ԵԱՔԴ/0125/01/17






ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ


11 սեպտեմբերի 2017թ. ք. Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (այսուհետ նաև՝ Դատարան),


Նախագահությամբ դատավոր` Ա. Նիկողոսյանի,
քարտուղարությամբ` Ե. Կարապետյանի,
մասնակցությամբ`
մեղադրող` Բ.Ղազինյանի,
ամբաստանյալ` Ա.Ղավամիի,
պաշտպաններ` Ի.Պետրոսյանի,
Ա.Սահակյանի
թարգմանիչ՝ Հ.Թախմասյանի

դռնբաց դատական նիստում քննության առնելով քրեական գործն ըստ մեղադրանքի`
Ամիր Սաբերի Ղավամիի (ծնված` 07.09.1981թ. Թեհրան քաղաքում, ՀՀ քաղաքացի, ամուսնացած, չի աշխատում, նախկինում չդատված, փաստացի բնակվող՝ ք.Երևան, Մոլդովական 32/4 տանը) ՀՀ քրեական օրենսգրքի 266–րդ հոդվածի 1-ին մասով (2 դրվագ) և 268-րդ հոդվածի 1-ին մասով,


ՊԱՐԶԵՑ


Գործի դատավարական նախապատմությունը.
1. 2017 թվականի ապրիլի 6–ին հարուցվել է թիվ 09160917 նախաքննական համարով քրեական գործը։
2017 թվականի ապրիլի 27–ին Ամիր Սաբերի Ղավամիի նկատմամբ որպես խափանման միջոց կիրառվել է ստորագրություն չհեռանալու մասին:
2017 թվականի մայիսի 4–ին որոշում է կայացվել Ամիր Սաբերի Ղավամիին մեղադրյալ ներգրավելու մասին ՀՀ քրեական օրենսգրքի ՀՀ քրեական օրենսգրքի 266–րդ հոդվածի 1-ին մասով (2 դրվագ) և 268-րդ հոդվածի 1-ին մասով,
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2017 թվականի մայիսի 4-ի որոշմամբ մեղադրյալ Ամիր Սաբերի Ղավամիի նկատմամբ որպես խափանման միջոց կիրառվել է կալանավորումը՝ երկու ամիս ժամկետով:
2017 թվականի հուլիսի 6-ին որոշում է կայացվել Ամիր Սաբերի Ղավամիի՝ Երևան քաղաքի Մոլդովական 32/4 հասցեի տան խուզարկությամբ հայտնաբերված դեղահաբերը ճանաչվել են իրեղեն ապացույց:
2017 թվականի հուլիսի 19-ին որոշում է կայացվել թիվ 09160917 քրեական գործից թիվ 09104317 քրեական գործն անջատելու մասին:
2017 թվականի հուլիսի 31-ին կազմվել է մեղադրական եզրակացությունը, որը 2017 թվականի օգոստոսի 4-ին հաստատվել է Արաբկիր և Քանաքեռ-Զեյթուն վարչական շրջանների դատախազ Բ.Ղազինյանի կողմից:
2. Երևան քաղաքի Արաբկիր և Քանաքեռ–Զեյթուն վարչական շրջանների ընդհանուր իրավասության առաջին ատյանի դատարանում քրեական գործն ստացվել է 2017 թվականի օգոստոսի 8–ին:
Դատավորների միջև քրեական գործերի բաշխման մակագրման եղանակով, քրեական գործը` թիվ ԵԱՔԴ/0125/01/17 համարի ներքո, մակագրվել և 2017 թվականի օգոստոսի 8-ին հանձնվել է նույն դատարանի դատավոր Ա.Նիկողոսյանին։
2017 թվականի օգոստոսի 8–ին կայացվել է քրեական գործը վարույթ ընդունելու մասին որոշում։
2017 թվականի օգոստոսի 23–ին քրեական գործը նշանակվել է դատական քննության։
3. Ամիր Սաբերի Ղավամին մեղադրվում է այն բանի համար, որ նա, խախտելով թմրամիջոցների և հոգեմետ /հոգեներգործուն նյութերի մասին 2002թ. դեկտեմբերի 26-ի ՀՀ օրենքի և ՀՀ Կառավարության 2010թ. մարտի 18-ի թիվ 270-Ն որոշման պահանջները, գործով դեռևս չպարզված ժամանակ և հանգամանքներում, անհայտ անձից իրացնելու նպատակով ապօրինի ձեռք է բերել թմրանյութ հանդիսացող մեթադոն տեսակի դեղահաբեր, որոնցից 2017թ. հունվար ամսին թվով 1 հատ դեղահաբ ապօրինի իրացրել է Մեհդի Էսմաիլի Փերմանունիին:
Այսինքն՝ Ամիր Սաբերի Ղավամիին մեղսագրվում է արարք՝ նախատեսված ՀՀ քրեական օրենսգրքի 266-րդ հոդվածի 1-ին մասով:
Բացի այդ՝ Ամիր Սաբերի Ղավամին, խախտելով թմրամիջոցների և հոգեմետ /հոգեներգործուն նյութերի մասին 2002թ. դեկտեմբերի 26-ի ՀՀ օրենքի և ՀՀ Կառավարության 2010թ. մարտի 18-ի թիվ 270-Ն որոշման պահանջները, գործով դեռևս չպարզված ժամանակ և հանգամանքներում, անհայտ անձից իրացնելու նպատակով ապօրինի ձեռք է բերել թմրանյութ հանդիսացող մեթադոն տեսակի դեղահաբեր, որոնցից 2017թ. հունվար ամսին թվով 1 հատ դեղահաբ ապօրինի իրացրել է Մեհդի Էսմաիլի Փերմանունիին:
Այսինքն՝ Ամիր Սաբերի Ղավամիին մեղսագրվում է արարք՝ նախատեսված ՀՀ քրեական օրենսգրքի 266-րդ հոդվածի 1-ին մասով:
Բացի այդ՝ Ամիր Սաբերի Ղավամին գործով չպարզված ժամանակ և հանգամանքներում, առանց իրացնելու նպատակի, խախտելով թմրամիջոցների և հոգեմետ /հոգեներգործուն նյութերի մասին 2002թ. դեկտեմբերի 26-ի ՀՀ օրենքի և ՀՀ Կառավարության 2010թ. մարտի 18-ի թիվ 270-Ն որոշման պահանջները, անհայտ անձից ապօրինի ձեռք է բերել և պահել թմրանյութ հանդիսացող, զգալի չափի՝ ընդհանուրը 0.355 գրամ հաստատուն քաշով «M 40/66p» գրառմամբ թվով 10 հատ մեթադոն տեսակի դեղահաբեր, որոնք էլ հայտնաբերվել են 2017թ. ապրիլի 26-ին Ամիր Սաբերի Ղավամիի բնակության վայրում՝ Երևան քաղաքի Մոլդովական 32/4 հասցեի տանը կատարված խուզարկությամբ և առգրավվել են:
Այսինքն՝ Ամիր Սաբերի Ղավամիին մեղսագրվում է արարք՝ նախատեսված ՀՀ քրեական օրենսգրքի 268-րդ հոդվածի 1-ին մասով:
Այսպիսով՝ Ամիր Սաբերի Ղավամիին մեղսագրվում են արարքներ՝ նախատեսված ՀՀ քրեական օրենսգրքի ՀՀ քրեական օրենսգրքի 266–րդ հոդվածի 1-ին մասով՝ 2 դրվագով, և 268-րդ հոդվածի 1-ին մասով՝ 1 դրվագով:

Արագացված դատական քննություն.
4. Մինչ դատաքննությունը սկսելն ամբաստանյալ Ամիր Սաբերի Ղավամին միջնորդեց դատական քննությունն անցկացնել արագացված կարգով` միաժամանակ հայտարարելով, որ միջնորդությունը ներկայացրել է կամավոր, խորհրդակցել է իր Պաշտպանների հետ, գիտակցում է արագացված դատաքննություն անցկացնելու բնույթն ու հետևանքները, առաջադրված մեղադրանքն իրեն պարզ և հասկանալի է, դրան համաձայն է և ընդունում է այն ամբողջ ծավալով:
Մեղադրողը հայտնեց, որ չի առարկում արագացված դատական քննության դեմ։
5. Դատական քննության ընթացքում Մեղադրողը որպես ամբաստանյալ Ամիր Սաբերի Ղավամիի անձը բնութագրող, պատասխանատվությունն ու պատիժը մեղմացնող տվյալներ նշեց, որ նա ունի բարձրագույն կրթություն, ամուսնացած է, նախկինում դատված չէ, իր կողմից կատարված արարքներում իրեն լիովին մեղավոր է ճանաչում և զղջում է կատարածի համար: Միևնույն ժամանակ, Դատախազը նշեց, որ Ամիր Սաբերի Ղավամիի պատասխանատվությունն ու պատիժը ծանրացնող հանգամանքներ չկան:
Դատական քննության ընթացքում Պաշտպանը նշեց, որ Ամիր Սաբերի Ղավամին բնութագրվում է դրական, նախկինում դատված չէ, ցանկանում է ՀՀ-ում տնտեսական գործունեություն ծավալել:
Պաշտպանը ներկայացրեց «Ռայան Փարս» ընկերության գործադիր տնօրենի կողմից տրված հետևյալ բովանդակությամբ բնութագիրը. «(...)[Պ]րն Ամիր Ղավամին հանդիսանում է ընկերության լավագույն և խոշոր բաժնետերը, հանդիսանում է տնտեսության մեջ ամենաազդեցիկներից մեկը: Ես և իմ գործընկերը մինչ այսօր (...) չենք տեսել որևէ սխալ կամ անմարդկային արարք: (...) [Պ]րն Ամիր Ղավամին (...) միշտ օգնություն է ցուցաբերել կարիքավորներին և ավելի ցածր մակարդակում գտնվող աշխատողներին (...)»։
Պաշտպանը ներկայացրեց Ամիր Ղավամիի հարևանների կողմից տրված հետևյալ բովանդակությամբ բնութագիրը. «(...)[Պ]րն Ամիր Ղավամին և նրա ընտանիքը հանդիսանում են մեր լավագույն հարևաններից մեկը: Մինչև այսօր (...) ականատես չենք եղել որևէ անօրինական կամ անմարդկային գործողությանը: Պրն Ամիր Ղավամին կրոնապաշտ է, հասուն և սկզբունքային մարդ, որը հաստատվում է մեր կողմից: (...)»։
Բացի այդ՝ Պաշտպանը ներկայացրեց Ամիր Ղավամիի առևտրային և ձեռնարկատիրական գործունեությամբ զբաղվող անձանց կողմից տրված հետևյալ բովանդակությամբ բնութագիրը. «(...)[Ն]ա [Ղավամին] հանդիսանում է աշխատանքի վայրում լավագույն և ամենակարգապահ անձը: Նրա հատկություններից է ցուցաբերելու օգնություն կարիքավորներին և ավելի ցածր մակարդակում գտնվող աշխատողներին: Նա կազմակերպված է և հետևողական է բոլոր մարդկային սկզբունքներին թե աշխատանքի վայրում և թե բնակության վայրում: (...)»։
Միևնույն ժամանակ, Պաշտպանը Դատարանից խնդրեց նշանակել հնարավորինս մեղմ պատիժ և կիրառել ՀՀ քրեական օրենսգրքի 70–րդ հոդվածը, այն է` նշանակված պատիժը պայմանականորեն չկիրառել։
Ամբաստանյալ Ամիր Սաբերի Ղավամին ըստ էության միացավ իր Պաշտպանի դիրքորոշմանը, հայտնեց, որ զղջում է իր կատարած հանցանքների համար և խնդրում է մեղմ պատիժ նշանակել։

Դատարանի իրավական վերլուծությունը և եզրահանգումը.
