ԵԱՔԴ/0145/01/17


ՈՐՈՇՈՒՄ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ


«26» փետրվարի 2019թ. ք.Երևան

Երևան քաղաքի ընդհանուր իրավասության դատարանը (այսուհետ նաև՝ Դատարան) հետևյալ կազմով՝

նախագահությամբ՝ դատավոր Ա.Մաթևոսյանի,
քարտուղարությամբ՝ Հ.Արտաշեսյանի,
մասնակցությամբ`
մեղադրող Կ.Ստեփանյանի,
տուժողի իրավահաջորդ Գ.Ստեփանյանի,
ամբաստանյալ Վ.Պետրոսյանի,
պաշտպաններ Կ.Խաչատրյանի, Ս.Մկրտչյանի,


դատարանում, դռնբաց դատական նիստում քննության առնելով թիվ ԵԱՔԴ/0145/01/17 քրեական գործն ըստ մեղադրանքի Վահագն Էդվարդի Պետրոսյանի՝ (ծնված 1993 թվականի փետրվարի 23-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, աշխատում է «Էրեբունի» Բ/Կ-ում որպես հերթապահ բուժակ, չդատված, հաշվառված` Տավուշի մարզ, գ.Ջուջևան, 6-րդ փողոց, 2-րդ նրբանցք, 3-րդ տուն, բնակվող` Կոտայքի մարզ, գ.Բալահովիտ, Ծաղկունքի 3-րդ փողոց, 2-րդ նրբանցք, 5-րդ տուն) ՀՀ քրեական օրենսգրքի 242-րդ հոդվածի 2-րդ մասով, որպես խափանման միջոց է ընտրված չհեռանալու մասին ստորագրություն,

