ԵԷԴ/0092/01/09

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

Նախագահությամբ դատավոր` Ա. ԳԱԲՐԻԵԼՅԱՆ
Քարտուղարությամբ` Լ. ՄԻՐԶՈՅԱՆ

Մասնակցությամբ`

Մեղադրող` Ա. ՄՈւՐԱԴՅԱՆ
Պաշտպան` Կ. ՄԱՆՈւՉԱՐՅԱՆ

2009թ. դեկտեմբերի 15-ին դատարանում
Դռնբաց դատական նիստում դատական քննության արագացված կարգի կիրառմամբ քննեց քրեական գործն ըստ մեղադրանքի` Արամ Իսահակի Առաքելյանի, ծնված 15.05.1968թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, նախկինում մեկ անգամ դատված` Երևանի քրեական դատարանի 17.10.2008թ. դատավճռով ՀՀ քր. օր-ի 268 հոդվածի 2-րդ մասով դատապարտվել է ազատազրկման` 1 տարի ժամկետով, չի աշխատում, բնակվում է ք.Երևան Ռոստոմի 27 տանը, ներկայումս ՀՀ ԱՆ «Նուբարաշեն» ՔԿՀ կալանավոր։
Մեղադրվում է ՀՀ քր. օր-ի 268 հոդվածի 2-րդ մասի 1-ին կետով։
Դատաքննությամբ և գործի տվյալներով պարզվեց հետևյալը.
Ամբաստանյալ Արամ Առաքելյանը 2008թ. հոկտեմբերի 18-ից կալանքը կրում է ՀՀ ԱՆ «Նուբարաշեն» քրեակատարողական հիմնարկում, և վերջինիս վերաբերյալ Երևան քաղաքի Ավան և Նոր-Նորք համայնքների ընդհանուր իրավասության դատարանի վարույթում քննվում է քրեական գործ` ՀՀ քր. օր-ի 266 հոդվածի 2-րդ մասի 2.1 ենթակետով, 268 հոդվածի 2-րդ մասով և 266 հոդվածի 4-րդ մասով նախատեսված հանցագործություններ կատարելու մեղադրանքով։ ՀՀ ԱՆ «Նուբարաշեն» ՔԿ հիմնարկում կալանքը կրելու ընթացքում, չպարզված հանգամանքներում, առանց իրացնելու նպատակի` իր գործածման համար ապօրինաբար ձեռք է բերել և թիվ 43 խցի սանհանգույցում գտնվող պահարանի մեջ պահել զգալի չափի` 0.0188 գրամ «բուպրենորֆին» տեսակի թմրակտիվ բաղադրատարր պարունակող 3 դեղահաբեր, որոնք նույն օրը հայտնաբերվել են հիմնարկի աշխատակիցների կողմից թիվ 43 խցում կատարված խուզարկության ժամանակ։
Վերը նշված հանցավոր արարքի կատարման համար Արամ Իսահակի Առաքելյանին մեղադրանք է առաջադրվել ՀՀ քր. օր-ի 268 հոդվածի 2-րդ մասի 1-ին կետով։
Քրեական գործով մինչև դատաքննությունը սկսելը ամբաստանյալ Արամ Առաքելյանը հայտնեց, որ համաձայն է առաջադրված մեղադրանքի հետ և միջնորդեց կիրառել դատական քննության արագացված կարգ։ Ա. Առաքելյանի պաշտպան Կարեն Մանուչարյանը նույնպես միջնորդեց կիրառել դատական քննության արագացված կարգ։
Հաշվի առնելով, որ մեղադրողը չի առարկել դատական քննության արագացված կարգ կիրառելու դեմ, ամբաստանյալը համաձայնվել է իրեն առաջադրված մեղադրանքի հետ և միջնորդել է կիրառել դատական քննության արագացված կարգ, ամբաստանյալին մեղսագրվող հանցագործության համար ՀՀ քրեական օրենսգրքով նախատեսված պատիժը չի գերազանցում 10 տարի ժամկետով ազատազրկումը, ամբաստանյալը գիտակցում է իր կողմից ներկայացված միջնորդության բնույթը և հետևանքները, միջնորդությունը ներկայացվել է կամավոր՝ պաշտպանի ներկայությամբ և նրա հետ խորհրդակցելուց հետո, դատարանը որոշեց միջնորդությունը բավարարել՝ կիրառել դատական քննության արագացված կարգ։
Դատարանը, ուսումնասիրելով ամբաստանյալ Արամ Առաքելյանի անձը բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքները, գտավ, որ ամբաստանյալ Արամ Առաքելյանի կողմից առանց իրացնելու նպատակի կրկին անգամ հոգեներգործուն նյութեր ապօրինի ձեռք բերելը և պահելը հիմնավորված է, նրա արարքը ճիշտ է որակված և համապատասխանում է ՀՀ քր. օր-ի 268 հոդվածի 2-րդ մասի 1-ին կետով նախատեսված հանցագործության հատկանիշներին։
Ամբաստանյալի նկատմամբ պատիժ նշանակելիս դատարանը հաշվի առավ ինչպես կատարած արարքի հանրորեն վտանգավորության աստիճանն ու գործի կոնկրետ հանգամանքները, այնպես էլ նրա անձը։
Ամբաստանյալի պատասխանատվությունը և պատիժը ծանրացնող հանգամանք է դիտվում հանցանքը կատարելու ռեցիդիվը։
Դատարանն ամբաստանյալ Արամ Առաքելյանի պատասխանատվությունը և պատիժը մեղմացնող հանգամանք է համարում այն, որ վերջինս խնամքին ունի թոշակառու ծնողներ և երկու անչափահաս երեխաներ, բնութագրվում է դրականորեն, զղջացել է կատարած արարքի համար և ընդունել մեղքը։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված 22.05.2009թ. ՀՀ ԱՆ «Նուբարաշեն» ՔԿ հիմնարկի թիվ 43 խցից հայտնաբերված 0.0188 գրամ «բուպրենորֆին» տեսակի թմրաակտիվ բաղադրատար պարունակող դեղահաբերը պետք է ոչնչացնել։
Երևանի քրեական դատարանի 17.10.2008թ. դատավճռով Արամ Առաքելյանը ՀՀ քր. օր-ի 268 հոդվածի 2-րդ մասով դատապարտվել է ազատազրկման` 1 տարի ժամկետով։ Դատավճիռը կատարման է ներկայացվել 28.04.2009թ., նոր հանցանքը կատարել է 22.05.2009թ., այսինքն մինչև պատժի լրիվ կրումը, ուստի դատարանը գտնում է, որ նոր նշանակվող պատժին մասնակիորեն պետք է գումարել վերը նշված դատավճռով սահմանված և նրա կողմից պատժի չկրած մասը։
Ղեկավարվելով ՀՀ քր. դատ. օր-ի 357-360 և 3751 հոդվածներով, դատարանը

