ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆ


Երևանի Էրեբունի և Նուբարաշեն Քրեական գործ ԵԷԴ/0083/01/09
համայնքների ընդհանուր իրավասության
առաջին ատյանի դատարանի
դատավճիռը կայացրած դատարանի
կազմը նախագահող դատավոր Ա.Գաբրիելյան


Ո Ր Ո Շ ՈՒ Մ

ՀԱՆՈՒՆ ՀԱՅԱՍՏԱՆԻ ՀԱՆԱՊԵՏՈՒԹՅԱՆ


25 նոյեմբերի 2009 թվական ք.Երևան


ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ
ԴԱՏԱՐԱՆԸ /ԱՅՍՈՒՀԵՏ` ՎԵՐԱՔՆՆԻՉ ԴԱՏԱՐԱՆ/ ՀԵՏԵՎՅԱԼ ԿԱԶՄՈՎ`


նախագահող դատավոր` Հ.ՏԵՐ-ԱԴԱՄՅԱՆ
դատավորներ` Ժ.ՀՈՎՍԵՓՅԱՆ
Ռ.ԱԶԱՐՅԱՆ

քարտուղարությամբ` Լ.ՂԱԶԱՐՅԱՆԻ
Ա.ՓԱՇԻԿՅԱՆԻ
Ն.ՊՈՂՈՍՅԱՆԻ

մասնակցությամբ`
մեղադրող` Ռ.ԷԼԻԶԲԱՐՅԱՆԻ
պաշտպան` Հ.ԲԱՂԴԱՍԱՐՅԱՆԻ

դռնբաց դատական նիստում ամբաստանյալի վերաքննիչ բողոքի հիման վրա, վերաքննության կարգով, քննության առնելով քրեական գործն ըստ մեղադրանքի`
Դրաստամատ Վազգենի Շահբազյանի`
ծնված 1985 թվականի օգոստոսի 26-ին Երևան քաղաքում, ազգությամբ` հայ, ՀՀ քաղաքացի, ամուսնացած, խնամքին մեկ երեխա, ՀՀ ՊՆ թիվ 54574 զորամասի ժամկետային զինծառայող, շարքային, միջնակարգ կրթությամբ, դատված` Սյունիքի մարզի առաջին ատյանի դատարանի 25.12.2007թ. դատավճռով ՀՀ քրեական օրենսգրքի 361-րդ հոդվածի 4-րդ մասով դատապարտվել է ազատազրկման 2 /երկու/ տարի ժամկետով, Արագածոտնի մարզի ընդհանուր իրավաության առաջին ատյանի դատարանի 2008 թվականի հուլիսի 18-ի որոշմամբ ՀՀ քրեական օրենսգրքի 76-րդ հոդվածի հիման վրա պայմանական վաղաժամկետ ազատվել է նշանակված 2 /երկու/ տարի ժամկետով ազատազրկման պատժի չկրած 1 /մեկ/ տարի 2 /երկու/ ամիս 28 /քսանութ/ օրվա կրումից: ՀՀ ԱՆ ՔԿՎ այլընտրանքային պատիժների կատարման բաժնի Արմավիրի բաժանմունքի պետի 21.08.2009թ. որոշմամբ, ՀՀ Ազգային Ժողովի <<Համաներում հայտարարելու մասին>> 19.06.2009թ. որոշման 6-րդ կետով և 12-րդ կետի 5-րդ ենթակետով, նրա նկատմամբ իրականացվող հետագա վերահսկողությունը դադարեցվել է, բնակվել է ք.Արմավիր, Հայրենյաց փողոց 45 տանը, նախնական կալանքի տակ է 2009 թվականի հուլիսի 04-ից:

Մեղադրանք է առաջադրվել ՀՀ քրեական օրենսգրքի 362-րդ հոդվածի 1-ին մասով նախատեսված հանցանքի կատարման համար, և վերանայելով դատական ակտը,

