-ին, ժամը 2100-ի սահմաններում Երևան քաղաքի Նուբարաշեն 15 փողոցի, թիվ 24ա հասցեում գտնվող իր տան դիմաց վիճաբանել է իր աներոջ` Մեջլում Սեյրանյանի հետ, որի հետևանքով վերջինիս ինքնազգացողությունը վատացել է։ Տեղի ունեցածի մասին Ս. Մեջլումյանի դուստր Անահիտ Սեյրանյանը զանգահարել և հայտնել է հորաքրոջ որդի, Արարատի մարզի Սայաթ-Նովա գյուղի բնակիչ Արթուր Ճաղարյանին ու իրենց տուն է կանչել։
Որոշ ժամանակ անց Ա. Ճաղարյանն իր ընկեր` Մաքսիմ Կիրակոսյանի հետ գնացել է Մ. Սեյրանյանի տուն, որտեղ իմանալով կատարված մանրամասնությունները, Մ. Կիրակոսյանի հետ գնացել է հարևանությամբ բնակվող Հ. Ստեփանյանի տան բակ։ Հանդիպելով վերջինիս, Ա. Ճաղարյանը քեռու հետ տեղի ունեցած վիճաբանության կապակցությամբ պարզաբանումներ կատարելու համար առաջարկել է Նուբարաշեն թաղամասից դուրս գնալ, որին չառարկելով` Հ. Ստեփանյանը մտել է տուն և ընտանիքի անդամներից գաղտնի վերցրել է խոհանոցային դանակը և տանից դուրս է եկել։
Այնուհետև, Հ. Ստեփանյանը կատարվելիք պարզաբանումներին ներկա գտնվելու համար իրենց բակ է կանչել իր հորաքրոջ որդի Արտուշ Բոյախչյանին։ Նույն օրը, ժամը 2300-ի սահմաններում Նուբարաշեն 15 փողոցի, թիվ 24ա հասցեում գտնվող տանը Ա. Ճաղարյանը և Հ. Ստեփանյանը վիճաբանել են միմյանց հետ, որին միջամտել են Ա. Բոյախչյանն ու Մ. Կիրակոսյանը։ Վիճաբանության ընթացքում Հ. Ստեփանյանն իր մոտ եղած խոհանոցային դանակով դիտավորությամբ հարվածել է Մ. Կիրակոսյանի կենսական կարևոր օրգանի` որովայնի շրջանին և կտրած-ծակած-թափանցող վնասվածքի ձևով նրա առողջությանը պատճառել ծանր վնաս։
Վերը նշված հանցավոր արարքի կատարման համար Համլետ Միխայիլի Ստեփանյանին մեղադրանք է առաջադրվել ՀՀ քր. օր-ի 112 հոդվածի 1-ին մասով։
Քրեական գործով մինչև դատաքննությունը սկսելը ամբաստանյալ Համլետ Ստեփանյանը հայտնեց, որ համաձայն է առաջադրված մեղադրանքի հետ և միջնորդեց կիրառել դատական քննության արագացված կարգ։ Հ. Ստեփանյանի պաշտպան Հենրիկ Բաղդասարյանը նույնպես միջնորդեց կիրառել դատական քննության արագացված կարգ։
Հաշվի առնելով, որ մեղադրողը չի առարկել դատական քննության արագացված կարգ կիրառելու դեմ, ամբաստանյալը համաձայնվել է իրեն առաջադրված մեղադրանքի հետ և միջնորդել է կիրառել դատական քննության արագացված կարգ, ամբաստանյալին մեղսագրվող հանցագործության համար ՀՀ քրեական օրենսգրքով նախատեսված պատիժը չի գերազանցում 10 տարի ժամկետով ազատազրկումը, ամբաստանյալը գիտակցում է իր կողմից ներկայացված միջնորդության բնույթը և հետևանքները, միջնորդությունը ներկայացվել է կամավոր՝ պաշտպանի ներկայությամբ և նրա հետ խորհրդակցելուց հետո, դատարանը որոշեց միջնորդությունը բավարարել՝ կիրառել դատական քննության արագացված կարգ։
