ԵԷԴ/0037/01/09

Ո Ր Ո Շ ՈՒ Մ
ՔՐԵԱԿԱՆ ԳՈՐԾԻ ՎԱՐՈւՅԹԸ ԿԱՐՃԵԼՈւ ԵՎ ՔՐԵԱԿԱՆ ՀԵՏԱՊՆԴՈւՄԸ ԴԱԴԱՐԵՑՆԵԼՈւ ՄԱՍԻՆ

Երևան քաղաքի Էրեբունի և Նուբարաշեն համայնքների ընդհանուր իրավասության դատարանը հետևյալ կազմով՝

ՆԱԽԱԳԱՀՈւԹՅԱՄԲ ԴԱՏԱՎՈՐ՝ Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ՝ Լ. ՄԻՐԶՈՅԱՆ

Մասնակցությամբ`

ՄԵՂԱԴՐՈՂ՝ Է. ՄԱՐՏԻՐՈՍՅԱՆ

2009թ. հուլիսի 16-ին, դատարանում
Դռնբաց դատական նիստում քննության առնելով քրեական գործն ըստ մեղադրանքի Արտակ Սերգեյի Գասպարյանի/ծնված 20.07.1975թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, նախկինում չդատված, բնակվում է ք.Երևան Ռոմանոս-Մելիքյան 8բ տանը/` ՀՀ քր. օր-ի 325 հոդվածի 1-ին մասով և 327 հոդվածի 1-ին մասով.