6. Լսելով Ամբաստանյալի դիրքորոշումն իր առաջադրված մեղադրանքի վերաբերյալ, հաշվի առնելով մինչև դատաքննությունը սկսվելն իր կամքով և Պաշտպանների հետ խորհրդակցելուց հետո ներկայացրած միջնորդությունն արագացված դատաքննություն կիրառելու վերաբերյալ, ինչպես նաև այդ կապակցությամբ Մեղադրողի, Պաշտպանների հայտնած դիրքորոշումը՝ Դատարանը գտնում է, որ սույն քրեական գործով անհրաժեշտ է անդրադառնալ հետևյալ իրավական հարցին. արդյո՞ք թիվ ԵԱՔԴ/0125/01/17 քրեական գործով` ըստ մեղադրանքի Ամիր Սաբերի Ղավամի` ՀՀ քրեական օրենսգրքի 266–րդ հոդվածի 1-ին մասով (2 դրվագ) և 268-րդ հոդվածի 1-ին մասով, առկա են ՀՀ քրեական դատավարության օրենսգրքի 375.1–րդ և 375.2–րդ հոդվածներով ամրագրված պայմանները` դատական քննության արագացված կարգ կիրառելու համար։
7. ՀՀ քրեական դատավարության օրենսգրքի 375.1-րդ հոդվածի համաձայն`
«1. Եթե մեղադրողը մեղադրական եզրակացությունում չի առարկել արագացված կարգ կիրառելու դեմ, ապա ամբաստանյալը կամ մեղադրյալն իրեն առաջադրված մեղադրանքի հետ համաձայնվելու դեպքում իրավունք ունի միջնորդելու արագացված դատական քննության կարգ կիրառելու մասին այն հանցագործություններով, որոնց համար Հայաստանի Հանրապետության քրեական օրենսգրքով նախատեսված պատիժը չի գերազանցում 10 տարի ժամկետով ազատազրկումը։
Մինչև դատաքննությունն սկսելը մեղադրողը դատարանի առաջարկությամբ կարող է իր դիրքորոշումը փոխել, թեպետ արագացված կարգ կիրառելու դեմ առարկել է մեղադրական եզրակացությունում։
2. Սույն հոդվածի առաջին մասով նախատեսված դեպքում դատարանը կիրառում է դատական քննության արագացված կարգ, եթե`
1) ամբաստանյալը գիտակցում է իր կողմից ներկայացված միջնորդության բնույթը և հետևանքները, և
2) միջնորդությունը ներկայացված է կամավոր, և
3) պաշտպանի հետ խորհրդակցելուց հետո, եթե ամբաստանյալն ունի այդպիսին։
3. Դատարանը, գտնելով, որ ամբաստանյալի կողմից միջնորդություն ներկայացնելիս չեն պահպանվել սույն հոդվածի առաջին կամ երկրորդ մասերով նախատեսված պայմանները, որոշում է ընդունում ընդհանուր կարգով դատաքննություն անցկացնելու մասին։
Դատարանը արագացված կարգ կիրառելու միջնորդությունը մերժում է նաև, եթե պարզում է, որ ամբաստանյալի արարքի իրավաբանական որակումը ճիշտ չէ։ (…) Ամբաստանյալի կամ մեղադրյալի անմեղսունակության առնչությամբ հիմնավոր կասկածների առկայության դեպքում դատարանը մերժում է արագացված կարգ կիրառելու միջնորդությունը՝ անցնելով ընդհանուր կարգով գործի քննությանը։
(…)»։
ՀՀ քրեական դատավարության օրենսգրքի 375.3-րդ հոդվածի համաձայն`
«(…)
4. Հարցերի արդյունքում դատարանը, համոզվելով, որ առկա են սույն օրենսգրքի 375.1 հոդվածով նախատեսված պայմանները, որոշում է կայացնում արագացված կարգով դատական քննություն անցկացնելու մասին։ Հակառակ դեպքում դատական քննությունն իրականացվում է ընդհանուր կարգով։
5. Դատարանը արագացված կարգով դատական քննություն անցկացնելիս քրեական գործով ձեռք բերված ապացույցների ընդհանուր կարգով սահմանված հետազոտություն չի կատարում։ Սակայն ուսումնասիրում է ամբաստանյալի անձը բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքները։
6. Դատարանն արագացված կարգով դատական քննության արդյունքում մեղադրական դատավճիռ կայացնելիս նշանակում է պատիժ, որը չի կարող գերազանցել կատարված հանցագործության համար նախատեսված առավել խիստ պատժի երկու երրորդը, իսկ եթե առավել խիստ պատժի երկու երրորդը փոքր է տվյալ հանցագործության համար նախատեսված առավել մեղմ պատժից` ապա առավել մեղմ պատիժը։
