ԵԷԴ/0091/01/09

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն համայնքների ընդհանուր իրավասության դատարանը՝

Նախագահությամբ դատավոր` Ա. ԳԱԲՐԻԵԼՅԱՆ
Քարտուղարությամբ` Լ. ՄԻՐԶՈՅԱՆ

Մասնակցությամբ`

Մեղադրող` Ա. ՄՈւՐԱԴՅԱՆ
Պաշտպան` Վ. ԱԹՈՅԱՆ

2009թ. սեպտեմբերի 16-ին դատարանում
Դռնբաց դատական նիստում քննեց քրեական գործն ըստ մեղադրանքի`
1. Արսեն Համլետի Բարսեղյանի, ծնված 22.09.1985թ., ք.Սևան, ազգությամբ հայ, ՀՀ քաղաքացի, 8-ամյա կրթությամբ, չամուսնացած, չի աշխատել, նախկինում երեք անգամ դատված, վերջինը` Գեղարքունիքի մարզի առաջին ատյանի դատարանի 17.10.2006թ. դատավճռով ՀՀ քր. օր-ի 177 հոդվածի 2-րդ մասի 4-րդն կետով, 67 հոդվածի կիրառմամբ դատապարտվել է ազատազրկման` 3 տարի ժամկետով, բնակվել է ք.Սևան Նալբանդյան 61 շենք, 8 բնակարանում, ներկայումս ՀՀ ԱՆ «Նուբարաշեն» ՔԿ հիմնարկի դատապարտյալ։
Մեղադրվում է ՀՀ քր. օր-ի 266 հոդվածի 2-րդ մասի 2-րդ և 3-րդ կետերով և 266 հոդվածի 4-րդ մասով։
Սույն գործով կալանքի տակ է 21.05.2009թ.։
2. Արման Գևորգի Խալաթյանի, ծնված 31.03.1979թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատել, նախկինում դատված` Երևանի Մալաթիա-Սեբաստիա համայնքի ընդհանուր իրավասության դատարանի 01.02.2008թ. դատավճռով ՀՀ քր. օր-ի 113 հոդվածի 2-րդ մասի 6-րդ կետով դատապարտվել է ազատազրկման` 4 տարի ժամկետով, բնակվել է ք.Երևան Անդրանիկի 92 շենք, 19 բնակարանում, ներկայումս ՀՀ ԱՆ «Նուբարաշեն» ՔԿ հիմնարկի դատապարտյալ։
Մեղադրվում է ՀՀ քր. օր-ի 34-268 հոդվածի 2-րդ մասի 2-րդ կետով և 34-266 հոդվածի 4-րդ մասով։
Դատաքննությամբ և գործի տվյալներով պարզվեց հետևյալը.
Գեղարքունիքի մարզի Սևան քաղաքի բնակիչ, ամբաստանյալ Արսեն Բարսեղյանը ՀՀ քր. օր-ի 177 հոդվածի 2-րդ մասի 4-րդ կետով նախատեսված հանցագործություն կատարելու համար Գեղարքունիքի մարզի առաջին ատյանի դատարանի 2006թ. հոկտեմբերի 17-ի դատավճռով դատապարտվել է ազատազրկման` 3 տարի ժամկետով և պատիժը կրել է ՀՀ ԱՆ «Նուբարաշեն» քրեակատարողական հիմնարկում, իսկ 05.12.2006թ. քրեակատարողական հիմնարկի պետի թիվ 64 հրամանով ընդգրկվել է տեխնիկատնտեսական աշխատանքներում և իրականացրել է վարչական շենքի 1-ին հարկի միջանցքի մաքրության աշխատանքները, որի կապակցությամբ շենք մուտք գործելու հնարավորություն է ունեցել։
