Ո Ր Ո Շ ՈՒ Մ ԵԱՔԴ/0077/01/17
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ
ՎԱՐՈՒՅԹԸ ԿԱՐՃԵԼՈՒ ՄԱՍԻՆ

Երևան քաղաքի ընդհանուր իրավասության դատարանը հետևյալ կազմով`

Նախագահող դատավոր` Դ. Գրիգորյան
քարտուղարությամբ` Հ.Դաջունցի,
Գ.Վարդանյանի
Մասնակցությամբ
մեղադրող` Գ.Աղաջանյանի
պաշտպաններ` Վ.Մարտիրոսյանի,
Ի.Հակոբյանի
ամբաստանյալ` Ն.Ղարիբյանի


Դռնբաց դատական նիստում, Երևան քաղաքում 2018 թվականի ապրիլի 7-ին քննելով քրեական գործով, ըստ մեղադրանքի Նինել Էդվարդի Ղարիբյանի` ՀՀ քրեական օրենսգրքի 325-րդ հոդվածի 1-ին մասով, ամբաստանյալ Ն.Ղարիբյանի միջնորդությունը` իր նկատմամբ ՀՀ քրեական օրենսգրքի 325-րդ հոդվածի 1-ին մասով վաղեմության ժամկետներն անցնելու հիմքով քրեական հետապնդումը դադարեցնելու և քրեական գործի վարույթը կարճելու վերաբերյալ.
Պ Ա Ր Զ Ե Ց
ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի ավագ քննիչ Տ.Ղազարյանի 2016 թվականի մայիսի 20-ի որոշմամբ ՀՀ քրեական օրենսգրքի 325-րդ հոդվածի 1-ին մասի հատկանիշներով հարուցվել է թիվ 13832416 քրեական գործը:
Նախաքննական մարմնի կողմից ամբաստանյալ Նինել Էդվարդի Ղարիբյանին 2017 մայիսի 22-ին մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով այն բանի համար, որ նա, 2016 թվականի փետրվարի 29-ին, ուղղակի դիտավորությամբ, վարկ ստանալու նպատակով օգտագործել է փաստաթուղթ հանդիսացող, իրավունք վերապահող աշխատանքի վերաբերյալ ակնհայտ կեղծ տեղեկանք:
Այսպես.
2016 թվականի փետրվար ամսին Նինել Ղարիբյանը իր ծանոթ Էդգար Ավագյանից վերցրել է համակարգչային եղանակով պատրաստված, փաստաթուղթ հանդիսացող, իրավունք վերապահող` իր կողմից իբրև <<Նեֆոկսա>> ՍՊ ընկերությունում որպես մենեջեր աշխատելու և ամսեկան 278.000 ՀՀ դրամ աշխատավարձ ստանալու վերաբերյալ աշխատանքի ակնհայտ կեղծ տեղեկանք, որը 2016թ. փետրվարի 29-ին, վարկ ստանալու նպատակով, ուղղակի դիտավորությամբ օգտագործել է` ներկայացրել է <<ՎՏԲ-Հայաստան բանկ>> ՓԲ ընկերության Երևան քաղաքի Բաղրամյան փողոցի 56 հասցեում գործող թիվ 4 մասնաճյուղ, որի հիման վրա իրեն տրամադրվել է հիշյալ աշխատավարձի վեցապատիկի չափով` 1.668.000 ՀՀ դրամ գումար վարկ:
Ամբաստանյալ Նինել Էդվարդի Ղարիբյանի նկատմամբ 2017 թվականի մայիսի 22-ի որոշմամբ որպես խափանման միջոց է կիրառվել չհեռանալու մասին ստորագրությունը:
2017 թվականի մայիսի 26-ին ամբաստանյալ Նինել Էդվարդի Ղարիբյանի վերաբերյալ քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է թիվ ԵԱՔԴ/0077/01/17 համարը:
2018 թվականի ապրիլի 7-ի դատական նիստի ընթացքում ամբաստանյալ Նինել Էդվարդի Ղարիբյանը խնդրել է իր նկատմամբ ՀՀ քրեական օրենսգրքի 325-րդ հոդվածի 1-ին մասով քրեական հետապնդումը դադարեցնել և քրեական գործի վարույթը կարճել՝ վաղեմության ժամկետներն անցնելու հիմքով:
Պաշտպաններ Վ.Մարտիրոսյանը և Ի.Հակոբյանը միացան միջնորդությանը:
Մեղադրող Գ.Աղաջանյանը չառարկեց ամբաստանյալ Նինել Էդվարդի Ղարիբյանի նկատմամբ քրեական պատասխանատվության ենթարկելու վաղեմության ժամկետներն անցնելու հիմքով ՀՀ քրեական օրենսգրքի 325-րդ հոդվածի 1-ին մասով քրեական հետապնդումը դադարեցնելուն և քրեական գործի վարույթը կարճելուն:
ՀՀ քրեական օրենսգրքի 19-րդ հոդվածի 2-րդ մասի համաձայն ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ, ինչպես նաև անզգուշությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երեք տարի ժամկետով ազատազրկումը:(…)։
ՀՀ քրեական օրենսգրքի 75-րդ հոդվածի համաձայն`
1. Անձն ազատվում է քրեական պատասխանատվությունից, եթե հանցանքն ավարտված համարելու օրվանից անցել են հետևյալ ժամկետները.
1. երկու տարի` ոչ մեծ ծանրության հանցանքն ավարտված համարվելու օրվանից:
(…)
(…)։
2. Վաղեմության ժամկետը հաշվարկվում է հանցանքն ավարտված համարելու օրվանից մինչև դատավճռի օրինական ուժի մեջ մտնելու պահը։ Տևող հանցագործության դեպքում վաղեմության ժամկետը հաշվարկվում է արարքը դադարելու, իսկ շարունակվող հանցագործության դեպքում` վերջին արարքը կատարելու պահից։
3. Վաղեմության ժամկետի ընթացքն ընդհատվում է, եթե մինչև նշված ժամկետներն անցնելն անձը կատարում է միջին ծանրության, ծանր կամ առանձնապես ծանր նոր հանցանք։ Այս դեպքում վաղեմության ժամկետի հաշվարկը սկսվում է նոր հանցանքի ավարտված համարելու պահից։
ՀՀ քրեական օրենսգրքի 75 հոդվածի 4-րդ մասի համաձայն վաղեմության ընթացքը կասեցվում է, եթե անձը խուսափում է քննությունից կամ դատից: Այս դեպքում վաղեմության ընթացքը վերսկսվում է անձին ձերբակալելու կամ մեղայականով նրա ներկայանալու պահից:
Վճռաբեկ դատարանը Անահիտ Հայկի Սաղաթելյանի գործով (տե՛ս Վճռաբեկ դատարանի 2011 թվականի հոկտեմբերի 20-ի թիվ ԳԴ5/0022/01/10 որոշման 24-րդ կետը) որոշման մեջ իրավական դիրքորոշում է ձևավորել այն մասին, որ «(…) քրեական օրենսդրությամբ, կապված արարքի բնույթից և հանրության համար վտանգավորության աստիճանից, նախատեսված են քրեական պատասխանատվության ենթարկելու տարբեր ժամկետներ, որոնց անցնելու դեպքում կատարված արարքը կորցնում է իր վտանգավորությունը, և անձն ազատվում է քրեական պատասխանատվությունից։
Վճռաբեկ դատարանը Սիրաժ Ղամբարյանի և մյուսների գործով (տե՛ս Վճռաբեկ դատարանի 2014 թվականի մարտի 28-ի թիվ ԵՇԴ/0055/01/11 որոշման 21-րդ կետը) որոշման մեջ իրավական դիրքորոշում է ձևավորել այն մասին, որ հանցագործության ավարտման պահը, պայմանավորված հանցագործության բնույթով (տևող կամ շարունակվող), որոշվում է տարբեր կերպ։ Մասնավորապես, տևող հանցագործությունները դրսևորվում են հանրորեն վտանգավոր գործողության կամ անգործության` տևական ժամանակահատվածում անընդմեջ իրականացմամբ, զուգորդվում են օրենքով հանցավորի վրա դրված պարտականությունների տևականորեն չկատարմամբ և ավարտված են համարվում արարքի դադարման պահից, որը կարող է պայմանավորված լինել ինչպես հանցավորի գործողություններով (օրինակ` մեղայականով ներկայանալով), այնպես էլ նրանից անկախ հանգամանքներով (օրինակ` իրավապահ մարմինների միջամտությամբ և այլն)։