Վ Ճ Ռ Ե Ց

Արամ Իսահակի Առաքելյանին մեղավոր ճանաչել ՀՀ քր. օր-ի 268 հոդվածի 2-րդ մասի 1-ին կետով և դատապարտել ազատազրկման` 1/մեկ/ տարի ժամկետով։
ՀՀ քր. օր-ի 67 հոդվածի կիրառմամբ նոր նշանակված պատժի ժամկետին մասնակիորեն գումարել Երևանի քրեական դատարանի 17.10.2008թ. դատավճռով ազատազրկման ձևով նշանակված պատժի չկրած մասից` ազատազրկման 5/հինգ/ ամիս ժամկետը և վերջնական պատիժ սահմանել ազատազրկում` 1/մեկ/ տարի 5/հինգ/ ամիս ժամկետով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել դատավճռի հրապարակման օրվանից` 15.12.2009թ.։
Գործով իրեղեն ապացույց ճանաչված 22.05.2009թ. ՀՀ ԱՆ «Նուբարաշեն» ՔԿ հիմնարկի թիվ 43 խցից հայտնաբերված 0.0188 գրամ «բուպրենորֆին» տեսակի թմրաակտիվ բաղադրատար պարունակող դեղահաբերը դատավճիռն օրինական ուժի մեջ մտնելուց հետո ոչնչացնել։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։

ԴԱՏԱՎՈՐ Ա. ԳԱԲՐԻԵԼՅԱՆ