Ամբաստանյալ Ա. Բարսեղյանը պատիժը կրելու ընթացքում` 2009թ. ապրիլի 25-ին, ժամը 0730-ի սահմաններում վարչական շենքի 1-ին հարկի միջանցքը մաքրելու ընթացքում ամբաստանյալ` ՔԿ հիմնարկի դատապարտյալ Արման Խալաթյանին իրացնելու նպատակով, չպարզված անձնավորությունից ապօրինաբար ձեռք է բերել և պահել խոշոր չափի` 5.155 գրամ «ափիոն» տեսակի թմրամիջոց և պրեկուրսոր հանդիսացող` 7մլ ծավալով «քացախաթթվի անհիդրիդ», որը նույն օրը, ժամը 0730-ի սահմաններում հայտնաբերվել է ՔԿ հիմնարկի աշխատակիցների կողմից կատարված Ա. Բարսեղյանի անձնական խուզարկության ընթացքում, որի հետևանքով ամբաստանյալ Ա. Խալաթյանը հանցագործությունն ավարտին չի հասցրել իր կամքից անկախ հանգամանքներով։
Վերը նշված հանցավոր արարքի կատարման համար Արսեն Համլետի Բարսեղյանին մեղադրանք է առաջադրվել ՀՀ քր. օր-ի 266 հոդվածի 2-րդ մասի 2-րդ և 3-րդ կետերով և 266 հոդվածի 4-րդ մասով, իսկ Արման Գևորգի Խալաթյանին` ՀՀ քր. օր-ի 34-268 հոդվածի 2-րդ մասի 2-րդ կետով և 34-266 հոդվածի 4-րդ մասով։
Դատաքննությամբ առաջադրված մեղադրանքում ամբաստանյալ Արսեն Բարսեղյանը իրեն մեղավոր ճանաչեց մասնակիորեն և ցուցմունք տվեց այն մասին, որ 2009թ. ապրիլի 25-ին, ժամը 0730-ի սահմաններում վարչական շենքի 1-ին հարկի միջանցքը մաքրելու ընթացքում հատակից գտել է «Մալբորո» տեսակի ծխախոտի տուփ, որը ամրացված է եղել կպչուն ժապավենով։ Տուփի մեջի պարունակության մասին տեղյակ չի եղել, մտածել է, որ փող կամ հեռախոս կարող է լինել, ուստի վերցրել է հետագայում պարզելու համար, սակայն մի քանի րոպե անց ՔԿ հիմնարկի աշխատակիցները անձնական խուզարկության են ենթարկել իրեն, որի ընթացքում տուփի միջից հայտնաբերվել է թմրանյութ։
Իրեն մեղավոր ճանաչեց միայն տուփը գտնելուց հետո այն ՔԿ հիմնարկի աշխատակիցներին չհաձնելու, այլ իր մոտ պահելու մեջ, իսկ այն, որ թմրանյութը պետք է հանձներ դատապարտյալ Արման Խալաթյանին, հայտնեց դատարանին, որ այն իրականությանը չի համապատասխանում, քանի որ Խալաթյանի հետ անձնական թշնամանք ունի և նախաքննության ընթացքում այդ մասին հայտնել է միայն նրան վատություն անելու նպատակով։
Դատաքննությամբ առաջադրված մեղադրանքում ամբաստանյալ Արման Խալաթյանը իրեն մեղավոր չճանաչեց և ցուցմունք տվեց այն մասին, որ դատապարտյալ Արսեն Բարսեղյանը իրենից պարտքով գումար է վերցրել և ժամանակին չի կարողացել վերադարձնել, որի շուրջ իրենց միջև վիճաբանություն է ծագել։ Այս դեպքի հետ կապված ինքը տեղյակ չէ, և երբ իրեն կանչել են հարցաքննության, մտածել է, որ այդ գումարի շուրջ ծագած վիճաբանության հետ է կապված, սակայն իրեն տեղեկացել են, որ Արսեն Բարսեղյանը իր դեմ ցուցմունք է տվել այն մասին, որ թմրանյութ պիտի փոխանցեր իրեն, որը իրականությանը չի համապատասխանում։
Ամբաստանյալներ Արսեն Բարսեղյանի և Արման Խալաթյանի պատճառաբանություններն անհիմն են ու մտածացին, որոնք նպատակ են հետապնդում խուսափելու քրեական պատասխանատվությունից և պատժից, իսկ նրանց կատարած արարքները հիմնավորվեց գործով ձեռք բերված հետևյալ ապացույցներով.
