ԵԷԴ/0096/01/09

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն համայնքների ընդհանուր իրավասության դատարանը՝

Նախագահությամբ դատավոր` Ա. ԳԱԲՐԻԵԼՅԱՆ
Քարտուղարությամբ` Լ. ՄԻՐԶՈՅԱՆ

Մասնակցությամբ`

Մեղադրող` Ա. ՍԵՊՈՅԱՆ
Պաշտպան` Կ. ՄԱՆՈւՉԱՐՅԱՆ

2009թ. սեպտեմբերի 22-ին դատարանում
Դռնբաց դատական նիստում դատական քննության արագացված կարգի կիրառմամբ քննեց քրեական գործն ըստ մեղադրանքի` Ռուբեն Սարգսի Համբարձումյանի, ծնված 13.10.1988թ., ք.Երևան, ազգությամբ հայ, ՀՀ քաղաքացի, չամուսնացած, չի աշխատում, նախկինում չդատված, բնակվում է ք.Երևան Բարձրաբերդի 57 տանը։
Մեղադրվում է ՀՀ քր. օր-ի 268 հոդվածի 1-ին մասով և 235 հոդվածի 4-րդ մասով։
Սույն գործով կալանքի տակ չի եղել։
Դատաքննությամբ և գործի տվյալներով պարզվեց հետևյալը.
Ռուբեն Սարգսի Համբարձումյանը 2009թ. հունիսի 21-ին Արագածոտնի մարզի Ոսկեվազ գյուղում, առանց իրացնելու նպատակի, քաղելու միջոցով ապօրինի ձեռք է բերել 2.2 գրամ քաշով չչորացված մարիխուանա տեսակի թմրամիջոց, այն փոխադրել է Երևան քաղաք, պահել է իր մոտ, որը 2009թ. հունիսի 22-ին հայտնաբերվել և առգրավվել է ոստիկանության Մետրոպոլիտենի պահպանության բաժնի աշխատակիցների կողմից։
Բացի այդ, Ռ. Համբարձումյանը 2009թ. հունիսի 19-ին, Վանաձոր քաղաքի տոնավաճառից գնել է սառը զենք հանդիսացող, երկկողմանի սահմանափակիչով, գործարանային արտադրության որսորդական դանակ, այն ապօրինի կերպով կրել է, որը 2009թ. հունիսի 22-ին հայտնաբերվել և առգրավվել է ոստիկանության Մետրոպոլիտենի պահպանության բաժնի աշխատակիցների կողմից։
Վերը նշված հանցավոր արարքների կատարման համար Ռուբեն Սարգսի Համբարձումյանին մեղադրանք է առաջադրվել ՀՀ քր. օր-ի 268 հոդվածի 1-ին մասով և 235 հոդվածի 4-րդ մասով։
Քրեական գործով մինչև դատաքննությունը սկսելը ամբաստանյալ Ռուբեն Համբարձումյանը հայտնեց, որ համաձայն է առաջադրված մեղադրանքի հետ և միջնորդեց կիրառել դատական քննության արագացված կարգ։ Ռ. Համբարձումյանի պաշտպան Կարեն Մանուչարյանը նույնպես միջնորդեց կիրառել դատական քննության արագացված կարգ։
Հաշվի առնելով, որ մեղադրողը չի առարկել դատական քննության արագացված կարգ կիրառելու դեմ, ամբաստանյալը համաձայնվել է իրեն առաջադրված մեղադրանքի հետ և միջնորդել է կիրառել դատական քննության արագացված կարգ, ամբաստանյալին մեղսագրվող հանցագործության համար ՀՀ քրեական օրենսգրքով նախատեսված պատիժը չի գերազանցում 10 տարի ժամկետով ազատազրկումը, ամբաստանյալը գիտակցում է իր կողմից ներկայացված միջնորդության բնույթը և հետևանքները, միջնորդությունը ներկայացվել է կամավոր՝ պաշտպանի ներկայությամբ և նրա հետ խորհրդակցելուց հետո, դատարանը որոշեց միջնորդությունը բավարարել՝ կիրառել դատական քննության արագացված կարգ։
Դատարանը, ուսումնասիրելով ամբաստանյալ Ռուբեն Համբարձումյանի անձը բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքները, գտավ, որ ամբաստանյալ Ռուբեն Համբարձումյանի կողմից առանց իրացնելու նպատակի զգալի չափերով թմրամիջոցներ ձեռք բերելը, պահելը և փոխադրելը հիմնավորված է, նրա արարքը ճիշտ է որակված և համապատասխանում է ՀՀ քր. օր-ի 268 հոդվածի 1-ին մասով նախատեսված հանցագործության հատկանիշներին։
Հիմնավորված է նաև ամբաստանյալ Ռուբեն Համբարձումյանի կողմից ապօրինի կերպով սառը զենք կրելը, այն նույնպես ճիշտ է որակված և համապատասխանում է ՀՀ քր. օր-ի 235 հոդվածի 4-րդ մասով նախատեսված հանցագործության հատկանիշներին։
Ամբաստանյալի նկատմամբ պատիժ նշանակելիս դատարանը հաշվի առավ ինչպես կատարած արարքի հանրորեն վտանգավորության աստիճանն ու գործի կոնկրետ հանգամանքները, այնպես էլ նրա անձը։
Ամբաստանյալի պատասխանատվությունը և պատիժը ծանրացնող հանգամանքներ չկան։
Դատարանն ամբաստանյալի պատասխանատվությունը և պատիժը մեղմացնող հանգամանք է համարում այն, որ վերջինս երիտասարդ է, նախկինում արատավորված չի եղել, խնամքին է գտնվում անաշխատունակ մայրը, աջակցել է հանցագործությունը բացահայտելուն` մատնանշելով հանցագործության դեպքի վայրը, բնութագրվում է դրականորեն, զղջացել է կատարած արարքի համար և ընդունել մեղքը։
Քննարկելով խափանման միջոցի հարցը, դատարանը գտնում է, որ ամբաստանյալ Ռ. Համբարձումյանի նկատմամբ ընտրված խափանման միջոցը` ստորագրություն չհեռանալու մասին, պետք է թողնել անփոփոխ։
Հաշվի առնելով ամբաստանյալ Ռ. Համբարձումյանի պատասխանատվությունն ու պատիժը մեղմացնող վերոհիշյալ բոլոր հանգամանքներն իրենց համակցության մեջ, ինչպես նաև պատասխանատվությունը և պատիժը ծանրացնող հանգամանքների բացակայությունը, դատարանը գտնում է, որ նպատակահարմար չէ ամբաստանյալ Ռ. Համբարձումյանին մեկուսացնել հասարակությունից, և որ նրա ուղղվելը հնարավոր է առանց ազատազրկման ձևով պատիժ կրելու, հետևաբար դատարանը գտնում է, որ նրա նկատմամբ պետք է կիրառել ՀՀ քր. օր-ի 70 հոդվածը և պատիժը պայմանականորեն չկիրառել։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված 2.2 գրամ քաշով չչորացված/0.8 գրամ հաստատուն քաշով չորացված/ «մարիխուանա» տեսակի թմրամիջոցը և սառը զենք հանդիսացող դաշույնը պետք է ոչնչացնել։
Ղեկավարվելով ՀՀ քր. դատ. օր-ի 357-360 և 3751 հոդվածներով, դատարանը

