ԵԱՔԴ/0208/01/17

ՈՐՈՇՈՒՄ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ ՄԱՍԻՆ

21 հունվարի 2019թ. ք. Երևան

Երևան քաղաքի ընդհանուր իրավասության դատարանը (այսուհետ նաև՝ Դատարան),

Նախագահությամբ դատավոր` Հ.Մանուկյանի,
քարտուղարությամբ` Կ.Ասատրյանի,
մասնակցությամբ`
մեղադրող` Կ.Բարսեղյանի,
ամբաստանյալ` Ի.Աբաջյանի,
պաշտպան՝ Ա.Գրիգորյանի
տուժող՝ Ա.Պոլստյանովայի
թարգմանիչ՝ Ծ.Թորոսյանի

դռնբաց դատական նիստում քննության առնելով թիվ ԵԱՔԴ/0208/01/17 քրեական գործով ամբաստանյալ Իրինա Արտուշի Աբաջյանի` (ծնված 05.12.1962թ., ք. Երևանում, ագությամբ հայ, ՌԴ քաղաքացի, միջին մասնագիտական կրթությամբ, չի աշխատում, նախկինում չդատված, ամուսնացած, բնակվող՝ ք.Երևան, Զ.Սարկավագի փողոց, 54/5-րդ շենք, 32-րդ բնակարան հասցեում) նկատմամբ համաներում կիրառելու հարցը,