Անձին քրեական պատասխանատվության ենթարկելու վաղեմության ժամկետի ընթացքն ընդհատվում է, եթե մինչև նշված ժամկետներն անցնելն անձը կատարում է միջին ծանրության, ծանր կամ առանձնապես ծանր նոր հանցանք։ Այս դեպքում վաղեմության ժամկետի հաշվարկն սկսվում է նոր հանցանքի ավարտված համարելու պահից (ՀՀ քրեական օրենսգրքի 75-րդ հոդվածի 3-րդ մաս)։
Այսպես` նոր կատարված հանցագործությունն ընդհատում է նախկին հանցագործության վաղեմության ժամկետի ընթացքը հետևյալ պայմանների առկայության դեպքում`
1.նախկին հանցագործությունն ավարտվել է և օրենքով դրա համար սահմանված վաղեմության ժամկետը դեռևս չի անցել,
2.նոր կատարվածը միջին ծանրության, ծանր կամ առանձնապես ծանր հանցագործություն է։
Վաղեմության ժամկետի ընդհատվելու դեպքում նախորդ հանցանքի համար ընթացող ժամկետը չեղյալ է համարվում, և հաշվարկը վերսկսվում է նոր հանցագործության ավարտման պահից։ Այլ կերպ ասած` նոր հանցանքի կատարմամբ նախկին հանցագործության համար նախատեսված վաղեմության ժամկետը չի վերանում, իսկ ինչպես նոր հանցանքի, այնպես էլ նախկին հանցանքի համար օրենքով սահմանված վաղեմության ժամկետները սկսվում են հաշվարկվել նոր հանցանքի ավարտման պահից` յուրաքանչյուր հանցագործության համար ինքնուրույն։
Դատարանը փաստում է, որ ՀՀ քրեական օրենսգրքի 325-րդ հոդվածի 1-ին մասով կատարված հանցանքն ավարտվել է 2016 թվականի փետրվարի 29-ին, որից հետո, համաձայն ՀՀ ոստիկանության ինֆորմացիոն կենտրոնի ձև 8 տեղեկանքի, ամբաստանյալ Նինել Էդվարդի Ղարիբյանի կողմից միջին ծանրության, ծանր կամ առանձնապես ծանր հանցագործություններ չեն կատարվել:
Նկատի ունենալով, որ ՀՀ քրեական օրենսգրքի 75-րդ հոդվածի 2-րդ մասի համաձայն վաղեմության ժամկետը հաշվարկվում է հանցանքն ավարտված համարելու օրվանից մինչև դատավճռի օրինական ուժի մեջ մտնելու պահը, իսկ մեղսագրվող հանցագործության համար Նինել Էդվարդի Ղարիբյանի վերաբերյալ դեռևս դատավճիռ չի կայացվել, ինչպես նաև, որ նա չի առարկել, որպեսզի վաղեմության ժամկետներն անցնելու հիմքով իր նկատմամբ ՀՀ քրեական օրենսգրքի 325-րդ հոդվածի 1-ին մասով քրեական հետապնդումը դադարեցվի և քրեական գործի վարույթը կարճվի, դատարանը գտնում է, որ Նինել Էդվարդի Ղարիբյանի նկատմամբ ՀՀ քրեական օրենսգրքի 325-րդ հոդվածի 1-ին մասով քրեական հետապնդումն ենթակա է դադարեցման և քրեական գործի վարույթը կարճման` վաղեմության ժամկետներն անցնելու հիմքով:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 6-րդ կետով, 41-րդ, 313-րդ, 379-րդ հոդվածներով, դատարանը

Ո Ր Ո Շ Ե Ց

Թիվ ԵԱՔԴ/0077/01/17 քրեական գործով ամբաստանյալ Նինել Էդվարդի Ղարիբյանի միջնորդությունը բավարարել և ամբաստանյալ Նինել Էդվարդի Ղարիբյանի նկատմամբ ՀՀ քրեական օրենսգրքի 325-րդ հոդվածի 1-ին մասով քրեական հետապնդումը դադարեցնել և քրեական գործի վարույթը կարճել` վաղեմության ժամկետներն անցնելու հիմքով:
Նինել Էդվարդի Ղարիբյանի նկատմամբ որպես խափանման միջոց կիրառված չհեռանալու մասին ստորագրությունը վերացնել:
Որոշումը կարող է բողոքարկվել ՀՀ քրեական վերաքննիչ դատարան հրապարակման պահից մեկամսյա ժամկետում:


ԴԱՏԱՎՈՐ` Դ. ԳՐԻԳՈՐՅԱՆ