(…)
8. Սույն օրենսգրքի 168 հոդվածի առաջին մասի 2-8-րդ կետերով նախատեսված դատական ծախսերն ամբաստանյալից ենթակա չեն բռնագանձման»։
8. ՀՀ սահմանադրական դատարանը 2010 թվականի դեկտեմբերի 28–ի թիվ ՍԴՈ-931 որոշման 6-րդ, 8-րդ և 11-րդ կետերում հայտնել է հետևյալ իրավական դիրքորոշումը. «(…) Արագացված կարգով դատական քննությունը քրեական դատավարության ձև է, որն օրենքով սահմանված կարգով միտված է գործն առավել սեղմ ժամկետում և պարզեցված կանոններով լուծելուն։ Այս ինստիտուտի առանցքում «գործարքն» է քրեական դատավարության երկու կողմերի` մեղադրանքի և պաշտպանության կողմերի միջև, որի շրջանակներում մեղադրյալը համաձայնում է առաջադրված մեղադրանքին, ինչի դիմաց նրա համար երաշխավորվում է պատժի այնպիսի չափ, որը չի կարող գերազանցել կատարված հանցագործության համար նախատեսված առավել խիստ պատժի երկու երրորդը, իսկ եթե առավել խիստ պատժի երկու երրորդը փոքր է տվյալ հանցագործության համար նախատեսված առավել մեղմ պատժից` ապա առավել մեղմ պատիժ, ինչպես նաև ամբաստանյալն ազատվում է ՀՀ Քրեական դատավարության օրենսգրքի 168-րդ հոդվածի 1-ին մասի 2-8-րդ կետերով նախատեսված դատական ծախսերից։ Համաձայնելով արագացված դատաքննությանը` ամբաստանյալը նաև կամովին հրաժարվում է մի շարք սահմանադրաիրավական երաշխիքներից, այն է` անմեղության կանխավարկածի սկզբունք, գործի հրապարակային քննության և այլ իրավունքներ։ Մյուս կողմից` մեղադրողը հրաժարվում է մեղադրանքը պաշտպանելու իր գործառույթը լրիվ ծավալով իրականացնելուց` դրանով հնարավորություն ստանալով տնտեսել իր միջոցները, ինչպես նաև մեղադրյալին (ամբաստանյալին) խրախուսել համագործակցելու քրեական հետապնդման մարմինների հետ»։
ՀՀ սահմանադրական դատարանը միևնույն որոշման 6–րդ կետում անդրադարձել է նաև արագացված դատաքննության ինստիտուտի՝ որպես քրեական դատավարության տարբերակված վարույթի տեսակի, 1987 թվականին Եվրոպայի խորհրդի նախարարների կոմիտեի «Քրեական արդարադատության պարզեցման վերաբերյալ» թիվ R (87) 18 հանձնարարականում կատարված վերլուծությանը, որը Դատարանի համոզմամբ կիրառելի է նաև սույն գործի շրջանակներում` հաշվի առնելով, որ 2015 թվականի դեկտեմբերի 6–ի խմբագրությամբ ՀՀ Սահմանադրության 81–րդ հոդվածի պահանջն է ՀՀ Սահմանադրությամբ նախատեսված հիմնարար իրավունքների, այդ թվում անձի իրավունքների և ազատությունների արդյունավետ դատական պաշտպանության վերաբերյալ ՀՀ Սահմանադրությունում ամրագրված նորմերը մեկնաբանելիս հաշվի առնել Հայաստանի Հանրապետության վավերացրած՝ մարդու իրավունքների վերաբերյալ միջազգային պայմանագրերի հիման վրա գործող մարմինների պրակտիկան:
Ըստ վկայակոչված հանձնարարականի` արագացված դատաքննության ինստիտուտն ուղղված է քրեական արդարադատության համակարգի գործունեությունն արագացնելուն և պարզեցնելուն, մասնավորապես՝ ողջամիտ ժամկետում քրեական գործի լուծման վերաբերյալ միջազգային չափանիշները և պահանջներն ապահովելու պետության պարտավորությունն արդյունավետ իրականացնելուն, հանցագործությունների քննությունն իրականացնելիս հապաղումները վերացնելուն, որոնք կասկածի տակ են դնում քրեական օրենքի հեղինակությունը և ազդում արդարադատության պատշաճ իրականացման վրա, ինչպես նաև պետության քրեական քաղաքականության գերակա խնդիրներն արդյունավետ լուծելուն։
Որպես քննարկվող ինստիտուտի նպատակներ` հանձնարարականում նշված են, ի թիվս այլնի.