ՊԱՐԶԵՑ

Գործի դատավարական նախապատմությունը.
06.11.2017թ. որոշմամբ հարուցվել է թիվ 09184517 քրեական գործը:
07.11.2017թ. որոշմամբ Աննա Սերգեյի Պոլստյանովան ճանաչվել է որպես տուժող:
27.11.2017թ. որոշմամբ Իրինա Արտուշի Աբաջյանի նկատմամբ որպես խափանման միջոց է ընտրվել ստորագրությունը չհեռանալու մասին:
03.12.2017թ. որոշմամբ Իրինա Արտուշի Աբաջյանը ներգրավվել է որպես մեղադրյալ, և նրան մեղադրանք է առաջադրվել ՀՀ քրեական օրենսգրքի 118-րդ հոդվածով:
22.12.2017թ. նախաքննական մարմնի կողմից կազմվել է թիվ 09184517 քրեական գործի մեղադրական եզրակացությունը և քրեական գործի հետ ուղարկվել Արաբկիր և Քանաքեռ-Զեյթուն վարչական շրջանների դատախազություն, որը 25.12.2017թ. որոշմամբ հաստատվել է ավագ դատախազ Կ.Բարսեղյանի կողմից, և քրեական գործը՝ ՀՀ քրեական օրենսգրքի 118-րդ հոդվածով, ուղարկվել է Երևան քաղաքի ընդհանուր իրավասության դատարան:
26.12.2017թ. որոշմամբ թիվ ԵԱՔԴ/0208/01/17 քրեական գործն ընդունվել է դատավոր Ա.Նիկողոսյանի վարույթ:
10.01.2018թ. որոշմամբ ԵԱՔԴ/0208/01/17 քրեական գործը նշանակվել է դատական քննության:
25.05.2018թ. դատավոր Ա.Նիկողոսյանի լիազորությունները Երևան քաղաքի ընդհանուր իրավասության դատարանում դադարեցվելու հիմքով քրեական գործը վերաբաշխվել և մակագրվել է նույն դատարանի դատավոր Հ.Մանուկյանին, և վերջինիս կողմից քրեական գործն ընդունվել է վարույթ:
14.06.2018թ. որոշմամբ թիվ ԵԱՔԴ/0208/01/17 քրեական գործը նշանակվել է դատական քննության:
21.01.2019թ. դատական նիստում քննարկվել է Իրինա Արտուշի Աբաջյանի նկատմամբ «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» 2018 թվականի նոյեմբերի 01-ի ՀՀ օրենքի համաներման օրենքի դրույթները կիրառելու հարցը: Ամբաստանյալ Իրինա Արտուշի Աբաջյանը և վերջինիս շահերի պաշտպան Ա.Գրիգորյանը չեն առարկել համաներում կիրառելու վերաբերյալ: Տուժող Ա.Պոլստյանովան հայտնել է, որ առարկում է համաներում կիրառելու դեմ, ցանկանում է, որ ամբաստանյալը պատժվի, որպեսզի հետագայում վերջինիս կողմից նմանատիպ արարքները չկրկնվի և իրեն բարոյական վնաս է հասցվել: Բացի դա տուժողը նշել է, որ որևէ գույքային պահանջ չունի ամբաստանյալի նկատմամբ: Մեղադրողը դատական նիստում հայտնել է, որ Իրինա Արտուշի Աբաջյանի նկատմամբ համաներման օրենքի դրույթները կիրառելի են, և ինքը որևէ առարկություն չունի
Դատարանի պատճառաբանությունները և եզրահանգումը.
Ուսումնասիրելով գործի նյութերը, լսելով դատավարության կողմերի դիրքորոշումները՝ Դատարանը գտնում է, որ սույն քրեական գործով Իրինա Արտուշի Աբաջյանի նկատմամբ «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» 2018 թվականի նոյեմբերի 01-ի ՀՀ օրենքի (այսուհետ նաև՝ Համաներման օրենք) դրույթները կիրառելի են հետևյալ պատճառաբանությամբ.
ՀՀ քրեական դատավարության օրենսգրքի 35-րդ հոդվածի համաձայն`
«1. Քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե`
(…)
13) ընդունվել է համաներման մասին օրենք:
(…)»:
Համաներման օրենքի 2-րդ հոդվածի համաձայն՝
«5. Քրեական գործի հարուցումը մերժել, հարուցված քրեական գործը կարճել, ինչպես նաև դադարեցնել քրեական հետապնդումը կամ չիրականացնել քրեական հետապնդում 2018 թվականի հոկտեմբերի 21-ը ներառյալ կատարած հանցագործությունների դեպքերով (բացառությամբ անմիջականորեն մարդու մահվան հանգեցրած դեպքերի, որոնցով առկա է տուժողի իրավահաջորդի առարկությունը), որոնցով`
1) անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան չորս տարի ժամկետով ազատազրկում.
(…)»:
Համաներման օրենքի 4-րդ հոդվածի համաձայն`
«9. Սույն օրենքի կատարումը վերապահել`