Պ Ա Ր Զ Ե Ց


ՀՀ քննչական կոմիտեի Երևան քաղաքի քննչական վարչության ՀԿԳ քննիչ Ա.Փարսադանյանի 2016 թվականի նոյեմբերի 20-ի որոշմամբ ՀՀ քրեական օրենսգրքի 242-րդ հոդվածի 2-րդ մասով հարուցվել և վարույթ է ընդունվել 60116816 քրեական գործը:
2016 թվականի նոյեմբերի 21-ին 60116816 քրեական գործն ընդունվել է նույն վարչության ավագ քննիչ Գ.Թադևոսյանի վարույթ:
Քննիչի 2016 թվականի նոյեմբերի 21-ի որոշմամբ Համբարձում Մայիսի Հովհաննիսյանը 60116816 քրեական գործովգ ճանաչվել է տուժող:
Քննիչի 2016 թվականի դեկտեմբերի 08-ի որոշմամբ Գագիկ Սամվելի Ստեփանյանը ճանաչվել է տուժող Համբարձում Հովհաննիսյանի իրավահաջորդ:
Քննիչի 2017 թվականի օգոստոսի 23-ի որոշմամբ Վահագն Էդվարդի Պետրոսյանը 60116816 քրեական գործով ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով` մեղադրանքի փաստական կողմի հետևյալ նկարագրությամբ.
«[Վահագն Էդվարդի Պետրոսյանը] 2016թ. Նոյեմբերի 20-ին, ժամը 18:10-ի սահմաններում, «Մազդա» մակնիշի 35 AG 901 հ/հ ավտոմեքենան վարել է Երևան քաղաքի Վահրամ Փափազյան փողոցով` Հրաչյա Քոչար փողոցի կողմից դեպի Ավետիսյան փողոց տանող ուղեմասի երկրորդ երթևեկելի գոտով, մոտ 50-60 կմ/ժամ արագությամբ, մոտակա լուսերով: Հասնելով Վ.Փափազյան փողոցի թիվ 13-րդ հասցեի դիմաց` ի վիճակի լինելով հայտնաբերել հետիոտն Համբարձում Մայիսի Հովհաննիսյանին, թույլ է տվել ՀՀ կառավարության 2007թ.-ի հունիսի 25-ի 955-Ն որոշմամբ հաստատված ճանապարհային երթևեկության կանոնների 67-րդ կետի պահանջներին հակասող գործողություններ` ժամանակին միջոցներ չի ձեռնարկել ավտոմեքենան մինչև վրաերթի տեղին հասնելը կանգնեցնելու կամ դանդաղեցնելու համար, առջևի ձախ մասով վրաերթի է ենթարկել իր ընթացքի ուղղությամբ ձախից դեպի աջ փողոցը հատող հետիոտն Հ.Հովհաննիսյանին, անզգուշությամբ պատճառել մահ` ինքն իրեն զրկելով վրաերթը կանխելու տեխնիկական հնարավորությունից:(...)»:
2017 թվականի օգոստոսի 23-ին Վահագն Էդվարդի Պետրոսյանի նկատմամբ որպես խափանման միջոց է կիրառվել ստորագրություն չհեռանալու մասին:
Քննիչի 2017 թվականի սեպտեմբերի 05-ի որոշմամբ 60116816 քրեական գործով Վահագն Պետրոսյանի նկատմամբ ՀՀ քրեական օրենսգրքի 244-րդ հոդվածով քրեական հետապնդում չի իրականացվել` նրա արարքում հանցակազմի բացակայության պատճառաբանությամբ:
2017 թվականի սեպտեմբերի 08-ին քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան, որտեղ այն ստացվել է 2017 թվականի սեպտեմբերի 12-ին:
Դատավորների միջև քրեական գործերի բաշխման էլեկտրոնային համակարգի միջոցով քրեական գործը ԵԱՔԴ/0145/01/17 համարի ներքո մակագրվել և հանձնվել է դատավոր Ա.Մաթևոսյանին:
Դատավոր Ա.Մաթևոսյանի 2017 թվականի սեպտեմբերի 13-ի որոշմամբ ԵԱՔԴ/0145/01/17 քրեական գործն ընդունվել է վարույթ և նույն թվականի սեպտեմբերի 25-ի որոշմամբ նշանակվել դատական քննության:
Դատական նիստում ամբաստանյալ Վահագն Պետրոսյանը, հիմք ընդունելով «Էրեբունի-Երևանի հիմնադրման 2800-ամյակի և Հայաստանի առաջին հանրապետթյան անկախության հռչակման 100-ամյակի կապակցությամբ քրեական գործերով համաներում հայտարարելու մասին» 2018 թվականի նոյեմբերի 1-ին ընդունված ՀՀ օրենքը (այսուհետ նաև՝ Համաներման ակտ), միջնորդեց իր նկատմամբ քրեական հետապնդումը դադարեցնել, իսկ քրեական գործի վարույթը կարճել:
Տուժողի իրավահաջորդ Գագիկ Ստեփանյանը հայտնեց, որ հատուցման ենթակա վնասի կապակցությամբ վեճ առկա չէ և չի առարկում «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքն ամբաստանյալ Վ.Պետրոսյանի նկատմամբ կիրառելու դեմ:
Մեղադրող Կ.Ստեփանյանը դատարանին հայտնեց, որ «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքն ամբաստանյալի նկատմամբ կիրառելու դեմ չի առարկում, քանի որ հիշյալ օրենքի կիրառման համար որևէ սահմանափակում առկա չէ:
ՀՀ քրեական օրենսգրքի 28-րդ հոդվածի համաձայն` «1. Մեղքը դրսևորվում է դիտավորությամբ կամ անզգուշությամբ: 2. Անզգուշությամբ կատարված արարքը հանցագործություն է, եթե դա հատկապես նախատեսված է սույն օրենսգրքի Հատուկ մասով»:
ՀՀ քրեական օրենսգրքի 82-րդ հոդվածի համաձայն՝ «Հանցանք կատարած անձն օրենսդիր մարմնի կողմից ընդունվող համաներման ակտով կարող է ազատվել քրեական պատասխանատվությունից, իսկ դատապարտյալը կարող է լրիվ կամ մասնակիորեն ազատվել ինչպես հիմնական, այնպես էլ լրացուցիչ պատժից, կամ պատժի չկրած մասը կարող է փոխարինվել ավելի մեղմ պատժատեսակով, կամ կարող է վերացվել դատվածությունը»:
ՀՀ քրեական օրենսգրքի 242-րդ հոդվածի համաձայն` «1. Ավտոմոբիլի կամ մեխանիկական այլ տրանսպորտային միջոցի վարորդի կողմից ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման կանոնները խախտելը, որը մարդու առողջությանն անզգուշությամբ պատճառել է ծանր կամ միջին ծանրության վնաս` պատժվում է տուգանքով` նվազագույն աշխատավարձի առավելագույնը երկուհարյուրապատիկի չափով, կամ կալանքով` մեկից երեք ամիս ժամկետով, կամ ազատազրկմամբ` առավելագույնը երկու տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով կամ առանց դրա: 2. Նույն արարքը, որն անզգուշությամբ առաջացրել է մարդու մահ` պատժվում է ազատազրկմամբ` առավելագույնը հինգ տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով: (...)»:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն՝ «Քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման մասին օրենք:»:
Նույն հոդվածի 5-րդ մասի համաձայն` «Դատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը»:
Նույն հոդվածի 6-րդ մասի համաձայն՝ «Սույն հոդվածի առաջին մասի (...) 13-րդ [կետում] նշված [հիմքով] գործի վարույթի կարճում և քրեական հետապնդման դադարեցում չի թույլատրվում, եթե դրա դեմ առարկում է մեղադրյալը: Այս դեպքում գործի վարույթը շարունակվում է սովորական կարգով:
Սույն հոդվածի առաջին մասի 13-րդ կետում նշված հիմքով գործի հարուցման մերժում, վարույթի կարճում և քրեական հետապնդման դադարեցում չի թույլատրվում, եթե չի հատուցվել կամ այլ կերպ չի հարթվել պատճառված վնասը, կամ առկա է վեճ հատուցման ենթակա վնասի կապակցությամբ: Այս դեպքում ևս գործի վարույթը շարունակվում է սովորական կարգով: Սույն պարբերությամբ նախատեսված կարգավորումը գործում է, եթե համաներման մասին օրենքով այլ բան նախատեսված չէ»:
«Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» 2018 թվականի նոյեմբերի 1-ի ՀՀ օրենքի 2-րդ հոդվածի 5-րդ մասի համաձայն`
«Քրեական գործի հարուցումը մերժել, հարուցված քրեական գործը կարճել, ինչպես նաև դադարեցնել քրեական հետապնդումը կամ չիրականացնել քրեական հետապնդում 2018 թվականի հոկտեմբերի 21-ը ներառյալ կատարած հանցագործությունների դեպքերով (...), որոնցով`
(...)
3) անձինք կարող են մեղադրվել կամ մեղադրվում են անզգուշությամբ հանցագործություն կատարելու մեջ, որոնց համար նախատեսված է պատիժ` ոչ ավելի, քան վեց տարի ժամկետով ազատազրկում.
(...)»:
«Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքի 2-րդ հոդվածի 10-րդ մասում նշվել են այն սահմանափակումները, որոնց առկայության դեպքում համաներումը կիրառելի չէ:
Համաներման ակտի 2-րդ հոդվածի 12-րդ կետի համաձայն՝ «Սույն հոդվածի 1-5-րդ և 7-րդ մասերը կիրառվում են անձի նկատմամբ, եթե սույն հոդվածի 8-րդ և 10-րդ մասերով այլ բան նախատեսված չէ»:
Համաներման ակտի 4-րդ հոդվածի 9-րդ մասի 1-ին կետի համաձայն`
«Սույն օրենքի կատարումը վերապահել՝
1) Հայաստանի Հանրապետության ընդհանուր իրավասության առաջին ատյանի և վերաքննիչ քրեական դատարաններին`
ա. այն անձանց նկատմամբ, որոնց վերաբերյալ գործերը Հայաստանի Հանրապետության ընդհանուր իրավասության առաջին ատյանի կամ վերաքննիչ քրեական դատարանում են, սակայն մինչև սույն որոշումն ուժի մեջ մտնելը չեն քննվել, կամ այն անձանց նկատմամբ, որոնց վերաբերյալ գործերը քննվել են, բայց դատավճիռներն օրինական ուժի մեջ չեն մտել,
(...)»:
Ուսումնասիրելով սույն քրեական գործի փաստական հանգամանքները՝ դատարանն արձանագրում է հետևյալը.
- ամբաստանյալ Վահագն Էդվարդի Պետրոսյանն իրեն մեղսագրվող հանցավոր արարքը կատարել է 2016 թվականի նոյեմբերի 20-ին, այսինքն մինչև 2018 թվականի հոկտեմբերի 21-ը,
- ՀՀ քրեական օրենսգրքի 242-րդ հոդվածի 2-րդ մասով նախատեսված հանցանքն ըստ մեղքի ձևի դասվում է անզգուշությամբ կատարվող հանցանքների շարքին, որի համար սահմանված ամենախիստ պատիժն ազատազրկումն է՝ առավելագույնը հինգ տարի ժամկետով,
- ամբաստանյալ Վահագն Էդվարդի Պետրոսյանը չի առարկել «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքի 2-րդ հոդվածի 5-րդ մասի 3-րդ կետի կիրառմամբ իր նկատմամբ քրեական հետապնդումը դադարեցնելու, քրեական գործի վարույթը կարճելու դեմ,
- տուժողի իրավահաջորդ Գ.Ստեփանյանը հայտարարել է, որ հանցագործությամբ հատուցման ենթակա վնասի կապակցությամբ վեճ առկա չէ և չի առարկում ամբաստանյալ Վ.Պետրոսյանի նկատմամբ Համաներման ակտ կիրառմամբ քրեական հետապնդումը դադարեցնելու դեմ,
- ամբաստանյալ Վահագն Էդվարդի Պետրոսյանի նկատմամբ Համաներման մասին օրենքի կիրառման համար, «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքի 2-րդ հոդվածի 10-րդ մասում նախատեսված որևէ սահմանափակում առկա չէ,
Ամփոփելով վերոգրյալը՝ դատարանը գտնում է, որ «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքը սույն քրեական գործով ամբաստանյալ Վահագն Էդվարդի Պետրոսյանի նկատմամբ քրեական հետապնդումը բացառող հանգամանք է, որի պատճառով ամբաստանյալ Վ.Պետրոսյանի նկատմամբ քրեական հետապնդումը ենթակա է դադարեցման, իսկ քրեական գործի վարույթը՝ կարճման:
Քննարկելով խափանման միջոցի հարցը և նկատի ունենալով, որ վերոգրյալ հիմնավորումներով Վ.Պետրոսյանի նկատմամբ քրեական հետապնդումը ենթակա է դադարեցման, դատարանը գտնում է, որ ամբաստանյալի նկատմամբ խափանման միջոց կիրառելու անհրաժեշտությունը վերացել է, ուստի նրա նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել:
Անդրադառնալով իրեղեն ապապցույցների հարցին՝ դատարանը գտնում է, որ որոշումն օրինական ուժի մեջ մտնելուց հետո իրեղեն ապացույց ճանաչված՝ ՀՀ ոստիկանության ՃՈ ծառայությանն ի պահ հանձնված «Մազդա» մակնիշի 35 AG 901 հաշվառման համարանիշի ավտոմեքենան պետք է հանձնել սեփականատիրոջ՝ Նորիկ Ժորայի Հարությունյանի տնօրինությանը, Վահե Չանգլյանի պատասխանատու պահպանմանը հանձնված «Պորշ» մակնիշի 01 ZZ 009 հաշվառման համարանիշի ավտոմեքենան պետք է թողնել վերջինիս տնօրինությանը, իսկ դատարանում պահվող` տուժող Համբարձում Հովհաննիսյանի արտաքին հագուստներն ու կոշիկները պետք է հանձնել տուժողի իրավահաջորդ Գագիկ Սամվելի Ստեփանյանին:
Անդրադառնալով ամբաստանյալ Վահագն Պետրոսյանի գույքի նկատմամբ դրված կալանքին՝ դատարանը գտնում է, որ նախաքննական մարմնի 2017 թվականի սեպտեմբերի 04-ի որոշմամբ ամբաստանյալ Վ.Պետրոսյանի շարժական ու անշարժ գույքի վրա դրված կալանքը պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ, 41-րդ, 151-րդ, 313-րդ և «Էրեբունի Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» 2018 թվականի նոյեմբերի 1-ի ՀՀ օրենքի 2-րդ հոդվածի 5-րդ մասի 3-րդ կետով` Դատարանը

