Ո Ր Ո Շ Ո Ւ Մ ԵԱՔԴ/0129/01/17
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ
ՎԱՐՈՒՅԹԸ ԿԱՐՃԵԼՈՒ ՄԱՍԻՆ

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը հետևյալ կազմով

Նախագահությամբ` դատավոր Դ. Գրիգորյան
քարտուղարությամբ` Հ.Դաջունցի

Մասնակցությամբ`
մեղադրող` Գ.Ալոյանի
պաշտպան` Լ.Ավետիսյանի
տուժող` Խ.Նազարյանի


Դռնբաց դատական նիստում 2017 թվականի հոկտեմբերի 18-ին, Երևան քաղաքում, քննության առնելով քրեական գործն, ըստ մեղադրանքի Կարապետ Մուրադի Երանոսյանի` ՀՀ քրեական օրենսգրքի 178-րդ հոդվածի 1-ին մասով.

Պ Ա Ր Զ Ե Ց

ՀՀ ոստիկանության Արաբկիրի բաժնի հետաքննության բաժանմունքի տեսուչ Գ.Մանուկյանի 2017 թվականի մայիսի 18-ի որոշմամբ ՀՀ քրեական օրենսգրքի 179-րդ հոդվածի 1-ին մասի հատկանիշներով հարուցվել է թիվ 14185717 քրեական գործը:
ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի քննիչ Վ.Վարագյանի 2017 թվականի մայիսի 22-ի որոշմամբ թիվ 14185717 քրեական գործը ընդունվել է վարույթ և շարունակվել նախաքննությունը:
Նախաքննության մարմնի կողմից ամբաստանյալ Կարապետ Մուրադի Երանոսյանին 2017 թվականի օգոստոսի 11-ին մեղադրանք է առաջադրվել ՀՀ քրեական օրենսգրքի 178-րդ հոդվածի 1-ին մասով այն բանի համար, որ նա 2017 թվականի մայիսի 9-ին զգալի չափերով` 120.000 ՀՀ դրամ գումարի հափշտակություն կատարելու դիտավորությամբ, գրավադրված ոսկյա զարդերը գրավատնից վերցնելու պատրվակով` Երևան քաղաքի Քանաքեռ ՀԷԿ 21/5 հասցեում Խաչիկ Նազարյանի վստահությունը չարաշահելու եղանակով, նրանից վերցրել է զգալի չափով` 100.000 ՀՀ դրամ գումար, որից հետո շարունակելով իր հանցավոր դիտավորությունը նույն օրը` ժամը 22-ի սահմաններում, Երևան քաղաքի Ազատության պողոտա <<Զովք>> սուպերմարկետի դիմաց, նույն եղանակով Խաչիկ Նազարյանից նրա կնոջ` Անի Հակոբյանի ներկայությամբ, խաբեությամբ հափշտակել է ևս 20.000 ՀՀ դրամ գումար, որից հետո միասին գնացել են Երևան քաղաքի Նորագավիթ թաղամաս` իբրև գրավադրված ոսկյա զարդերը վերցնելու, որտեղից և Կարապետ Երանոսյանը թողնելով նրանց այնտեղ` դիմել է փախուստի:
Կարապետ Մուրադի Երանոսյանի նկատմամբ 2017 թվականի մայիսի 29-ի որոշմամբ որպես խափանման միջոց է կիրառվել չհեռանալու մասին ստորագրությունը:
Քրեական գործը մեղադրական եզրակացությամբ 2017 թվականի օգոստոսի 16-ին ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան, որտեղ քրեական գործին շնորհվել է թիվ ԵԱՔԴ/0129/01/17 համարը:
2017 թվականի հոկտեմբերի 18-ի դատական նիստի ընթացքում տուժող Խաչիկ Ջանիկի Նազարյանը հայտարարեց, որ հաշտվել է ամբաստանյալ Կարապետ Մուրադի Երանոսյանի հետ և ներել վերջինիս, նրա նկատմամբ որևէ բողոք, պահանջ, քաղ. հայց չունի, չի առարկում նրա նկատմամբ ՀՀ քրեական օրենսգրքի 178-րդ հոդվածի 1-ին մասով նախատեսված հանցագործություն կատարելու համար քրեական հետապնդումը դադարեցնելուն և քրեական գործի վարույթը կարճելուն:
Ամբաստանյալ Կարապետ Մուրադի Երանոսյանը նշեց, որ տուժող Խաչիկ Ջանիկի Նազարյանի հետ հաշտվել է, ՀՀ քրեական օրենսգրքի 178-րդ հոդվածի 1-ին մասով առաջադրված մեղադրանքը լիովին ընդունում և իրեն մեղավոր է ճանաչում, զղջում է կատարածի համար և միջնորդեց տուժողի հետ հաշտվելու հիմքով իր նկատմամբ քրեական հետապնդումը դադարեցնել և քրեական գործի վարույթը կարճել:
Մեղադրող Գ.Ալոյանը նշեց, որ վերը շարադրված պայմաններում ամբաստանյալ Կարապետ Մուրադի Երանոսյանի նկատմամբ քրեական հետապնդումը պետք է դադարեցնել, իսկ քրեական գործի վարույթը կարճել` տուժողի հետ հաշտության հիմքով:
Դատարանը փաստում է, որ Կարապետ Մուրադի Երանոսյանի կողմից կատարած հանցանքը համապատասխանում է ՀՀ քրեական օրենսգրքի 178-րդ հոդվածի 1-ին մասի հատկանիշներին:
ՀՀ քրեական դատավարության օրենսգրքի 183-րդ հոդվածի 1-ին մասի համաձայն ՀՀ քրեական օրենսգրքի 178-րդ հոդվածի 1-ին մասով նախատեսված հանցագործության վերաբերյալ գործը հարուցվում է ոչ այլ կերպ, քան տուժողի բողոքի հիման վրա և կասկածյալի կամ մեղադրյալի կամ ամբաստանյալի հետ հաշտվելու դեպքում ենթակա է կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե տուժողը հաշտվել է կասկածյալի կամ մեղադրյալի հետ:
ՀՀ վճռաբեկ դատարանը, Աշոտ Սիմոնի Բաբայանի վերաբերյալ գործով 2013 թվականի հուլիսի 13-ի որոշմամբ, վերլուծելով ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի և ՀՀ քրեական օրենսգրքի 73-րդ հոդվածի ձևակերպումները, արձանագրել է, որ տուժողի և հանցանք կատարած անձի հաշտության վերաբերյալ դրանցում առկա ձևակերպումները տարբեր են: Մասնավորապես, ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետը` որպես հաշտության հիմքով անձին քրեական պատասխանատվությունից ազատելու նախապայման, նշում է հանցանք կատարած անձի հետ տուժողի հաշտվելը, իսկ ՀՀ քրեական օրենսգրքի 73-րդ հոդվածն ընդհակառակը` տուժողի հետ հանցանք կատարած անձի հաշտվելը: Այլ կերպ` ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի իմաստով հաշտության փաստի հաստատման համար բավարար է արձանագրել, որ հաշտվել է տուժողը, իսկ ՀՀ քրեական օրենսգրքի 73-րդ հոդվածի իմաստով` հանցանք կատարած անձը:
Նույն որոշմամբ` ՀՀ վճռաբեկ դատարանն իրավական դիրքորոշում է արտահայտել այն մասին, որ (...) Հանցանք կատարած անձի համար հաշտությունը հանցանքի կատարման մեջ իրեն մեղավոր ճանաչելն է, այդ արարքի համար զղջալը, ափսոսանք հայտնելը, իսկ տուժողի համար՝ հանցանք կատարած անձին ներելը: Բացի այդ, հաշտությունը ենթադրում է տուժողի և ենթադրյալ հանցագործի կամավոր և փոխադարձ համաձայնություն միմյանց հետ հաշտվելու վերաբերյալ: Այսինքն` հաշտությունը պետք է լինի ինչպես գործողություն, այնպես էլ փոխադարձ գործողությունների արդյունք: Հաշտության կամավոր և փոխադարձ բնույթի բացակայության դեպքում վարույթն իրականացնող մարմինը չի կարող որոշում կայացնել հաշտության հիմքով քրեական գործի վարույթը կարճելու և քրեական հետապնդումը դադարեցնելու վերաբերյալ: Այլ կերպ` հաշտությունը երկու կողմերի փոխադարձ կամահայտնությունն է, այն երբեք չի կարող կրել միակողմանի բնույթ, և եթե տուժողը ցանկություն է հայտնում հաշտվելու, իսկ հանցանք կատարած անձը դրա դեմ առարկում է, կամ հակառակը, ապա հաշտության հիմքով քրեական գործի վարույթը կարճելու և քրեական հետապնդումը դադարեցնելու իրավական հիմքը բացակայում է: Նույն կերպ, հաշտությունը կամավոր և փոխադարձ չի կարող համարվել, հետևաբար` այդ հիմքով քրեական գործի վարույթը չի կարող դադարեցվել, եթե հաշտությունը հետևանք է տուժողի նկատմամբ հանցանք կատարած անձի գործադրած ոչ իրավաչափ ներգործության (տես ՀՀ վճռաբեկ դատարանի` Աշոտ Սիմոնի Բաբայանի վերաբերյալ գործով 2013 թվականի հուլիսի 13-ի որոշումը):
Շարադրված իրավադրույթների և ՀՀ վճռաբեկ դատարանի իրավական դիրքորոշման լույսի ներքո վերլուծելով սույն որոշմամբ արձանագրված փաստական տվյալները` Դատարանն արձանագրում է, որ ամբաստանյալ Կարապետ Մուրադի Երանոսյանը ՀՀ քրեական օրենսգրքի 178-րդ հոդվածի 1-ին մասով առաջադրված մեղադրանքում իրեն լիովին մեղավոր է ճանաչել, զղջացել և ափսոսանք հայտնել կատարածի համար, հաշտվել է տուժողի հետ, իսկ տուժող Խաչիկ Նազարյանը ներել է վերջինիս, հաշտվել է նրա հետ, այսինքն դատարանը գտնում է, որ ամբաստանյալ Կարապետ Մուրադի Երանոսյանի և տուժող Խաչիկ Ջանիկի Նազարյանի միջև հաշտությունը կամավոր է և փոխադարձ, որպիսի հանգամանքը տվյալ դեպքում բացառվում է Կարապետ Մուրադի Երանոսյանի նկատմամբ քրեական հետապնդումն և այն ենթակա է դադարեցման, իսկ քրեական գործի վարույթը կարճման:
Անդրադառնալով Կարապետ Մուրադի Երանոսյանի նկատմամբ կիրառված խափանման միջոց չհեռանալու մասին ստորագրության հարցին Դատարանը գտնում է, որ այն պետք է վերացնել` ՀՀ քրեական դատավարության օրենսգրքի 151-րդ հոդվածի 2-րդ մասի հիմքով:
Դատարանը գտնում է, որ Կարապետ Մուրադի Երանոսյանի շարժական և անշարժ գույքի վրա դրված կալանքը պետք է վերացնել:
Դատարանն արձանագրում է նաև, որ սույն քրեական գործով քաղ. հայց չի ներկայացվել, դատական ծախսեր և իրեղեն ապացույցներ չկան:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 35 հոդվածի 1-ին մասի 5-րդ կետով, 41-րդ, 379-րդ, 427-րդ հոդվածներով դատարանը,