ա) դատավարական տնտեսումը, այսինքն` առանձին քրեական գործերով ժամանակի, միջոցների և ջանքերի կրճատումը` դրանք ավելի բարդ գործերի վարույթի համար օգտագործելու նպատակով,
բ) հանցագործության կատարման և պատժի նշանակման միջև ընկած ժամանակահատվածի կրճատումը, նպատակ ունենալով ուժեղացնել դատավարության և քրեական պատժի նախազգուշական ազդեցությունը,
գ) կողմերին հաշտեցնելը և այլն։
9. ՀՀ վճռաբեկ դատարանը թիվ ԵԿԴ/0209/01/10 քրեական գործով Շողակաթ Ամիրխանյանի և Գառնիկ Ֆարմանյանի վերաբերյալ 2011 թվականի փետրվարի 24–ին կայացված որոշման 24–րդ կետերում հայտնել է.
«(…) [Դ]ատական քննության արագացված կարգի կիրառման համար, ի թիվս այլոց, անհրաժեշտ են հետևյալ պայմանները.
1) ամբաստանյալը կամ մեղադրյալն իր միջնորդության մեջ հայտարարել է առաջադրված մեղադրանքի հետ համաձայն լինելու և արագացված դատական քննության կարգ կիրառելու մասին,
2) ամբաստանյալը կամ մեղադրյալը գիտակցում է իր ներկայացրած միջնորդության բնույթն ու հետևանքները,
3) միջնորդությունը ներկայացված է կամավոր, պաշտպանի հետ խորհրդակցելուց հետո և ՀՀ քրեական դատավարության օրենսգրքի 375.2-րդ հոդվածով նախատեսված ժամանակահատվածում, այն է՝ քրեական գործը դատարան ուղարկելու պահից մինչև դատաքննությունն սկսվելը,
4) մեղադրողը չի առարկում արագացված կարգ կիրառելու դեմ,
5) անձը մեղադրվում է այնպիսի հանցանք գործելու մեջ, որի համար նախատեսված պատիժը չի գերազանցում 10 տարի ժամկետով ազատազրկումը»:
10. Սույն դատավճռի 7–ից 9–րդ կետերում մատնանշված իրավական նորմերը, ՀՀ Սահմանադրական դատարանի և ՀՀ վճռաբեկ դատարանի արտահայտած իրավական դիրքորոշումները համադրելով սույն դատավճռի 3–ից 5–րդ կետերում նշված փաստական հանգամանքների հետ, Դատարանն արձանագրում է հետևյալը.
ա) ամբաստանյալ Ամիր Սաբերի Ղավամին իր միջնորդության մեջ հայտարարել է առաջադրված մեղադրանքին համաձայն լինելու և արագացված դատական քննության կարգ կիրառելու մասին,
բ) ամբաստանյալ Ամիր Սաբերի Ղավամին գիտակցել է իր ներկայացրած միջնորդության բնույթն ու հետևանքները,
գ) միջնորդությունը ներկայացվել է կամավոր, պաշտպաններ Ի.Պետրոսյանի և Ա.Սահակյանի հետ խորհրդակցելուց հետո և ՀՀ քրեական դատավարության օրենսգրքի 375.2–րդ հոդվածով նախատեսված ժամանակահատվածում, մինչև դատաքննությունը սկսվելը։
դ) Մեղադրողը չի առարկել արագացված կարգ կիրառելու դեմ,
ե) ամբաստանյալ Ամիր Սաբերի Ղավամին մեղադրվում է ՀՀ քրեական օրենսգրքի 266–րդ հոդվածի 1-ին մասով (2 դրվագ) և 268-րդ հոդվածի 1-ին մասով նախատեսված հանցանքներ գործելու մեջ, որոնց համար նախատեսված պատիժը չի գերազանցում 10 տարի ժամկետով ազատազրկումը։
Հաշվի առնելով «ա»–ից «ե» կետում շարադրված փաստական հանգամանքները, Դատարանը գտնում է, որ առկա են ՀՀ քրեական դատավարության օրենսգրքի 375.1-րդ և 375.2-րդ հոդվածներով նախատեսված պայմանները արագացված կարգով դատական քննություն անցկացնելու մասին։
Հիմք ընդունելով վերոգրյալը` Դատարանը, գործով ձեռք բերված ապացույցների ընդհանուր կարգով սահմանված հետազոտություն չկատարելով, հանգում է այն հետևության, որ Ամիր Սաբերի Ղավամին մեղավորությամբ կատարել է սույն դատավճռի 3-րդ կետում արձանագրված` ՀՀ քրեական օրենսգրքի 266–րդ հոդվածի 1-ին մասով (2 դրվագ) և 268-րդ հոդվածի 1-ին մասով իրեն մեղսագրվող արարքները։
11. Հաստատված համարելով ամբաստանյալ Ամիր Սաբերի Ղավամիի մեղավորությունն իրեն մեղսագրվող հանցանքի կատարման մեջ` Դատարանը գտնում է, որ անհրաժեշտ է անդրադառնալ ամբաստանյալին մեղսագրվող արարքների համար պատժի նշանակման հետ կապված իրավական հարցերի հետևյալ խմբին.
ա) ապացուցված են արդյո՞ք Ամիր Սաբերի Ղավամիի պատասխանատվությունը մեղմացնող կամ ծանրացնող հանգամանքների առկայությունը.
բ) ենթակա է արդյո՞ք պատժի ամբաստանյալ Ամիր Սաբերի Ղավամին իր կատարած հանցանքի համար.
գ) ի՞նչ պատիժ պետք է նշանակվի ամբաստանյալ Ամիր Սաբերի Ղավամի նկատմամբ.