Պ Ա Ր Զ Ե Ց

Նախաքննության մարմինը ամբաստանյալ Արտակ Սերգեյի Գասպարյանին ՀՀ քր. օր-ի 325 հոդվածի 1-ին մասով և 327 հոդվածի 1-ին մասով մեղադրանք է առաջադրել այն բանի համար, որ 1993թ. հաշվառման է կանգնել Էրեբունու ՏԶԿ-ում և կցագրման արդյունքում ճանաչվել պիտանի զինծառայության համար, սակայն չի ներկայացել տարածքային զինկոմիսարիատ, չի կանգնել հաշվառման և խախտելով «Զինապարտության մասին ՀՀ օրենքը» խուսափել է 1993թ. աշնանային և հետագա զորակոչերից։
Դրանից հետո Ա. Գասպարյանը, 2002թ. մայիսի 22-ից ՌԴ քր. օր-ի 162 հոդվածի 2-րդ մասով նախատեսված հանցագործություն կատարելու համար հետախուզման մեջ գտնվելով, 10.04.2006թ. Սևան քաղաքի անձնագրային բաժանմունքից ստացել է Արտակ Սերյոժայի Օսիպյան կեղծ տվյալներով AG0652309 սերիայի ՀՀ քաղաքացու անձնագիր։
2008թ. նոյեմբերի 4-ին և 22-ին Ա. Գասպարյանը Երևան քաղաքի «Ֆաստ-կրեդիտ» գրավատանը օգտագործել է նշված անձնագիրը և ոսկու գրավի դիմաց կնքել համապատասխանաբար` 90.000 և 195.000 ՀՀ դրամի վարկային պայմանագրեր։
Դատաքննությամբ մեղադրող-դատախազ Է. Մարտիրոսյանը, համաձայն ՀՀ քր. դատ. իր-ի 35 հոդվածի 4-րդ մասի հրաժարվեց ամբաստանյալ Արտակ Գասպարյանի նկատմամբ ՀՀ քր. օր-ի 327 հոդվածի 1-ին մասով առաջադրված մեղադրանքից և դատարանում մեղադրանքը պաշտպանեց ՀՀ քր. օր-ի 325 հոդվածի 1-ին մասով։
ՀՀ քր. օր-ի 325 հոդվածի 1-ին մասով առաջադրված մեղադրանքում ամբաստանյալ Արտակ Գասպարյանը իրեն լիովին մեղավոր ճանաչեց, և օգտվելով իր սահմանադրական իրավունքից, հրաժարվեց դատաքննությամբ ցուցմունք տալուց։
Նախաքննության ընթացքում Արտակ Գասպարյանը ցուցմունք է տվել այն մասին, որ 1994թ. մեկնել է ՌԴ Դոնի-Ռոստով քաղաք արտագնա աշխատանքի։ 1997թ. ՌԴ Դոնի-Ռոստով քաղաքի Կիրովի շրջանի դատարանի կողմից խարդախություն կատարելու և կեղծ փաստաթուղթ օգտագործելու մեղադրանքով դատապարտվել է երեք տարի ազատազրկման։ 2000թ. դեկտեմբերի 19-ին ազատվել է պատժի կրումից և երկու տարի ՌԴ-ում բնակվելուց հետո 2002թ. վերադարձել է ՀՀ։ 2006թ. հանդիպել է իր ծանոթ, ԼՂՀ բնակիչ` Ժուլվեր Այվազյանին։ Ժ. Այվազյանը հայտնել է, որ իր մոտ կա Արտակ Սերյոժայի Օսիպյան տվյալներով, ԱՀ Խանլարի շրջանի ՔԿԱԳՏԲ-ի կողմից տրված ծննդյան վկայական։ Ժ. Այվազյանը իրեն է տվել Ա. Օսիպյանի անվամբ որպես փախստական 001364 կարգահամարի տակ գրանցված լինելու վերաբերյալ թիվ 012432 և փախստականի կարգավիճակից հրաժարվելու վերաբերյալ թիվ 026496 տեղեկանք-ձևաթղթերը, որից հետո ինքը նշված փաստաթղթերը ներկայացրել է Սևան քաղաքի ՏԶԿ և որպես զինծառայող 04.04.2006թ. հաշվառվել պահեստազորում։
Այնուհետև, նշված փաստաթղթերը ներկայացրել է Սևանի անձնագրային բաժանմունք և 10.04.2006թ. ստացել Արտակ Սերյոժայի Օսիպյան կեղծ տվյալներով AG0652309 սերիայի ՀՀ քաղաքացու անձնագիր, ապա 2008թ. նոյեմբերի 4-ին և 22-ին կեղծ անձնագրով Երևան քաղաքի «Ֆաստ-Կրեդիտ» գրավատանը ոսկու գրավի դիմաց կնքել է վարկային պայմանագրեր, ստացել նշված գումարները, իսկ դրանից հետո անձնագիրը ոչնչացրել է։
Բացի ամբաստանյալի խոստովանական ցուցմունքներից, նրա կատարած արարքը հիմնավորվեց գործով ձեռք բերված հետևյալ ապացույցներով.
Վկա` Սյուզաննա Ավետիսյանը, որը հանդիսանում է ամբաստանյալի կինը, օգտվելով իր սահմանադրական իրավունքից, հրաժարվեց դատաքննությամբ ցուցմունք տալուց։
Նախաքննության ընթացքում Սյուզաննա Ավետիսյանը ցուցմունք է տվել այն մասին, որ 2008թ. ընթացքում Ա. Գասպարյանը ոսկյա զարդեր է գրավադրել Երևան քաղաքում գործող գրավատներից մեկում։ Նշված զարդերի մեջ եղել են 3 ոսկյա մատանի, 1 պարանոցի շղթա, ականջողեր և թևնոց։
Վկա` Գագիկ Բադալյանի ցուցմունքով այն մասին, որ 2008թ. նոյեմբերի 4-ին Ա. Գասպարյանը այցելել է իրենց գրավատուն, ներկայացրել է Արտակ Սերյոժայի Օսիպյանի անվամբ տրված ՀՀ քաղաքացու անձնագիրը, վարկային պայմանագիր կնքել իրենց հետ և ոսկյա զարդերի գրավի դիմաց ստացել 90.000 ՀՀ դրամ գումար։ Դրանից հետո, 2008թ. նոյեմբերի 22-ին, Ա. Գասպարյանը կրկին այդ անձնագրով իրենց հետ կնքել է պայմանագիր և նորից ոսկյա զարդերի գրավի դիմաց ստացել 195.000 ՀՀ դրամ գումար։
Վկա` Արմեն Միրզոյանի նախաքննությամբ տրված և դատաքննությամբ հետազոտված ցուցմունքով այն մասին, որ 2008թ. նոյեմբեր ամսին Ա. Գասպարյանին տեղեկացրել է իրեն պատկանող ոսկյա շղթան վերանորոգելու իր մտադրության մասին։ Վերջինս հայտնել է, որ նման աշխատանք կատարող մասնագետ ծանոթ ունի և առաջարկել է ոսկյա շղթան վերանորոգելու համար նշված մասնագետին փոխանցելու համար իրեն տալ։ Մի քանի օր անց, Ա. Գասպարյանը զանգահարել է իրեն և հայտարարել, որ գտնվում է ֆինանսական ծանր կացության մեջ և խնդրել է իր թույլտվությունը իր մոտ գտնվող ոսկյա շղթան գրավատանը գրավադրելու և դրա դիմաց գումար վերցնելու համար։ Ինքը չի մերժել Ա. Գասպարյանին և վերջինս գրավադրելով այն` դրա դիմաց գումար է ստացել։
Որպես ապացույց ճանաչված 2008թ. նոյեմբերի 4-ին և 22-ին Ա. Գասպարյանի և «Ֆաստ-Կրեդիտ» գրավատան միջև կնքված թիվ 15032 և 15365 վարկային պայմանագրերի առկայությամբ, «Ա. Օսիպյան» կեղծ տվյալներով որպես փախստական 001364 կարգահամարի տակ գրանցված լինելու վերաբերյալ թիվ 012432 և փախստականի կարգավիճակից հրաժարվելու վերաբերյալ թիվ 026496 տեղեկանք-ձևաթղթերով, ինչպես նաև գործով ձեռք բերված այլ փաստական տվյալներով։
Այսպիսով դատարանը ապացուցված համարեց, որ ամբաստանյալ Արտակ Սերգեյի Գասպարյանը կատարել է արարք, որը նախատեսված է ՀՀ քր. օր-ի 325 հոդվածի 1-ին մասով, որով և պետք է ենթարկվի քրեական պատասխանատվության։
Մեղադրող-դատախազ` Է. Մարտիրոսյանը, հիմք ընդունելով ՀՀ ԱԺ «Համաներում հայտարարելու մասին» 19.06.2009թ. որոշումը, միջնորդեց դատարանին Արտակ Սերգեյի Գասպարյանի նկատմամբ կիրառել համաներում և քրեական գործի վարույթը կարճել։
ՀՀ ԱԺ «Համաներում հայտարարելու մասին» 19.06.2009թ. որոշման 5-րդ մասի 1-ին կետը սահմանում է` «Նյութերով քրեական հետապնդում չհարուցել և քրեական հետապնդում չիրականացնել, ինչպես նաև կարճել այն անձանց կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանի վարույթում գտնվող` մինչև 2009թ. հունիսի 1-ը կատարած հանցագործություններով քրեական գործերը, որոնցով անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում», իսկ ՀՀ քր. օր-ի 325 հոդվածի 1-ին մասի սանկցիան նախատեսում է պատիժ ազատազրկում` առավելագույնը երկու տարի ժամկետով, հետևաբար դատարանը գտնում է, որ Ա. Գասպարյանի նկատմամբ պետք է կիրառել համաներում և նրա նկատմամբ հարուցված քրեական գործի վարույթը կարճել և քրեական հետապնդումը դադարեցնել։
Անդրադառնալով ապացույցների տնօրինման հարցին, դատարանը գտնում է, որ գործով ապացույց ճանաչված և քրեական գործին կցված Ա. Գասպարյանի կողմից 2006թ. ընթացքում ձեռք բերված վարորդական իրավունքի կեղծ վկայականը, փախստականի կարգավիճակից հրաժարվելու վերաբերյալ փախստականների և միգրացիայի վարչության կողմից տրված կեղծ տեղեկանքը, որի վրա առկա է թիվ 10 դրոշմակնիքը, անձնագրային բաժին ներկայացրած 14.08.1980թ. ԱՀ Խանլարի շրջանի ՔԿԱՏԳ բաժնի կողմից տրված ծննդյան կեղծ վկայականը և Ա. Գասպարյանի կողմից 2008թ. նոյեմբերի 4-ին և 22-ին «Ֆաստ-Կրեդիտ» գրավատանը կնքած վարկային պայմանագրերը պետք է թողնել քրեական գործում։
Ղեկավարվելով ՀՀ ԱԺ «Համաներում հայտարարելու մասին» 19.06.2009թ. որոշման 12-րդ մասի 1-ին կետի «ա» ենթակետով և ՀՀ քր. դատ. օր-ի 35 և 313 հոդվածներով, դատարանը