Վկա` Գեղամ Հարությունյանի ցուցմունքով այն մասին, որ 2009թ. ապրիլի 25-ին, ժամը 0730-ի սահմաններում ՔԿ հիմնարկի աշխատակիցներ Արմեն Առաքելյանի և Շահեն Միսկարյանի հետ իրականացրել են տնտեսատեխնիկական աշխատանքներում ներգրավված դատապարտյալ Արսեն Բարսեղյանի անձնական խուզարկությունը։ Խուզարկության ընթացքում վերջինիս մոտ հայտնաբերվել է «Մալբորո» տեսակի ծխախոտի տուփ, որի մեջ եղել է թմրամիջոցի նմանվող զանգված և սրվակի մեջ լցված հեղուկ։ Հայտնաբերվածի հետ կապված Ա. Բարսեղյանը հայտարարել է, որ այն իրեն փոխանցել է անծանոթ մի անձանովորություն` դատապարտյալ Արման Խալաթյանին հանձնելու համար։
Վկաներ` Շահեն Միսկարյանի և Արմեն Առաքելյանի նույնաբովանդակ ցուցմունքներով այն մասին, որ 2009թ. ապրիլի 25-ին, ժամը 0730-ի սահմաններում ՔԿ հիմնարկի աշխատակից Գեղամ Հարությունյանի հետ միասին իրականացրել են տնտեսատեխնիկական աշխատանքներում ներգրավված դատապարտյալ Արսեն Բարսեղյանի անձնական խուզարկությունը։ Խուզարկության ընթացքում վերջինիս մոտ հայտնաբերվել է «Մալբորո» տեսակի ծխախոտի տուփ, որի մեջ եղել է թմրամիջոցի նմանվող զանգված և սրվակի մեջ լցված հեղուկ։ Հայտնաբերվածի հետ կապված Ա. Բարսեղյանը հայտարարել է, որ այն իրեն փոխանցել է անծանոթ մի անձանովորություն` դատապարտյալ Արման Խալաթյանին հանձնելու համար։
Ամբաստանյալներ Արսեն Բարսեղյանի և Արման Խալաթյանի հանցանքը հիմնավորվեց նաև 2009թ. ապրիլի 25-ին Ա. Բարսեղյանի անձնական խուզարկությամբ հայտնաբերված և իրեղեն ապացույց ճանաչված խոշոր չափի` 5.155 գրամ «ափիոն» տեսակի թմրամիջոց և պրեկուրսոր հանդիսացող` 7մլ ծավալով քացախաթթվի անհիդրիդի առկայությամբ։
Դատաքիմիական փորձաքննության 2009թ. ապրիլի 27-ի թիվ 14260905 եզրակացությամբ, համաձայն որի փորձաքննությանը ներկայացված 5.155 գրամ մաքուր քաշով նյութը հանդիսանում է տնայնագործական եղանակով պատրաստված «ափիոն» տեսակի թմրամիջոց, իսկ 7մլ սուր հոտով թափանցիկ նյութը հանդիսանում է «քացախաթթվի անհիդրիդ» տեսակի պրեկուրսոր։
ՔԿ հիմնարկի աշխատակիցների կողմից ներկայացված և այլ փաստաթուղթ ճանաչված Ա. Խալաթյանի կողմից գրված ծածկագիր-նամակի առկայությամբ, որով վերջինս քրեական պատասխանատվությունից խուսափելու նպատակով Ա. Բարսեղյանին խնդրել է իր դեմ չվկայել։
Դատաձեռագրաբանական փորձաքննության 2009թ. հուլիսի 1-ի թիվ 20901 եզրակացությամբ, համաձայն որի ներկայացված ծածկագիր-նամակում ձեռագիր տեքստը կատարվել է Արման Խալաթյանի կողմից։
Ա. Բարսեղյանի անձնական խուզարկության արձանագրությամբ, խուզարկությամբ հայտնաբերված իրերի զննման, առգրավման և փաթեթավորման արձանագրությամբ, ինչպես նաև գործով ձեռք բերված այլ փաստական տվյալներով։