1) Հայաստանի Հանրապետության ընդհանուր իրավասության առաջին ատյանի և վերաքննիչ քրեական դատարաններին`
ա. այն անձանց նկատմամբ, որոնց վերաբերյալ գործերը Հայաստանի Հանրապետության ընդհանուր իրավասության առաջին ատյանի կամ վերաքննիչ քրեական դատարանում են, սակայն մինչև սույն որոշումն ուժի մեջ մտնելը չեն քննվել, կամ այն անձանց նկատմամբ, որոնց վերաբերյալ գործերը քննվել են, բայց դատավճիռներն օրինական ուժի մեջ չեն մտել,
(…)
11. Սույն հոդվածի 9-րդ մասով նախատեսված մարմինները համաներման ակտը պետք է կիրառեն սույն օրենքն ուժի մեջ մտնելուց հետո` երեք ամսվա ընթացքում: Եթե սույն հոդվածի 9-րդ մասով նախատեսված մարմինների տրամադրության տակ առկա են համաներումը կիրառելու համար անհրաժեշտ փաստաթղթերը, բավարար չափով պարզաբանված և ճշգրտված են տվյալ գործի հանգամանքները, ապա այդ մարմինները պարտավոր են համաներման ակտը կիրառել նշված հանգամանքների ի հայտ գալուց հետո` ողջամիտ ժամկետում` չսպասելով ընդհանուր ժամկետի լրանալուն:»
ՀՀ քրեական օրենսգրքի 118-րդ հոդվածի համաձայն`
«Ծեծելը կամ այլ բռնի գործողություններ կատարելը, որը չի առաջացրել սույն օրենսգրքի 117-րդ հոդվածով նախատեսված հետևանքներ՝
պատժվում է տուգանքով՝ նվազագույն աշխատավարձի առավելագույնը հարյուրապատիկի չափով, կամ կալանքով՝ առավելագույնը երկու ամիս ժամկետով:»:
Անդրադառնալով սույն գործի նյութերին՝ հարկ է նշել, որ ԵԴ/0459/01/18 քրեական գործով գործով Իրինա Արտուշի Աբաջյանը մեղադրվում է այնպիսի ենթադրյալ հանցագործություն կատարելու մեջ, որի համար նախատեսված պատիժը չի գերազանցում չորս տարին:
Ինչպես նաև սույն քրեական գործով գործով Իրինա Արտուշի Աբաջյանին մեղադրանք է առաջադրվել 2017 թվականին կատարված ենթադրյալ հանցանքի համար:
2018 թվականի նոյեմբերի 01-ին ընդունվել է Համաներման օրենքը, որն ուժի մեջ է մտել նույն թվականի նոյեմբերի 6-ին:
Միաժամանակ Դատարանն արձանագրում է, որ տվյալ դեպքում Համաներման օրենքի 2-րդ հոդվածի 10-րդ կետով նախատեսված սահմանափակող հանգամանքներ առկա չեն:
Վկայակոչած իրավանորմերը համադրելով սույն գործի փաստերի հետ՝ Դատարանն արձանագրում է, որ ՀՀ քրեական դատավարության օրենսգրքի 35-րդ հոդվածի 1-ին մասի դրույթներով հարուցված քրեական գործը ենթակա է կարճման, մասնավորապես՝ Համաներման օրենքի 2-րդ հոդվածի 5-րդ մասի 1-ին կետի կիրառմամբ գործով Իրինա Արտուշի Աբաջյանի նկատմամբ քրեական հետապնդումը ենթակա է դադարեցման, իսկ սույն գործի վարույթը ենթակա է կարճման:
Անդրադառնալով սույն քրեական գործով տուժողի դիրքորոշմանը համաներումը չկիրառելու վերաբերյալ, ապա Դատարանն արձանագրում է, որ նշվածը չի կարող արգելք հանդիսանալ համաներում կիրառելու համար:
Անդրադառնալով գործով Իրինա Արտուշի Աբաջյանի նկատմամբ ընտրված խափանման միջոցի հարցին, ապա Դատարանը գտնում է, որ այն պետք է վերացնել:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 35-րդ 41-րդ, 376.1-րդ, ինչպես նաև «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» 2018 թվականի նոյեմբերի 01-ի ՀՀ օրենքի 2-րդ հոդվածի 5-րդ մասի 1-ին կետով` Դատարանը

Ո Ր Ո Շ Ե Ց


Կիրառել «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» 2018 թվականի նոյեմբերի 01-ի ՀՀ օրենքի 2-րդ հոդվածի 5-րդ մասի 1-ին կետը և Իրինա Արտուշի Աբաջյանի նկատմամբ ՀՀ քրեական օրենսգրքի 118-րդ հոդվածով քրեական հետապնդումը դադարեցնել և թիվ ԵԱՔԴ/0208/01/17 քրեական գործի վարույթը կարճել:
Իրինա Արտուշի Աբաջյանի նկատմամբ ընտրված խափանման միջոց ստորագրությունը չհեռանալու մասին վերացնել:
Որոշումը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակելու օրվանից մեկամսյա ժամկետում:

ԴԱՏԱՎՈՐ՝ Հ.ՄԱՆՈՒԿՅԱՆ