Ո Ր Ո Շ ՈՒ Մ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Գործ ԵԷԴ/0070/01/09
08 հուլիսի 2011թ. ք.Երևան
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ`
ՆԱԽԱԳԱՀՈՂ ԴԱՏԱՎՈՐ` Մ.ՊԵՏՐՈՍՅԱՆ
ԴԱՏԱՎՈՐՆԵՐ` Գ. ՄԵԼԻՔ-ՍԱՐԳՍՅԱՆ
Ս. ՀԱՄԲԱՐՁՈՒՄՅԱՆ
ՔԱՐՏՈՒՂԱՐՈՒԹՅԱՄԲ` Ռ. ԴԱՎՈՅԱՆՒ

ՄԱՍՆԱԿՑՈՒԹՅԱՄԲ`
ՄԵՂԱԴՐՈՂ` Զ.ՍՏԵՓԱՆՅԱՆՒ

Դռնբաց դատական նիստում քննելով դատապարտյալ Բենյամին Պավլիկի Մարտիրոսովի վերաքննիչ բողոքը` քրեական գործով ըստ մեղադրանքի Բենյամին Պավլիկի Մարտիրոսովի` ՀՀ քրեական օրենսգրքի 34-268 հոդվածի 2-րդ մասի 2-րդ կետով և 34-268 հոդվածի 3-րդ մասով, Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի /այսուհետ դատարան/ 16.06.2011թ. որոշման դեմ.