Այսպիսով դատարանը ապացուցված համարեց, որ ամբաստանյալ Արսեն Համլետի Բարսեղյանը կատարել է արարք, որը նախատեսված է ՀՀ քր. օր-ի 266 հոդվածի 2-րդ մասի 2-րդ և 3-րդ կետերով և 266 հոդվածի 4-րդ մասով, իսկ Արման Գևորգի Խալաթյանը` ՀՀ քր. օր-ի 34-268 հոդվածի 2-րդ մասի 2-րդ կետով և 34-266 հոդվածի 4-րդ մասով, որով և պետք է ենթարկվեն քրեական պատասխանատվության։
Պատիժ նշանակելիս դատարանը հաշվի է առնում արարքի հասարակական վտանգավորությունը, ամբաստանյալի ինքնությունը և գործի ողջ հանգամանքները։
Ամբաստանյալ Արսեն Բարսեղյանի պատասխանատվությունը և պատիժը ծանրացնող հանգամանք է դիտվում հանցանքը կատարելու առանձնապես վտանգավոր ռեցիդիվը։
Դատարանն ամբաստանյալի պատասխանատվությունը և պատիժը մեղմացնող հանգամանքներ չհայտնաբերեց։
Քննարկելով խափանման միջոցի հարցը, դատարանը գտնում է, որ ամբաստանյալ Ա. Բարսեղյանի նկատմամբ ընտրված կալանք խափանման միջոցը պետք է թողնել անփոփոխ։
Ամբաստանյալ Արման Խալաթյանի պատասխանատվությունը և պատիժը ծանրացնող հանգամանք է դիտվում հանցանքը կատարելու ռեցիդիվը։
Դատարանն ամբաստանյալի պատասխանատվությունը և պատիժը մեղմացնող հանգամանքներ չհայտնաբերեց։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված 5.155 գրամ քաշով «ափիոն» տեսակի թմրամիջոցը և 7մլ «քացախաթթվի անհիդրիդ» տեսակի պրեկուրսորը պետք է ոչնչացնել, իսկ քրեական գործին կցված և ապացույց ճանաչված այլ փաստաթուղթ հանդիսացող` ֆոլգայապատ 12.9X15.3սմ չափերի թղթի կտորը, որի վրա կապույտ ներկանյութով գրված է ձեռագիր-նամակ տեքստ` թողնել քրեական գործում։
Գեղարքունիքի մարզի առաջին ատյանի դատարանի 17.10.2006թ. դատավճռով Ա. Բարսեղյանը ՀՀ քր. օր-ի 177 հոդվածի 2-րդ մասի 4-րդ կետով, 67 հոդվածի կիրառմամբ դատապարտվել է ազատազրկման` 3 տարի ժամկետով, նոր հանցանքը կատարել է մինչև պատժի լրիվ կրումը, ուստի դատարանը գտնում է, որ նոր նշանակվող պատժին մասնակիորեն պետք է գումարել վերը նշված դատավճռով սահմանված և նրա կողմից պատժի չկրած մասը։
Երևանի Մալաթիա-Սեբաստիա համայնքի ընդհանուր իրավասության դատարանի 01.02.2008թ. դատավճռով Ա. Խալաթյանը ՀՀ քր. օր-ի 113 հոդվածի 2-րդ մասի 6-րդ կետով դատապարտվել է ազատազրկման` 4 տարի ժամկետով, նոր հանցանքը կատարել է մինչև պատժի լրիվ կրումը, ուստի դատարանը գտնում է, որ նոր նշանակվող պատժին մասնակիորեն պետք է գումարել վերը նշված դատավճռով սահմանված և նրա կողմից պատժի չկրած մասը։
Ղեկավարվելով ՀՀ քր. դատ. օր-ի 357-360 հոդվածներով, դատարանը

Վ Ճ Ռ Ե Ց

1. Արսեն Համլետի Բարսեղյանին մեղավոր ճանաչել ՀՀ քր. օր-ի 266 հոդվածի 2-րդ մասի 2-րդ և 3-րդ կետերով և 266 հոդվածի 4-րդ մասով։
ՀՀ քր. օր-ի 266 հոդվածի 2-րդ մասի 2-րդ և 3-րդ կետերով դատապարտել ազատազրկման` 5/հինգ/ տարի ժամկետով` առանց գույքի բռնագրավման։