Պ Ա Ր Զ Ե Ց
ԳՈՐԾԻ ԴԱՏԱՎԱՐԱԿԱՆ ՆԱԽԱՊԱՏՄՈՒԹՅՈՒՆԸ

1. ՀՀ ՊՆ քննչական վարչության Երևանի կայազորի քննչական բաժնի քննիչ Գ.Հակոբյանի 2009 թվականի մայիսի 13-ի որոշմամբ հարուցվել է թիվ 90256009 քրեական գործը ՀՀ քրեական օրենսգրքի 362-րդ հոդվածի 1-ին մասով:

2. Նախաքննության մարմնի 2009 թվականի մայիսի 19-ի որոշմամբ Դրաստամատ Վազգենի Շահբազյանը որպես մեղադրյալ է ներգրավվել և նրան մեղադրանք է առաջադրվել ՀՀ քրեական օրենսգրքի 362-րդ հոդվածի 1-ին մասով:

3. 19.05.2009թ. քննիչ Գ.Հակոբյանը միջնորդություն է ներկայացրել Երևանի Արաբկիր և Քանաքեռ-Զեյթուն համայնքների ընդհանուր իրավասության դատարան` թիվ 90256009 քրեական գործով մեղադրյալ Դրաստամատ Վազգենի Շահբազյանի նկատմամբ կալանավորումը որպես խափանման միջոց 2 /երկու/ ամիս ժամանակով ընտրելու մասին, որը դատարանի 21.05.2009թ. որոշմամբ բավարարվել է:

4. 2009 թվականի մայիսի 21-ի որոշմամբ Դրաստամատ Վազգենի Շահբազյանի նկատմամբ հայտարարվել է հետախուզում:

5. 2009 թվականի հուլիսի 06-ին Դրաստամատ Վազգենի Շահբազյանը հայտնաբերվել և բերման է ենթարկվել Արմավիրի ՌՈԲ:

6. 2009 թվականի հուլիսի 13-ին թիվ 90256009 քրեական գործն ըստ մեղադրանքի Դրաստամատ Վազգենի Շահբազյանի ` ՀՀ քրեական օրենսգրքի 362-րդ հոդվածի 1-ին մասով, մեղադրական եզրակացությամբ ուղարկվել է Երևանի Էրեբունի և Նուբարաշեն համայնքների ընդհանուր իրավասության առաջին ատյանի դատարան /այսուհետ` առաջին ատյանի դատարան/:

7. Առաջին ատյանի դատարանի 03.09.2009թ. դատավճռով Դրաստամատ Վազգենի Շահբազյանը մեղավոր է ճանաչվել ՀՀ քրեական օրենսգրքի 362-րդ հոդվածի 1-ին մասով և դատապարտվել ազատազրկման 3 /երեք/ տարի 6 /վեց/ ամիս ժամկետով:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Պատժի սկիզբը հաշվվել է 2009 թվականի հուլիսի 04-ից:
Որպես խափանման միջոց ընտրված կալանքը թողնվել է անփոփոխ` մինչև դատավճռի օրինական ուժի մեջ մտնելը:

8. Առաջին ատյանի դատարանի 03.09.2009թ. դատավճռի դեմ վերաքննիչ բողոք է բերել ամբաստանյալ Դրաստամատ Շահբազյանը:

9. Վերաքննիչ բողոքի կապակցությամբ գրավոր պատասխան չի ներկայացվել:

10. Վերաքննիչ դատարանն իր 2009 թվականի հոկտեմբերի 19-ի որոշմամբ վերաքննիչ բողոքն ընդունել է վարույթ և քրեական գործն ըստ մեղադրանքի Դրաստամատ Վազգենի Շահբազյանի ` ՀՀ քրեական օրենսգրքի 362-րդ հոդվածի 1-ին մասով, նշանակել է վերաքննիչ դատարանի դռնբաց դատական նիստում քննության 2009 թվականի նոյեմբերի 06-ին, ժամը` 12.30-ին, Երևան քաղաքում:


ԳՈՐԾԻ ՓԱՍՏԱԿԱՆ ՀԱՆԳԱՄԱՆՔՆԵՐԸ

11. Ամբաստանյալ Դրաստամատ Շահբազյանը, 2003 թվականի նոյեմբեր ամսին Մասիսի զինկոմիսարիատի կողմից զորակոչվել է ՀՀ ԶՈւ և ծառայության նշանակվել ԼՂՀ ՊԲ թիվ 38401 զորամասում` որպես կրտսեր սերժանտ։ 10.07.2004թ. ինքնակամ թողել է զորամասի տարածքը և այլևս ծառայության վայր չի ներկայացել։ Հարուցված քրեական գործով հայտարարվել է հետախուզում։ Դ. Շահբազյանը հայտնաբերվելուց հետո, Սյունիքի մարզի առաջին ատյանի դատարանի 25.12.2007թ. դատավճռով ՀՀ քրեական օրենսգրքի 361-րդ հոդվածի 4-րդ մասով դատապարտվել է ազատազրկման` 2 տարի ժամկետով։ 9 ամիս 2 օր պատիժը կրելուց հետո, 18.07.2008թ. պայմանական վաղաժամկետ ազատվել է և 29.12.2008թ. հետագա ծառայությունը շարունակելու համար տեղափոխվել է ՀՀ ՊՆ թիվ 54574 զորամաս։
16.04.2009թ., ժամը 16:00-ի սահմաններում Դրաստամատ Վազգենի Շահբազյանը ծառայությունից վերջնականապես խուսափելու նպատակով ինքնակամ թողել է զորամասի տարածքը և այլևս չի վերադարձել։


ՎԵՐԱՔՆՆԻՉ ԲՈՂՈՔԻ ՀԻՄՔԵՐԸ, ՀԻՄՆԱՎՈՐՈՒՄՆԵՐԸ, ՊԱՀԱՆՋԸ


Ամբաստանյալ Դ.Շահբազյանի վերաքննիչ բողոքը քննվում է հետևյալ հիմքերի սահմաններում` ներքոհիշյալ հիմնավորումներով.

12. Ամբաստանյալ Դ.Շահբազյանը պատճառաբանելով, որ ինքնակամ թողել է զորամասի տարածքը ոչ թե ծառայությունից վերջնականապես խուսափելու, այլ` ընտանեկան խնդիրները լուծելու և կրկին ծառայության վերադառնալու նպատակով, խնդրել է` իր փաստացի կատարած գործողություններին տալ ճիշտ քրեաիրավական գնահատական և ՀՀ քրեական օրենսգրքի 61-րդ հոդվածի պահանջների պահպանմամբ իր նկատմամբ նշանակել արդարացի պատիժ:


ՎԵՐԱՔՆՆԻՉ ԴԱՏԱՐԱՆԻ ՊԱՏՃԱՌԱԲԱՆՈՒԹՅՈՒՆՆԵՐՆ ՈՒ ԵԶՐԱՀԱՆԳՈՒՄԸ:


13. Վերաքննիչ դատարանում դատաքննության ժամանակ պաշտպանական կողմը պատճառաբանելով, որ ամբաստանյալ Դ.Շահբազյանը ծառայությունից վերջնականապես խուսափելու նպատակ չի ունեցել, խնդրեց` Դ.Շահբազյանին ՀՀ քրեական օրենսգրքի 362-րդ հոդվածի 1-ին մասով մեղսագրված արարքը վերաորակել ՀՀ քրեական օրենսգրքի 361-րդ հոդվածի 4-րդ մասի և հաշվի առնել ամբաստանյալի ինքնությունը նրա կողմից կատարված կատարված արարքի բնույթն ու հասարակական վտանգավորության աստիճանը, պատասխանատվությունը և պատիժը մեղմացնող հանգամանքները, պատիժ նշանակելու ընդհանուր սկզբունքները` նրա նկատմամբ նշանակելով արդարացի պատիժ:

14. Մեղադրողն առարկեց վերաքննիչ բողոքի դեմ և պատճառաբանելով, որ ՀՀ քրեական օրենսգրքի 362-րդ հոդվածի 1-ին մասով նախատեսված հանցավոր արարքը կատարելու մեջ ամբաստանյալ Դ.Շահբազյանի մեղավորության վերաբերյալ առաջին ատյանի դատարանի հետևությունները հիմնավորված և պատճառաբանված են, որ ՀՀ քրեական օրենսգրքի 61-րդ հոդվածի պահանջների պահպանմամբ նրա նկատմամբ նշանակել է արդարացի պատիժ, խնդրեց` Դ.Շահբազյանի վերաբերյալ ՀՀ քրեական օրենսգրքի 362-րդ հոդվածի 1-ին մասով Երևանի Էրեբունի և Նուբարաշեն համայնքների ընդհանուր իրավասության առաջին ատյանի դատարանի 03.09.2009թ. դատավճիռը թողնել անփոփոխ, իսկ վերաքննիչ բողոքն` առանց բավարարման:

15. Վերաքննիչ դատարանը քննության առնելով ամբաստանյալի վերաքննիչ բողոքը` բողոքի հիմքերի և հիմնավորումների սահմաններում, լսելով բողոքում ներկայացված հետևությունները հիմնավորելու մասին ամբաստանյալ Դրաստամատ Շահբազյանի և պաշտպանի ելույթը, դատական ակտը չբողոքարկած հակառակ կողմի` մեղադրող Ռ.Էլիզբարյանի պատասխանը, ուսումնասիրելով և վերլուծելով գործի նյութերը, դրանք գնահատելով իրենց համակցությամբ, հանգում է այն հետևության, որ վերաքննիչ բողոքը պետք է մերժել` առաջին ատյանի դատարանի 2009 թվականի սեպտեմբերի 03-ի դատավճիռը թողնելով օրինական ուժի մեջ` հետևյալ պատճառաբանությամբ.

ՀՀ քրեական օրենսգրքի 362-րդ հոդվածի 1-ին մասով առաջադրված մեղադրանքի հիմնավորվածությունը

16. Առաջին ատյանի դատարանը, կատարելով ապացույցների բազմակողմանի, լրիվ և օբյեկտիվ հետազոտություն և համաձայն ՀՀ քրեական դատավարության օրենսգրքի 127-րդ հոդվածի պահանջի` յուրաքանչյուր ապացույց գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, հանգել է հետևության, որ Դ.Շահբազյանին ՀՀ քրեական օրենսգրքի 362-րդ հոդվածի 1-ին մասով առաջադրված մեղադրանքը հաստատված է դատաքննության ժամանակ հետազոտված ապացույցներով:

17. Վերաքննիչ դատարանը, ելնելով դատավճռի օրինականությունը և հիմնավորվածությունը պատշաճ կերպով ստուգելու անհրաժեշտությունից, ձեռք բերված ապացույցները համադրելով գործի մյուս հավաստի և փոխկապակցված տվյալների հետ, գնահատելով դրանք` իրենց համակցությամբ, հանգում է այն հետևության, որ ամբաստանյալի վերաքննիչ բողոքում նշված փաստարկները հերքված են, իսկ վերջինիս մեղսագրված հանցանքը հիմնավորվում է գործով ձեռք բերված և դատավճռում շարադրված բավարար ապացույցներով:

18. Ամբաստանյալ Դ.Շահբազյանի հանցանքը հիմնավորվում է ինչպես դատաքննության ընթացքում տված իր ինքնախոստովանական ցուցմունքներով, այնպես էլ վկաներ Մամիկոն Միրզոյանի, Պատվական Սարգսյանի, Սամվել Պարգևյանի, Ինա Գալուստովայի, Անժելա Մելքոնյանի տված ցուցմունքներով:

19. Առաջին ատյանի դատարանում, դատաքննության ընթացքում ամբաստանյալ Դրաստամատ Շահբազյանը ցուցմունք է տվել այն մասին, որ հանդիսացել է ՀՀ ՊՆ թիվ 54574 զորամասի ժամկետային զինծառայող։ 16.04.2009թ. իրեն զանգահարել է կինը և հայտնել, որ ընտանիքում անախորժություններ են ծագել։ Նույն օրը, առանց սպայական կազմին տեղյակ պահելու, ինքնակամ թողել է զորամասի տարածքը և գնացել տուն։ Տեսնելով, որ ծնողները կնոջը և երեխային թողել են տանը, իսկ իրենք գնացել են Երևան քաղաք, այևս չի վերադարձել զորամաս և զբաղվել է բանվորությամբ, որպեսզի ստացած գումարներով պահի ընտանիքը։ 05.07.2009թ. Արմավիր քաղաքում ՌՈ բաժնի աշխատակիցների կողմից հայտնաբերվել և կալանավորվել է։

20. Վկաներ` Մամիկոն Միրզոյանը, Պատվական Սարգսյանը և Սամվել Պարգևյանը նույնաբովանդակ ցուցմունքներ են տվել այն մասին, որ Դրաստամատ Շահբազյանի հետ միասին ծառայել են ՀՀ ՊՆ թիվ 54574 զորամասում։ Ծառայության ընթացքում Դ. Շահբազյանը մի քանի անգամ ինքնակամ բացակայել է զորամասից։ Վերջին անգամ, 16.04.2009թ. ինքնակամ թողել է զորամասի տարածքը և ծառայության վայր չի ներկայացել:

21. Վկա` Ինա Գալուստովան ցուցմունք է տվել այն մասին, որ հանդիսանում է Դրաստամատ Շահբազյանի կինը։ Դ. Շահբազյանի կողմից զորամասը ինքնակամ թողնելու պատճառ է հանդիսացել այն, որ իրենց ընտանիքում անախորժություններ են ծագել, որից հետո ամուսնու ծնողները իրեն և երեխային թողել են տանը և գնացել Երևան քաղաք։ 16.04.2009թ. Դ.Շահբազյանը իրենից տեղեկանալով այդ մասին, ինքնակամ թողել է զորամասի տարածքը և վերադարձել տուն։

22. Վկա` Անժելա Մելքոնյանը ցուցմունք է տվել այն մասին, որ ընտանիքում ծագած վիճաբանությունների պատճառով իրենք ընտանիքով տեղափոխվել են Երևան քաղաք, իսկ Դ. Շահբազյանի կնոջը և երեխային թողել են տանը։ Դրանից հետո, ինքը Դ. Շահբազյանին չի տեսել, իսկ հետագայում Ինա Գալուստովայից տեղեկացել է, որ իր որդին գտնվում է հետախուզման մեջ, սակայն աշխատում է և վաստակած գումարներով պահում է ընտանիքը։

23. Ամբաստանյալ Դ.Շահբազյանը մեղավորությունը ՀՀ քրեական օրենսգրքի 362-րդ հոդվածի 1-ին մասով նախատեսված հանցավոր արարքը կատարելու մեջ հիմնավորված է նաև ՀՀ ՊՆ թիվ 54574 զորամասի հրամանատարի հրամաններով, երեկոյան անվանականչի մատյանի քաղվածքով, զեկուցագրերով, հեռախոսագրերով, տեղեկանքներով, Դ.Շահբազյանին բերման ենթարկելու մասին արձանագրությամբ:

24. Այսպիսով, վերաքննիչ դատարանը նույնպես հանգում է այն հետևության, որ առաջին ատյանի դատարանում դատաքննության ընթացքում հետազոտված փաստական տվյալներով, որոնք նշված են 03.09.2009թ. դատավճռում, ապացուցված է այն արարքը, որի կատարման մեջ մեղադրվում է ամբաստանյալ Դ.Շահբազյանը և այդ արարքը համապատասխանում է ՀՀ քրեական օրենսգրքի Հատուկ մասի նորմերի հատկանիշներին, և որ ապացուցված է ամբաստանյալի կողմից այդ արարքը կատարելը:

25. Ապացուցված է նաև ամբաստանյալ Դ.Շահբազյանի մեղավորությունը նշված հանցանքը կատարելու մեջ և այդ հանցանքը համապատասխանում է ՀՀ քրեական օրենսգրքի 362-րդ հոդվածի 1-ին մասի հատկանիշներին:

26. Առաջին ատյանի դատարանը Դրաստամատ Շահբազյանի նկատմամբ պատիժ նշանակելիս հաշվի է առել նրա կատարած արարքի հասարակական վտանգավորության աստիճանը, ամբաստանյալի անձը բնութագրող տվյալները և գործի ողջ հանգամանքները:

27. Դատարանն ամբաստանյալ Դ.Շահբազյանի պատասխանատվությունը և պատիժը մեղմացնող հանգամանք դիտել է այն, որ վերջինս երիտասարդ է, խնամքին ունի մինչև տասնչորս տարեկան մեկ երեխա, զղջացել է կատարած արարքի համար և ընդունել է մեղքը:

28. Դատարանն ամբաստանյալ Դ.Շահբազյանի պատասխանատվությունը և պատիժը ծանրացնող հանգամանք դիտել է հանցանքը կատարելու ռեցիդիվը:

29. Վերաքննիչ դատարանը վերլուծության ենթարկելով և գնահատելով առաջին ատյանի դատարանում հետազոտված ապացույցները հանգում է այն հետևության, որ Երևանի Էրեբունի և Նուբարաշեն համայնքների ընդհանուր իրավասության առաջին ատյանի դատարանը, պահպանելով ՀՀ քրեական օրենսգրքի պատիժ նշանակելու ընդհանուր սկզբունքները, լիարժեք վերլուծության ենթարկելով գործում առկա փաստական հանգամանքները, ամբաստանյալ Դրաստամատ Շահբազյանի նկատմամբ նշանակել է պատիժ ազատազրկման ձևով` 3 /երեք/ տարի 6 /վեց/ ամիս ժամկետով, որը համապատասխանում է կատարված հանցագործության ծանրությանը և ամբաստանյալի անձին, և որ վերաքննիչ բողոքում ու գործում չկան հանգամանքներ, որոնք կարող են հիմք դառնալ ամբաստանյալ Դ.Շահբազյանի վերաբերյալ դատավճիռը բեկանելու և նրան առաջադրված մեղադրանքը վերաորակելու համար:

30. Այսպիսով, վերաքննիչ դատարանը վերոշարադրյալ հիմքով առաջին ատյանի դատարանի 03.09.2009թ. դատավճիռը համարում է օրինական, հիմնավորված և պատճառաբանված, իսկ վերաքննիչ բողոքում բերված եզրահանգումներն` անհիմն:
Ուստի վերոհիշյալ դատավճիռը պետք է թողնել օրինական ուժի մեջ:

Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-րդ հոդվածով, 394-րդ հոդվածի 1-ին մասի 1-ին կետով, 402-րդ հոդվածով, ՀՀ վերաքննիչ քրեական դատարանը

à ð à Þ º ò

1. Վերաքննիչ բողոքը մերժել:

2. Երևանի Էրեբունի և Նուբարաշեն համայնքների ընդհանուր իրավասության առաջին ատյանի դատարանի 2009 թվականի սեպտեմբերի 03-ի դատավճիռը` Դրաստամատ Վազգենի Շահբազյանի վերաբերյալ ՀՀ քրեական օրենսգրքի 362-րդ հոդվածի 1-ին մասով, թողնել օրինական ուժի մեջ:

3. Սույն որոշումն օրինական ուժի մեջ է մտնում հրապարակման պահից` մեկամսյա ժամկետում:

4. Սույն որոշումը կարող է բողոքարկվել ՀՀ Վճռաբեկ դատարան հրապարակման պահից` մեկամսյա ժամկետում:


ՆԱԽԱԳԱՀՈՂ ԴԱՏԱՎՈՐ` Հ.ՏԵՐ-ԱԴԱՄՅԱՆ

ԴԱՏԱՎՈՐՆԵՐ` Ժ.ՀՈՎՍԵՓՅԱՆ

Ռ.ԱԶԱՐՅԱՆ