դ) ամբաստանյալ Ամիր Սաբերի Ղավամին արդյո՞ք պետք է կրի իր նկատմամբ նշանակված պատիժը։
12. Պատասխանելով սույն դատավճռի 11–րդ կետի «ա» ենթակետով բարձրացված իրավական հարցին` Դատարանն անհրաժեշտ է համարում նշել հետևյալը.
ՀՀ քրեական օրենսգրքի 61–րդ հոդվածի համաձայն`
«(…)
2. Պատժի տեսակը և չափը որոշվում են հանցագործության հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով:
(…)»
ՀՀ քրեական օրենսգրքի 63-րդ հոդվածը սահմանում է պատասխանատվությունը և պատիժը ծանրացնող հանգամանքների սպառիչ ցանկը:
13. Նախորդ կետում վկայակոչված իրավադրույթները համադրելով սույն դատավճռում արձանագրված փաստական տվյալների հետ` Դատարանն արձանագրում է, որ քրեական գործում առկա չեն ամբաստանյալ Ամիր Սաբերի Ղավամիի պատասխանատվությունն ու պատիժը մեղմացնող և ծանրացնող հանգամանքներ:
Միևնույն ժամանակ, Դատարանը որպես ամբաստանյալ Ամիր Սաբերի Ղավամիի անձը բնութագրող տվյալ է դիտարկում նրա` նախկինում դատված չլինելը` համաձայն ՀՀ ոստիկանության ինֆորմացիոն կենտրոնից 2017 թվականի օգոստոսի 17–ին ստացված թիվ Ե-0017/17 գրության։
14. Պատասխանելով սույն դատավճռի 11–րդ կետի «բ» ենթակետով բարձրացված իրավական հարցին` Դատարանն անհրաժեշտ է համարում նշել, որ այն դեպքում, երբ հաստատված է համարվում անձի կողմից քրեական օրենքով արգելված հանցանքի կատարման փաստական հանգամանքը, ապա անհրաժեշտություն է առաջանում կյանքի կոչել քրեական իրավունքի հիմքում ընկած պատասխանատվության անխուսափելիության սկզբունքը (նպատակ ունենալով վերականգնել սոցիալական արդարությունը, ուղղել հանցանք կատարած անձին և կանխել հետագա հանցագործությունների կատարումը` հանցավորի մոտ ձևավորելով իրավահպատակ վարքագիծ և ապահովելով նրա վերասոցիալականացումը հասարակությունում), բացառությամբ այն դեպքերի, երբ ՀՀ քրեական օրենսգրքի ընդհանուր մասում նախատեսված մեխանիզմների ուժով անձը կարող է ենթակա չլինել պատժի օրենքի ուժով (Ex lege):
Համադրելով վերոնշյալ դիրքորոշումը ամբաստանյալ Ամիր Սաբերի Ղավամիի կողմից խարդախություն կատարելու վերաբերյալ հաստատված փաստական հանգամանքների հետ՝ Դատարանն արձանագրում է, որ առկա է անհրաժեշտություն կատարված հանցանքների կապակցությամբ վերականգնել սոցիալական արդարությունը, ուղղել ամբաստանյալին և կանխել հետագա հնարավոր հանցագործությունները` այդ կերպ նպաստելով ամբաստանյալի իրավահպատակ վարքագծի ձևավորմանը և նրա վերասոցիալականացմանը հասարակությունում։ Միևնույն ժամանակ, Դատարանն արձանագրում է, որ սույն քրեական գործով ամբաստանյալի պատժի ենթակա չլինելու օրենքի ուժով նախատեսված հիմքերը բացակայում են։
Այսինքն, Դատարանը գտնում է, որ ամբաստանյալ Ամիր Սաբերի Ղավամին ենթակա է պատժի` իր կողմից կատարված հանցանքների համար։
15. Պատասխանելով սույն դատավճռի 11–րդ կետի «գ» ենթակետով բարձրացված իրավական հարցին` Դատարանն անհրաժեշտ է համարում նշել հետևյալը.
ՀՀ քրեական օրենսգրքի 10-րդ հոդվածի համաձայն` «Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար»:
ՀՀ քրեական օրենսգրքի 48-րդ հոդվածի 2-րդ մասի համաձայն`
«Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները»:
ՀՀ քրեական օրենսգրքի 61-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները»:
(…)
ՀՀ քրեական դատավարության օրենսգրքի 375.3–րդ հոդվածի համաձայն`
«(…)
6. Դատարանն արագացված կարգով դատական քննության արդյունքում մեղադրական դատավճիռ կայացնելիս նշանակում է պատիժ, որը չի կարող գերազանցել կատարված հանցագործության համար նախատեսված առավել խիստ պատժի երկու երրորդը, իսկ եթե առավել խիստ պատժի երկու երրորդը փոքր է տվյալ հանցագործության համար նախատեսված առավել մեղմ պատժից` ապա առավել մեղմ պատիժը։
(…)
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի տեսակները»:
Պատիժ նշանակելու ընդհանուր սկզբունքներին վճռաբեկ դատարանն անդրադարձել է Նարեկ Սարգսյանի վերաբերյալ 2011 թվականի դեկտեմբերի 22-ի թիվ ԵԿԴ/0042/01/11 գործով կայացված որոշման մեջ, որտեղ իրավական դիրքորոշում է ձևավորել այն մասին, որ «(...) [Պ]ատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են`
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
(…) [Պ]ատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների (…) պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ` ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները` ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն»։
ՀՀ վճռաբեկ դատարանի ձևավորած կայուն նախադեպային իրավունքի համաձայն՝ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ, ինչի վերաբերյալ վճռաբեկ դատարանն իրավական դիրքորոշում է ձևավորել Արարատ Ավագյանի և Վահան Սահակյանի գործով 2014 թվականի հոկտեմբերի 31-ի թիվ ԵԿԴ/0252/01/13 որոշման 39–րդ կետում հայտնել է հետևյալը.