Ո Ր Ո Շ Ե Ց

Արտակ Սերգեյի Գասպարյանի վերաբերյալ ՀՀ քր. օր-ի 327 հոդվածի 1-ին մասով հարուցված քրեական գործի վարույթը կարճել և քրեական հետապնդումը դադարեցնել` համաձայն ՀՀ քր. դատ. օր-ի 35 հոդվածի 4-րդ մասի։
Կիրառել ՀՀ ԱԺ «Համաներում հայտարարելու մասին» 19.06.2009թ. որոշման 5-րդ մասի 1-ին կետը և Արտակ Սերգեյի Գասպարյանի նկատմամբ ՀՀ քր. օր-ի 325 հոդվածի 1-ին մասով հարուցված քրեական գործի վարույթը կարճել և քրեական հետապնդումը դադարեցնել։
Ա. Գասպարյանի նկատմամբ ընտրված կալանք խափանման միջոցը վերացնել և նրան անհապաղ ազատ արձակել դատական նիստի դահլիճում։
Գործով ապացույց ճանաչված և քրեական գործին կցված Ա. Գասպարյանի կողմից 2006թ. ընթացքում ձեռք բերված վարորդական իրավունքի կեղծ վկայականը, փախստականի կարգավիճակից հրաժարվելու վերաբերյալ փախստականների և միգրացիայի վարչության կողմից տրված կեղծ տեղեկանքը, որի վրա առկա է թիվ 10 դրոշմակնիքը, անձնագրային բաժին ներկայացրած 14.08.1980թ. ԱՀ Խանլարի շրջանի ՔԿԱՏԳ բաժնի կողմից տրված ծննդյան կեղծ վկայականը և Ա. Գասպարյանի կողմից 2008թ. նոյեմբերի 4-ին և 22-ին «Ֆաստ-Կրեդիտ» գրավատանը կնքած վարկային պայմանագրերը թողնել քրեական գործում։
Որոշումը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