Գործ հմ. ԵԷԴ /0067/01/09
2009թ.
ք.Երևան
Ո Ր Ո Շ Ու Մ

Քրեական գործի վարույթը կարճելու և
քրեական հետապնդումը դադարեցնելու մասին


«06» Հուլիսի 2009թ. ք. Երևան


Երևան քաղաքի Էրեբունի և Նուբարաշեն համայնքների ընդհանուր իրավասության դատարանի դատավոր Ա.Օհանյանս հետազոտելով վարույթումս գտնվող հմ. ԵԷԴ 0067/01/09 քրեական գործի նյութերը

Պ Ա Ր Զ Ե Ց Ի

ՀՀ ՊՆ 68617 զորամասի ժամկետային զինծառայող, շարքային Ս.Խաչատրյանի կողմից զինվորական ծառայության պարտականությունները կատարելուց ժամանակավորապես խուսափելու նպատակով զորամասի բուժկետից դուրս գրվելու թերթիկում կեղծում կատարելու և մինչև 2009թ. փետրվարի «19»-ի առավոտը գաղտնի զորամասի բուժկետում մնալու, իսկ նույն օրը ժամը 11։00-ին զորամասն ինքնակամ լքելու փաստի առթիվ 18.04.2009թ. ՀՀ ՊՆ քննչական վարչության Երևանի կայազորի քննչական բաժնում ՀՀ Քրեական օրենսգրքի 363 հոդվածի 1-ին մասի հատկանիշներով քրեական գործ է հարուցվել։
Նախաքննության մարմնի կողմից Սևադա Մուշեղի Խաչատրյանին ՀՀ Քրեական օրենսգրքի 363 հոդվածի 1-ին մասով մեղադրանք է առաջադրվել այն բանի համար, որ նա. «Հանդիսանալով ՀՀ ՊՆ 68617 զորամասի ժամկետային զինծառայող` շարքային, 2009թ. փետրվարի «17»-ի զորամասի բուժկետից դուրս գրվելուց հետո, զինվորական ծառայության պարտականությունները կատարելուց ժամանակավորապես խուսափելու նպատակով, դուրս գրման թերթիկի մեջ կեղծել է իր ստորաբաժանման` այդ օրվա պատասխանատու, մայոր Ա.Թեմուրյանի ստորագրությունը և նշված թերթիկը թողել է զորամասի հերթապահ մասում։ Այնուհետև որոշ ժամանակ անց դիմել է մայոր Ա.Թեմուրյանին և հայտնել, որ իրեն դուրս են գրել բուժկետից բայց ձևացնելով, թե իբր դեռևս վատառողջ է` խնդրել է իրեն կրկին հետազոտման նպատակով ուղարկել բուժկետ։ Սակայն առանց բուժզննում անցնելու Ս.Խաչատրյանը ստել է իրեն ուղարկած և դրսում սպասող սերժանտին` ասելով, թե իբր իրեն նորից ընդունել են բուժման։ Դրանից հետո Ս.Խաչատրյանը մինչև սույն թվականի փետրվարի «19»-ի առավոտ գաղտնի մնացել է զորամասի բուժկետում, որից հետո ժամը 11։00-ի սահմաններում ինքնակամ թողել է զորամասը։ Ստուգումների արդյունքում 21.02.2009թ. ժամը 01։00-ի սահմաններում շարքային Ս.Խաչատրյանի խաբեության փաստը հայտնաբերվել է և վերջինս նույն օրը ժամը 16։00-ին վերադարձվել է ծառայության վայր»։
Քրեական գործը 13.06.2009թ. կազմված և 18.06.2009թ. հաստատված մեղադրական եզրակացությամբ Երևան քաղաքի Էրեբունի և Նուբարաշեն համայնքների ընդհանուր իրավասության դատարան է ստացվել 22.06.2009թ-ին։
Քրեական գործն, ըստ մեղադրանքի Սևադա Մուշեղի Խաչատրյանի` ՀՀ Քր. օր-ի 363 հոդվածի 1-ին մասով վարույթ եմ ընդունել 22.06.2009թ, իսկ այնուհետև դատարան է ստացվել մեղադրյալ Սևադա Խաչատրյանի դիմումը, որով վերջինս առաջադրված մեղադրանքում իրեն լիովին մեղավոր է ճանաչել, զղջացել է կատարածի համար և խնդրել է իր նկատմամբ կիրառել ՀՀ ԱԺ կողմից 19.06.2009թ. ընդունված համաներման որոշումը։ Քրեական գործի նյութերի ուսումնասիրությունից պարզեցի նաև, որ Սևադա Խաչատրյանը նախկինում երբևէ դատապարտված չի եղել։