«(…) Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից։ Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման։ Քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են։ Հետևաբար կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա։ Նշված հանգամանքների գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից:
(…)
Այսպիսով, նշանակվող պատժի արդարացիության հիմնական պահանջն այն է, որ պատիժը պետք է համապատասխանի հանցագործության հանրային վտանգավորության աստիճանին և բնույթին (հանցագործության` հանրության համար վտանգավորության աստիճանի և բնույթի հարցերի վերաբերյալ մանրամասն տե՛ս Գարուշ Մադաթյանի վերաբերյալ վճռաբեկ դատարանի 2009 թվականի փետրվարի 17-ի ԵՇԴ/0029/01/08 որոշման 14-րդ կետը)։
Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա։
(…) Պատժի անհատականացման սկզբունքի բովանդակության հիմնական մասն է կազմում նաև հանցավորի անձը բնութագրող տվյալների գնահատումը, որոնք իրենց ամբողջության մեջ հնարավորություն են տալիս անձին դիտել ոչ միայն որպես հանցանք կատարող, որը պետք է պատասխանատվություն կրի, այլ նաև որպես կոնկրետ անձ՝ իր անհատական հատկանիշներով։ Ընդ որում՝ անձի այն հատկանիշները, որոնք գտնվում են հանցակազմից դուրս, նշանակություն են ունենում դատարանի կողմից պատժի տեսակը և չափը որոշելիս։ Որպես հանցավորի անձը բնութագրող հատկանիշներ՝ գնահատվում են նրա սոցիալ-հոգեբանական, սոցիալ-ժողովրդագրական հատկությունները՝ վարքագիծն ընտանիքում և կենցաղում, աշխատանքի նկատմամբ ունեցած վերաբերմունքը, կրթությունը, առողջական վիճակը, տարիքը, ծառայությունը պետության և հասարակության առջև և այլն»։
16. Վերը վկայակոչված իրավական դիրքորոշումների հիման վրա` Դատարանն անհրաժեշտ է համարում նշել.
Սույն դատավճռում շարադրված իրավադրույթների, դրանց վերլուծության արդյունքում ձևավորված դատողությունների և ՀՀ վճռաբեկ դատարանի իրավական դիրքորոշումների լույսի ներքո գնահատելով ամբաստանյալ Ամիր Սաբերի Ղավամիի կատարված հանցագործությունների բնույթը և հանրության համար վտանգավորության աստիճանը, այդ թվում` նրա հանցավոր մտադրության իրականացման աստիճանը, խախտված հասարակական հարաբերության սոցիալական նշանակությունը, այդ ոլորտում պետության քրեական քաղաքականության ուղղվածությունը, հանցանքները կատարելուց հետո ամբաստանյալի դրսևորած վարքագիծը, դրանք համադրելով սույն դատավճռի 13-րդ կետում արձանագրված՝ նրա պատասխանատվությունը և պատիժը մեղմացնող հանգամանքների, այնպես էլ ծանրացնող հանգամանքների բացակայության պայմաններում՝ Դատարանը հանգում է այն հետևության, որ տվյալ դեպքում մեղսագրվող ՀՀ քրեական օրենսգրքի 266-րդ և 268-րդ հոդվածների սանկցիաներով նախատեսված ազատազրկում պատժատեսակի նվազագույն չափին մոտ պատժատեսակի միջոցով հնարավոր է ապահովել պատժի նպատակների իրացվելիությունը:
Այսինքն` Դատարանը գտնում է, որ ամբաստանյալ Ամիր Սաբերի Ղավամիի նկատմամբ պատիժ պետք է նշանակել ազատազրկում պատժատեսակը, որի ռեալ (իրական) կիրառման միջոցով հնարավոր կլինի ապահովել ՀՀ քրեական օրենսգրքի 48-րդ հոդվածով նախատեսված` պատժի նպատակների իրացվելիությունը: Տվյալ դեպքում նշանակվող ազատազրկումը բխում է նաև ՀՀ քրեական օրենսգրքի 10-րդ և 61-րդ հոդվածներով սահմանված` արդարության և պատասխանատվության անհատականացման, պատիժ նշանակելու ընդհանուր սկզբունքներից։
Մինչև դատավճռի օրինական ուժի մեջ մտնելը Ամիր Սաբերի Ղավամիի նկատմամբ որպես խափանման միջոց կիրառված կալանավորումը թողնել անփոփոխ:
17. Պատասխանելով սույն դատավճռի 11–րդ կետի «դ» ենթակետով բարձրացված իրավական հարցին` Դատարանն անհրաժեշտ է համարում նշել հետևյալը.