ՀՀ քր. օր-ի 266 հոդվածի 4-րդ մասով դատապարտել տուգանքով` նվազագույն աշխատավարձի հարյուրապատիկի` 100.000/հարյուր հազար/ ՀՀ դրամի չափով։
ՀՀ քր. օր-ի 66 հոդվածի 3-րդ մասի համաձայն՝ պատիժները լրիվ գումարելու միջոցով, պատիժ նշանակել ազատազրկում՝ 5/հինգ/ տարի ժամկետով` առանց գույքի բռնագրավման և տուգանք` նվազագույն աշխատավարձի հարյուրապատիկի` 100.000/հարյուր հազար/ ՀՀ դրամի չափով։
ՀՀ քր. օր-ի 67 հոդվածի կիրառմամբ նոր նշանակված պատժի ժամկետին մասնակիորեն գումարել Գեղարքունիքի մարզի առաջին ատյանի դատարանի 17.10.2006թ. դատավճռով ազատազրկման ձևով նշանակված պատժի չկրած մասից` ազատազրկման 2/երկու/ ամիս ժամկետը և վերջնական պատիժ սահմանել ազատազրկում` 5/հինգ/ տարի 2/երկու/ ամիս ժամկետով` առանց գույքի բռնագրավման և տուգանք` նվազագույն աշխատավարձի հարյուրապատիկի` 100.000/հարյուր հազար/ ՀՀ դրամի չափով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել 21.05.2009թ.։
Կալանք խափանման միջոցը թողնել անփոփոխ մինչև դատավճռի օրինական ուժի մեջ մտնելը։
2. Արման Գևորգի Խալաթյանին մեղավոր ճանաչել ՀՀ քր. օր-ի 34-268 հոդվածի 2-րդ մասի 2-րդ կետով և 34-266 հոդվածի 4-րդ մասով։
ՀՀ քր. օր-ի 34-268 հոդվածի 2-րդ մասի 2-րդ կետով դատապարտել ազատազրկման` 1/մեկ/ տարին 6/վեց/ ամիս ժամկետով։
ՀՀ քր. օր-ի 34-266 հոդվածի 4-րդ մասով դատապարտել տուգանքով` նվազագույն աշխատավարձի հարյուրապատիկի` 100.000/հարյուր հազար/ ՀՀ դրամի չափով։
ՀՀ քր. օր-ի 66 հոդվածի 3-րդ մասի համաձայն՝ պատիժները լրիվ գումարելու միջոցով, պատիժ նշանակել ազատազրկում՝ 1/մեկ/ տարի 6/վեց/ ամիս ժամկետով և տուգանք` նվազագույն աշխատավարձի հարյուրապատիկի` 100.000/հարյուր հազար/ ՀՀ դրամի չափով։
ՀՀ քր. օր-ի 67 հոդվածի կիրառմամբ նոր նշանակված պատժի ժամկետին մասնակիորեն գումարել Երևանի Մալաթիա-Սեբաստիա համայնքի ընդհանուր իրավասության դատարանի 01.02.2008թ. դատավճռով ազատազրկման ձևով նշանակված պատժի չկրած մասից` ազատազրկման 1/մեկ/ տարի 6/վեց/ ամիս ժամկետը և վերջնական պատիժ սահմանել ազատազրկում` 3/երեք/ տարի ժամկետով և տուգանք` նվազագույն աշխատավարձի հարյուրապատիկի` 100.000/հարյուր հազար/ ՀՀ դրամի չափով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը հաշվել դատավճռի հրապարակման օրվանից` 16.09.2009թ.։
Գործով իրեղեն ապացույց ճանաչված 5.155 գրամ քաշով «ափիոն» տեսակի թմրամիջոցը և 7մլ «քացախաթթվի անհիդրիդ» տեսակի պրեկուրսորը դատավճիռն օրինական ուժի մեջ մտնելուց հետո ոչնչացնել, իսկ քրեական գործին կցված և ապացույց ճանաչված այլ փաստաթուղթ հանդիսացող` ֆոլգայապատ 12.9X15.3սմ չափերի թղթի կտորը, որի վրա կապույտ ներկանյութով գրված է ձեռագիր-նամակ տեքստ` թողնել քրեական գործում։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