Պ Ա Ր Զ Ե Ց
1/. Գործի դատավարական նախապատմությունը և փաստական հանգամանքները.
Ամբաստանյալ Բենյամին Պավլիկի Մարտիրոսովին մեղադրանք է առաջադրվել ՀՀ քրեական օրենսգրքի 34-268 հոդվածի 2-րդ մասի 1-ին և 2-րդ կետերով և 34-268 հոդվածի 3-րդ մասով և նա դատապարտվել է այն բանի համար, որ գտնվելով ՀՀ ԱՆ <<Նուբարաշեն>> քրեակատարողական հիմնարկի հիվանդանոցային համար մեկ խցում, առանց իրացնելու նպատակի թմրամիջոցներ ապօրինի ձեռք բերելու և գործածելու համար 2009թ. մարտի 1-ին, ժամը 21:00-ի սահմաններում, իր մոտ ապօրինի պահվող 077-70-31-31 հեռախոսահամարից զանգահարել է քրոջ որդի` Օնիկ Մարտիրոսյանի 093-70-86-66 հեռախոսահամարին և առաջարկել է Երևանի Հարավ-Արևմտյան թաղամասում` նախկին <<Առյուծ արքա>> կոչվող սրճարանի մոտ հանդիպել ինքնությունը չպարզված անձնավորությանը, նրանից վերցնել ծխախոտատուփ և մարտի 2-ին <<Նուբարաշեն>> քրեակատարողական հիմնարկում իր մոտ կարճատև տեսակցության ժամանակ փոխանցել իրեն:
Օ.Մարտիրոսյանը, չմերժելով առաջարկը, տեղեկացված չլինելով թմրամիջոցների ապօրինի շրջանառության մասին, 2009թ. մարտի 1-ին Բ.Մարտիրոսովի նշած վայրում հանդիպել է գործով չպարզված անձնավորությանը, որը նրան է փոխանցել թմրամիջոցներով լցված և մեկուսիչ ժապավենով փաթեթավորված ծխախոտատուփը։
2009թ. մարտի 2-ին Օ. Մարտիրոսյանը չի կարողացել տեսակցության գնալ քեռու մոտ <<Նուբարաշեն>> քրեակատարողական հիմնարկ, որի մասին հայտնել է նրան։
Նույն օրը, Բ. Մարտիրոսովը, ապօրինի թմրանյութեր ձեռք բերելու նպատակով տեսակցության պատրվակի տակ, այս անգամ հրավիրել է իր ծանոթ Օֆելյա Տիգրանի Մուրադյանին, որին քրեակատարողական հիմնարկ պետք է տեղափոխեր համագյուղացի` տաքսու վարորդ Ռաֆայել Աղասյանը: Բ.Մարտիրոսովը Օ.Մարտիրոսյանի հետ հեռախոսազրույցի ժամանակ հանձնարարել է նշված ծխախոտատուփը փոխանցել Ռ.Աղասյանին, վերջինիս միջոցով թմրանյութը ձեռք բերելու համար։
Ռ.Աղասյանը, տեղյակ չլինելով մեկուսիչ ժապավենով փաթեթավորված ծխախոտատուփում թմրամիջոցների առկայության մասին, Բ. Մարտիրոսովին տեսակցելու և ծխախոտատուփը նրան փոխանցելու նպատակով 2009թ. մարտի 2-ին, ժամը 11:25-ի սահմաններում գնացել է <<Նուբարաշեն>> քրեակատարողական հիմնարկ, որտեղ մինչ տեսակցություն տրամադրելը քրեակատարողական հիմնարկի աշխատակիցների կողմից ենթարկվել է անձնական խուզարկության, որի ժամանակ նրա մոտ հայտնաբերվել և առգրավվել է ծխախոտատուփը` առանձնապես խոշոր չափի` 10.010 գրամ <<ափիոն>> և խոշոր չափի` 11.26 գրամ <<մարիխուանա>> տեսակի թմրամիջոցներով, ինչի հետևանքով Բ.Մարտիրոսովը իրենից անկախ հանգամանքներով չի կարողացել ձեռք բերել թմրամիջոցները:
Դատաքննությունն անց է կացվել արագացված կարգի կիրառմամբ:
Վերը նշված հանցագործության համար Երևան քաղաքի Էրեբունի և Նուբարաշեն համայնքների ընդհանուր իրավասության դատարանի 11.09.2009 թվականի դատավճռով ամբաստանյալ Բենյամին Պավլիկի Մարտիրոսովը մեղավոր է ճանաչվել ՀՀ քրեական օրենսգրքի 34-268 հոդվածի 2-րդ մասի 1-ին և 2-րդ կետերով և 34-268 հոդվածի 3-րդ մասով և ՀՀ քրեական օրենսգրքի 34-268-րդ հոդվածի 2-րդ մասի 1-ին և 2-րդ կետերով դատապարտվել ազատազրկման` 1/մեկ/ տարի ժամկետով, ՀՀ քրեական օրենսգրքի 34-268-րդ հոդվածի 3-րդ մասով` ազատազրկման` 2/երկու/ տարի ժամկետով:
ՀՀ քրեական օրենսգրքի 66-րդ հոդվածի 3-րդ մասի համաձայն` պատիժները մասնակիորեն գումարելու միջոցով, պատիժ է նշանակվել ազատազրկում` 2/երկու/ տարի 6/վեց/ ամիս ժամկետով:
ՀՀ քրեական օրենսգրքի 67-րդ հոդվածի կիրառմամբ նոր նշանակված պատժի ժամկետին մասնակիորեն գումարվել է Երևանի Կենտրոն և Նորք-Մարաշ համայնքների առաջին ատյանի դատարանի 11.06.2004թ. դատավճռով ազատազրկման ձևով նշանակված պատժի չկրած մասից` ազատազրկման 6/վեց/ ամիս ժամկետը և վերջնական պատիժ է սահմանվել ազատազրկում` 3/երեք/ տարի ժամկետով, որը պետք է կրի ՀՀ ԱՆ համապատասխան քրեակատարողական հիմնարկում` պատժի սկիզբը հաշվելով 01.06.2009թ.-ից:
Մինչև դատավճռի օրինական ուժի մեջ մտնելը` խափանման միջոց կալանքը թողնվել է անփոփոխ:
Վճռվել է գործով իրեղեն ապացույց ճանաչված <<Դանհիլ Գոլդ>> տեսակի ծխախոտատուփը, կապույտ գույնի կպչուն ժապավենը, առանձնապես խոշոր չափի` 10.010 գրամ <<ափիոն>> տեսակի և խոշոր չափի` 11.26 գրամ <<մարիխուանա>> տեսակի թմրամիջոցները դատավճիռն օրինական ուժի մեջ մտնելուց հետո ոչնչացնել, իսկ քրեական գործին կցված և ապացույց ճանաչված այլ փաստաթուղթ հանդիսացող` 02.03.2009թ. Բենյամին Պավլիկի Մարտիրոսովից բացատրություն վերցնելու մասին արձանագրությունը` թողնել քրեական գործում:
ՀՀ ԱՆ <<Գորիս>> քրեակատարողական հիմնարկի դատապարտյալ Բենյամին Մարտիրոսովը 03.06.2011թ. դիմել է դատարան և խնդրել է <<ՀՀ քրեական օրենսգրքում փոփոխություններ և լրացումներ կատարելու մասին>> 23.05.2011թ. օրենքի հիման վրա վերանայել իր նկատմամբ կայացրած դատավճիռը:
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 16.06.2011թ.-ի` դատավճիռը վերանայելու մասին որոշմամբ Բենյամին Պավլիկի Մարտիրոսովի նկատմամբ Երևան քաղաքի Էրեբունի և Նուբարաշեն համայնքների ընդհանուր իրավասության դատարանի 11.09.2011թ. ԵԷԴ/0070/01/09 դատավճռով ՀՀ քրեական օրենսգրքի 34-268-րդ հոդվածի 2-րդ մասի 1-ին և 2-րդ կետերով արարքը համապատասխանեցվել է ՀՀ քրեական օրենսգրքի 34-268-րդ հոդվածի 2-րդ մասի 2-րդ կետին և պատիժը թողնվել է անփոփոխ` ազատազրկում 1/մեկ/ տարի ժամկետով:
Դատավճիռը մնացած մասով թողնվել է անփոփոխ:

2/. Վերաքննիչ բողոքի հիմքերը, փաստարկները և պահանջը.
Վերոհիշյալ 16.06.2011թ. որոշման դեմ վերաքննիչ բողոք է բերել դատապարտյալ Բենյամին Մարտիրոսովը` հետևյալ հիմքերի սահմաններում, ներքոհիշյալ հիմնավորումներով.
Բողոքաբերը հայտնել է, որ դատավճռով պատիժ նշանակելիս դատարանը հաշվի է առել, որ առկա է ՀՀ քրեական օրենսգրքի 268-րդ հոդվածի 2-րդ մասով նախատեսված երկու որակական հատկանիշ` արարքի կրկնակիության և խոշոր չափերով և պատիժ է նշանակել ազատազրկում 1/մեկ/ տարի ժամկետով:
Քանի որ ՀՀ քրեական օրենսգրքի 268-րդ հոդվածի 2-րդ մասի 1-ին կետով նախատեսված կրկնակիության հոդվածով որակված արարքը վերացվել է, բողոքաբերը գտնում է, որ պատժի չափը նույնպես ենթակա էր վերանայման և նվազեցման:
Վերոգրյալի հիման վրա խնդրել է վերանայել Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 16.06.2011թ. ԵԷԴ/0070/01/09 որոշումը և նշանակված պատժի չափը նվազեցնել:
Բողոքաբերը խնդրել է գործը քննել իր բացակայությամբ:

3/.Վերաքննիչ դատարանի պատճառաբանությունները և եզրահանգումները.
Վերաքննիչ դատարանը ստուգելով գործի փաստական հանգամանքների բացահայտման ու քրեական օրենքի կիրառման ճշտությունը, ինչպես նաև գործը քննելիս և լուծելիս քրեադատավարական օրենքի նորմերի պահպանումը, լսելով մեղադրող կողմի պատասխանը վերաքննիչ բողոքի դեմ, ներկայացված բողոքի հիմքերի ու հիմնավորումների սահմաններում վերլուծելով քրեական գործի նյութերը, հանգում է այն հետևության, որ վերաքննիչ բողոքը պետք է մերժել` նկատի ունենալով հետևյալը.
Ըատ էության բողոքաբերը վիճարկում է այն հանգամանքը, որ եթե ՀՀ քրեական օրենսգրքի 21-րդ հոդվածը, այն է` հանցագործությունների կրկնակիությունը, ուժը կորցրած է ճանաչվել, որի արդյունքում իրեն ՀՀ քրեական օրենսգրքի 34-268 հոդվածի 2-րդ մասի 1-ին և 2-րդ կետերով մեղսագրված արարքը որակվել է ՀՀ քրեական օրենսգրքի 34-268 հոդվածի 2-րդ մասի 2-րդ կետով, ապա պատժի չափը նույնպես ենթակա էր վերանայման և նվազեցման:
Վերաքննիչ դատարանն անդրադառնալով դատարանի կողմից նշանակված պատժի մասով վերաքննիչ բողոքի հիմնավորմանը և պահանջին` արձանագրում է, որ դատապարյալի կողմից ներկայացված վերաքննիչ բողոքի փաստարկն ինքնին բավարար չէ վերաքննիչ բողոքը բավարարելու և նշանակված պատիժը մեղմացնելու համար:
Վերոգրյալից հետևում է, որ դատարանը սույն գործի քննության արդյունքում հանգել է հիմնավոր հետևության և կայացրել է գործի տվյալներից բխող օրինական ու հիմնավորված դատական ակտ, այն է` Բենյամին Պավլիկի Մարտիրոսովի նկատմամբ Երևան քաղաքի Էրեբունի և Նուբարաշեն համայնքների ընդհանուր իրավասության դատարանի 11.09.2011թ. ԵԷԴ/0070/01/09 դատավճռով ՀՀ քրեական օրենսգրքի 34-268-րդ հոդվածի 2-րդ մասի 1-ին և 2-րդ կետերով արարքը համապատասխանեցրել է ՀՀ քրեական օրենսգրքի 34-268-րդ հոդվածի 2-րդ մասի 2-րդ կետին և պատիժը թողնել է անփոփոխ` ազատազրկում 1/մեկ/ տարի ժամկետով:
Վերաքննիչ դատարանը նկատի ունենալով, որ սույն գործով թույլ չեն տրվել նյութական և դատավարական իրավունքի այնպիսի խախտումներ, որոնք կհանգեցնեին դատական սխալի, գտնում է, որ դատարանի որոշումը դատապարտյալի նկատմամբ նշանակված պատժի մասով օրինական է ու հիմնավորված, ուստի այն բեկանելու և բերված վերաքննիչ բողոքը բավարարելու օբյեկտիվ հիմքեր առկա չեն:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-394-րդ, 402-րդ հոդվածներով վերաքննիչ դատարանը

Ո Ր Ո Շ Ե Ց
ՀՀ ԱՆ <<Գորիս>> քրեակատարողական հիմնարկի դատապարտյալ Բենյամին Պավլիկի Մարտիրոսովի կողմից բերված վերաքննիչ բողոքը մերժել:
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 16.06.2011 թվականի որոշումը` Բենյամին Պավլիկի Մարտիրոսովի վերաբերյալ` ՀՀ քրեական օրենսգրքի 34-268 հոդվածի 2-րդ մասի 2-րդ կետով և 34-268 հոդվածի 3-րդ մասով, թողնել օրինական ուժի մեջ:
Որոշումը կարող է բողոքարկվել ՀՀ Վճռաբեկ դատարանին` հրապարակման պահից մեկամսյա ժամկետում:




ՆԱԽԱԳԱՀՈՂ ԴԱՏԱՎՈՐ` Մ. ՊԵՏՐՈՍՅԱՆ

ԴԱՏԱՎՈՐՆԵՐ` Գ. ՄԵԼԻՔ-ՍԱՐԳՍՅԱՆ

Ս. ՀԱՄԲԱՐՁՈՒՄՅԱՆ