Նկատի ունենալով ամբաստանյալ Ամիր Սաբերի Ղավամիի կողմից քրեական օրենքով արգելված արարքի կատարման եղանակը, բնույթը, հանրային վտանգավորության և հանցավոր մտադրության իրականացման աստիճանը, Դատարանը գտնում է, որ ամբաստանյալի նկատմամբ անհրաժեշտ է կիրառել քրեաիրավական ներգործության միջոց, որն անմիջականորեն պետք է ներգործի ամբաստանյալի նկատմամբ` ունենալով կանխարգելիչ (պրևենտիվ) բնույթ, ապագայում համանման արարքների կատարումը բացառելու համար։
Այսինքն, Դատարանը գտնում է, որ ամբաստանյալ Ամիր Սաբերի Ղավամին պետք է կրի իր նկատմամբ նշանակվող պատիժը։
Միևնույն ժամանակ, անդրադառնալով պատժի կրման սկզբի հաշվարկման մեխանիզմին` Դատարանը գտնում է, որ ամբաստանյալ Ամիր Սաբերի Ղավամիի պատժի կրման սկիզբը պետք է հաշվել Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի կողմից կայացված՝ «Կալանավորումը որպես խափանման միջոց կիրառելու միջնորդությունը քննելու վերաբերյալ» 2017 թվականի մայիսի 4-ի որոշման արդյունքում նրա` փաստացի արգելանքի վերցված լինելու պահից։
18. Անդրադառնալով որպես իրեղեն ապացույց ճանաչված` Ամիր Սաբերի Ղավամիի Երևան քաղաքի Մոլդովական 32/4 հասցեում գտնվող տանը 26.04.2017թ. կատարված խուզարկությամբ առգրավված դեղահաբերը, որոնցից թվով 10 հատ դեղահաբերը պարունակում են մեթադոն տեսակի թմրանյութ, դրանք պետք է ոչնչացնել սույն դատավճիռն օրինական ուժի մեջ մտնելուց հետո։
Անդրադառնալով ամբաստանյալ Ամիր Սաբերի Ղավամիի նկատմամբ ընտրված` խափանման միջոց կալանավորմանը, Դատարանը գտնում է, որ մինչև սույն դատավճռի օրինական ուժի մեջ մտնելն այն պետք է թողնել անփոփոխ` դատական ակտի հնարավոր բողոքարկման դեպքում ամբաստանյալի դատավարական պարտականությունների պատշաճ կատարումն ապահովելու համար:
Դատարանը նաև գտնում է, որ դատական ծախսերի հարցը պետք է համարել լուծված, քանի որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախսը բացակայում է, իսկ նշված հոդվածի նույն մասի 2-ից 8-րդ կետերով նախատեսված դատական ծախսերը, համաձայն ՀՀ քրեական դատավարության օրենսգրքի 375.3-րդ հոդվածի 8-րդ մասի` ամբաստանյալից բռնագանձման ենթակա չեն:
Միևնույն ժամանակ, Դատարանն արձանագրում է, որ առկա չէ որևէ հիմք` ամբաստանյալի նկատմամբ հարկադիր բուժում կամ խնամակալություն նշանակելու համար, գործով բռնագանձման ենթակա գույք չկա:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360-րդ, 365-րդ, 369-372-րդ, 375.3-375.4-րդ հոդվածներով` Դատարանը`

ՎՃՌԵՑ`

Ամիր Սաբերի Ղավամիին մեղավոր ճանաչել ՀՀ քրեական օրենսգրքի 266–րդ հոդվածի 1-ին մասով նախատեսված հանցագործություն կատարելու մեջ և նրա նկատմամբ պատիժ նշանակել ազատազրկում` 3 (երեք) տարի ժամկետով։
Ամիր Սաբերի Ղավամիին մեղավոր ճանաչել ՀՀ քրեական օրենսգրքի 266–րդ հոդվածի 1-ին մասով նախատեսված հանցագործություն կատարելու մեջ, և նրա նկատմամբ պատիժ նշանակել ազատազրկում` 3 (երեք) տարի ժամկետով։
Ամիր Սաբերի Ղավամիին մեղավոր ճանաչել ՀՀ քրեական օրենսգրքի 268-րդ հոդվածի 1-ին մասով նախատեսված հանցագործություն կատարելու մեջ և նրա նկատմամբ պատիժ նշանակել ազատազրկում` 5 (հինգ) ամիս ժամկետով։
ՀՀ քրեական օրենսգրքի 66-րդ հոդվածի 3–րդ մասի կանոններով, հանցանքների համակցությամբ, սույն գործով նշանակված պատիժները մասնակիորեն գումարելով` վերջնական պատիժ նշանակել ազատազրկում 4 (չորս) տարի ժամկետով։
Ամիր Սաբերի Ղավամիի պատժի կրման ժամկետի սկիզբը հաշվել նրան փաստացի արգելանքի վերցնելու պահից՝ 2017 թվականի մայիսի 4-ից :
Ամիր Սաբերի Ղավամիի նկատմամբ որպես խափանման միջոց ընտրված կալանավորումը թողնել անփոփոխ` մինչև դատավճռի օրինական ուժի մեջ մտնելը:
Որպես իրեղեն ապացույց ճանաչված` 10 հատ դեղահաբերը ոչնչացնել:
Դատավճռի ծախսերի հարցը համարել լուծված։
Դատավճիռը կարող է բողոքարկվել ՀՀ քրեական վերաքննիչ դատարան հրապարակվելու օրվանից հետո` մեկամսյա ժամկետում, բացառությամբ ՀՀ քրեական դատավարության օրենսգրքի 395–րդ հոդվածի 1–ին կետով նախատեսված հիմքի։



ԴԱՏԱՎՈՐ` Ա.ՆԻԿՈՂՈՍՅԱՆ