Ո Ր Ո Շ Ե Ց

Ամբաստանյալ Կարապետ Մուրադի Երանոսյանի (ծնված 22.02.1993թ. Գյումրի քաղաքում, ազգությամբ հայ, ՀՀ քաղաքացի, ամուսնացած, նախկինում դատված, հաշվառված է ք.Երևան, Ռիգայի փողոց, 126Ա տուն, փաստացի բնակվում է ք.Երևան, Այգեկցի փողոց, տուն 95) նկատմամբ ՀՀ քրեական օրենսգրքի 178-րդ հոդվածի 1-ին մասով նախատեսված հանցագործություն կատարելու համար քրեական հետապնդումը դադարեցնել և քրեական գործի վարույթը կարճել` տուժողի հետ հաշտվելու հիմքով:
Կարապետ Մուրադի Երանոսյանի նկատմամբ կիրառված խափանման միջոց չհեռանալու մասին ստորագրությունը վերացնել:
Կարապետ Մուրադի Երանոսյանի շարժական և անշարժ գույքի վրա դրված կալանքը վերացնել:
Որոշումը կարող է բողոքարկվել ՀՀ վերաքննիչ քրեական դատարան հրապարակման պահից մեկամսյա ժամկետում:



ԴԱՏԱՎՈՐ` Դ. ԳՐԻԳՈՐՅԱՆ