Ո Ր Ո Շ Ե Ց

«Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքի 2-րդ հոդվածի 5-րդ մասի 3-րդ կետի հիման վրա Վահագն Էդվարդի Պետրոսյանի նկատմամբ ՀՀ քրեական օրենսգրքի 242-րդ հոդվածի 2-րդ մասով քրեական հետապնդումը դադարեցնել և թիվ ԵԱՔԴ/0145/01/17 (60116816) քրեական գործի վարույթը կարճել:
Վահագն Էդվարդի Պետրոսյանի նկատմամբ ընտրված ստորագրություն չհեռանալու մասին խափանման միջոցը վերացնել:
Որոշումն օրինական ուժի մեջ մտնելուց հետո իրեղեն ապացույց ճանաչված՝ ՀՀ ոստիկանության ՃՈ ծառայությանն ի պահ հանձնված «Մազդա» մակնիշի 35 AG 901 հաշվառման համարանիշի ավտոմեքենան հանձնել սեփականատիրոջ՝ Նորիկ Ժորայի Հարությունյանի տնօրինությանը:
Որոշումն օրինական ուժի մեջ մտնելուց հետո իրեղեն ապացույց ճանաչված՝ Վահե Չանգլյանի պատասխանատու պահպանմանը հանձնված «Պորշ» մակնիշի 01 ZZ 009 հաշվառման համարանիշի ավտոմեքենան թողնել վերջինիս տնօրինությանը:
Որոշումն օրինական ուժի մեջ մտնելուց հետո իրեղեն ապացույց ճանաչված և դատարանում պահվող` տուժող Համբարձում Հովհաննիսյանի արտաքին հագուստներն ու կոշիկները հանձնել տուժողի իրավահաջորդ Գագիկ Սամվելի Ստեփանյանին:
Նախաքննական մարմնի 2017 թվականի սեպտեմբերի 04-ի որոշմամբ ամբաստանյալ Վահագն Էդվարդի Պետրոսյանի շարժական ու անշարժ գույքի վրա դրված կալանքը վերացնել:
Որոշումը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում:



ԴԱՏԱՎՈՐ Ա.ՄԱԹԵՎՈՍՅԱՆ