Դատարանը, ուսումնասիրելով ամբաստանյալ Համլետ Ստեփանյանի անձը բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքները, գտավ, որ ամբաստանյալ Համլետ Ստեփանյանի կողմից դիտավորությամբ առողջությանը ծանր վնաս պատճառելը հիմնավորված է, նրա արարքը ճիշտ է որակված և համապատասխանում է ՀՀ քր. օր-ի 112 հոդվածի 1-ին մասով նախատեսված հանցագործության հատկանիշներին։
Ամբաստանյալի նկատմամբ պատիժ նշանակելիս դատարանը հաշվի առավ ինչպես կատարած արարքի հանրորեն վտանգավորության աստիճանն ու գործի կոնկրետ հանգամանքները, այնպես էլ նրա անձը։
Ամբաստանյալի պատասխանատվությունը և պատիժը ծանրացնող հանգամանքներ չկան։
Դատարանն ամբաստանյալ Համլետ Ստեփանյանի պատասխանատվությունը և պատիժը մեղմացնող հանգամանք է համարում այն, որ վերջինս նախկինում արատավորված չի եղել, մեղայականով ներկայացել է նախաքննական մարմնին, բնութագրվում է դրականորեն, զղջացել է կատարած արարքի համար և ընդունել մեղքը։
Քննարկելով խափանման միջոցի հարցը, դատարանը գտնում է, որ ամբաստանյալ Հ. Ստեփանյանի նկատմամբ ընտրված կալանք խափանման միջոցը պետք է թողնել անփոփոխ։
Տուժող Մաքսիմ Կիրակոսյանը խնդրեց դատարանին ամբաստանյալ Համլետ Ստեփանյանից հօգուտ իրեն բռնագանձել 600.000 ՀՀ դրամ գումար որպես հանցագործությամբ պատճառված վնասի հատուցում։
Հաշվի առնելով այն հանգամանքը, որ ամբաստանյալը տուժողի կողմից ներկայացրած քաղաքացիական հայցը չնդունեց, ուստի դատարանը գտնում է, որ քաղաքացիական հայցը պետք է թողնել առանց քննության, իսկ տուժողին իրավունք վերապահել հետագայում քաղ. դատավարության կարգով դիմելու դատարան։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված տուժող Մ. Կիրակոսյանի վերնաշապիկը և անդրավարտիքը պետք է վերադարձնել Մաքսիմ Կիրակոսյանին, իսկ Հ. Ստեփանյանի ներկայացրած դանակը` ոչնչացնել։
Ղեկավարվելով ՀՀ քր. դատ. օր-ի 357-360 և 3751 հոդվածներով, դատարանը

Վ Ճ Ռ Ե Ց

Համլետ Միխայիլի Ստեփանյանին մեղավոր ճանաչել ՀՀ քր. օր-ի 112 հոդվածի 1-ին մասով և դատապարտել ազատազրկման` 3/երեք/ տարի ժամկետով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել 18.06.2009թ.։
Կալանք խափանման միջոցը թողնել անփոփոխ մինչև դատավճռի օրինական ուժի մեջ մտնելը։
Քաղաքացիական հայցի մասով` տուժողի կողմից ներկայացրած քաղաքացիական հայցը թողնել առանց քննության և նրան իրավունք վերապահել հետագայում քաղ. դատավարության կարգով դիմելու դատարան։
Գործով իրեղեն ապացույց ճանաչված տուժող Մ. Կիրակոսյանի վերնաշապիկը և անդրավարտիքը դատավճիռն օրինական ուժի մեջ մտնելուց հետո վերադարձնել Մաքսիմ Կիրակոսյանին, իսկ Հ. Ստեփանյանի ներկայացրած դանակը` ոչնչացնել։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