Վ Ճ Ռ Ե Ց

Ռուբեն Սարգսի Համբարձումյանին մեղավոր ճանաչել ՀՀ քր. օր-ի 268 հոդվածի 1-ին մասով և 235 հոդվածի 4-րդ մասով.
ՀՀ քր. օր-ի 268 հոդվածի 1-ին մասով դատապարտել ազատազրկման` 6/վեց/ ամիս ժամկետով։
ՀՀ քր. օր-ի 235 հոդվածի 4-րդ մասով դատապարտել ազատազրկման` 6/վեց/ ամիս ժամկետով։
ՀՀ քր. օր-ի 66 հոդվածի 2-րդ մասի համաձայն՝ պատիժները լրիվ գումարելու միջոցով, վերջնական պատիժ նշանակել ազատազրկում՝ 1/մեկ/ տարի ժամկետով։
ՀՀ քր. օր-ի 70 հոդվածի կիրառմամբ Ռուբեն Համբարձումյանի նկատմամբ ազատազրկման ձևով նշանակված պատիժը պայմանականորեն չկիրառել՝ սահմանելով փորձաշրջան՝ 2/երկու/ տարի ժամկետով։
Ռ. Համբարձումյանի վարքագծի նկատմամբ վերահսկողությունը հանձնարարել ՀՀ ԱՆ ՔԿՎ այլընտրանքային պատիժների կատարման բաժնին։
Փորձաշրջանի սկիզբը հաշվել հաշվառման վերցնելու պահից։
Խափանման միջոցը` ստորագրություն չհեռանալու մասին, թողնել անփոփոխ մինչև դատավճռի օրինական ուժի մեջ մտնելը և փաստացի կատարումն ապահովելը։
Գործով իրեղեն ապացույց ճանաչված 2.2 գրամ քաշով չչորացված/0.8 գրամ հաստատուն քաշով չորացված/ «մարիխուանա» տեսակի թմրամիջոցը և սառը զենք հանդիսացող դաշույնը դատավճիռն օրինական ուժի մեջ մտնելուց հետո ոչնչացնել։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