Համաձայն ՀՀ Ազգային Ժողովի կողմից 19.06.2009թ. ընդունված «Համաներում հայտարարելու մասին» որոշման 5-րդ կետի 1-ին ենթակետի` նյութերով քրեական հետապնդում չհարուցել և քրեական հետապնդում չիրականացնել, ինչպես նաև կարճել այն անձանց կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանի վարույթում գտնվող` մինչև 2009թ. հունիսի 1-ը կատարած հանցագործություններով քրեական գործերը, որոնցով անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում։
ՀՀ Քրեական օրենսգրքի 363 հոդվածի 1-ին մասի սանկցիան պատիժ է նախատեսում կալանք` առավելագույնը երեք ամիս ժամկետով, կամ կարգապահական գումարտակում պահում` առավելագույնը երկու տարի ժամկետով։
ՀՀ Քրեական դատավարության օրենսգրքի 35 հոդվածի 1-ին կետի 13 ենթակետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իuկ հարուցված քրեական գործի վարույթը ենթակա է կարճման, եթե` ...ընդունվել է համաներման ակտ։ Նույն հոդվածի 5-րդ և 6-րդ կետերի համաձայն` դատարանը, հայտնաբերելով քրեական հետապնդումը բացառող հանգամանքներ, լուծում է ամբաuտանյանի նկատմամբ քրեական հետապնդումը դադարեցնելու հարցը։ Uույն հոդվածի առաջին մաuի 6-րդ և 13-րդ կետերում նշված հիմքերով գործի վարույթի կարճում և քրեական հետապնդման դադարեցում չի թույլատրվում, եթե դրա դեմ առարկում է մեղադրյալը։ Այu դեպքում գործի վարույթը շարունակվում է uովորական կարգով։
ՀՀ Քրեական դատավարության օրենսգրքի 292 հոդվածի 1-ին մասի 2-րդ կետի համաձայն` քրեական գործն իր վարույթ ընդունած դատավորը, հետազոտում է գործի նյութերը և քրեական գործը վարույթ ընդունելու պահից 15 oրվա ընթացքում կայացնում հետևյալ որոշումներից մեկը`… քրեական գործի վարույթը կարճելու կամ քրեական հետապնդումը դադարեցնելու մաuին։
ՀՀ Քրեական դատավարության օրենսգրքի 294 հոդվածի 1-ին և 2-րդ կետերի համաձայն` սույն oրենuգրքով նախատեuված հիմքերի առկայության դեպքում, երբ դա հնարավոր է առանց դատաքննության, դատարանը պատճառաբանված որոշում է կայացնում քրեական գործով վարույթը կարճելու կամ քրեական հետապնդումը դադարեցնելու մաuին։ Գործով վարույթը կարճելու կամ քրեական հետապնդումը դադարեցնելու մաuին որոշումն ընդգրկում է նախնական քննության փուլում ընտրված խափանման և վնաuի հատուցման ապահովման միջոցները, քրեադատավարական հարկադրանքի այլ միջոցները վերացնելու մաuին որոշում, ինչպեu նաև որոշում է իրեղեն ապացույցների ճակատագրի հարցը։
Վերոգրյալները հիմք ընդունելով և ղեկավարվելով ՀՀ Քրեական դատավարության օրենսգրքի 35, 292, 294 հոդվածներով և ՀՀ Ազգային Ժողովի կողմից 19.06.2009թ. «Համաներում հայտարարելու մասին» որոշմամբ

Ո Ր Ո Շ Ե Ց Ի

Թիվ ԵԷԴ /0067/01/09 քրեական գործի վարույթն, ըստ մեղադրանքի Սևադա Մուշեղի Խաչատրյանի` ՀՀ Քր. օր-ի 363 հոդվածի 1-ին մասով, կարճել և դադարեցնել Ս.Խաչատրյանի նկատմամբ քրեական հետապնդումը։
Որոշումն օրինական ուժի մեջ մտնելուց հետո վերացնել Սևադա Մուշեղի Խաչատրյանի նկատմամբ ընտրված, զորամասի հրամանատարությանը հսկողության հանձնելու մասին, խափանման միջոցը։
Որոշումը կարող է բողոքարկվել ՀՀ Վերաքննիչ քրեական դատարանին՝ հրապարակվելու օրվանից հետո` մեկամսյա ժամկետում։

ԴԱՏԱՎՈՐ Ա. ՕՀԱՆՅԱՆ