Գործ No ԵԱՔԴ/0171/01/17

ՈՐՈՇՈՒՄ

քրեական գործի վարույթը կարճելու և
քրեական հետապնդումը դադարեցնելու մասին

ՙ13՚ դեկտեմբերի 2018 թվական քաղաք Երևան

Երևան քաղաքի ընդհանուր իրավասության դատարանը

նախագահությամբ` դատավոր Արթուր Մկրտչյանի
քարտուղարությամբ` Արուսյակ Ոսկանյանի
մասնակցությամբ`
մեղադրող Դավիթ Մնացականյանի
ամբաստանյալ Գարիկ Հարությունյանի

Կենտրոն նստավայրում, դռնբաց դատական նիստում քննության առնելով քրեական գործն ըստ մեղադրանքի Գարիկ Ֆեդիկի Հարությունյանի /ծնված` 1976 թվականի դեկտեմբերի 02-ին` Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնլուծված, չի աշխատում, չդատված, բնակվող` քաղաք Երևան, Բաղրամյան 57/1 տուն/, մեղադրվում է ՀՀ քրեական օրենսգրքի 117-րդ հոդվածով,

ՊԱՐԶԵՑ

2017 թվականի մայիսի 04-ին ՀՀ ոստիկանության Արաբկիրի բաժնում ՀՀ քրեական օրենսգրքի 117-րդ հոդվածով հարուցվել է թիվ 14181417 քրեական գործը և ուղարկվել ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժին:
2017 թվականի մայիսի 05-ին ՀՀ ոստիկանության Մաշտոցի բաժնում ՀՀ քրեական օրենսգրքի 137-րդ հոդվածի 1-ին մասով հարուցվել է թիվ 10169517 քրեական գործը և ուղարկվել ՀՀ քննչական կոմիտեի Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժին:
2017 թվականի հունիսի 12-ին Գարիկ Հարությունյանը թիվ 14181417 գործի շրջանակներում ձերբակալվել է:
2017 թվականի հունիսի 15-ին Գարիկ Հարությունյանը թիվ 14181417 քրեական գործով ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով և նրա նկատմամբ որպես խափանման միջոց է կիրառվել կալանավորումը:
2017 թվականի հունիսի 30-ին Գարիկ Հարությունյանը թիվ 10169517 քրեական գործով ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 137-րդ հոդվածի 1-ին մասով, նույն օրը քրեական գործն ըստ ենթակայության ուղարկվել է ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժին:
2017 թվականի սեպտեմբերի 01-ին ՀՀ վերաքննիչ քրեական դատարանի որոշմամբ Գարիկ Հարությունյանն ազատվել է կալանքից:
2017 թվականի սեպտեմբերի 08-ին Գարիկ Հարությունյանի նկատմամբ որպես խափանման միջոց է ընտրվել ստորագրություն` չհեռանալու մասին:
2017 թվականի սեպտեմբերի 26-ին Գարիկ Հարությունյանին առաջադրված մեղադրանքը փոփոխվել է, նրան նոր մեղադրանք է առաջադրվել ՀՀ քրեական օրենսգրքի 117-րդ հոդվածով:
2017 թվականի սեպտեմբերի 27-ին Գարիկ Հարությունյանը ՀՀ քրեական օրենսգրքի 117-րդ հոդվածով ներգրավվել է որպես մեղադրյալ:
2017 թվականի նոյեմբերի 10-ին թիվ 14181417 քրեական գործը մեղադրական եզրակացությամբ ուղարկվել է Երևան քաղաքի ընդհանուր իրավասության դատարան:

Նախաքննության մարմինն ամբաստանյալ Գարիկ Հարությունյանին ՀՀ քրեական օրենսգրքի 117-րդ հոդվածով մեղադրանք է առաջադրել, որ ՙնա 2017 թվականի ապրիլի 25-ին` ժամը 10-ի սահմաններում, նախկին կնոջ` Գայանե Մոսոյանից անչափահաս որդուն տեսակցելու հարցի շուրջ պարզաբանումներ ստանալու համար, այցելել է Երևան քաղաքի Հր.Քոչար 21 հասցեում գտնվող <<Նոր Արաբկիր>> առողջության կենտրոն, որտեղ Գայանե Մոսոյանի թոքախտաբանության աշխատասենյակում վիճաբանել է վերջինիս հետ, դիտավորությամբ ձեռքերով հարվածներ է հասցրել նրա մարմնի տարբեր մասերին` մասնավորապես դեմքի և գլխի շրջաններին, ապա շարունակելով իր անօրինական գործողություններըաշխատանքային սեղանի վրա առկա մկրատով հարվածել է Գայանե Մոսոյանի ձախ նախաբազկի շրջանին, իսկ առկա գրչատուփով և թղթապանակով` գլխի շրջանին, պատճառելով աառողջության կարճատև քայքայումով թեթև վնասի հատկանիշներ պարունակող մարմնական վնասվածքներ, այն է` գլխուղեղի ցնցում, գլխի գագաթային շրջանի սալջարդ և ձախ նախաբազկի ստորին երրորդականի առաջնային մակերեսի կտրած պատռած վերք:՚:

Քրեական գործի դատական քննության փուլում ամբաստանյալ Գարիկ Հարությունյւանը միջնորդեց իր նկատմամբ քրեական հետապնդումը դադարեցնել և քրեական գործի վարույթը կարճել` համաներման մասին օրենքի համապատասխան կետի հիմքով:
Մեղադրող Դ.Մնացականյանը չառարկեց միջնորդության դեմ:
Տուժող Գայանե Մոսոյանը և նրա ներկայացուցիչ Գ.Գրիգորյանը համաներման կիրառման վերաբերյալ դիրքորոշում չեն հայտնել, և քրեական գործով քաղաքացիական հայց և գույքային վնասի հատուցման պահանջ չեն ներկայացրել:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն`
ՙՔրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման ակտ:՚:
ՀՀ քրեական դատավարության օրենսգրքի 35-րդ հոդվածի 6-րդ մասի համաձայն`
<<Սույն հոդվածի առաջին մասի 6-րդ և 13-րդ կետերում նշված հիմքերով գործի վարույթի կարճում և քրեական հետապնդման դադարեցում չի թույլատրվում, եթե դրա դեմ առարկում է մեղադրյալը: Այս դեպքում գործի վարույթը շարունակվում է սովորական կարգով:
Սույն հոդվածի առաջին մասի 13-րդ կետում նշված հիմքով գործի հարուցման մերժում, վարույթի կարճում և քրեական հետապնդման դադարեցում չի թույլատրվում, եթե չի հատուցվել կամ այլ կերպ չի հարթվել պատճառված վնասը, կամ առկա է վեճ հատուցման ենթակա վնասի կապակցությամբ: Այս դեպքում ևս գործի վարույթը շարունակվում է սովորական կարգով:>>:

ՀՀ քրեական օրենսգրքի 117-րդ հոդվածը սահմանում է.
<<Դիտավորությամբ մեկ ուրիշին մարմնական վնասվածք կամ առողջությանն այլ վնաս պատճառելը, որն առաջացրել է առողջության կարճատև քայքայում կամ ընդհանուր աշխատունակության աննշան կայուն կորուստ՝
պատժվում է տուգանքով՝ նվազագույն աշխատավարձի հիսնապատիկից հարյուրհիսնապատիկի չափով, կամ կալանքով՝ առավելագույնը երկու ամիս ժամկետով:>>:

ՀՀ Ազգային ժողովի 2018 թվականի նոյեմբերի 1-ի` <<Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին>> ՀՀ օրենքի 2-րդ հոդվածի 5-րդ մասը սահմանում է.
<<Քրեական գործի հարուցումը մերժել, հարուցված քրեական գործը կարճել, ինչպես նաև դադարեցնել քրեական հետապնդումը կամ չիրականացնել քրեական հետապնդում 2018 թվականի հոկտեմբերի 21-ը ներառյալ կատարած հանցագործությունների դեպքերով (բացառությամբ անմիջականորեն մարդու մահվան հանգեցրած դեպքերի, որոնցով առկա է տուժողի իրավահաջորդի առարկությունը), որոնցով՝
1) անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան չորս տարի ժամկետով ազատազրկում.
/.../>>:

Դատարանը փաստում է, որ Գարիկլ Հարությունյանի նկատմամբ համաներման կիրառման սահմանափակումներ առկա չեն, հետևաբար ՀՀ քրեական օրենսգրքի 117-րդ հոդվածով քրեական գործի վարույթը ենթակա է կարճման, իսկ Գարիկ Հարությունյանի նկատմամբ` քրեական հետապնդումը դադարեցման` ՀՀ Ազգային ժողովի 2018 թվականի նոյեմբերի 1-ի` <<Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին>> ՀՀ օրենքի 2-րդ հոդվածի 5-րդ մասի 1-ին կետի հիմքով:
ՀՀ քրեական օրենսգրքի 82-րդ հոդվածի համաձայն`
<<Հանցանք կատարած անձն օրենսդիր մարմնի կողմից ընդունվող համաներման ակտով կարող է ազատվել քրեական պատասխանատվությունից, իսկ դատապարտյալը կարող է լրիվ կամ մասնակիորեն ազատվել ինչպես հիմնական, այնպես էլ լրացուցիչ պատժից, կամ պատժի չկրած մասը կարող է փոխարինվել ավելի մեղմ պատժատեսակով, կամ կարող է վերացվել դատվածությունը:>>:
Անդրադառնալով խափանման միջոցի հարցին, դատարանը գտնում է, որ Գարիկ Հարությունյանի նկատմամբ ընտրված խափանման միջոցը` ստորագրություն չհեռանալու մասին, պետք է վերացնել:
Անդրադառնալով Գարիկ Հարությունյանի գույքի վրա դրված կալանքին, դատարանը փաստում է հետևյալը.
ՀՀ քրեական դատավարության օրենսգրքի 232-րդ հոդվածի 1-ին մասի համաձայն`
ՙԳույքի վրա կալանք դնելը կիրառվում է քաղաքացիական հայցը, գույքի հնարավոր բռնագրավումը, բռնագանձումը և դատական ծախսերն ապահովելու համար՚:
ՀՀ քրեական դատավարության օրենսգրքի 238-րդ հոդվածի համաձայն`
ՙ1. Գույքը, քրեական վարույթն իրականացնող մարմնի որոշմամբ, ազատվում է կալանքից, եթե քաղաքացիական հայցը հետ վերցվելու, կասկածյալին կամ մեղադրյալին վերագրվող արարքի որակումը փոխվելու հետևանքով կամ այլ պատճառներով վերացել է գույքի վրա կալանք դնելուց բխող սահմանափակումների կիրառման անհրաժեշտությունը:
2. Քաղաքացիական հայցվորի կամ այլ շահագրգիռ անձանց միջնորդությամբ դատարանն իրավունք ունի գույքի վրա դրված կալանքը պահպանել նաև քրեական գործով վարույթի ավարտից հետո` մեկ ամսվա ընթացքում՚:
Դատարանը փաստում է, որ քրեական գործով առկա չէ քաղաքացիական հայց, ինչպես նաև` ՀՀ քրեական օրենսգրքի 117-րդ հոդվածով որպես լրացուցիչ պատիժ գույքի բռնագրավում նախատեսված չէ, հետևաբար, դատարանը գտնում է, որ վերացել է գույքի վրա կալանք դնելուց բխող սահմանափակումների կիրառման անհրաժեշտությունը:
Հետևաբար, դատարանը գտնում է, որ Գարիկ Հարությունյանի անվամբ հաշվառված <<ՎԱԶ-21061 մակնիշի 34UA491 հաշվառման համարանիշի ավտոմեքենայի վրա ՀՀ ՔԿ Երևան քաղաքի քննչական վարչության Արաբկիր վարչական շրջանի քննչական բաժնի քննիչ Հ.Ռափյանի` 26.10.2017թ. որոշմամբ դրված կալանքը պետք է վերացնել:
Անդրադառնալով իրեղեն ապացույցների տնօրինման հարցին, դատարանը գտնում է, որ իրեղեն ապացույց ճանաչված և քրեական գործին կցված մկրատը, գրչատուփը և թղթապանակը պետք է վերադարձնել տուժող Գայանե Մոսոյանին:

Ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետով, 379-րդ հոդվածներով, դատարանը

ՈՐՈՇԵՑ

ՀՀ քրեական օրենսգրքի 117-րդ հոդվածով քրեական գործի վարույթը կարճել և Գարիկ Ֆեդիկի Հարությունյանի նկատմամբ քրեական հետապնդումը դադարեցնել` ՀՀ Ազգային ժողովի 2018 թվականի նոյեմբերի 1-ի` <<Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին>> ՀՀ օրենքի 2-րդ հոդվածի 5-րդ մասի 1-ին կետի հիմքով:
Գարիկ Ֆեդիկի Հարությունյանի նկատմամբ ընտրված խափանման միջոցը` ստորագրություն չհեռանալու մասին, վերացնել:
Գարիկ Հարությունյանի անվամբ հաշվառված <<ՎԱԶ-21061 մակնիշի 34UA491 հաշվառման համարանիշի ավտոմեքենայի վրա ՀՀ ՔԿ Երևան քաղաքի քննչական վարչության Արաբկիր վարչական շրջանի քննչական բաժնի քննիչ Հ.Ռափյանի` 26.10.2017թ. որոշմամբ դրված կալանքը վերացնել:
Իրեղեն ապացույց ճանաչված և քրեական գործին կցված մկրատը, գրչատուփը և թղթապանակը վերադարձնել տուժող Գայանե Մոսոյանին:
Որոշումը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:



ԴԱՏԱՎՈՐ Ա.ՄԿՐՏՉՅԱՆ